ئەڤرۆ نیوز:
بڕیارە نێزیک ئۆپەڕاسیۆنا کۆنتڕۆلکرنا قەزا حەویجە یا سەر ب پارێزگەھا کەرکووکێ و دەڤەرێن بن دەستێ داعش ماینە بھێتە دەستپێکرن ئەڤژی گورەی داخویانیێن فەرماندێن لەشکرێ عیراقێ، وەزارەتا پێشمەرگەی ژی دبێژیت پێشمەرگە ناچیتە ناف سەنتەرێ حەویجەدا و تنێ دێ دەوروبەرێ کەرکووکێ بپارێزن، گورەی زانیاریێن رۆژناما ئەڤرۆ 2 ھزار چەکدارێن داعش ل حەویجەی خوە عاسێ کریە.
ئەحمەد عەسکەری، ئەندامێ جڤاتا پارێزگەھا کەرکووکێ بۆ رۆژناما ئەڤرۆ گۆت” ھەتا نوکە بۆمە ناھیتە پشتڕاستکرن دێ ئۆپەڕاسیۆنا گرتنا قەزا حەویجە کەنگی بھێتە دەستپێکرن، ھەردبێژن دەمەکێ نێزیک، چونکی عێراقێ ب مەبەست ئۆپەڕاسیۆنا گرتنا حەویجە گیرۆکریە و ئێخستیە پشتی شەڕێ مووسل، ئەڤەژی واتایا ڤێ چەندێ ددەت کو حوکمەتا عیراقێ مەرەمێن سیاسیێن خوە ھەنە ل گیرۆکرنا ھێرشا حەویجەدا، گرتنا حەویجە زۆر ساناھیترە ل گرتنا مووسل ژبەرکو دەوروبەرێن حەویجە ھەموو ھاتینە دۆرپێچکرن و ھژمارەکا زۆرا ھێزێن پێشمەرگە و عیراقی ل دەڤەرێ ھەنە، ھەروەسا بەردەوام فڕۆکەیێن ھەڤپەیمانان بنگەھێن داعش دکەنە ئامانج لڤی سینوری، گورەی زانیاریێن بەردەستێ مە نێزیکی دو ھزار چەکدارێن تیرۆرستێن داعش ل قەزا حەویجە ماینە و خوە عاسێ کریە، بەلێ پتریا وان داعشێن عیراقینە و خەلکێ دەڤەرێ و پارێزگەھێن دی یێن عیراقێ نە، چونکە بەری نوکە داعشێن بیانی ل حەویجە نەماینە و یان ھاتینە کوشتن یانژی بەرەف دەڤەرێن دیڤە چووینە. عەسکەری گۆتژی” راستە حەویجە دەڤەرەکا بەرفرەھە و تنێ سەنتەرێ قەزا حەویجە بن دەستێ داعش نینە، بەلکۆ دەڤەرێن ژێریا مووسل و قەزا بێجی و ناحیا ریاز و زاب و چەند دەڤەرێن دیژی بن دەستێ گروپا داعش ماینە و بدیتنامە پێشبینی دکەین ئەگەر ئۆپەڕاسیۆن بھێتە دەستپێکرن دێ دەمەکێ زۆرێ کێم ئەو دەڤەر ھێنە رزگارکرن، زیانێن خەلکێ سڤیل ژی دێ زۆر کێمبن ئەڤەژی ئەگەرێ وێ ئەڤە ریکێن دەرچوونێ ھەنە و وەلاتی دشێن خوە رزگاربکەن.
ژلایێ خۆڤەژی جەبار یاوەر ئەمیندارێ گشتیێ وەزارەتا پێشمەرگەی دیارکر” حەویجە راستە دەستپێکێ کەفتیە بن داعش و ھەتا نوکە وەکی خوە مایە، بەلێ ب گرتنا حەویجە دێ مەترسیا گروپا تیرۆرستیا داعش زۆر کێمبیت لسەر کەرکووکێ، ددەمێ دەستپێکرنا ھێرشێ دێ ھەماھەنگی دناڤبەرا سوپایێ عیراقێ و وەزارەتا پێشمەرگەیدا ھەبیت، بەلێ پێشمەرگە ناچیتە ناف سەنتەرێ باژێڕێ حەویجە، بەلکۆ دێ دەوروبەرێن حەویجە ھێتە بجھکرن ھەتا کەرکووک ژی بھێتە پاراستن و پتریا ئەو دەڤەرێن ماینە بن دەستێ داعش دەڤەرێن عەرەب نشینن نەک کوردی.
ھێرشا سەر حەویجە دێ ھێتە دەستپێکرن
نيشاندان