ئه‌ڤرۆ نیۆز،ره‌مه‌زان هه‌رنى:

رێڤه‌به‌رێ گشتی یێ وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ دیاركر:وه‌ك وه‌زاره‌ت چاڤه‌رێ ده‌مه‌ك گونجایێ دكه‌ین بۆ ئینانا ده‌رێ یێن گورێن ب كوم یێن كوردێن ئێزدى ئه‌وێن ل 3/8/2014 و ل دووڤ دا هاتینە كوشتن ل چه‌ندین جهێن شنگالێ و كومه‌لگه‌هێن ده‌ردور کو ب كوم هاتینە ڤه‌شارتن.

به‌ره‌ڤان حه‌مدى رێڤه‌به‌رێ گشتی یێ وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ بۆ ئه‌ڤرۆ نیۆز خویاكر:پشتى وێ تاوانا مه‌زن ئه‌وا ل هەیڤا تەباخێ ل سالا 2014 ب سه‌ر كوردێن ئێزدى دا هاتى و ب سه‌دان وەلاتى ده‌ربەده‌ربوون و كه‌فتنه‌ ده‌ستێن داعشان و پاشی هاتنه‌ كوشتن و ل گورێن ب كوم هاتینە ڤه‌شارتن ل شنگالێ و ده‌ردورێن وێ،كو ل گورى زانیاریا 39 گورن و 14 ژ وان ل سه‌ر ئه‌ردى نه‌ جهێن وان دیارن و 25 گورێن دن ژى نه‌دیارن و ل گورەى پلانێن وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ پێدڤیه‌ هه‌موو گور بهێنه‌ دیتن و ڤه‌كرن.

به‌ره‌ڤانى ل دۆر هژمارا كه‌سێن ناڤ گورێن ب كوم خویاكر ژی:هه‌تا نوكه‌ دیارنینه‌ كا هه‌ر گوره‌كێ چه‌ند كه‌س تێدا هاتینه‌ ڤه‌شارتن،ژبه‌ركو ئه‌و ده‌لیڤه‌یا ئه‌منى نه‌بوویه‌ کو سه‌ره‌دانا وان جهان بكه‌ین،به‌لێ ل دووڤ به‌رنامه‌یه‌كێ دارشتى هه‌موو گورێن ب كوم یێن كوردێن ئیزدى دێ هێنه‌ راكرن كو سالا 2014 پشتى چه‌ند مه‌هه‌ك بورین ل سه‌ر وێ تاوانێ 3 گورێن ب كورم هاتینه‌ دیتن و راكرن ولێگه‌ریان و بزاڤ بۆ گورێن مایى ژێ دبه‌رده‌وامن.

قه‌زا شنگالێ دكه‌ڤیته‌ روژئاڤا باشورێ كوردستانێ و سه‌ر ب پارێز گه‌ها مووسل ڤه‌ یه‌ 120 كلم ل سه‌نته‌رێ پارێزگه‌هێ دووره‌،ژمارا ئاكنجیێن وێ به‌ریا هاتنا داعش 412 هزار كه‌س بوون ئێزدى و موسولمان و مه‌سیحى و عه‌ره‌ب ل شنگالێ دژیان سێ ناحیه‌ هه‌بوون،ئەو ژی(سنونێ،گرعوزێر ،بلێج)بوون، ل 3 تەباخا 2014 ژلایێ تیرورستێن داعش هاتنه‌ گرتن 6 هزار و 417 كه‌س هاتنه‌ ده‌سته‌سه‌ركرن و هزار و 293 كه‌س ژى ژ ژن و زارۆک و زه‌لامان هاتنه‌ كوشتن و ل گورێن ب كوم دا هاتنه‌ ڤه‌شارتن،د ئۆپه‌راسیونه‌كا تایبه‌ت یا پێشمەرگێ کوردستانێ دا ل 12/11/2015 شنگال ب ته‌مامى هاته‌ ئازاد كرن.

ئه‌ڤرۆ نیۆز،ره‌مه‌زان هه‌رنى :

نوونه‌رێ كوردێن شه‌به‌ك ل جڤاتا نوونه‌رێن عیراقێ دیار كر،باشترین دیارى و داخوازیا مه‌ ل كوردستانێَ ئه‌وه‌ كو رێیا ڤه‌كه‌ن ئه‌و كوردێن ل سنورێ سوپاى عیراقى و حه‌شدا شه‌عبى بشێن ل وى ساترى ده‌رباز بن كو ل ناڤبه‌را گوندێن شه‌به‌كا هاتیه‌ دروست كرن و كوردێن شه‌به‌ك ب گشتى ل گه‌ل رێفراندوما كوردستانێ دانه‌،ئەم دخوازین ل عیراقێ جودابین ژبلى نه‌خوشیێ مه‌ چو مفایه‌ك ل عیراقێ نه‌دیتیه‌ نوكه‌ پتر ل 200 كوردێن شه‌به‌ك ب دیل ل ده‌ست داعش دانه‌.

سالم جمعە نوونه‌رێ كوردێن شه‌به‌ك ل جڤاتا نونه‌رێن عیراقێ بۆ ئه‌ڤرۆ نیوز دیارکر:پشتى رزگاركرنا گوند و ده‌ڤه‌رێن شه‌به‌كا ل ده‌شتا مۆسل نوکە ئه‌و ده‌ڤه‌ر یێن هاتینە ئاڤه‌دانکرن یێن بووینە دوبه‌ش به‌شه‌ك ل ژێر ده‌سهه‌لاتا هێزێن پێشمه‌رگه‌ى دایه‌ و به‌شه‌ك ل ژێر كونترۆلا سوپایێ عیراقێ دایه‌ دناڤ وان دا ژى حه‌شدا شه‌عبى كو گوندێن شه‌به‌كا بووینه‌ دوبه‌ش و دیواره‌ك ناڤ به‌را وان دا هاتیه‌ دروستكرن، به‌شه‌ك سه‌ر ب كوردستانێ ڤەیه‌ و به‌شه‌ك سه‌ر ب حوکمه‌تا ناڤه‌ندى ڤەیە و هه‌موو شه‌به‌ك دژى وێ دابه‌شكرنێ نه‌ ئه‌وا نوکەل ناڤبه‌را شه‌به‌كا دروست بووى،ل ده‌شتا مۆسل مه‌ هه‌میا دڤێت ڤه‌گه‌رینه‌ سه‌ر هه‌رێما كوردستانێ وه‌ك دیار نوکە هه‌موو پێكهاته‌یێن ده‌شتا مووسل ل گه‌ل به‌غدا نه‌ماینه‌ دى َداخوازێ كه‌ین پاریزگه‌هه‌ك بۆ مه‌ بهێته‌ دامه‌رزاندن.

سالم جمعە دیارکر ژی:مه‌ داخواز كریه‌ و ئیمزا ژى كوم كرینه‌ كو ناحیه‌ك بهێته‌ دامه‌رزاندن بو كوردێن شه‌به‌ك ل گه‌ل چه‌ندین ناحیێن دى بۆ كو مه‌ نه‌ته‌وێن دى ل ده‌شتا مووسل ژبه‌ركو ئه‌م خوه‌ ب كوردێن ره‌سه‌ن دزانین وه‌ك شه‌به‌ك .
سالم جمعه‌ خویاکر ژی،مه‌ داخوازكریه‌ ب فه‌رمى كو ئه‌و ساترێ ب ره‌نگێ دیوار ناڤبه‌را گوندێن شه‌به‌كا دا هاتیه‌ دروست كرن بهێته‌ راكرن ژبه‌ركو 26 گوندێن لایێ پێشمه‌رگه‌ى د ئارامن به‌لێ ئه‌و 35 گوندێن دكه‌ڤنه‌ لایێ دى یێ ساترى كو سوپایێ عیراقێ و حه‌شدا شه‌عبى پاراستنا وان ده‌ڤه‌را دكه‌ت و مه‌ترسى هه‌یه‌ لسه‌ر ژیانا كوردێن شه‌به‌ك،له‌ورا داخواز دكه‌ین هه‌مو كوردێن شه‌به‌ك ڤه‌گه‌رنه‌ سه‌ر هه‌رێما كوردستانێ،هه‌روه‌سا كوردێن شه‌به‌ك فه‌وجه‌ك هه‌یه‌ نوكه‌ فه‌وجه‌كا دێ د مه‌شق و راهێنانان دایه‌ مه‌دڤێت ئه‌ڤه‌ ب هویرى چاڤدێریا ده‌شتا موسل بكه‌ن،مه‌ وه‌ك كوردێن شه‌به‌ك ب فه‌رمى ل جڤاتا نونه‌رێن عیراقى دیار كریه‌ كو مه‌نه‌ڤێت پشتى هنده‌ نه‌خوشیێ جاره‌كادى ل عیراقى بین و ل گه‌ل حوکمه‌تا به‌غدا بین.

نوونه‌رێ شه‌به‌كا ل جڤاتا نوونه‌رێن عیراقێ دیارکر ژی:ل گورى وێ ئامارا لبه‌ر ده‌ست هژمارا كوردێن شه‌به‌ك ل ده‌شتا مووسل 450 بۆ 500 هزارایه‌،هه‌وره‌سا ل شه‌رێ دژى داعش و قاعیده‌ 1487 كوردێن شه‌به‌ك هاتینه‌ كوشتن و 217 كوردێن شه‌به‌ك ل ده‌ستێ داعش دانه‌ وه‌ك دیل و ئه‌م چۆ لێ نزانین كا ره‌وشا وان چه‌وایه‌.

ئه‌ڤرۆ نیۆز،زنار تۆڤى:

په‌یڤدارێ ده‌سته‌یا گشتى یا گه‌شتوگۆزارێ ل هه‌رێما كوردستانێ رادگه‌هینیت كو وه‌كى جه‌ژنێن بورى ئاماده‌كارى بۆ پێشه‌وازیكرنێ ل گه‌شتیاران هاتیه‌ كرن و ئه‌ڤ ساله‌ هه‌تنا گه‌شتیاران بۆ هه‌رێما كوردستانێ د زێده‌بوونێ دایه‌.

نادر رۆستى په‌یڤدارێ ده‌سته‌یا گشتى یا گه‌شتوگۆزارێ ل هه‌رێما كوردستانێ بۆ ئه‌ڤرۆ نیۆز دیاركریه‌:كو ل دووڤ پلانا ده‌سته‌یا گشتى یا گه‌شتوگۆزارێ دڤێ جه‌ژنێ ژى دا و ب هه‌مان شێوه‌ ئاماده‌كارى هاتینه‌كرن ژلایێ رێڤه‌به‌ریێن گشتى و رێڤه‌به‌ریێن باژێران ب هه‌ماهه‌نگى ل گه‌ل پارێزگه‌هان،دیسا فه‌رمانگه‌ه و لایه‌نێن په‌یوه‌ندیدار و لیژنێن پێشه‌وازیێ و سه‌رپه‌رشتیێ و دووڤچوونێ ژى بۆ جهێن گه‌شتیارى هاتینه‌ دروستكرن،هێشتا دبێژیت:ژ جه‌ژنا ره‌مه‌زانێ هه‌تاكو نوكه‌ ل ده‌رگه‌هێن گۆمركى یێن هه‌رێما كوردستانێ كار ئاسانى بۆ هاتنا گه‌شتیاران دهێته‌كرن،ئه‌ڤێ ژى وه‌كریه‌ كو ل جه‌ژنا ره‌مه‌زانێ هه‌تاكو نوكه‌ رۆژانه‌ 5 هه‌تاكو 8 هزار گه‌شتیاران بهێنه‌ هه‌رێما كوردستانێ،هه‌روه‌سا ئه‌ڤ هژمارا گه‌شتیاران یا دلخۆشكه‌ره‌،چونكى پتریا جهێن گه‌شتیارى ب ره‌نگه‌كێ به‌رده‌وام هژماره‌كا زۆر یا گه‌شتیاران لێ هه‌نه‌.

په‌یڤدارێ ده‌سته‌یا گه‌شتوگۆزارێ ل هه‌رێما كوردستانێ زێده‌تر دبێژیت:د جه‌ژنا قوربانێ دا ل سالا بورى 213 هزار گه‌شتیار د ماوێ 10 رۆژان دا هاتبوونه‌ كوردستانێ،دیسا دهێته‌ چاڤه‌رێكرن كو ئه‌ڤ ساله‌ هژمارا گه‌شتیاران ژ جه‌ژنا قوربانێ ل سالا بورى گه‌له‌ك زێده‌تر بیت،هه‌روه‌سا د سالا بورى دا ملیۆنه‌ك و 600 هزار گه‌شتیار هاتینه‌ هه‌رێما كوردستانێ،هه‌كه‌ ئه‌م ڤێ چه‌ندێ به‌راورد بكه‌ین ل گه‌ل سالا 2015 رێژا وان 100% بلندبوویه‌ و گۆت ژى:ل دووڤ پلانا ده‌سته‌یا گه‌شتوگۆزارى دهێته‌ چاڤه‌رێكرن كو د سالا 2017 پتر ژ 2 ملیۆن گه‌شتیاران بهێنه‌ هه‌رێما كوردستانێ،ناڤهاتى ئه‌و ژى دیاركر:كو د 6 هه‌یڤێن بورى دا یێن سالا 2017 هه‌تاكو نوكه‌ ملیۆنه‌ك و 450 هزار گه‌شتیار هاتینه‌ هه‌رێما كوردستانێ،ئه‌ڤ چه‌نده‌ ئاماژێ ب هندێ دكه‌ن،كو هژمارا گه‌شتیاران ل سالا 2017 دا به‌راورد ب سالا 2016 دا گه‌له‌ك زێده‌بوویه‌،دیسا پتریا وان گه‌شتیاران ژ ناڤه‌راست و ژێریا عێراقێ دهێن.

ناڤهاتی ئه‌و چه‌ند ژى گۆت:مه‌ وه‌ك ده‌سته‌یا گه‌شتوگۆزارێ پلانا خوه‌ هه‌تاكو سالا 2025 دانایه‌،هه‌موو سالان ئه‌م ل دووڤ وێ پلانا ستراتیجى دچین و ل دووڤ وێ پلانا مه‌ دارێژتى ئه‌م كار دكه‌ین،ژ پێخه‌مه‌ت هه‌رێما كوردستانێ پشت به‌ستنێ ل سه‌ر كه‌رتێ گه‌شتوگۆزارى ژى بكه‌ت،دیسا ئه‌م گه‌له‌ك د گه‌شبینین ل گۆره‌ى وێ پلانا مه‌ داناى،ژبۆ پێشخستنا كه‌رتێ گه‌شتوگۆزارى ل هه‌رێما كوردستانێ،له‌ورا سال بۆ سالێ رێژا گه‌شتیاران بۆ هه‌رێما كوردستانێ زێده‌تر دبیت و دیسا جهێن گه‌شتیارى ژى دهێنه‌ چێكرن.

سه‌باره‌ت هندێ كو پتریا گه‌شتیاران سه‌ره‌دانا هه‌ولێرێ دكه‌ن ژ سلێمانیێ و دهوكێ نادر رۆستى دبێژیت:هه‌ر پارێزگه‌هه‌كێ سرۆشتێ خوه‌ یێ تایبه‌ت هه‌یه‌،هه‌روه‌سا پتریا گه‌شتیاران دهێنه‌ هه‌ولێرێ پاشى سلێمانیێ و دهوك ل دووڤ دا دهێت،هاتنا پتریا گه‌شتیاران بۆ هه‌ولێرێ بۆ هندێ بوویه‌،چونكى هه‌ولێر پایته‌ختێ هه‌ریمَا كوردستانێ یه‌ دیسا ل هه‌موو جیهانێ گه‌شتیار پتر قه‌ستا پایته‌ختى دكه‌ن و هه‌روه‌سا هه‌ولێر وه‌كى سه‌نته‌ره‌كى دكه‌ڤیته‌ دناڤبه‌را سلێمانیێ و دهوكێ دا،دیسا جهێ مانا گه‌شتیاران ل هه‌ولێرێ دو هنده‌یا دهوكێ و سلێمانیێ یه‌،چونكى ل دهوكێ 70 ئۆتێل هه‌نه‌،لێ ل هه‌ولێرێ 270 ئۆتێل هه‌نه‌ و ئه‌ڤان تشتان وه‌كریه‌ كو خه‌لك پتر قه‌ستا هه‌ولێرێ بكه‌ن.

په‌یڤدارێ ده‌سته‌یا گەشتی یا گه‌شتوگۆزارێ ل هه‌رێما كوردستانێ گۆت ژى:پشتى شه‌رێ داعشێ پارێزگه‌ها دهوكێ ژلایێ گه‌شتیارى ڤ هاتیه‌ دۆرپێچكرن،چونكى ئه‌و گه‌شتیارێن ژ عێراقێ دهاتنه‌ دهوكێ ب رێیا مۆسلێ دهاتن،له‌ورا ژبه‌ر نه‌مانا رێیا مۆسلێ و گرتنا ژ یلاێ داعشان ڤه‌ وه‌كریه‌ كو گه‌شتیار نه‌ شیان د مۆسلێ را بهێنه‌ دهوكێ،هه‌ر چه‌نده‌ ئه‌ڤ ساله‌ ژ پار پتر گه‌شتیار هاتینه‌ پارێزگه‌ها دهوكێ ژى.

ئەڤرۆ نیۆز،زنار تۆڤی:

حاكمێ مه‌ده‌نی یێ ئه‌مریكا ل عێراقێ (پۆل بریمه‌ر) د روونشتنەکێدا ل ‌ناڤا وه‌زاره‌تا ده‌رڤە یا وەلاتێ خۆ دا گۆتیە:هه‌موو ئه‌وێن ل عێراقێ من ته‌عامول ل ‌گه‌ل دا د‌كر،كو‌ خۆ وه‌ك سیاسه‌تمه‌دار و نیشتیمان په‌روه‌ر نیشان ددا،د راستیدا د وەسا نەبوون،به‌لکو هه‌میان كار بۆ به‌رژه‌وه‌ندیا خۆ یا تایبەت و یا حزبا خۆ د‌كر.

به‌شەکێ زۆر ژ وان زەلامێن ئێرانێ و به‌شەکێ دی ژی زەلامێن وەلاتێن كه‌نداڤی بوون،لەورا‌ ب پێكه‌نین و ب ‌شێوه‌یه‌كی بازاری من ته‌عامول ل ‌گه‌ل وان دکر،ل گەل هندێ ژی سیفه‌تەکێ لاستیكی وان هه‌بوو،ب هه‌می تشتەکێ رازی دبوون،چونكی‌ ل ‌سه‌ر سفرا حازر روونشتبوون،كه‌سێ ژ وان جورئه‌تا هندێ نەبوو،بێژنە من یان ژی بێژنە ئه‌مریكا نه‌خێر،لەورا زۆر جارا بێی ئەز وان ئاگەهدار بکەم و بێی ره‌زامه‌ندیا ‌وان من بریار ددا.

ژ بلی‌ (سه‌رۆك بارزانی) كو هه‌یبه‌ت و مەزنی و كارێزما و دلسۆزیا وی مرۆڤی‌ بۆ گه‌لێ وی،ئەم وەلێکربووین کو ئەم نەدشیاین بەحسێ كوردستانێ ژی بكه‌ین،چونكی ب حه‌قیقه‌ت بۆ به‌رژه‌وه‌ندیا كوردستانێ كار د‌كر،هه‌ر بابه‌تەکێ په‌یوه‌ندی ب كورد و كوردستانێ ڤە هه‌با‌،بێی ره‌زامه‌ندیا (بارزانی) مە نە دشیا ‌هیچ بریارەکێ بده‌ین،چه‌ند جاران ژی زۆر ب‌ توندی ژ ‌من و ژ ئه‌مریكا ژی توره‌ بوویە ل ‌سه‌ر پێشمه‌رگەی و ناڤێ پێشمه‌رگەی‌ و كه‌ركوكێ و ئێكپارچه‌یا عێراقێ و چاره‌نڤیسێ گه‌لێ كوردستانێ،لەورا من و سه‌رۆك (جۆرج بۆش)ی ژی رێزەکا تایبه‌ت و حسێبەکا جۆدا مە بۆ وی دكر.