ئەڤرۆ نیوز ، نەوزاد ھلۆری:
ب مەرەما دابینکرنا پێدڤیێن گوشتێ ماسی ژ بو بازارێن نافخوە و پارێزگەھێن ھەرێما کوردستانێ ، دوو پرۆژەیێن ماسیان ل سنوورێ قەزا مێرگەسوور ھاتینە درۆستکرن ، رێڤەبەرێ چاندنا قەزا ناڤبری ژی دیارکر کو ئەو پرۆژە وەکو فروشیارن نەک وەبەرھێنە.
محمەد مێرگەسووری رێڤەبەرێ چاندنا قەزا مێرگەسوور دیارکر كو دوو پرۆژەیێن ب خودانکرنا ماسیان ل گوندێن ساکا و ھەربوو ھاتینە درۆستکرن و بۆ ئەڤرۆ نیوز گۆت : ( ھەردوو پرۆژەیێن ماسیان ژلایێ کەرتێ تایبەت ڤە ھاتنە درۆستکرن و حکومەتا ھەرێما کوردستانێ ژی دێ ھەڤکاریا وان کەتن د دابینکرنا پێدڤیێن وان وەکو گاز و دەرمان و ئالیکێ خوارنێ و نھا کەفتنە د خزمەتا وەلاتیان دا کو لسەر شێوەیێ حەوزێن ئاڤێ یێن مەزن ھاتینە چێکرن و ماسی تێدا دھێنە ب خودانکرن)
دیارکر ژی کو ماسیێن ئەڤان ھەردوو پرۆژەیان ژ کومارا ئیسلامیا ئیرانێ دھێنە دابینکرن بو پرۆژەیان و زێدەتر گۆت : ( ژ بلی ئەڤان ھەردوو پرۆژەیان نھا دەستووریا درۆستکرنا پرۆژەکێ دن ژی ھاتیەدان و من باوەرە کو دێ داخوازیێن وەلاتیان دابین کەتن ژ بوو گوشتێ ماسی ، بەلێ ھندی ئەڤ پرۆژە و پرۆژێن دن ماسیان بفروشن ھەر دی َداخوازیێن وەلاتیان بو گوشتێ ماسی د بلند بوونێ دابیت و پێدڤی یە حکومەتێ پلانەک ھەبیت کو جوتیارێن مە وەبەرھێنانا گوشتێ ماسی بکەن نەک ماسیان بفرۆشن )

ئەڤرۆ نیوز ، نەوزاد ھلوری :
کەنگروک ئێکە ژ وان متایێن ھشکێن وەرزانە و سالانە ل دەستپێکا ھەیڤا حەفت بانگا کەنگروکا دھێتە کرن ، بەلێ ئەڤ سالە ژبەرکو وەرزێ گەرمێ زویکا دەستپێکر ، ل چەند گوندێن دەردورا ناحیا دینارتە بانگا کەنگروکان دەستپێکر.

عەبدولسەمیع سەدیق ئێکە ژ وەلاتیێن گوندەکێ سەر ب ناحیا دینارتێ دیارکر کو سالانە ئەو دچنە کەنگروکا و گۆت : ( ھەموو سالان ل دەستپێکا ھەیڤا حەفت ھەتا ناڤەراستا ھەیڤێ بانگا کەنگروکا ل گوندی دھێتەکرن و ھژمارەکا زورا وەلاتیان قەستا چیایی دکەن بوو کرنا کەنگروکان ، بەلێ ئەڤ سالە وەرزێ گەرمایێ زویکا دەستپێکر ، ژبەرڤێ یەکێ نھا ل پرانیا گوندێن سەر ب ناحیا دینارتە ژی بانگا کەنگروکان دەستپێکر )

سیپان عەبدولخالق ئەو ژی وەلاتیەکێ دەڤەرا دینارتێ یە گۆت : ( ھەموو سالان ئەز د چمە کەنگروکان و رێژەیەکا باش ژی دکەم بەلێ دبیت ئەڤ سالە وەکو پارسال نەچمێ ژ بەرکو ئەڤ سالە وەکو پارسال د باش نینن و گەلەک وەلاتی د روژانێن رەمەزانێ دا بەری کو بگەھن یێن چوینە کەنگروکان )
زێدەتر گۆت : ( پارسال کیلویا کەنگروکان دناڤبەرا ١٠- ١٥ ھزار دیناران دھاتە فروتن و رەنگە ئەڤ سالە ژی ب ھەمان بھایی یان پتر بیت )

ئیدریس عەبدولجەبار ئێکە ژ بکرێن کەنگروکان دیارکر کو ئەو سالانە کەنگروکان دکریت و گۆت : ( ھەر چەندە ھەتا نھا من چوو کەنگروک نەکرینە بەلێ بھایێن وان ھەر وەکو پارسالن ، و بەھر پتریا کەنگروکێن ئەم دکرین ئەم ل بازارێن دھوک و ھەولێرێ د فروشین )
گوت ژی : ( دەڤەرا دینارتێ ئێکە ژ وان دەڤەرێن کوردستانێ کو رێژەیەکا زور یا کەنگروکان ھەنە بەلێ ئەڤ سالە دبیت کەنگروک کێمتر بن ئەو ژی ژ بەر دوو ئەگەرێن سەرەکی کو ئەو ژی ئەڤ سالە بانگا وان یا گیرویە و رەمەزان ب سەردا ھات و ل دەما چنینێ گەلەک دێ وەریێن و ئەگەرا دوویێ ژی د وەرزێ بوھارێ دا رێژەیەکا زورا کەنگروکان ھاتینە ھەلکێشان)
ژلایێ خوڤە ئەندازیار ئەحمەد جەمیل ئەبو زەید رێڤەبەرێ چاندنا ئاکرێ دیارکر کو ئەڤ سالە دێ کەنگروک کێمتر بیت و گۆت : ( ئەگەرا سەرەکی یا کێمتر بوونا کەنگروکا ئەڤ سالە دزڤریت بو وێ یەکێ کو ئەڤ سالە بانگا کەنگروکا کەفتە د رەمەزانێ دا ب تایبەتی دەڤەرێن ناڤدار ب شکەفتێ و دڤری و سەرێ ئاکرێ و دینارتە و کو راستەوخوە دێ چنینا کەنگروکێ گیروکەت و وەلاتی نھا ناچنە کەنگروکان ، و ژلایەکی َدنڤە ل وەرزێ بوھاری گەلەک ب تەری ھاتیە ھەلکێشان و ئەو جھێن کەنگروک ھەیی گەلەک پوشت و پەلەخ تێدا رابویە و ئەڤ یەک ژی بوویە سەدەم کو کەنگروک تێرا ب حەندقیت ، بەس دەڤەرێن ناڤدار ب سەرێ بانیێ و چیایێ پیرس و کادانان ئەگەر پشتی رەمەزانێ ژی ببیتە بانگ چوو کارتێکرن ل کەنگروکێ ناکەت )
زێدەتر گۆت : ( پارسال نێزیکێ ١٩٠ تەنێن کەنگروکان بتنێ ل دەڤەرا ئاکرێ ب تایبەتی دینارتێ ھاتنە بەرھەمئینان بەلێ دھێتە پێشبینیکرن کو ئەڤ سالە ئەڤ رێژەیە بو ١٢٠ – ١٥٠ تەنان کێم ببیت ، و دیسان پارسال کیلویا کەنگروکان دناڤبەرا ٣ بو ١٢ ھزار دیناران دھاتە فروتن و ئەڤ سال ژی ھەر ھەمان بھایە و کو ئەڤ یەک ژی بھایەکی َزور کێمە بەراورد دگەل بازاری کو ل بازاری کیلو ب ٢٥ ھزار دیناران دھێتە فروتن )

بانگا کەنکروکا سەرەرایی کو ناڤەکێ کەلتوری یە و بو رۆژا چوونا کەنگروکان دھێتە بکارئینان د ھەمان دەم دا ئەڤ رۆژە دەلیڤەکا مەزنە ژ بوو وەلاتیان کو داھاتیەکێ بو خێزانا خوە دابین بکەن و دڤی واریدا شێخزادە ھلوری دانعەمرەکێ دەڤەرێ یە گۆت : ( د بەرێ دا دەمەک دھاتە دەستنیشانکرن بو رۆژا چوونا گوندیان بو کەنگروکان و دھاتە بناڤکرن ب بانگا کەنگروکان ئەو ژی دا کەسەک ھێتە دەستنیشانکرن و ب شەڤ ب دەنگەکێ بلند ل سەر خانویەکێ بلند یان ژی جھەکێ بلند کو گوندیان ھەمووان گوھلێ بیت و گازی کەتن و دا بێژن سوبەھی یان دوسبە بانگا کەنگروکایە و ھەموو وەلاتیێن گوندی دا د وێ رۆژێ دا چنە کەنگروکان و ھەر کەسەکێ بەرا وێ رۆژێ چووبایە کەنگروکان دا ھێتە سزادان و بەھرا پتریا جاران ژی سزا ئەو بوو دا کەنگروکێن وی ژێوەرگرن و بێ بەھردکرن ژ چوونا کەنگروکان د وێ سالێ دا)

ئەڤرۆ نیوز ، بێوار حسێن:

ل روژانێن جەژنا رەمەزانێ رێژەیەکا زورا مێڤان و گەشتیاران سەرەدانا هاڤینگەهێن سنوورێ قەزا ئاکرێ کریە ، ل گورەی زانیاریێن گەشت و گۆزارا ئاکرێ زێدەتری 20 هزار کەسان سەرەدانا جهێن گەشت و گوزاریێن ئاکرێ کریە.

دڤی واریدا مێڤان رەشید بەرپرسێ راگەهاندنا گەشت و گۆزارا ئاکرێ بۆ ئەڤرۆ نیوز گۆت: ( ئەڤ سالە رێژەیا گەشتیار و مێڤانان بەراورد ل گەل سالێن بورى بەر ب زێدەبوونێ ڤە چویە و هەتا نها زێدەتری 20 هزار کەسان سەرەدانا جهێن گەشت و گوزارێن ئاكرێ کریە کو پرانیا وان ل باشوورێ عیراقێ هاتبوون)

زێدەتر گۆت: (ب رێیا گرێبەستان ل گەل 17 كومثانیێن گەشت و گۆزارێ شیان هژمارەکا گەشتیاران بو هاڤینگەهێن دەڤەرێ بینین ، مە هەموو ئاسنکاری بو وان کرینە و هژمارەکا خارنگەهێن نو هاتینە ڤەکرن و مە پاس بو ڤەگوهاستنا گەشتیاران دابینکرینە و ئەو جهێن رێیێن وان نەخوش مەیێن چێکری )

گرنگترین ئەو جهێن گەشت و گوزاری کو زورترین هژمارا گەشتیاران ل روژنێن جەژنێ خەلکەکێ زور قەست کریێ هاڤینگەهێن گەلیێ زنتا ، سیپە ، گویسکێ ، سیلێ و گربیش بوون.