ئه‌ڤرۆ نيوز:

شیرەتکارێ جڤاتا ئاسایشا ھەرێما کوردستانێ مەسرور بارزانی راگەھاند، بۆ ھندێ ئەم د سەربخوە بین، دڤێت ئەم سەر بخوەڤە بین، نابیت سەر بھیچ ئالایەکێ دیتر ڤە بین، سەبارەت بابەتێ پەرلەمانی ژی گۆت: ئەم نوکە ئامادەینە پەرلەمانی ئەکتیڤ بکەین، ھەروەسا دیارکر، پرۆسا ریفراندۆمێ پاشەکشیێ ناکەین و بگۆتنێن وان کەسێن دژی ریفراندۆمێ ژی ناکەین.

دگۆتارەکێ دا ل کەرنەڤالێ ئێکەتیا قوتابیێن کوردستانێ کو ب مەرەما پشتەڤانیکرنا ل پرۆسا ریفراندۆمێ ل ھەولێرا پایتەخت ھاتە ئەنجامدان، مەسرور بارزانی بەحسێ گرنگی یا سەربخوەیا ھەرێما کوردستانێ کر و گۆت: نابیت چاڤێ مە ھەر ل وێ چەندێ بیت کو ئەم ھەر دیڤەلانک بین، یان خەلکەکێ دیتر حوکمڕانیێ ل سەر مە بکەت، کەسەک نەشێت چاڤێ وی ل پۆستێن وەلاتەکێ دی بیت و بھێت لڤێرە رێنمایێن خوە ب مە راسپێریت ل سەر چەوانیا ئەنجامدانا ریفراندۆمێ.
شیرەتکارێ جڤاتا ئاسایشا ھەرێما کوردستانێ، دووپاتکر بەری کو خەلکی باوەری ب سەربخوەیا کوردستانێ ھەبیت، دڤێت مە بەری ھەموو کەسەکی ئەو باوەری لنیک مە دروست ببیت کو ئەو مافەکێ سرۆشتی یە مەیە، ئەو مفا خودێ دایە مە، ھەروەسا خوەیاکر، خەلکەکێ نەڤێت ئەم ریفراندۆمێ بکەین و ھیجەتا بۆ دبینن ل رەنگ و چەوانیا ئەنجامدانا ریفراندۆمێ، ئەم ب ھیچ رەنگەکێ ب گۆتن و ئاخفتنێن وان ناکەین، و بھیچ شێوەکێ نە پاشڤە ڤەدگەرین و نە پەشیمان دبین، ئەو ریفراندۆم ژی دێ ددەمێ خوەدا ھێتە ئەنجامدان،
مەسرور بارزانی ھەروەسا گۆت: لەورا دڤێت ئەم خودانێن وێ بڕیارێ بین و ئەم وەکی نەتەوە دڤێت پێداگیریێ ل سەر وێ بڕیاراێ بکەین، کو ب ھیچ شێوەکی ژ مافێ خوە خۆشنابین و ب ھیچ تشتەکی ژ بلێ وەکھەڤی یا ل گەل مللەت و نەتەوەیێن جیھانێ ئەم ئامادە نینە یا ژوان کێمتر پێ رازی ببین.
ل دۆر سەربخوەیێ ژی شیرەتکارێ جڤاتا ئاسایشا ھەرێما کوردستانێ زێدەتر روونکر، کو ئەو پرسە مسۆگەرکرنا پاشەرۆژا کوردا دکەت و گۆت: بابەتێ سەربخوەیی یان ژی بابەتێ سەروەریا وەلاتی یا گرنگە بۆ پاراستنا پاشەرۆژا وەلات و خەلکێ مە، ھەکە ئەم د قانوونا نێڤدەولەی دا خودان سەروەری بین و خودان وەلاتەکێ سەربخوە بین، وی دەمی ب حوکمێ قانوونا نێڤدەولیا مە، مایتێکرنا دکاروبارێن ناڤخوەیا کوردستانێ ناھێتە قەبوولکرن، بەلێ نوکە ئەم پشکەکێن ژ حوکمەتەکا دیتر، ئەو بخوە وەکی پێدڤی نەشێت سەروەری یا خوە ب پارێزیت و ژ ھەموو ئالیەکێ ڤە مایتێکرن د کاروبارێن وێ دھێنە کرن، ھەکە وانا نەڤێت سەربخوە بن، مە دڤێت ئەم سەربخوە بین.
ل دۆر پرسا کاراکرنا پەرلەمانی، مەسرور بارزانی گۆت: ئاخفتن ل سەر وێ ئێکێ دھێتە کرن، کا ئەرێ مە پێدڤی ب کاراکرنا پەرلەمانی بۆ ئەنجامدانا ریفراندۆمێ ھەیە؟، جارێ من دڤێت ڤی بەحسی بکەم، ب ھیچ شێوەکی ئەم دژی کاراکرنا پەرلەمانی نەبووینە و نابین ژی، مە دڤێت پەرلەمان بھێتە کاراکرن، بەلێ چو جورە پەرلەمان بیت، بۆ بەرژوەندیا مللەتی بڕیاران بدەت، نابیت ببیتە سەرۆک فڕاکسیۆنا حزبەکێ و بناڤێ پەرلەمانی بتنێ بۆ بەرژوەندیا تایبەتا حزبەکی کاری بکەت، ئەم وێ قەبوول ناکەین.
ھەروەسا مەسرور بارزانی گۆت: ژێدەرێ شەرعیەتا مللەتی یە بەری پەرلەمان بیت، بەلێ سەرەڕای وێ چەندێ ژی مە پێخۆشە پەرلەمان بھێتە کاراکرن ل سەر ڤی بابەتی ژی ئاخفتنا پێدڤی ھاتیە کرن وپێشنیاز ھەبوون و گەنگەشەکرنا وان پێشنیازان ژی ژ ئالیێ سیاسی ڤە دھێنە کرن، بەلێ ئەم ب ھیچ شێوەکی وێ قەبوول ناکەین بۆ رازیکرنا جزبەکێ یان ئالیەکی،یان بۆ چارەکرنا کێشا سیاسی دناڤبەرا دو و یان سێ حزبان دا، کو پەرلەمان و ستراتیجیا نەتەوەیی و نیشتیمانی یا مللەتێ مە بکەڤیتە ژێر پرسیارێ کو بتنێ بەرچاڤکرنا ل سەر چارەکرنا کێشێن ناڤخوەیا حزبیێن بەرتەسک ب ھێتە کرن، ئەم وێ قەبوول ناکەین، بەری ھەموو تشتەکی بەرژوەندیێن بلندێن مللەتێ مە ب تایبەتی مەسەلا ریفراندۆمێ و سەربخوەیی د رۆژەڤێ دایە.
شیرەتکارێ جڤاتا ئاسایشا ھەرێما کوردستانێ ئەو ژی گۆت: بەری ھەموو تشتەکی مە دڤێت، ب پەرلەمانتاران بێژین، کو ئەو ب پەرۆشی بەحسێ کاراکرنا پەرلەامنی دکەن بلا پەرلەمانی ئەکتیڤ بکەن، پەرلەمان ب پڕانیێ کارا دبیت، بلا بھێن ھەکە ھەر کەسەکێ بڤێت ل سەر مەسلا پرسا ریفراندۆمێ یان بۆ سەربخوەیێ پەرلەمانی کارا بکەن، ئەم دڤی ئالی دا ئامادەینە پەرلەمان بدەنگێ پڕانیێ بھێتە کاراکرن، و سەرۆکاتیەکا نوو بۆ پەرلەمانی بھێتە ھەلبژارتن، بەلێ پەرلەمان بتنێ بۆ بەرژوەندیا کێشا حزبی و چارە بکەت و پاشی ببیتە ئاستەنگ بۆ کێشێن نەتەوەیی و نیشتیمانی ب باوەریا مە ئەو پەرلەمان د خزمەتا وێ پرسێ دا نابیت و بشێت یا سەرکەفتی بیت.

ئەڤرۆ نیوز،زنار تۆڤی:
ل رۆژا چارشەمبی و ل دەمژمێر 2:30 خۆلەک ئاگر بەربوو ترۆمبێلەکا تایبەت ل چەپێن زرێزە یا ب سەر ب ناحیا باتیفا ڤە و ترۆمبێل ب تەمامی هاتیە سوتن.
میلازم مەسعود محەمەد بەرپرسێ بنگەهێ هاتنوچوونا باتیفا بۆ ئەڤرۆ نیوز راگەهاند:ل دەمژمێر 2:30 خۆلەک ژ ئەگەرێ شۆتەکێ کارەبێ ئاگر بەر دبیتە ترۆمبێلەکا تایبەت یا رەنگ سپی ل چەپێن زرێزە و ترۆمبێل ب تەمامی هاتیە سوتن و گۆت ژی:چار کەس د وێ ترۆمبێلێ دابوون،لێ شیان خوە ژێ قورتال بکەن و چ زیانێن گیانی نەگەهشتینە وان چار کەسان و بتنێ زیانێن ماددی گەهشتیە وان.

ئه‌ڤرۆ نيوز:

ب هه‌لكه‌فتا یوبیلا زیڤی وده‌ربازبونا 25سالا ل سه‌ر دامه‌زراندنا ته‌له‌فزیونا دهوك ئه‌ڤرو سپێدێ‌ 33-5-2017 فه‌رهاد ئه‌مین ئه‌تروشی پارێزگه‌رێ‌ دهوكێ‌ سه‌را باره‌گایێ‌ تی ڤی دهوك دا ژلایێ‌ به‌رێزان مه‌حفوز مایی به‌رپرسێ‌ ده‌زگایێ‌ خانی وعدنان یوسف رێڤه‌به‌رێ‌ تی ڤی دهوك وكارمه‌ندێن وێ‌ پێشوازی لێ‌ هاته‌ كرن.
پارێزگه‌رێ‌ دهوكێ‌ دپه‌یڤه‌كێدا رولێ‌ بلند یێ‌ تی ڤی دهوك باش سه‌نگاند وخواست كو ل ئاینده‌ی پتر نوویا تی دشاشا وێ‌ دا بهێته‌ دیتن وگوت كه‌نالێ‌ دهوك یێ‌ سه‌ركه‌فتی بو ب گه‌هاندنا په‌یاما خو ودێ‌ هه‌ر مینیت یێ‌ سه‌ركه‌فتی سه‌ره‌رایی هه‌بونا كێشێن ته‌كنیكی ودارایی و پیروزباهی ل رێڤه‌به‌ر وهه‌موو كارمه‌ندێن ته‌له‌فزیونا دهوك كر وهیڤیا سه‌ركه‌فتن وپێشكه‌فتنێ‌ بو خواست وپشته‌ڤانیا پارێزگه‌هێ‌ نیشان دا بو هه‌ر هاریكاریه‌كێ‌.
هه‌ژی گوتنێ‌ یه‌ ته‌له‌فزیونا دهوك ل رێكه‌فتی 3-5-1992هاتیه‌ دامه‌زراندن وهه‌تا نوكه‌ یا به‌رده‌وامه‌ ل سه‌ر گه‌هاندنا په‌یاما خو.

ئامێدیێ، مەحمود نهێلی:
سامی ئوشانا قایمقامێ قەزا ئامێدیێ ب وەکالەت بۆ ئەڤرۆ نیوز دیارکر کو نیڤرۆیا ئەڤرۆ فروکەیێن سوپایێ تورکیا دەڤەرا نێروەو و رێکان توپبارانکریە و د ئەجامێ دا شەهید و بریندار هەنە و گۆت؛ ژ بەر کو نوک وەرزێ بهارێ یە و وەلاتی قەستا گوندێن خوە دکەن بو مەرەما چاندنێ هندەک هاۆلاتێن وان گوندان کو ئاکنجیێن ناحیا شێلادزێ نە کەفتینە بەر بوردمانێ و ئێک شەهید بوویە و كه‌سه‌ك دی بریندار بووینە .
و دیارکر ژ بەرکو دەڤەر یا دووری سەنتەرێ ناحیا شێلادزی بوویە تا نوکە بریندار ب رێڤەبەنە بۆ نەخوشخانەیێ.

ئه‌ڤرۆ نيوز:

ل گۆری زانیاریێن ئێن ئاڕ تی، ئێکەتی رازی بوویە ب گوهارتنا سەرۆکێ پەرلەمانی و بریارە د کۆمبوونا داهاتی یا دگەل گۆڕان دا، ب فەرمی پێشنیارا گوهارتنا یوسف محەمەد ب کەسەکێ دی ژ گۆڕان، بێختە هەمبەر وێ تەڤگەرێ.

 ژێدەرەکی ل ئەنجومەنێ سەرکردایەتیا ئێکەتی بۆ ئێن ئاڕ تی راگەهاند، د دیماهیک کۆمبوونا ئەنجومەنێ سەرکردایەتیا ئێکەتی دا بەحسێ کاراکرنا پەرلەمانی هاتیە کرن، ب ئاوایەکێ کو سەرۆکێ پەرلەمانی بدەنە گۆڕان، بەلێ یوسف محەمەد بهێتە گوهارتن.

وی ژێدەری گۆت ژی، کۆسرەت رەسول عەلی، جێگرێ ئێکەمێ سکرتێرێ گشتیێ ئێکەتی و مەلا بەختیار، بەرپرسێ دەستەیا کارگێریا مەکتەبا سیاسیا ئێکەتی بوان گۆتیە “بلا ب ئاشکرا دگەل وە باخڤین، دڤێ روەشێ دا دەستێن مە هاتنە گرێدان و پرانیا پۆستان ژی لجەم پارتینە”.

هەروەسا گۆتن ژی، د هەموو کۆمبوون و هەولێن خوە دا دگەل پارتی دا گەهشتنە وێ ئێکێ کو پەرلەمان بێتە کاراکرن و سەرۆکێ پەرلەمانی ژی بدەنە گۆڕان، ب وی مەرجی کو یوسف محەمەد بێتە گوهارتن ب کەسەکێ دی یێ گۆڕان.

هەروەسا گۆتنە ژی “پشتی چەندین کۆمبوون و گۆتۆبێژان هەتا ئەو شیانە قەناعەتێ ب بارزانی بکەن کو پەرلەمان بۆ گۆڕان بیت و ب وێ پێشنیارێ ژی رازی بوویە”.

هەمان ژێدەرێ ئەنجومەنێ سەرکردایەتیا ئێکەتی گۆت ژی “بریارە د کۆمبوونا داهاتی یا ناڤبەرا ئێکەتی و گۆڕان دا وێ پێشنیارێ بێخنە هەمبەر تەڤگەرا گۆڕان، لێ هێشتا دیارنینە گۆڕان دێ ب وێ پێشنیارێ رازی بیت یان نە”.

لگۆری زانیاریێن ئێن ئاڕ تی ئەگەر لگۆری وێ پێشنیارا ئێکەتی بیت ل پشتی رێکەفتنا ئێکەتی و گۆڕان دێ ب تەمەنترین پەرلەمانتار سەرپەرشتیا ئیدارەیا ئیکەم کۆمبوونا کاراکرنا پەرلەمانێ کوردستانێ بکەت.

ئەڤ ئێک ژی د دەمەکێ دایە کو ل رێکەفتی ٢٩ێ هەیڤا نیسانا ٢٠١٧ێ، ئەنجومەنێ سەرکردایەتیا ئێکەتی کۆمبوو و پشتی کۆمبوونێ ژی سەعدی پیرە، ئەندامێ مەکتەبا سیاسیا ئێکەتی د کۆنگرەیەکا رۆژنامەڤانی دا راگەهاند، ئەندامێن سەرکردایەتیا ئێکەتی هەڤدەنگ بوونە لسەر کاراکرنا پەرلەمانی.

ب ھەلکەفتا یوبیلا زیڤی، دەربازبوونا 25 سالان ل سەر دامەزراندنا تلەفزیونا دھۆک، ب ناڤێ ستافێ رۆژناما ئەڤرۆ و مالپه‌رێ ئه‌ڤرۆ نيوز پیرۆزباھیێن خوە ئاراستەی رێڤەبەر و کارمەند و ھەموو ستافێ تلەفزیونێ دکەین، ھیڤییا پێشڤەچوون و سەرکەفتنێن بەردەوام بۆ دخوازین.