ئه‌ڤرۆ:

سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ بۆچوونا فه‌رمی یا پارتی ل دۆر دستوورێ هه‌رێما كوردستانێ و كۆمسیۆنا بلند یا هه‌لبژارتن و راپرسیان ل هه‌رێمێ و پرسا هه‌لبژارتنان راگه‌هاند.

زانا مه‌لا خالد، سه‌رۆكێ فراكسیۆنا پارتی ل په‌رله‌مانێ كوردستانێ  ل دۆر كۆمبوونا سه‌رۆكایه‌تیا په‌رله‌مانی و سه‌رۆكێن فراكسیۆنان، گۆت” ئه‌ڤه‌ كۆمبوونا دوویێ بوو ل دۆر سێ پرسێن گرنگ ل هه‌رێما كوردستانێ دهێته‌ كرن، ئه‌وژی پرسێن دستوورێ هه‌رێمێ و كۆمسیۆنا بلند یا هه‌لبژارتن و راپرسیان و هه‌لبژارتن ب قانوون و ژڤانێ هه‌لبژارتنان بوون، دانوستاندنێن تیروته‌سه‌ل ل دۆر هه‌رسێ بابه‌تان هاتنه‌ كرن و ئه‌م وه‌كو فراكسیۆنا پارتی ل په‌رله‌مانێ كوردستانێ بۆچوونا پارتی ل دۆر دستوورێ هه‌رێما كوردستانێ به‌رچاڤكر و ب پێدڤیه‌كا حه‌تمی بۆ هه‌رێمێ دزانین و مه‌ به‌رهه‌ڤیا فراكسیۆنا پارتی ژی بۆ هه‌ر ده‌ستپێشخه‌ریه‌كێ ل گه‌ل فراكسیۆنێن دی دناڤ په‌رله‌مانێ كوردستانێ دا دیاركر، بۆ وێ چه‌ندێ بشێین د ده‌مه‌كێ نێزیك دا لژنا نڤیسینا دستوورێ هه‌رێما كوردستانێ ب ده‌سته‌یه‌كا نووڤه‌ بهێته‌ هه‌لبژارتن و تێدا شێوازێ بریاردانێ ل سه‌ر برگه‌ و مادێن نڤیسینا دستووری بهێته‌ دیاركرن، بۆ ڤێ مه‌به‌ستێ ل گه‌ل هه‌موو فراكسیۆنێن دی د هه‌ڤرابین و زه‌مینه‌سازی یا سیاسی بۆ وێ مه‌به‌ستێ بهێته‌ كرن، تاكو بگه‌هیته‌ ئه‌نجامی”.

سه‌باره‌ت كۆمسیۆنا هه‌لبژارتن و راپرسیان و هه‌لبژارتنێن هه‌رێما كوردستانێ، سه‌رۆكێ فراكسیۆنا پارتی ئاشكراكر كو د ده‌مێ بۆری دا ل سه‌ر ئیستیحقاقێن هه‌لبژارتنێن سالا 2013ێ یێن په‌رله‌مانێ كوردستانێ ئه‌و كۆمسیۆن یا هاتیه‌ هه‌لبژارتن، كو ب گۆره‌ی قانوونا په‌رله‌مانێ كوردستانێ ل سالا 2014ێ جڤاتا كۆمسیاران ژ 9 ئه‌ندامان پێكهاتیه‌ و نوونه‌رێن پێكهاتێن دی یێن مه‌سیحی و توركمان ژی بخوه‌ڤه‌ دگریت.

زانا مه‌لا خالد گۆت ژی” ئه‌ڤ جڤاتا ب گۆره‌ی ئیستحقاقێن هه‌لبژارتنێن په‌رله‌مانێ كوردستانێ سالا 2013 هتیه‌ هه‌لبژارتن و ژڤانێ ویلایه‌تا جڤاتا وێ ل 23/12/2019 ب دووماهی هاتیه‌، له‌وما وه‌كو قۆناغا ئێكێ به‌ری هه‌لبژارتنێن خۆلا داهاتی مه‌ پێدڤی ب جڤاته‌كا نوو هه‌یه‌”.

ل دۆر قانوونا هه‌لبژارتنان و ژڤانێ هه‌لبژارتنێن په‌رله‌مانێ كوردستانێ ژی گۆت” بۆچوونا فه‌رمی یا پارتی ئه‌وه‌ كو پێدڤیه‌ هه‌لبژارتن ل ژڤانێ خوه‌ ل سالا 2022 بهێنه‌ ئه‌نجامدان وهیچ ڤالاهیه‌ك د قانوونا هه‌لبژارتنان ل هه‌رێمێ نینه‌، له‌وما مه‌ پێدڤی ب راستڤه‌كرنه‌كا نووب ۆ وێ قانوونێ نینه‌”.

دیاركر ژی” ئه‌م وه‌كو پارتی دیموكراتی كوردستان رادگه‌هینین كو د پێداگیرین ل سه‌ر وێ چه‌ندێ هه‌لبژارتنێن په‌رله‌مانێ كوردستانێ د ژڤانێ خوه‌ یێ دیاركری دا بهێنه‌ ئه‌نجامدان و ده‌رگه‌هێ دانوستاندنێ ل گه‌ل هه‌موو فراكسیۆنێن دێ یێ ڤه‌كری بیت بۆ وێ چه‌ندێ سازانه‌كێ بكه‌ین و زه‌مینه‌ سازیا سیاسی یا باشتر و سه‌قایه‌كێ سیاسی یێ باشتر ل په‌رله‌مانی ژ پێخه‌مه‌ت گه‌هشتن ب ئه‌نجامه‌كی ل سه‌ر هه‌رسێ پرسان ب ره‌خسینین”.

ئه‌ڤرۆ:

دوهی سێشه‌مبی 16/11/2021 ب پشكداریا به‌رپرسێن بلند یێن هه‌رێما كوردستانێ و ئیراقێ، كۆربه‌ندێ ئاشتی و ته‌ناهیێ ل رۆژهه‌لاتا ناڤین ل زانكۆیا ئه‌مریكی ل دهۆكێ ده‌ست پێ كر و تێدا نێچیرڤان بارزانی، سه‌رۆكێ هه‌رێما كوردستانێ په‌یڤه‌ك پێشكێش كر.

ل ده‌ستپێكا په‌یڤا خوه‌دا، نێچیرڤان بارزانی گۆت” خوه‌شحالم بابه‌ته‌كێ گه‌له‌ك گرنگ كو ئاشتی و ته‌ناهی یه‌ ل رۆژهه‌لاتا ناڤین، ئه‌م هه‌موو كۆمكرین، ب دیتنا من ئه‌ڤ بابه‌ته‌ گه‌له‌ك یێ گرنگه‌ كو ل هه‌رێما كوردستانێ، هه‌ولێر و ئیراقێ به‌حس ل سه‌ر بكه‌ین”.

سه‌رۆكێ هه‌رێما كوردستانێ ئاماژه‌ ب 16 نۆڤمبه‌ری وه‌كو رۆژا جیهانی یا لێبۆرینی كر كو یا هه‌ڤده‌مه‌ ل گه‌ل ب رێڤه‌چوونا ڤی كۆربه‌ندی و راگه‌هاند” ب ڤێ هه‌لكه‌فتێ هیڤیدارم ب كارێ هه‌ڤپشك و پێكڤه‌بوونێ ل ده‌ڤه‌رێ و هه‌موو جیهانێ ئه‌م هه‌موو پێكڤه‌ بشێین كولتوورێ پێكڤه‌ژیانێ، هه‌ڤدوقه‌بوولكرنێ و لێبۆرینێ به‌رفره‌هتر بكه‌ین و ل بن سێبه‌را وێ ئارامی و سه‌قامگیریا زێده‌تر بۆ مرۆڤایه‌تیێ بده‌ستڤه‌ بهێت.

نێچیرڤان بارزانی دووپاتی ل وێ چه‌ندێ ژی كر” ئاشتی و پاراستنا سه‌قامگیریێ، پێدڤیێن هه‌ره‌ ده‌ستپێكی یێن نوكه‌ و پاشه‌رۆژا ده‌ڤه‌را مه‌یه‌، رۆژهه‌لاتا ناڤین ب تایبه‌تی و جیهان ب گشتی دڤێ قۆناغا هه‌ستیار یا رۆژهه‌لاتا ناڤین دا برنا پێشڤه‌ یا ئاشتیێ و سه‌قامگیریێ ته‌حه‌دایه‌كا گه‌له‌ك مه‌زنه‌ و به‌رپرسیاره‌تیه‌كا هه‌ڤپشكه‌ بۆ وان گه‌لێن ل ده‌ڤه‌رێ دژین”.

سه‌رۆكێ هه‌رێما كوردستانێ گۆت ژی” چاوان ئاشتیێ بپارێزن و چاوان د سه‌ركه‌فتی بین؟ ب پێناسه‌كا ده‌ستپێكی، ئاشتی ئانكو نه‌بوونا شه‌ری و كوشتارێ، ئانكو نه‌بوونا تیرۆرێ و توندوتیژیێ، د به‌رانبه‌ر دا ئانكو هه‌بوونا ته‌بایی و پێكڤه‌ژیانێ، به‌لێ ته‌ناهیێ رامانه‌كا به‌رفره‌هتر یا هه‌ی ژ نه‌بوونا شه‌ری، به‌لێ ته‌ناهی هه‌موو لایه‌نێن ژیان ڤه‌دگریت”.

نێچیرڤان بارزانی دیاركر ژی” هه‌بوونا ته‌ناهیا ئاڤێ و وزێ د ناڤبه‌را ئیراق، ئیران، توركیا و سووریێ دا گه‌له‌ك یا گرنگه‌، ئه‌وا ل ڤێرێ ئه‌ز دخوازم به‌حس بكه‌م، ته‌ناهی یه‌ ب رامانا وێ یا گشتی، دشیان دایه‌ هه‌كه‌ شه‌ر ژی نه‌بیت، كۆمه‌كا هۆكاران ببنه‌ گه‌ف و خه‌لكی بێخنه‌ دناڤ ترسێ و دله‌راوكیێ دا، هه‌كه‌ ره‌وشا نوكه‌ وه‌كو نموونه‌ وه‌ربگرین، ڤایرۆسێ كورۆنا و ده‌رئه‌نجامێن ڤێ په‌تایێ”.

سه‌رۆكێ هه‌رێما كوردستانێ رۆهنكر ژی” د هه‌موو بواراندا هه‌ر وه‌لاته‌ك كو ژ شه‌ری رزگار دبیت، ب سێ قۆناغان دا ده‌رباز دبیت، ئێك، دووماهی ئینان ب شه‌ری و پاراستنا ئاشتیێ، دوو، دروستكرنا باوه‌ریێ ب جۆره‌كی كو لایه‌ن به‌رامبه‌ر نیازپاكیێ به‌رامبه‌ر هه‌ڤدو نیشا بده‌ن، سێ، نه‌هێلانا هۆكارێن شه‌ری و نه‌زڤرین بۆ ره‌وشا شه‌ری”.

نێچیرڤان بارزانی گۆت ژی” ئیراق د نوكه‌ دا یا د قۆناغا پشتی شه‌ری و جهگیركرنا ئاشتیێ دا، له‌وما گاڤا ئێكێ پێك دهێت ژ ب دووماهی ئینان و و نه‌هێلانا هۆكارێن نه‌سه‌قامگیریێ و بزاڤكرنه‌ بۆ پاراستنا ئاشتیێ، ئه‌م ل ئیراقێ د قۆناغا ئێكێ داینه‌، ئانكو مه‌ شه‌ره‌كێ نه‌خوازراو دژی رێكخراوه‌كا تیرۆرستی تمامكر و تشته‌ك ب ناڤێ خیلافه‌تا ئیسلامی یا داعشێ نه‌مایه‌، به‌لێ هێشتا ئه‌ركه‌كێ زۆر یێ ل سه‌ر ملێ مه‌ و رێیه‌كا دوور یا ل به‌راهیا مه‌ بۆ چه‌سپاندنا ته‌ناهیێ ل ئیراقێ، ب تایبه‌تی چاره‌سه‌ركرنا هه‌موو وان گرفتێن كو بوار بۆ دیاربوون و ب هێزبوونا داعشێ ل ڤێ ده‌ڤه‌رێ په‌یداكری”.

سه‌رۆكێ هه‌رێما كوردستانێ دووپاتكر” د ڤێ قۆناغێ دا مه‌ شیا ل سه‌ر ئاستێ ناڤخوه‌ ب پشته‌ڤانیا پێشمه‌رگه‌ی و هێزێن چه‌كدارێن ئیراقێ و ل سه‌ر ئاستێ ده‌ڤه‌رێ ژی ب هاریكاریا وه‌لاتێن جیران و ل سه‌ر ئاستێ نێڤده‌وله‌تی ژی ب هاریكاریا هه‌ڤپه‌یمانیا نێڤده‌وله‌تی یا دژی داعشێ، ل سه‌ر وێ رێكخراوا تیرۆرستی ب سه‌ركه‌ڤین، ئه‌ڤ سه‌ركه‌فتنه‌ په‌یامه‌كێ ئاراسته‌ی مه‌ دكه‌ت، ئه‌وژی ئه‌وه‌ كو سه‌قامگیركرنا ته‌ناهیێ پێدڤی ب ته‌ناهیێ هاریكاریا هه‌موویان یا هه‌ی و ل چه‌سپاندنا ئاشتیێ ژی دا ئه‌م هه‌موو دێ د مفادار و سه‌ركه‌فتی بین”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، د كۆربه‌ندێ ئاشتی و ته‌ناهی ل رۆژهه‌لاتا ناڤین ل دهۆكێ راگه‌هاند، پێدڤیه‌ ل ڤی كۆربه‌ندی ب ئالوگۆركرنا بیر و بۆچوونان و پێشكێشكرنا په‌یڤان، دووپاتیێ ل سه‌ر وان خالێن گرنگ بكه‌ین، كو كاریگه‌ری ل سه‌ر ده‌ڤه‌رێ ب شێوه‌كێ گشتی هه‌ی، هه‌روه‌كو دزانین ژبلی سه‌قایێ سیاسی، سه‌قایێ سروشتی ژی گوهۆرین یێن ب سه‌ر دا هاتین.

سه‌رۆكێ حوكمه‌تا هه‌رێما كوردستانێ ئاماژه‌ ب وێ چه‌ندێ ژی كر، ئێك ژ وان كێشێن كاریگه‌ری ل سه‌ر په‌یوه‌ندیێن د ناڤبه‌را وه‌لاتان دا هه‌بیت، كێشا ئاڤێ یه‌، ژبلی كو د نوكه‌ دا ئه‌م د قۆناغا پشتی هه‌لبژارتنێن جڤاتا نوونه‌رێن ئیراقێ دا ده‌رباز دبین، هیڤیدارین بشێین ژ ڤێ قۆناغێ ژی ب سه‌ركه‌فتی ده‌رباز ببین و ئیراقێ بۆ كنارێ ئاشتیێ ببه‌ین”.

ده‌قێ په‌یڤا مه‌سرور بارزانی، سه‌رۆكێ حوكمه‌تا هه‌رێما كوردستانێ ل كۆربه‌ندێ ئاشتیێ و ته‌ناهیێ ل رۆژهه‌لاتا ناڤین:

بێگۆمان ده‌ڤه‌ر ب گشتی و وه‌لاتێ مه‌ ب شێوه‌كێ تایبه‌ت، د قۆناغه‌كا گرنگ و هه‌ستیاردا ده‌رباز دبیت، پێدڤیه‌ ئه‌م ل ڤی كۆربه‌ندی ب ئالوگۆركرنا بیر و بۆچوونان و پێشكێشكرنا په‌یڤان، دووپاتیێ ل سه‌ر وان خالێن گرنگ بكه‌ین، كو كاریگه‌ری ل سه‌ر ده‌ڤه‌رێ ب شێوه‌كێ گشتی هه‌یه‌، هه‌روه‌كو دزانین ژبلی سه‌قایێ سیاسی، سه‌قایێ سروشتی ژی گۆهۆرین یا ب سه‌ردا هاتی، ژ گه‌له‌ك روویان ڤه‌ دشیان دایه‌ كاریگه‌ریا په‌یوه‌ندیێ دناڤبه‌را وه‌لاتان ل ده‌ڤه‌رێ و وه‌لاتێن جیهانێ ژی دا هه‌بیت.

هیڤیدارم ئه‌ڤ بابه‌ته‌، بابه‌ته‌ك بیت، هه‌ر وه‌كو ئه‌م ب خوه‌ چه‌ندین جاران هه‌ست پێ دكه‌ین، كێشا ئاڤێ بۆ نموونه‌، ئێكه‌ ژ وان كێشێن كو كاریگه‌ری ل سه‌ر په‌یوه‌ندیا د ناڤبه‌را وه‌لاتان دا هه‌ی، ژبلی وی د نوكه‌ دا د قۆناغا پشتی هه‌لبژارتنێن جڤاتا نوونه‌رێن ئیراقێ دا ده‌رباز دبین، هیڤیدارین بشێین د ڤێ قۆناغێ دا ژی ب سه‌ركه‌فتی ده‌ربازبین و ئیراقێ بۆ كنارێ ئاشتیێ ببه‌ین، پێدڤیه‌ پێكڤه‌ كاری بۆ ڤێ چه‌ندێ بكه‌ین، هه‌روه‌سا ئه‌م دبینین گوهۆرین ل سه‌ر ئاستێ ده‌ڤه‌رێ ژی یێن هه‌ین، ژ دروستبوونا هه‌ڤپه‌یمانیێ و ده‌ستپێكرنا دانوستاندنان دناڤبه‌را وه‌لاتان، هه‌روه‌كو دبینین، كو ئه‌ڤه‌ ژی دیارده‌كه‌ و پشته‌ڤانیێ ل هه‌موو جۆرێن دانوستاندنێن ئاشتیانه‌ دكه‌ین، بۆ گه‌هه‌شتنێ ب چاره‌سه‌ریه‌كا گونجای ل ده‌ڤه‌را مه‌.

هیڤیدارم ئه‌ڤ كۆربه‌نده‌ هاریكار بیت، بۆ وێ چه‌ندێ بیر و بۆچوونێن هه‌وه‌ پشته‌ڤان و هاریكار بن، بۆ به‌رچاڤ رۆهنیا زێده‌تر یا هه‌موویان، كو هاریكاریا وان بریاران بكه‌ین یێن د خزمه‌تا وه‌لاتێ مه‌ و ده‌ڤه‌رێ دا بن.

دهۆك باژێره‌كێ خوه‌شه‌، باژێرێ پێكڤه‌ژیانا ئایین و نه‌ته‌وێن جودایه‌، هه‌كه‌ هه‌وه‌ ده‌م هه‌بیت، من پێخوه‌شه‌ هوون سه‌ره‌دانا ڤی باژێری بكه‌ن و پیچه‌كی ڤی باژێری ببینن.

هیڤیدارم ئه‌نجامێن دانوستاندنان و ئالوگۆركرنا بیر و بۆچوونێن هه‌وه‌ د ڤی كۆربه‌ندێ ئاشتی و ته‌ناهیا رۆژهه‌لاتا ناڤین ب گرنگ بهێنه‌ وه‌رگرتن و بچنه‌ دناڤ وی به‌رنامێ كاری، كو پێدڤیه‌ د پاشه‌رۆژێ دا ئه‌م هه‌موو كار ل سه‌ر بكه‌ین.

ئه‌ڤرۆ:

شانده‌كێ ئه‌مریكا سه‌ره‌دانا رۆژئاڤایێ كوردستانێ كر و ل گه‌ل مه‌زلوم عه‌بدی فه‌رماندارێ گشتی یێ هێزێن سووریا دیموكرات و به‌رپرسێن رێڤه‌به‌ریا خوه‌سه‌ر كۆمبوو و شاندێ كوردی ژ بۆ ئاڤه‌دانیا رۆژئاڤایێ كوردستانێ و رێگری كرن ژ ئێرشێن توركیا داخوازا هاریكاریێ ژ ئه‌مریكا كر.

به‌ری سێ رۆژان شانده‌كێ ئه‌مریكا ب سه‌رۆكاتیا ئیسن گولدریچ جێگرێ وه‌زیرێ ده‌رڤه‌ یێ ئه‌مریكا سه‌ره‌دانا رۆژئاڤایێ كوردستانێ كر و ل گه‌ل مه‌زلوم عه‌بدی فه‌رماندارێ گشتی یێ هێزێن سووریا دیموكرات و به‌رپرسێن رێڤه‌به‌ریا خوه‌سه‌ر كۆمبوو و د كۆمبوونێ دا شاندێ ئه‌مریكا به‌حسێ گرنگیا ئاگربه‌ستا ل رۆژئاڤایێ كوردستانێ كر و راگه‌هاند كو دڤێت توركیا و هێزێن سووریا دیموكرات ئاگربه‌ستێ بنپێ نه‌كه‌ن، چونكو ئارامیا نها ل باكورێ سووریێ بۆ هه‌موو ئالیه‌كێ گرنگه‌ و دڤێت هه‌موو ئالی ژی بزاڤا هندێ بكه‌ن كو چو ئالۆزیێن نوو دروست نه‌بن، جونكو ئه‌و یه‌ك دێ بیته‌ ئه‌گه‌رێ هندێ كاره‌ساتێن مه‌زن یێن مرۆڤی ل باكورێ سووریێ روو بده‌ن و ئه‌مریكا ژی ل دژی هندێ یه‌.

پشتی هه‌ڤدیتنێ جه‌نه‌رال مه‌زلوم عه‌بدی فه‌رماندارێ گشتی یێ هێزێن سووریا دیموكرات ژی راگه‌هاند كو د كۆمبوونێ دا وان سوپاسیا هه‌لوه‌ستێ باش یێ ئه‌مریكا كرینه‌، چونكو ئه‌مریكا هه‌تا نها ژی هاریكاریا وان دكه‌ت و هه‌روه‌سا هه‌لوه‌ستێ ئه‌مریكا یێ بۆ ئارامیا رۆژئاڤایێ كوردستانێ ژی گه‌له‌ك گرنگه‌ و گۆت: (د كۆمبوونێ دا مه‌ داخواز ژ ئه‌مریكا كر كو رێ نه‌ده‌ت توركیا ده‌ست ب ئۆپه‌راسیۆنه‌كا نوو ل باكورێ سووریێ بكه‌ت، چونكو ئه‌و یه‌ك دێ بیته‌ ئه‌گه‌رێ روودانا كاره‌ساته‌كا مه‌زن یا مرۆڤی و شاندێ ئه‌مریكا ژی به‌حسێ هندێ كرن كو ئه‌و ل دژی هندێ نه‌ توركیا ده‌ست ب ئۆپه‌راسیۆنه‌كا نوو بكه‌ت و دڤێت توركیا پێگیریێ ب ئاگربه‌ستێ بكه‌ت).

فه‌رماندارێ گشتی یێ هێزێن سووریا دیموكرات ئه‌و یه‌ك ژی دیار كر كو گه‌له‌ك ده‌ڤه‌رێن به‌ری نها ژ ده‌ستێ داعشێ هاتینه‌ رزگاركرن پێدڤی ب ئاڤه‌دانیێ نه‌ و وه‌لاتی داخوازا هاریكاریێ دكه‌ن، ژ به‌ر هندێ ژی مه‌ د كۆمبوونا ل گه‌ل به‌رپرسێن ئه‌مریكا دا داخواز كر كو ئه‌مریكا ژ بۆ ئاڤه‌دانیا وان ده‌ڤه‌ران هاریكاریا رێڤه‌به‌ریا خوه‌سه‌ر بكه‌ت و شاندێ ئه‌مریكا ژی دیار كرن ئه‌و دێ ل دووڤ شیانان و ل گۆر پێدڤیاتێن وان ده‌ڤه‌ران هاریكاریێ كه‌ن و مه‌ ژی سوپاسیا هه‌لوه‌ستێ ئه‌مریكا كر.

چاڤدێرێن سیاسی ژی دیار دكه‌ن كو سه‌ره‌دانا شاندێ ئه‌مریكا بۆ رۆژئاڤایێ كوردستانێ د ره‌وشا نها دا گه‌له‌ك گرنگه‌، چونكو ئه‌مریكا ئه‌و په‌یامه‌ دا توركیا كو ئه‌و ده‌ست ژ رۆژئاڤایێ كوردستانێ و پشته‌ڤانیا كوردان به‌رناده‌ن، هه‌روه‌سا ئه‌مریكا په‌یامه‌كا دی ژی دا توركیا كو نابیت ب چو ره‌نگه‌كێ توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ بكه‌ت، ئه‌و هه‌ر دو په‌یامه‌ بێگومان بۆ كوردێن سووریێ گه‌له‌ك گرنگ بوون، چونكو بۆ هه‌ر كه‌سه‌كێ ئاشكرایه‌ هه‌كه‌ ئه‌مریكا خوه‌ بێده‌نگ بكه‌ت دێ توركیا ئێرشی رۆژئاڤایێ كوردستانێ كه‌ت.

ئه‌و یه‌ك د ده‌مه‌كێ دایه‌ كو حه‌فتیا بۆری فه‌رمانداره‌كێ ئه‌مریكا ژی راگه‌هاند كو هێزێن وان دێ ل باكورێ سووریێ مینن، چونكو شه‌رێ ل دژی رێكخراوا تیرۆرستی یا داعشێ بۆ وان گه‌له‌ك گرنگه‌ و مه‌ترسیا داعشێ ژی هه‌ر رۆژ زێده‌تر لێ دهێت و ژ به‌ر هندێ هێزێن ئه‌مریكا دێ ل باكورێ سووریێ مینن و دێ هاریكاریا هێزێن سووریا دیموكرات ژی كه‌ن، چونكو داعش دشێت جاره‌كا دی ده‌ست ب كریارێن تیرۆرستی ل سووریێ بكه‌ت.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانێ، دلته‌نگیا خوه‌ ل دۆر ره‌وشا په‌نابه‌رێن كورد ل سنوورێ بیلارۆسا و پۆله‌ندا ده‌ربری و راگه‌هاند، باشكرنا ره‌وشا وان، به‌رپرسیاره‌تیا هه‌ڤپشك یا هه‌موویانه‌.

مه‌سرور بارزانی، د به‌رپه‌رێ خوه‌ ل تۆرا جڤاكی یا تویته‌ری دا په‌یامه‌ك به‌لاڤكر و راگه‌هاند” گه‌له‌ك یێ دلته‌نگم ژبه‌ر ره‌وشا وه‌لاتییِن مه‌ و هه‌موو ئه‌وێن نوكه‌ ل سه‌ر سنوورێن ئێكه‌تیا ئه‌ورۆپا، باشكرنا ره‌وشا وان به‌رپرسیاره‌تیه‌كا هه‌ڤپشك یا مه‌ هه‌موویانه‌”.

رۆهنكر ژی” ئه‌و ژلایێ قاچاخچی و بازرگانێن مرۆڤان و چه‌ند تۆرێن ده‌ره‌كی هاتینه‌ سه‌ردابرن”.

سه‌رۆكێ حوكمه‌تا هه‌رێمێ دیاركر ژی كو دبزاڤان دایه‌ بۆ پشتراستبوونێ ژ سلامه‌تی و ئێمناهیا وان وه‌لاتیێن ل ده‌ڤه‌رێن سنووری دناڤبه‌را بیلارۆسیا و پۆله‌ندا و گۆت” ل گه‌ل هه‌ڤپشكێن مه‌ د په‌یوه‌ندیێ دامه‌ و كار دكه‌م بۆ پشتراستبوون ژ سلامه‌تی و ئێمناهیا وان وه‌لاتیان”.

ئه‌ڤرۆ:

شیره‌تككارێ راگه‌هاندنێ یێ سه‌رۆك مه‌سعود بارزانی، كیفاح مه‌حموود، به‌رسڤا باقر ئه‌لزوبه‌یدی ل سه‌ر په‌نابه‌رێن كورد كو د ناڤبه‌را بیلاروسیا و پۆله‌ندا ماین دده‌ت.

باقر ئه‌لزوبه‌یدی د به‌رپه‌رێ خوه‌ ل سه‌ر تۆرا جڤاكی یا فه‌یسبووكی په‌یامه‌ك ل بن ناڤێ( گه‌لێ سته‌ملێكریێ مه‌ یێ كورد رزگار بكه‌ن) به‌لاڤكریه‌.

كیفاح مه‌حمموود، شیره‌تكارێ راگه‌هاندنێ یێ سه‌رۆك بارزانی د به‌رسڤا وی دا دبێژیت” ئارمانجا باقر ئه‌لزوبه‌یدی ژبه‌لاڤكرنا وی ناڤونیشانی ئازراندنا كاره‌ساته‌كا خه‌یالی یه‌ و دخوازیت ب دلسۆزانه‌ خوه‌ نیشا كورد و كوردستانێ بده‌ت”.

كیفاحی، زێده‌تر گۆت” ل دۆر به‌لاڤكرنا وێ موزایه‌دا گالته‌جاری ل سه‌ر ره‌وشا هه‌رێما كوردستانێ كو هه‌موو كه‌سه‌كی ماف هه‌بیت ل دۆر وێ چه‌ندێ باخڤیت، به‌لێ باقر ئه‌لزوبه‌یدی ئه‌و ماف نینه‌، چونكه‌ گه‌لێ مه‌ باش تێدگه‌هیت كو ئه‌لزوبه‌یدی ب خوه‌ كه‌سه‌كێ شوڤینی یه‌”.

دبێژیت ژی” گه‌لێ مه‌ دزانیت كو ئه‌زموونه‌كا ته‌حل ل گه‌ل باقر ئه‌لزوبه‌یدی یا هه‌ی كو ناڤبری رۆله‌كێ سه‌ره‌كی هه‌بوو د برینا مووچێ خه‌لكی و پشكا بودجا هه‌رێما كوردستانێ ژ لایێ به‌غدا ڤه‌، هه‌روه‌سا ل ده‌مێ ئه‌و وه‌زیرێ ناڤخوه‌یا ئیراقێ بوو، د سه‌رده‌مێ وی دا مه‌زنترین تاوان دژی زیندانیان هاته‌ ئه‌نجامدان”.

شیره‌تكارێ راگه‌هاندنێ یێ سه‌رۆك بارزانی ئاماژه‌كر” هه‌كه‌ ل ئیراقێ دادپه‌روه‌ریه‌كا راسته‌قینه‌ هه‌با، پێدڤی بوو ئه‌ڤرۆ ئه‌لزوبه‌یدی ژبه‌ر تاوانێن وی د زیندانێ ڤه‌با، نڤیسه‌رێ ڤی پۆستی ل فه‌یسبووكی بانگه‌شا وێ چه‌ندێ دكه‌ت كو كوردستانه‌كا سه‌رفه‌راز و ئارام كو ژ به‌سرا هه‌تا مووسل په‌ناگه‌ها هه‌موو ئیراقیایه‌ ب گه‌نده‌لی و سه‌ركه‌تكرن و هه‌ژاریێ دنالیت، ئه‌و نڤیسه‌ره‌ ب خوه‌ ره‌وشا ناخهه‌ژینا گه‌لێ مه‌ ل عیماره‌ و ئه‌هواران و گوند و باژێرێن دی یێن باشوورێ ئیراقێ ژبیرا خوه‌ بریه‌، كو ژ ئه‌گه‌رێ حوكمرانیا ئه‌لزوبه‌یدی و گرۆپا وی ره‌وشا ژیانێ بۆ سه‌رده‌مێ چه‌رخێن ناڤه‌راست زڤریه‌، به‌لێ خه‌لكێ باشوورێ ئیراقێ ل ده‌مێ ده‌نگدانا ڤێ دووماهیێ دا ئه‌لزوبه‌یدی و گرۆپا وی سزادان و ژ مه‌یدانا هه‌ڤركیا نیشتمانی دوورخستن”.

دیاركر ژی” دیارده‌یا كۆچ و په‌نابه‌ریێ بۆ ئورۆپا دیارده‌كا جیهانی یه‌ كو یا تایبه‌ت نینه‌ ب ره‌گه‌ز و نه‌ته‌وه‌ و ده‌وله‌تێ ڤه‌، به‌لێ ژلایێ په‌رله‌مان و حوكمه‌تا هه‌رێما كوردستانێ جهێ سه‌رنجه‌كا مه‌زنه‌ كو ئه‌و هژمارا كۆچبه‌را ب تنێ نوونه‌راتیا هه‌رێما كوردستانێ ناكه‌ن، به‌لكو ئه‌و ژ هه‌موو وه‌لات و نه‌ته‌وه‌ و ره‌گه‌زانه‌ و هۆكار و ره‌وشا سیاسی یا خوه‌ یا هه‌ی، كوب ووینه‌ ئه‌گه‌رێ وێ چه‌ندێ ل ناڤه‌راستا ململانێیا توند د ناڤبه‌را ئێكه‌تیا ئورۆپا و بیلاروسیا دیارببن و ببنه‌ به‌حسێ میدیایا جیهانی”.

كیفاح مه‌حموود ل دووماهیا به‌رسڤا خوه‌ دا دبێژیت” سوپاس بۆ خودێ مه‌زن كو گه‌لێ مه‌ ب تمامی ئاگه‌هدارێ راستیایه‌ و باش دزانیت خودانێ ڤێ په‌یامێ و هه‌ڤشێوێن وی ژ هونه‌رێ موزایه‌دێ و دووروویێ سیاسی نه‌، سه‌ره‌خوه‌شیا مه‌ ئه‌وه‌ كو برایێ نمه‌ ل ناڤه‌راست و باشوورێ ئیراقێ راستیێن ڤان جۆرا كه‌سان باش دزانن و وانه‌كا باش ژی پێ به‌خشی”.

ئه‌ڤرۆ:

لقێ سیێ پارتی دیموكراتی كوردستان ل كه‌ركووكێ به‌یاننامه‌ك به‌لاڤكر و تێدا به‌رسڤا داخۆیانیێن سه‌رۆكێ به‌ره‌یێ توركمانی دده‌ت و دووپات دكه‌ت كو ئه‌و داخۆیانیه‌ بۆ وێ چه‌ندێ نه‌ شكه‌ستنێن خوه‌ د هه‌لبژارتنان دا پنی بكه‌ت.

لقێ سیێ د به‌یانناما خوه‌ دا دبێژیت” هێزێن پارتی و پێشمه‌رگه‌ مل ب ملێ هێزێن نیشتمانی یێن جۆرا و جۆر به‌رگری ژ كه‌ركووكێ كر و ئه‌و پارێزگه‌هه‌ و پێكهاتێن وێ ژ ده‌ستێ داعشێ و گرۆپێن تیرۆرستی یێن دی پاراست”.

هه‌روه‌سا تێدا هاتیه‌” نوكه‌ د ڤێ دووریانا ترسناك دا كود بینین شانێن نڤستی یێن داعشێ كریارێن جۆرا و جۆر ئه‌نجام دده‌ن، ئیبتزازچی و هه‌لپه‌رستكار ب به‌یاننامێن ره‌گه‌زپه‌رستانه‌ دهێنه‌ د مه‌یدانێ دا”.

دیاركر ژی” سه‌رۆكێ به‌ره‌یێ توركمانی زنجیره‌كا داخۆیانیێن بێ سه‌روبه‌ر و شه‌پرزه‌ ده‌ركرینه‌ كو هیچ ئارمانجه‌ك نینه‌ ژبلی كو ب شێوه‌كێ نمایشكارانه‌ د راگه‌هاندنێ دا ده‌ربكه‌ڤیت و ئه‌و شكه‌ستنێن خوه‌ د هه‌لبژارتنێن ڤێ دووماهیێ دا پنی بكه‌ت چونكه‌ ل بن سه‌ركردایه‌تیا وی دا به‌ره‌یێ توركمانی كێمترین ده‌نگێن توركمانان بده‌ستڤه‌ئیناینه‌، ئه‌ڤه‌ وێ چه‌ندیچ نیشان دده‌ت كو ئه‌و كه‌سه‌ ب هیچ جۆره‌كی نوونه‌راتیا وان وه‌لاتیان ناكه‌ت كو ئه‌و به‌یاننامه‌ ب ناڤێ وان ده‌ركریه‌”.

ل دووماهیا به‌یاننامه‌ لقێ سێ دا هاتیه‌” پێشمه‌رگه‌ و پارتی دیموكراتی كوردستان، ده‌ست ل ناڤ ده‌ستێ هه‌موو وه‌لاتیێن كه‌ركووكێ، به‌رگریێ ژ كه‌ركووكێ دكه‌ن و ب راستگۆیی كاردكه‌ن بۆ ئاڤه‌دانكرنا باژێری و زڤراندنا سه‌قامگیریا سیاسی بۆ كه‌ركووكێ و بده‌ستڤه‌ئینانا گه‌شه‌یا ئابووری بۆ هه‌موو پێكهاتێن وێ و جهێن وان یێن شكه‌ستن خواری دناڤ ڤی پرۆژه‌ی دا نابیت”.

ئه‌ڤرۆ:

فه‌رماندێ هێزا پێشمه‌رگێ شنگالێ راگه‌هاند، د به‌رده‌وامیا هاتنا چه‌كدارێن pkk بۆ ناڤ رێزێن پێشمه‌رگه‌ی دا، هژمارا وان گه‌هشته‌ 900 چه‌كداران و هه‌كه‌ ئه‌م رێ پێ بده‌ین دێ زێده‌تر ژی په‌یوه‌ندیێ ب مه‌ كه‌ن، چونكه‌ ب تمامی یێن بێ ئومێد بووین ژ pkk.

قاسم شه‌شۆ، فه‌رماندێ هێزا پێشمه‌رگێ شنگالێ، گۆت” هاتنا چه‌كدارێن pkk بۆ ناڤر ێزێن پێشمه‌رگه‌ی گه‌له‌ك یا زێده‌بووی و ئه‌وێن دهێن ئه‌م ناڤێن وان تۆمار دكه‌ین و دهنێرینه‌ هه‌رێما كوردستانێ و هه‌تا نوكه‌ زێده‌تر ژ 900 چه‌كدارێن pkk یێن هاتین و مه‌ هه‌موو یێن تۆماركرین”.

شه‌شۆی زێده‌تر گۆت” مه‌ نوكه‌ یا راگرتی، هه‌كه‌ نه‌ دێ ب كۆم په‌یوه‌ندیێ ب مه‌ كه‌ن، ئه‌و چه‌نده‌ ژی بۆ هژماره‌كا فاكته‌ران دزڤریت”.

خویاكر ژی” نوكه‌ pkk هاریكاریا دارایی یا چه‌كدارێن خوه‌ ناكه‌ت و زۆریێ لێ دكه‌ت و ب نه‌چاری وان دبه‌ته‌ سووریێ و شه‌ری پێ دكه‌ت و دده‌ته‌ كوشتن و مه‌ترسیا توپبارانكرنێ ژی به‌رده‌وام یا ل سه‌ر هه‌ی، له‌وما ئه‌و ناخوازن ژیانا خوه‌ بێخنه‌ دمه‌ترسیێ دا و دزانن چاره‌نڤیسێ وان ل گه‌ل pkk یێ دیار نینه‌ و یێن بێ ئومێد بووین، له‌وما دهێن و دبنه‌ پێشمه‌رگه‌ و دزانن دێ وان ب ڤێ چه‌ندێ پاشه‌رۆژه‌كا گه‌ش هه‌بیت”.