ئەڤرو نیوز:
ل گورەی نڤیسارەکا کونسولگەری یا ھندستانێ ل ھەولێرێ ، قوتابیێن کورد یێن ھەرێما کوردستانێ دکارن بێ بەرامبەر ل وی وەلاتی بخوونن.
نڤیسارا کونسولگەریا ھندستانێ ل رێکەفتی ١١/٥/٢٠١٧ دەرچویە و سوزا دانا زەمانا خواندنێ بو ب دەستڤەئینانا باوەرناما دکتورایێ د وارێ چاندنێ دا ددەت و ھەموو مەزاختن ژی لسەر وایە.
ل گورەی ئەوێ نڤیسارێ کو ئاراستەیێ فەرمانگەھا پەیوەندیێن دەرڤەیێن ھەرێما کوردستانێکريه ، قوتابی دکارن دوارێ چاندنێ دا خواندنا ٢٠١٧ بو ٢٠١٨ ل ھندستانێ بخوونن و دوماھی مولەت ژی ھەتا روژا ٣١/٥/٢٠١٧يه.

ئەڤرۆ نيوز:
سەرۆک وەزیرێن کەنەدا ھەیڤا ڕەمەزانێ ل موسولمانان پیرۆز دکەت و ڕاگەھاندیە، ڕەمەزان دئینتە بیرا مرۆڤی کو پێدڤیێن کەسێن دی پێش یێن خوە بێخین.
جەستن ترودۆ، سەرۆک وەزیرێن کەنەدا د پەیامەکا ڤیدیۆیدا ھەیڤا رەمەزانێ ل موسلمانان پیرۆز دکەت و دبێژیت: “ڤێ حەفتیێ دەستپێکا مەھا ڕەمەزانێ یە و ژ لایێ موسولمانێن کەنەدا و جیھانێ ڤە رۆژی دھێنە گرتن، خەلک د مزگەفت و مالاندا ل گەل ھەڤال و خێزانێن خوە کۆم دبن و ڤێ مەھێ پیرۆز دکەن”.
سەرۆک وەزیرێن کەنەدا خویا ژی کر، ڕەمەزان دئینتە بیرا مە کو ئەم قەدرێ پیرۆزیێن خوە بزانین و ئەم ژ بۆ کۆمەلگەھا خوە ڤەگەڕین و پێدڤیێن کەسێن دی پێش یێن خوە بێخین و گۆت: “موسلمانێن کەنەدا پشکداریەکا گرنگ د کەنەدا دا ھەیە و یێ وێ پشکداریێ بھێزتر دکەن”.
جەستن ترودۆ د وێ پەیاما خوە دا ئاماژە ب وێ چەندێ ژی کریە کو پڕانیا وەلاتێن جیھانێ، ب تایبەتی وەلاتێن ئیسلامی، شەمبیێ وەکو رۆژا ئێکێ یا ھەیڤا رەمەزانا ئەڤ سالە ھژمارتیە.

ئەڤرۆ نيوز:

رێکخستنا تیرۆرست یا داعشێ ل مسرێ و فلیپینێ دخوازیت خوە بجە بکەت و نھا ئارمانجا وێ یا سەرەکی ئاڤاکرنا دەڤەرەکا ئازادە د ناڤبەرا مسرێ و لیبیایێ دا و ل دووڤ زانیاریێن کو حوکمەتا مسرێ بەلاڤ کریە ب ھزاران تیرۆرستێن داعشێ ژ عیراقێ بەرێ خوە دانە لیبیایێ و مسرێ.
پەیڤدارێ سەرۆکێ مسرێ د داخۆیانیەکی دا راگەھاند کو تیرۆرستێن داعشێ ژ لیبیا دھێنە ناڤا وەلاتێ وان و کریارێن تیرۆرستی ئەنجام ددەن و وان ژی ل لیبیا بنگەھێن داعشێ بۆمبەباران کرینە و ب دەھان تیرۆرست کوشتینە.
د ڤێ دەربارێ دا سەمیح شوکری وەزیرێ دەرڤە یێ مسرێ د داخۆیانیەکی دا بۆ رۆژنامەڤان و دەزگەھێن راگەھاندنێ دیار کر کو ئەو د رژدن ل ھەر جھەکی شەرێ تیرۆرستان بکەن و وەلاتێ خوە ل ھەمبەر ھێرشێن تیرۆرستی ب پارێزن و گۆت: (دڤێت ھەموو جیھان پێکڤە د ھەر واری دا ل دژی تیرۆرێ راوەستن و ئەم پێکڤە دشێین ھەموو بنگەھێن تیرۆرستان ژ ناڤ ببەین و ھەکە تێکۆشینەکا پێکڤە نەبیت تیرۆرست دشێن ژێدەرێن جودا جودا ل ھەر جھەکی جیھانێ بۆ خوە پەیدا بکەن و ئەو یەک ژی دەلیڤێ ددەتە وان کو کریارێن تیرۆرستی ل ھەر جھەکی ئەنجام بدەن).
وەزیرێ دەرڤە یێ مسرێ راگەھاند ژی کو ھێزێن وان یێن ئەسمانی ل لیبیایێ ئۆپەراسیۆنەکا دژوار ل دژی بنگەھێن تیرۆرستێن داعشێ و قاعیدە ئەنجام داینە و گۆت: (ئەم دێ بەرسڤا ھەر ھێرشەکی تیرۆرستی بدەین و ل ھەر جھەکی کو تیرۆرست ھەبن ل دووڤ ھێزا خوە ئەم دێ ل دژی وان ئۆپەراسیۆنان برێڤە ببەین و د ڤێ چارچۆڤێ دا مە بنگەھێن تیرۆرستان ل لیبیا بۆمبەباران کرینە و ھژمارەکا زێدە تیرۆرست ژی ھاتنە ژناڤبرن و ل ناڤ وەلات ژی ئۆپەراسیۆنێن مە یێن دژوار ل دژی تیرۆرستان و ھەڤکارێن وان بەردەوامن).