ئه‌ڤرۆ نیوز ، نه‌وزاد هلۆرى:
ئێڤاریا ئه‌ڤرۆ ب پشكداریا سه‌رۆكێ هه‌رێما كوردستانێ كه‌رنه‌ڤالا سه‌ربخوه‌ى یا كوردستانێ ب به‌رهه‌ڤبوونا هژماره‌كا زور یا جه‌ماوه‌رێ سلێمانیێ ب رێڤه‌ چوو ، و تێدا بارزانى گوتاره‌ك پێشكێشكر و دیاركر كو ریفراندۆم بویه‌ ئه‌جیندایا جڤاكێ نیڤده‌وله‌تى كو ئه‌ڤ یه‌ك ژى به‌رهه‌مێ خوونا شه‌هیدایه‌ و ئێك رێزیا گه‌لێ كوردستانێ پاراست ژبه‌ركو ریفراندۆم بریارا گه‌لێ كوردستانێ بوویه‌.
مه‌سعود بارزانى سه‌رۆكێ هه‌رێما كوردستانێ د كه‌رنه‌ڤالا سه‌ربخوه‌ى یا كوردستانێ ل سلێمانیێ دیاركر كو بریارا ریفراندۆمێ بریارا گه‌لێ كوردستانێ و سه‌ركرداتیا سیاسیا كوردستانێ یه‌ و گۆت: ( باژێرێ سلێمانیێ هه‌رده‌م باژێرێ هه‌لمه‌ت و قورانیدانێ یه‌ و پایته‌ختێ ره‌وشه‌نبیریێ یه‌ ، دلخوشم و شانازیى دكه‌م كو ئه‌ڤرۆ ل سلیمانیى مه‌ ،خه‌لكێ سلێمانیێ چه‌وا به‌رى نها به‌رسینگێ دوژمنان گرت و پێشه‌نگ بوون ، و ئه‌ڤرۆ ژى سلێمانى دێ پێشه‌نگ بیت و پشتراستم دێ بێژیت به‌لێ بو سه‌ربخوه‌ى یا كوردستانێ)
زێده‌تر گۆت: (ریفراندۆم بویه‌ ئه‌جیندایا جڤاكێ نیڤده‌وله‌تى كو ئه‌ڤ یه‌ك ژى به‌رهه‌مێ خوونا شه‌هیدان و قوربانیدانا گه‌لێ كوردستانێ یه‌ ، و ئه‌ڤێ یه‌كێ ژى ئێكرێزیا گه‌لێ كوردستانێ پاراست و بویه‌ ئه‌گه‌ر كو په‌رله‌مان كارا بیت ، ریفراندۆم بریارا گه‌لێ كوردستانێ یه‌ و ئه‌ڤ بریاره‌ ژى د ده‌مه‌كێ دا هاتیه‌ كو به‌غدا شه‌راكه‌ت نه‌هێلا و ده‌ستوور پێیشیلكر و ته‌وافق نه‌هێلا ، و پێشتر ژى چه‌ندین جاران مه‌ گوتبویه‌ عیراقێ شه‌راكه‌ت نه‌مایه‌ و وه‌رن دا ببینه‌ دوو جیرانێن باش ، ل وى ده‌مى ئه‌و د نه‌رم بوون و وه‌كو كارته‌كا فشارێ دیت)
مه‌سعود بارزانى دیاركر ژى كو ئه‌و زور دلخوش بوو كو ئه‌ڤرۆ مام جه‌لال ل ڤێره‌ به‌رهه‌ڤبایه‌ و ئه‌وان هه‌ردووان پێكڤه‌ بارێ ریفراندۆمێ هه‌لگرتبایه‌ و دا ل وى ده‌مى ب ساناهى تر بیت و گۆت ژى: (ریفراندۆم ئامرازه‌كه‌ بو سه‌ربخوه‌ى یا كوردستانێ ، درۆستبوونا ده‌وله‌تا كوردستانێ ژى بوو هه‌مووانه‌ بێى جوداهیا ئاینى و نه‌ته‌وه‌یى ، و هه‌رده‌م بیروباوه‌رێن من یێن كوردینێ ب هێز بوویه‌ و خه‌لكێ سلێمانیێ ئه‌ڤرۆ بیروباوه‌ریێن من زێده‌تر كرن و كومبوونا هه‌وه‌ ژى په‌یامه‌كا ب هێز بوو نافخوه‌ و ده‌رڤه‌یه‌ كو سه‌ربخوه‌ى یا كوردستانێ دێ به‌هرا هه‌وه‌ بیت ، و ئه‌ز كومبوونا هه‌وه‌ ب ته‌مامكرنا ریفراندمێ دبینم و هه‌وه‌ ریفراندۆم كر)
ل بارا پاشئێخستنا ریفراندۆمێ ژى بارزانى گۆت: ( ئه‌گه‌ر به‌دیله‌كێ باشتر بگه‌یته‌ ده‌ست ئه‌نجومه‌نا بلند یا ریفراندۆمێ و گه‌لێ كوردستانێ قبول كر ل وى ده‌مى دێ هێته‌ پاشئێخستن ، به‌لێ هه‌تا نها چو به‌دیل نه‌هاتینه‌ دان )

ئەڤرۆ نیوز ، هلوری:

دەمەک بەریا نها سەرۆکێ هەرێما کوردستانێ گەهشتە پارێزگەها سلێمانیێ و ژلایێ سەروککومارێ عیراقێ و بەرپرسێن ئێکەتی هاتە پێشوازیکرن.

مەسعود بارزانی سەرۆکێ هەرێما کوردستانێ گەهشتە پارێزگەها سلێمانیێ و ژلایێ فوئاد مەسعوم سەروککومارێ عیراقێ و چەند بەرپرسێن ئێکەتیا نیشتمانیا کوردستانێ هاتە پێشوازیکرن ، ل گورەی زانیاریان دێ چەند کومبوون دناڤبەرا بارزانی و لایەنێن سیاسیێن سلێمانیێ هێنەکرن.

سەرەدانا بارزانی ب ئارمانجا پشکداریکرنێ یە د کەرنەڤالا سەربخوەی یا کوردستانێ کو بریارە ئێڤاریا ئەڤرو ل یاریگەها سلێمانیێ ب رێڤە بچیت.

ئه‌ڤرۆ نیوز ، نه‌وزاد هلۆرى:
ئێڤاریا ئه‌ڤرۆ ب پشكداریا سه‌رۆكێ هه‌رێما كوردستانێ لژنا بلند یا ریفراندۆمێ كه‌رنه‌ڤاله‌كا جه‌ماوه‌رى بو جه‌ماوه‌رێ هه‌رچوار قه‌زایێن (مێرگه‌سوور و سوران و ره‌واندوز و چومان )رێكخست و تێدا بارزانى گوتاره‌ك خواند و دیاركر كو ئێك ژ نیعمه‌تنێن ریفراندۆمێ و ده‌ستكه‌فتیێن وێ بو هه‌موو جیهانێ دیاربو كو بریارا ریفراندۆمێ بریارا گه‌لێ كوردستانێ یه‌ و ئێكرێزیا گه‌لێ كوردستانێ زڤرى و په‌رله‌مان ژى كارا بو ، و گه‌لێ كوردستانێ رژده‌ كو دێ ریفراندۆمێ ئه‌نجام ده‌ت.
مه‌سعود بارزانى د چارچوڤێ كه‌نه‌ڤالا سه‌ربخوه‌ى یا كوردستانێ ل قه‌زا سوران دیاركر كو پێشمه‌رگه‌ و خه‌لكێ كوردستانێ ل ڤان چیایێن ده‌ڤه‌رێ قاره‌مانیێن مه‌زن د شوره‌شا ئیلونێ دا توماركرینه‌ و گۆت: ( خه‌لكێ سوران و مێرگه‌سوور و ره‌واندوز و چومان مل ب ملێ خه‌لكێ سنوورێ پارێزگه‌ها دهۆكێ ده‌نگێ خوه‌ بو ریفراندۆمێ دا ، و دبیت ئه‌م هه‌موو پرسیار بكه‌ین بوچى مه‌ بریاردا ریفراندۆمێ دایه‌، ده‌ستپێكێ بریارا ریفراندۆمێ بریارا سه‌ركرداتیا سیاسیا كوردستانێ و گه‌لێ كوردستانێ بوویه‌ و مولكێ چوو كه‌س و حزبان نینه‌ ، چوو رێكێن دن نه‌بوون كو گه‌لێ كوردستانێ تاقى نه‌كریى ژ مه‌ركه‌زیه‌تێ هه‌تا فیدرالیێ به‌لێ ژ به‌ركو ئه‌م دجڤاكه‌كێ گرتى و دویر ژ پێكڤه‌ ژیانێ دژیان به‌ر هندێ مه‌ بریارا ریفراندۆمێ دا )
زێده‌تر گۆت: (به‌رى نها به‌حسا ریفراندۆمێ ل واشنتون و عیراقێ ژى هاتبویه‌كرن و مه‌ گوتبویه‌ وان هه‌ڤپشكى شكه‌ستن ئینا و پێدڤى یه‌ ئەم و عیراق بریارێ بدەین كو دوو هه‌ڤسویێن باش بین ، و ل وى ده‌مى ئه‌و د نه‌رم بوون ، ئێك سەرکردێن عیراقێ راگه‌هاند بوو كو مه‌ نه‌ڤێت ژێكجودابین و ئه‌گه‌ر جودا بین ژى بلا لسه‌ر بنه‌مایه‌كێ باش بیت ، و ژبه‌ركو هه‌ڤسه‌نگى و ته‌وافق نه‌ما و چه‌ك و ته‌قه‌مه‌نى ب پێشمه‌رگه‌ى نه‌دا و قانونا پێشمه‌رگه‌ ده‌رباز نه‌كر و بودجه‌ و موچه‌یێن خه‌لكێ كوردستانێ برین كو ئه‌ڤ یه‌ك ژى جوره‌كێ ئه‌نفالێ بو دژى گه‌لێ كوردستانێ ، مه‌ بریارا ریفراندۆمێ دا ، و ئه‌گه‌ر بارودوخ یێ باش بایه‌ مه‌ ریفراندۆم نه‌دكر و نها دخوازن كو بزڤرین بو هێلا كه‌سك ، ئانكو ب هاونان ل دهوك و هه‌ولێرێ بده‌ن كو ئه‌ڤ یه‌ك ژى سنوور نینن ، ئه‌م ب ریفراندۆمێ سنووران دیار ناكه‌ین به‌لكو ب دانوستاندن دهێنه‌ دیاركرن و ئه‌م به‌رهه‌ڤ نینین دانوستاندنێ لسه‌ر سنووران بكه‌ین )
سه‌رۆكێ هه‌رێما كوردستانێ د درێژاهیا گوتارا خوه‌ دیاركر ژى كو ئه‌و ل گه‌ل وه‌لاتێن جیهانێ و به‌غدا دانوستاندن لسه‌ر ریفراندۆمێ كریه‌ و ب روونى دیاره‌ كو هه‌لویستێ وان گورانكارى ب سه‌ردا هاتیه‌ كو ئه‌ڤ یه‌ك ژى جهێ پرسیارێ یه‌ و گۆت: ( هه‌ر ئێك ژ وان وه‌لاتان ب ره‌نگه‌كێ بابه‌ت شروڤه‌ دكر و هنده‌كان ب كارتا فشارێ وه‌سف دكر ، به‌لێ پێدڤى یه‌ ئه‌م ڤان ئاخفتنا پشتگوهڤه‌ بهاڤێژین ، و ئێك ژ نیعمه‌تنێن ریفراندۆمێ و ده‌ستكه‌فتنێن وێ بو هه‌موو جیهانێ كو بریارا ریفراندۆمێ بریارا گه‌لێ كوردستانێ یه‌ و ئێكرێزیا گه‌لێ كوردستانێ زڤرى و په‌رله‌مان ژى كارا بو ، و گه‌لێ كوردستانێ رژده‌ كو دێ ریفراندۆمێ ئه‌نجام ده‌ت )
بارزانى دیاركر ژى كو زور به‌حس لسه‌ر ده‌ستورێ عیراقێ دهێته‌كرن و ل گوره‌ى ده‌ستورى ژى مه‌ مافێ ریفراندۆمێ هه‌یه‌ و گۆت ژى : ( مه‌ ب ره‌زامه‌ندى بریاردابوو كو د عیراقه‌كا مه‌ده‌نى و دیموكراسى و ئێكگرتى دا بژین به‌لێ ده‌ركه‌فت عیراق به‌روڤاژى وێ یه‌ و بویه‌ ده‌وله‌ته‌كا دینى و مه‌زهه‌بى ، و نها هه‌موو جیهان لسه‌ر خه‌ته‌ و ریفراندۆم ژى ئامرازه‌ داكو بو جیهانێ بێژین مه‌ دڤێت سه‌ربخوه‌ بین ، مه‌ هه‌رده‌م گوتیه‌ ئه‌گه‌ر به‌دیله‌ك جهێ ریفراندۆمێ بگریت ئاریشه‌ نینه‌ بهێته‌ پاشئێخستن ، به‌روڤاژى ریفراندۆم ناهێته‌ پاشئێخستن ، و نها زمان و دانوستاندنێن وان جودایه‌ و مه‌ چوو ئاریشه‌ ل گه‌ل جڤاكێ نیڤده‌وله‌تى نینه‌ به‌لكو مه‌ ل گه‌ل عیراقێ هه‌یه‌ ، ئه‌گه‌ر رێكه‌فتن ل گه‌ل عیراقێ هاته‌كرن كو جهێ ریفراندۆمێ گرت و گرنتیه‌ك بو بجهكرنا وێ هاته‌كرن دێ هێته‌ دێ ئاهەنگێن سەرکەفتنێ ل ڕوژا 25 ئیلونێ ئەنجام دەین ، هه‌تا نها به‌غدا نه‌هاتیه‌ پێش و جڤاكێ نیڤده‌وله‌تیش هه‌تا نها چوو به‌دیل نه‌داینه‌ , و ئه‌گه‌ر ل ڤان رۆژان ئه‌و به‌دیل نه‌هات دێ به‌رده‌وام بین لسه‌ر بانگه‌شێن خوه‌ و ئه‌گه‌ر به‌دیل هات ژى دیسان هه‌وه‌ ریفراندۆم كر و دێ بەردەوام بین لسەر بانگەشێن خوە)
دانوستاندنا مه‌ ل ل گه‌ل عیراقێ لسه‌ر پوست و بودجه‌ى نینه‌ و ئه‌و قوناغ بورى ، و پشتى ئه‌ڤان هه‌مو قوربانیێن گه‌لێ كوردستانێ داین ل سالا 2003 سه‌ركرداتیا سیاسیا كوردستانێ شاشى كر كو چوینه‌ به‌غدا ، ئەکەر عیراق هه‌ڤپشكى قبول نه‌كەت ، ئه‌م ژى خزمه‌تكارێ قبول ناكه‌ین ، و خه‌له‌تیا دوویێ یا کوردستانێ ژى ئه‌و بوویه‌ پشتى كو عیراقێ بودجه‌ برى و مه‌ ل وى ده‌مى ده‌وله‌ت بوون نه‌راگه‌هاند ، مافێ مه‌یه‌ پرسیارا مافێ خوه‌ بكه‌ین ، بارزانى هوسا گوت.
مه‌سعود بارزانى د درێژاهیا ئاخفتنێن خودا دیاركر ژى كو عیراق چوو بێژیت بلا بێژیت و بریارێن وێ ناگه‌هنه‌ كوردستانێ و تنێ نیه‌تا وان به‌رامبه‌ر گه‌لێ كوردستانێ دیار دبیت و گۆت ژى : ( ئه‌م ل گه‌ل جیرانێن خوه‌ هه‌رده‌م فاكته‌رێ سه‌قامگیریێ بوینه‌ و چوو جاران نه‌بوینه‌ جهێ هه‌ره‌شه‌ و هه‌ره‌شه‌یان ناكه‌ین و ژ كه‌سێ ژى قبول ناكه‌ین ، ریفراندۆم دوماهیا دنیایێ نیه‌ كو ئه‌ڤ هه‌موو گڤاشتنه‌ هه‌بن ، ریفراندۆم بتنێ پرسیاره‌كه‌ و دكارین قوناغا پشتى وێ دانوستاندنان بكه‌ین و زولمه‌كا مه‌زنه‌ رێك ل بریارا ئیرادا خه‌لكى بهێته‌كرن ، ئه‌م دژى توندوتیژیان نینین و چوو جاران ژى هێزێ بكارنائینین و ئه‌گه‌ر زوردارى ل مه‌ هاته‌كرن دێ به‌ره‌ڤانیێ ل خوه‌ كه‌ین)
ل بارا شێوازێ ده‌وله‌تا كوردستانێ گۆت: ( ئه‌ڤه‌ دێ ژلایێ لژنه‌كا تایبه‌ت بیت و ده‌وله‌تا كوردستانێ دێ فیدرالى و مه‌ده‌نى بیت و مافێن هه‌موو پێكهاته‌یێن ئاینى و نه‌ته‌وه‌یى تێدا هێنه‌ دیاركرن ، و ره‌نگه‌ زمانێ هنده‌ك عه‌ره‌بێن توندره‌و به‌رامبه‌ر گه‌لێ كوردستانێ بهێته‌كرن ، و نها هژماره‌كا زورا عه‌ره‌بان هاتینه‌ كوردستانێ وه‌كو ئاواره‌ و به‌لێ گه‌لێ كوردستانێ نابیت ره‌وشتێ خوه‌یێ پێكڤه‌ ژیانێ بپارێزیت و پێكڤه‌ وه‌كو برا دژین)
بارزانى داخواز ل جه‌ماوه‌رێ ده‌ڤه‌رێ كر كو ئالایێن هه‌موو پارت و لایه‌نێن سیاسى و وێنه‌یێن كه‌سایه‌تى بینن خوارێ و بتنێ ئالایێن كوردستانێ و وێنه‌یێن شه‌هیدان بهێنه‌ بلندكرن و ل دوماهیێ گۆت: ( سلاڤان بو گیانێ شه‌هیدان و پێشمه‌رگێن قاره‌مان دهنێرین)