ئه‌ڤرۆ نیوز، نه‌وزاد هلۆرى:
شاره‌زایه‌كێ وارێ سیاسه‌تا توركیا دیاركر كو هاتنا هێزێن میلیشیاتێن حه‌شد شه‌عبى و عیراقێ بۆ پارێزگه‌ها كه‌ركووك و ده‌ڤه‌رێن دن یێن مینا شنگال، رامانا وێ یه‌كێ دده‌ت كو هه‌یڤا شیعى دێ دروست بیت، ئه‌ڤ یه‌ك ژى د به‌رژه‌وه‌ندیا توركیا دا نینه‌ و وان د ترسینیت و ناخوازیت هه‌رێما كوردستانێ ژ ده‌ست بده‌ت.

هوشه‌نگ تاجر شاره‌زایێ وارێ سیاسه‌تا توركیا بۆ ئه‌ڤرۆ نیوز گۆت: (توركیا ب چو شێوه‌یان ژ ره‌وشا نها رازى نینه‌ ژ به‌ر كو هه‌یڤا شیعى دگه‌هیته‌ سنوورێن توركیا و ئه‌ڤ یه‌ك ژى رامانه‌ كو دێ هاوكێشه‌ دێ هێته‌ گوهۆڕین و د به‌ژه‌وه‌ندیا توركیا دا نینه‌).

زێده‌تر گۆت: (گورانكاریێن نهایێن كو ل ده‌ڤه‌رێ دروست دبن دێ بیته‌ سه‌ده‌م كو جاره‌ك دن په‌یوه‌ندیێن د ناڤبه‌را هه‌رێما كوردستان و توركیا ب هێزبن و ئه‌و چو جاران هه‌رێما كوردستانێ ناده‌ت ده‌ست ئیرانێ، به‌لێ ره‌نگه‌ هه‌ردولا پێدڤى ب ده‌مى بن ژ به‌ر كو ئه‌مریكا و سعودى ژى د رۆژه‌ڤێ دا هه‌نه‌، یا گرنگ ئه‌وه‌ كو سه‌ركرداتیا سیاسیا كوردستان و گه‌لێ كوردستانێ خوه‌ رابگرن و ئێكرێزى و ئێكگرتنا خوه‌ بپارێزن).

شاره‌زایى وارێ سیاسه‌تا توركیا دیاركر ژى كو دژاتیا توركیا بۆ ئه‌نجامدانا ریفراندۆما كوردستانێ ب تنێ بو وێ یه‌كێ بوویه‌ كو هه‌ڤسه‌نگى یا وه‌لاتێ خوه‌ ب پارێزیت و رێ ل به‌رامبه‌ر كوردێن باكور بگریت كو زێده‌تر نه‌هێنه‌ پێش و گۆت ژى: (د نها دا حه‌شد شه‌عبى بزاڤان دكه‌ت كو هه‌موو ده‌رگه‌هێن سنووریێن هه‌رێمێ بكه‌ڤن ده‌ست وان، ره‌نگه‌ ب ده‌مه‌كێ ژ به‌ر هه‌بوونا په‌یمانا د ناڤبه‌را هه‌ردولایان ئه‌ڤ یه‌ك دروست ژى بیت، به‌لێ چو جاران توركیا ب ڤێ یه‌كێ رازى نابن و دوهى ژى سه‌رۆك وه‌زیرێن توركیا راگه‌هاند كو ئه‌و رازى نابن حوكمه‌تا عیراقێ زوردایێ ل كوردێن عیراقێ بكهت، د نها دا هه‌رێما كوردستانێ زۆر په‌یمان و رێكه‌فتن ل گه‌ل توركیا هه‌نه‌ و جاره‌ك دن ئه‌و په‌یمان دێ هێنه‌ نووكرن ڤه‌ و توركیا د گه‌له‌ك سكته‌ران ژى دا پێدڤى ب هه‌رێما كوردستانێ یه‌).