ئەڤرۆ نیۆز،زنار تۆڤی:
رێڤەبەرێ ناحیا کانی ماسێ بۆ ئەڤرۆ نیۆز دیارکر:ئەڤ سالە روودانێن ئاگر بەربوونێ ل ناحیا کانی ماسێ یا سەر ب قەزا ئامێدیێ ڤە بەرەف کێمیێ ڤە چووینە و هەکە ئەم بەراوردیەکێ ل گەل سالا بوری بکەین،70 % یا روودانێن ئاگر بەربوونێ ئەڤ سالە دکێمترن.
سەربەست سەبری ئاکرەیی رێڤەبەرێ ناحیا کانی ماسێ زێدەتر دبێژیت:ل سالا بوری پتری 20 روودانێن ئاگر بەربوون ل ناحیا کانی ماسێ روودابوون و گەلەک زیانێن ماددی گەهاندبوونە خەلکێ و گەلەک ژ عەردێ دارستانێ و زەڤیێن جووتیاران هاتبوونە سۆتن و گۆت ژی:ئەڤ سالە چار روودانێن ئاگر بەربوونێ ل سنۆرێ ناحیا کانی ماسێ چێبووینە و ئێک ژ وانا کو ئەڤە سێ رۆژە ئاگر بەربوویە بەرۆژێ گوندێ تشیشێ و پتری 70 دۆنەمێن ئەردێ دارستانێ و پیش و پەلەخی هاتینە سوتن و هەتانوکە ئەگەرێن ڤێ روودانێ نەهاتینە زانین.
هەروەسا گۆت ژی:پرانیا جاران ژ ئەگەرێ تۆپبارانێ و فرۆکێن تورکی روودانێن ئاگری ل ناحیا کانی ماسێ روو ددەن،هەر چەندە مە وەک ناحیا کانی ماسێ داخواز ژ جهێن شۆلەژێ کربوو،کو ل هەر سێ هەیڤێن هاڤینێ تیمەکا ئاگر ڤەمراندنێ ب هنێرنە ناحیا کانی ماسێ،لێ هەتاکو نوکە داخوازیا مە بجه نەهاتیە،لەورا ژبەر نەبوونا ترۆمبێلا ئاگر ڤەمراندنێ زیانێن مەزن ژ ئەگەرێ ئاگربەربوونێ دگەهنە خەلکێ ڤێ دەڤەرێ.
نيشاندان
