ئه‌ڤرۆ نيوز:
ئيبراهيم جه‌عفه‌رى وه‌زيرێ ده‌رڤه يێ عيراقێ چه‌نده‌كێ به‌رى نوكه ب سه‌ره‌دانه‌كا فه‌رمى گه‌هشته باژێرێ هه‌ولێر و بڕياره ل گه‌ل به‌رپرسێن هه‌رێمێ كۆم ببيت.
سه‌ره‌دانا ئيبراهيم جه‌عفه‌رى بۆ هه‌رێما كوردستانێ پشتى وێ چه‌ندێ دهێت كو ل حه‌فتيا بۆرى شانده‌كێ هه‌ڤپشكێ پارتى و ئێكه‌تى سه‌ره‌دانا به‌غدا كربوو و ل گه‌ل سه‌رۆكاتيان و لايه‌نێن عيراقى ل سه‌ر پرسا ريفراندۆمێ و بلندكرنا ئالايێ كوردستانێ ل كه‌ركووك كۆمبوون.
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ ل گه‌ل وه‌زيرێ ده‌وله‌تا بريتانيا بۆ كاروبارێن رۆژهه‌لاتا ناڤه‌راست و ئه‌فريقيا كۆمبوو.
رۆژا چارشه‌مبى 12ى نيسانا 2017ێ نێچيرڤان بارزانى سه‌رۆكێ حوكمه‌تا هه‌رێما كوردستانێ ب ئاماده‌بوونا جێگرێ خوه قۆباد ته‌له‌بانى و ژماره‌كا وه‌زيرێن حوكمه‌تێ پێشوازى ل مارتن ئێلوود، وه‌زيرێ ده‌وله‌تا بريتانيا بۆ كاروبارێن رۆژهه‌لاتا ناڤه‌راست و ئه‌فريقيا و شاندێ ل گه‌ل دا كر.
فه‌لاح مسته‌فا به‌رپرسێ فه‌رمانگه‌ها په‌يوه‌نديێن ژ ده‌رڤه ل حوكمه‌تا هه‌رێما كوردستانێ ل تويته‌رێ خوه راگه‌هاند: د كۆمبوونێ دا به‌ر ب پێشڤه‌چوونا سياسى و سه‌قامگێريا پشتى داعش گه‌نگه‌شه‌كر.
Good exchange b/w #KRG #PMBarzani #DPMTalabani & #UK #FCO Minister for #ME on Political Developments,Post #ISIS #Stabilization & #Governance pic.twitter.com/IONCQsOGIa
— Falah Mustafa (@FalahMustafa) April 12, 2017
ژ لايه‌كێ دى ڤه مالپه‌رێ فه‌رميێ حوكمه‌تا هه‌رێما كوردستانێ راگه‌هاند كو شاندێ مێڤان به‌حسا ره‌وشا مووسل پاش داعش كر و خۆيا كر كو پێدڤيه هه‌ماهه‌نگيا پێدڤى د ناڤبه‌را هه‌موو پێكهاتێن هه‌رێما كوردستانێ و عيراقێ و كۆمه‌لگه‌ها نێڤده‌وله‌تى دا هه‌بيت ب مه‌ره‌ما پاراستنا ئاراميا ده‌ڤه‌رێ و ئاڤه‌ندانكرنێ.
ژ لايێ خوه ڤه نێچيرڤان بارزانى سه‌رۆك حوكمه‌تا هه‌رێما كوردستانێ سۆپاس سه‌ره‌دانا شاندێ مێڤان كر بۆ پشته‌ڤانى و هاريكاريا هه‌رێمێ د وارێن مرۆڤى و له‌شكرى دا و دا زانين كو ل گه‌ل حوكمه‌تا عيراقێ ژبلى هه‌ماهه‌نگيا له‌شكرى د چو واره‌كێ دى دا هه‌ماهه‌نگى نه‌بوويه.
بارزانى دا زانين ژى كو بۆ ناڤخۆيا كوردستانێ گه‌نگه‌شه‌يه‌كا باش هه‌يه دا كو ب ديالوكێ كێشێن خوه چاره بكه‌ن و دانوستاندنێن به‌رفره‌هـ ژى ل سه‌ر ريفراندۆما هه‌رێما كوردستانێ هه‌نه دا كو خه‌لك ب خوه داهاتيێ خوه ديار بكه‌ت.
ئه‌ڤرۆ نيوز:
مه‌حمه‌د ئه‌حمه‌دى نه‌ژاد، سه‌رۆك كۆمارێ به‌رێ يێ ئيرانێ خوه بۆ سه‌رۆك كۆماريا وه‌لاتێ خوه كانديد كر.
د رۆژا دويێ يا ناڤ نڤيسينێ دا بۆ پۆستێ سه‌رۆك كۆماريێ ل ئيرانێ، مه‌حمود ئه‌حمه‌دى نه‌ژاد كو ژ سالا 2005ێ هه‌تا 2013ێ سه‌رۆك كۆمارێ ئيرانێ بوويه، خوه بۆ خولا 12ێ يا سه‌رۆك كۆماريا ئيرانێ كانديد كر.
پرۆسا ناڤ نڤيسينێ بۆ به‌ربژێراتيا سه‌رۆك كۆماريا ئيرانێ ل 11ى نيسانا 2017ێ ده‌سپێكريه و هه‌تا نوكه زێده‌ترى 100 كه‌سان ناڤێن خوه نڤيسينه و بڕياره پێنج رۆژان يا به‌رده‌وام بيت. ئه‌ڤه د ده‌مه‌كى دا كو هێشتا چو به‌ربژێرێن ب هێز ناڤێن خوه تۆمار نه‌كرينه ژ وان ژى حه‌سه‌ن رۆحانى يێ سه‌رۆك كۆمار و ئيبراهيم ره‌ئيسى سه‌رپه‌رشتێ مه‌زارگه‌هێ ئيمامێ هه‌شتێ يێ شيعان و حه‌ميد به‌قايى به‌ربژێرێ ته‌ڤگه‌را مه‌حمود ئه‌حمه‌دى نه‌ژاد.
بڕياره هه‌لبژارتنێن سه‌رۆك كۆمارێ ئيرانێ ل 19ى گۆلانا 2017ێ بهێنه ئه‌نجام دان.
ئه‌ڤرۆ نيوز:
د رێ و ره‌سمه‌كى دا ل وه‌زاره‌تا خواندنا بلند و ڤه‌كولينێن زانستى يا حوكمه‌تا هه‌رێما كوردستانێ رێڤه‌به‌رێ گشتى يێ پرۆژێن ئه‌نده‌زيارى ل وه‌زاره‌تا خواندنا بلند و ڤه‌كولينێن زانستى هاته گوهۆڕين.
دوهى رۆژا سێشه‌مبى رێكه‌فتى 11ى نيسانا 2017ێ ل هه‌ولێر رێ و ره‌سمێن گوهۆڕينا رێڤه‌به‌رێ گشتى يێ يێ پرۆژێن ئه‌نده‌زيارى ل وه‌زاره‌تا خواندنا بلند و ڤه‌كولينێن زانستى هاتنه گێران و تێدا دكتور داود ئه‌ترووشى وه‌كو رێڤه‌به‌رێ گشتى ل جهێ دكتور دلشاد كاكه‌سۆر جاف هاته دانان.
پێشتر دكتور داود ئه‌ترووشى وه‌كو جێگرێ سه‌رۆكێ زانكۆيا دهۆك و وه‌كو مامۆستا كوليژا ئه‌نده‌زيارى ل زانكۆيا دهۆك كار كريه.
ئەڤرۆ نیوز:
نڤیسەرێ مەزنێ تورک، ئیسماعیل بێشکچی، د گۆتارەکا خوە یا نوو دا ل مالپەرێ ئیلکە خەبەر یێ تورکی ب ناڤێ کەرکووک و ئالایێ کوردستانێ بەلاڤکریە، تێدا ئاماژە ب وێ چەندێ کریە کو کەرکووک یا کوردستانی یە و دڤێت ڤەگەریتە سەر ھەرێما کوردستانێ.
بێشکچی خۆیا دکەت کو چاوان چاوا کو سلێمانی و ھەولێر و چەمچەمال و گەلەک دەڤەرێن دی پشکەکن ژ ئاخا کوردستانێ، کەرکووک ژی وەسا پشکەکا گرنگە ژ ئاخا کوردستانێ و دڤێت ھەموو پارت و ئالیێن سیاسی یێن کوردی ل ھەرێما کوردستانێ ب دەنگەکێ بلند بێژن کو ئەم دێ خوەدان ژ ئالایێ کوردستانێ ل کەرکووکێ دەرکەڤین و چو ھێزەک نەشێت ئالایێ مە ل کەرکووکێ بینتە خوارێ و دڤێت ھەلویستەکێ ب ھێز ھەبیت و دەنگێ کوردان گەلەکێ بلند بیت دا ھەموو ئالیێن دی بزانن کو کورد چەند رژن دێ کەرکووکێ ڤەگەریننە سەر کوردستانێ.
شیرەتا وێ چەندێ ژی ل کوردان دکەت کو پێدڤیە کورد ب چو رەنگەکێ ھزرا کوردستانەکا بێ کەرکووک نەکەن، ژ بەر ھندێ ژی یا بەری دەمەکێ ل کەرکووکی روو دای و بلندکرنا ئالایێ کوردستانێ گەلەکێ گرنگ بوو و دڤێت ھێزێن کوردی ل ھەرێما کوردستانێ و پارچێن دی یێن کوردستانێ ژی ب ھەلویستێ خوە یێن نەتەوی دەستخوەشیێ ل ئیدارا کەرکووکێ بکەن د دەمەکێ وەسا دا چو ھێزەک نەشێت بێژیت کو ئالایێ کوردستانێ ل کەرکووکێ بیننە خوارێ.
دەربارەی ھەبوونا تورکمان ژی ل کەرکووک دبێژیت: “گەلەک کەس دبێژن کو چەند سەد ھزار تورکمان ل کەرکووکێ دژین و کەرکووک باژێرێ وانە، ئەرێ ھوون دزانن کو چەند ملیۆن کورد ل ئستەنبولێ دژین؟ ھەتا نھا کەسێ گوە لێ بوویە کو کورد بێژن ئستەنبولێ باژێرێ کوردانە، چاوا ئستەنبولێ باژێرێ کوردان نینە وەسا ژی کەرکووکێ باژێرێ تورکمان و عەرەبان نینە، کەرکووکێ باژێرێ کوردانە و دڤێت د زووترین دەم ڤەگەریتە سەر ھەرێما کوردستانێ و ب ڤەرگەریانا کەرکووکێ دێ پێگەھێ ھەرێما کوردستانێ گەلەکێ ب ھێز بیت و وی دەمی ھەکە کورد دەولەتا خوە راگەھینن دێ ببنە خوەدان دەولەتەکا ب ھێز ل رۆژھەلاتا ناڤین”.
ل دۆر دیموگرافیا کوردستانێ ژی ددەتە زانین کو داگیرکەرێن کوردستانێ ب ھەموو رەنگەکێ بزاڤ کرینە کو دیموگرافیا کوردستانێ تێک بدەن و ل کەرکووکێ ژی ھەمان تشت ھاتیە کرن، لێ بۆ ھەموو کەسەکێ ئاشکرایە کو مەلا مستەفا بارزانی چەند گرنگی دایە کەرکووکێ و رازی نەبوویە ب چو رەنگەکێ بەحسێ کوردستانەکا بێ کەرکووکێ بھێتە کرن، دڤێت ئەڤرۆکە ژی ھەلویستێ کوردان ل ھەرێما کوردستانێ ل ھەمبەر چارەنڤیسێ کەرکووکێ وەسا بیت و نابیت رێ بھێتە دان ھندەک وەلاتێن وەکو تورکیا و ئیران دەستێوەردانێ د کاروبارێ ناڤخوەیی یێ ھەرێما کوردستانێ و عیراقێ دا بکەن، ژ بەر ھندێ ژی نھا باشترین دەمە بۆ ڤەگەریانا کەرکووکێ ل سەر ھەرێما کوردستانێ و راگەھاندنا دەولەتا کوردی.
ئەڤرۆ:
ڤەکۆلەرەکێ ناڤدار دیار دکەت کو ترامپی دڤێت ب پشتەڤانی کرنا ل دەولەتا کوردی پرۆژێ ئیرانێ یێ ھیلالێ شیعە رابگریت و ژ بەر ھندێ ژی دێ پشتەڤانیێ ل دەولەتا کوردی کەت و ژی نھا باشترین دەمە کو کورد ب رێیا ریفراندۆمێ دەولەتا خوە راگەھینن.
محەمەد ئالکیش ڤەکۆلەرێ ناڤدار د داخۆیانیەکێ دا بۆ ئەلمونیتۆر دیار کریە کو ترامپی دڤێت ب تەمامی پرۆژێ ئیرانی یێ بەرەیێ شیعی و ب ھێزکرنا رێکخراوێن ھشکباوەر وەکو حزبوللاھێ ژناڤ ببەت و ژ بەر ھندێ ژی ترامپی دەستێوەردان د کاروبارێ ناڤخوەیی یێ سووریێ کر و ھێرشا ھەفتیا بۆری نیشا ددەت کو ئێدی ترامپ دێ ل ھەمبەر ئیرانێ و بزاڤێن وێ بێ ھەلویست نەبیت و دێ ب رەنگەکی دژوار کار بۆ لاوازبوونا ئیرانێ و ژناڤچوونا رژێما بەشاری کەت و گۆت: (ترامپ و ئیدارا نوو یا ئەمریکا گەھشتنە وێ باوەریێ کو ئێدی دڤێت رژێمێن وەکو یا بەشاری و ئیرانێ نەمینن و ترامپ ژ رەوشا نھا یا تورکیا ژی رازی نینە و دڤێت رێگریێ ل ب ھێزبوونا ئیرانێ بگریت و ل گۆر باوەریا من پشتەڤانیا ئەمریکا ل راگەھاندنا دەولەتا کوردی دێ دربەکا مەزن بیت بۆ پرۆژێ شیعی یێ ئیرانێ).
ناڤھاتی ھەروەسا دیار دکەت کو ئاشکرایە پەیوەندیێن بەغدا و ھەولێرێ گەلەکێ ئالۆز بووینە و ناکۆکیێن ھەر دو ئالیان ب چو رەنگەکێ چارە نابن و ژ بەر ھندێ ژی یا نھا کوردان دڤێت بکەن تشتەکێ گەلەکێ باشە، ئانکو بریارا ریفراندۆمێ ژ ئالیێ ھەر دو پارتێن مەزنێن کوردی ل ھەرێما کوردستانێ تشتەکێ گەلەکێ باش بوو و ئاشکرایە کو دێ ئەنجامێ ریفراندۆمێ ئەرێ بیت، چونکو ئەڤرۆکە ھەموو کوردان دڤێت دەولەتا خوە راگەھینن و ژ بەر ھندێ ژی ئەمریکا دێ پشتەڤانیێ ل راگەھاندنا دەولەتا کوردی کەت و تشتێ ئەز دزانم دەمەکە ئەمریکا ل سەر ھندێ کار دکەت و پشتەڤانیا ئەمریکا ژی بوویە پالدەرەک باش کو ئەڤرۆکە کورد ژی د رژدن دێ ب رێیا ریفراندۆمێ دەولەتا خوە راگەھینن.
محەمەد ئالکیش ڤەکۆلەرێ ناڤدار ھەروەسا دیار دکەت کو ئیران پتر ژ تورکیا ژ راگەھاندنا دەولەتا کوردی ل عیراقێ دترسیت، چونکو دەولەتا کوردی دێ ئاستەنگیێ ل ھەمبەر پرۆژی شیعی یێ ئیرانێ دروست کەت و ھەروەسا ئیران دترسیت کو ب راگەھاندنا دەولەتا کوردی ل عیراقێ کوردێن ئیرانێ ژی داخوازا مافێ خوە بکەن و بێگومان د دەمەکێ وەسا دا دێ رەوشا ناڤخوەیی یا ئیرانێ ژی گەلەکێ ئالۆز بیت، ئەمریکا ڤان خالان ھەموویێ باش ددەتە بەرچاڤ و دخوازیت ب رێیا کوردان ئیرانێ تەنگاڤ کەت و گۆت: (ئەز باوەرم ناکەم وەلاتەکێ ب ھێز وەکو روسیا دژبەریا دەولەتا کوردی ل ھەرێما کوردستانێ بکەت، چونکو روسیا ژی گەلەک ئاریشێن خوە ھەنە و روسیا ژی دزانیت دشێت مفایەکا باش ژ پەیوەندیێن ل گەل کوردان ببینیت و ئەز باوەر ناکەم کو روسیا ئاریشان بۆ راگەھاندنا دەولەتا کوردی دروست کەت).
ئەڤرۆ نيوز:
شارەزایەکێ سیاسی ئاشکراکر کو نوکە باشترین دەلیڤە یە ئەم کورد بۆچوونا مللەتێ خوە وەربگرین چونکە مە پشتەڤان ھەنە و دیسا شەرێ داعش ھەڤپەیمانێن کوردان زێدەکرینە و بەرامبەر وەلاتێن داگیرکەر وەک عیراقێ لاواز بووینە.
ئازاد عادل ماستەر ب زانستێن سیاسی ل وەلاتێ سوید، دھەڤیتنەکێ دا ل گەل رۆژناما ئەڤرۆ گۆت: ھەر پرۆسەکا مفای بگەھینتە مللەت و دوزا کوردان پێشڤەببەت بێ گومان چو پەیوەندی ب دەمی ڤە نابیت، دەم نەیێ گرنگە، چونکە گەھشتنا مللەتان بۆ ئارمانجێن خوە چ پەیوەندی ب دەمی ڤە نینە، نەیار و نەحەزێن مللەتێ کورد ھەر دەم دژی وێ چەندێ بووینە نە کورد نە گەھنە ئارمانجێن خوە وەک مافەکێ نەتەوایەتی و دەولەت بوونێ، چونکە ئەو ب مەترسیێن ھەرە مەزن بخوە دبینن، لێ نوکە ئەو نەحەزێن دۆژمناتیا کوردان ھەر دەم دکرن، لاواز بووینە و پێدڤی یە وەک مللەتێ کورد ئەم ئەڤێ چەندێ مفایێ ژێ وەربگرین، و بەرامبەر دوستێن مللەتێ کورد زێدەبووینە و تایبەت پشتی بەر سینگێ رێکخراوا تیرۆرستی یا داعش راوستاین.
ھەروەسا دیتنا شارەزایێ زانستێن سیاسی، راژاندنا بابەتێ ریفراندۆمێ بۆ سەربخوەیێ سەرکەفتنە بۆ مللەتێ کورد و ھەکە سوبەھی رێگری ژی لێ بھێتە دێ تشتەکێ گەلەک ب سەناھی بیت، گرنگ ئەوە مە ناما خوە گەھاندە جیھانێ و دێ بەردەوام بین بۆ سەربخوەیی، رەنگە گەلەک لایەن ھەبن وی دەمی خوە دیار بکەن، کو پشتەڤانێن مللەتێ کوردن و رەنگە لایەن ژی ھەبن پێش وەخت دوستێن کوردان بووینە و دەستێ ھاریکاریێ بۆ سەربەخویا کوردستانێ درێژ نەکەن، پێدڤی یە ئەم ھزر ل شکەستنا وێ پروسێ نەکەین، چونکە ئەڤە دێ ھاریکاریا دوژمنێن مللەتێ مە کەت.
ئازاد عادل، ھەمبەر زێدەبوونا قەیرانان ژی گۆت: ھەکە پێدچوونەکێ دمێژوویا مللەتێ کوردان دا بکەین، دیارە یا پڕ بوویە ژ قەیرانان و کارەساتان، لەوما پێدڤی یە دبەرھەڤ بین و خوە ل بەر بگرین و تایبەت دەمێ سەرکەفتنا مللەتی د بابەتێ ریفراندۆمێ دا، ئەگەرێ دیاربوونا قەیرانان ھەنە چونکە رەوشا ھەرێما کوردستانێ یا نافخوە نەیا گونجایە و ژلایەکی ڤە دبیت بزاڤ بۆ تێکدانا پرۆژێ سەربەخوەیا ھەرێما کوردستانێ بھێنە کرن ، دیسا وەلاتێن جیران وەک تورکیا و ئیران دبیت ب رێکا دەروازا زیانێ بگەھینە مللەتێ کورد و تێکدانا رەوشا ئابووری، بەلێ مە ژی دێ کارتێن فشارێ ھەبن دژی وان ب رێکا پەیوەندیان ل گەل وەلاتێن جیھانێ.
ئازاد عادل مامۆستایێ زانکویێ ل دۆر رەوشا کەرکووکێ ژی گۆت: گەلەک جاران کەرکووک زڤریە و ژ دەست مە چوویە، لێ ئەڤ جارە نە وەک جارێن بوری یە و کەرکووک یا نێزیک دبیت بھێتە سەر ھەرێما کوردستانێ و تایبەت شەرێ داعش و ھەموو پێکھاتێن کەرکووکێ زانی کو بتنێ کوردن و پێشمەرگێ کوردستانێ یە بشێن ئارامیا ڤی باژێری رابگرن و لەوما رازیبوونا خوە دیارکر ل سەر بلندکرنا ئالایێ کوردستانێ و راستسا وێ چەندێ ژی بوومە دیاربوویە کو کوردان گەلەک دەڤەرێن دیێن زەنگین ب پەترۆلێ وەک کەرکووکێ ھەنە، لەوما ھەتا نوکە چ کردارێن دروست ژی دژی بزاڤێن کوردان ل سەر ڤەگەراندنا کەرکووکێ بۆ سەر کوردستانێ نە ھاتینەکرن.
زدەتێر ئازاد عادل خوەیاکر، چو وەلاتێن دونیایێ بوومە دەولەت بوونێ وەک دیاری نائینن، ژبەر دبیتە مەترسی ل سەر وەلاتێن تورکیا و عیراق و ئیران و سوریا و ئەوڤان وەلاتان ژی ھەڤپەیمانێن خوە ھەنە، بەلێ ھەبوونا (33) قونسلخانا ل ھەرێما کوردستانێ بەلگەیە ل سەر وێ چەندێ کو بۆ ھەر بابەتەکی و پرۆسەکێ دێ مە پشتەڤانێن خوە ھەبن و دیسا پشتەڤانی و ھاریکاریا پێشمەرگێ کوردستانێ ژ لایێ وەلاتێن بیانی ڤە ل شەرێ دژی داعش بەلگەیە کو مە پشتەڤان دێ ھەبن.
ل دۆر کورد چو بکەن ل ئەڤێ قوناغێ، ئازاد عادل گۆت: نوکە قوناغەکا ھەستیارە و پێدڤی یە بەرنامەکێ رێک و پێک بھێـتەدان ژلایێ سەرکرداتیا کوردستانێ ڤە، چونکە دەڤەر ب گشتی یا بەر ب گوھۆڕینان دچیت و پێدڤی یە کورد پشکەکا ھەرە مەزن بن ژ ئەڤان گوھۆڕینان، ھەکە ھات داعش نەما ل عیراقێ دێ پەیوەندیێن کوردان ل گەل جیھانێ دێ بەر ب کێمبوونێ چن، شەرێ ل گەل داعش بۆ ئەگەر کورد ل جیھانێ بەر نیاس بن و عیراق ژی بەر ب لاواز بوونێ بچیت و بوومە گرنگە ئەم مفایی ژێ وەربگرین و بگەھینە ئارمانجێن خوە ، کورد نوکە بووینە فاکتەرەکێ گرنگ ل دەڤەرێ و جیھانێ و پێدڤی یە کورد مفایی ژ ئەڤێ چەندێ بکەن و دەست ژ ململانیێ یا نافخوە بەردەن.
ئه‌ڤرۆ نیوز:
سه‌رۆك وه‌زیرێن عیراقێ، حه‌یده‌ر عه‌بادى راگه‌هاند، نابیت ریفراندوم ل كه‌ركووكێ بهێته كرن كو كه‌ركووك بكه‌ڤیته سه‌ر هه‌رێما كوردستانێ دده‌مه‌كێ دا كو هێشتا پشكه‌ك ژ پارێزگه‌ها كه‌ركووكێ ژ ئالیێ داعش ڤه یا داگیركریه و خه‌لك ژى ل وێ پارێزگه‌هێ ئاواره‌نه.
سه‌رۆك وه‌زیرێن عیراقێ، حه‌یده‌ر عه‌بادى دیاركر، ئه‌ز پیچه‌ك ژ پێكهاتێن كه‌ركووكێ یێ نێزیكم، ئه‌م دخوازین پرسێن ده‌ڤه‌رێن كێشه ل سه‌ر ب هه‌ڤكارى و دانوستاندنان بهێنه چاره‌كرن.
ئه‌ڤرۆ نيوز:
ب سه‌رپه‌رشتیا سه‌رۆك بارزانى، ئه‌ڤرۆ مه‌كته‌با سیاسى یا پارتى دیموكراتى كوردستان و ئێكه‌تیا نیشتمانیا كوردستان كۆم بوون، هه‌ر دو ئالیان دیاركر كو ئه‌و دێ بزاڤێن خوه بۆ چاره‌كرنا كێشێن ناڤخۆیى خۆرتكر لێ كه‌ین.
د كومبوونێ دا بڕیار هاته دان كو لژنه‌كا بلند ب راوێژكرن ل گه‌ل هه‌موو لایه‌نێن سیاسى بهێته پێكئینان بۆ ئه‌نجامدانا دانوستاندنان ل كه‌ل هێزێن نیشتمانى یێن عیراقى سه‌باره‌ت داخوازى و كێشێن د ناڤبه‌را هه‌ردو ئالیان دا، ب تایبه‌ت د ڤێ ره‌وشێ دا كو خه‌لكێ كوردستانێ پێنگاڤان به‌ره‌ڤ ریفراندومێ د هاڤێژیت.
هه‌روه‌سا بڕیار هاته دان پێنگاڤێن پێدڤى بۆ پێكئینانا لژنه‌كا تایبه‌ت بهێنه دان بۆ سه‌رپه‌رشتیكرنا پرۆسا ریفراندومێ .
نيشاندان