ئەڤرۆ نیۆز،زنار تۆڤی:

پەیڤدارێ حەشدا شەعبی ئاشكرا دکەت،کو پشتی جەژنا قۆربانێ دێ بەرەیێن شەری بۆ ئۆپەراسیۆنا كۆنترۆلکرنا حەویجە هێنە دیارکرن،ل دووڤ زانیاریان دێ دو ئێكەیێن تۆپخانێن ئەمریكا و فرنسا ژی پشکداریێ دڤی شەریدا كەن.

ئەحمەد ئەسەدی،پەیڤدارێ حەشدا شەعبی د راگەهاندنەکێدا ئەو ژی دیارکریە،کو پلانا هێرشکرنێ بۆ سەر باژێرکێ حەویجە ژلایێ فەرماندەیا ئۆپەراسیۆنێن هەڤبەش ڤە دێ هێتە دارێژتن،بەلێ هەتاکو نوکە بەرەیێن شەری ب سەر هێزان دا نەهاتینە دابەشکرن.

هەروەسا گوتیە ژی، دابەشکرنا بەرەیان ماوەیەکێ زۆر پێناچیت و پشتی جەژنێ راستەوخۆ جهێن هێزان دێ هێنە دیارکرن،ئاماژە ب هندێ ژی دایە کو هێزێن وان ژ پاڤژکرنا مین و بۆمبێن چاندی یێن داعشێ ل باژێرکێ تەلەعفەر د بەردەوامن.

ل دووڤ ژێدەرێن سەربازی یێن عێراقی،ل شەرێ كۆنترۆلکرنا حەویجە یێ باشۆرێ كەركووكێ دا،دێ 48 ھزار سەرباز ژ ھێزێن جۆدا یێن عێراقێ پشکداریێ د ڤێ ئۆپەراسیۆنێ دا كەن و زۆربەیا وان دێ ژ پۆلیسێن فیدرالی بن،هەروەسا دێ 8 ھزار ترۆمبێلێن سەربازی و 200 تانكێن ژ جۆرێ ئەبرامز و تی 72 و تی 55 دڤی شەری دا هێنه بكار ئینان،ژ بلی فرۆکێن عێراقی و ھەڤپەیمانان،دیسا دێ دو ئێكەیێن تۆپخانەیا سوپایێ ئەمریكا و فرنسا ژی پشکداریێ دڤی شەریدا كەن.

ئەڤرۆ نیۆز،زنار تۆڤی:

كۆمسیۆنا بلند یا سه‌ربه‌خۆیا هه‌لبژاردن و راپرسیێ ل هه‌رێما كوردستانێ،ماوێ ده‌ستپێكرنا هه‌لمه‌تا بانگەشەیا ریفراندۆما سه‌ربه‌خۆیا هه‌رێما كوردستانێ راگه‌هاند،کو دێ‌ 18 رۆژان ڤەکێشیت،سەرۆكێ كۆمسیۆنێ ژی گوتیە:پێنج هزار سندوقێن دەنگدانێ دێ ل دەڤەرێن كوردستانی یێن دەرڤەی ئیدارا هەرێمێ هێنە دانان.

كۆمسیۆنا بلند یا سه‌ربه‌خۆیا هه‌لبژاردن و راپرسیێ ل هه‌رێما كوردستانێ راگەهاندیە کو سوبەهی سیشەمبێ 5/9/2017 دێ ماوێ ده‌ستپێكرنا هه‌لمه‌تا بانگەشەیا ریفراندۆما سه‌ربه‌خۆیا هه‌رێما كوردستانێ كو دێ‌ ل 25/9/2017 هێتە ئه‌نجامدان ده‌ستپێكەت.

هەروەسا سەرۆكێ کۆمسیۆنا بلند یا سەربەخۆیا هەلبژاردن و راپرسیێ ل هەرێما کوردستانێ ڤەکرنا دو نڤێسینگەهێن خۆ ل هەر ئێک ل باژێێن کەرکووک و مووسلێ راگەهاندیە و ئاماژە ب هندێ ژی دا کو پێنج هزار سندوقێن دەنگدانێ بۆ ریفراندۆما سەربەخۆیا كوردستانێ دێ ل دەڤەرێن كوردستانی یێن دەرڤەی ئیدارا هەرێمێ هێنە دانان.

هندرین محەمەد سەرۆکێ کۆمسیۆنا بلند یا سەربەخۆ یا هەلبژاردن و راپرسیێ ل هەرێما کوردستانێ گۆتیە ژی، نڤێسینگەها مووسلێ دێ ل قەزا شێخان بیت و هەروەسا ئەو هاتینە راسپاردن کو راپۆرتەکا مەیدانى ئامادە بکەن دەربارەى پێدڤیا هژمارا سندوقێن دەنگدانێ و ئەو جهێن کو سندوق لێ بهێنە دانان.

هەروەسا گوتیە :دێ سەرەدانەکا مەیدانى کەن بۆ هەموو وان دەڤەرێن ناکۆکی لێ هەین،دێ سەرەدانا کەمپێن ئاواران ژی کەن،چونکی پشکەکا زۆر ژ خەلکێ قەزا و ناحیێن سنوورێ مووسلێ ئاوارەنە و د ناڤا کەمپان دا،هەروەسا پشکەک ژ وان ل باژێرێن هەولێر و دهۆکێ ژی د ئاکنجینە،بۆ هندێ داکو مافێ کەسێ ژ دەنگدانێ بەرزە نەبیت.

هندرین محەمەدی د پرێس کۆنفرانسەکیدا ئاماژە ب هندێ ژی دایە،کو ل هەموو هەرێما کوردستانێ و دەڤەرێن كوردستانی یێن دەرڤەی ئیدارا هەرێمێ،دێ 12 هزار سندوقێن دەنگدانێ هێنە دانان،ژ ڤێ هژمارێ ژی دێ پێنج بۆ شەش هزار سندوقان ل دەڤەرێن كوردستانی یێن دەرڤەی ئیدارا هەرێمێ بن.

ل‌ 7 خزیرانا 2017 ل سه‌لاحەدین، ب‌ سه‌رۆكاتیا مه‌سعود بارزانى سه‌رۆكێ هه‌رێما كوردستانێ،حزب و لایه‌نێن‌ سیاسی یێن كوردستانێ كۆمبوون و بریار هاتەدان ل‌ 25/ 9/ 2017 ریفراندۆما سه‌ربه‌خۆیێ ل هه‌رێما كوردستانێ و دەڤەرێن‌ كوردستانی یێن ده‌رڤەی ئیدارا هه‌رێما كوردستانێ بهێنە ئه‌نجامدان.

ئەڤرۆ نیۆز،زنار تۆڤی:

ئەڤ شەڤە ئەلیستەر بێرد وەزیرێ دەولەتێ بۆ کاروبارێن رۆژهەلاتا ناڤەراست و پەرەپێدانا مرۆڤی ل بریتانیا بۆ گۆتوبێژکرنا شەرێ داعش و پرسا ریفراندۆما سەربەخۆیا كوردستانێ گەهشتە هەولێرا پایتەخت.

ئەلیستەر بێرد ژلایێ فەلاح مستەفای ڤە بەرپرسێ فەرمانگەها پەیوەندیێن دەرڤە یێن هەرێما کوردستانێ پێشوازی لێ هاتەکرن،بریارە د سەرەدانا خۆدا ل گەل مەسعود بارزانی سەرۆکێ هەرێما کوردستانێ و بەرپرسێن بلند یێن کوردستانێ کۆم ببیت.

ئەلیستەر بێرد وەزیرێ دەولەتێ بۆ کاروبارێن رۆژهەلاتا ناڤەراست و پەرەپێدانا مرۆڤی ل بریتانیا د پرێس کۆنفرانسەکێدا راگه‌هاند هاتیمە ستایشا هێزێن پێشمەرگەی بکەم،کو ل بەرەیێن پێشیێ یێن شەری دانە و ل ڤێ دوماهیێ هەماهەنگیەکا زۆر باش ل گەل هێزێن عێراقێ دروستکریە و شیاینە مووسلێ و تەلەعفەر کۆنترۆل بکەن.

هەروەسا بریارە وەزیرێ دەولەتێ یێ بریتانی ب فەرمی هەلویستێ وەلاتێ خۆ دەربارەی ریفراندۆما سەربەخۆیا كوردستانێ ب بەرپرسێن هەرێما کوردستانێ رابگەهینیت.

ئەلیستەر بێرد ئەڤە جارا پێنجێ یە وەکو وەزیرێ دەولەتا بریتانیا سەرەدانا هەرێما کوردستانێ دکەت.

 
ئەڤرۆ نیۆز،زنار تۆڤی:

ئەڤرۆ ئێکشەمبی 3.9.2017 تۆپخانەیا سۆپایێ تورکی ناحیا کانی ماسێ یا سەر ب قەزا ئامێدیێ ڤە بۆردۆمانکر و چەندین گۆلەتۆپ ل گوندێن ڤێ ناحیێ داینە.

ئامەد سالح وەلاتیەکێ ناحیا کانی ماسێ یە بۆ ئەڤرۆ نیۆز دیارکر:ئەڤرۆ ئێکشەمبی و ب بەهانەیا هەبوونا چەکدارێن پەکەکێ و ل دەمژمێر 6:30 ئێڤاری و بۆ ماوێ پتر ژ نیڤ دەمژمێرێ تۆپخانەیا سۆپایێ تورکی گوندێ بێدوهێ ل ناحیا کانی ماسێ تۆپ بارانکر و جارەکادی ترس ل دەف خەلکێ دەڤەرێ پەیداکر و گۆت ژی:دەنگەکێ مەزن ژ وان تۆپان دهات و هەروەسا هەیام هەیام تورکیا ڤی گوندی و تەبالا و سەرکێ دێشێشێ تۆپ باران دکەت.

ئەڤرۆ نیۆز،زنار تۆڤی:

پەیڤدارێ دەستەیا گشتی یا گەشتوگۆزارێ ل هەرێما کوردستانێ دا دیارکرن:کو د هەردو رۆژێن ئێکێ و دویێ یێن جەژنا قوربانێدا 145 هزار گەشتیار هاتینە هەرێما کوردستانێ.

نادر رۆستی پەیڤدارێ دەستەیا گشتی یا گەشتوگۆزارێ ل هەرێما کوردستانێ بۆ ئەڤرۆ نیۆز دبێژیت:ل هەردو رۆژێن جەژنا قوربانێدا 145 هزار گه‌شتیار هاتینە هه‌رێما كوردستانێ و هەروەسا هاتنا گه‌شتیاران یا به‌رده‌وامە و هژماران وان د بلندبوونێ دایە.

هەروەسا گۆت ژی:ئه‌ڤه‌ ئامارێن سه‌ره‌تایی یێن هاتنا گه‌شتیارانه‌،لێ ئامارا دوماهیا هاتنا گه‌شتیاران دێ ل رۆژانێن داهاتی ب هوورکاریێن ته‌مام‌ را‌گه‌هینین.