ئه‌ڤرۆ نيوز، نيوار محه‌مه‌د سه‌ليم:

برياره‌ ده‌مژمێر 14:00 كۆمبوونا په‌رله‌مانێ كوردستانێ بهێته‌ ئه‌نجام دان و تێدا دێ دانوستاندن ل سه‌ر پرۆژێ قانوونا پارڤه‌كرنا ده‌سته‌لاتێن سه‌رۆكێ هه‌رێما كوردستانێ ب سه‌ر ده‌زگه‌هێن گشتى يێن (سه‌رۆكاتيا جڤاتا وه‌زيران، سه‌رۆكێ جڤاتا وه‌زيران، سه‌رۆكاتيا په‌رله‌مانێ كوردستانێ و جڤاتا دادوه‌رى) دا هێته‌ به‌لاڤكرن.

ب گۆره‌ى ئه‌و قانوونا پێشنيازكرى، ماددێ 10 كو ده‌سته‌لاتێن سه‌رۆكێ هه‌رێما كوردستانێ ژ قانوونا سه‌رۆكاتيا هه‌رێمێ يا ژماره‌ ئێك يا راستڤه‌كرى يا سالا 2005ێ ب خوه‌ ڤه‌ دگريت ل سه‌ر سه‌رۆكاتيا جڤاتا وه‌زيران، سه‌رۆكێ جڤاتا وه‌زيران، سه‌رۆكاتيا په‌رله‌مانێ كوردستانێ و جڤاتا دادوه‌رى هاتينه‌ به‌لاڤكرن.

ل سه‌ر ئاستێ سه‌رۆكێ جڤاتا وه‌زيران:

ب گۆره‌ى ڤى پرۆژێ قانوونا پێشنيازكرى، په‌ياده‌كرنا ئه‌رك و ده‌سته‌لانێن هاتى ژ حوكمێ ماددێ ئێك و دو ديسا برگێن (دو، شه‌ش، يازده‌، پازده‌، هه‌ژده‌، نوزده‌) ژ مادێ ده‌هێ يێ قانوونا سه‌رۆكاتيا هه‌رێما كوردستانێ عيراقێ ژماره‌ (1) يا سالا (2015) يا راستڤه‌كرى دێ ل لايێ سه‌رۆكێ جڤاتا وه‌زيران بيت.

بڕگا دو: ده‌ركرنا مه‌رسۆمه‌كى ب ئه‌نجامدانا هه‌لبژارتنێن گشتى يێن په‌رله‌مانێ كوردستانێ – عيراق و ده‌ستنيشانكرنا ژڤانێ وان د ماوێ 15 رۆژان دا ژ مێژوويا حه‌لكرنا وان يان به‌رى 60 رۆژان ژ ب دووماهى هاتنا خولا هه‌لبژارتنان ب ره‌نگه‌كى كو ژڤانێ هه‌لبژارتنان ژ 60 رۆژان نه‌بۆريت.

بڕگا شه‌ش:  ده‌ركرنا لێبۆرينا گشتى ل سه‌ر سزادايان ب گۆره‌ى قانوونێ.

بڕگا پازده‌: دامه‌زراندن و لادانا مه‌زنه‌ به‌رپرسێن هه‌رێمێ ژ پله‌يێن تايبه‌ت ل سه‌ر بنه‌مايێ هه‌لبژارتنێ و ده‌ستنيشانكرنێ ژ لايێ وه‌زيرێن تايبه‌تمه‌ند و ره‌زامه‌نديا جڤاتا وه‌زيران.

بڕگا هه‌ژده‌: دانا ناڤ و پله‌يان ب گۆره‌ى قانوونى.

بڕگا نوزده‌: سه‌رۆكێ هه‌رێمێ هنده‌ك ده‌سته‌لاتێن دژى دگريته‌ به‌ر كو ب گۆره‌ى دستوورى دهێنه‌ ده‌ستنيشانكرن.

ل سه‌ر ئاستێ جڤاتا وه‌زيران:

ب گۆره‌ى ڤێ قانوونا پێشنيازكرى، په‌ياده‌كرنا ئه‌رك و ده‌سته‌لاتێن هاتى ژ برگێن (سێ، چار، پێنج، حه‌فت، هه‌شت، هه‌ڤده‌) ژ ماددێ ده‌هێ يێ قانوونا سه‌رۆكاتيا هه‌رێما كوردستانا عيراقێ ژماره‌ (1) يا سالا (2005) يا راستڤه‌كرى دێ ل لايێ سه‌رۆكاتيا جڤاتا وه‌زيران بن.

بڕگا سێ: ده‌ركرنا مه‌رسۆمێ په‌رله‌مانێ كوردستانێ بۆ خولا گرێدانا ئێكێ يا خولا هه‌لبژارتنان د ماوێ (10) رۆژان دا ژ رۆژا راگه‌هاندنا ئه‌نجامان و هه‌كه‌ داخوازى نه‌گه‌هشتێ، په‌رله‌مانێ كوردستانێ دشێت د رۆژا ب دووڤدا كۆم بيت.

بڕگا چار: حه‌لكرنا په‌رله‌مانێ كوردستانێ – عيراق ب مه‌رسۆمه‌كى د ڤان حاله‌تان دا:

(1) – هه‌كه‌ زێده‌تر ژ نيڤا ئه‌ندامان ده‌ست ژ كار كێشا.

(2) – هه‌كه‌ رێژا قانوونى بۆ ماوێ 45 رۆژان ته‌مام نه‌بوو ژ مێژوويا ده‌ستنيشانكرى بۆ گرێدانا روونشتنا خولا هه‌لبژارتى.

(3) – هه‌كه‌ په‌رله‌مانى باوه‌رى نه‌دا جڤاتا وه‌زيران بۆ سێ پێكهاتێن جڤاتا وه‌زيران يێن جودا و ل دووڤ ئێك.

(4) – هه‌كه‌ سيسته‌مێ هه‌لبژارتنێن په‌رله‌مانى هاته‌ گوهۆڕين و ماوێ مايى يێ خولا هه‌لبژارتنان شه‌ش هه‌يڤان كێمتر.

بڕگا پێنج: ده‌ركرنا بڕيارێن خودان هێزه‌كا قانوونى پشتى گه‌نگه‌شێ ل گه‌ل سه‌رۆكێ په‌رله‌مانێ كوردستانێ و جڤاتا وه‌زيرێن هه‌رێمێ، ل ده‌مێ هه‌رێما كوردستانێ و سيسته‌مێ وێ يێ سياسى و ئاسايشا نه‌ته‌وى يا گشتى و ده‌زگه‌هێن وێ يێن دستوورى تووشى هه‌ر مه‌ترسيه‌كێ بوون كو مه‌ترسى بوون ل سه‌ر گرێدانا روونشتنا په‌رله‌مانى، ب ره‌نگه‌كى كو روونشتنا ئێكێ يا په‌رله‌مانێ كوردستانێ دا بهێته‌ گه‌نگه‌شه‌كرن، هه‌كه‌ نه‌هاته‌ به‌رچاڤكرن و گه‌نگه‌شه‌كرن ژ لايێ په‌رله‌مانى ڤه‌، ماوێ وێ يێ قانوونى ب دووماهى دهێت.

بڕگا حه‌فت: په‌سه‌ندكرنا بڕيارێن سێداره‌دانێ و كێمكرنا وان بۆ زيندانكرنا هه‌تا هه‌تايێ.

بڕگا هه‌شت: راگه‌هاندنا بارێ نه‌ئاسايى ب گۆره‌ى قانوونه‌كا تايبه‌ت.

بڕگا هه‌ڤده‌: دانا پلێن له‌شكرى بۆ فه‌رمانده‌ و هێزێن چه‌كدارێن هه‌رێمێ و هێزێن ناڤخۆ و ده‌ركرنا وان و ره‌وانه‌كرن بۆ خانه‌نشينكرنێ ب گۆره‌ى قانوونێن دياركرى.

ل سه‌ر ئاستێ سه‌رۆكاتيا په‌رله‌مانێ كوردستانێ:

ب گۆره‌ى ڤێ قانوونا پێشنيازكرى، په‌ياده‌كرنا ئه‌رك و ده‌سته‌لاتێن هاتى ژ برگا (ئێك/2، چارده‌) ژ ماددێ ده‌هێ يێ قانوونا سه‌رۆكاتيا هه‌رێما كوردستانا عيراقێ ژماره‌ (1) يا سالا (2005) يا راستڤه‌كرى دێ ل لايێ ده‌سته‌يا سه‌رۆكاتيا په‌رله‌مانى بيت.

بڕگا ئێك/2: ده‌ركرنا قانوون و بڕياران ئه‌وێن ژ لايێ په‌رله‌مانێ كوردستانێ – عيراق ڤه‌ دهێنه‌ ده‌ركرن د ماوێ 15 رۆژان دا ژ مێژوويا گه‌هشتنا وان بۆ سه‌رۆكاتيا هه‌رێمێ و مافێ نه‌رازيبوونا ته‌مام يان يا ناڤه‌كى يێ ل سه‌ر هه‌يى د ماوێ ده‌ستنيشانكرى دا و دشێت دووباره‌ ڤه‌گه‌رينيته‌ په‌رله‌مانى بۆ چاڤ لێخشاندنێ، بڕيارا په‌رله‌مانێ كوردستانێ د وێ ده‌ربارێ دا يا ڤه‌بڕه‌، ئه‌ڤ بڕيار و قانوونێن ده‌ركرى ل ده‌مێ ده‌ستنيشانكرى دا گازنده‌ ل سه‌ر نه‌هاته‌ كرن، رامانا رازيبوونێ يه‌ و دێ ل رۆژناما فه‌رمى (وقائع كوردستان) هێته‌ به‌لاڤكرن.

بڕگا چارده‌: ده‌ركرنا مه‌رسومێ ده‌ست ژ كاركێشانا وه‌زيران يان وه‌زيره‌كى و راسپاردنا وان ب به‌رده‌واميدانا كارى هه‌تا وه‌زيرێن نوو دهێنه‌ دانان.

ل سه‌ر ئاستێ جڤاتا دادوه‌رى:

ب گۆره‌ى ڤێ قانوونا پێشنيازكرى، په‌ياده‌كرنا ئه‌رك و ده‌سته‌لاتێن هاتى ژ برگا (دوازده‌، سێزده‌، شازده‌) ژ ماددێ ده‌هێ يێ قانوونا سه‌رۆكاتيا هه‌رێما كوردستانا عيراقێ ژماره‌ (1) سالا (2005) يا راستڤه‌كرى دێ ل لايێ جڤاتا دادوه‌رى بيت.

بڕگا دوازده‌: راسپاردنا سه‌رۆك وه‌زيران پشتى ژ لايێ په‌رله‌مانێ كوردستانێ – عيراق ڤه‌ دهێته‌ ده‌ستنيشانكرن بۆ پێكئينانا حوكمه‌تێ و د ماوێ سيهـ رۆژان دا ژ ماوێ راسپاردنێ.

بڕگا سێزده‌: ده‌ركرنا مه‌رسۆمێ ره‌زامه‌نديێ ل سه‌ر ده‌ست ژ كاركێشنانا جڤاتا وه‌زيران يان وه‌زيره‌كێ ل ده‌مێ وه‌رگرتنا باوه‌ريێ ژ وان.

بڕگا شازده‌: دامه‌زراندنا دادوه‌ر و سه‌رۆك و ئه‌ندامێن داخوازكاريا گشتى پشتى ژ لايێ جڤاتا دادوه‌رى يا هه‌رێمێ ڤه‌ دهێنه‌ ده‌ستنيشانكرن.

تێبينى: ئه‌ڤه‌ هاتيه‌ پێشنيازكرن و بڕياره‌ ل په‌رله‌مانێ كوردستانێ دانوستاندن ل سه‌ر بهێته‌ كرن