ئەڤرو نیوز ، ھلوری:
ئێڤاریا ئەڤرو دەمژمێر ٥ رێزدار نێچیرڤان بارزانی سەرۆکێ حکومەتا ھەرێما کوردستانێ ل گەل ھژمارەکا بەرپرسێن حزبی و حکومی ل مالا خوە کوم بو و دکومبوونێ دا بەحس ل سەرەدانا شاندنێ حکومەتا ھەرێما کوردستانێ بو روسیا و گرێبەستێن ل گەل کومپانیا روسنەفتا رووسی ھاتەکرن ، ل دوماھیا کومبوونێ کونگرەیەکێ رۆژنامەڤانی ئەنجام دا و تێدا ھەموو ھورکارێن گرێبەستا کومپانیا ناڤبری و حکومەتی ئێخستنەبەر چاڤ.
ل دەستپێکا کونگرەیێ رۆژنامەڤانی دار ێزدار نێچیرڤان بارزانی دیارکر کو گرێبەستا ئەوان ل گەل کومپانیا روسنەفتا روسی د سێ واران دا دەرباز بیت و کو ئەو ژی گەشەپێدانا بیرێن پەرتولێ و ژێر خانا ئابووری و وزیەیێ بوویە و گۆت: ( روسنەفت دێ پەترۆلا ھەرێما کوردستانێ کریت و ڤەگوھێزین بو پالاوتگەھێن ئەلمانیا ، و مە تنێ یاداشتەکا لێکتێگەھشتنێ دناڤبەرا خوە دا ئیمزاکریە کو ٥٠% ژلایێ روسیان ڤە دێ ھێتە ب رێڤەبرن و ئەو کومپانی دێ کارێن وەبەرھێنانێ ل بیرێن پەترولێ کەن و گرنگیێ ژێرخانا ئابووری یا ھەرێما کوردستانێ دەتن و ماوەیێ دوو سالان کوپانیا ناڤبری دێ پەترولا ھەرێما کوردستانێ کریت کو ئەڤ یەک ژی دبیتە ئێکەمین جار پەترول ب کومپانیەکا حکومی بھێتە فروتن و بەری نھا بتنێ بازرگانان دکری ، قەبارێ گرێبەستا حکومەتێ ل گەل روسنەفت ژی سێ ملیار دولارە کو ئەڤ یەک ژی تشتەک نوێ و گرنگە بو ھەرێما کوردستانێ و تا رادیەکێ باش دێ ئاریشەیێن قەیرانێن ھەرێما کوردستانێ چارەسەر کەت )
زێدەتر گۆت: (ئەو بوریێن کو نھا ل ھەرێما کوردستانێ بو بەندەرێ جیھان دچیت دێ ھەمان بوری بن بو ڤەگوھاستنا پەترولا روسنەفت ژی ژبەرکو ھەرێما کوردستانێ تنێ شیانێن ھنارتنا ٧٠٠ ھزار بەرمیلان ھەیە د روژەکێ دا ، فروتنا نەفتێ ب رێیا روسنەف ژی بابەتەکێ قانونی یە ل گورەی قانونا نەفت و گازێ یا سالا ٢٠٠٧ کو ئەو ژی پەرلەمانی ئەنجومەنەک دامەزراندیە و ھەموو دەستھەلات داینە دوارێ فروتنا پەترولێ دا ئانکو مە چوو ئاریشەیێن قانونی نینن)
ل بارا ئاریشەیا دناڤبەرا حکومەتا ھەرێما کوردستانێ و کومپانیا دانەغاز ، سەرۆکێ حکومەتا ھەرێما کوردستانێ گۆت: (ھەموو لایەک دزانیت بابەتێ دانەغاز ب فیتکا کێ ھاتیە د روژەڤێ دا ، نھا بزاڤ دھێنەکرن بو ئێکلاکرنا دوسیا دانەغاز و ب ئەنجامێن وێ دلخوشین ، دڤێت لایەنێن سیاسێن ھەرێما کوردستانێ ئەڤێن کو پشکدارێ حکومەتا بنکە فراوانن خوە ئێکلا بکەن یان دڤێت ل گەل حکومەتێ بمینن یان ژی بلا ببنە ئوپوزسیون ھەموو لایەنێن سیاسی د حکومەتێ نونەرێن خوە ھەنە بەلێ ژبلی ئێکەتی نیشتمانی کوردستان لایەنێن دن یێن سیاسی گەلەک د لەزبوون و دەلیڤە نەدا ھەتاکو شاندنێ حکومەتێ ڤەگەرێتە ھەرێما کوردستانێ و نابیت حزبێت کوردستانێ ببنە حزبێت فێسبوکێ کو ئەڤ یەک دبیتە دوریاتی و سەردابرنا خەلکی ، بەلێ خەلکێ ھەرێما کوردستانێ ھوشیارە و ھەموو دزانن کا چ ھەیە و لایەنێن سیاسی چوو نیەت ھەنە)
ل بارا سەرەدانا خوە بو عیراقێ ، ناڤبری گۆت: ( چوو ژڤانێن دیارکری نینن بو چوونا بەغدا و کومبوون ل گەل بەرپرسێن حکومەتا عیراقێ ، بەلێ کومبوون ل گەل حکومەتا عیراقێ ب تشتەک گرنگ دبینم و ئەگەر ژڤانەک ھەبیت ژی پێخوشحالین ل گەل ھەڤدوو کوم ببین )

ئه‌ڤرۆ نيوز:

رێڤه‌به‌رێ‌ كۆمپانیا گشتی یا دانویله‌ی ل دهوكێ‌ رێڤه‌به‌رێ‌ سایلویا فه‌یدیێ‌ دیاركر كو تا نوكه‌ (CDD) یێ‌ جوتیارێن پارێزگه‌ها دهوكێ‌ ل وه‌زاره‌تا چاندنا عیراقێ‌ یه‌ ونه‌هنارتیه‌ كومپانیا گشتی یا بازرگانی یا دانویله‌ی وبریارا وه‌رگتنا گه‌نمێ‌ جوتیاران نه‌كه‌تیه‌ دوارێ‌ بجه ئینانێ‌ دا وئه‌م یێ‌ جاڤه‌رێدكه‌ین وجوتیارا ژی سرا وه‌رگرتنا گه‌نمی لبه‌ر ده‌رگه‌هێ‌ سایلویا گرتیه‌.

سه‌باره‌ت رێژا وه‌رگرتنا گه‌نمی نازم محمد علی رێڤه‌به‌رێ‌ كومپانیا گشتی یا دانویله‌ی ل دهوكێ‌ گوت: حكومه‌تا عیراقێ‌ بریار دایه‌ گه‌نمێ‌ كوردستانێ‌ ل دویڤ رێژا 17% یا بودجا كوردستانێ‌ بهێته‌ وه‌رگرتن ئانكو 51% دێ‌ هێته‌ وه‌رگرتن و49% یا گه‌نمی ناهێته‌ وه‌رگرتن وبڤێ‌ چه‌ندێ‌ جوتیارێن كوردستانێ‌ دێ‌ زه‌ره‌رمه‌ندبن چونكو لدوڤ رێژا هه‌نێ‌ (442) هزارته‌نێن گه‌نمێ‌ كوردستانێ‌ دێ‌ هێنه‌ وه‌رگرتن( 175)هزار ته‌ن به‌هرا دهوكێ‌ و(151) هزار ته‌ن به‌هرا هه‌ولێرێ‌ و(115) هزار ته‌ن به‌هرا سلێمانیێ‌.

ل دور به‌رهه‌مێ‌ چاڤه‌رێكری یێ‌ جوتیارێن پارێزگه‌ها دهوكێ‌ یێ‌ ئه‌ڤ ساله‌ وشیانێن وه‌رگرتنێ‌ ل سایلویێن پارێزگه‌هێ‌ گوت: ل دوڤ راپورتێن رێڤه‌به‌ریا گشتی یا چاندنێ‌ دهێته‌ پێشبینیكرن كو (344) هزار ته‌نێن گه‌نمی بهێنه‌ به‌رهه‌مئینان ولدوڤ رێژا وه‌رگرتنێ‌ نیڤا به‌رهه‌می دێ‌ هێته‌ وه‌رگرتن وبو زانین ئه‌ڤ ساله‌ بتنێ‌ گه‌نمێ‌ هویر دێ‌ هێته‌ وه‌رگرتن وشیانێن سایلویان بڤی ره‌نگی یه‌ (سایلویا شێخان شیان هه‌نه‌ 60هزار ته‌نا و25هزار ته‌نێن دی ب رێكا به‌نكه‌را عومباركه‌ت وسایلویافه‌یدیێ‌ 30هزار ته‌نا و 30هزا ته‌نێن دی ب رێكا به‌نكه‌را وسایلویا زاخو شیان هه‌نه‌ 15هزار ته‌نا و20هزار ته‌نێن دی ل گوره‌پانا وبنگه‌هێ‌ روڤیا شیان هه‌نه‌ 55هزار ته‌نا وه‌رگریت).

سه‌باره‌ت وان ئاسانكاریێن بو جوتیارا هاتینه‌ كرن رێڤه‌به‌رێ‌ كومپانیا گشتی یا دانویله‌ی ل دهوكێ‌ گوت: هه‌ر جوتیاره‌ك دێ‌ گه‌نمێ‌ خو به‌ته‌ نێزیكترین سایلو یان بنگه‌هێ‌ وه‌رگرتنێ‌ جوتیارێن ده‌ڤه‌رێن زاخو وئامێدیێ‌ و باكورێ‌ قه‌زا مانگێشكێ‌ دێ‌ گه‌نمێ‌ خو به‌نه‌ سایلویا زاخو هه‌روه‌سا جوتیارێن قه‌زا سێمێلێ‌ وباشورێ‌ ناحیا مانگێشكێ‌ دێ‌ گه‌نمێ‌ خو ئینه‌ سایلویا فه‌یدیێ‌ وجوتیارێن ئاكرێ‌ وشێخانا سه‌ر پارێزگه‌ها دهوكێ‌ ڤه‌ دێ‌ ئینه‌ سایلویا شێخان و جوتیارێن ده‌ڤه‌را به‌رده‌ره‌ش دێ‌ ئینه‌ بنگه‌هێ‌ روڤیا .

نازم محمد علی ئه‌و یه‌ك ژی دیاركر كو دوو لیژنه‌ ل سه‌ر ئاستێ‌ پارێزگه‌هێ‌ هاتینه‌ پێك ئینان ئێك یا تایبه‌ته‌ بو سه‌رپه‌رشتیكرن ودوڤ چونا پروسا وه‌رگرتنا گه‌نمێ‌ جوتیاران ولیژنا دووێ‌ یا تایبه‌ته‌ بو وه‌رگرتنا سكالا وگازندێن جوتیاران ول داویێ‌ ژی داخاز ژجوتیاران كر كو هه‌موو دهاریكاربن دگه‌ل كارمه‌ندێن سایلویان وپێگریێ‌ ب رێنمایێن وه‌رگرتنێ‌ بكه‌ن دا پروسا وه‌رگرتنا گه‌نمی بێ‌ ئاریشه‌ بهێته‌ ئه‌نجامدان.