ئەڤرۆ نیوز:
شارەدارییا باژارێ لۆس ئەنجلس ل ئەمریکا ب مەرەما کێمکرنا پلەیێن بلند یێن گەرمێ، ھەژمارەکا جادەیێن وی باژاری ب رەنگێ سپی بۆیاغ کرن.
شارەدارییا لۆس ئەنجۆس دەست ب بۆیاغکرنا ٣٥% یا جادەیێن وی باژاری ب رەنگێ سپی کر ژبەرکو پلەیێن گەرمێ بلند بووینە و چاڤێ رۆژێ ل دەمێ ب ئەردێ چیمەنتۆ کری و قێرکری دکەڤیت تێھنا گەرمێ دژوارتر دکەت، ل گۆری گۆتنا بەرپرسێن وان بویاغکرنا ب وی رەنگی دێ رێژەیا گەرمێ ئینتە خوار.
ئه‌ڤرۆ نيوز، نيوار محه‌مه‌د سه‌ليم:
دبيت هێشتا زوو بيت بڕيارێ بده‌ين يان هه‌ڤبه‌ركيێ د ناڤبه‌را ده‌وله‌تا كوردستانێ و عيراقێ دا بكه‌ين كا پشتى راپرسيێ كێش ده‌وله‌ت ژ وان دێ يا سه‌ركه‌فتى بيت، به‌لێ ئه‌م دشێين ژى پشت به‌ستنێ ل سه‌ر هنده‌ك به‌لگه‌يێن ناڤخۆيى و جيهانى بكه‌ين كو ببنه پيڤه‌ر بشێين هه‌ڤبه‌ركيێ د ناڤبه‌را دو ده‌وله‌تان دا بكه‌ين ئێك كو هێشتا نه‌هاتيه راگه‌هاندن و ئێك ژى پتر ژ سه‌ده‌يه‌كى يه ده‌وله‌ت.
بۆ ڤێ ئێك ژى باشترين نمۆنه ئه‌م كار ل سه‌ر بكه‌ين، سه‌رۆك وه‌زيرێ هه‌رێما كوردستانێ نێچيرڤان بارزانى و سه‌رۆك وه‌زيرێ به‌رێ يێ عيراقێ نورى مالكى نه.
دامه‌زراوا فورن پۆلسى د راپۆرته‌كا خوه يا شرۆڤه‌كارى دا ئاماژه ب وان سه‌ركه‌فتنان كريه يێن سه‌رۆك وه‌زير نێچيرڤان بارزانى د وارێ ئابوورى دا ب ده‌ست خوه ڤه ئيناين كو د ماوێ بۆرى دا شيايه په‌ترۆلا هه‌رێما كوردستانێ ب ره‌نگه‌كێ سه‌ربه‌خۆ ب رێيا توركيا ره‌وانه‌يى بازارێ ژ ده‌رڤه بكه‌ت و په‌يوه‌نديێن خوه ل گه‌ل وه‌لاتێ توركيا گه‌له‌ك باش بكه‌ت و ژ دوژمنه‌كێ خوه ل ده‌ڤه‌رێ بكه‌ته هه‌ڤپشكه‌كێ بازرگانى.
هه‌ر ديسا ڤێ راپۆرتێ ئاماژه ب سه‌ركه‌فتنا پێشه‌سازى ل هه‌رێما كوردستانێ كريه كو شيايه ب رێيا په‌ترۆلێ كۆمپانيێن مه‌زن يێن جيهانى بكێشيته ناڤ هه‌رێما كوردستانێ وه‌كو كۆمپانيێن ئێكسۆن مۆبيل و شيفرۆن و هنده‌ك كۆمپانيێن توركى ژى.
ژ لايێ مرۆڤاتى و ديموكراتى و ئازاديا راده‌ربڕينێ ژى سه‌ركه‌فتنه‌كا گه‌له‌ك مه‌زن ب ده‌ست ڤه ئينايه، دوژمن كرينه دوستێن بازرگانى و سلامه‌تى بۆ هه‌موويان دابينكريه، پارێزگارى ل كێمينه‌يان كرينه، خوه ژ شه‌رێن مه‌زهه‌بى دوورخستيه، هه‌رێما كوردستانێ پێشخستيه، هێزێن پێشمه‌رگه‌ى رێكخستينه و به‌رسينگێ گه‌نده‌ليێ گرتيه، ئه‌ڤه تايبه‌تمه‌نديه ژى شيانێن وى د سه‌ره‌ده‌ريكرن د گه‌ل كێشه‌يان دا نيشان دده‌ت. د سه‌ر هندێ را روو ب روويێ گه‌له‌ك كێشێن مه‌زن بوويه، ژ وان ژى بزاڤێن ئيرانێ بۆ سه‌رنه‌كه‌فتنا پرۆسا سه‌ربه‌خۆيا كوردستانێ، دودليا توركيا ل سه‌ر پرسا ريفراندۆمێ و كێشا سنوران و هه‌بوونا ميليشياتان و چه‌ندين كێشێن دى.
هه‌كه ب ره‌نگه‌كێ كورت به‌حس ل وان كارێن نورى مالكى بكه‌ين يا ژ هه‌موويان سه‌ره‌كيتر ئه‌و بوويه كو رێژه‌يا سونان ل به‌غدا ژ 45% بۆ 25% كێم بكه‌ت كو ئه‌ڤ چه‌نده ژ ئه‌گه‌رێ نه‌بوونا باوه‌ريێ ژ ده‌ف سونان بۆ حوكمه‌تا مالكى بوويه. ديسا كوشتنا ب هزاران خه‌لكێ سڤيل و بێ گۆنه‌هـ ژ ئه‌نجامێ هه‌ڤركيێن مه‌زهه‌بى.
راپۆرته‌كا نيويورك تايمز يا ئه‌مريكى ژى به‌حس ل ديارنه‌مانا 220 مليار دۆلارێن حوكمه‌تا عيراقێ دكه‌ت كو ل سه‌ر ده‌مێ نورى مالكى بۆ ب جهئينانا ب شه‌ش هزار پرۆژه‌يان ته‌رخان كربوون، هه‌تا نوكه ژى ئه‌گه‌رێ بجهئينانا ئه‌وان پرۆژان يێ ديار نينه.
راپۆرته‌كا هيۆمه‌ن رايتس وۆچ ژى به‌حس ل سه‌ر ده‌مێ مالكى دكه‌ت كو سه‌ركردێن سونان يێن مه‌زن به‌رزه دكرن و دكرنه د زيندانێ دا و هنده‌ك ژ وان ژى ژ وه‌لاتى ره‌ڤين و به‌رچاڤترين كه‌س ژى تارق هاشمى بوو، ب ئه‌ڤێ چه‌ندێ ژى سونه گه‌له‌ك بێهيڤى بوون.
ئێك ژ به‌لگه‌يێن دى يێن گه‌له‌ك ئاشكه‌را ئه‌و بوو كو ب تنێ بۆ مانا خوه ل سه‌ر كورسيێ هه‌ژموونا ئيرانێ ل ناڤخۆيا وه‌لاتى زێده كر و ئه‌ڤه ژى بوو ئه‌گه‌رێ توندڕه‌ويێ و سياسه‌تا خه‌له‌ت يا عيراق به‌ر ب رۆژه‌ڤا ئه‌ڤرۆ برى كو وه‌لاته‌كێ شكه‌ستى يه ب هه‌موو رامانان.
هه‌ڤه هه‌موو ژبلى هه‌كه به‌حس ل هاتنا داعش بكه‌ين و كوشتارگه‌ها سپايكه‌ر و وێرانكاريا ژ ئه‌گه‌رێ داعش دروست بوويى كو بوويه ئه‌گه‌رێ كوشتن و به‌رزه‌بوونا ب سه‌دان هزار كه‌سان ژبلى ئاوه‌ربوون و بجههێلانا وه‌لاتى ژ لايێ مليۆنان مرۆڤان ڤه، ب ره‌نگه‌كى كو ب چ ره‌نگه‌كى عيراق ناڤه‌گه‌ريته سه‌رده‌مێن خوه يێن هێمن و ئارام و دێ هه‌ر وه‌لاته‌كێ شكه‌ستى بيت كو هه‌كه بچينه سه‌رده‌مێن به‌رێ، هه‌ر ژ ئاڤابوونا ده‌وله‌تا عيراقێ و هه‌تا نوكه يا ئارام و سه‌قامگير نه‌بوويه.
ئه‌ڤه هه‌موو هندێ د گه‌هينن كو هه‌كه ده‌وله‌ته‌كا مه‌ده‌نى و ديموكرات ل رۆژهه‌لاتا ناڤه‌راست بهێته ئاڤاكرن دبيت ببيته هه‌ژموون بۆ هه‌موو ده‌ڤه‌رێ.
ئه‌ڤرۆ نيوز، نيوار محه‌مه‌د سه‌ليم:
به‌رپرسێ ده‌سته‌يا كارگێرى يا مه‌كته‌با سياسى يا ئێكه‌تى نشتيمانى كوردستان ده‌رباره‌ى سه‌ره‌دانا شاندێ ئێكه‌تيێ بۆ ته‌هرانا پايته‌ختێ ئيرانێ گۆت: “ئيران ريفراندۆمێ ره‌ت دكه‌ت و مه ژى تێبينى يێن خوه دانه به‌رپرسێن ئيرانێ”.
مه‌لا به‌ختيار به‌رپرسێ ده‌سته‌يا كارگێرى يا مه‌كته‌با سياسى يا ئێكه‌تى نشتيمانى كوردستان د كۆنگره‌كێ رۆژنامه‌ڤانى دا به‌حس ل سه‌ره‌دانا شاندێ خوه بۆ ئيرانێ كر و گۆت: “به‌رى نوكه ئيرانێ ل سه‌ر ئاستێ رێبه‌رێ خوه هه‌تا كو وه‌زاره‌تا ده‌رڤه هه‌لويست دژى ريفراندۆم و سه‌ربه‌خۆيا كوردستانێ هه‌بوو، د ڤێ كۆمبوونێ ژى دا ب ره‌نگه‌كێ هوورتر دژايه‌تيا خوه دياركر، ئه‌وان ئاخفتنا خوه كر و مه ژى يا خوه كر، ئه‌وان ره‌تكر و مه رژدى ل سه‌ر ريفراندۆمێ كر”.
به‌رپرسێ ده‌سته‌يا كارگێرى يا مه‌كته‌يا سياسيا ئێكه‌تيێ گۆت: “د ئێك ژ كۆمبوونێن خوه دا ب ئاشكه‌رايى مه گۆته به‌رپرسێن ئيرانێ هه‌ر چ روو بده‌ت بلا روو بده‌ت، جاره‌كا دى قه‌بوول ناكه‌ين حوكمه‌تا عيراقێ كه‌ركووكێ ب پشكه‌ك ژ عيراقێ بزانيت بێ بجهئينانا ماددێ 140، د ئاماده‌ينه باجا هه‌ر تشته‌كى بده‌ين، به‌لێ ئه‌وێ قه‌بوول ناكه‌ين”.
ده‌رباره‌ى وێ چه‌ندێ كا ئايا قوباد ته‌له‌بانى و نه‌جمه‌دين كه‌ريم نوونه‌رێن ئێكه‌تيێ نه، مه‌لا به‌ختيار گۆت: “دكتور نه‌جمه‌دين كه‌ريم وه‌كو نوونه‌رێن ئێكه‌تيێ و پارێزگارێ كه‌ركووكێ پشكدار بووينه و كاك قوباد ژى ل سه‌ر داخوازا جه‌نابێ كاك مه‌سعود بارزانى پشكدارى كريه، به‌لێ كاك قوباد ژى ئێكه‌تى يه و كورێ مام جه‌لاله”.
ئەڤرۆ نیوز ، نەوزاد ھلۆری:
ئێڤاریا ئەڤرۆ ل سنوورێ قەزا بەردەرەش یا سەر ب پارێزگەھا دھۆک دوو کەس خەندقین کو ھەردوو ژی خوشک و برایێ نئێک بوون.
دڤی واریدا بێوار عەبدولعەزیز بەرپرسێ راگەیاندنا رێڤەبەریا بەرەڤانیا باژێری ل دھوکێ بۆ ئەڤرۆ نیوز گۆت: (ئەڤرۆ ئێڤاری ل گوندێ بەردەسوور یا سەر ب ناحیا روڤیا ل سنوورێ قەزا بەردەرەش دوو کەس خەندقین کو ھەردوو ژی خوشک و برابوون)
زێدەتر گۆت: ( تەرمێن ھەردوو خوشک و برا ژلایێ وەلاتیان ژ ئاڤێ ھاتینە دەرئینان و رەوانەیێ نەخوشخانا داد ھاتینەکرن بو زانینا ئەگەرا خەندقینێ)
ئەڤرۆ نیوز ، نەوزاد ھلۆری:
وەسا بریارە لژێر چەند درۆشمەکێن ریفراندۆم و سەربخوی یا کوردستانێ ، رێڤەبەریا شەھید و ئەنفالکریێن بارزان ٣٤ سالیا جینوسایدا بارزانیان ل گوندێ بارزان ساخ بکەت.
دڤی واریدا رێبوار رەمەزان رێڤەبەرێ رێڤەبەرا کاروبارێن شەھید و ئەنفالکریێن بارزان بۆ ئەڤرۆ نیوز گوت: (لژێر چەند درۆشمەکێن ریفراندۆم و سەربخوی یا کوردستانێ ، رێڤەبەریا شەھید و ئەنفالکریێن بارزان دێ ٣٤ سالیا جینوسایدا بارزانیان ل گوندێ بارزان لرۆژا ٣١/٧/٢٠١٧ ساخ کەت و تێدا کومەکا چالاکی و گوتارێن جوداجودا ھێنە پێشکێشکرن و خواندن)
زێدەتر گۆت: ( د رێورسمێن ساخکرنێ دا دێ ھژمارەکا زور یا بەرپرسێن حکومی و حزبی و نونەر و کونسولگەریێن ھەرێمێ و کەسایەتی و کەس و کارێن شەھید و ئەنفالکریان و جەماوەرەکێ زور بەرھەڤبن ، و بو ئێکەم جار ژی دێ کەس و کارێن شەھیدێن شەرێ داعش ل گەل کەس و کارێن جینوسایدا بارزانیان پێکڤە چالاکیان ئەنجام دەن ، و دیسا ندێ کومەکا گوتاران ژی ھێنە خواندن)
دھێتە زانین کو لرۆژا ٣١/٧/١٩٨٣ د رۆژەکا رەش دا و د پلانەکا دارشتی دا ب بریارا سەرۆکێ رژێما بەعسا روخاندی سەدام حسێن ، ھەشت ھزار کەس ژ نێرینەیێن بارزانی دناڤبەرا ژیێ ١٠ بو ٧٠ سالی دا ھاتنەگرتن و بو بیابانێن باشوورێ عیراقێ ھاتنە ڤەگوھاتن و ل دەڤەرا بناڤ “نوگرە سەلمان ” ب ساخی بن ئاخکرن ، پشتی کو ھژمارەکا روفاتێن جینوسایدکریێن بارزانی بو گوندێ بارزان ھاتینە ڤەگوھاستن و ل گورستانەکا تایبەت ھاتینە ڤەشارتن ، وەکو نەریتەکێ جڤاکی سالانە کەس و کارێن جینوسایدکریان ئەڤێ رۆژێ ب چەند سالاکیان ساخ دکەن.
ئەڤرۆ نیوز:
ئەڤرۆ روژا پێنج شەمبی حەیدەر عەبادی سەروک وەزیرێن عیراقێ و فەرماندەیێ بالایێ هێزێن چەکدارێن عیراقێ دیارکر کو رولێ هێزێن پێشمەرکەی د ئازادکرنا موسل دا رولەکێ نایاب بوویە.
عەبادی گۆت: ( رولێ هێزێن پێشمەرگەی د هەڤکاریکرنا هێزێن عیراقی د ئازادکرنا موسل دا رولەکێ نایاب و بەرچاڤ بویە ، هەڤدژێن وان ژی رەت دکەین د ئازادکرنا دووەم مەزنترین باژێرێ عیراقێ کو ل ناڤەراستا سالا 2014 کەفتبویە دەست داعش)
عەبادی ل بارا بەغدادی گۆت : (ئەم ب ئێکگرتنێ د بەرسینگرتنا داعشێ دا ب سەرکەفتین و نها هەڤکاریێن باش دناڤبەرا هێزێن عیراقی و پێشمەرگەی هەنە )
ئەڤرۆ نیۆز،زنار تۆڤی:
سەرۆکێ هەرێما کوردستانێ پەیامەک دەربارەی ریفراندۆما سەربەخۆیا کوردستانێ بەلاڤکریە و جەخت ل هندێ کریە کو ژ ئەنجامدانا ریفراندۆمێ پاشگەز نابین و ئەو سەردەمە ب سەرچوویە کو ب زمانێ هێرشێ و چاڤسورکرنێ ل دژی کوردان رابوەستن.
د پەیامەکێ دا کو د پێگەهێ خوە یێ تایبەتی ل تۆرا کۆمەلایەتیا فێسبووکێدا بەلاڤەکریە، مەسعود بارزانی، سەرۆکێ هەرێما کوردستانێ راگەهاندیە و ئەڤە ژی دەقێ پەیاما وی یە:
ب ناڤێ خودایێ بەخشندە و میهرەبان
د چەند رۆژێن بوری دا،هژمارک ژ سیاسی و کاربەدەستێن عێراقێ بۆ دژایەتیکرنا ریفراندۆمێ و مافێن گەلێ کوردستانێ،بەحسێ دستووری و پابەندبوونێ ب دستوورێ عێراقێ دکەن،زۆر باشتر بوو کو ئەڤ بەرێزە ب هووری دستوورێ عێراقێ ببینن، چونکی د دیباجا دستووری دا ب روونی ھاتییە،کو پابەندبوون ب دستووری زامنێ مانەوەیا عێراقەکا ئێکپارچەیی یە.
ل ڤێرێ پرسیار ئەوە،ئەرێ ئەو پابەندی دستووری بوون؟ ب دەهان نموونە ھەنە کو پشان ددەن کو حوکمەتێن عێراقێ پابەندی وی دستووری نەبووینە،کو خەلکێ عێراقێ دەنگ پێ دابوو،ب پێچەوانەیا دستووری د سوپایێ عێراقێدا هەڤسەنگی هاتیە تێکدان و کورد هاتینە پشتگوه خستن،د دۆخەکێدا کو پێشمەرگەی بناغێ سەرەکی یێ سوپایێ عێراقێ پشتی ٢٠٠٣ پێکئینایە.
د سلکێ دپلۆماسی و کاروبارێن دەرڤەدا ب ھەمان شێوە،کار بۆ گۆشەگیرکرن و دەرکرنا نوونەرێن خەلکێ کوردستانێ دهێتەکرن،چەندین سالە پێشمەرگە ژی هاتیە ئابلۆقەدان کو پشکەک بوو ژ مەنزوومێ بەرگریا عێراقێ،ئەڤە ژبلی ژ پشتگوێخستنا ماددێ ١٤٠ و پێکئینانا ئەنجوومەنێ ئیتحادی،ئەو ئەنجوومەنە زامنێ تەوافوق و تەوازونا ناڤ پێکھاتێن عێراقێ یە،ب پێچەوانەیا دستووری ھەول هاتنەدان کو بنەمایێن سیستەمێ فیدرالی بهێنە پێشێلکرن یان نەهێنە جێبەجێکرن،کار گەهشتە هندێ کو نانێ خەلکێ کوردستانێ ب نووکە ئیمزایەکێ ببرن و مە نەدیت کو ھیچ لایەنەکێ سیاسی یان ناڤەندەکا ئایینی ئیدانەیا ڤێ بریارا نەدستوری و نە مرۆڤانە بکەت کو قووتێ خەلکێ کوردستانێ و شیری زارۆیێن کوردستانێ برییە،ل دووڤ کیژ یاسای و کیژ ماددێ دستووری حوکمەتا عێراقێ ئەو مافە ھەیە کو ئیجرائاتێن نەیاسایی دەرھەق گەلێ کوردستانێ بکەت؟.
ژ لایەکێ دیڤە ژ پێناڤا شەراکەتا دناڤبەرا پێکھاتاندا، عێراق پێدڤی ب بنەمایێن تەوافوقێ بوو،بەلێ ئەو تەوافوقە ژی تێکدا و نوکە بانگەشێ بۆ زۆرینەیا سیاسی دکەن، زۆر باش ژی دزانین کو مەبەستا وان ژ زۆرینەیا سیاسی چییە؟،کو د راستیدا نەھێلانا شەراکەتێ و پشتگوهخستنا پێکھاتیێن دی یێن سەرەکییە.
بۆ ھەموو لایەکێ ژی رادگەهینین کو ریفراندۆم مافەکێ سرۆشتی یێ گەلێ کوردستانێ و ھەموو گەلێن جیھانێ یە،دڤێت ئەو مافێ سرۆشتی بهێتە مومارەسەکرن و بۆچی بتنێ ئەو مافە ل گەلێ کوردستانێ بهێتە حەرامکرن؟.
مە ئیلتیزام ھەیە بەرامبەر خوینا شەھیدێن مە و رایا گشتی و داخوازیێن رەوا یێن گەلێ مە،لەورا ئەم ل وان مافێن خوە پاشگەز نابین و گەلێ کوردستانێ دێ وان ئەو مافێن خوە یێن سرۆشتی خۆی ب شێوەیەکی ئاشتیانە و دوور ژ توندوتیژیێ پیادە دکەت،چونکی مەنەڤێت ئەزموونا تەحل و شکەستنخوار یا بەری نوکە دوبارە بکەینەڤە،ب باشی دزانین کو ھەردولا جیرانێن ئێکتر و کووراتیا ستراتیژی یا ئێکتر بین و وەک برا و دۆست ھەڤکار و ھەماھەنگ بین د وارێن جۆدا دا.
ئەو سەردەمە ژی ب سەرڤەچوویە کو ب زمانێ ھێرشێ و و چاڤسورکرنێ ل دژی مافێ رەوایێ گەلێ کوردستانێ رابوەستن،حەز ژی ناکەین کو کەس وی زمانی بکار بینیت،گەلێ کوردستانێ ئاشتی و برایەتی دڤێت و بەلێ زمانێ ھێرشی و ئینکارێ ژ کەسێ قبوول ناکەت.
ئه‌ڤرۆ نيوز:
پشتى كو نووچێ رزگاركرنا چه‌ند پێشمه‌رگه‌يان ژ ده‌ستێ چه‌كدارێن داعش ل مووسل هاتيه به‌لاڤكرن داخۆيانيێن جودا ل سه‌ر هاتنه به‌لاڤكرن و ئه‌ڤرۆ نيوز ژى بزاڤ كر خوه بگه‌هينيته پترترين ژێده‌ران دا كو بگه‌هيته راستيا بابه‌تى.
به‌هزاد عیسا کەسوکارێ ئێک ژ ئێخسیرکریان ب ناڤێ باپیر عیسا بۆ ئەڤرۆ نیوز گۆت: “مە نووچەیێ رزگارکرنا ئێخسیرکریان ژ تورێن جڤاکی زانیە، د دووڤ دا مە بۆ پشتراستبوونێ پەیوەندی ب ئاسایشا دهۆکێ کریه، ئەوان ژی دیارکر کو چەند پێشمەرگەیەک هاتینە رزگرکرن بەلێ گۆت ژی کو هەتا نها ئەڤ یەک ب دروستی نەهاتیە پشتراستکرن و ئەو ژڤانن کو نووچەی پشتراست بکەن پاشان بەلاڤ بکەن”.
زێدەتر گۆت: “هیڤیا مە ئەوە کو ب زووترین ده‌م هەموو ئێخسیرێن پێشمەرگە بهێنە رزگارکرن و کەسوکارێن وان ژی دلخوش و شاد ببن”.
سۆپاسالارێ پێشمه‌رگێ كوردستانێ د داخۆيانيه‌كێ دا بۆ ئه‌ڤرۆ نيوز دياركر كو چو تشتێ دروست ل به‌ر ده‌ستێ وان نينه و ب تنێ ئه‌و پێزانينن يێن ژ په‌يجێن ئه‌نترنێتێ هاتينه وه‌رگرتن، “چ تشت ب فه‌رمى بۆ مه نه‌هاتيه، ئه‌م يێ دووڤچوونا بابه‌تى دكه‌ين”.
عسمەت رەجەب بەرپرسێ لقێ 14 یێ پارتی دیموکراتی کوردستان بۆ ئەڤرۆ نيوز دیار کر ھێزێن ئەمنی یێن عیراقێ د کڤانێ پرۆسەیەکا له‌شكرى دا ب سەر زیندانەکا تیرۆرستێن داعش ھەلبووینە و ژمارەکا زیندانیان تێدانە و پشتی ھینگێ سوپایێ عیراقێ لیستەک ب ناڤێن وان زیندانیان بەلاڤ کریە و دیار بوویە کو چار ژ وان پێشمەرگەنە کو ب ئێخسیری کەفتبوونە د دەستێن داعشێ دا.
بەرپرسێ لقێ 14 یێ پارتی دیموکراتی کوردستان ئاماژە ب ناڤێن وان چار پێشمەرگێن ئێخسیر ژی کر کو وەکو دلیستا سوپایێ عیراقێ دا ھاتین، یێ ئێکێ ئەحمەد یاسین رەجەب، یێ دویێ باپیر عیسا ئەحمەد، یێ سیێ کامیران بەھجەت عەبدولمەجید و یێ چارێ عەزیز جومعە رەمەزان مزووری و گۆت “ئەڤە وەکو پێزانینێن دەستپێکینە، رەنگە ل دەڤەرا گۆگجەلی ھاتبنە ئێخسیرکرن”.
هه‌ر ئێك ژ نيوار باشوورى، حكمه‌ت زێوكى و نه‌وزاد زاده هلۆرى پشكدارى د به‌رهه‌ڤكرنا ڤى بابه‌تى دا كريه.
ئەڤرۆ نیوز ، ھلۆری:
دەستەیا دەستپاکی یا ھەرێما کوردستانێ د کونگرەیەکێ رۆژنامەڤانی دا دیارکر کو د ئەڤ سالەدا 378 دوسیێن گەندەلیێ ل دادگەھێن ھەرێما کوردستانێ ھەنە.
حاکم ئەحمەد ئەنوەر سەرۆکێ دەستەیا دەستپاکی یا ھەرێما کوردستانێ ئەڤرۆ ل ھەولێرێ د کونگرەیەکێ رۆژنامەڤانی دا دیارکر کو دماوەیێ شەش مەھێن بوری دا ل سنوورێ ھەردوو پارێزگەھێن ھەولێر و سلێمانی 22 دوسیێن ھەوالدەری و 87 داخوازی و دوسیێن سزایی و 83 دوسیێن زانیاری ھاتینە تومارکرن)
ل بارا پارێزگەھا دھوکێ گۆت: (ل سنوورێ پارێزگەھا دھۆکێ 16 دوسیێن ھەوالدەری و 9 داخوازی و دوسیێن سزایی و 10 دوسیێن زانیاری ھاتینە تومارکرن)
سەرجەمێ ھەموو ئەو دوسیێن گەندەلیێ کو ل ھەرێما کوردستانێ ھاتینە تومارکرن دبنە 378 دوسیە ، ئەڤە ژبلی 92 دوسیێن دن یێن زانیاریان.
ئەڤرۆ نیوز :
وەزارەتا خواندنا بلند و ڤەکولینێن زانستی نووترین رێنمایی بو خواندنا سالا2017-2018 بەلاڤکر و تێدا ھاتیە: (ب مەرەما رێکخستنا رێنمایێن یەکەیێن تایبەت ب فەرمانگەێن خواندنێ و پلاندانان و دوڤچوونێ ، و ل گورەی ئەوان دەستھەلاتێن کو ب مە ھاتینە دان بو سالا خواندنێ 2017-2018 دێ ب رەنگێ ل خوارێ کار ب رێنمایان ھێتەکرن)
ڤێرە کلیک بکەن بو دانلودکرنا ھەموو رێنمایێن گرێدای ب بابەتی ڤە
نيشاندان