ئەڤرۆ نیۆز،زنار تۆڤی:
رێڤەبەرێ گشتی یێ گومرگێن هەرێما كوردستانێ دیارکر،کو ئیرانێ هەرسێ خالێن فەرمی یێن دهێنە هەرێما كوردستانێ داخستن و هاتنوچوون و مامەلەیا بازرگانی بتنێ ل دەروازێن نیڤ فەرمی یا بەردەوامە،وەزارەتا دەرڤە یا ئێرانێ ژی دبێژیت:مە هایداری ژ بریارەکا ب ڤی جۆری نینە.
سامال عەبدولرەحمان،رێڤەبەرێ گشتی یێ گومرکان ل هەرێما كوردستانێ راگەهاندیە،کو رۆژا ئێكشەمبی 15-10-2017، كۆمارا ئیسلامی یا ئیرانێ هەرسێ خالێن سنوری یێن فەرمی(پەروێزخان، باشماخ و حاجی ئۆمەران) یێن کو دهێنە هەرێما كوردستانێ داخستینە. گوتیە ژی:مە دووڤچوونا ڤی بابەتی کریە و وەسا دیاربوویە،کو تەهرانێ فەرمانا ڤێ چەندێ دایە و ئەم نزانین هەتاکو کەنگی دێ ئەڤ چەندە یا بەردەوام بیت.
هەروەسا دیارکر ژی،ڤێ بریارێ ب تنێ دەروازێن فەرمی گرتینە و دەرگەهێن كێلێ و سەیرانبەن و تەوێلە كو دەرگەهێن نیڤ فەرمینە ل گەل ئیرانێ.
هەروەسا نازم دەباغ،نوونەرێ حوکمەتا هەرێما كوردستانێ ل ئێرانێ راگەهاندیە،کو بەرپرسێن ئیرانێ ئەم ئاگەهدار كرینە كو داخستنا دەرگەهان ب روویێ كوردستانێدا ل دووڤ رێككەفتنەکێ بوویە دناڤبەرا ئیرانێ و توركیا و عێراقێ دا،گوت ژی،نوکە ئیرانێ سنورێن خوە ل گەل هەرێما كوردستانێ داخستینە و ب تنێ هاتنۆچوون بۆ وان كەسان هەیە،یێن كو ل هەردو سنوران دا ماین و وان دڤێت ڤەگەرنە جهێن ئاکنجیبوونا خوە.
پەیڤدارێ وەزارەتا دەرڤە یا ئیرانێ بەهرام قاسمی دبێژیت،وەزارەتا دەرڤە یا ئێرانێ ئاگەهداری ژ دەرکرنا بریارەکا ب ڤی رەنگی نینە،لێ ب تنێ مە سنورێ ئەسمانیێ خوە ل گەل هەرێما کوردستانێ ل سەر داخوازیا عێراقێ داخستییە.
نوکە بۆ بازرگانیكرن و هاتنۆچوونا خەلکێ، ئیرانێ و هەرێما كوردستانێ شەش خالێن سنوری و دەروازێن فەرمی یێن هەڤبەش هەنە،ژ وان ژی دەروازێن پەروێزخان و باشماخ و حاجی ئۆمەران دەروازێن سنوری یێن فەرمینە و هەر ئێک ژ دەروازێن كێلێ و سەیرانبەن و تەوێلە ژی دەروازێن نیڤ فەرمینە.
نيشاندان