ئەڤرو نیوز :
وەزارەتا دارایی و ئابووری یا حکومەتا ھەرێما کوردستانێ دیارکر کو ئەو دێ دەرمالەیێن ماموستایێن ھەلگرێن باوەرناما دبلوم ئەڤێن کو دوو سالان ل پەیمانگەھا راھێنان و گەشەپێدانا پەروەردەیی خواندی زێدەکەت.
ل گورەی نڤیسارەکا وەزارەتا ناڤبری ب ھژمار ٦٧٤٧/٧/٩ و رێکەفتی ٢٥/٥/٢٠١٧ دەرچوویە و دانەیەک دەست ئەڤرو نیوز کەفتیە تێدا دیاردبیت کو ئەو ماموستایێن کو ھەلگرێ باوەرناما دبلومێ نە و ل پەیمانگەھا راھێنان و گەشەپێدانا پەروەردەیی بو دەما دوو سالان درێژی ب خواندنا خوە دایە ، جھێ رێزگرتن و ھەژی گوھرینا دەرمالەیێن باوەرنامێن خوەنە ب رێژا ٤٥%.
دپشکەکا دن یا ئەوێ نڤیسارێ دا ئەڤ یەک مەرجدارکریە و دبێژە: (ب مەرجێ ئەو باوەرنامە ژلایێ وەزارەتا خواندنا بلند و ڤەکولینێن زانستی ڤە باوەرناما دەرچوونێ ژ ئەوێ پەیمانگەھێ ب باوەرناما بەکالوریوسێ ھاتبیتە حساب کرن)

ئەڤرو نیوز:
پشتی نیڤرویا ئەڤرو دوو چەکدارێن داعش خوە گەھاندە سنوورێ قەزا دوبز و ھێزێن پولیس و پێشمەرگەیان ژی روو ب روو بوون و ھەردوو کوشتن.
دڤی واریدا “عەمید سەرحەد قادر ” رێڤەبەرێ پولیسێن قەزا و ناحیێن کەرکوک د لێدوانەکێ دا بو دەزگەھێن راگەھاندنێ دیارکر کو ئەو ھەردوو داعش ھاتینە کوشتن یێن کو ئەڤرو ھێرش کریە سەر پولیس و پێشمەرگەیان و گۆت: (ئەوان ھەردوو چەکدارێن داعش ب مەرەما ئەنجامدانا کریارەکا تیروستی دناڤا قەزا دوبز دا ب دزیڤە خوە گەھاندە دەردورێن قەزا دوبز ، پشتی کو ئەم ھاتینە ئاگەھدارکرن ھەرزوو ئەم گەھشتینە جھێ روودانێ و ب ھەڤکاریا ھێزێن پێشمەرگەی ئەو ھەردوو تیرورست ھاتنە دورپێچدان و دوڤدا پشتی شەرەکێ دژوار ھاتنە کوشتن )
زێدەتر گۆت: (ب لێبورین ڤە ژ ئەنجامێ روو ب روو بوونا پولیس و پێشمەرگەیان ل گەل ئەوان تیرورستان ، پولیسەک و سێ پێشمەرگە شەھیدبوون و چوار پولیس ژی برینداربوینە )

ئەڤرو نیوز ، نەوزاد زادە ھلۆری:
ئەڤرو ل ئێک ژ مزگەفتنێن ناحیا شێلادزێ ژلایێ کەسەکێ نەناسیار ڤە قاسەیا پارێن خێرخوازی یا مزگەفتەکێ ھاتە شکاندن و پارێن وێ دزینە.
دڤی واریدا “برقی چێی “بۆ ئەڤرو نیوز گۆت: (ئەڤرو ل ئێک ژ مزگەفتێن ناحیا شێلادزێ کەسەکێ نەناسیار قاسەیا پارێن خێرخوازیێن مزگەفتێ شکاندیە و پارێن وێ ھەموو برینە)
برقی کو نەڤیا ناڤێ مزگەفتی ئاشکرا بکەت زێدەتر گۆت: (سوپاس بو خودێ کو ئەو دزیکەر نەگەھشتە ئارمانجا خوە کو ئەو ژی دزینا پارایە ژبەرکو شڤێدی مەلایێ مزگەفتێ پارێن قاسێ ھەموو دەرئیناینە و ھەلگرتینە و بتنێ ٧٥٠ دینار تێدا مابوون و دزیکەری تنێ ئەو پارە برینە ، بەلێ یا کو جھێ داخێ یە ئەوە ھێشتا دیاردا دزینا پاران مایە ب تایبەتی یا مزگەفتان ، ژبەرڤێ گرنگە جھێن پەیوەندیدار زێدەتر د چاڤ ڤەکریبن)
دھێتە زانین کو بەری نوکەژی ل مزگەفتەکا دن یا شێلادزێ دوو جاران قاسەیا پاران ھاتیە شکاندن و پارێن وێ ھاتبوونە دزین.

ئەڤرو نیوز :
ئێکەتیا زانایێن ئاینێ ئیسلامی ل کوردستانێ و لژنا بلندا فەتوایێ ل ھەرێمێ رێژەیا زەکات و فترەیان بو ئەڤ سالە بو موسلمانان دیارک رکو ئەو ژی فترە سێ ھزار دینارن و زەکات ژی ھەر ٤ ملیون و ٥٠٠ ھزار دیناران زەکات دکەڤیت.
لژنا بلند یا فەتوایێ یا ھەرێما کوردستانێ ب مەرەما دیارکرنا رێژەیا فەترە و زەکاتان کومبوو و ل گورەی راگەھاندنا داویا کومبوونێ درۆستە ل شوونا خوارنێ پارە ژی بھێتەدان.
ل گورەی ئەوێ راگەھاندنێ ئەڤ سال بو ھەر کەسەکێ وەکو فترە سێ ھزار دینار ھاتیە دیارکرن ، و زەکات ژی ل سەر ھەر رێژەیەکا پارێ دانایی کو سال تەمام کربیت ھەیە و ئەو ژی ئەگەر بگەھیتە ٤ ملیون و ٥٠٠ ھزار دیناران و ئەڤ یەک ژی لگورەی ٢٠ مسقالێن زێری ھاتیە خەملاندن.
ل بارا ئەوان کەسانێن کو رۆژیێن خوە ژ بەر ئەگەرێن شەرعی خواربیت د راگەھاندنێ ھاتیە کو ئەو دکارن خوارنێ بدەن یان ژی پارەی بدەن و بو ھەر رۆژەکێ ژی سێ ھزار دینارن.