ئەڤرۆ نیوز ، سالار دۆسکی:

سەرۆکێ فەرمانگەھا ھەماھەنگیێ و دوڤچوونێ ل حکۆمەتا ھەرێما کوردستانێ دیارکر کو کو شنگال و ئێزدی پارچەکن ژ کوردستانێ و کەس نەشێت ژ کوردستانێ ڤەکەن ،و بزاڤێن مە بو رزگارکرنا وان ئێزدیێن دەستێ داعش د بەردەوامن.
د.نوری ئوسمان عەبدولرەحمان سەرۆکێ فەرمانگەھا ھەماھەنگیێ و دوڤچوونێ ل حکۆمەتا ھەرێما کوردستانێ بۆ ئەڤرۆ نیۆز گۆت: (برایێن ئێزدی ل کیڤە بچن و دێ ب دووڤ دا چین و مە زانیاری ھەنە ئێزدیێن دەستێ داعش دا ل حوێجە و تەلەعفەر ماینە ، نێزیکێ شەش ھزار ٤٠٠ کەسێن ئێزدی کەفتینە دەست داعش ژ وانان زێدەتری سێ ھزار کەسان ھاتینە رزگارکرن و دیڤچوون و لێگەریان بو رزگارکرنا یێن بەردەوامە )
زێدەتر گۆت: (ھەتا نھا ١٠ گورێن ب کوم ھاتینە دیتن و دبیت ئەڤ دەڤەرێن کو ھەتا نھا نەھاتینە رزگارکرن ھێشتا ھەبن ، پشتی دھێنە ئازادکرن دێ خزمەتێن مەزن بۆ ھێنەکرن وەک سەنتەرێ چارەسەرکرنا دەروونی و چارەسەکرنا جەسەدی دکارین رێکخراوێن نیڤدەولەتی و زانکۆ و کەسانێن شارەزا بینین سەرخەت داکو چارەسەیێن بلەز بۆ ئەڤان کەسان بھێنە دیتن و دیسا گەلەک ژ ئەڤان رزگارکریان ب مەرەما وەرگرتنا چارەسەریان بو وەلاتێن بیانی ھاتینە رەوانەکرن و مە رێکەفتن ل گەل ھەرێمەکا وەلاتێ ئەلمانیا ھەیە بۆ چارەسەرکرنا رزگارکریان)
دیارکر ژی کو ئارمانجا سەرەکی ئەوە جارەکا دی شنگال بھێتە ئاڤاکرن و ئاوارە بچیتە سەر جە و وارێن خوە و گۆت ژی: ( حوکمەتا ھەرێما کوردستانێ ژی دووپاتیێ ل سەر وێ یەکێ کریە کو شنگال و ئێزدی پارچەکن ژ کوردستانێ و کەس نەشێت ژ کوردستانێ ڤەکەت)

ئەڤرۆ نیوز ، نەوزاد ھلۆری:
وەسا بریار کو ئەڤرۆ ل سەنتەرێ باژێرێ دھوکێ ھژمارەکا رێکخراوێن پارێزگەھا دھوکێ کەمپینەکا پشتەڤانیێ بۆ پرسا ریفراندۆمێ رابگەھینن.
دڤی وارید ” ھێرش رەشید ” ئێک ژ رێکخەرێن ئەوێ کەمپینێ بو ئەڤرۆ نیوز گۆت: (ئەم وەکو رێکخراوێن جڤاکێ سڤێل و چەند رێکخراوەکێن دن ب مەرەما پشتەڤانیکرن ل پروسا ریفراندۆم بۆ سەربخویی یا کوردستانێ دێ کەمپینەکا پشتەڤانیێ راگەھینین و تێدا زێدەتری ٢٠ رێکخراو پشکدارن)
زێدەتر گۆت: (ل دەمژمێر ١١ێ سپێدێ ئەڤرۆ رۆژا سێشەمبی ل نیڤا بازارێ باژێرێ دھوکێ دێ کەمپین ھێتە راگەھاندن و دێ بەیانمایەک ھێتەخواندن و دوڤدا کەمپین دی َکارێن خوە ل ھەموو کوردستانێ دەست پێ کەت ب ئەنجام دانا چالاکیێن ژێکجودا)
دھێتە زانین ل ھەردوو پارێزگەھێن ھەولێر و سلێمانیێ ژی ھەمان کەمپین بو پشتەڤانیکرنا ریفراندۆمێ ھاتینە پێکینان.

ئه‌ڤرۆ نیوز:
هه‌رێما كوردستانێ پلانا خوه‌ بۆ ئاڤاكرنا 14 به‌نداڤان دیار كر ب مه‌ره‌ما پشتراستكرنا تژیكرنا پێدڤییا ئاڤێ ل هه‌رێمێ.
عه‌بدولستار مه‌جید، وه‌زیری چاندن و ژێده‌رێن ئاڤێ یێ هه‌رێما كوردستانێ ئه‌و پلانه‌ ئاشكرا كر و گۆت: پێدڤییا هه‌رێمی ب ئاڤێ زێده‌بوویه‌ ژبه‌ر بكارئینانا وێ یا نه‌رێكخستی.
هه‌روه‌سا ناڤهاتی دوپات كر كو هه‌تا هه‌كه‌ر توركیا شه‌رێ ئاڤێ دژی هه‌رێما كوردستانێ بكه‌ت، ئه‌و پلانا حكومه‌تا هه‌رێمێ دێ تێرا هه‌رێمێ ئاڤێ دابین كه‌ت.

ئەڤرۆ نیوز ، ھلۆری:
ئەڤرۆ کومبونا كۆمیتا بلند یا ریفراندۆمێ ب سەرپەرشتیا بارزانی دوماھی ھات و شاندێ حکومەتا ھەرێما کوردستانێ بو بەغدا ژی پێکئینا بو دانوستاندن لسه ر پرسا ریفراندۆمێ.
کومبوونا كۆمیتها بلند یا ریفراندۆمێ ب سەرپەرشتیا مەسعوود بارزانی سەرۆکێ ھەرێما کوردستانێ دوماھی ھات و شاندێ حکومەتا ھەرێما کوردستانێ بو بەغدا ژی پێکئینا کو پێکدھێت ژ ” د.رۆژ نوری شاوەیس ژ پارتی دیموکراتی کوردستان ، فوئاد حسێن ل دیوانا سەروکاتیا ھەرێما کوردستانێ ، سەعدی ئەحمەد پیرە ژ ئێکەتیا نیشتمانیا کوردستانێ ، محه‌مه‌د هاودیانی ژ ئێکگرتویا ئیسلامی یا کوردستانێ ، و ڤیان دەخیل وەکو نونەرا ئێزدیان و مەلا ماجد عوسمان ژی ژ پێکھاتەیا تورکمانان ھاتنە پێکئینان و ھێشتا نونەرێ مەسیحیان کو دھێتە پێشنیارکرن كو ارام گورگیس و رومیو ھەکاری بیت نەھاتیە ئێکلاکرن.
ژێدەرەکێ بۆ ئەڤرۆ نیوز دیارکر كو ھەر شاندەکێ ژلایێ حکومەتێ بھێتە پێکئینان بۆ سەرەدانا ھەر وەلاتەکێ دێ ژلایێ سەروکێ ھەرێمێ و جێگری وی ھێنە پێکئینان و دەستنیشانکرن ژبەرکو ئەو ھاتینە راسپاردن بو دیارکرنا شاندێن وەلاتێن جیھانێ ل بارا پرسا ریفراندۆمێ و سوبه‌ هى كۆمیته‌یا به‌غدا دێ ئێكه‌م كۆمبوونا خوه‌ ل مالا دكتور رۆژ نووری شاوەیس كه‌ن و چاڤه‌رێیه‌ د چه‌ند رۆژێن بهێت دا كۆمیته‌ بچیته‌ به‌غدا.

ئەڤرۆ نیوز ، نەوزاد ھلۆری:
ئەڤرۆ ل سنوورێ قەزا ئاکرێ یا سەر ب پارێزگەھا دھۆک پەنەلەکێ زانستی بو چەند سیاسیەکێن کوردستانێ ب رێڤەچوو کو تایبەت بو ب پرسا ریفراندۆمێ ، د چارچوڤێ پەنەلێ دا ھوشیار زێباری ئەندامێ سەرکرداتیا پارتی دیموکراتی کوردستان دیارکر کو دەنگویێن گرتنا سنوران و گرانبوونا بازاران بتنێ ریکلامەکە ژلایێ ھندەک بازرگانان دھێتەکرن.
دڤی ھونەر سەلیم بەرپرسێ راگەھاندنا کولیژ و پەیمانگەھا تەکنیکی یا ئاکرێ بۆ ئەڤرۆ نیوز گۆت: ( سەروکاتیا زانکویا پولیتەکنیکی یا دھۆک ب ھەڤکاریا پەیمانگەھا تەکنیکی یا ئاکرێ پەلەنەکێ زانستی بو پشتەڤانیا ریفراندۆمێ بناڤ و نیشانێن ” ریفراندۆم ھێڤێنێ سەربخوە بوونێ یە ” بو ھەر ئێک ژ کەساتیێن سیاسی ” ھوشیار زێباری ئەندامێ سەکرداتیا پارتی دیموکراتی کوردستان ، سەعدی ئەحمەد پیرە ئەندامێ سەرکرداتیا ئێکەتیا نیشتمانیا کوردستانێ و خەلیل ئیبراھیم ژ ئێکگرتویا ئیسلامیا کوردستانێ و دکتور عوسمان عەلی وەیس راوێکارێ قانونی و دەستووری ل پەرلەمانێ کوردستانێ ” ئەنجام دا و تێدا دانوستاندن لسەر کومەکا تەوەران ل بار ریفراندۆمێ ھاتنەکرن)
زێدەتر گۆت: ( پەنەل ل ھولا پەیمانگەھا تەکنیکی یا ئاکرێ ب رێڤەچوو و ھەموو تەخ و چینێن جڤاکی تێدا پشکداربوون و ھژمارەکا مێھڤانان ل ناخوەیێن پارێ.گەھێن ھەرێمێ ژی بەرھەڤ ببوون)
د چارچوڤێ پەنەلێ دا ” ھوشیار زێباری ” ئەندامێ سەرکرداتیا پارتی دیموکراتی کوردستان گۆت:(ریفراندۆم پرسەکا نیشتمانیە و چوو کەس و لایەنان ماف نینە ب مولکێ خوە بزانن و گەلێ کوردستانێ بریاردایە کو چارەنڤیسێ خوە دیاربکەت بو مان و نەمانا ل گەل عیراقێ پشتی ئەو ھەموو نەخوشی و کوشتن و تالانان و دەر ب دەریان ب سەرێ وان ھاتی)
زێدەتر گۆت: (ھندەک کەس و لایەن ترسا وێ یەکێ دئێخن دلێ خەلکی کو ئەگەر ریفراندۆم بھێتە ئەنجام دان دێ دەرگەھێن سنووری ھێنە گرتن و بازار گران بن ، بەلێ ئەڤ یەک بتنێ ریکلامەکە ھندەک بازرگان و کەس دکەن و چو تشتەک بو ڤێ یەکێ نینە و پێدڤی یە ئەڤ کەس بھێنە سزادان ، بو گەلێ کورد دوپات دکەین کو چوو وەلاتێن جیھانی دژاتیا خوە بو ئەنجامدانا ریفرانۆدمێ دیار نەکریە و ریفراندۆم دێ د وەختێ خوە دا ھێتە ئەنجامدان ، و گەلێ کورد گەلەک قوربانی داینە و خەباتەکا زور کریە ، ئێدی دەم ھات بەرھەمێ خەبات و قوربانیدانا خوە ببینیت )