ئەڤرۆ نیۆز،زنار تۆڤی:

حوکمەتا ئەمریکا دێ چەندین جۆرێن چەک و تەقەمەنیان بۆ هێزێن پێشمەرگێ کوردستانێ هنێریت.

ل دووڤ نووچەکێ گۆڤارا (فۆرێین پۆلیسی) یا ئەمریکی ئەڤ چەندە دیارکریە،لێ دەمێ گەهشتنا وان هاریکاریێن ئەمریکا بۆ هێزێن پێشمەرگەی ئاشکرا نەکریە.

هەروەسا گۆتیە:هنارتنا چەک و تەقەمەنیان ل چارچۆڤێ یاداشتا لێک تێگەهشتنا دناڤبەرا هەرێما کوردستانێ و ئەمریکا دایە،کو تێدا ئەمریکا سۆزا هنارتنا ئەوی برێ پارەیی دابوو.

هاریکاریێن سەربازی پێکهاتینە ژ:
– 4400 چەکێن M16.
– 100 ترۆمبێلێن جۆری هامڤیی یێن گولەنەبر.
– ب دەهان دۆشک.
– 36 تۆپێن 1.5 ملیمی و چەندین چەکێن دی.

هەروەسا دیارکریە کو بهایێ وان هاریکاریان دگەهیتە 300 ملیۆن دۆلاران، بۆ وان دو لیوایێن وەزارەتا پێشمەرگەینە،یێن کو ب سەرپەرشتیا ئەمریکا هاتینە پێکئینان و مەشق پێ هاتیە کرن.

رۆژا سێشەمبی 12/7/2016 ب چاڤدێریا مەسعود بارزانی، سەرۆكێ هەرێما كوردستانێ، کەریم سنجاری، وەزیرێ پێشمەرگەی ب وەكالەت و ئێلیزا سلۆتكین،هاریکارێ وەزیرێ بەرگریا ئەمریكا لێك تێگەهشتنەکا سەربازی دناڤبەرا هەولێرێ و واشتنتۆن دا هاتیە ئیمزاکرن.

ئەڤرۆ نیۆز،زنار تۆڤی:

کەشناسیا هەرێما کوردستانێ راگەهاند،کو پشتی نیڤرۆیا ئەڤرۆ بیڤەلەرزەکێ هەرێما کوردستانێ هەژاند.

ئەڤرۆ پێنجشەمبی 2017/8/31 رێڤەبەریا گشتی یا کەشناسی و بیڤەلەرزێ ل هەرێما کوردستانێ راگەهاند:ئەڤرۆ ل دەمژمێر 4:09 خولەک ب دەمێ هەولێرێ بیڤەلەرزەکێ ب دووریا 10 کم ل قەلادزێ و 36 کم ل کۆیە دا و ب کووراتیا 10 کم،هەروەسا هێزاوێ 3.4 پلەیان ل دووڤ پیڤەرێ ریختەرێ روودایە.

کەشناسیا هەرێما کوردستانێ ئەو ژی گۆتیە:کو وەلاتیان هەست ب وێ بیڤەلەرزێ کریە.

د چەند حەفتیێن بوری دا،بیڤەلەرزێ چەندین باژێرێن هەرێما کوردستانێ هەژاندیە و د وان بیڤەلەرزان دا وەلاتی برینداربووینە و زیانێن ماددی ژی گەهشتینێ.

ئه‌ڤرۆ نیۆز،زنار تۆڤى:

دكتۆر ئامانج ره‌حیم سكرتێرێ ئه‌نجۆمه‌نێ وه‌زیرێن هه‌رێما كوردستانێ سه‌باره‌ت ب وى گۆژمێ پاره‌ى یێ كو بریاره‌ حوكمه‌تا هه‌رێمێ بده‌ته‌ دانه‌گاز دبێژیت:پێشتر دانه‌گاز داخوازیا نێزیكى 26 ملیارو 500 ملیۆن دۆلارا دكر،به‌لێ ئه‌وا د رێككه‌فتنێ دا بریار ل سه‌ر هاتیه‌دان،بتنێ دێ 2 ملیار و 239 ملیۆن دۆلاران وه‌رگریت،كو پێكهاتیه‌ ژ شایسته‌یێن دارایى یێن وێ كۆمپانیێ،كو هه‌ر ژ ده‌ستپێكا كاركرنا وێ ل هه‌رێما كوردستانێ هه‌تاكو نوكه‌.

هه‌روه‌سا دبێژیت:داخوازیێن دانه‌گاز دو به‌شبوون،به‌شێ ئێكێ شایستێن دارایى بوون،كو 2 ملیار و 239 ملیۆن دۆلارن،هه‌روه‌سا داخوازا قه‌ره‌بووكرنا هه‌موو وان زیان دكر یێن كو ب ئه‌گه‌رێ كارنه‌كرنێ د ماوێ چه‌ند سالێن بورى دا ل گێلگه‌هێن كورمۆرو چه‌مچه‌مال ل سه‌ر رێككه‌فتین،كو وان دگۆت 26 ملیار و 500 ملیۆن دۆلارن.

د.ئامانج دبێژیت ژى:ل دووڤ ڤێ رێككه‌فتنێ دانه‌گاز سازش ل سه‌ر داخوازا 26 ملیار دۆلاران كریه‌ و بتنێ دێ شایستێن دارایى وه‌رگریت،حوكمه‌تا هه‌رێمێ ژى دێ پابه‌ندى سێ بریارێن به‌شێ ئێكێ یێ دادگه‌ها له‌نده‌نێ بیت،ئه‌ڤه‌ ژى گرنتیه‌كه‌ بۆ كۆمپانیا و وه‌به‌رهێنه‌رێن بیانى و هه‌روه‌سا هه‌رێما كوردستانێ ژى یا ئاماده‌یه‌ بریارێن دادگه‌هان جێبه‌جێ بكه‌ت،شایسته‌یێن دارایى یێن كۆمپانیان بده‌تێ،هێشتا دبێژیت:ژبلى راگه‌هاندنا هه‌ڤبه‌ش كو بۆ میدیایان ئاشكراكریه‌،رێككه‌فتنه‌كا مه‌زن ل گه‌ لگرۆپێ كۆمپانیا پیرل كریه‌،كو دانه‌گاز ژى ل خوه‌ دگریت.

ده‌رباره‌ى شێوازێ پێدانا وان 2 ملیار و 239 ملیۆن دۆلاران،ئامانج ره‌حیم دبێژیت:ل گوره‌ى ڤێ رێككه‌فتنێ حوكمه‌تا هه‌رێما كوردستانێ دێ 600 ملیۆن دۆلاران ده‌ته‌ دانه‌گاز،هه‌روه‌سا دێ 400 ملیۆن دۆلارێن ده‌تێ،به‌لێ دێ بۆ گه‌شه‌پێدانا كێلگه‌هێن كورمۆرو چه‌مچه‌مال بن،ل گه‌ل دو بلۆكێن نوو ب ناڤێ بلۆكێ 19 و 20،بۆ هندێ كو بشێن به‌رهه‌مئینانا گازێ ل وان گێلگه‌هان زێده‌ بكه‌ن،هه‌كه‌ ئه‌ڤه‌ ژى یا سه‌ركه‌فتى بیت،دێ كێشا كاره‌بێ هێته‌ چاره‌سه‌ركرن.

سه‌باره‌ت ب ملیاره‌ك و 239 ملیۆن دۆلارێن دى سكرتێرێ ئه‌نجۆمه‌نێ وه‌زیران دبێژیت:ئه‌و گۆژمێ پاره‌ى یێ كو دادگه‌هێ بریار ل سه‌ر داى،شایستێن دارایى یێن دانه‌گازن و دێ وه‌رگریت،به‌لێ ئێدى ب هیچ ره‌نگه‌كێ قه‌ر ل سه‌ر حوكمه‌تێ نامینن،له‌ورا دشێین بێژین ل گه‌ل جێبه‌جێكرنا ڤێ رێككه‌فتنێ ئێدى قه‌رێن دانه‌گاز ل سه‌ر حوكمه‌تێ نامینن.

هەروەسا دیاركر ژى:ئه‌ڤ رێككه‌فتنا نوو ل دووڤ یاسا نه‌فت و گازێ یا په‌رله‌مانێ كوردستانێ هاتیه‌كرن،كو دانه‌گازێ پابه‌ند دكه‌ت ب ناڤه‌رۆكا وێ یاسایێ،چونكى رێكه‌فتنا به‌راهى ل سالا 2007 ل گه‌ل دانه‌گاز و به‌رى ده‌رچوونا وێ یاسایێ هاتبووكرن،ئه‌ڤه‌ ژى د به‌رژه‌وه‌ندا خه‌لكێ كوردستانێ دایه‌.