ئەڤرو نیوز ،بێوار حسێن :
لژنا ئابووری و چاڤدێری یا بازاری ل قەزا سوران جھەکێ درۆستکرنا شیریناھیان دائێخست و سزادا.
دڤی واریدا ئازاد تەوفق سەروکێ لژنا ئابووری و چاڤدێری یا بازاری بۆ ئەڤرو نیوز گۆت: (ب مەرەما دوڤچوون لسەر بازاری و پاراستنا سەر و مال و ساخەلەمیا وەلاتیان ئەڤرو لژنا ئابووری و چاڤدێریا بازاری ، جھەکێ چێکرنا شیریناھیان ل تاخێ ھەرێم ل سەنتەرێ قەزا سوران سزادا ئەو ژی جھێ وان دائێخست ژبەرکو پێگری ب رێنمایێن لژنا مە نەکربوون و چوو مەرجێن ساخلەمیێ تێدانەبوون)
زێدەتر گۆت: (نھا مەھا رەمەزانی َھات و رەنگە ھندەک خودان بازار ڤێ یەکێ ب دەلیڤە ببینن بو فروتنا کەلوپەلێن ئێکسپایر ، تیمێن مە ژی بو سزادان و دوڤچونا ھەموو سەرپێچیان بەردەوام د لێگەرانێ دایە و ھەر سەرپێچیەکا بھێتە دیتن دێ ھێتە سزادان)

ئەڤرو نیوز، سالار دۆسکی:
ب مەرەما کێمکرنا رێژەیا بێکاریێ ل ھەرێما کوردستانێ و عیراقێ و دیتنا چارەسەریێ ، ئەندامێن پەرلەمانێ کوردستانێ و عیراقێ ل گەل چەندین رێکخراوێن بیانی و un و نوونەرێن چەنین وەزارەتێن گرێدایی ب بابەتی ڤە دانوستاندنێ دڤی واریدا دکەن.
نەجیبا نەجیب پەرلەمانتارا عیراقێ ژ فراکسونا پارتی دیموکراتی کوردستان بۆ ئەڤرۆ نیۆز گۆت: (ماوێ چار رۆژانە ئەم پشکدارین ل گەل ستافێ بەنکا نیڤدەولی و لژنا پەترۆلێَ د دانوستاندنێ و ئەنجامدانا ورگ شوپان داینە ، مەرەم ژ ئەوە کو ستراتیجیەکێ بۆ کێمکرنا رێژا ھەژاریێ ل کوردستانێ و عیراقێ بدانین، ژبەرکو د ڤان دوو سالێن بوری دا رێژا ھەژاریێ ب شێوەکێ بەرچاڤ بلند بووی و تایبەت پشتی شەرێ داعش و نزمبوونا بھایێ پەترۆلێ ل بازارێن جیھانێ)
زێدەتر گۆت: (دناڤا ئەڤان کومبوونێن ھاتینەکرن نوونەرێن وەزارەتێن پلاندانان ، پەروەردە ، ساخلەمی و کارو بارێن جڤاکی یێن ھەر دوو حوکمەتێن ھەرێما کوردستانێ و عیراقێ بەرھەڤ بووینە و دیسا نوونەرێن رێکخراوێن یو ئێن ژی کو گرێدان ب بابەتی ڤە ھەبووینە بەرھەڤ بووینە، چەندین خالێن گرنگ ھاتنە رێزکرن کو کار ل سەر بھێتەکرن بۆ کێمکرنا رێژا ھەژاریێ ل کوردستانێ و عیراقێ و ب دتنا من ئەگەر ئەڤ خالە بکەڤنە دبیاڤێ بجھئینانێ دا دێ رێژا ھەژاریێ ل کوردستانێ کێم بیت و دێ مفایەکێ مەزن ژێ ھێتە وەرگرتن ، مە دڤێت ھەژارێن کوردستانێ مفاداربن ژ بۆدجا عیراقێ و پارێن رێکخراوێن بیانی و بەنکا نیڤدەولەتی و ئەم شیاین قەناعەتێ بۆ وان دروست بکەین کو بۆدجە یا زێدە دبیت ژبەرڤێ گرنگە ھەموو ھەژارێن عیراقێ مفاداربن و نەھێتە ھەمارتن ل سەر ١٧% ل گەل کێشا پەترۆلێ و ئەڤە وەک پێشنیاز ھاتیەدان ، بەلێ بریار د دەستێ ئەنجوومەنێ وەزیران دایە و مە باوەری ھەیە دێ ئەنجامێن باش ھەبن، دیسان ئەگەر پارە ژلایێ رێکخراوێن بیانی ڤە بۆ ھەژارێن عیراقێ بھێتە تەرخانکرن دڤێت ب یەکسانی بۆ ھەموو عیراقێ بیت و وەزارەتا پلاندانانێ یا ھەرێما کوردستانێ ژی یا پێگیرە بڤێ یەکێ )
نەجیبا نەجیب ددرێژاھیا ئاخفتنێن خودا دیارکر ژی کو ئەڤە نێزیکێ سالەکێ یە ئەو کار لسەر ڤێ یەکێ دکەن و گۆت ژی: (ئەگەر سەرۆک وەزیرێن عیراقێ ل سەر پێشنیارێن مە رازی بیت دێ تەخا ھەژار مفاداربن و ناھێنە گرێدان ب ١٧% ڤە و مە گەەلک ئیمزاژی بو پشتەڤانیا ڤێ یەکێ کومکرینە )

ئەڤرو نیوز ، نەوزاد زادە ھلۆری:
دەرگەھەکێ دن یێ سنووری بناڤێ دەرگەھێ ” زێد ” دناڤبەرا ھەرێما کوردستان و کومارا تورکیا ھاتە ڤەکرن ، بڤێ یەکێ ژی نێزیکترین دەرگەھێ خالا سنووری دناڤبەرا کومارا تورکیا و ھەولێرا پایتەخت ھاتەڤەکرن.
دڤی واریدا ” غەفور ئەحمەد مەلا سوار ” قایمقامێ قەزا مێرگەسوور بو ئەڤرو نیوز گۆت: (دەستپێکا مەھا حوزیران یا سالا ٢٠١٤ شاندەکێ حکومەتا ھەرێما کوردستانێ ب سەرپەرشتیا پارێزگارێ ھەولێر سەرەدانا تورکیا کر و ل گەل بەرپرسێن ئەوی وەلاتی دانوستاندن لسەر ڤەکرنا دەرگەھەکێ دن یێ سنووری دناڤبەرا ھەرێما کوردستان و تورکیا ھاتەکرن بناڤێ دەرگەھێ زێد کو دێ بیتە نێزیکترین دەرگەھێ سنووری بو ھەولێرێ )
زێدەتر گۆت: (سوپاس بو خودێ پشتی چاڤەرێبوونەکا زور ئەڤرو ئەو دەرگەە ژی ھاتەڤەکرن و تنێ چەند ئەگەرەکێن تەکنیکی ماینە کو دەرگەە ب ئێکجاری بکەڤیتە دخزمەتا وەلاتیان دا و نھا دەرگەە ژلایێ تورکیا ڤەکریە و چوو کێشە نینە بتنێ ژلایێ ھەرێما کوردستانێ ھندەک ئەگەرێن تەکینیکی ماینە و دەمەکێ زور نێزیک ئەو ئاریشە ژی دێ ھێنە چارەسەرکرن)
قایمقامێ قەزا مێرگەسوورێ د درێژاھیا ئاخفتنێن خودا دیارکر ژی کو قەیرانا دارایی و شەرێ داعش ئەگەرێن سەرەکی یێن گیربوونا دەرگەھێ نوێ بوون و گۆت ژی: (ب ڤەکرنا دەرگەھێ زێد دێ مەزنترین قەرەبالغا ھاتن و چوونێ دناڤبەرا ھەرێما کوردستانێ و تورکیا درۆست بیت ژ بەرکو دەرگەھێ زێد نێزیکترین خالا سنووری یا دناڤبەرا تورکیا و ھەولێرێ یە ، بڤێ یەکێ دێ ئالوگورا بازرگانی و مرۆڤایەتی و جڤاکی درۆست بیت و خەلکەکێ زور مفای ژێوەرگریت)
دەرگەھێ زێد دکەڤیتە گوندێ زێد یا سەر ب ناحیا شێروانی مەزن ل سنوورێ قەزا مێرگەسوور ل دەڤەرا بارزان کو ٣٠کم ل ناڤەندا قەزا مێرگەسوور و ١٤٤کم ل سەنتەرێ ھەولێر دوورە ، بەرامبەر دەرگەھێن دن رێیا ھاتن و چونێ دناڤبەرا ھەولێر و تورکیا دێ ١٠٠کم کێم دکەت.

ئەڤرو نیوز :
کومپانیا رۆژ نەفت راگەھاند کو ئەوان چەند رێکەفتنەکێن نوو دوارێ پەترولێ دا ل گەل حکومەتا ھەرێما کوردستانێ ئیمزاکرن ب تایبەتی دوارێ لێگەریانا پەترول و گاز و بازرگانی و کارێن مرۆڤایەتی.
دراگەھاندنەکێ دا کومپانیا ناڤبری دیارکر کو بەلگەنامەیێن دناڤبەرا کومپانیا روز نەفت و ھەرێما کوردستانێ بەرا کومبوونا دناڤبەرا فلادیمێر پوتین ھاتینە ئیمزاکرن و گۆتیە: (ئەو گرێبەست ژلایێ ئاشتی ھەورامی وەکو ھەرێما کوردستانێ ،و ئیگور سەچین وەکو لایەنێ کومپانیێ ھاتینە ئیمزاکرن)
د پشکەکا دن یا راگەھاندنا وان دا ھاتیە: (ھەردوو لایێن گرێبەستێ ئیمزا لسەر بەرھەمئینان و گەشەپێدانا لێگەریانا پەتروڵ و گازێ کریە ، بەرامبەر ھنارتنا پەترولا ھەرێما کوردستانێ دێ ب رەنگەکێ قانونی پارە بو ھەرێما کوردستانێ ھێتە فرێکرن و ئەڤ رێکەفتنە ژی یا درێژخایەنە و مەرەم بھێزکرنا ژێرخانا ئابوورا ھەرێما کوردستانێ یە)
د درێژاھیا راگەھاندنا وان دا ھاتیە: (روز نەفت دکاریت سیستەمێن سەرەکیێن دەڤەرێ ب شیانێن ٧٠٠ ھزار بەرمیلان د روژەکێ دا بکاربینیت و پلان ژی ھاتیە دانان ئەڤ یەک بەرفرەھتر لێ بھێتەکرن و دوماھیا ئەڤ سالە دێ بیتە ئێک ملیون بەرمیلێن پەترولێ د ئێک رۆژ دا ،د رێکەفتنێ دا پێنج بلوکێن بەرھەمئینانێ ھاتینە کرن بو لێگەریان و بەرھەمئینانێ ل گوەری گرێبەستا دناڤبەرا ھەردوو لایان دا)