ئه‌ڤرۆنيۆز، عه‌زيز هه‌ورامى

بيڤه‌له‌رزه‌كێ ئه‌ڤرۆ سپێدێ پێنج جاران ل سه‌ر ئێك ل ده‌ڤه‌را به‌مۆ يا ب سه‌ر پارێزگه‌ها هه‌له‌بجه‌ ڤه‌ دا ودئه‌نجامدا پشكه‌ك ژچياى ئينا خار ورێيا هاتنوچوونێ راوه‌ستاند.

عادل مه‌لا سالح بۆ ئه‌ڤرۆنيۆز گۆت( ئه‌ڤرۆ ل ده‌مژمێر دويێ سپێدێ شه‌ش جاران بيڤه‌له‌رزێ ناحيا به‌مۆ يا سه‌ ر ب پارێزگه‌ها هه‌له‌بجه‌ ڤه‌ هه‌ژاند وپشكه‌ك ژ چيايێ هنداڤى سه‌نته‌رێ ناحيێ روخاند ورێيا هاتنوچوونێ راوه‌ستاند).

رێڤه‌به‌رێ ناحيا به‌مۆ دبێژيت( سه‌ره‌راى گرتنا رێيا ناحيێ، ترس ژى ل سه‌ر گيانێ شۆفێرێن هاتنوچوونێ ل وێ رێ دكه‌ن يا هه‌ى).

ئه‌ڤرۆنيۆز:

وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، پرۆژێ ب نيڤده‌وله‌تيكرنا زانكۆيان ب گۆژمێ مليۆن يورۆيان كه‌فته‌ دوارێ بجهئينانێ دا.

ل دووڤ راگه‌هاندنه‌كا وه‌زاره‌تا خواندنا بلند ل هه‌ريمێ، ل رۆژێن 8 هه‌تا 11 ڤێ مه‌هێ، شانده‌كێ بلندێ وه‌زاره‌تا ناڤبرى ل باژێرێ (گوتينگن) يێ ئه‌لمانى پشكدارى دكۆمبوونا ئێكێ يا پرۆژێ (TIGRIS) كو ب هه‌ڤكاريا پرۆگرامێ (+Erasmus) يێ ئێكه‌تيا ئورۆپى وزانكۆيا (Gottingen) يا ئه‌لمانى وچارزانكۆيێن دى يێن ئورۆپى وه‌كو پارتنه‌رى كه‌فتنه‌ دوارێ بجهئينانێ دا.

دوى پرۆژه‌ى دا، وه‌زاره‌تا خواندنا بلند وده‌سته‌يا كوردستانى بۆ ڤه‌كۆلينێن ستراتيژى وزانستى وزانكۆيێن ( سه‌لاحه‌ددين، سلێمانى، چه‌رموو، راپه‌رين،هه‌له‌بجه‌،زانكۆيێن پۆليته‌كنيك ل هه‌ولێرێ وسلێمانيێ ودهۆكێ) د پشكدارن، كو پرۆژێ ناڤبرى دێ يێ تايبه‌ت بيت ب دروستكرن وب هێزكرنا شيانێن مامۆستايان وب نيڤده‌وله‌تيكرنا زانكۆيێن كوردستانێ.

وه‌زاره‌تا خواندنا بلند دوێ راگه‌هاندنا خوه‌دا خوياكر، بجهئينانا وى پرۆژه‌ى دێ ده‌رگه‌هه‌كێ دى ل به‌رده‌م زانكۆيێن كوردستانێ ڤه‌كه‌ت بۆ بلندكرنا شيانێن زانستى يێن مامۆستايان وئاشنابوون ب پێشكه‌فتنا جيهانێ، زێده‌بارى بده‌ستڤه‌ئينانا ده‌ليڤا خواندنا بلند (ماسته‌ر ودكتۆرايێ) بۆ قوتابيێن كورد ل زانكۆيێن ئه‌لمانيا وچيك.

ئەڤرۆ نیۆز، رەمەزان ھەرنی :

رێڤەبەرێ ئاسایشا خورماتوو خویاکر كو پشتی 16ى چريا ئێكێ ھەموو مالێن کوردا ل قەزا خورماتوو ئاوارە بووینە و د رەوشەکا گەلەک خراب دا دژین، هه‌كه‌ نوکە باژێرێن وان بھێنە ئازاد کرن ژی نەشێن ڤەگەرنەڤە سەر مال و حالێن خوە ژ بەر کو مالا چو کوردەکى نەمایە دەستکاری نەکربیت، “ئەو باژێر ھاتیە وێرانکرن”.

عەقید کاوە مەلا پەروێز رێڤەبەرێ ئاسایشا خورماتوو بۆ ئەڤرۆ نیۆز گۆت: “ب شەڤ و رۆژ پەیقاندن و تالانکرنا مالێن کوردا ل ناڤ خورماتوو و دەوروبەرا يا بەردەوامە، چو تشت بۆ کەسێ نە ھێلایە”.

زێده‌تر گۆت: “حەشدا شەعبی و سۆپایێ عیراقێ كولان كولان دگەريێن و مالێن کوردان دکەنە ئامانج، چەکدارێن نوکە ل ناڤ خورماتوو دڤێت خورماتوو بکەنە باژێرەکێ شیعەیان ببیتە مولکێ وان، لەورا ڤان تاوانان ئەنجام ددەن دا کو خەلک نەڤەگەرن، گەھشتیە وی رادەی دەستدرێژی کریە سەر ژنێن ل دەڤەرێ”.

رێڤەبەرێ ئاسایشا خورماتوو خۆياكر كو نوکە رەوشا دەڤەرێ گەلەک یا ئالوزە ھەتا ھێزەکا نێڤدەولەتی سەرەپەرشتیا وێ دەڤەرێ نەکەت و ژ دەستێ حەشدا شەعبی و سۆپایێ عیراقێ نه‌ئينيته‌ ده‌ر، دێ رۆژ بۆ رۆژێ خرابتر بیت، کەس نەشێت ڤەگەرێتە سەر مال و حالێن خوە.

عه‌قيد كاوه‌ ئاشكه‌را ژى كر كو باشترین دەلیڤەیە ھێزەکا ھەڤپشکا نێدڤدەولەتی بھێتە دەڤەرێ بۆ دوورکرنا حەشدا شەعبی و سۆپایێ عیراقێ، “نوکە پشكه‌كا تورکمانان ژی بووینە ئەگەرێ پەیداکرنا نەخوشیێ و نەئارامیێ ل وێ دەڤەرێ”.

ب باشى ژى زانى كو د ڤى ده‌مى دا ل UN و جڤاکا ئاسایشا نێڤدەولەتی سكالا ل دژی ڤان چەکداران بهێنه‌ تۆمارکرن کو دوور ژ بنەمایێن شەری و ب سیاسی و ب کەرب یێ ھەموو جورێن خرابیێ و بن پێکرنا مافێن مرۆڤان دکەن.

رێڤه‌به‌را ئاسايشا خورماتوو ل دووماهيێ ژى گۆت: “هه‌كه‌ رێگری ل ڤان چه‌كداران نەھێتە کرن، چو قەزا و ناحیەک ل کەرکووک نامینن نه‌بنه‌ شیعە”.

ئەڤرۆ نيوز:
پشتی روودانا ئەردھەژێ ل ب تایبەت کرمانشان یا رۆژھەلاتێ کوردستانێ و ژمارەکا زۆر یا وەلاتیان بوونە قوربانی، دەزگەھێ خێرخوازی یێ بارزانی ژی ئامادەیا خوە بۆ ھاریکاریکرنا لێقەومیێن وێ دەڤەرێ دەربری و دا زانین کو د ئامادەنە ھاریکاریا بگەھیننە کرمانشان.
د ڤێ دەربارێ دا، ئیبراھیم سەمین ئەندامێ دەستەیا کارگێری یا دەزگەھێ خێرخوازی یێ بارزانی د داخۆیانیەکێ دا راگەھاند کو پشتی روودانا ئەردھەژا باشوور و رۆژھەلاتێ کوردستانێ ئەوان وەکو دەزگەھێ خێرخوازی یێ بارزانی ئامادەیا خوە بۆ گەھاندنا ھاریکاریان بۆ لێقەومیان دەربڕیە.
گۆتژی: بۆ ڤێ مەرەمێ مە ب فەرمی داخوازی پێشکێشی قونسلخانا ئیرانێ ل ھەولێر کریە و تێدا ئامادەکاریا خوە بۆ لێقەومیێن ئەردھەژێ دیارکریە و ئەوان ژی گۆتیە کو دێ داخوازیا مە بلند کەت و پاشان دێ مە ئاگەھدار کەن.
ئەڤ بابەتە د دەمەکی دایە کو پشتی روودانا ئەردھەژێ چەندین وەلاتێن ئورۆپی و نەتەوێن ئێکگرتی ژی ئامادەیا ھنارتنا ھاریکاریان دەربڕیە، بەلێ ئیرانێ ھەموو ئەو داخوازی رەتکرینە و دوھی محەمەد جەواد زەریف وەزیرێ ژ دەرڤە یێ ئیرانێ د داخۆیانیەکێ دا بۆ میدیا ئیرانی راگەھاند کو ئەوان پێدڤی ب ھاریکاریا چو لایەنەکی نینە و ئەو ب خوە دشێن کونترۆلا بابەتی بکەن.
ئەڤ ھەلویستێ ئیرانێ د دەمەکی دایە کو ماوێ دو رۆژا ئەردھەژ روودایە، بەلێ وەکو پێدڤی ھاریکاریا حوکمەتێ بۆ لێقەومیان و خەلکێ زەرەرمەند گەلەک یا کێمە و ھەتا نوکە ب سەدان تەرم د بن دیوار و داران دا ماینە و ب ھزاران خەلک ئاوارە بووینە و جھێن بنەجھبوونێ نینە، ب گۆرەی پێزانینان ل پتریا باژێر و باژێرکێن رۆژھەلاتێ کوردستانێ رێکخراوێن مەدەنی و وەلاتیان ھاریکاری گەھاندینە لێقەومیان، بەلێ حوکمەت رێگریێ لێ دکەت ب بەھانەیا وێ چەندێ کو دڤێت ھاریکاری د رێیا حوکمەتێ دا بن.

ئەڤرۆ نيوز:

ئەندامەکێ جڤاتا پارێزگەھا کەرکووکێ ئاشکراکر کو ژڤانە سوبە رۆژا پێنچ شەمبی رێکەفتی 16ى چريا دويێ2017 ئەنجوومەنێ پارێزگەھا کەرکووکێ ل پەرلەمانێ کوردستانێ کومبوونا خوە یا نەئاسایی ئەنجام بدەت.
محەمەد کەمال ئەندامێ ئەنجوومەنێ جڤاتا پارێزگەھا کەرکووکێ بۆ مالپەرێ دوارۆژ گۆت: سەرۆکاتیا جڤاتا پارێزگەھا کەرکووکێ بریاردایە سوبە رێکەفتی 16ى چريا دويێ2017 ل پەرلەمانێ کوردستانێ کومبوونا خوە یا نەئاسایی ئەنجا بدەت.
ھەڤدەم دلشاد پیرۆت ئەندامێ جڤاتا پارێزگەھا کەرکووکێ ل سەر ھەمان بابەت، بۆ ھەمان مالپەر دیارکریە کو سەرۆکاتیا جڤاتا کەرکووکێ بانگەشەک بۆ ئەندامێن جڤاتێ ژ لیستا برایەتی ھنارتیە ب مەرەما ئەنجامدانا کومبوونا جڤاتێ ل ھەولێرێ ل پەرلەمانێ کوردستانێَ.
ھەمان ئەنداما جڤاتێ د یارکر ژی کو ئەڤ کومبوونە ژڤانە سوبە رۆژا پێنچ شەمبی و دێ یا تایبەت بیت ل سەر رەوشا پارێزگەھا کەرکووک و ئەو کاودانێن نوکە دەڤەر تێدا دبوریت.