NO IORG
نووترين نووچه

ئەڤرۆ نيوز:
بەرپرسێ لقێ ئێکێ پارتی دیموکراتی کوردستان ل گەل دکاندارێن د روودانا ئاگربەربوونا بازاڕێ چەلێ دا دکانێن وان سۆتین کۆمبوو و دیار کر، یا د شیانێن وان دا بیت دێ ھاریکاریا دکانداران کەن و داخوازی و گازندێن وان گەھیننە دام و دەزگەھێن پەیوەندیدار.
بەرێز سەربەست تروانشی، بەرپرسێ لقێ ئێکێ پارتی دوھی 12/4/2017 پێشوازی ل دکاندارێن دکانێن وان د روودانا ئاگربەربوونا بازاڕێ چەلێ دا سۆتین کر و د کۆمبوونەکی دا ل گەل وان، بەرپرسێ لقێ ئێک ھەڤخەمیا لقێ ئێکێ پارتی گەھاندە دکاندارێن ناڤبری گۆت: “روودانەکا نەخوش بوو روودای و زیانێن مەزنێن ماددی و گیانی گەھشتنە وەلاتیێن مە ل بازاری و کار و کەسابەتا وان راوەستیا”.
پاشی بەرپرسێ لقێ ئێک گۆھداریا گلە و گازندێن دکاندارێن زیان گەھشتیێ کر و سۆز دا ل گۆرەیی شیانان ل گەل وان ھاریکاربیت و داخوازیێن وان بگەھینیتە دام و دەزگەھێن پەیوەندیدار.
ھەر دوھی و ب ھەلکەفتا بۆرینا 38 سالان ل سەر دامەزراندنا بزاڤا دیموکراتی یا ئاشوری و ب مەرەما گەھاندنا پیرۆزباھیان، شاندەکێ لقێ ئێک ب سەرۆکاتیا سەربەست تروانشی، بەرپرسێ لقێ سەرەدانا بارەگایێ بزاڤا ئاشوری ل دھۆکێ کر، دیسا د روونشتنەکێ دا و ب ھەلکەفتا سالرۆژا دامەزراندنا وان (سەربەست تروانشی) پیرۆزباھیێن لقێ ئێکێ پارتی گەھاندنە بزاڤا ناڤبری و داخوازا بەردەوام بوون و سەرکەفتنێ د کاروانێ وانێ خزمەتکرنێ دا خواست.
ھەروەسا ھەردو لایان تەکەزی ل سەر خورتکرنا پەیوەندیێن دو قولی د ناڤبەرا لقێ ئێک و بزاڤا دیموکراتی یا ئاشوری دا کرن.

ئه‌ڤرۆ نيوز:
ل دەستپێکا ھاتنا وەرزێ بھارێ ھەتا دووماھیا وێ، ژ ئەگەرێ بارینەکا زۆر یا بارانان و پەیدابوونا شەھەکا باش د ناڤ ئاخێ دا، رێژەکا بەرچاڤ و باش یا گیایێ بھارێ ل دەڤەرێن چیایی یێن نێروە و رێکان و دۆسکی ژووریا سەر ب ناحیا شێلادزێ ڤە ژلایێ خەلکێ دەڤەرێ ڤە دھێتە پەیداکرن و سالانە مفایەکێ باش بۆ خوارنا خوە و فروتنێ دیتینە.
نەعمان عەبدولا ئێک ژ ئاکنجیێن ناحیا شێلادزێ د ژیێ 50 سالیێ دایە بۆ رۆژناما ئەڤرۆ گۆت: سالێن بۆری ژین و ژیارا مە گوندێن ڤێ دەڤەرێ ل سەر بەرھەمێ بھارێ یە، چونکی دەڤەرەکا ناڤ چیایی یە و مفایەکێ باش مە ژڤان دەڤاران دیتیە و ل گەل ھاتنا وەرزێ بھارێ مە ھەموو جۆرێن گیای پەیدا دکرن و پاش ل بازارێ شێلادزێ دھاتنە فرۆتن، لێ ئەڤ سالە بازارێ شێلادزێ وەکو سالێن بۆری گەرم نەبوویە، ژ ئەگەرێ ھەبوونا پەکەکێ ل دەڤەرا نێروە و رێکان و دۆسکی ژووریا.
ناڤبری گۆت ژی: خەلکێ ناحیا شێلادزێ وەکو سالێن بۆری نەشێن بچنە گوندێن خوە و چیایێن دەڤەرێ بۆ ئینانا گیایێ بھارێ، ژبەرکو پەکەکە بوویە رێگر ل ڤان دەڤەران و ئالۆزیا بۆ خەلکێ ڤێ دەڤەرێ دروست دکەن و رۆژانە ژلایێ حوکمەتا تورکیا ڤە ئەڤ دەڤەرە ب تۆپ و فرۆکان دھێنە بۆمبەبارانکرن ژبەر ھەبوونا پەکەکێ ل ڤان دەڤەران.
ئەڤ چەندە ژی بوویە ئەگەرێ ترس و لەرزەکا مەزن د دلێ خەلکێ دەڤەرێ دا. لەوما ئەڤ سالە ژی وەکو سالێن بۆری بازارێ شێلادزێ پڕ نەبوویە ژ گیایێ بھارێ مینا کڤارک و لویش و جۆرێن و سترک و کەنگر و .. ھتد.

ئەڤرۆ نيوز:
جێگرێ سەرۆک کۆمارێ بەرێ یێ عیراقێ و کەساتیا دخوازکری ژ ئالیێ دادگەھا بلندا عیراقێ ڤە ب توومەتا ھاریکاری و ئەنجامدانا چالاکیێن تیرۆری ل عیراقێ، تارق ھاشمی راگەھاند ناڤێ وی د لیستا ئەنترپۆلا نێڤدەولی دا ھاتە ژێبرن.
تارق ھاشمی گۆت: پشتی ئەنترپۆلا نێڤدەولی ھەموو بەلگەێن دژی وی ھەلسەنگاندین و ئەو گونھباریێن بۆ ھاتیە دارشتن بەرۆڤاژی وێ دەرکەفت و ئەو چەندە بۆ بەغدا و وەزارەتا ناڤخوەیا عیراقێ ژی ھاتیە روھنکرن.
ھەروەسا ھاشمی دیارکر، بڕیارا گرتنا بادەکا من و بێ گونەھیا من ھاتە خوەیاکرن، ئەو بڕیار بۆ ھەموو وەلاتێن ئەندام ھاتیە ھنارتن ژوانا ژی عیراقێ.
تارق ھاشمی د ھەڤدیتنەکا تایبەت بۆ (ئەلعەربی ئەلجەدید) کو ل وەلاتێ بەریتانیا دەردکەڤیت گۆت: سەفقەکا سیاسی ھەیە کو ھەموو توومەت و بڕیارێن دادگەھی یێن سەر دەمێ نوری مالکی ھەمبەری ھژمارەکا سیاسەتمداران بھێنە ھەلوەشاندن، ھندەک دەستپێخەریێن ھیڤیدار ھەنە کو دلسۆزانە بن راستگویا ئارمانجان تێدا ھەبیت بۆ ھندێ عیراق پێ بھێتە قورتال کرن، بزاڤەکا چاکسازی یا رەھا بەری دەلیڤەکا زێرین و دووماھیی ژدەست مە بچیت.
جێگرێ سەرۆک کۆمارێ بەرێ ھەروەسا ئاشکراکر، وی ھەڤدیتنەکا تایبەت ل گەل فەرماندێ فەرماندەیا پازدارێن ئیرانی قاسم سولیمانی ئەنجامدایە ددەمێ سەرەدانا وی بۆ تەھران ل ئادارا 2017، دوێ ھەڤدیتنێ دا ب ئامادەبوونا بەرپرسێ بادەکا فەرماندەکێ لەشکرێ شۆرەشا ئیرانی وی دەمی بناڤێ ئەحمەد فەروزندە.
تارق ھاشمی ھەروەسا دیارکر، دوێ سەرەدانێ دا بشێوەکێ تایبەت مە بەحسێ دەستھەلاتا رەھایا ئیرانێ ل سەر عیراقێ کر، و ئەگەرێ سەرەدانا من بۆ ئیرانێ ھات پشتی بالیۆزێ یرانێ ل عیراقێ حسێن قومی نەشیایی بەرسڤا من بدەت ل دۆر ھندەک پرسا، سەبارەت بادەکا روودانێن توندوتیژیێ یێن نەپەنی کو جھێ گۆمانا من بوو وەلاتێ ئیرانێ دەست تێدا ھەبیت، وەکی بادەکا چالاکیێن قاعیدە یا تیروری و لەشکرێ مەھدی.
ل گۆڕ گۆتنا تارق ھاشمی قاسم سولیمانی بۆ دووپاتکر کو وەلاتێ ئیرانێ دەست ل گەل ھەندەک ئالیێن سیاسی و ھەماھنگیەکا تەمام ھەیە بۆ بجھئینانا بەرژوەندیێن ئێمناھیا نەتەوەیی یا ئیرانێ ھەیە.

ئەڤرۆ نیوز:

حەشدا شەعبی پشکەک ژ ھێزێن خوە ل مووسل ڤەکێشاینە و چاڤدێرەکێ ئەمنی ژی دبێژیت، ڤەکێشانا ھێزێن حەشدا شەعبی پەیوەندی ب ئاریشەیێن نافمالا شیعی ڤە ھەنە و ب ئەگەرێ ئالۆزیا ل دەڤەرێن بەغدا و شیعە مەزھەب پەیدابووی حەشدا شەعبی پشکەک ژ ھێزێن خوە ل مووسل ڤەکێشاینە، سەرۆکێ لیژنا قانوونی ژی لپەرلەمانێ عێراقێ دیارکر، چەندین سکالا لدۆر تاوانێن حەشدا شەعبی ل مووسل گەھشتینە بەغدا.

شوان محەمەد تەھا، چاڤدێری ئەمنی و سەرۆکی بەرێ یێ لیژنا ئاسایش و بەڕەڤانیێ لپەرلەمانێ عێراقێ بۆ رۆژناما ئەڤرۆ گۆت”دچوارچوڤێ پشکداریا ھێزێن حەشدا شەعبی د ئۆپەڕاسیۆنا رزگارکرنا باژێڕێ مووسلدا، ڤێجارێ حەشدا شەعبی زێدەتر ب بەرپرسیاری ڤە سەرەدەری دگەل رەوشا شەڕی دکر و ئەزموونا بەرێ ل کۆمکوژیا وەلاتیێن سونە مەزھەب دۆبارە نەکر، ئەگەر ل ھندەک دەڤەرێن مووسل چەکدارێن حەشدا شەعبی تاوانژی ئەنجامدابن، ئەڤە خوە پاراستیە ل چافکێن کامیرە و بەلافبوونا ناڤ و دەنگێ وان، وەکی ل ھندەک دەڤەرێن عێراقێ تاوان ئەنجامدای و بووینە ئەگەرێ ڤێ چەندێ عەرەبێن سونە و جڤاکا نێڤدەولەتی دلگرانببن، ژبەرکو تەپەسەرکرنا وەلاتیێن سونە مەزھەب ناڤ و دەنگەکێ خراپ ئخێستیە سەر ھێزێن حەشدا شەعبی.

شوان محەمەد تەھا دیارکر” پشکەک ژ ھێزێن حەشدا شەعبی ئەڤێن پشکداری شەڕێ گرتنا مووسلدا دکەن، ھاتینە ڤەکێشان بۆ دەڤەرێن وان، ئەڤەژی بۆ ئەگەرێ تێکچوونا نافمالیا شیعی ڤەدگەڕیت، کو بۆیە ئەگەرێ ئالۆزبوونا رەوشا ھژمارەک دەڤەرێن عێراقێ و کۆتلەیێن شیعە گەفان ل ئێکدوو دکەن، لەوڕا ب ئەگەرێ ئەڤان ئالۆزیان پشکەک ژ حەشدا شەعبی ھاتیە ڤەگەڕاندن و مووسل بجە ھێلایە.

ژلایێ خۆڤەژی موحسین سەعدوون، سەرۆکێ لیژنا قانوونی لپەرلەمانێ عێراقێ بۆ رۆژناما ئەڤرۆ دیارکر” ھێزێن حەشدا شەعبی ئەڤێن پشکداری د شەڕێ گرتنا مووسلدا کری چەند تاوانەک ئەنجامداینە و چەندین سکالا لدژی ئەڤان ھێزێن حەشدا شەعبی گەھشتینە بەغدا، لەوڕا پشتی رزگارکرنا مووسڵ دڤێت ئەف ھێز ل دەڤەرێ بھێنە ڤەکێشان، ژبەرکو دێ ببنە ئەگەرێ شەڕێ مەزھەبی و ئالۆزی دێ کەڤیتە دەڤەرێ، ئەمژی وەکی کورد دگەل ڤێ چەندێ ینە حەشدا شەعبی دەمەکێ زوو پشتی گرتنا مووسل بھێتە ڤەکێشان ژ مووسل، چونکی ئیدارە و خەلکێ پارێزگەھێ رازینینە بمانا ئەڤێ ھێزێ و ئەنجوومەنێ پارێزگەھێ ژی دێ ب کارێ خوە رابیت بۆ ڤەکێشانا حەشدا شەعبی ل سنورێ پارێزگەھا نەینەوا.

ئه‌ڤرۆ نيوز:

ئه‌ڤرو ئێڤاری 12-4-20177ل فروكخانا فه‌رمانده‌یا دهوكێ‌ فه‌رهاد ئه‌مین ئه‌تروشی پارێزگه‌رێ‌ دهوكێ‌ پێشوازیا ابراهیم جعفه‌ری وه‌زیرێ‌ ده‌رڤه‌ یێ‌ عیراقا فیدرال و فواد حسێن سه‌روكێ‌ دیوانا سه‌روكاتیا هه‌رێما كوردستانێ‌ وشاندێ‌ دگه‌لدا كر.

پاش سه‌ره‌دانا زانكویا ئه‌مریكی ل دهوكێ‌ كرن و ل هولا زانكویا ئه‌مریكی وه‌زیرێ‌ ده‌رڤه‌ یێ‌ عیراقێ‌ وسه‌روكێ‌ دیوانا سه‌روكاتیا هه‌رێما كوردستانێ‌ سمیناره‌كا هه‌ڤپشك بوقوتابیێن زانكویێ‌ وبه‌رپرسێن ئیداری ل پارێزگه‌هێ‌ پێشكێشكرن .
لبه‌راهیێ‌ په‌یڤا بخێر هاتنێ‌ ژلایێ‌ سه‌روكێ‌ زانكویا ئه‌مریكی هاته‌ خاندن وبخێر هاتنا مێهڤانان كر كو ل دوڤ داخازیا زانكویا وان هاتین بو پێشكێشكرنا سمینارێ‌.
هه‌ر بڤێ‌ هه‌لكه‌فتێ‌ پارێزگه‌رێ‌ دهوكێ‌ بخێر هاتنا وه‌زیرێ‌ ده‌رڤه‌ یێ‌ عیراقا فیدرال وسه‌روكێ‌ دیوانا سه‌روكاتیا هه‌رێما كوردستانێ‌ وشاندێ‌ پێرا كر وچه‌ند رونكرن دانه‌ سه‌ر ره‌وشا پارێزگه‌ها دهوكێ‌ وچه‌ند تێبینی ئاراسته‌ی وه‌زیرێ‌ ده‌رڤه‌ یێ‌ عیراقێ‌ كرن بو وێ‌ یه‌كێ‌ ره‌وشا ئاواره‌یان وپارێزگه‌ها دهوكێ‌ پتر لبه‌ر چاڤ بهێته‌ وه‌رگرتن وگرنگی پێ‌ بهێته‌ دان.
ئه‌وتێبینی ئه‌ڤه‌بون هاتنا ژماره‌كا زور یا ئاواره‌یان كوپترن ژ7000هزار كه‌سا وكارتێكرنا وان ل سه‌ر هه‌موو سه‌كته‌ران وئه‌و هاریكاریێن زور كێم یێن عیراقێ‌ بو ئاواره‌یان كرین ، ئازارێن كوردێن ئێزدی ل سه‌ر ده‌ستێن داعش دیتین ونه‌پوته‌دانا حكومه‌تا عیراقێ‌ ب بابه‌تی –برینا بودجا هه‌رێمێ‌ وكارتێكرنا وێ‌ ل سه‌ر ژیانا وه‌لاتییان – كێم هاریكاریكرنا پێشمه‌رگه‌ی هه‌رچه‌ند به‌ره‌ڤانیێ‌ ژئاخا عیراقێ‌ وكوردستانێ‌ دكه‌ت ل دژی تیرورستێن داعش .
پاش وه‌زیرێ‌ ده‌رڤه‌ یێ‌ عیراقا فیدرال سمینارا خو ل دور عیراقێ‌ نوو وعیراقا به‌ری 20033ێ‌ پێشكێشكر وگوت بومن شه‌رفه‌كا مه‌زنه‌ كو ل هه‌موو مه‌حافلێن ده‌ولی ئه‌م به‌حسێ‌ ئازار ونه‌خوشیێن ملله‌تێ‌ كورد وهه‌موو پێك هاتێن دی ل عیراقێ‌ دكه‌ین وئه‌و نه‌هامه‌ت وزورداریا ل سه‌ر ده‌ستێ‌ رژێما به‌عس ب سه‌ردا هاتیه‌ سه‌پاندن وی ده‌می ده‌وله‌تا عیراقێ‌ ئێك كه‌سی برێڤه‌دبر وهه‌موو تشته‌ك ل بن حكومرانیا دكتاتوریه‌تێ‌ دهاته‌ مه‌شاندن …لێ‌ پشتی 2003ێ‌ وژناڤچونا رژێما به‌عس عیراقه‌كا دیموكراتی فیدرالی فره‌ حزبی فره‌ هزری وئازادیا روژنامه‌ڤانی هاته‌ ئاڤاكرن وهه‌موو پێك هاتان پشكداری تێدا كریه‌ وهه‌موو ب مافێن خو شادبوینه‌ هه‌رچه‌نده‌ كێماسی ژی هه‌نه‌ لێ‌ عیراقێ‌ نوو یا جیاوازه‌ ژیا به‌ری 2003ێ‌ .
وه‌زیرێ‌ ده‌رڤه‌ یێ‌ عیراقێ‌ ئاماژه‌ دا وێ‌ چه‌ندێ‌ كو ده‌وله‌تا نوو یا عیراقێ‌ فیدرالیه‌ ئانكو موكمكرنا باوه‌ریێ‌ یه‌ دناڤبه‌را خه‌لكێ‌ عیراقێ‌ دا وعیراقا نوو سه‌روه‌ری ویاسایێ‌ وگرنتیا وه‌لاتیبونێ‌ دناڤ ئاخا وه‌لاتی دا به‌رجه‌سته‌ دكه‌ت .
براهیم جعفری ئه‌و یه‌ك ژی دیاركر كو عیراقا نوو هزرا تیرورێ‌ ئیدانه‌ دكه‌ت وهه‌ولده‌ین وان هه‌موو هزار ژناڤ ببه‌ین.
هه‌روه‌سا ئاماژه‌ دا ئاسته‌نگێن هاتینه‌ پێشیا عیراقێ‌ وه‌كو شه‌رێ‌ تیرورێ‌ وگه‌نده‌لیا ئیداری وهتد …وهیڤی خاستن كو په‌یوه‌ندی دناڤبه‌را هه‌موو لایه‌نان دا خوش ببن وئاشته‌وایا نیشتمانی بهێته‌ كرن وجڤاكێ‌ ده‌وله‌تی ژی هاریكاربیت پشتی شه‌رێ‌ داعش ب دوماهی دهێت وهه‌موو ب هه‌ڤرا عیراقێ‌ ئاڤاكه‌ن.
سه‌روكێ‌ دیوانا سه‌روكاتیا هه‌رێما كوردستانێ‌ ژی دیاركر دعیراقا نوو دا ئاسته‌نگی هه‌نه‌ وهێشتا ئه‌م نه‌گه‌هشتینه‌ ئاستێ‌ ئاڤاكرنا دیموكراتیا راسته‌قینه‌ و پروژێ‌ وه‌لاتیبونێ‌ وده‌وله‌تبونێ‌ .
هه‌روه‌سا گوت مه‌ كوردان هزر دكر ب ئاڤاكرنا فیدرالیێ‌ كورد دێ‌ ب هه‌موو مافێن خو شاد بن هه‌رچه‌نده‌ هنده‌ك ده‌ستكه‌فتی هه‌نه‌ لێ‌ كێماسی ژی زور هه‌نه‌ وفیدرالی بدورستی نه‌هاتیه‌ په‌یره‌وكرن.
فواد حسێن سه‌روكێ‌ دیوانا سه‌روكاتیا هه‌رێما كوردستانێ‌ ته‌كه‌زكر كو هه‌كه‌ سازیێن راسته‌قینه‌ یێن فیدرالی ل عیراقێ‌ هه‌بان ئه‌ڤرو ئه‌ڤ قه‌یرانه‌ ژی نه‌ دبون.
پاش چه‌ندین پسیار ژلایێ‌ قوتابییان وبه‌رهه‌ڤبویان هاتنه‌ ئاراسته‌كرن وبه‌رسڤ ل سه‌ر هاتنه‌ دان.

ئه‌ڤرۆ نيوز:

ئيبراهيم جه‌عفه‌رى وه‌زيرێ ده‌رڤه‌ يێ عيراقێ چه‌نده‌كێ به‌رى نوكه‌ ب سه‌ره‌دانه‌كا فه‌رمى گه‌هشته‌ باژێرێ هه‌ولێر و بڕياره‌ ل گه‌ل به‌رپرسێن هه‌رێمێ كۆم ببيت.

سه‌ره‌دانا ئيبراهيم جه‌عفه‌رى بۆ هه‌رێما كوردستانێ پشتى وێ چه‌ندێ دهێت كو ل حه‌فتيا بۆرى شانده‌كێ هه‌ڤپشكێ پارتى و ئێكه‌تى سه‌ره‌دانا به‌غدا كربوو و ل گه‌ل سه‌رۆكاتيان و لايه‌نێن عيراقى ل سه‌ر پرسا ريفراندۆمێ و بلندكرنا ئالايێ كوردستانێ ل كه‌ركووك كۆمبوون.

ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ ل گه‌ل وه‌زيرێ ده‌وله‌تا بريتانيا بۆ كاروبارێن رۆژهه‌لاتا ناڤه‌راست و ئه‌فريقيا كۆمبوو.

رۆژا چارشه‌مبى 12ى نيسانا 2017ێ نێچيرڤان بارزانى سه‌رۆكێ حوكمه‌تا هه‌رێما كوردستانێ ب ئاماده‌بوونا جێگرێ خوه‌ قۆباد ته‌له‌بانى و ژماره‌كا وه‌زيرێن حوكمه‌تێ پێشوازى ل مارتن ئێلوود، وه‌زيرێ ده‌وله‌تا بريتانيا بۆ كاروبارێن رۆژهه‌لاتا ناڤه‌راست و ئه‌فريقيا و شاندێ ل گه‌ل دا كر.

فه‌لاح مسته‌فا به‌رپرسێ فه‌رمانگه‌ها په‌يوه‌نديێن ژ ده‌رڤه‌ ل حوكمه‌تا هه‌رێما كوردستانێ ل تويته‌رێ خوه‌ راگه‌هاند: د كۆمبوونێ دا به‌ر ب پێشڤه‌چوونا سياسى و سه‌قامگێريا پشتى داعش گه‌نگه‌شه‌كر.

ژ لايه‌كێ دى ڤه‌ مالپه‌رێ فه‌رميێ حوكمه‌تا هه‌رێما كوردستانێ راگه‌هاند كو شاندێ مێڤان به‌حسا ره‌وشا مووسل پاش داعش كر و خۆيا كر كو پێدڤيه‌ هه‌ماهه‌نگيا پێدڤى د ناڤبه‌را هه‌موو پێكهاتێن هه‌رێما كوردستانێ و عيراقێ و كۆمه‌لگه‌ها نێڤده‌وله‌تى دا هه‌بيت ب مه‌ره‌ما پاراستنا ئاراميا ده‌ڤه‌رێ و ئاڤه‌ندانكرنێ.

ژ لايێ خوه‌ ڤه‌ نێچيرڤان بارزانى سه‌رۆك حوكمه‌تا هه‌رێما كوردستانێ سۆپاس سه‌ره‌دانا شاندێ مێڤان كر بۆ پشته‌ڤانى و هاريكاريا هه‌رێمێ د وارێن مرۆڤى و له‌شكرى دا و دا زانين كو ل گه‌ل حوكمه‌تا عيراقێ ژبلى هه‌ماهه‌نگيا له‌شكرى د چو واره‌كێ دى دا هه‌ماهه‌نگى نه‌بوويه‌.

بارزانى دا زانين ژى كو بۆ ناڤخۆيا كوردستانێ گه‌نگه‌شه‌يه‌كا باش هه‌يه‌ دا كو ب ديالوكێ كێشێن خوه‌ چاره‌ بكه‌ن و دانوستاندنێن به‌رفره‌هـ ژى ل سه‌ر ريفراندۆما هه‌رێما كوردستانێ هه‌نه‌ دا كو خه‌لك ب خوه‌ داهاتيێ خوه‌ ديار بكه‌ت.

ئه‌ڤرۆ نيوز:

مه‌حمه‌د ئه‌حمه‌دى نه‌ژاد، سه‌رۆك كۆمارێ به‌رێ يێ ئيرانێ خوه‌ بۆ سه‌رۆك كۆماريا وه‌لاتێ خوه‌ كانديد كر.

د رۆژا دويێ يا ناڤ نڤيسينێ دا بۆ پۆستێ سه‌رۆك كۆماريێ ل ئيرانێ، مه‌حمود ئه‌حمه‌دى نه‌ژاد كو ژ سالا 2005ێ هه‌تا 2013ێ سه‌رۆك كۆمارێ ئيرانێ بوويه‌، خوه‌ بۆ خولا 12ێ يا سه‌رۆك كۆماريا ئيرانێ كانديد كر.

پرۆسا ناڤ نڤيسينێ بۆ به‌ربژێراتيا سه‌رۆك كۆماريا ئيرانێ ل 11ى نيسانا 2017ێ ده‌سپێكريه‌ و هه‌تا نوكه‌ زێده‌ترى 100 كه‌سان ناڤێن خوه‌ نڤيسينه‌ و بڕياره‌ پێنج رۆژان يا به‌رده‌وام بيت. ئه‌ڤه‌ د ده‌مه‌كى دا كو هێشتا چو به‌ربژێرێن ب هێز ناڤێن خوه‌ تۆمار نه‌كرينه‌ ژ وان ژى حه‌سه‌ن رۆحانى يێ سه‌رۆك كۆمار و ئيبراهيم ره‌ئيسى سه‌رپه‌رشتێ مه‌زارگه‌هێ ئيمامێ هه‌شتێ يێ شيعان و حه‌ميد به‌قايى به‌ربژێرێ ته‌ڤگه‌را مه‌حمود ئه‌حمه‌دى نه‌ژاد.

بڕياره‌ هه‌لبژارتنێن سه‌رۆك كۆمارێ ئيرانێ ل 19ى گۆلانا 2017ێ بهێنه‌ ئه‌نجام دان.

ئه‌ڤرۆ نيوز:

د رێ و ره‌سمه‌كى دا ل وه‌زاره‌تا خواندنا بلند و ڤه‌كولينێن زانستى يا حوكمه‌تا هه‌رێما كوردستانێ رێڤه‌به‌رێ گشتى يێ پرۆژێن ئه‌نده‌زيارى ل وه‌زاره‌تا خواندنا بلند و ڤه‌كولينێن زانستى هاته‌ گوهۆڕين.

دوهى رۆژا سێشه‌مبى رێكه‌فتى 11ى نيسانا 2017ێ ل هه‌ولێر رێ و ره‌سمێن گوهۆڕينا رێڤه‌به‌رێ گشتى يێ يێ پرۆژێن ئه‌نده‌زيارى ل وه‌زاره‌تا خواندنا بلند و ڤه‌كولينێن زانستى هاتنه‌ گێران و تێدا دكتور داود ئه‌ترووشى وه‌كو رێڤه‌به‌رێ گشتى ل جهێ دكتور دلشاد كاكه‌سۆر جاف هاته‌ دانان.

پێشتر دكتور داود ئه‌ترووشى وه‌كو جێگرێ سه‌رۆكێ زانكۆيا دهۆك و وه‌كو مامۆستا كوليژا ئه‌نده‌زيارى ل زانكۆيا دهۆك كار كريه‌.

17862588_1474532779254878_5477765094971342192_n

website security
WP Facebook Auto Publish Powered By : XYZScripts.com