ئەڤرۆ نیوز ، نەوزاد ھلۆری:
نیڤرویا ئەڤرۆ ھێزەکا جلوبەرگ رەش ژ نیشکەکێڤە ب سەر بنگەھێ خێرخوازی بارزانی گرت ل سەر چیایێ شنگاڵ و زیانێن ماددی گەھاندینە دەزگەھی ، و قایمقامێ شنگالێ ژی بو ئەڤرۆ نیوز ئەگەرێن ھێرشا وان ئاشکرا دکەت.
مەحما خەلیل قایمقامێ قەزا شنگاڵ بو ئەڤرۆ نیوز گۆت: (ب مخابنیڤە ئەڤرۆ ھەموو دەڤەرێن ھەرێما کوردستانێ ب گشتی و شنگال و ئێزدی ب تایبەتی مژولێ ساخکرنا سێ سالیا کارەساتا شنگالێ و سەر ئێزدیانە ، کو رۆژەک خویناوی و رەش بوویە د دیروکا ئێزدیان دا ، شوونا کو پەکەکە پشکدارێ خەمێن ئێزدیان بیت نیڤرۆیا ئەڤرۆ ھێرشەکا درندانە بو سەر بنگەھێ خێرخوازی بارزانی کریە و ھەموو دنیا دزانیت کو دەزگەھێ بارزانی د بوری و نھا چەند خزمەت بو کوردێن ئێزدی و ئاوارەیان کریە ب تایبەتی وان ئێزدی و ئاوارەیێن کو نھا لسەر چیایێ شنگالێ و دەردورا وێ دژین)
زێدەتر گۆت: ( مەرەما سەرەکی یا پەکەکێ ئەو بوویە کو ئالایێ کوردستانێ لسەر دەزگەھێ بارزانی و سەر چیایێ شنگاڵی بینن خوار ، بەلێ ب ھیمەتا پێشمەرگێن قەھرەمان و شەرکەرێن ئێزدی چوو ھێزەک نەشێت دەستدرێژیان بکەتە سەر چیایێ شنگاڵ و ئەو دام و دەزگەھێن کو ل شنگاڵ و دەوروبەر خزمەتا خەلکێ دەڤەرێ دکەن)
قایمقامێ شنگالێ د درێژاھیا ئاخفتنێن خودا دیارکر ژی کو ئەو ھێزا پەکەکێ ژ نیشکەکێڤە ھێرش بو سەر بنگەھێ بارزانی کریە و زیان گەھاندینە دەرگەە و پەنجەرێن ئاڤاھیێ دەزگەھی و گۆت ژی: (ھەتاکو کارمەندێن دەزگەھی ئاسایش ئاگەھدارکرین و گەھشتینە جھێ روودانێ پەکەکە ژی نەماینە وێرێ ، و چەندین جاران مە گوتیە پەکەکە دەڤەرێ چوول بکەن بەلێ ھەتا نھا دەڤەر چول نەکرینە)

ئەڤرۆ نیوز ، نەوزاد ھلۆری:
ل ژێر چاڤدێریا نێچیرڤان بارزانی سەرۆكێ حکومەتا ھەرێما کوردستانێ و ب بەرھەڤبوونا ھژمارەکا کەسایەتی و کونسول و نونەرێن وەلاتێن جیھانێ و کوردێن ئێزدی سێیەمین سالرۆژا کارەساتا شنگاڵی ل دھۆکێ ھاتە ساخکرن ، و نێچیرڤان بارزانی گوتارەک پێشکێشکر و تێدا تیشک ئێخستە چەند تەوەرەکان ژ وانان رەوشا کوردێن ئێزدی و بزاڤێن حکومەتا ھەرێما کوردستانێ بو رزگارکرنا ئەوان کچ و ژنێن ئێزدیێن کو ھەتا نھا د دەستێ داعشێ دانە ، و دیارکر ژی کو نھا رەوشا دارایی یا کوردستانێ بەر ب باشتر دچیت.
نێچیرڤان بارزانی سەرۆکێ حکومەتا ھەرێما کوردستانێ دیارکر کو کارەساتا شنگاڵی گەلەک یا ب ئازار و خەمناک بوو ، بو گەلێ کورد کو ئەو ژی کوشتن و رەڤاندنا کچ و ژن و زاروک و پیر و پەکفتێن ئێزدی بوون و گۆت: (حکومەتا ھەرێما کوردستانێ ھەردەم لدوڤ گازیا کوردێن ئێزدی چوویە و بزاڤ کرینە ئێش و ژانێن کارەساتا شنگاڵی ب سەر گەلێ ئێزدی کێم بکەت ، ل گورەی شیانان حکومەتا ھەرێما کوردستانێ بزاڤان بو ئاڤەدانکرنا شنگاڵ و دەڤەرێن ئێزدی نشین و دەڤەرێن دن دکەت داکو تابلویا پێکڤە ژیانا ئاینی و نەتەوەیی ل ھەرێما کوردستانێ یا بەردەوام بیت و مە نەڤێت ب تێکچوونا تابلویا پێکڤە ژیانێ کەیفا دوژمنان ب مە بھێت ، ژ بەرڤێ سووزێ ددەین کو ب ھەموو ھەول و بزاڤ و شیانێن خوڤە کار بو ئاڤەدانکرن و باشترکرنا رەوشا ئەمن و ئاسایشا شنگاڵ و دەڤەرێن دن بکەین داکو خەلکێ ئەوان دەڤەران ژی بشێن ڤەگەرێنە سەر دەڤەرێن خوە)
زێدەتر گۆت: ( ژ مێژە مە ئەو یەک زانیە کو ئەو چەکێ د دەستێ ھێزێن پێشمەرگەی دا ب کێر بەرەڤانیکرن ژخوە ناھێت ، بەلێ ژ بەر چەند ئەگەرەکان مە نەشیا چەکێ پێشکەفتی و پێدڤی دەستخوڤە بینین ، بەلێ پشتی کو داعش بو عیراقێ و دەڤەرێن ڤەقەتیایێن ھەرێما کوردستانێ ژ ئەنجامێ شکەستنا سوپایێ عیراقێ ھاتین و چەک و تەقەمەنیێن سوپایی عیراقێ کەفتینە دەست داعش و د ئەنجام دا ھژمارەکا زورا پێشمەرگەیان ھاتینە شەھیدکرن و چەندین دەڤەر کەفتینە دەست داعش و کارەساتێن مینا شنگاڵ درۆست بوین ، پێشمەرگە نەچاربوون ب دوڤ رێیەکا دن بگەرێن بو دەستکەفتنا چەکێن پێدڤی)

نێچیرڤان بارزانی سەرۆکێ حکومەتا ھەرێما کوردستانێ د درێژاھیا ئاخفتنێن خودا دیارکر ژی کو حکومەتا ئێک لدوڤ ئێکێ یێن عیراقێ گەلەک سووز ب خەلكێ ھەرێما کوردستانێ داینە بەلێ ژ ئەنجامێ شکاندنا ئەوان سووزان ٧٢ فەرمان بتنێ ب سەرێ ئێزدیان ھاتینە و گۆت ژی: ( ھەتا نھا ھێشتا حکومەتا عیراقێ ھێزێن پێشمەرگەی ھەڤبەشێ سوپایێ عیراقێ نەکریە ئەڤە د دەمەکێ دایە کو ل گورەی دەستوورێ عیراقێ پێشمەگە پشکەکە ژ سوپایێ عیراقێ و وەکو پێدڤی چەکێن پێشکەفتی ب وان نەداینە ، و د بەرامبەر دا ژی حکومەتا عیراقێ ھەموو جورێن چەکێ پێشکەفتی ب ھێزێن حەشد شەعبی داینە کو ل گورەی دەستووری ھێزێن حەشد شەعبی ھێزەکا قانوونی و دەستووری نینە)
د گوتارا خودا دیارکر ژی کو گەلێ کورد ھەموو رێکێن قانونی و دەستووری ل گەل عیراقێ بو ب دەستڤەئینانا ئەرک و مافێن خوە تاقیکرینە بەلێ چوو ئەنجام نەبوینە و گۆت ژی: (دەنگێ کوردێن ئێزدی د سەرئێخستن و پشتەڤانیکرنا ریفراندۆمێ بو سەربەخویی یا کوردستانێ دەنگەکێ گرنگە ودەنگێ کارەسات و ئەوان ئێش و ژانایە یێن کوردێن ئێزدی ب دەستی داعش دیتین ، و لژێر سیبەرا حکومەتا ھەرێما کوردستانێ زێدەتری 3ھزار کوردێن ئێزدی لژێر دەستێ داعش ھاتینە رزگارکرن و ل ڤێرە سوپاسیا ھەموو وان کەس و لایەنان دکەین یێن کو ھەڤکاربوین بو زڤراندن و ڤەگەراندنا وان ، و سوپاسیا خەلکێ پارێزگەھا دھۆکێ دکەین کو دەرگەھێن مال و مزگەفتێن خوە ڤەکرین دەما کو ئێزدی ئاوارەیێ پارێزگەھا دھوکێ بووین مل ب ملی وان کەمپێن کو حکومەتا ھەرێما کوردستانێ بو ئاوارەیان درۆستکرین)
نێچیرڤان بارزانی سەرۆکێ حکومەتا ھەرێما کوردستانێ دیارکر ژی کو نھا رەوشا دارایی و ئابووری یا حکومەتا ھەرێما کوردستانێ بەر ب باشترڤە دچیت و داویێ گوت: (ھەول و بزاڤێن حکومەتا ھەرێما کوردستانێ بو باشترکرنا ژین و ژیانا وەلاتیان ب گشتی و کوردێن ئێزدی د بەردوامن و داخوازێ ل خەلکی کوردستانێ ژی دکەم کو زێدەتر ھەڤکاریا کوردێن ئێزدی بکەن)

ئه‌ڤرۆ نیوز:
ل گۆری گۆتنا به‌رپرسه‌كێ كورد، به‌غدا رێ بده‌ت یان نه‌ده‌ت رێفراندۆما سه‌رخوه‌بوونا كوردستانێ دێ هێته‌ كرن و پشتی رێفراندۆمێ هه‌لوه‌ستێ به‌غدا دێ هێته‌ گوهرین.
محه‌مه‌د ئێحسان، به‌رپرسێ پێشتر یێ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بۆ ئاژانسا ئه‌نادۆلێ گۆت: به‌غدا پشتی رێفراندۆمێ دێ دانپێدانێ ب گوهرینێن نه‌خشه‌یێ سیاسی یێ هه‌رێمێ كه‌ت.
ئێحسانی گۆت ژی: پشته‌ڤانییا نێڤده‌وله‌تی بۆ سه‌رخوه‌بوونا كوردستانێ هه‌یه‌، چ وه‌لاته‌ك دژی مافه‌كێ ره‌وا مینا رێفراندۆما هه‌رێما كوردستانێ نینه‌، ئه‌و ئالیێن دژی رێفراندۆمێ باوه‌ری ب ماف و دیمۆكراسیێ د ناڤ سنۆر و ده‌رڤه‌ی سنۆری خوه‌ نینه‌، نها  یا گرنگ ئه‌وه‌ كار بۆ ئه‌نجامدانا رێفراندۆمێ د ده‌مێ خوه‌ دا بهێته‌ كرن، زلهێزێن جیهانی ل وی ده‌می دێ هه‌لوه‌ستێ خوه‌ دیار كه‌ن.
ناڤهاتی خویا كر: كوردستانا سه‌ربخوه‌ نه‌ ل سه‌ر توركیا یان هه‌ر جیرانه‌كێ دی گه‌ف نابیت.
هه‌روه‌سا وی به‌رپرسێ كورد دوپات كر كو رێفراندۆم ل ده‌ڤه‌رێن كوردستانی كو نها ژ ئالیێ پێشمه‌رگه‌ ڤه‌ دهێنه‌ پاراستن ژی دێ هێته‌ كرن، هه‌روه‌سا ئه‌و ناوچه‌یێن كوردستانی یێن نه‌ د شیان دا رێفراندۆم لێ بهێته‌ كرن دێ وه‌ك ناوچه‌یێن كوردستانێ هێنه‌ هه‌ژمارتن.

ئەڤرۆ نیوز، سەباح زھێر زێباری:

ئەندامەکێ پەرلەمانێ عیراقێ دیارکر کو ھەلویستیێ عیراقێ ب ھاوکێشەیێن نیڤدەولی ڤە دگرێداینە و چوو ھەلویستێن نەرێنی نابن ، و ئەگەر ھەرێما کوردستانێ ریفراندوم ئەنجام دا ژ نوو دێ ھەلویستێن نیڤدەولی دیاربن.
جەمال کوچەر ئەندامێ پەرلەمانێ عیراقێ بۆ ئەڤرۆ نیوز گۆت: ( ھەلویستێ عێراقێ ل بارا ریفراندۆما ھەرێمی گرێدایە ب ئیرانێ ڤە و چوو ھەلویستێن دژوار و نەرێنی نابن ، تایبەتی د نھادا کو عیراق نێزیکێ ھەلبژاردنان دبیت و ئەو نە مەجبورن کو خەلکی ژ دەست خوە بدەن ، نەک تنێ عیراقێ چو ھەلویستێن نەرێنی نابن بەلکو چوو وەلاتێن جیران ژی ھەلویستێن دژوار نابن)
زێدەتر گۆت: (زڤراندنا ٩٥% ژ دەڤەرێن ڤەقەتیایی بویە سەدەم کو عیراق دژی ریفراندومێ راوەستیت ژبەرکو ئەڤ دەڤەرە بو وان گرنگ و ھەستیارە ، ئەنجامدانا ریفراندۆم و سەربخوە بوونا ھەرێما کوردستانێ سەرپێچیەکا قانونی و دەستووری نینە بەلکو عیراقێ سەرپێچی لسەر دەستووری کریە و دڤیابا ل سالا ٢٠٠٧ ماددێ ١٤٠ ھاتبایە جێ بەجێ کرن)
کوچەرى د درێژاھیا ئاخفتنێن خودا گۆت ژی: (د سیاسەتێ دا نینە کو بەری ئەنجامدانا ریفراندۆمێ دەولەتەک ھەلویستێ خوە ل بارا ریفراندۆما ھەرێما کوردستانێ دیار بکەت ، ئەگەر پرانیا خەلکێ کوردستانێ ل گەل ئەنجامدانا ریفراندۆمێ بیت وی دەمی ئەمریکا ژی چوو ھەلویستێن نەرێنی نابن ، دنھادا ئەمریکا ل گەل دەمێ ئەنجامدانا ریفراندۆمێ نینە ئەو ژی ژبەرکو ھێشتا شەری َداعش دوماھی نەھاتیە)

ئەڤرۆ نیوز ، ھلۆری:
سەرۆکێ ھەرێما کوردستانێ مەسعود بارزانی دیارکر کو حکومەت و دەستھەلاتدارێن عراقێ بەرپرسیارن ھەمبەر تێکدانا شەراکەتێ و ئەو بارودوخی َکو نھا درۆست بووی ، و گەلێ کورد نھا پێنگاڤێن سەربخویێ دھاڤێژیت.
ئەڤرۆ سەرۆکێ ھەرێما کوردستانێ مەسعود بارزانی ل گەل شاندەکێ بلند یێ رابیتەیا ئیسلامی یا جیھانی ل ھەولێر کومبو و چەند دانوستاندنەک لسەر رەوشا ھەرێمێ و عیراقێ بەحسکرن.
ل گورەی مالپەرێ سەروکاتیا ھەرێما کوردستانێ شاندێ رابیتەیا ئیسلامیا جیھانی دانوستاندن لسەر پێکھاتە و فرە ئاینی و فرە نەتەوەیی ل کوردستانێ کر و تەکەس کر کو ئەو باش ل داخوازیێن گەلێ کورد و ئەوان کارەسات و نەخوشیێن ب سەری ھاتی دزانن ، و د بەرامبەر دا سەرۆکێ ھەرێمێ سوپاسیا شاندنێ ناڤبری کر و پاشان ھەموو ئەگەرێن کو کوردستانێ پەنا بو سەربخوە و ئەنجامدانا ریفراندۆمێ بەحسکرن و دیارکر کو گەلێ کورد ھەموو رێکێن پێکڤە ژیان و شەراکەتێ ل گەل عیراقێ تاقیکرن بەلێ چوو ئەنجام نەبوون ، و حکومەت و کاربدەستێن عیراقێ بەرپرسیارن ھەمبەر تێکدانا شەراکەتێ و ئەو بارودوخێ کو نھا درۆست بووی.

د پشکەکا دن یا کومبوونێ دا ھەردوولایان بەحس ل وان ھەرەشەیێن تیرورستان و ھزرێن تایفەگەری و سەقامگیریا پێکڤە ژیانێ کر و شاندنێ ناڤھاتی ژی خوشحالیا خوە دەبری بو ئەوان ھەلویستێن گەلی کورد ھەمبەری خزمەتکرن و ڤەحەوانا ئاوارەیان کری.