ئەڤرۆ نیوز:
پشتی ریفراندۆما ھەرێما کوردستانێ سەرەرای دژبەریا ھندەک وەلاتێن ئورۆپا لێ ھژمارەکا بەرچاڤ ژ ئەندامێن پەرلەمانێ ئورۆپا پشتەڤانیا خوە بۆ سەرخوەبوونا ھەرێما کوردستانێ دیار دکەن و داخواز ژ وەلاتێن ئێکەتیا ئورۆپا ژی دکەن کو پشتەڤانیێ ل دەولەتا کوردی بکەن.
ئالین سمیتس ئەندامێ پەرلەمانێ ئورۆپا بۆ دەزگەھێن راگەھاندنێ دیار کر کو ل ھەرێما کوردستانا عیراقێ ریفراندۆمەکا دیموکراتیک ھاتە کرن و خەلکێ ژی دەنگێ خوە دا، کوردان دڤێت ژ عیراقێ جودا بن و دەولەتا خوە یا سەربخوە ئاڤا کەن، لێ مخابن وەلاتێن جیرانێن کوردستانێ ھێشتا ژی ب زمانێ گەفێ سەرەدەریێ ل گەل ئەنجامێن ریفراندۆمێ دکەن و گۆت: (مخابن ھەتا نھا گەلەک وەلاتێن ئورۆپا پشتەڤانیا خوە بۆ عیراقەکا ئێکگرتی و فیدرالی دیار کری، لێ ھەر کەس باش ڤێ راستیێ دزانیت کو عیراق ئێکگرتی نەمایە و یا دی بەرپرسێن عیراقێ رۆژانە قانوونان بنپێ دکەن و زۆرداریێ ل کوردان و سوننان و نەتەوێن دی ل عیراقێ دکەن، ژ بەر ھندێ ژی دڤێت وەلاتێن ئێکەتیا ئورۆپا ل ھەمبەر رەوشا نھا ل عیراقێ بێ ھەلویست نەمینن و گرنگە پشتەڤانیێ ل کوردان بکەن، چونکو دڤێت ئەم ژبیر نەکەین کو کوردان د شەرێ ل دژی مەزنترین رێکخراوا تیرۆرستی ل جیھانێ شەر کرن و گەلەک قوربانی داینە).
ل ئالیێ دی چەندین ئەندامێن دی یێن پەرلەمانێ ئورۆپا ژی ب رێیا بەرپەرێن جڤاکی یێن وەکو تویتەر و فەیسبووکێ پشتەڤانیا خوە بۆ دەولەتا کوردی دیار کرن و داخواز ژ وەلاتێن ئێکەتیا ئورۆپا کرن کو ل ھەمبەر گەفێن ل سەر ھەرێما کوردستانێ بێ ھەلویست نەمینن و پشتەڤانیێ ل مافێ رەوا یێ کوردان بکەن.
د. سەردار محەمەدی مامۆستایێ زانکۆیێ ل بریتانیا ژی راگەھاند کو مخابن ئەڤرۆکە وەلاتێن ئێکەتیا ئورۆپا ژ پرەنسیبێن خوە یێن سەرەکی دوور کەڤتینە، ئورۆپی رۆژانە بەحسێ مافێ مرۆڤی و دیموکراسیێ دکەن، لێ نھا ل ھەمبەر مافێ کوردان خوە بێدەنگ کرینە، بێدەنگیا وان ژی نیشا ددەت کو مافێ مرۆڤی ل دەف وان تنێ درووشمە و بۆ بەرژەوەندیێن خوە یێن سیاسی بکار دئینن، ھەکە وەسا نەبا دا ھەتا نھا چەندین وەلاتێن ئورۆپا پشتەڤانیا خوە بۆ ریفراندۆما سەرخوەبوونا ھەرێما کوردستانێ دیار کربا و گۆت: (مخابن ل ئورۆپا ژی دیموکراسی تنێ بۆ ھندەک کەسانە و یێن بەحسێ دیموکراسیێ بۆ جیھانێ دکەن تنێ بۆ بەرژەوەندیێن خوە دبێژن و ئەو گۆتن تنێ وەکو ئاخڤتن مایە و د کریاری دا ھەتا نھا ئورۆپا چ نەکریە).
ناڤبری ئەو یەک ژی دیار کر کو ئەو پەرلەمانتارێن کو پشتەڤانیێ ل دەولەتا کوردی دکەن ئەو ژی ژ وان پارتێن سیاسی یێن ئورۆپا نە کو ب سالانە پەیوەندیێن وان ل گەل ھێزێن کوردی ھەنە و مخابن پشتەڤانیا چەندین پەرلەمانتارێن پەرلەمانێ ئێکەتیا ئورۆپا ژی چو کاریگەریەکا خوە یا سیاسی یا مەزن نابیت، ھەرچەندە تشتەکێ گرنگە و پیرۆزە، لێ ھەتا چەندین وەلاتێن مەزن یێن ئورۆپا ب فەرمی پشتەڤانیێ ل دەولەتا کوردی نەکەن ھەڤسەنگیا نھا ناھێتە گوھۆرین و گۆت: (ئەز باوەرم رەوش وەسا بەردەوام نابیت و ھەکە ھندەک گوھۆرین ل دەڤەرێ روو بدەن رەنگە کارتێکرنێ ل ھەلویستێ وەلاتێن ئێکەتیا ئورۆپا بکەن و ھەموو کەسەک ژی دزانیت کو کوردستان دێ ھەر ھێتە ئاڤا کرن و پرانیا وەلاتێن ئورۆپا ژ بەر بەرژەوەندیێن خوە ل رۆژھەلاتا ناڤین دێ نەچار بن دانپێدانێ ب دەولەتا کوردی ل باشورێ کوردستانێ بکەن).