ئه‌ڤرۆ نيوز:
ھژمارەکا سیاسەتمەدارێن ئەمریکی د داخۆیانیێن جودا جودا دا دیار کرن کو دڤێت ئەمریکا پشتەڤانیێ ل دەولەتا کوردی بکەت، چونکو عیراق بەر ب نەمانێ ڤە دچیت و ھەرێما کوردستانێ سەرەرای گەلەک ئالۆزیان شیایە تا رادەیەکێ د بیاڤێ دیموکراسیێ و پێکڤەژیانێ دا سەرکەفتی بیت و ژ بەر ھندێ ژی دڤێت پشتەڤانیێ ل دەولەتا کوردی بکەین چونکو دێ بیتە ھەڤپەیمانەکێ باش بۆ ئەمریکا.
شیرەتکارێ بەرێ یێ وەزیرێ بەرگیریێ ئەمریکا و سیاسەتمەدارێ ناڤدارێ وی وەلاتی پیتر ھوسی راگەھاند کو ئەڤرۆکە رۆژھەلاتا ناڤین وەکو بەرێ نەمایە، نەخشێ رۆژھەلاتا ناڤین ھاتیە گوھۆرین و ھەر دو دەولەتێن عیراق و سووریێ وەکو خوە نەماینە، رەنگە ناڤێ وان وەکو دەولەت ل سەر نەخشێ جیھانێ مابیت لێ د راستی دا ھەر دو وەلات ژی پارچە بووینە و ئێدی چو کەسەک نەشێت بەحسێ عیراقەکا ئێکگرتی بکەت، ئەڤرۆکە پرانیا عیراقێ کەڤتیە بن کۆنترۆلا ئیرانێ و بزاڤێن تیرۆرستی ژی پشکەکا مەزن ژ ئاخا عیراقێ داگیر کرینە و گۆت: (یێن بەحسێ عیراقەکا فیدرال و ئێکگرتی دکەن ئەو تنێ خوە دخاپینن و چو راستی بۆ ھندێ نینە، سوننی و کورد ب تەمامی ژ ناڤەندێن گرنگ و بریاردانێ ھاتینە دوورخستن و ژ بەر ھندێ ژی رامانا پێکڤەژیانێ ل عیراقێ ژی نەمایە).
ناڤھاتی ئەو یەک ژی دیار کر کو ھەرێما کوردستانێ شیایە تا رادەیەکێ باش گوھۆرینان بکەت و د شەرێ ل دژی داعشێ دا کوردان شیان کێم نەتەوە و خەلکێن دی ب پارێزن و ژ بەر ھندێ ژی ئەڤرۆکە دڤێت ئەمریکا کوردان ب پارێزیت و پشتەڤانیێ ل دەولەتا کوردی بکەت، چونکو ئەو دەولەت دێ د پاشەرۆژێ دا ببیتە ھەڤپەیمانەکێ ب ھێز بۆ ئەمریکا.
ل ئالیێ دی گەلەک سیناتۆر و سیاسەتمەدارێن ئەمریکی ژی دیار کرن کو د رەوشا نھا یا رۆژھەلاتا ناڤین دا کورد خوەدان ھێزن و وەکو ھێزەکا نوو یا سیاسی دەرکەڤتنە مەیدانێ، کوردان پەیوەندیێن باش ل گەل ئەمریکا ھەنە و نھا ل رۆژھەلاتا ناڤین تنێ کورد وەکو ھەڤپەیمانێن راستەقینە یێ ئەمریکا ماینە و گەلەک وەلاتێن دی یێن کو بەری نھا ھەڤپەیمانێ ئەمریکا بوون نھا ل دژی بەرژەوەندیێن ئەمریکا کار دکەن، ژ بەر ھندێ ژی دڤێت ئەمریکا پشتەڤانیێ ل کوردان بکەت چونکو ئەو یەک د بەرژەوەندیا ئەمریکا دایە.
ھەروەسا سەرۆک وەزیرێن ئیسرائیلێ ژی ب رەنگەکێ فەرمی پشتەڤانیا خوە بۆ دەولەتا کوردی دیار کر و قونسولێ بەرێ یێ فرەنسا ل ھەرێما کوردستانێ ژی راگەھاند کو نابیت ب چو رەنگەکێ کورد ریفراندۆمێ پاشڤە بخینن، چونکو دێ دەلیڤەکا دیرۆکی ژ دەستێ کوردان بچیت و گرنگە دەلیڤا نھا یا دیرۆکی ژ ئالیێ کوردان ڤە بھێتە بکار ئینان و دڤێت ریفراندۆم د دەمێ خوە دا بھێتە کرن.
ل ئالیێ دی گەلەک دەزگەھێن راگەھاندنا جیھانێ ژی بەحسێ ریفراندۆما ھەرێما کوردستانێ دکەن و دیار دکەن کو سەرۆکێ ھەرێما کوردستانێ مەسعود بارزانی یێ رژدە دێ ریفراندۆمێ د دەمێ خوە دا ھێتە کرن، چونکو ئەمریکا داخواز کربوو نھا ریفراندۆم نەھێتە کرن لێ بارزانی داخوازا ئەمریکا رەت کریە و گۆتیە چو گرەنتیا مانا مە ل گەل عیراقێ نەمایە و دڤێت ئێدی کورد بریارا خوە بدەن و ژ بەر ھندێ ژی چو کەسەک نەشێت ئاستەنگیان ل ھەمبەر ئیرادا خەلکێ کوردستانێ دروست بکەت و دێ ریفراندۆم ل دەمێ خوە دا ھێتە کرن و دێ گەلێ کوردستانێ بریارێ ل دۆر چارەنڤیسێ خوە بدەت.

ئەڤرۆ نیوز ، هلۆری:

پشتی کو ئەڤرۆ ئێڤاری شاندێ بلند یێ ریفراندۆمێ ب مەرەما دانوستاندن ل سەر پرسا ریفراندۆمێ گەھشتیە بەغدا و ئێکەم کومبوون ژی ل گەل عەبادی دەستپێکر

بو دانوستاندن لسەر پرسا ریفراندۆم و دوماھی گۆرانکاریێن سیاسی دناڤبەرا ھەرێما کوردستانێ و عیراقێ نھا شاندێ ریفراندۆمێ ل گەل حەیدەر عەبادی سەرۆک وەزیرێن عیراقێ کومبونەکا بەفرەھکر و دانوستاندن لسەر چەند تەوەرەکان ھاتنەکرن.

ل گورەی ئەوان زانیاریێن کو ھاتینە بەلاڤکرن ، حەیدەر عەبادی ل گەل شاندێ ناڤبری نێزیکێ دەمژمێرەکی َدانوستاندن لسەر چەند پرسەکان کریە ژوانان پرسیا ریفراندۆمێ و عەبادی پێشوازی ل پرسا ریفراندۆمێ کریە وھەتا نھا رەت نەکریە .

ئێڤاریا ئەڤرۆ لسەر بریارا سەرۆکێ هەرێما کورستانێ مەسعود بارزانی شاندەکێ بلند یێ ریفراندۆمێ کو ژ نونەرێن سەرۆکاتیا هەرێمێ و پارتی و ئێکەتی و ئێکگرتو و ئێزدی و مەسیحی و تورکمانان پێکدهێن سەرەدانا بەغداکر و وەسا بریارە بو دەما سێ روژان ل بەغدا بمینن بو دانوستاندن لسەر پرسا ریفراندۆمێ ل گەل دەستهەلاتدارێن عیراقێ.

ئەڤرۆ نیوز ، ھلۆری:
وەسا بریارە کو کوردێن فەیلی سوبەھی ل ھەولێر دوماھی ھەلویستێ خوە ل بارا ریفراندۆمێ ل ھەرێما کوردستانێ رابگەھینن.
ل گورەی ئەوان زانیاریێن کو دەست ئەڤرۆ نیوز کەفتین وەسا بریارە کوردێن فەیلی سوبەھی ل ئوتێل چوار چرا ل ھەولێرێ دوماھی ھەلویستێ خوە ل بارا ریفراندۆما ھەرێما کوردستانێ راگەھینن کو وەسا بریارە لرۆژا ٢٥ ئیلونا ئەڤ سالە بھێتە ئەنجامدان.
دھێتە زانین کو پێر د کونفرانسەکێ دا کوردێن شەبەک ژی پشتەڤانیا وە بو ریفراندۆمێ راگەھاند و خواست کو دەڤەرێن وان ڤەگەرن سەر ھەرێما کوردستانێ و پێشمەگەر ئەوان بپارێزن.