ئەڤرۆ نیوز:
د کومبوونا مەکتەبا رێکخستنا ئێکەتیێ یا رێککەفتێ 12-7- 2017 ھاتیە ئەنجامدان، بۆ دەمێ 10 خولەکا جێگرێ سکرتێرێ گشتی یێ ئێکەتیا نشتیمانی کوردستان بتنێ ئامادەیی وێ کومبونێ دبیت، دوان 10 خولەکان کو تیچدا شاناز ئیبراھیم و بەرپسێ رێکخستنا دەرڤەیا ئێکەتیێ و گرۆپێ نێزیک ل وێ د ئامادەبوون، کوسرەت رەسوڵ گەفێن دژوار ل ئامادەبوویان کرن.
ل گۆڕ پێزانینێن ل ژێر دەستێ ئاژانسا خواکوڕک ھەی، کوسرەت رەسوڵ د کومبوونا رێکخستنا ئێکتیا نشتیمانی دا گۆت: ھەر کەسەکێ بڤێت ئێکەتیێ ب ئاقارێ دژی ریفراندۆمێ و سەربخوەیا کوردستانێ دا ببەت، دێ زێندان کەم ل ھەر پلە و پۆستەکێ ھەبیت.
سەرەرای کو مەکتەبا سیاسیا ئێکەتیێ ب رەنگەکێ بەردەوام پشتەڤانیا خوە بۆ ریفراندۆم و سەربخوەیا ھەرێما کوردستانێ دیار دکەت، بەلێ ھندەک ئەندامێن سەرکرداتیا ئێکەتیێ دڤێت ئاراستەیا ئێکەتیێ بۆ دژاتیا سەربخوەیا ھەرێما کوردستانێ و ریفراندۆمێ ب گوھۆڕن.
ژئالیەکێ دیڤە ئەندامێ مەکتەبا سیاسیا ئێکەتی نیشتیمانی کوردستان سەعدی ئەحمەد پیرە، سەبارەت سەرەدانا ئیرانێ دبێژیت، مە بڕیار دایە ل گەل ھەر ئێک ل گۆڕان و پارتی روونین سەبارەت سەرەدانا ئێکەتیێ بۆ ئیرانێ، چونکی مە بڕیار دایە، ژئێکگرتن و کودەنگیا کوردان دەرنەکەڤین، چونکی ئیران دێ بابەتێ ریفراندۆمێ ل ھەمبەری شاندێ ئێکەتیێ بەحس کەت، لەورا سەرەدانا مە بۆ پارتی و پەیوەندی دێ ب سەرەدانا شاندێ مە بۆ ئیرانێ ڤە ھەبیت.
ل دۆر کاراکرنا پەرلەمانێ ژی سەعدی ئەحمەد پیرەی گۆت: دکومبوونا ھەردو مەکتەبێن سیاسیێن پارتی و ئێکەتیێ دا، بڕیار ل سەر کاراکرنا پەرلەمانی ھاتیە دان، و ھاتیە دووپاتکرن، پشتی ڤەگەریانا شاندێ ئێکەتیێ ژ ئیرانێ، ئالیێن سیاسی و دانوستاندنێ ل سەر دەم و رۆژا روونشتنا ئێکێ یا پەرلەمانێ کوردستانێ بھێتە کرن، چونکی بڕیارا کاراکرنا پەرلەمانی ھاتیە دان، بتنێ ئەو مایە کا ئالیێن سیاسی بۆ کاراکرنا پەرلەمانی چەوا و کەنگی دەست پێ بکەن.
ئەندامێ مەکتەبا سیاسی ھەروەسا دبێژیت، دکومبوونا پێنجێ یا مەکتەبا سیاسی یا ئێکەتیێ دا بڕیار ھاتیە دان کو ل سەر بابەتێ سەرەدانا شاندێ ئێکەتیێ بۆ تەھران دانوستاند ل گەل ھەر ئێک ژ پارتی دیموکراتی کوردستان و بزاڤا گۆڕانێ بھێنە ئەنجامدان، چونکی ب پشتی راستی ڤە ئێک ژ تەوەرێن دانوستاندنا ل گەل ئیرانێ بابەتێ ریفراندۆمێ یە، مە ژی بڕیارا وێ چەندێ دایە ل گەل کودەنگیا کوردا و پرۆسا ریفراندۆمێ بین و دەرنەکەڤین.
ھەر ل گۆڕ پێزانینێن ئاژانسا خواکوڕک، سەبارەت روونشتنا ئێکەتیێ ل گەل ھەردو ئالیان، ژێدەرێ خواکوڕک دووپاتکر، بوچوونا ھەردو ئالیێن پارتێ و گۆڕانێ بۆ ئێکەتیێ ل سەر ریفراندۆم و سەبرخوەیا کوردستانێ دوەک ھەڤبوون، بەلێ ل گۆڕ ئەتکێتێن حزبێن خوە، ب دیتنا گۆڕانێ پشتی کراکرنا پەرلەمانی ریفراندۆم ددەمێ خوەدا بھێتە ئەنجامدان، پارتی ژی ھەمان بوچوونا گۆڕانێ بۆ ئێکەتیێ ھەبوو، بەلێ پارتی پێ باشە ریفراندۆم ددەمێ خوەدا بھێتە ئەنجامدان و نەھێتە پاشخستن.

ئه‌ڤرۆ نيوز:

وەزارەتا ئاڤەدانکرن و ئاکنجیکرنێ مژۆلی تەمامکرنا چەندین پڕۆژێن گرنگە ل کەرتێن ئاکنجیبوون و رێک و پران، رێڤەبەرێ گشتیێ پلاندانانێ ژی ل وەزارەتا ناڤبری ئاماژێ ب ڤێ چەندێ دکەت کو دێ شەش ھزار خانی ل سەر خەلکێ کێم دەرامەت ھێنە بەلاڤکرن.
زانا عوزێری، رێڤەبەرێ گشتیێ پلاندانانێ ل وەزارەتا ئاڤەدانکرن و ئاکنجیکرنێ یا حوکمەتا ھەرێما کوردستانێ بۆ رۆژناما ئەڤرۆ گۆت: “بڕیارە ھەر پڕۆژەکێ وەزارەتێ 80%ێ ھاتبیتە ب جھئینان پارە بۆ بھێتە مەزاختن و بھێتە تەمامکرن، نوکە کار ل سەر چەند پڕۆژێن رێک و پران یێ دھێتەکرن و بڕیارە رێیا ھەولێر بۆ دھۆک کو ب رێیا چەمەی دھێتە نیاسین بھێتە تەمامکرن، دیسا پڕژێن تۆنێلێن زاخۆ، پیرمام و ھەیبەت سولتان ژی بھێنە تەمامکرن”.
زانای گۆتژی: “مە ل گەل سندۆقا نێڤدەولەتی پڕۆژەکێ رێک و پران ل سنورێ پارێزگەھا دھۆکێ یێ ھەی، بەلێ ھێشتا دەست پێ نەھاتیەکرن و نەکەفتیە د بیاڤێ ب جھئینانێ دا”.
رێڤەبەرێ گشتیێ پلاندانانێ ل وەزارەتا ئاڤەدانکرن و ئاکنجیکرنێ خویا ژی کر، چەندین پڕۆژێن ئاکنجیکرنێ ل بەردەستێ وەزارەتا ئاڤاکرنێ نە و کار یێ تێدا دھێتەکرن، ژ وان ژی شەش ھزار یەکەیێن ئاکنجیبوونێ بۆ وەلاتیێن کرێدار و کێم دەمەرات یێن دھێنە دروستکرن و نوکە یێن گەھشتینەی قووناغا دووماھیێ و ب تنێ خزمەتگوزاری ماینە بۆ ناڤا ئەڤان یەکەیا بھێتە برن و گۆت: “مە وەکو وەزارەت چەند یەکەیێن ئاکنجیبوونێ بۆ کەسوکارێن شەھیدێن شەڕێ دژی داعش ئاڤاکرینە و نوکە کار یێ تێدا دھێتەکرن، ھەر دەمێ ب دووماھی ھاتن ل سەر کەسوکارێن وان شەھیدان دێ ھێنە بەلاڤکرن کو بەری نوکە جڤاتا وەزیران سۆز دابوویێ دێ ھەر مالباتا شەھیدەکی یەکەیەکا ئاکنجیبوونێ وەرگریت”.

ئەڤرۆ نیوز ، نەوزاد ھلۆری:
کەس و کارێن شەھیدان جھێ رێز و زورترین خزمەتێ نە ، و لسەر ئەڤی درۆشمی و لسەر داخوازیا رێڤەبەریا کاروبارێن شەھید و ئەنفالکریێن بارزان سەرجەم خودان مالیدەیێن کارەبایێن دەڤەرا بارزان رەزامەندیا خوە دەربری کو بھایێ کارەبا مالیدەیان ژ کەس و کارێن شەھیدێن شەرێ داعش وەرنەگرن.
دڤی واریدا رێبوار رەمەزان رێڤەبەریا کاروبارێن شەھید و ئەنفالکریێن بارزان تایبەت بئ ئەڤرۆ نیوز گۆت: (خزمەتکرنا کەس و کارێن شەھیدان ئەرکە و چوو منەت نینە و پێدڤی یە ئەوا کو لسەر شیانێن حکومەت و حزب و زەنگین و ھەر کەسەکێ بیت بەرامبەر ئەوان بکەن ژبەرڤێ ، لسەر داخوازیا رێڤەبەریا کاروبارێن شەھید و ئەنفالکریێن بارزان سەرجەم خودان مالیدەیێن کارەبایێن دەڤەرا بارزان رەزامەندیا خوە دەربری کو بھایێ کارەبا مالیدەیان ژ کەس و کارێن شەھیدێن شەرێ داعش وەرنەگرن کو ئەڤ یەک ژی پێنگاڤەک ھەری باشە تایبەتی دڤی وەختی دا کو قەیرانا دارایی ھەیە)
زێدەتر گۆت: ( سنوورێ دەڤەرا بارزان پێکدھێت ژ سەنتەرێ قەزا مێرگەسوور و ھەر پێنج ناحیێن بارزان ، پیران ، گورەتوو ، شێروانی مەزن و شێروانی بچووک ل گەل ٢٧٠ گوندان ، و ھەر مالەکا کەس و کارێن شەھیدان بکەڤیتە د چارچوڤێ سنوورێ دەڤەرا بارزان ئەو بوھایێ کارەبا مالیدەیان نادەتن و ھاتە لێبورینکرن کو ئەو ژی ھەتا نھا ٢١ مالیاتن)
د بەرنامەیێ مەدایە کو زورترین ھاریکاری و کارێن خوبەخش بو کەس و کارێن شەھیدان بکەین و دخوازیت کو ئەڤ یەک ل سنوورێ قەزا و ناحیێن دن ژی یێن ھەرێما کوردستانێ بەرامبەر کەس و کارێن شەھیدان بھێتەکرن ، رێبواری ھوسا گوت.