ئه‌ڤرۆ نيوز:

ئەحمەد تورک کەسایەتیێ سیاسی یێ باکورێ کوردستانێ راگەھاند کو ھەموو تاکێ کورد چاڤەرێ وێ رۆژێ دکەن کو دەولەتا کوردی بھێتە راگەھاندن، بریارا ریفراندۆمێ ل ھەرێما کوردستانێ پێنگاڤەکا دیرۆکی یە و دڤێت ھەموو ئالیێن سیاسی و رێکخراوێن جڤاکی ژی پشتەڤان بن.
ئەڤرۆ:
ئەحمەد تورک ھەڤسەرۆکێ بەرێ یێ باژێرڤانیا ئامەدێ و کەسایەتیێ سیاسی یێ باکورێ کوردستانێ بۆ مالپەرێ پەیاما کورد راگەھاند کو حەسرەتا ھەموو کوردانە کو رۆژەکێ دەولەتا کوردی بھێتە ئاڤاکرن و ب سالانە گەلێ کورد ل ھەر چار پارچێن کوردستانێ خەباتێ بۆ دەولەتا کوردی دکەن، لێ دڤێت ھێز و ئالیێن سیاسی یێن کوردی ل ھەرێما کوردستانێ رەوشا نھا باش بدەنە بەرچاڤ و دھێتە خواستن کو رێکخراوێن جڤاکی و ھەموو ھێز و ئالیێن دی یێن سیاسی ژی د ڤێ پرۆسێسا دیرۆکی دا پشکدار بن.
ئەحمەد تورک د بەرەدەوامیا ئاخڤتنا خوە دا ئەو یەک ژی دیار کر کو دڤێت ھێزێن سیاسی ل ھەرێما کوردستانێ حسابێ بۆ گەلەکێ تشتان بکەن، جارێ شەرێ ل دژی داعشێ ھەیە و ھەلویستێ بەغدا و وەلاتێن جیرانێن ھەرێما کوردستانێ ژی گرنگن، ژ بەر ھندێ ژی دڤێت ل گۆر ھندێ ھێزێن سیاسی ل ھەرێما کوردستانێ بشێن سیاسەتەکا سەرکەڤتی بۆ دەربازبوونا ژ وێ قۆناغا گرنگ برێڤە ببەن و گۆت: (خوزیکا بەری پرۆسێسا ریفراندۆمێ پەرلەمان ھاتبا کارا کرن، چونکو ھەکە ئەو یەک ھاتبا کرن دا پتر کاریگەریا خوە ھەبیت).
ل دۆر ھەلویستێ پارتێن سیاسی یێن باکورێ کوردستانێ ژی ئەحمەد تورک راگەھاند کو نابیت ئەم دەستێوەردانێ د کاروبارێ ھەرێما کوردستانێ دا بکەین، لێ ھەکە ژ مە بھێتە خواستن بێگومان دێ ھزر و نێرینێن خوە بۆ وان دیار کەین، پرۆسێسا ریفراندۆمێ پێنگاڤەکا دیرۆکی و پیرۆزە و بێگومان ھەموو کورد ل جیھانێ ئەڤرۆکە دلخوەشن کو پارچەکا کوردستانێ بەر ب راگەھاندنا دەولەتا سەربخوە ڤە دچیت، ھەکە ھاتە خواستن پارتێن باکور ژی دشێن ژ بۆ باشتر برێڤەچوونا قۆناغا نھا یا ھەستیار نێرینێن خوە دیار کەن و گۆت: (لێ نابیت ئەم ب نێرینێن جودا ببینە ئەگەرێ دروست کرنا ئالۆزیان و نابیت دەستێوەردان بھێتە کرن، ھەکە ژ مە ھاتە خواستن دڤێت ئەم ژی وەکو ھێزێن کوردی ھاریکاریا برایێن خوە ل ھەرێما کوردستانێ بکەین دا پرۆسێسا ریفراندۆمێ ب رەنگەکێ سەرکەڤتی برێڤە بچیت).
پشتی راگەھاندنا رۆژا ریفراندۆمێ ھەتا نھا ھەموو پارتێن سیاسی یێن باکورێ کوردستانێ پشتەڤانیا خوە دیار کرینە و بەری نھا پەیڤدارێ ھەدەپێ ئۆسمان بایدەمیر ژی راگەھاند کا چاوا عەرەبان، تورکان و فارسان دەولەتێن خوە ھەنە وەسا ژی کوردان ئەو ماف یێ ھەی کو دەولەتا خوە راگەھینن و پشتەڤانیا خوە بۆ ریفراندۆما ھەرێما کوردستانێ دیار کربوو.
چاڤدێرێن سیاسی یێن کورد ژی دیار دکەن کو پشتەڤانیا ھێزێن سیاسی یێن کوردی یێن پارچێن دی یێن کوردستانێ بۆ ریفراندۆمێ گرنگە، چونکو ئەو یەک نیشا ددەت دەولەت مافێ رەوا یێ گەلێ کوردستانێ یە و نابیت چو ھێزەکا کوردی دژبەریا ریفراندۆمێ و دەولەتا کوردی بکەت.

ئەڤرۆ نیوز:
ژێدەرەکێ ژ ھێزێن ئێمناھیێ ل سنوورێ پارێزگەھا کەرکوک دیارکر کو شڤێدی داعشێ ب رێیا ھاونان سەنگەرێن پێشمەرگەی بوردومانکرن.
ئەوی ژێدەری دیارکر ژی کو ژ ئەنجامێ ئەوان ھاونان دا سێ پێشمەرگە ب سڤکی برینداربوون و گۆتیە ژی : (تیرورستێن داعشێ ڤیا بگەھن سەنگەرێن پێشمەرگەی ل باشوورێ کەرکوکێ ل گوندێ ئەبو محەمەد ل نێزیک قەزا داقوق بەلێ نەگەھشتن و دپشترا دەست ب ھاڤێتنا ھاونان کر و پێشمەرگەیان ژی ب توندی بەرسڤا وان ب بوردومانکرنا جھێ ھاون ھاتی)
زێدەتر گوتیە : ( ژ ئەنجامێ ئەوان ھاونان سێ پێشمەرگەیێن فەوجا کاکەیان یا سەر ب لێوا نوو یا ھێزا پێشمەرگەی برینداربوون و ھاتنە رەوانەکرن بو نەخۆشخانەیێن کەرکوک)