فوتو و زانیارى، نه‌وزاد هلۆرى:
گه‌نجه‌كێ ناحیا شێلادزێ بناڤێ ” یوسف ئه‌رتشى” تراكتورا خوه كریه شوفه‌ر و كاروبارێن خوه یێن ئینج و خه‌بات و نافمالێ پێ ب رێڤه دبه‌ت.
یوسف ئه‌رتشى بو ئه‌ڤرۆ نیوز گۆت: ( درۆستكرنا شوفه‌ر لسه‌ر تراكتورێ ژ هزرا منه و چه‌ند رۆژێن بورى من درۆستكریه ، ئه‌ڤ شوفه‌ره دكاریت هه‌تاكو چوار ته‌نێن گرانیا تشتان ب هه‌لگریت و نێزیكێ چوار مه‌تران ژى بلند بیت)
زێده‌تر گۆت: ( به‌رى تراكتورا خوه بكه‌م شوفه‌ر من شوفه‌ره‌كا بچوك هه‌بوو ، به‌لێ گه‌له‌ك ژ كاردكه‌فت و شولێن من پێ نه‌دقه‌تیان ژبه‌رڤى َمن ڤیا شوفه‌رێ لسه‌ر تراكتورا خوه زێده بكه‌م داكو زێده‌تر بكارم كاروبارێن خوه پێ ب رێڤه‌ببه‌م)
ئه‌ڤرۆ نیوز ، نه‌وزاد هلۆرى:
پشتى كو ئه‌ڤرۆ ل هه‌ولێر هه‌موو حزب و لایه‌نێن سیاسیێن ( بێى پشكداریا گۆڕان و كومه‌لێ ) كومبووین ، هه‌ر ئێك ژ ئاخفتنكه‌رێن پارتى دیموكراتى كوردستان و ئێكه‌تیا نیشتمانیا كوردستانێ كونگره‌یه‌كا رۆژنامه‌ڤانى ئه‌نجامدا و دیاركر كو مه‌رجێن عیراقێ ژ بوو گوتوبێژان جهێ قبولكرنێ نینه و شاندنێ كوردستانێ بو به‌غدا ب مه‌ره‌ما دانوستاندنان دێ ل ده‌ما كو به‌غدا ره‌زامه‌ندیێ ده‌ردبریت دێ دیاربن.
مه‌حمود محه‌مه‌د ئاخفتنه‌رێ پارتى دیموكراتى كوردستان ل بارا كومبوونا ئه‌ڤرۆ گۆت: ( ئێكرێزى و ئێگرتنا دناڤبه‌را مه ، هه‌ستا به‌رپرسیاره‌تى و پێدڤى یا ده‌ربازكرنا ره‌وشا نها و گوتوبێژێن دناڤبه‌را هه‌ولێر و به‌غدا بابه‌تێن سه‌ره‌كیێن كومبوونا ئه‌ڤرۆ بوون)
زێده‌تر گۆت: ( بریارا سه‌ركرداتیا سیاسیا كوردستانێ ئه‌وه كو گوتوبێژێن بێ مه‌رج ل گه‌ل به‌غدا بكه‌ن ، ئه‌و كه‌سێن كو دێ بنه ئه‌ندامێن شاندنێ دانوسكار ژى دێ ل وى ده‌مى دیاربن ده‌ما كو به‌غدا به‌رهه‌ڤیا گوتوبێژان بیت و دێ چاڤه‌رێ به‌رسڤا وان بین)
ژلایه‌كێ دنڤه سه‌عدى ئه‌حمه‌د پیره ئاخفتنكه‌رێ ئێكه‌تیا نیشتمانیا كوردستانێ كو ئه‌و ئاخفتنێن كو ژ زارده‌ڤێ سه‌عد حه‌دیسى بناڤێ حكومه‌تا عیراقێ هاتینه گوتن جهێ قبولكرنێ نینه و گۆت: ( به‌غدا و هه‌ولێر به‌رى نها داخوازا گوتوبێژێن بێ مه‌رج كریه و لایه‌نێ، نیڤده‌وله‌تى ژى دوپات ل وێ یه‌كێ كریه كو گوتوبێژێن بێ مه‌رج بهێنه‌كرن)
پیره‌ى به‌حس ل وێ یه‌كى ژى كر كو حزب و لایه‌نێن سیاسیێن كوردستانێ د چارچوڤێ پرۆژه‌یه‌كێ دا بو گه‌هاندنا خه‌لكێ كوردستانێ ب كه‌ناره‌كێ ئارام كاربكه‌ن و گۆت ژى: ( پشتى داوى هاتنا ریفراندۆمێ و هاتنا هێزێن عیراقێ بو ده‌ڤه‌رێ ئاخفتنێن زور درۆست بوینه كو جهێ قبولكرنێ نینه )
ئه‌ڤرۆ نیوز ، هلورى:
ئه‌ڤرۆ ل هه‌ولێر هه‌موو پارت و لایه‌نێن سیاسیێن كوردستانێ كومبوونه‌كا به‌فره‌هـ ئه‌نام دا و ل داویا كومبوونێ راگه‌هاندنه‌ك به‌لاڤكر و تێدا دوپات ل ئێكرێزى و ئێگرتنا كوردستانێ كر و دوپات ژى كر كو ریفراندۆم مافه‌كێ ده‌ستورى و قانونیێ كوردستانێ یه و چو جاران ده‌ستبه‌ردار نابن ، و ئاماژه ب وێ یه‌كێ كر كو هێزێن عیراقى ب ناڤێ ده‌ستوور و قانونێ چه‌ندان بنپێكرن هه‌مبه‌رى گه‌لێ كوردستانێ ئه‌نجامداینه و داوى جار ژى ل كه‌ركوك و ده‌ڤه‌رێن كوردستانیێن ده‌رڤه‌یێ كارگێریا هه‌رێما كوردستانێ.
ئه‌ڤا ل خوارێ ده‌قا راگه‌هاندنا وایه
به‌رى نیڤرویا ئه‌ڤرۆ ئه‌م وه‌كو حزب و لایه‌نێن سیاسیێن كوردستانێ ل بارا بارودوخێ سیاسیێ هه‌رێما كوردستان و داوى وان ئه‌گه‌ر و پێشهاتنێن كو هاتینه د رۆژه‌ڤێ ل هه‌ولێرێ كومبووین ، د كومبوونێ دا ب هویرى بارودوخێ نهایێ هه‌رێما كوردستانێ هاتنه گوتوبێژكرن و شروڤه بو هاته‌كرن ، و هزر و بیر و بوچونێن مه دڤێ قوناغێ دا ل بارا ره‌وشا هه‌رێما كوردستانێ ب ڤى ره‌نگى یه.
– مه هه‌مووان دوپات ل سه‌ر وێ یه‌كێ كر كو ئێكرێزى و ئێكده‌نگى یا هه‌موو هێز و لایه‌نێن سیاسیێن كوردستانێ ، دێ بیته زامنێ سه‌ركه‌فتن و ده‌ربازكرنا هه‌موو ئاریشه‌یان دزانین.
– ب توندى ئیدانا هێرشێن سه‌ربازى و بریارێن سیاسى و ئابوریێن حكومه‌تا عیراقێ دكه‌ین و هاتنا وان ژى ره‌ت دكه‌ین ، كو ده‌رحه‌ق گه‌لێ كوردستانێ و ده‌ڤه‌رێن كوردستانیێن ده‌رڤه‌یێ كارگێریا هه‌رێما كوردستانێ هاتینه ئه‌نجامدان ، ئه‌ڤ هێرش و بریارێن عیراقێ ب نه ده‌ستوورى و نه دیموكراسى و دژى مروڤایه‌تى دزانین و ژلایێ هه‌موو گه‌لێ كوردستانێ هاتیه ره‌تكرن و ئه‌ڤ كارێن سه‌ربازیێن عیراقێ ژى نابنه ئه‌مرێ واقعى.
– بو به‌رسڤدانا داخوازێن جڤاكێ نیڤده‌وله‌تى و دوستێن مه ل بارا چاره‌سه‌ركرنا ئاریشه‌یێن ل گه‌ل حكومه‌تا عیراقێ ب رێیا دانوستاندنان ، ئه‌م هه‌موو ده‌مان خوازیارێن گوتوبێژان بوین ، به‌لێ عیراقێ مه‌نتقا سه‌ربازى هه‌لبژارد ، ل ڤێره بو هه‌موو لایه‌كێ رادگه‌هینین كو به‌رهه‌ڤیین بو گوتوبێژێن بێ مه‌رج لسه‌ر بنه‌مایێ ده‌ستوور و دویر ل هه‌موو فه‌رزكرنێن سیاسه‌تا ئه‌مرێ واقع و هێرش و غرورا سه‌ربازى ، پێدڤى یه عیراق لسه‌ر بنه‌مایێن داننان ب مافێن گه‌لێ كوردستانێ بهێته سه‌ر مێزا گوتوبێژان ، بو ڤى بابه‌تى ژى حكومه‌تا هه‌رێما كوردستانێ نونه‌راتیا گه‌لێ كوردستانێ دكه‌ت.
– ئه‌م وه‌كو هه‌موو لایه‌نێن سیاسى ب توندى هه‌ر پێنگاڤ و ئاراسته‌یه‌كێ ب مه‌ره‌ما ساخكرنا دوو ئیداره‌یێ ره‌ت دكه‌ین ، پێدڤى یه هه‌رێما كوردستانێ ب ئێكگرتى بچیته ناڤ گوتوبێژه‌كێ ل گه‌ل حكومه‌تا عیراقێ.
– ریفراندوما گه‌لێ كوردستانێ مافه‌كێ ده‌ستوورى و قانونى یا گه‌لێ كوردستانێ یه و ده‌ستبه‌ردار نابین و پێدڤى یه عیراق و جڤاكێ نیڤده‌وله‌تى لسه‌ر ئه‌وان مافێن گه‌لێ كوردستانێ نه‌هێته سزادان.
ل ڤێره داخوازێ ل هه‌موو ده‌زگه‌هێن راگه‌هاندنێن حزب و سه‌ربخوه‌ى یا دكه‌ین خوه دویر بگرن ل زمانێن توندو روژاندنا هه‌ستێن خه‌لكى ، و پێدڤى یه ب ئه‌مانه‌ت ڤه نوچه و روویدانان ڤه‌گوهێزن ، پارێزگاریێ ل ئێكرێزى و ئاشته‌وایى یا جڤاكى بكه‌ن.
– ل داویێ سلاڤ بو گیانێ پاكێ هه‌موو شه‌هیدێن كوردستانێ ب گشتى و قوربانیێن كه‌ركوك و دوزخورماتو و خانه‌قین ب تایبه‌تى دهنێرین ، به‌رخودانا پێشمه‌رگه‌یێن قاره‌مانێن كوردستانێ ژى بلند د نرخینین و سلاڤ و رێز بو هه‌مووان هه‌نه ، و سلاڤ و رێز و ڤیان بو هه‌موو خوشك و برایێن خوه د هنێرین كو ب زورى ژلایێ هێزێن عیراقێ هاتینه ده‌ر ب ده‌ركرن.
– سه‌ركه‌فتن بو ئیراده‌یا هه‌حخوازێن گه‌لێ كوردستانێ
پارت و لایەنێن سیاسی
１- پارتى دیموکراتى کوردستان
２- ئێكه‌تیا نیششتمانیا کوردستانێ
３- حزبى شیوعى یا کوردستانێ
４- ئێكه‌تیا نەتەوەیى یا دیموکراتیا کوردستانێ YNDK
５- حزبا زەحمەتکێشێن کوردستانێ
６- حزبا سۆسیالیستا دیموکراتى یا کوردستانێ
７- پارتا کرێکار و رەنجدەرێن کوردستانێ
８- ته‌ڤگه‌را دیموکراتى یا گەلێ کوردستانێ
９- ئێكگرتوویا ئیسلامى یا کوردستانێ
１０- پارتا پارێزگارێن کوردستانێ
１１- حزبا پێشکەوقتنخوازى یا دیموکراتیا کوردستانێ
１２- ته‌ڤگه‌را رزگارى یا دیموکراتیا کوردستانێ
１３- ته‌ڤگه‌را ئاشتیخوازێن کوردستانێ
１４- پارتا پارێزگارێن دیموکراتیا کوردستانێ
１５- پارتا نەتەوەیى یا کوردستانێ
１６- ته‌ڤگه‌را خرڤه‌بوونا سریانى
１７- حزبا دیموکراتا بێت و نەهرێن
１８- ئێكه‌تیا بێت نەهرێن یا نیشتمانى
１９- حزبا دیموکراتا کلدانى
２０- ئەنجوومەنا نەتەوەیى یا کلدانى
２１- رابتەیا کلدانى یا جیهانى
２２- حزبا نیشتمانیا ئاشوورى
２３- ته‌ڤگه‌را مەسیحى دیموکراتىیا سەربخۆه
２４- پارتا گەشەپێدانا تورکمانى
２５- پارتا دیموکراتى یا تورکمان ل کوردستانێ
２６- کۆمەڵا لیبرالى یا تورکمانى
２７- کۆمەڵا رۆشنبیرى یا تورکمانى ل کوردستانێ
２８- پارتا نیشتمانیا تورکمانى
２９- یانەیا ئۆچاغى یا تورکمانى
３０- ته‌ڤگه‌را دیموکراتیا تورکمانى
３１- پارتا چاکسازى یا تورکمانى
３２- بەرەیێ شەرعى یا تورکمانى
ئه‌ڤرۆ نیوز ، نه‌وزاد هلۆرى:
وه‌زاره‌تا پێشمه‌رگه‌ى یا سه‌ر ب حكومه‌تا هه‌رێما كوردستانێ راگه‌هاندنه‌ك به‌لاڤكر و ل گوره‌ى راگه‌هاندنا وان ئه‌و ئاگه‌هدارن ژ وێ خه‌مخورى و گه‌رما و گه‌رما وه‌لاتیان بو پشكداربوون د ناڤ رێزێن پێشمه‌رگه‌ى ب خوبه‌خش و دخوازن كو ب به‌رنامه‌یه‌كێ دارشتى خوبه‌خش بهێنه وه‌رگرتن.
ل گوره‌ى راگه‌هاندنا وه‌زاره‌تا پێشمه‌رگه‌ى ، ئه‌و دزانن كو سه‌رجه‌م كورێن گه‌لێ كوردستانێ هه‌رده‌م ب گه‌رما و گه‌رم بو پشته‌ڤانى و هه‌ڤكاریا پێشمه‌رگه‌ى و به‌ره‌ڤانیكرن ل خاك و نیشتمان رێژه‌یه‌كا هه‌ره زور یاخوبه‌خشان ژى جهێ شانازى و جهێ رێز و پێزانیایه ،به‌لێ ئاگه‌هداریا هه‌موو خوبه‌خشان دكه‌ین بو باشتر رێكخستن و رێگرتن ژ دیاردا نه‌ریتان بو به‌رژه‌وه‌ندیا گشتى و پاراستنا گیانێ خوبه‌خشان ب پێدڤى دزانین ب به‌رنامه‌یه‌كێ دارشتى و گونجاى رول و ئه‌ركێن خوبه‌خشان ئه‌نجام بده‌ن.
د راگه‌هاندنا وه‌زاره‌تا پێشمه‌رگه‌ى زێده‌تر هاتیه: ( داخوازێ ل هه‌موو خوبه‌خشان دكه‌ین خوه ل باره‌گایێ فه‌رمانده‌یا كه‌ركوك ل قوشته‌په یا سه ب ئێكه‌یا 80ێ ناڤ نڤیسان بكه‌ن و رێنمایێن پێدڤى وه‌ربگرن ، داخوازێ ل هه‌موان ژى دكه‌ین كو لده‌ما درۆستبوونا شه‌ر و ئالوزیان ژى نه‌چنه جهێ شه‌رى و ل گه‌ل هێزێن پێشمه‌رگه‌ى تێكه‌ل نه‌بن)
ئه‌ڤرۆ نیوز ، نه‌وزاد هلورى:
سه‌رجه‌م چین و ته‌خێن جڤاكى یێن قه‌زا زاخو ده‌ست ب خرڤه‌بونه‌كا نه‌رازیبونێ كر دژى هاتنا هێزێن حه‌شد شه‌عبى بو ناڤا كه‌ركوك و ده‌ڤه‌رێن كوردستانیێن ده‌رڤه‌یا كارگێریا هه‌رێما كوردستانێ.
دڤى واریدا چالاكڤان ” نه‌وزاد سیتو” كو ئێكه ژ خرڤه‌بوویان بو ئه‌ڤرۆ نیوز گۆت: ( ئه‌م وه‌كو ته‌خ و چینێن جڤاكى یێن قه‌زا زاخو هه‌مبه‌رى ده‌ستدرێژیێن حه‌شد شه‌عبى هه‌مبه‌رى ئاخ و گه‌لێ كوردستانێ و هاتنا وان بو كه‌ركوك و ده‌ڤه‌رێن كوردستانیێن ده‌رڤه‌یێ كارگێریا هه‌رێما كوردستانێ خرڤه‌بوونه‌كا نه‌رازیبوونێ ل پاركا شه‌هیدان ئه‌نجام دا و تێدا ب بلندكرنا چه‌ندین درۆشمان خواست كو ب زوترین ده‌م هێزێن حه‌شد ل وان ده‌ڤه‌ران ده‌ركه‌ڤن و ل شوونا وان پێشمه‌رگه دووباره جێگر ببن ڤه ژبه‌ركو ئه‌ڤ ده‌ڤه‌ر كوردستانن و گه‌لێ كوردستانێ هزاران شه‌هید لسه‌ر داینه و خه‌بات بو پاراستنا وێ كریه)
زێده‌تر گۆت: (پێدڤى یه عیراق رێزێ ل سه‌روه‌ریا هه‌رێما كوردستان و ئاخا وێ بگریت ، و دیسان ژى دڤێت وه‌لاتێن جیهانێ و رێكخراوێن جڤاكێ سڤێل و مافێ مروڤى ل نافخوه و جیهانێ بهێنه سه‌رخه‌ت و گڤاشتنان ل عیراقێ بكه‌ن كو پاشڤه بزڤریت ، دیسان ژى داوازێ ل وه‌لاتێن زل هێز ژى دكه‌ین كو رێگریێ ل ده‌ستدرێژیێن عیراقێ بكه‌ت )
ئەڤرۆ نيوز:
بڕیارە ل ڤان نێزیکان حوکمەتا ھەرێما کوردستانێ چارەکێ بۆ دابینکرنا گازا سپی ببینیت یان بودجەکا تایبەت بدەتە پارێزگەھێن ھەرێما کوردستانێ کو ئەو چارەکێ بۆ وەلاتیێن خوە ببینن و بەرپرسەکێ وەزارەتێ ژی دبێژیت: جڤاتا وەزیران ل سەر پرسا دابینکرنا گازا سپی دێ کۆم بیت و بڕیارەکێ ل دۆر دەت.
مستەفا تاھا جەبار، رێڤەبەرێ بەلاڤکرنا سووتەمەنیێ ل ھەولێرێ دیار کر کو مەسەلا گازا سپی یا دایە پارێزگەھان و دھێتە چاڤەرێکرن کو بودجەکا تایبەت بۆ پارێزگەھان بھێتە دابینکرن، دیسا بزاڤێن وان ل گەل وەزارەتا سامانێن سروشتی و پارێزگەھان دبەردەوامن، وەزارەت ژی ل گەل جڤاتا وەزیران یا ل سەر ھێل بۆ دیتنا چارەکێ و بۆ باس گۆت: “نوکە چەند ئەگەرەکێن ھەین بۆ دابینکرنا بەرمیلەکا گازێ بۆ ھەر خێزانەکێ، ئەو ژی یان دێ گازێ دەن یان بودجەکا تایبەت بۆ تەرخان کەن”.
مستەفا تاھا خویا ژی کر، ئاریشا وان نەبوونا پترۆلا خام نینە، بەلکو ئاریشا وان نەبوونا پارزینگەھانە بۆ پارزنینا پترۆلێ و گۆت: “ئەو پترۆلا دھێتە ھنارتن بۆ پارزنینێ نینە، بەلکو بۆ فرۆتنێ یە، داکو بۆ ھەرێمێ ببیتە داھات، دیسا نوکە ل ھەرێما کوردستانێ دو پارزینگەھێن ھەین، پارزینگەھا کەلەک و یا بازیان، ل پارزینگەھا کەلەک پتر پانزین و گازوایل دھێتە پارزنین و ل یا بازیان ژی پتر گاز دھێتە پارزنین”.
رێڤەبەرێ بەلاڤکرنا سووتەمەنیێ ل ھەولێرێ دیار ژی کر، رەنگە د ڤان رۆژێن بھێن دا جڤاتا وەزیران ل سەر پرسا دابینکرنا گازا سپی کۆم ببیت و بڕیارەکێ ل دۆر بدەت و بودجەکێ بۆ دابین بکەت.
وی بەرپرسێ وەزارەتا سامانێن سروشتی ئاماژە ب وێ چەندێ ژی کر کو ئەو پێشبینی دکەن کو پشتی حوکمەتا ھەرێما کوردستانێ رێکارێن دانا بەرمیلەکا گازێ بۆ ھەر خێزانەکێ بەلاڤ دکەت، بھایێ گازێ ئەرزان ببیت و گۆت: “خودێ حەز بکەت دێ گاز ل سەر وەلاتیان ھێتە بەلاڤکرن و بھایێ یا بازاری ژی دێ ئەرزان بیت”.
ئەڤرۆ نيوز:
شرۆڤەکارەکێ کاروبارێن رۆسیا دیارکر، سەرۆک وەزیرێن ئیسرائیلێ ب سەرۆکی رۆسیا گۆتیە ئەو دێ ھەرێما کوردستانێ ژ میلیشیایێن ئیرانێ پارێزیت و ئەگەر پێدڤی بکەت دێ ئەسمانێ سووریێ بۆ وێ مەرەمێ بکارئینیت.
ماکسیم سوچکۆڤ، سەرنڤێسەرێ دوسەیا رۆسیا ل مالپەرێ ناڤدار ئەلمۆنیتەر، د چەند تویتان دا بەحسا ھندێ کر کو ئسرائیل بۆ پشتەڤانیا ھەرێما کوردستانێ، دگەل رۆسیا دەست ب لڤینان کریە و د پەیوەندییا تێلەفۆنی یا بەری سێ رۆژان دا د ناڤبەرا نەتەنیاھۆ و پۆتینی دا، سەرۆک وەزیرێن ئسرائیلێ دیارکریە کو دێ ھەرێما کوردستانێ ژ ھێرشێن میلیشیایێن ئیرانێ پارێزیت.
ب گۆتنا سۆچکۆڤی، بنیامین نەتەنیاھۆی گوتیە پۆتینی کو دێ ئەسمانێ سووریێ ب کارئینیت ژ بۆ ھنارتنا فرۆکەیێن سەربازی.
ب بۆچوونا سەرنڤێسەرێ دوسەیا رۆسیا ل مالپەرێ ئەلمۆنیتەر، بەغدا ب پەیوەندیێن رۆسیا و کوردستانێ رازی نینە، لەورا بریارە ل حەفتیا بھێت ئیبراھیم جەعفەری وەزیرێ دەرڤە یێ ئیراقێ بچیتە مۆسکۆ و ل سەر وێ پرسێ گۆتۆبێژان بکەت.
ئەڤرۆ نیۆز،زنار تۆڤی:
شرۆڤه‌كاره‌كێ كاروبارێن رووسیا دیارکریە:کو سه‌رۆك وه‌زیرێن ئیسرائیلێ بنیامین نەتەنیاهۆ گوتیە سه‌رۆكێ رۆسیا،دێ هه‌رێما كوردستانێ ژ میلیشیایێن ئیرانێ پارێزیت و هەکە پێدڤی بكه‌ت دێ ئه‌سمانێ سووریێ بۆ وێ مه‌ره‌مێ بكارئینیت.
ماكسی سوجكۆڤ، سه‌رنڤێسه‌رێ دوسه‌یا رووسیا ل مالپه‌رێ ناڤدار ئه‌لمۆنیته‌ر، د چه‌ند تویتان دا به‌حسێ هندێ كریە، كو ئسرائیل بۆ پشته‌ڤانیا هه‌رێما كوردستانێ،ل گه‌ل رووسیا ده‌ست ب لڤینان كریه و د په‌یوه‌ندییا تێله‌فۆنی یا به‌ری سێ رۆژان دا د ناڤبه‌را نه‌ته‌نیاهۆ و پۆتینی دا، سه‌رۆك وه‌زیرێن ئسرائیلێ دیاركریه كو دێ هه‌رێما كوردستانێ ژ هێرشێن میلیشیایێن ئیرانێ پارێزیت.
ب گۆتنا سۆجكۆڤی،بنیامین نه‌ته‌نیاهۆی گوتیە پۆتینی، كو دێ ئه‌سمانێ سووریێ ب كارئینیت ژ بۆ هنارتنا فرۆكه‌یێن سه‌ربازی.
ئه‌وی شرۆڤه‌كاری دایه زانین ژی:رووسیا ل وێ باوه‌ریێ یه،کو مایتێكرنا ئسرائیلێ د كێشه‌یێن ناڤبه‌را هه‌ولێر و به‌غدا دا كاره‌كێ باش نینه و دێ كێشه‌یان ئالۆزتر لێكه‌ت، دیسان دێ وه‌به‌رهێنانا رووسیا د بیاڤێ هێزێ دا ل هه‌رێما كوردستانێ ئێخیته مه‌ترسیێ.
ب بۆچوونا سه‌رنڤێسه‌رێ دوسه‌یا رووسیا ل مالپه‌رێ ئه‌لمۆنیته‌ر، به‌غدا ب په‌یوه‌ندیێن رۆسیا و كوردستانێ رازی نینه،له‌ورا بریاره ل حه‌فتیا بهێت ئیبراهیم جه‌عفه‌ری وه‌زیرێ ده‌رڤه یێ عێراقێ بچیته مۆسكۆ و ل سه‌ر وێ پرسێ گۆتۆبێژان بكه‌ت.
ماکسی سوجکۆف ئاماژە ب هندێ ژی دایە،کو ل دووڤ ژێدەرێن رووسی،د پەیوەندییەکا تەلەفۆنی دا ئەڤرۆ دناڤبەرا رەجەب تەیب ئەردۆغانی، سەرۆک کۆماری تورکیا و ڤلادیمیر پووتینی، سەرۆکێ رووسیا بەحسێ کوردستانێ هاتیەکرن،هەر چەندە کرێملنێ د راگەهاندنا خۆدا ئاماژە پێنەدایە کو بەحسێ هەرێما کوردستانێ هاتبیتەکرن.
نيشاندان