ئەڤرۆ نیوز ، نەوزاد ھلۆری:
ئێڤاریا ئەڤرۆ ھێزێن پێشمەرگەی شیان زێدەتری 600 چەکدارێن داعش دناڤ ئاوارێن قەزا تەعەلفەر ل ناحیا عەيازیە دەستەسەر بکەن.
دڤی واریدا نەقیب بێدار زێباری ژ ھێزا پێشمەرگێ پاراستنا ژینگەھا دھۆک ل سنوورێ قەزا تەلەعفەر تایبەت بو ئەڤرۆ نیوز گۆت: ( ئەڤرۆ سپێدێ ھێزێن پێشمەرگەی شیان زێدەتری 15 خوکوژێن داعش دەستەسەر بکەن کو دڤیا دناڤ رێزێن پێشمەرگەی خوە ب تەقینن ، ئەڤە زێدەباری دەستەسەرکرنا زێدەتری 600 چەکدارێن دن یێن داعش ل سنوورێ ناحیا عەيازیە یا سەر ب قەزا تەلەعفەر ل ئێڤاریا ئەڤرۆ دا و دەستەسەرکرنا وان ژی بەردەوامە)
زێدەتر گۆت: ( پرانیا ئەو چەکدارێن کو ھاتینە گرتن چ ئەو یێن کو دڤیا خوە ب تەقینن یان ژی ئەوێن کو دناڤ ئاوارەیان دا ڤیا بگەھن سەنگەرێن پێشمەرگەی بیانی بوون)
بێدار زێباری د درێژاھیا ئاخفتنێن خودا گۆت ژی کو ھێشتا ھژمارەکا زورا چەکدارێن داعش ل سنووێ ناحیا عەيازیە ماینە و گۆت ژی : ( ھەموو ئەو چەکدارێن کو نھا ل ناحیا عەيازیە ماین ل دەڤەرێن چیایی دانە کو ئەو ژی جھەکێ ئاسێ یە ، بەلێ دەمەکێ نێزیک ھەموو ئەو چەکدار ژی دێ ھێنەگرتن و کوشتن ، و پرانیا ئەوان چەکداران ژی مەرەم ئەوە خوە بگەھینن سوریا ژبەرڤێ یەکێ ھەتا نھا ماینە و خوە رادەست نەکریە)

زێباری نەڤەشارت ژی کو ئەڤرۆ ئێڤاری خوکوژەکێ داعش گەھشتە پێشمەرگەی و خوە تەقاتد و د ئەنجام دا پێشمەرگەیەک شەھیدبوو و چوار ژی بریندارن.

ئەڤرۆ نیوز ، نەوزاد ھلۆری:
سپێدەیا ئەڤرۆ چەکدارێن داعش ژ سێ لایان ڤه ھێرشەک بو سەر سەنگەرێن پێشمەرگەی ل مێحوەرێ دوزخورماتو ئینا بەلێ ھێرشا وان ھاتە شکاندن لسەر دەستێ ھێزێن پێشمەرگەی.
ژێدەرەکێ ژ ھێزێن پێشمەرگەی ل دوزخورماتو بو ئەڤرۆ نیوز دیارکر کو سپێدە زویا ئەڤرۆ چەکدارێن داعش ھێرشەکا بەفرەە ژ سێ لایان ڤە بو سەنگەرێن پێشمەرگەی ل گوندێ زەرگە یا سەر ب مێحوەرێ دوزخورماتو ئینا و گۆت: ( پشتی شەرەکێ دوو دەمژمێری د ئەنجام دا ھێرشا وان ھاتە شکاندن و ھژمارەکا چەکدارێن داعش ژی ھاتنه کوشتن و تەرمێن وان کەفتینە دەستێن ھێزێن پێشمەرگەی)
زێدەتر گۆت: ( ب مخابنیڤە پێشمەرگەیەک ژی شەھیدبویە و ئێک ژی بریندارە)

ل گورەی زانیاریان د ھەیاما 35 رۆژێن بوری دا ئەڤە دبیتە 10 ھێرش ژلایی َداعش ڤە بو سەنگەرێن پێشمەرگەی ل مێحوەرێ دوزدورخوماتو ، و سەرەم ھێرش ژی ھاتتە شکاندن .