بالیۆزێ بەرێ یێ ئەمریکا و دبلۆماتکارێ ناڤدارێ وی وەلاتی راگەھاند کو سەرۆکێ ھەرێما کوردستانێ ب چو رەنگەکێ دەستان ژ سەرخوەبوونا کوردستانێ بەرنادەت و گەلێ کوردستانێ ژی ب ریفراندۆمێ بریارا خوە یا دای و ئەمریکا ژی نەچارە رێزێ ل ئیرادا گەلێ کوردستانێ بگریت.
ب، ھۆشەنگ تاجر:
پیتر گالبرایس بالیۆزێ بەرێ یێ ئەمریکا و دبلۆتکارێ ناڤدارێ وی وەلاتی بۆ رۆژناما خەبەر تورک یا تورکیا راگەھاند کو مەسعود بارزانی سەرکردەکێ وێرەک و ژێھاتی یە و سەرەرای دژبەریا ئەمریکا و گەلەک وەلاتان ریفراندۆم ل کوردستانێ ھاتە کرن، ئەنجامێ ریفراندۆمێ ژی نیشا ددەت کو ریفراندۆم و سەرخوەبوونا کوردستانێ داخوازیا ھەموو گەلێ کوردستانێ بوویە و مەسعود بارزانی ژی وەکو سەرۆکێ ھەرێما کوردستانێ ئەڤ داخوازیا گەلێ کوردستانێ بجە ئینا و گۆت: (سەرکردێن تورکیا و عیراقێ داخوازا ھلوەشاندنا ئەنجامێ ریفراندۆمێ دکەن، براستی ژی ئەڤە گەلەکێ سەیرە، چونکو ئەنجامێ ریفراندۆمێ داخوازیا گەلێ کوردە و چو کەسەک نەشێت داخوازیا رەوا یا گەلێ کوردستانێ پشتگوە ب ھاڤێژیت و یێن داخوازیەکا وەسا ژی دکەن رێزێ ل مافێ مرۆڤی ناگرن و ئەو یەک ناھێتە قەبوول کرن).
ناڤبری د بەردەوامیا ئاخڤتنا خوە دا ئەو یەک ژی دیار کر کو پێدڤی بوو ھەتا نھا ئەمریکا دانپێدانێ ب ئەنجامێ ریفراندۆمێ کربا، چونکو ئەمریکا ژی باش دزانیت کورد نھا ل رۆژھەلاتا ناڤین ھەڤپەیمانەکێ ستراتیژی نە بۆ ئەمریکا و د شەرێ ل دژی رێکخراوا تیرۆرستی یا داعشێ ژی ئەو یەک ب رەنگەکێ ئاشکرا دیار بوو، براستی تێناگەھم بۆچی ھەتا نھا ئیدارا ئەمریکا وەسا سەرەدەریێ ل گەل ئەنجامێ ریفراندۆما ھەرێما کوردستانێ دکەت، دڤێت ئەم ژبیر نەکەین کو نێزیکی ٩٣% خەلکێ کوردستانێ ب ئەرێ دەنگێ خوە داینە و چو وەلاتەک نەشێت ڤێ راستیێ رەت بکەت و گۆت: (ئەز بارزانی باش ناس دکەم و دێ ھەر دەولەتا سەربخوە یا کوردستانێ راگەھینیت، لێ رەنگە ژ بەر رەوشا نھا یا ئالۆز ل عیراقێ و دەڤەرێ کو ئاریشە ل سەر وان ھەنە ببنە ئەگەر کو راگەھاندنا دەولەتا کوردی گیرو بیت، لێ بارزانی دێ ھەر دەولەتا کوردی راگەھینیت چونکو خەلکێ کوردستانێ ب ریفراندۆمەکا شەرعی و قانوونی داخوازیا خوە بۆ ھەموو جیھانێ دیار کر).
ل دۆر ھەلویستێ ئەمریکا بۆ پاشەرۆژا کورددستانێ ژی پیتر گالبرایسی راگەھاند کو ئەمریکا ژی باش دزانیت کو دێ دەولەتا کوردی ھێتە راگەھاند، لێ دیارە ژ بەر بەرژەوەندیێن خوە یێن ل گەل عیراقێ و دەستێوەردانێن ئیرانێ دخوازن جارێ کورد وەکو ھێزەکا کاریگەر ل گەل عیراقێ بمینن، لێ کوردان ب رێیا ریفراندۆمێ ژی ئەو یەک بۆ ھەموو جیھانێ دیار کرن کو دخوازن دەولەتا خوە یا سەربخوە راگەھینن و دڤێت ئەمریکا ژی ڤێ راستیێ قەبوول بکەت، چونکو رێگری کرن ل داخوازیێن کوردان دێ ئەنجامێن خوە یێن خراب ھەبن و گۆت: (کورد نھا ب ھێزن و ئەمریکا ژی ڤێ راستیێ باش دزانیت و ئەڤرۆکە نەبیت رۆژەکا دی ئەمریکا نەچارە دانپێدانێ ب ئیرادا گەلێ کوردستانێ بکەت).
ل دۆر ھەلویستێ تورکیا و ئەگەرێ ھێرشەکا سەربازی ل سەر ھەرێما کوردستانێ ژی ناڤھاتی راگەھاند کو لەشکرێ عیراقێ ب چو رەنگەکێ نەشێت ھێرشی ھەرێما کوردستانێ بکەت، د شەرێ ل دژی داعشێ دا مە ھەموویان دیت کا رەوشا لەشکرێ عیراقێ چاوا بوو و تورکیا و ئیران ژی نەشێن سنۆرێ ھەرێما کوردستانێ دەرباز بکەن، ئەمریکا و جڤاکێ نێڤدەولەتی ڤێ یەکێ قەبوول ناکەت و گۆت: (بەحسێ سزایێن ئابووری دھێنە کرن، ئەز باوەر ناکەم کو تورکیا شاشیەکا وەسا دیرۆکی بکەت، چونکو روسیا خوە کریە ناڤ بازارێ وزێ یێ ھەرێما کوردستانێ و روسیا دشێت ب رێکەکا دی پەترۆلا ھەرێما کوردستانێ بگەھینتە بازارێن جیھانێ، ژ بەر ھندێ ھەکە تورکیا ئاستەنگیان دروست بکەت دێ تووشی زیانەکا مەزن بیت و ئەردۆگان و حوکمەتا نھا یا تورکیا ژی ڤێ راستیێ باش دزانن و ژ بەر ھندێ ژی ھەتا نھا نەشیاینە چو پێنگاڤەکێ ب ھاڤێژن).
بالیۆزێ بەرێ یێ ئەمریکا: ئەمریکا نەچارە رێزێ ل ئیرادا گەلێ کوردستانێ بگریت
نيشاندان