ئه‌ڤرۆ نیوز ، نه‌وزاد هلۆرى:
هێزێن پێشمه‌رگه‌ى ب هه‌ماهه‌نگى یا هێزێن سوپایێ عیراقێ ده‌ست ب هێرشه‌كێ كر بو كونترولكرنا ته‌ڤایا ناحیا عه‌یازیه‌ و ده‌ركرنا داعشێ ، و به‌رپرسه‌كێ پێشمه‌رگه‌ى دده‌تن دیاركرن كو هه‌تا نها زێده‌ترى 90% یا ناحیا عه‌یازیه‌ هاتیه‌ كونترولكرن.
سه‌مه‌دار رزا زێبارى ژ هێزا پێشمه‌رگێ كوردستانێ بو ئه‌ڤرۆ نیوز گۆت: (ئه‌ڤرۆ هێزێن پێشمه‌رگه‌ى ب هه‌ماهه‌نگى یا هێزێن سوپایێ عیراقێ ده‌ست ب هێرشه‌كێ كریه‌ بو كونترولكرنا ته‌ڤایا ناحیا عه‌یازیه‌ و ده‌ركرنا داعشێ ، و هه‌تا نها زێده‌ترى 90% یا ناحیا عه‌یازیه‌ هاتیه‌ كونترولكرن و هه‌ر ئه‌ڤرۆ ژى زێده‌تر ژ 10 چه‌كدارێن داعش هاتینه‌ كوشتن )
زێده‌تر گۆت: ( پێشره‌ویێن پێشمه‌رگه‌ى و سوپایێ عیراقێ د به‌رده‌وامن ، و نها هژماره‌كا داعش ل بلنداهیێن ناحیا عه‌یازیه‌ خوه‌ ڤه‌شارتیه‌ و زێده‌تر ل ده‌مێن شه‌ڤێ ده‌ردكه‌ڤن و ئارمانجا وان ژى ئه‌وه‌ كو بگه‌هن سوریا ، به‌لێ پێشمه‌رگه‌ ب چوو ره‌نگان رێكێ ب وان ناده‌تن)

ئەڤرۆ نیوز، نەوزاد ھلۆری:
بڕیارە ئەڤرۆ پشتی نیڤرۆ ئێک ژ مەزنترین کەرنەڤالێن جەماوەری بۆ سەربه‌خوەیا کوردستانێ ل قەزا ئاکرێ ب رێڤە بچیت کو بۆ ھەردو قەزایێن ئاکرێ و بەردەرەش ھاتیە رێکخستن. ئەندامەکێ رێکخستنا کەرنەڤالى ژى دیارکر کو رەنگە سەرۆکێ ھەرێما کوردستانێ ژی بەرھەڤ ببیت و گۆتارەکێ پێشکێش بکەت.
د ڤی واری دا ” فەرھەنگ ئەیوب ” ئەندامێ رێکخستنا کەرنەڤالا سەربه‌خوەیا کوردستانێ ل ئاکرێ و بەردەرەش بۆ ئەڤرۆ نیوز گۆت: (ئەڤرۆ رۆژا چارشەمبی رێکەفتی 13/9/2017 ل یاریگەھا ئاکرێ يا وه‌رزشى دێ مەزنترین کەرنەڤالا سەربه‌خویا کوردستانێ ھێتە ئەنجامدان، رەنگە مەسعود بارزانی سەرۆکێ ھەرێما کوردستانێ ژی بەرھەڤ ببیت و گۆتارەکێ پێشکێش کەت).
ئاشكه‌را ژى كر كو دێ کومەکا سترانان وەکو پشتەڤانی بۆ ریفراندۆم و سەربه‌خوەیا کوردستانێ ژ لایێ چەندین ھونەرمەندێن باکوور و باشوور و رۆژئاڤایێ کوردستانێ ھێنە گۆتن.
زێدەتر گۆت: (ھەموو بەرھەڤیێن کەرنەڤالى ھاتینەکرن و دھێتە پێشبینیکرن ژماره‌كا ئێكجار زۆر ژ ھەردو قەزایێن ئاکرێ و بەردەرەش و دەوروبەر بەرھەڤی کەرنەڤالى ببن).

ئه‌ڤرۆ نیوز، نه‌وزاد هلۆرى:

سه‌رۆكێ عه‌شیره‌تا زێبار ل سنوورێ قه‌زا ئاكرێ د په‌یامه‌كێ كو ئاراسته‌یێ عه‌شیره‌تێن سنوورێ قه‌زا ئاكرێ و به‌رده‌ڕه‌ش كریه‌ دخوازیت كو به‌ر ب پروسیا ریفراندۆمێ بۆ سه‌ربه‌خوه‌یا هه‌رێما كوردستانێ بچن و بێژن به‌لێ بۆ ریفراندۆمێ.
دڤى واری دا سه‌مه‌دار رزا زێبارى بۆ ئه‌ڤرۆ نیوز گۆت: (ئه‌ڤرۆ د په‌یامه‌كێ دا كو بو سه‌ركرده‌ و لایه‌نگیر و پێكهاته‌یێن عه‌شیره‌تێن سنوورێ قه‌زا ئاكرێ و به‌رده‌ره‌ش “زێبارى، سورچى، گۆڕان و هه‌ركى” هاتیه‌ ره‌وانه‌كرن تێدا داخوازێ ژ وان دكه‌ت كو ب هه‌موو شیانێن خوه‌ ڤه‌ پشته‌ڤانیا ریفراندۆمێ بو سه‌ربخوه‌یا كوردستانێ بكه‌ن و ده‌نگێ خوه‌ ب به‌لێ بده‌ن).
زێده‌تر گۆت: (گه‌لێ كوردستانێ و هێزێن پێشمه‌رگه‌ى شیان داعشێ ببه‌زینن و بشكێنن و ل سه‌ر وان د سه‌ركه‌فتى بن، پێدڤى یه‌ ب هه‌مان شێوه‌ ده‌نگى بۆ ریفراندۆمێ بده‌ن و ریفراندۆمێ ژى ب سه‌ربێخن، ب هه‌موو ڤیان و حه‌زژێكرن ڤه‌ ئه‌ڤرۆ ل یاریگه‌ها وه‌رزشى یا ئاكرێ به‌رهه‌ڤ بن بۆ پشته‌ڤانیكرنا پروسیا ریفراندۆمێ).