پشتی کومبوونا سەرۆکێ حکومەتا ھەرێما کوردستانێ نێچیرڤان بارزانی ل گەل پارێزگەە و سەرۆکێن جڤاتێن پارێزگەھێن ھەرێمێ کومبووی، چەندین خالێن گرنگ یێن پەیوەنداری ب بودجا ھەرێما کوردستانێ و موچێن فەرمانبەران ھاتنە بەحسکرن.

سەرۆکاتیا حوکمەتا ھەرێما کوردستانێ ل گەل پارێزگار و سەرۆکێن جڤاتێن پارێزگەھا و ئێدارە و دەڤەرێن ھەرێما کوردستانی کومبوون و رۆلێ پارێزگەە و جڤاتێن پارێزگەھان و ئیدارە دبیاڤێ ب رێڤەبرنا کاروبارێن وەلاتیان و رووب رووبوونا کێشە و قەیرانان دا بلندی ھاتە نرخاندن.

دوھی رێککەفتی 5/11/ 2017 ل ھەولێرا پایتەخت، سەرۆکاتیا جڤاتا وەزیرێن ھەرێما کوردستانێ ب ئامادەبوونا وەزیرێن ئالیێن پەیوەندیدار، ل گەل پارێزگەە و سەرۆکێن جڤاتێن پارێزگەھان و ئیدارا دەڤەرێن ھەرێمی یا کوردستانی کومبوون.

دڤێ کومبوونێ دا رۆلێ پارێزگەھا و جڤاتا پارێزگەھان و ئیدارە د بیاڤێ برێڤەبرنا کاروبارێن وەلاتیان و رووب رووبوونا قەیرانان ب بلندێ ھاتنە ھەلسەنگاندن، و داکووکی ل سەر وێ چەندێ ھاتە کرن، کو ئێکرێزی و ھەڤکاریا پارێزگەھان و جڤاتێن پارێزگەھان ل گەل دامۆدەزگەھێن پەیوەندیدارێن حوکمەتێ و وەزارەتان، تاکە رێیە بۆ دەربازکرنا رەوشا ئالۆزا نوکە ھەرێما کوردستانێ تێدا دەرباز دبیت.

د ھەمان کومبوون دا ھاتە دووپاتکرن، سیاسەتا حوکمەتا عێراقی ب روونی یا دیارە کو مەرەم ژێ ھەلوەشاندنا قەوارێ دستوورییێ ھەرێما کوردستانێ یە و نابیت بڕیارێن نەدستووری یێن حوکمەتا عیراقێ کارتێکرنا ل سەر پارێزگەە و جڤاتێن پارێزگەھان بکەت، ھەروەسا دیارکرن، ئەو بڕیار و رەنگە سەرەدەری یا ئەڤرۆیا حوکمەتا عیراقێ ل گەل ھەرێما کوردستانێ دکەت، نابیت ببیتە ئەگەرێ جودابوون و دروستکرنا کێشێن دناڤبەرا پارێزگەھێن ھەرێما کوردستانێ و حوکمەتا ھەرێما کوردستانێ دا.

ھەر دڤێ کومبوونێ رەوشا ئەڤرۆیا مووچەخورێن ھەرێمێ و بزاڤێن حوکمەتا ھەرێما کوردستانێ بۆ دابینکرنا مووچەی و بەھرا دارایی ھاتنە گەنگەشەکرن، داکووکی ل سەر وێ چەندێ ھاتیە کرن، کو حوکمەتا عیراقێ سەبارەت دابینکرنا مووچەێ پارێزگەھان دبێژیت، ب تنێ پڕوپاگندەکا سیاسیە و باشترین بەلگە ژی رەشنڤیسا بۆدجا سالا 2018 یا عیراقێ یە کو پشکا بودجا ھەرێما کوردستانێ تێدا ھاتیە دیارکرن، بتنێ ئەو پشک بەھرا پارێزگەھەکا ھەرێما کوردستانێ ژی ناکەت، بەغدا ب ڤێ سیاسەتێ دڤێت دووبەرەکیێ دناڤبەرا پارێزگەە و حوکمەتا ھەرێما کوردستانێ دا دروست بکەت.

ئەڤرۆ نیۆز، رێوار مزیری:
د بەرسڤا دەستپێشخەریا حەیدەر عەبادی دا بۆ ھنارتنا مووچێ فەرمانبەرێن ھەرێما کوردستانێ، جڤاتا پارێزگەھێن ھەرێما کوردستانێ د راگەھاندنەکا ھەڤپشک دا داخواز دکەن بەغدا ل سەر بنەمایێ سیستەمێ بایۆمەتری پارەی بۆ ھەرێما کوردستانێ ب ھنێریت.

پارێزگار و جڤاتا پارێزگەھێن ھەرێما کوردستانێ و یەکێن ئیداری یێن گەرمیان و راپەرین ئەڤرۆ رۆژا 5ى چريا دويێ 2017 ل گەل حوکمەتا ھەرێما کوردستانێ کۆمبوون و راگەھەندنەکا شەش خالی بۆ بەرسڤدانا حەیدەر عەبادی ل دۆر دەستپێشخەریا وی بۆ ھنارتنا مووچێ فەرمانبەرێن ھەرێما کوردستانێ بەلاڤکر.

د راگەھاندنێ دا ھاتیە کو پێشۆازیێ ل دەستپێشخەریا حەیدەر عەبادی، سەرۆک وەزیرێن عیراقێ دکەین بۆ پێدانا مووچێ فەرمانبەرێن ھەرێما کوردستانێ، بەلێ ل دووڤ داتا پێزانینێن سیستەمێ بایۆمەتری، د ھەمان دەم دا ھەلەبجە وەکو پارێزگەھەکا ھەرێما کوردستانێ د قانوونا بۆدجا عیراقێ دا ئاماژە پێ بھێتەکرن، بۆ چارەسەریا ئالۆزیێن دناڤبەرا ھەر دو حوکمەتا فیدرال و حوکمەتا ھەرێما کوردستانێ دا دووپاتیێ ل سەر دیالۆک و دانوستاندنێ ل سەر بنەمایێ دەستووری دکەین و داخوازا وێ چەندێ ژی دکەین حوکمەتا ھەرێما کوردستانێ ل سەر دابینکرنا مووچێ فەرمانبەران یا بەردەوام بیت، ھەروەسا بۆ دەربازبوونێ ژ ڤێ قەیرانا دژوار داخوازێ ژ حوکمەتا فیدرال دکەین پشتەڤانیا ھەرێما کوردستانێ و دامودەزگەھێن وێ بکەت.

د ھەمان راگەھاندن دا ھاتیە جڤاتا پارێزگەھێن ھەرێمێ و یەکێن ئیداری داخوازێ ژ ل وەلاتێن دۆست و نەتەوەیێن ئێکگرتی دکەن د ھاریکاربن بۆ چارەسەرکرنا ئالۆزیێن د ناڤبەرا ھەولێر و بەغدا دا ل سەر بنەمایێ دەستوورێ عیراقێ.