ئەڤرۆ نیۆز،زنار تۆڤی:

ئەڤرۆ ئەینیێ 13.10.2017 فۆئاد مەعسووم سەرۆک کۆمارێ عێراقێ گەهشتیە سلێمانیێ و دەربارەی دۆخی کەرکووکێ دێ ل گەل سەرکردایەتیا ئێکەتیێ کۆمبیت،هەروەسا سەرۆک کۆمار شەش داخوازیێن عەبادی و حەشدا شەعبی ڤێنه و حەشدا شەعبی داخوازیا ئەڤان جهان کرینە،کو کورد بۆ گەرینن و دو رۆژ دەلیڤە داینە کوردستانێ،هەکە کورد رەزامەندیێ ل سەر وان شەش خالان نەکەن،سوبەهی و ل دەمژمێر 2 شەڤ دێ هێرشێ کەنە سەر کوردستانێ،ئەو خال ژی ئەڤەنە:

۱.رادەستکرنا فرۆکخانا کەرکووکێ،بۆ حەشدا شەعبی،
۲-رادەستکرنا سەربازگەها کەیوان.
۳-رادەستکرنا سەرجەم کێلگەهێن نەفتا کەرکووکێ.
4- کورد هەموو وان چەکدارێن داعش رادەستی وان بکەن،یێن کو ژلایێ پێشمەرگەیڤە هاتینە گرتن.
٥-سوپایێ عێراقێ ڤەگەریتە وان هەموو جهان،یێن کو پێش هاتنا داعشێ لێ جهگیربوون.
٦- ژ کارلادانا پارێزگارێ کەرکووکێ نەجمەدین کەریمی ژ پۆستێ وی.

بۆ جێبەجێکرنا ڤان خالان عەبادی و حەشدا شەعبی تا دەمژمێر دویێ شەڤا داهاتی موهلەت داینە کوردان.

ئەڤرۆ نیۆز،زنار تۆڤی:

پشتی کو بەرێز حەیدەر عەبادی سەرۆك وەزیرێن عێراقێ و فەرماندێ گشتی یێ هێزێن چەكدار ل عێراقێ،ل رۆژا 10/10/2017 د كۆنفرانسەکێ رۆژنامەڤانیدا هێرشێن دەستپێكرنا هێرشەکا سەربازی یا سوپای و حەشدا شەعبی ل دژی پێشمەرگە و كوردستانێ راگەهاند،چەند رۆژن ب مەبەستا هێرشكرنێ بۆ سەر هێزێن پێشمەرگەی،بەردەوام هێزێن زێدەتر یێن حەشدا شەعبی و سوپایێ عێراقێ ل دەوربەرێن باژێرێ مووسل تا دەوروبەرێن كەركووكێ و خانەقینێ دهێنە کۆمکرن.

ئەم وەكو حومەتا هەرێما كوردستانێ، داخوازێ ژ به‌رێز ئایەتوللا سەید عەلی سیستانی و هەموو لایەنێن عێراقی و هەموو رێكخراوێن مەدەنی و ئاشتیخواز و نەتەوێن ئێكگرتی، ئەمریكا، ئێکەتیا ئورۆپا، دەولەتێن ئەندام د هەڤپەیمانیەتیا ل دژی داعش، دەولەتێن ئەندام د ئەنجومەنێ ئاسایشا نێڤدەولەتی و ولاتێن دراوسێ دكەین،کو رۆلێ خۆ یێ ب لەز بگێرن و تەدەخولێ بكەن بۆ دوورگرتنا ڤێ دەڤەرێ ژ شەرەکێ تازە و داخواز دكەین،کو هێزێن عێراقی و هیچ هێزەکا دەرەكی هەولێن دروستكرنا ڤی شەری نەدەن، چونكی دێ لێكەفتنەکا راستەوخۆ یا گەلەک خراب هەبیت بۆ سەر بارودۆخێ نافخۆیێ عێراقێ و هەموو دەڤەرێ و دێ زەمینەیێ بۆ بهێزبوونا داعشێ و رێكخراوێن تیرۆریستی یێن دیتر ل ڤێ دەڤەرێدا خۆشکەتەڤە.

ئەم وەك حوکمەتا هەرێما كوردستانێ ژ پێناڤی چارەسەركرنەکا راستەقینە یا هەموو كێشەیان،ئەم ئامادەیی یا خۆ بۆ گفتوگۆیه‌كا بنیاتنەرانە نیشان ددەین و بەرپرسیارەتیا هەر شەر و لێكەفتەکا خراب د ئێخینە ستوویێ لایەنێ بەرامبەر و فەرماندێ گشتی یێ هێزێن چەكدارێن عێراقێ بەرێز حەیدەر عەبادی.

داخوازێ ژ هەموو پێكهاتێن گەلێ كوردستانێ ژ كورد و عەرەب و توركمان و كریستیانان دكەین،کو ب ورەیەكا بەرز ئامادە بن بۆ بەرسڤدانا هەر شەرخوازیەكێ و ب هەموو شێوەیەكێ پشتەڤانیێ ل پێشمەرگەی بكەن بۆ پاراستنا هەموو باژێرێن كوردستانێ، بۆ هندێ باژێرێن مە هەڤشێوێ مووسل و ئەنبار و دیتر یێن عێراقێ تووشی كۆمەلكوژیێ و وێرانبوونێ نەبن، هەروەسا داخوازێ ژ هەموو حیزب و لایەنێن كوردستانی دكەین،کوئێک هەلویست بن بۆ پاراستنا ئاشتی و بەرگریكرنێ ژ كوردستانێ.

باژێرێن هەرێما كوردستانێ پەناگەهەك بووینە بۆ حەواندنا سەدان هزار پەنابەر و ئاوارێن شەرێ داعش و شەرێ تایفی د عێراقێدا، زۆر سەیرە حوکمەتا عێراقێ دڤێت ب هێرشا سەربازی، ئارامیا وان دەڤەران ژی تێكبدەت.
سالا 2014، پشتی کو سوپایێ عێراقێ ژ كەركووك و دەڤەرێن دەوربەر رەڤین و چەكەکێ زۆر بۆ داعش بجه هێلای، هێزێن پێشمەرگەی ل تەوارا خەلکێ وان دەڤەران هاتن و ئه‌و ژ دەستێ داعشان پاراستن،ژ وی دەمی ئەو دەڤەرە د دۆخەکێ ئارامیێ وەسا دا دژین کو هیچ دەمەکێ سەقامگیریەكا ب ڤی شێوەی ب خۆ ڤە نه‌ دیتیە، ئه‌ڤەژی ب ئەگەرێ فیداكاریا پێشمەرگەی و پۆلیس و دەزگەهێن ئەمنی و هەڤكاریا خەلکێ یە ل گەل وان.

چەندین جاران ژی مە راگەهاندیە کو نابیت هیچ چارەسەریەک دوور ژ حەزا وەلاتیان ب سەر وان دەڤەران دا بهێته سەپاندن و دڤێت ئیدارەیەكا خودان تایبەتمەندی كو حەزا هەموو پێكهاتان بهێتە بەرچاڤ گرتن، بۆ وان دەڤەران هەبیت، بۆ ڤێ مەبەستێ ژی حوکمەتا هەرێما كوردستانێ یا ئامادەی هەموو هەڤكاریانە.

نوکەژی دووبارە دكەینەڤە كو ئەم ئامادەینە بۆ گفتوگۆیێ و ل دژی هندێنە کو پەنایێ ببەینە بەر چەکی بۆ چارەسەركرنا كێشەیان، دڤێت هەموو كێشە ب شێوەیەكێ ئاشتیانە و ب گفتوگۆیێ بهێنە چارەسەرکرن،نەک داخوازیا مە بۆ گفتوگۆیێ و لێكگه‌هشتنێ،ب‌ هێرشکرنێ و كۆمكرنا هێزێ و سوپایی و پێنگاڤێن عه‌مه‌لى بۆ شه‌ری،بەرسڤ بهێتەدان‌.

نێچیرڤان بارزانى
سه‌رۆك وەزیرێن هەرێما كوردستانێ
13/10/2017

ئەڤرۆ نیۆز،زنار تۆڤی:

ل شەڤا بوری هێزێن حەشدا شەعبی و هندەك ژ هێزێن سوپایێ عێراقێ دەست ب جمووجۆلێ و خۆ ئامادەكرنێ کریە بۆ پەلاماردانا دەڤەرێن ژێر دەستهەلاتا پێشمەرگەی ب تایبەت ل دەوروبەرێن كەركووكێ، ئەو جمووجۆلە پشتی هاندان و دەست ل پشتێن بیانی و هەروەسا لێدوانێن هێرشکرنێ یێن چەند رۆژێن بوری، یێن هژمارەکا بەرپرسێن سەربازی و سیاسی یێن عێراقێ دهێت ل دژی گەلێ كوردستانێ،کو ئاماژێن مەترسیدار ل هەلگیرساندنا شەری و پەلاماردانا كوردستانێ تێدایە.

ئەم كۆمەلگەهێ نێڤدەولەتی و هەڤپەیمانان و رایا گشتی یا جیهانی ژڤێ چەندێ ئاگەهدار دكەین،کو ئەڤ دۆخێ نالەبار دێ بیتە ئەگەرێ كارەساتەکا مەزن،ئەم دژی شەری و خوین رشتنێی نە،ل روانگەها هەستكرنێ و ب بەرپرسیارەتی داخوازێ ژ حوکمەتا بەغدا دكەین،کو ل جهێ جولاندنا هێزێ و خۆسەپاندنا ب زۆر،بهێت گوتۆبێژێ بكەت و ب ڤێ رێکێ گرفتان چارەسەر بكەت،بەلێ هێرش و پەلاماردان و شەر فرۆشتن ناهێنە قەبوولکرن و چارەسەریا هیچ گرفتەکێ ناكەن و هێزا پێشمەرگەی زۆر ب توندی دێ بەرگریێ ژ گەلێ كوردستانێ کەت و رێکێ نادەت ب زمانێ چەكی و خۆسەپاندنا ب زۆر، مامەلە ل گەل كوردستانێدا بهێتە کرن.

پێدڤە هەموو هێزێن پێشمەرگەهێ كوردستانێ ژی د ئامادەباشیا تەمام دابن بۆ بەرگریكرنێ ژ گەل و ئاخا كوردستانێ،بەرسڤا هەموو جۆرە هێرش و پەلامارەکێ بدەن.

فەرماندەیا گشتی یا هێزا پێشمەرگێ كوردستانێ

13. 10. 2017

ئەڤرۆ نیۆز،زنار تۆڤی:

رێڤەبەرێ ئاسایشا كه‌ركووكێ (پارتى) رادگەهینیت کو ب ده‌هان هزار پێشمه‌رگه‌ ب‌ چه‌كێ قورس و جەبلخانه‌کا زۆر‌ گه‌هشتنه‌‌ سنوورێن پارێزگەها كه‌ركووكێ و رێکێ ب هیچ هێزەکێ نادەت کو پێن خۆ بێخنە‌ ئاخا كوردستانێ‌.

د راگەهاندنەکا رێڤەبەراتیا ئاسایشا كه‌ركووكێ(پارتى)دا كو‌ ئه‌ڤرۆ ئەینیێ بەلاڤکریە،کو ب ‌فه‌رمانا مه‌نسور بارزانى لیوایا تایبه‌ت یا ئێك و له‌شكرێ گوڵان و هێزێن پشتیەڤانیا ئێك و چه‌ندین لیوایێن هێزێن زێره‌ڤانیێ،ب ‌ده‌هان هزار پێشمه‌رگه‌‌ ب چه‌كێ قورس و جەبلخانه‌کا زۆر و گه‌هشتنه‌ سنورێن پارێزگەها كه‌ركووكێ.

هەروەسا گوتیە‌،سۆزێ ددەینە خەلکێ باژێرێ كه‌ركووكێ کو رێکێ ب هیچ هێزەکا دوژمنان ناده‌ین،کو پێن خۆ بێخنە ناڤ ئاخا پیرۆزا كوردستانێ.

ل شەڤا بوری جڤاتا ئاسایشا هه‌رێما كوردستانێ ل پێگه‌هێ فه‌رمیێ خۆ ل تۆرا جڤاکی یا توویته‌رێ بەلاڤکریە،مە زانیاری هه‌نه‌ کو هژماره‌کا به‌رچاڤ یا سوپایێ عێراقێ و حه‌شدا شه‌عبی ب تانك و تۆپ و زرێپۆشان‌ ژ‌ به‌شیر و تازه‌ ل باشۆرێ كه‌ركووكێ هاتینە كۆمکرن و ل دووڤ زانیاریێن هه‌والگریێ،وێ هێزێ نیەتا ده‌ست ب سه‌رداگرتنا كێلگەهێن نه‌فتێ و فرۆكخانێ‌ و پێگه‌هێن سه‌ربازی ل ده‌ورووبه‌رێن ڤێ دەڤەرێ هه‌نه‌.