ئه‌ڤرۆ نيوز:

پشتی وەرزێ ھاڤینێ دەست پێکری و پلێن گەرمایێ بلند بووین و رەوشا کارەبا گشتی ژی تێک چوویی و خودانێن موەلیدەیێن کارەبێ ژی دەستکاریێ دڤولتی دا دکەن و وەلاتی ژی دبێژن ئەڤ چەندە بوویە سەدەما سوۆتن و کارنەکرنا ئامیرێن مە یێن کارەبی.

فەیسەل عەبدولا دبێژیت: پشتی بوویە وەرزێ ھاڤینێ زێدەباری وێ گەرما زێدەیا ب سەر دەڤەرێ دا ھاتی مە چو حال ژ بەر کارەبا موەلیدەی نینە و دەمێ کارەبا گشتی دچیت ھندەک جاران بیست خولەک دبۆرن ژ نوو کارەبێ ھەل دکەن.
گۆت ژی: ژبلی ڤێ یەکێ خوە دێ بێژی ھەموو خودانێن موەلیدەیان یا گۆتیە ئێکدو دەستکاریێ دڤولتی دابکەن و دیار کر کو وان شەش ئەمپێرێن کارەبا موەلیدەی یێن ھەین و چو ئامیرە پێ کارناکەن و گۆت: ھەموو تشتا دڤەمرینین دا کو موبەریدێ بدەینە کاری و ھەر سرکێت دھێتە خوارێ و خوە ناگریت و کەس پرسیارا ڤێ چەندێ ناکەت.
سامان کەمال دبێژیت : مە گلەیی ژ لیژنا موەلیدان ل پارێزگەھا دھوکێ ھەنە، چونکو وەکو پێدڤی دووڤچوونا خودانێن موەلیدەیان ناکەن، ژ بەر ڤێ یەکێ پێگیریێ ب رێنمایێن قائیمقامیێ ناکەن و وەکو خوە ڤولتیێ موەلێدێ دئیننە خوارێ، لەورا ئامیرە بێ کار ناکەن و دسۆژن یان دەمێ کارەب دچیت ماوەکی ب سەرڤە دبەن پاش ددەنە کاری.
جەھوەر عەلی قائیمقامێ قەزا دھۆکێ بۆ ئەڤرۆ گۆت: بەرنامێ کارکرنا ل ھەیڤا بۆری ژی 24 و چوار بوون، ژبەر مەھا رەمەزانا پیرۆز و ھاتنا وەرزێ ھاڤینێ نەخاسمە پشتی پلێن گەرمێ بلند بووین بەردەوامی دێ ب ڤی بەرنامەی ھێتە دان و دیسان گۆت: ھەر ل بەر گەرمێ و ھندەک جھان پشتی چەندین سالان وان موەلیدەیان کار کریە و بێ ھێز بووینە یان ژی ئەو شیان نینن بۆ چەندین دەمژمێران ئەو موەلیدە کاربکەن و گۆت: ھندەک خودانێن موەلیدان ڤولتی ئینایە خوارێ و ھەر ئێکسەر مە ئاگەھداریا لیژنێن سەرپەرشتیا موەلیدەیان کر کو سەرەدانا وان جھان بکەن و ڤولتیێ دروست بکەن و پێگیریێ ب رێنمایان بکەن و ھەتا راددەکی ئەڤ چەندە ھاتیە کونترول کرن.
قائیمقامێ قەزا دھۆکێ گۆت ژی: ھەر جھەکێ خودانێ موەلیدەی دەستکاری د ڤولتی دا کر بلا ھەر زوو وەلاتی مە ئاگەھدار بکەن، چونکو یێ پێگیریێ ب رێنمایێن قائیمقامیێ نەکەت دێ پێ رابوون ژێ ھێنە وەرگرتن و ھێتە سزادان و گۆت: بەرنامێ کارکرنا موەلیدان ژی دێ ل دویڤ رێنمایێن لیژنێ بیت کا پێدڤی ب چەند دەمژمێریایە کاربکەت و بەرنامە ژی نھا 24 دەمژمێری یە، ھەر دەمێ کارەبا نیشتیمانی چو و دڤێت موەلیدە کارکەن و بھایێ ئەمپیرێن کارەبێ ژی ب وی سیستەمێ کارکرنێ ھێتە دانان.
زێدەتر گۆت: رەنکە ب ڤێ یەکێ باراێ دارایی یێ وەلاتیان گران ببیت، بەلێ ھەیڤێن گەرمێ نە و سەرەدەری ناھێتە کرن، لەورا دڤێت ھەموو دەمەکی کارەب ھەبیت و ئەڤە ژی ل سەر داخوازا خەلکێ مەیە و بۆ بەرژەوەندیا وەلاتیان دێ ھەموو شیانان ئێخینە کاری.

ئەڤرۆ نیوز ، نەوزاد ھلۆری:
ئاوارەیێن باشوورێ کوردستانێ ب گشتی و یێن کوردێن ئێزدی ب تایبەت د نەخوشترین ژیان دا ، ژیانا خوە دبورینن ، ئەو ئاوارەیێن کو ل دەرڤەیێ کەمپان دژین زێدەباری کو ژ گەلەک مافان دھێنە بێ بەھرکرن د ھەمان دەم دا کرێکاری ب کریەکا ئەرزان ژی دەست ناکەڤت ، و کرێکارەک ددەتن دیارکرن دووبارە ئاڤدانکرنا شنگالێ دێ بیتە سەدەم کو دەلیڤێن کاری ژ بوو خەلکێ شنگال ب گشتی پەیدا ببیت.

رەزڤان چیچو ئاوارەیەکێ شنگالێ یە و ل دەڤەرا ئامێدیێ ئاکنجی یە بۆ ئەڤر نیوز گۆت : ( ئەز وەکو گەنجەکێ ئاوارەیێ شنگالێ نھا ل سنوورێ قەزا ئامێدیێ ئاکنجی مە بەلێ ب مخابنیڤە ل ڤێرە چوو کار نین بکەم و بارودوخێ مە ژی ل ئاستێ پێدڤی نیە و ئەڤ یەک ژی بوویە سەدەم کو ئەم توشی نەخوشیێن دەروونی بین و ھەموو رۆژان ب دەستێ بەتال ھاتن و چونێ بکەین ، و ئەگەر رۆژەکێ کار ژی ھەبیت گەلەک ئەرزانە و ئەم ژی ب نەچاری ئەوی کاری ب ئەرزانی بکەین )
زێدەتر گۆت : (پشکەکا زۆر یا شنگال ژلایێ تیرورستێن داعشێ ڤە ھاتیە وێران و خراپکرن ، بەلێ نھا جارەک دن ژلایێ ھێزێن پێشمەرگەی ڤە ھاتیە کونترولکرن و پێدڤی یە لایەنێن پەیوەندیدار ب زوترین دەم کار بکەن بوو دوبارە ئاڤەدانکرنا شنگالێ و ئەگەر شنگال ھاتە ئاڤەدانکرن ل وی دەمی دی جارەک دن دەلیڤەیێن کاری بوو خەلکی ھێنە دیتن )
رەشو شەمسەدین ئێکە ژ ئاوارەیێن شنگالێ کو ھوستایێن دانانا کاشی یە و ل ناحیا شێلادزێ ئاکنجی یە دیارکر کو د ھەیڤێ ھەموویێ دا ئەو سێ چوار رۆژان ناچیتە کاری و گوت : ( ل سنوورێ دەڤەرا ئامێدیێ و ناحیا شێلادزێ چوو کارنینن بکەین و ئەڤە بویە سەدەم کو زیانێن مەزن ب مە بکەڤن ، و دەما ئەم ل شنگالێ ھەموو رۆژان ئەم بخوە دچوینە کاری بەلێ نھا چوو کارنینن بکەین و ئەگەر کار ھەبیت ژی گەلەکێ رەزیل و ئەرزانە و ئەڤە سەرەرای کو پتریا کارێن ئەم دکەین ژی ب دەینن )

زێدەباری ئاوارەیێن شنگالێ دھەمان دەم دا ئاوارەیێن دن ژی کرێکاری دەست ناکەڤیت، دڤی واریدا شێرزاد باسل ئاوارەیەکێ رۆژئاڤایێ کوردستانێ یە و ل دەڤەرا بارزان ئاکنجیە گۆت: ( زێدەباری کو کرێکاری زور ئەرزانە د ھەمان دەم دا زور کێمە و ھندەک جاران ب ١٥ ھزاران ژی دەست مرۆڤی ناکەڤیت بەلێ ئەگەر دەڤەرێن کوردستانێ ئاڤەدانی دەست پێ بکەت دێ دەلیڤێن کاری و کرێکاری ژی جارەک دن زور بیت ڤە )
بەری نھا مەحما خەلیل قایمقامێ شنگالێ دیارکربو  کو زێدەتر ژ ٣٠ ھەزار ھوستا و کرێکار و کەسێن بسپوور ل شنگالێ ھەنە و ھەموو ژی بێ کارن و بۆ ئەڤرۆ نیوز گۆت : ( لسەر حکومەتا عیراقێ و حکومەتی ھەرێما کوردستانێ پێدڤی یە ب زوترین دەم جارەک دن شنگالێ دووبارە ئاڤدان بکەنەڤە چونکی نھا پتریا شنگالێ ژ خانوو و دام و دەزگەھێن حکومەتێ و جھێن گشتی و جاددەیێن شنگالی َھاتینە خرابکرن )
گوت ژی : ( ئاڤەدانکرنا شنگالێ پێدڤی ب زێدتر ژ ١٥٠ ھەزار کرێکار و دەستێ کاری و کەسانێن بسپوور ھەیە و کو ئەڤ یەک ژی دێ بیتە سەدەم جارەک دن دەلیڤەیێن کاری ژ بو گەنج و کرێکار و بسپوورێن شنگالێ بھێتەدان و و بێکاری ژی نەمینیت و ژیانەک نوو ل شنگالێ دەست پێ بکەت ڤە )
قایمقامێ شنگالێ دیارکر ژی کو پشکەکا زورا کوردستانێ ب تایبەتی پارێزگەھا دھۆک و ھەولێر لسەر دەستێ خەلکێ شنگالێ ھاتیە ئاڤەدانکرن و گۆت : ( چەندان گەنجێن شنگالێ لە دەرڤەیێ کوردستانێ کارکریە و ھەزاران کەس ژی وەکو ئەندازیار و بسپوور ل ناڤەندێن زانکو و پەیمانگەھان دەرچوینە و دکارن ھەر کاری بکەن بو دووبارە ئاڤەدانکرنا شنگالێ )