ئەڤرۆ نیۆز،زنار تۆڤی:

وەزارەتا ئەوقاف و کاروبارێن ئایینی ل هەرێما کوردستانێ راگەهاندیە کو،هەموو ئامادەکاری یێن پرۆسا حەج و پێشوازیکرنێ ل حەجیێن کوردستانێ ل وەلاتێ سعودی ب دوماهی هاتینە،هەروەسا لیژنەیا تایبەت یا كارگێری یا وەزارەتا ئەوقافێ وکاروبارێن ئایینى هەموو رێکارێن پێشوازیکرنێ ل حەجیان ل هه‌ردو باژێرێن مەککە و مەدینا پیرۆز ب دوماهی ئیناینە و هەر ژ جهێ ڤەحەوهانێ و هاتنوچوونێ و باشترین خوارن بۆ حەجیان و تیمێ نۆشداری و ساخلەمیێ و كارگێری و سەرجەم پێدڤی و هووردەکاریێن تایبەت ب ڤێ پرۆسێ ڤە‌.

وەزارەتا ئەوقافێ هەروەها گۆتیە،کو دابەشکرنا جهێ ڤەحەویانا حەجیان ل دووڤ پارێزگەهان و ب ڤی شیوەی هاتیە رێکخستن،کو ئۆتیلا سەما زیافە بۆپاریزگەها هەولێر و ئۆتێلا نەسەمات خیر بۆ پارێزگەها سلێمانیێ و گەرمیان هەلەبجە و بەشەک ژ حەجیێن هەولێرێ و ئۆتێلا جاد مەحبەس بۆ حەجیێن پارێزگەها دهۆکێ،هەروەسا ئەڤرۆ چار شەمبێ 2 ئابێ دێ ئێکەم کاروانێ حەجیێن کوردستانێ یێن ئەڤ سالە دەست پێکەت و ئێکەم گەشت ژ فرۆکخانا نێڤدەولەتى یا هەولێرێ کو تێدا 280 كه‌س ل دەمژمێر 8 نیڤێ سپێدێ دێ سەفەرێ کەن و دویەم گەشت دێ ژ فرۆکخانا سلێمانیێ دەستپێکەت کو 188 كه‌س دێ ل دەمژمێر 12 شەڤێ سەفەرێ کەن.

گەشتێن حەجێ دێ هەتاکو رۆژا 16 ئابێ بەردەوام بن و تێدا دێ 4867 حەجى ژ هەرێمێ هێنە ڤەگۆهاستن بۆ عەرەبستانا سعودی.

ئه‌ڤرۆ نیۆز،زنار تۆڤى:

جێگرێ فراكسیۆنا پارتى دیمۆكراتى كوردستان ل په‌رله‌مانێ عێراقێ ده‌رباره‌ى وه‌رگرتنا پۆستێ وه‌زاره‌تا دارایى یا عێراقێ،به‌رسڤا حوكمه‌تا عێراقێ دده‌ت و جه‌ختێ ل هندێ دكه‌ت كو ئه‌و وی پۆستى وه‌رناگرن،هه‌ر چه‌نده‌ پێشتر په‌رله‌مانێ عێراقێ د چارچۆڤێ چه‌ندین روونشتنان دا،پۆستێ وه‌زاریرێ دارایى یێ عێراقێ ژ پارتى دیمۆكراتى كوردستان وه‌رگرتیه‌،كو هشیار زێبارى ئه‌ڤ پۆسته‌ وه‌رتبوو،د كابینا حه‌یده‌ر عه‌بادى دا.

شاخه‌وان عه‌بدولا جێگرێ فراكسیۆنا پارتى دیمۆكراتى كوردستان ل په‌رله‌مانێ عێراقێ بۆ ئه‌ڤرۆ نیۆز دبێژیت:به‌رى نوكه‌ ژى ئه‌م ژ لایێ به‌غدا ڤه‌ هاتینه‌ ئاگه‌هداركرن كو كاندیده‌كێ بۆ پۆستێ وه‌زیرێ دارایى یێ عێراقێ ده‌ست نیشان بكه‌ین،لێ مه‌ داخوازا وان ره‌تكریه‌ و مه‌ بۆ وان دیاركریه‌ كو ئه‌م چو كاندیدان ڤرێناكه‌ین،چونكى مه‌ باوه‌رى ب هه‌ڤبه‌شیێ ل عێراقێ نه‌مایه‌،دیسا مه‌ بۆ وان دیاركریه‌ مه‌ وه‌زیره‌ك نه‌ڤێت كو بتنێ د به‌رژه‌وه‌ندا وى كه‌سى دابیت و نه‌شێت چو بۆ خه‌لكێ كوردستانێ بكه‌ت،له‌ورا ما بۆچیه‌ مه‌ وه‌زیره‌ك هه‌بیت و خه‌لكێ كوردستانێ یێ بێ مووچه‌ بیت؟.

جێگرێ سه‌رۆكێ فراكسیونا پارتى گۆت ژى:هه‌كه‌ پارتى كاندید هه‌بایه‌،دا ژ مێژه‌ پێشكێش كه‌ین،به‌لێ مه‌ نینه‌ و مه‌ عێراق ئاگه‌هدار ژى كریه‌ ل سه‌ر ڤى بابه‌تى،چونكى به‌رى نوكه‌ مه‌ وه‌زیرێ دارایى هه‌بوو،لێ پاره‌ نه‌بوون و بوودجێ خه‌لكێ كوردستانێ نه‌ دهاته‌ هنارتن،و مه‌ گۆتیه‌ وان كو بوودجێ كوردستانێ ژ لایێ هه‌وه‌ ڤه‌ هاتیه‌ برین،دیسا مه‌ گۆتیه‌ وان،كو مه‌ سۆپا سالار ژى هه‌بوو لێ بوودجێ پێشمه‌رگه‌ى هاته‌ برین و هه‌وه‌ نه‌دا،له‌ورا ئێدى ئه‌م ڤى پۆسته‌ى وه‌رناگرین و ئه‌م د حوكمه‌ته‌كێ دا نابین كو مافێ مه‌ پێشێل بكه‌ت.

ده‌رباره‌ى هه‌لبژارتنێن داهاتى یێن په‌رله‌مانێ عێراقێ شاخه‌وان دبێژیت:نوكه‌ ئه‌م مژۆلى بابه‌تێ ریفراندۆما سه‌ربه‌خۆیا كوردستانێ نه‌ و هێشتا زوویه‌ بۆ ڤى بابه‌تى،له‌وما پشتى ئه‌ڤ پرۆسه‌یه‌ ب دوماهى دهێت،هنگێ دێ پارتى دیمۆكراتى كوردستان هه‌لویستێ خوه‌ ل دوور پشكدارى و نه‌ پشكداریا خوه‌ د وان هه‌لبژارتنان دا راگه‌هینیت.

ئەڤرۆ نیۆز،زنار تۆڤی:

پەیڤدارێ سه‌رۆكاتیا كۆماری یا توركیا دیارکریە کو رێفراندوما هه‌رێما كوردستانێ نابیته‌ ئه‌گه‌رێ چاره‌كرنا كێشه‌یان ل عێراقێ،لێ ئه‌و چەند ژی دیارکریە کو ئەو نه‌شێن بێژن بلا هه‌رێم و به‌غدا په‌یوه‌ندیێن خوه‌ باشتر لێ بكه‌ن.

ئیبراهیم كالن په‌یڤدارێ سه‌رۆكاتیا توركیا بۆ كه‌نالێ تی ڤی نێت یێ تورکی راگەهاندیە:کو ئێكپارچه‌یا ئاخا عێراقێ بۆ توركیا یا گرنگه‌،لێ نوکە عێراق یا پرە ژ كێشه‌ و ئالۆزیان و چو كارێن وی وه‌لاتی ب باشی برێڤه‌ ناچن، له‌ورا ئه‌م نه‌شێن بێژین بلا هه‌رێم و به‌غدا په‌یوه‌ندیێن خوه‌ باشتر لێ بكه‌ن.

پەیڤدارێ سەرۆکاتیا کۆماری ئەو ژی خویاکریه:کو هەردەم ئه‌نقه‌ره‌ گرنگیێ ب ئاشتیا ناڤخوه‌یا عێراقێ دده‌ت و هەروەسا رێفراندوم هه‌موو كێشه‌یێن هه‌ولێر و به‌غدا چاره‌ناكه‌ت،ب تایبه‌ت ژی كێشه‌یێن ئابووری و ئێمناهیێ د ڤی وەلاتی دا.

ئه‌ڤرۆ،زنار تۆڤى:

رێناس جانۆ ئه‌ندامێ په‌رله‌مانێ عێراقێ ل سه‌ر فراكسیۆنا پارتى دیمۆكراتى كوردستان ده‌رباره‌ى وان كارتێن فشارێ یێن د ده‌ستێ عێراقێ و ئیرانێ دا ماین هه‌مبه‌رى ئه‌نجامدانا ریفراندۆمێ،بۆ رۆژناما ئه‌ڤرۆ دبێژیت:نوكه‌ مه‌زنترین كارتا فشارێ یاكو عێراق ب كار دئینیت دیالۆكه‌،ئه‌و ژى ب رێیا سه‌رۆك وه‌زیرێن عێراقێ حه‌یده‌ر عه‌بادى یه‌،هه‌روه‌سا به‌رى دو حه‌فتیان ژى حه‌یده‌ر عه‌بادى شانده‌كێ فه‌رمى هنارتیه‌ كوردستانێ،ژ پێخه‌مه‌ت دانوستاندنێ ل گه‌ل حوكمه‌تا هه‌رێما كوردستانێ بكه‌ت،له‌ورا نوكه‌ دیارترین كارت كو عێراق ب كار دئینیت ل گه‌ل هه‌رێمێ،ئه‌و ژى كارتا دیالۆكێ یه‌،لێ ئه‌و كارتێن دى یێن عێراق ب كار دئینیت ژى دێ د ئه‌رێنى بن و د نه‌رێنى نابن ل هه‌مبه‌رى كوردستانێ،هه‌روه‌سا د بابه‌تێ په‌سه‌ندكرنا میزانیا عێراقێ دا یا سالا 2018 جۆره‌ نه‌رماتیه‌ك تێدا هه‌بوو،له‌ورا وان دڤێت ب ڤێ رێكێ جۆره‌ فشاره‌كێ ل سه‌ر هه‌رێمێ دروست بكه‌نه‌ ڤه‌،دیسا وان دڤێت ناما خوه‌ ب وى جۆرى رابگه‌هینن،كو وان دڤێت ئه‌و كێشێن دناڤبه‌را به‌غدا و هه‌رێما كوردستانێ دا ماینه‌ هه‌لاویستى چاره‌سه‌ر بكه‌ن.

هێشتا دبێژیت:لێ ئه‌و كێشێن هه‌تاكو نوكه‌ دناڤبه‌را به‌غدا و هه‌ولێرێ دا ماین،ژ هندێ گه‌له‌ك مه‌زنترن كو عێراق بشێت دڤى ماوه‌یى دا،ئانكو به‌رى 25 ئیلۆنێ چاره‌سه‌ر بكه‌ت،هه‌ر چه‌نده‌ بابه‌تێ په‌سه‌ندكرنا میزانیا عێراقێ دێ چیته‌ پشتى ئه‌نجامدانا ریفراندۆما سه‌ربه‌خۆیا كوردستانێ و نوكه‌ كار یێ تێدا دهێته‌ كرن،ژبه‌ر هندێ ژى ئه‌و هه‌لویستێ عێراقێ هه‌تاكو نوكه‌ وه‌رگرتى و ئه‌ڤه‌ چه‌ند ساله‌ ژى ئه‌م وه‌كو كورد داكوكیێ ل سه‌ر دكه‌ین كو بوودجه‌یێ هه‌رێما كوردستانێ و پشكا پێشمه‌رگه‌ى و یێن جۆتیارێن كوردستانێ بهێته‌ دان،لێ هه‌تاكو نوكه‌ عێراقێ نه‌دایه‌،زێده‌بارى ڤێ چه‌ندێ ژى كو عێراقێ كێشا ده‌رمانان بۆ هه‌رێمى دروستكریه‌،له‌ورا عێراق د داهاتى ژى دا ڤێ پێنگاڤێ ناهاڤێژیت.

رێناس جانۆ هێشتا دبێژیت:دڤێت ئه‌م نكۆلیێ ل هندێ نه‌كه‌ین كو ئیران وه‌لاته‌كێ گرنگه‌ د ده‌ڤه‌رێ دا،چونكى به‌رفره‌هبوونا ده‌ستهه‌لاتا ئیرانێ د عێراقێ دا رۆژ ب رۆژ یا زێده‌تر دبیت،هه‌روه‌سا ئیران ب رێیا وان پارت و لایه‌نێن سیاسى یێن كو ملكه‌چى بریارا ئیرانێ بووین،دێ ب هه‌موو ره‌نگان دژایه‌تیا ریفراندۆما سه‌ربه‌خۆیا كوردستانێ كه‌ن،لێ وه‌كو دیار ئه‌و كارتێن به‌رى نوكه‌ ئیرانێ هه‌مبه‌رى كوردستانێ ب كار ئیناین سه‌رنه‌گرتینه‌،له‌ورا هه‌ر كارته‌كا دى یا ئیران ب كار بینیت ل داهاتى ژى دا سه‌رناگریت و كوردستانێ رێره‌وا خوه‌ یا دروست گرتیه‌ به‌ر.

ئه‌و ئه‌ندامێ په‌رله‌مانێ عێراقێ زێده‌تر دبێژیت:بۆ گفتۆكرنێ ل گه‌ل عێراقێ،پێدڤیه‌ هه‌رێما كوردستانێ دو پێنگاڤان بهاڤێژیت،ئه‌و ژى پێنگاڤا یاسایى و پێنگاڤا سیاسى یه‌،هه‌روه‌سا ئه‌ڤ هه‌ردو پێنگاڤه‌ هه‌لبژارتنێن مه‌نه‌،چونكى مه‌ یا گۆتى مه‌ دڤێت ئه‌م ب رێكێن ئاشتیانه‌ داخوازیێن خوه‌ بگه‌هینینه‌ حوكمه‌تا عێراقێ،دیسا رێكێن یاسایى ئه‌ون كو ئه‌م بزاڤێ بكه‌ین ئه‌ڤێ داخوازێ ب فه‌رمى و ب یاسایا ته‌شریعه‌كێ پێشكێشى په‌رله‌مانێ عێراقێ بكه‌ین،هه‌روه‌سا رێیا سیاسى ژى ئه‌وه‌ كو نوكه‌ دانوستاندن یا به‌رده‌وامه‌ ل گه‌ل لایه‌نێن سیاسى ل سه‌ر وێ داخوازا هه‌رێما كوردستانێ و خه‌لكێ وێ دكه‌تن.

ناڤهاتى گۆت ژى:بۆ بابه‌تى سه‌ربه‌خۆیا هه‌رێما كوردستانێ ئه‌م نه‌ پێدڤى هندێ نه‌،كو ئه‌م روخسه‌تێ ژ كه‌سه‌كێ ب خوازین،چونكى ئه‌ڤه‌ بریاره‌كه‌ و دێ گه‌لێ كوردستانێ ده‌ت و ئه‌ڤ بریاره‌ دێ ل هه‌رێمێ هێته‌ دان،هه‌ر چه‌نده‌ دێ یا باش بیت،هه‌كه‌ عێراق ل سه‌ر داخوازیا خه‌لكێ كوردستانێ یا رازى بیت،لێ هه‌كه‌ یا رازى نه‌بیت ژى،ئه‌ڤه‌ ناهێته‌ وێ واتایێ كو ئه‌م ریفراندۆمێ ئه‌نجام ناده‌ین،یان ژى دێ عێراق شێن رێگریه‌كا یاسایى هه‌مبه‌رى وێ كه‌ت،له‌ورا ئه‌م ب هیڤى نه‌ و مه‌ گه‌شبینیه‌كا ته‌مام هه‌یه‌،بۆ ریفراندۆما سه‌ربه‌خۆیا كوردستانێ.