ئه‌ڤرۆ نیوز ، نه‌وزاد هلۆرى:
د درێژاهیا ئوپه‌راسیوونا كونترۆلكرنا قه‌زا حه‌ویجه‌ و باشوورێ رۆژئاڤایێ كه‌ركوكێ ، ئه‌ڤرۆ ژى هژماره‌كا زور یا ئاوارێن حه‌ویجه‌ گه‌هشتنه‌ سه‌نگه‌رێن پێشمه‌رگه‌ى و هێزێن عیراقى ژى شیاینه‌ زێده‌تر ژ 26 گوندێن قه‌زا حه‌ویجه‌ كونترۆلك بكه‌ن.
رائید فه‌ریق جه‌وده‌ت شاكر ژ هێزا پولیسێن فیدرالى یێن عیراقێ بو ئه‌ڤرۆ نیوز دیاركر كو ئوپه‌راسیوونا كونترۆلكرنا قه‌زا حه‌ویجه‌ به‌رده‌وامه‌ و گۆت: (ئه‌ڤرۆ هێزێن عیراقى شیاینه‌ زێده‌تر ژ 26 گوندێن قه‌زا حه‌ویجه‌ كونترۆل بكه‌ن و ده‌ست ب سه‌ر هژماره‌كا چه‌كێن داعش بگرن كو زێده‌ترى سى َهزار پارچه‌یێن چه‌كێن جودا ودانه‌ ، و خه‌لكێ ئه‌وان ده‌ڤه‌ران ژى ئاواره‌ بووینه‌)
زێده‌تر گۆت: ( هێزێن عیراقى بتنێ 10كم نها ل سه‌نته‌رێ قه‌زا حه‌ویجه‌ دورن و به‌ر ب ئاراسه‌یێ حه‌ویجه‌ دچن)
ل گوره‌ى زانیاریێن ئه‌ڤرۆ نیوز هژماره‌كا زور یا گوندێن ده‌روبه‌رێن قه‌زا حه‌ویجه‌ به‌ر ب سه‌نگه‌رێن پێشمه‌رگه‌ى چوینه‌ كو زێده‌ترى هزار و 500 كه‌سان بخوڤه‌ دگریت و نه‌ڤیایه‌ بچنه‌ ژێر ده‌ستێ حه‌شد شه‌عبى ، ئه‌و ئاواره‌ گه‌هشتنه‌ گوندى َمه‌لا عه‌بدوللا كو ژ زاروك و ژنان پێكدهێن.

ئه‌ڤرۆ نيوز:

نڤيسينگه‌ها راگه‌هاندنا سه‌رۆك وه‌زيران روونكرنه‌ك د ده‌رباره‌ى سه‌ره‌دانا سه‌رۆك وه‌زيرێن عيراقێ بۆ فره‌نسا به‌لاڤكر و رادگه‌هينيت “مه‌ره‌م ژ سه‌ره‌دانێ، دانوستاندن نينه‌ ل دۆر ريفراندۆما نه‌يا دستوورى”.

د روونكرنه‌كێ دا كو ئه‌ڤرۆ رۆژا شه‌مبى 30ى ئيلۆنا 2017ێ يا نڤيسينگه‌ها راگه‌هاندنا سه‌رۆك وه‌زيرێن عيراقێ به‌لاڤكريه‌، هاتيه‌: “داخوازنامه‌ بۆ پاريس ژ لايێ وه‌زيرێن ژ ده‌رڤه‌ و ناڤخۆ يێن فره‌نسا ل رۆژا 26ى ئيلۆنا 2017ێ ئاراسته‌ى سه‌رۆك وه‌زيرێن عيراقێ هاتيه‌ كرن، ئه‌وى ده‌مێ به‌ياننامه‌يا فه‌رمى ژى هاتيه‌ به‌لاڤكرن كو داخوازنامه‌ هاتيه‌ قه‌بوولكرن”.

ب گۆره‌ى نڤيسينگه‌ها راگه‌هاندنا عه‌بادى “مه‌ره‌م ژ سه‌ره‌دانێ، ب هێزكرنا په‌يوه‌نديێن ناڤبه‌را فره‌نسا و عيراقێ و ته‌ركيز ل سه‌ر بزاڤێن شه‌رێ دژى داعش ل ده‌ڤه‌رێ يه‌”.

د پشكه‌كا دى يا روونكرنێ دا هاتيه‌: “د دووماهى په‌يوه‌نديا ناڤبه‌را سه‌رۆك وه‌زيرێن عيراقێ و سه‌رۆك كۆمارێ فره‌نسا ب چو ره‌نگه‌كى ئاماژه‌ ب پێدڤيا دانپێدانێ ب مافێن گه‌لێ كورد و زێده‌كرنا كێشان ژ لايێ به‌غدا نه‌هاتيه‌ كرن وه‌كو د ميديايێن كوردى دا به‌حس لێ هاتيه‌ كرن، به‌لكو ب هه‌ڤدژى ڤێ چه‌ندێ ئيدانه‌يا رژدبوونا سه‌ركرداتيا كورد هاتيه‌ كرن د ئه‌نجامدانا ريفراندۆمێ و روو ب رووبوونا ده‌ڤه‌رێ ب كاودانه‌كێ نه‌يێ بنه‌جهـ”,

ئه‌ڤه‌ د ده‌مه‌كى دايه‌ كو ميديا كوردى و فره‌نسا ب هه‌مان ره‌نگ به‌حس ل سه‌ره‌دانا عه‌بادى بۆ فره‌نسا كريه‌ و دبێژن كو بزاڤێن ئيمانوێل ماكرۆن، سه‌رۆك كۆمارێ فره‌نسا بۆ وێ چه‌ندێ يه‌ كاودانێن ده‌ڤه‌رێ ئاسايى ببن، ديسا ميديا فره‌نسا به‌حس ل وێ چه‌ندێ ژى كريه‌ كو ماكرۆن د په‌يوه‌نديا تله‌فۆنى دا ل گه‌ل عه‌بادى ل رۆژا 27ى ئيلۆنا 2017ێ ل گه‌ل وێ چه‌ندێ كو به‌حسا ئێكپارچه‌يا ئاخا عيراقێ كريه‌، ديسا به‌حسا مافێن كوردان ژى كريه‌”.