ئه‌ڤرۆ نیۆز،عه‌زیز هه‌ورامی:

دەمێ ل 16.10 هێزێن ئێکەتیێ چەپەرێن خۆ بەرداین و ده‌سته‌یه‌كا دناڤ وێ حزبێدا پێشوه‌خت رێککەفتن له گه‌ل حه‌شدا شه‌عبی كری،ل‌ سنورێ پارێزگەها كه‌ركوكێ ئه‌و باژێره‌ كه‌فته‌ ژێر ده‌ستێ حه‌شدا شه‌عبی،د ماوێ ڤان چه‌ند رۆژان دا حه‌شدێ مال و دوكانێن وەلاتیان دسووژیت و گه‌نجێن وی باژێری ده‌ستگیر دکەن و سڤکاتیێ ب ‌خێزانێن وان د‌كه‌ن،جێگرێ به‌رپرسێ ئه‌نجومه‌نێ سه‌ركردایه‌تیا پارتی ل كه‌ركوكێ دیاردکەت،کو حه‌شدا شه‌عبی کارێن هۆڤانە هەمبەری وەلاتیێن كه‌ركوكێ دکەت.

دیاری حوسێن جێگرێ به‌رپرسێ ئه‌نجومه‌نێ سه‌ركردایه‌تا پارتی دیموكراتی كوردستان بۆ ئه‌ڤرۆ نیۆز دبێژیت:نوکە ل كه‌ركوكێ رەوش زۆر ئالۆزبوویە و هێزێن حه‌شدا شه‌عبی مال و دوکانێن خەلکێ تالان دکەن و سڤکاتیێ ب خەلکێ وی باژێری دکەن،لەورا هژمارەکا مەزن یا خەلکێ ئاواره‌ بووینە.

هەروەسا گوت ژی:نوکە حەشدا شەعبی لایه‌نگرێن حزبێن كوردستانی و ل گه‌ل ئه‌و توركمانێن کو ل گەل کوردان بووینە دگرن و مولک و مالێن وان تالان د‌كه‌ن و هەروەسا خانی دوکانێن وان ژی دسووژن،نوکە سوپایێ ئێرانێ حوکمی دکەت ب پشتەڤانیا حه‌شدا شه‌عبی و كۆمه‌کا به‌رپرسێن ئێکەتیا نیشتیمانی یا كوردستانێ.

ئه‌و چەند ژی گوت:دوهی چەندین خێزان ڤەگەریانە كه‌ركوكێ،لێ جارەکادی ژ کەرکوکێ دەرکەفتن‌،چونکی نوکە حەشدا شەعبی لایەنگر و كادرێن پارتی ده‌ستگیر دکەن.

دیاری حسێن خویاکر ژی:هەموو مال و دوكانێن كوردان ل دووز خورماتۆ هاتینە سووتن،ئەوا نوکە حه‌شدا شه‌عبی دکەت،هەما كریارێن تیرۆرستێن داعشن و ئەڤە ژ وان خرابترن ژی.

ئەڤرۆ نیۆز،زنار تۆڤی:

موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:ئەڤرۆ د روودانەکا ترافیکێ دا ترۆمبێلەک وەرگەریا و کەیەکێ گیانێ خۆ ژ دەستدا.

ناڤهاتی دیارکرژی:ئەڤرۆ ئەینیێ 20.10.2017 ل دەمژمێر (14:45 ) پشتی نیڤرۆ د روودانەکا هاتنوچوونێ دا ل سەر جادا گشتی یا زاویتە بۆ کۆمەلگەها باگێرا و ل گەلیێ قەنتارا ترومبێلەکا دهوک تایبەت ژ جورێ (نیسان_سەنی ) ژبن کونترۆلا شوفێری دەرکەفتیە و خۆ ب پەرجانێ نیڤا جادێ دایە و د ئەنجامدا کەسەکێ گیانێ خۆ ژ دەستدایە و سێ کەسێن دی ژی بریندار بووینە و ئەو هەر سێ کەس هاتینە ڤەگۆهاستن بۆ نەخۆشخانا تەنگافیا ل دهۆکێ.

ناڤهاتی گوت ژی:ئەگەرێ ڤێ روودانێ ڤەدگەریت بۆ نەپێگریا شۆفێری ب رێنمایێن هاتنوچوونێ.

ئەڤرۆ نیۆز،زنار تۆڤی:

موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:ئەڤرۆ د روودانەکا ترافیکێ دا دو کەس ب گرانی برینداربووینه.

ناڤهاتی دیارکرژی:ئەڤرۆ ئەینیێ 20.10.2017 ل نێزیک بەنداڤا ئاخێ یا دەرکارێ ترۆمبێلەکا تایبەت جێب کیا یا رەنگ سپی وەرگەریا و د ئەنجامدا دو کەس د وێ ترۆمبێلێ دا ب گرانی برینداربووینه و هەروەسا زیانێن ماددی ژی گەهشتینە وێ ترۆمبێلێ.