ئه‌ڤرۆ نیوز:
وه‌زیرێ ده‌رڤه‌یێ توركیا د سه‌ره‌دانا خوه یا ئه‌ڤرۆ دا بۆ هه‌رێمێ و كومبوونا ل گه‌ل سه‌رۆك بارزانى، به‌حسێ چه‌ندین پرسێن گرنگ كر، پشتى كومبوونێ د كونگره‌كێ رۆژنامه‌ڤانى دا سه‌باره‌ت گرتنا سنورێن خوه ل گه‌ل هه‌رێمێ، دیاركر ” لێكگوهارتنێن بازرگانى یێن د ناڤبه‌را مه و هه‌رێمێ، چ په‌یوه‌ندى ب ریفراندۆمێ ڤه نینه”
ئه‌ڤرۆ نیوز:
سه‌رۆك بارزانى ئه‌ڤرۆ پێشوازیا مه‌ولود چاوش ئوغلو وه‌زیرێ ده‌رڤه‌یێ توركیا كر، د دیداره‌كێ دا، بارزانى ئه‌گه‌رێن كورد پال داین كو بڕیارا ریفراندۆمێ بده‌ن بۆ وه‌زیرێ ده‌رڤه‌یێ توركیا دیاركر و راگه‌هاند” عیراقێ شه‌راكه‌ت و ده‌ستوور و ته‌وافوق پێشێل كر، له‌وا گه‌لێ كوردستانێ ژ ده‌وله‌تا عیراقێ بێ هیڤى بوو و ناخوازیت ب چو ره‌نگه‌كێ ئه‌زموونێن تال یێن بوورى دووباره بكه‌ت و گه‌لێ كوردستانێ به‌رپرس نه‌بوویه ژ وێ ره‌وشا نوكه په‌یدابووى، به‌لكو سیاسه‌ت و شاشیێن حكومه‌تا عیراقێ ئه‌گه‌رن”.
ئەڤرۆ نیۆز،زنار تۆڤی:
رۆژا چارشەمبێ 23 تەباخا 2017 ل سەلاحەددین ئەنجوومەنێ بلند یێ ریفراندۆمێ ب سەرپەرشتیا مەسعود بارزانی سەرۆکێ هەرێما کوردستانێ و ب ئامادەبوونا كۆسرەت رەسول عەلی كۆمبوونا خوە یا ئاسایی بەست.
د وێ كۆمبوونێ دا ناڤەرۆکا سەرەدانا وەزیرێ بەرەڤانیا ئەمریكا بۆ هەرێما كوردستانێ و هەلویستێ هەرێمی و نێڤدەولەتی هەمبەری ریفراندۆمێ هاتە گوتۆبێژ کرن،پشتی گوهداریکرنێ ل راپۆرت و دەرئەنجامێن گوتۆبێژا شاندێ دانوستاندكارێ هەرێما كوردستانێ و حوکمەت و لایەنێن سیاسی یێن عێراقێ و بالیۆزخانێن ل بەغدا،كۆمبوون گەهشتە ڤان دەرئەنجامێن ل خوارێ :
ئێك: كۆمبوونێ پێزانین بۆ كار و ئەدایا ئێكگرتی یا شاندێ دانوستاندكار ل بەغدا هەبوو،جەخت ل بەردەوامیا گوتۆبێژ و دانوستاندنێ ل گەل بەغدا كریە دەربارەی ریفراندۆمێ و ئایندەیێ پەیوەندیێن دناڤبەرا هەرێمێ و بەغدا.
دو: دروستكرنا كۆمیتە و رێوشوێنێن پراكتیکی بۆ پڕۆسا ریفراندۆمێ ب لەزتر لێ بکەن بۆ ئەنجامدانێ ل دەمێ خوە دا،راگەهاندن و شیانێن حزبان بۆ پالپشتیكرنا ریفراندۆمێ هەماهەنگ بن.
سێ: كۆمبوونێ پشتگیریا خوە دوپاتكریە بۆ هەولێن حوکمەتا هەرێمێ بۆ چاكسازیێ و گرتنەبەرا رێوشوێنێن پێدڤی بۆ باشتركرنا مووچە و بارێ ژیانا وەلاتیان.
چار:ئەنجوومەنێ بلند یێ ریفراندۆمێ سەرەرای جەختكرنێ ل مافێ رەوایێ گەلێ كوردستانێ ژ دیاركرنا چارەنڤیسی، تێگەهشتنا تەمام بۆ هەلویستێ نێڤدەولەتی هەیە،ل بەرامبەر ریفراندۆمێ و ئەوێ ژی دوپات دکەت كو ریفراندۆمێ هیچ كاریگەریا نەرێنی ل سەر شەرێ داعش نابیت و گەلێ كوردستانێ ل سەنگەرێ پێشیا شەرێ تیرۆرێ دێ مینیت و ل شەرێ تیرۆرێ دا ئامادەیە هەموو جۆرە هەڤکاریەکێ و هەماهەنگیێ و گفتوگویەکێ ل گەل هەڤپەیماناندا.
پێنج: كۆمبوونێ باوەریەکا تەمام ب شەراكەتا راستەقینە یا پێكهاتێن نەتەوەیی و ئاینی یێن كوردستانێ هەیە و پشتگریا هەموو جۆرە گرنتیەکێ دکەت بۆ دەستەبەركرنا مافێن وان.
شەش: پێكئینان و هنارتنا شاندێ دانوستاندكار بۆ وەلاتێن جیران و جیهانێ بێخیتە بەرنامێ كارێ ئەنجوومەنێ بلند یێ ریفراندۆمێ.
حەفت:د ماوەیەكێ نێزیكدا كۆنفرانسەك بۆ نڤیسەر و ئەدیب و رۆژنامەنڤیسێن دەڤەرێ و رۆژهەلاتا ناڤەراست ب زمانێ عەرەبی ل هەرێما كوردستانێ بهێتە سازکرن ل سەر پرنسیپێن دیموكراتی و مافێ چارە نڤیسێ.
ئەنجوومەنێ بلند یێ ریفراندۆمێ
23_ 8_ 2017
ئه‌ڤرۆ نیۆز،گوهدار زێبارى:
ئه‌ڤرۆ 23 – 8 – 2017 ل ده‌م ژمێر 4.30 ئێڤارى ل رووبارێ رێزان ل ده‌ڤه‌را بارزان كه‌سه‌ك خه‌ندقی، پشتى كو تیمێن به‌ره‌ڤانیێ ته‌رمێ وى ئینایە دەر،تەرمێ وی بۆ كه‌س و كارێن وى هاته ره‌وانه‌كرن.
یوسف حه‌سه‌ن وه‌ك شایەتحاله‌ك و كه‌سه‌كێ نێزیك وى ل دوور ڤێ روودانێ بۆ ئەڤرۆ نیۆز دبێژیت: ئه‌ڤرۆ ب مه‌ره‌ما گه‌شته‌كێ بوو ده‌ڤ قوتابی و هه‌ڤالێن خوە ل رێزان پشتى نانخوارنا نیڤرۆ ئه‌ڤ كه‌سه قه‌ستا سه‌ر رووباری دكه‌ت ب مه‌ره‌ما شووشتنا ده‌ستێن خوە، لێ ل سه‌ر لێڤا رووبارى دته‌حسیت و دكه‌ڤیته دناڤ رووبارى دا و گیانێ خوە ژ ده‌ست دده‌ت.
زێده‌تر گوت : هه‌ژار عه‌زیز ژ دایكبوویێ سالا 1981 یە و ئاكنجیێ ده‌ڤه‌را ئاكرێ یه و ماموستایێ په‌یمانگه‌ها ته‌كنیكى یا ئاكرێ بوویه و خودان خێزانه و دوو زاروك ژى هه‌نه.
ئەڤرۆ نیوز ، نەوزاد هلوری:
ئەو ئەرد هەژا ئێڤاریا ئەڤرو چەند دەڤەرێن هەرێما کوردستانێ هژاندین کو جهێ سەرەکی قەزا رانیێ و دوکان بوویە ، هەشت کەس ل رانیێ بریندارکرن و زیانێن زورێن ماددی پشت خوە هێلان.
هندرین رەواندوزی ئاکنجیێ قەزا رانیێ تایبەت بو ئەڤرو نیوز گۆت: ( ژبەر سەدەما ئەرد هەژا ئەڤرو یا قەزا رانیێ هەشت کەس ل سەنتەرێ قەزایێ برینداربوینە و رەوانەیێ نەخوشخانێ کرینە ، ژبەر دژواریا برینێن وان هەموو هاتینە نڤاندن)
زێدەتر گۆت: ( ژبلی زیانێن گیانی د هەمان دەم دا زیان ب سەدان ترومبێل و سەدان دوکان بازار و ئاڤاهیێن خەلکی و حکومی گەهشتینە)
ئەرد هەژا رانیێ پلەیا وێ 5،6 بویە و ل دەمژمێر 5:1 روودایە ، و ژ ئەنجامێ وێ ئەرد هەژێ سلێمانی و دهوک و هەولێر و گەرمیان و شێخان ۆ رەواندوز و قەلادزێ و ئامێدیێ و سوران ژی هژیایە.
ئەڤرۆ نیوز ، هلوری:
ئێڤاریا ئەڤرۆ ل چەند دەم و جهێن ژێکجودا ل هەرێما کوردستانێ چەند ئەردهژ روویدان.
ل پارێزگەها هەولێر و سلێمانی و دهوک و قەزا سوران و ئامێدیێ و گەرمیان و رانیێ و رەواندوز و شێخان ئەرد هژ روویدا بەلێ هەر ئێک ژ وان ل دەمە و پیڤەرەکێ.
ل گۆرەی زانیاریان جهێ سەرەکیێ ئەردهەژێ قەزا دوکان و رانیە بوویە و دەڤەرێن دن هەست پێ کریە کو ئەو ژی دەمژمێر 5:1 خولەک بوویە و هێزا وێ ژی 5،6 پلە بو ل گورەی پیڤەرا رێختەر.
هندرین رەواندوزی ئاکنجیێ قەزا رانیێ بو ئەڤرو نیوز گۆت: ( ئەرد هەژا رانیێ نێزیکێ چوار چرکەیان ڤەکێشا و زیانێن زورێن ماددی گەهشتینە بازار و دوکان و ئاڤاهیێ حکومی و وەلاتیان، هەشت کەس ژی دەخلێ نەخوشخانێ کرینە(
ئەڤرۆ نیۆز،زنار تۆڤی:
شەڤا دەربازبووی سێ تیرۆرستێن خوەکوژێن داعش ب مەرەما خوە رەدەستکرنێ دڤیان خوە نێزیکی سەنگەرێن پێشمەرگێ کوردستانێ بکەن و خوە دناڤا وان دا ب پەقینن و زیانێ ب گەهیننێ،لێ هەر زوو پێشمەرگێن کوردستانێ ب پلانا وان حەسیان و ئەو تیرۆرست کوشتن.
ئدریس شەعبان غەفار بەرپرسێ رێکخستنا فەرماندەیا دهۆکێ و ئەندامێ فەرماندەیا دهۆکێ بۆ ئەڤرۆ نیۆز دیارکر:کو شڤێدی ل 22_8_2017 ل دەمژمێر 9 شەڤێ ل میحوەرێ رۆژئاڤایێ دیجلە و ل گۆندێ گۆل محەمەد سێ تیرۆریستێن خوەکۆژێن داعش ب بەهانەیا خوە رادەستکرنێ بۆ سەنگەرێن سۆپایێ 7 یێ ب سەر فەرماندەیا دهۆکێ ڤە دڤیان خوە د ناڤا هێزێن پێشمەرگەی ب پەقینن .
هەروەسا گۆت ژی:لێ ل گۆر پێزانینێن هەوالگیریا فەرماندەیا دهۆکێ و ب هەماهەنگی ل گەل سۆپایێ 7 یا فه رماندەیا دهۆکێ ئەو هەرسێ تیرۆرست کەفتنە بۆسەیا پێشمەرگێن قارەمان و هەر سێ دەملدەست هاتنە کۆشتن.
ئەڤرۆ نیۆز،زنار تۆڤی:
دادگەها بلند یا عەرەبستانا سعودیە راگەهاند کو رۆژا ئەینیا بهێت 1-9-2017 ئێکەم رۆژا جەژنا قوربانێ یە.
میدیا یا فەرمی یا عەرەبستانا سعودیە بەلاڤکریە،کو دادگەهێ هەیڤا زیلحیجە بۆ سالا 1438 یا کۆچی دیتیە و ئاماژە ب هندێ ژی دایە کو رۆژا چارشەمبی 23 تەباخێ ئێکەم رۆژا هەڤا زیلحیجەیە.
ل دووڤ دادگەها سعودیە راوەستان ل سەر چیایێ عەرەفێ دێ رۆژا پێنجشەمبیا داهاتی 9 هەیڤێ بیت،کو هەڤدەمە ل گەل رۆژا 31 هەیڤا تەباخا 2017 ، لەورا رۆژا 1 ئیلۆنا 2017 کو دبیتە رۆژا ئەینی یا بهێت،دێ بیتە ئێکەم رۆژا جەژنا قوربانێ.
ئەڤرۆ نیۆز،زنار تۆڤی:
ئەنجۆمەنێ بلند یێ ریفراندۆما سەربەخۆیا کوردستانێ دێ کۆمبیت و دێ دانوستاندنێ ل سەر ئەنجامێن سەرەدانا شاندێ وی ئەنجۆمەنی بۆ بەغدا کەت.
ئەڤ کۆمبوونە دێ ئەڤرۆ چارشەمبی 23/8/2017 ل سەلاحەدین ب سەرپەرشتیا مەسعود بارزانی، سەرۆکێ هەرێما کوردستانێ و ب ئامادەبوونا ئەندامێن ئەنجۆمەنێ بلند یێ ریفراندۆما سەربەخۆیێ هێتە ئەنجامدان.
بریارە د وێ کۆمبوونێدا گفتوگۆ ل سەر ئەنجامێن سەرەدان و کۆمبوونێن شاندێ ئەنجۆمەنێ بلند یێ ریفراندۆمێ ل گەل بەرپرسێن بلند یێن عێراقێ بهێتەکرن.
رۆژا دوشەمبی 15\8\2017، شاندێ ئەنجۆمەنێ بلند یێ ریفراندۆما سەربەخۆیێ بۆ گفتوگۆکرنێ ل گەل سەرکردێن عێراقێ دەربارەی ریفراندۆما سەربەخۆیا کوردستانێ سەرەدانا بەغدا یا پایتەختێ عێراقێ کریە.
وی شاندێ کوردستانێ بۆ گەهاندنا داخوازیا خەلکێ کوردستانێ بۆ ئەنجامدانا ریفراندۆما سەربەخۆیێ سەرەدانا بەغدا کریە،ژبلی بەرپرسێن بلند یێن عێراقێ،ل گەل باڵیۆزێن وەلاتێن ئەمریکا و ئێرانێ و تورکی ژی کۆمبووینە.
نيشاندان