سەرۆكێ هەرێما كوردستانێ، نێچیرڤان بارزانی ل گەل ئۆدری ئازوولای، ڕێڤەبەرا گشتی یا ڕێكخراوا نەتەوەیێن ئێكگرتی بۆ پەروەردە و زانست و ڕەوشەنبیریێ (یونسكۆ) كۆمبوو.
د دیدارەكێ دا هەردو ئالیان باس ل كار وچالاكیێن یونسكۆ ل هەرێما كوردستانێ و ئیراقێ كر و ڕۆناهی خستە سەر وان جهێن هەرێما كوردستانێ كو شوونوارێن دیرۆكی و دێرین تێدا هەین.
پڕۆژەیێ نووژەنكرنا كەلها دێرین یا هەولێرێ، تەوەرەكێ دی یێ كۆمبوونێ بوو، ئۆدرێ ئازوولای ئاماژە ب قۆناغێن پڕۆژەی كر و سوپاسیا ئالیێن پەیوەندیدارێن هەرێما كوردستانێ كر بۆ هاریكاریێن پێشكێشی تیما یونسكۆ كری. ژ ئالیێ خوەڤە نێچیرڤان بارزانی كار و چالاكیێن یونسكۆ ل ئیراقێ و هەرێما كوردستانێ بلند هەلسەنگاندن و پشتەڤانیا هەرێما كوردستانێ بۆ پڕۆژەیێن وان دووپاتكر.

ئەڤرۆ

بارەگایێ بارزانی پەیامەك ل دۆر بیرەوەرییا سەرهلدانێ بەلاڤكر و دیار كریە، جهێ مخابنییەكا مەزنە ل بیرەوەرییا سەرهلدانێ حزب و لایەنێن سیاسی و لایەنگرێن وان بزاڤێن هندێ بكەن ئەوێ بیرەوەرییێ بكەنە حزبی و هەر ئێك ب جۆرەكی خوە بكەتە خودانێ سەرهلدانێ.
د پەیاما بارەگایێ‌ بارزانی دا هاتیە: «جهێ مخابنییەكا مەزنە د بیرەوەرییا سەرهلدانێ دا حزب و لایەنێن سیاسی و لایەنگرێن وان بزاڤێن هندێ بكەن، كو ئەوێ بیرەوەرییێ بكەنە حزبی و هەر ئێك ب جۆرەكی خوە بكەتە خودانێ ئەوێ سەرهلدانێ‌، سەرهلدان دەرئەنجامێ ئێكرێزی و تێكۆشانا هەموو لایەنانە،‌ یێ جەماوەر و لایەنێن د ناڤ بەرەیێ كوردستانی دا و پێشمەرگەی و رێكخستنێن نهێنی و هەموو چینێن جودا یێن كوردستانێیە، درێژەدانا خەباتا دوور و درێژ و بەردەوام یا گەلێ كوردستانێ بوو».
دیسا د پەیاما بارەگایێ‌ بارزانی دا هاتیە: «پەیام و ئارمانجێن سەرهلدانێ د بلند و گرانبها و نیشتیمانی و نەتەوەیینە، نابیت ببنە حزبی و بچووك ببن و ژ رامان و گەوهەران ڤالا ببن، سەرهلدان ب رەنج و ماندیبوون و بزاڤێن هەموو لایەكی سەركەڤت، لەوما خودانێ دروست و راستەقینە یێ وێ روودانا مەزن، كوردستانە ب هەموو حزب و لایەن و كەسایەتی و وەلاتیانڤە».

سەرۆك مەسعود بارزانی، د پەیامەكێ دا ب هەلكەفتا 32 سالیا سەرهلدانا 1991 ڕاگەهاند، سەرهلدان ئەو ڕاستیێن بۆ دۆست و دۆژمنان سەلماند كو ستەمكاری نەشێت ئیرادەیا ئازادیخوازی د ناخێ گەلێ كوردستانێ نەهێلیت.
دەقێ پەیاما سەرۆك بارزانی..
ب هەلكەفتا 32 سالیا سەرهلدانا مەزن یا گەلێ كوردستانێ پیرۆزباهیێ ل مالباتێن سەربلندێن شەهید و پێشمەرگێن قەهرەمان و هەموو خەباتكەر و ئازادیخواز و نیشتمانپەروەران و هەموو خەلكێ كوردستانێ دكەم.
سەرهلدان ب ئیرادەیا ئازادیخوازیا گەلێ كوردستانێ و قەهرەمانیا پێشمەرگەی و پلان و ئێكڕێزیا ئالیێن د ناڤ بزاڤا ڕزگاریخوازا كوردستانێ هاتە كرن و سەركەفتن بدەستڤەئینا. سەرهلدانێ ئەو ڕاستیە بۆ دۆست و دوژمنان سەلماند كو ستەمكاری چو جاران نەشێت ئیرادەیا ئازادیخوازی د ناخێ گەلێ كوردستانێ دا نەهێلیت. سەرهلدان هەلگرا بها و ئارمانجێن بلند بوو، بۆ وێ چەندێ بوو گەلێ كوردستانێ ئازاد ببیت و ژیانەكا سەربلند د وەلاتێ خوە دا هەبیت.
ل سالیادا سەرهلدانێ هزاران سلاڤ بۆ شەهیدێن سەرهلدانێ و هەموو شەهیدێن ڕێكا ڕزگاریا كوردستانێ دهنێرین و دوپاتیێ ل وێ چەندێ دكەین، قەوارەیێ هەرێما كوردستانێ كو ئێك ژ بەرهەمێن سەرهلدانا خەلكێ كوردستانێ یە، دەستكەفتەكێ دیرۆكی و گرانبهایێ گەلێ كوردستانێ یە. پێدڤیە ئەو دەستكەفتە بهێتە پاراستن و بهێزكرن و نابیت ب هیچ شێویەەكی كار بۆ لاوازكرنا وان بها و ئارمانجان بهێتە كرن كو گەلێ كوردستانێ ژ پێخەمەت وان دا سەرهلدان كر.

سەرۆك مەسعود بارزانی د بەرگێ پێنجێ یێ پەرتۆكا (بارزانی و بزاڤا ڕزگاریخوازا كوردی) باسێ سەرهلدانا 1991 دكەت و دبێژیت» هەیڤا ئادارا 1991، وەرچەرخانەیەكا گرنگ و مەزن بوو د دیرۆكا گەلێ كوردستانێ دا، جەماوەرێ ئازا و دلسۆزێ كوردستانێ دژی دامودەزگەهێن ڕژێما بەعس ل كوردستانێ سەرهلدان كر و د دەمەكێ كورت دا هەموو دەزگەهێن سەركوتكەرێن ڕژێمێ ل كوردستانێ هاتنە ڕامالین و كوردستان ژ هێزا ستەمكار یا بەعسی هاتە پاقژكرن، كو بەرهەمێ ئێكڕێزی و تەباییا گەلێ كوردستانێ و پارتێن سیاسی یێن كوردستانی بوو».
سەرۆك بارزانی دبێژیت» ل 6/3/1991 من سەرەدانا قاسمەڕەش كر و ل گەل نەوشێروان مستەفای و برایێن سەركردایەتیا بەرەی ل دەڤەرێ كۆمبووم و بڕیار هاتە دان ل هەردو ئێزگەیێن دەنگێ كوردستان و گەلێ كوردستانێ، پێزانین و ڕینمایێن پێدڤی ب جەماوەرێ كوردستانێ بهێنە دان».
سەرۆك بارزانی دبێژیت ژی» ل 11/3/1991 چووینە ڕانیە و پێشوازیەكا ئێكجار مەزن و گەرم یا جەماوەری ل مە هاتە كرن و ئەز و نەوشیروان مستەفا پێكڤە بووین و مە پەیڤەك پێشكێشی جەماوەرێ دلسۆز و خۆراگر كەر».
هەروەسا ئاماژە دكەت» ل ڕۆژا 17/3/1991 مە سەرەدانا پردێ كر، ل گەل نەوشیروان مستەفا و كۆسرەت ڕەسوول، مە پێكڤە باس ل چاوانیا ڕزگاركرنا كەركووكێ كر، بڕیارا پێدڤی هاتە دان و هێزا پێدڤی ژی بۆ هاتە دیاركرن
و ل ڕۆژا 20 ئادارێ كەركووك ب تمامی هاتە ئازادكرن، ئەو چەند ڕۆژێن ئازادیا كەركووكێ، د پڕ بوون ژ سەربلندیێ وو هیڤی و خوەشیێ بۆ مللەتێ مە».
سەرۆك بارزانی زێدەتر دبێژیت» ل ڕۆژا 22 ئادارا 1991 من سەرەدانا باژێرێ كوێ كر و ب بەرهەڤبوونا هەژمارەكا مەزن یا خەلكی، من پەیڤەك پێشكێشی جەماوەرێ كۆیێ كر و من ڕاگەهاند كو قۆناغا شەرعیەتا شۆرەشگێری ب دووماهی هات و پێدڤیە بەر ب شەرعیەتا قانوونی پێنگاڤان بهاڤێژین، هەلبژارتن بهێنە ئەنجامدان و جەماوەرێ كوردستانێ و گەلێ كورد بڕیارێ ل چارەنڤیسێ خوە بدەت».
هەروەسا دبێژیت» هەردەمێ ل تەلەڤزیۆنان سەحدكەمە وێ پەیڤا خوە، كو ل وێ ڕەوشێ من باسێ هەلبژارتنان و سەروەریێ و شەرعیەتا قانوونێ دكر، كەسێ هزر د وی بابەتی دا و د وێ ڕەوشێ دا نەدكر، لەما هەر دەمێ دبینم، هەستەكا خوەش بۆ من دروست دبیت».

ئەڤرۆ

بەرپرسێ دەستەیا كارگێریا مەكتەبا سیاسی یا پارتی دیموكراتی كوردستان، ڕاگەهاند، ئەڤ دووربوونا برادەرێن ئێكەتیێ ژ پارتی، وەسا پێ دچیت دخوازن جهگرەكی بۆ پارتی ببینن و گوت ژی، هەكە بافل وقوباد تالەبانی سیاسەتا مام جەلالی پەیڕەو بكەن، كێشە د ناڤبەرا پارتی و ئێكەتیێ دا ڕوو نادەت.
ب دیتنا فازل میرانی، بەرپرسێ دەستەیا كارگێریا مەكتەبا سیاسی یا پارتی دیموكراتی كوردستان، نوكە كورسیێن پێكهاتەیان ئێك ژ كێشەیێن د ناڤبەرا پارتی و ئێكەتیێ دایە و باس ل وێ چەندێ ژی دكەت «مە پێ باشە زێدەتر ئەم و ئێكەتی ل سەر پێكهاتەیان نەبینە بڕیاردەر، نەبینە پارێزەرێن وان، ئەڤجا مەسیحی بن یان توركمان. ئەو ب خوە هەر بڕیارەكێ بدەن بلا ئەم قبوول بكەین».
بەرپرسێ دەستەیا كارگێریا مەكتەبا سیاسی یا پارتی گوت ژی» كێشەیێن پارتی و ئێكەتی بۆ دووماهیا سالێن شێستان دزڤرن، بەلێ پشتی سالا 1998 و ژئەگەرێ وێ تێكگەهشتنا دناڤبەرا سەرۆك مەسعود بارزانی و رەحمەتی مام جەلالی دا هەی، ئەڤ كێشە ئارامتر بوون»
فازل میرانی گوت ژی» هەكە بافل تالەبانی و قوباد تالەبانی سیاسەتا مام جەلالی پەیڕەو بكەن، ئەڤ كێشە ڕوو نادەن».

ئەڤرۆ

سەرۆكێ حوكمەتا هەرێما كوردستانێ، مەسرور بارزانی، د پەیامەكێ دا ب هەلكەفتا 32 سالیا سەرهلدانا خەلكێ كوردستانێ ل سالا 1991، ڕاگەهاند، سەرهلدان پەیامەكا ڕۆهن و زەلالا خەلكێ كوردستانێ بوو بۆ هەموو جیهانێ، كو ژێر دەستیێ و داگیركاریێ ڕەت دكەت و دخوازیت ب سەربلندی بژیت.
دەقێ پەیاما مەسرور بارزانی..
ب هەلكەفتا 32 سالیا سەرهلدانا مەزن یا گەلێ كوردستانێ ل ئادارا 1991، گەرمترین پیرۆزباهیان ئاراستەی هەموو كوردستانیان و پێشمەرگێن قەهرەمان و مالباتێن سەربلندێن شەهیدان دكەم.
سەرهلدانا پیرۆز یا سالا 1991، بەرهەمێ ئێكڕێزی و ئێكگرتنا هێزێن كوردستانی و پێكهاتەیێن جودا و تەخ و چینێن خەلكێ كوردستانێ بوو، كو وەرچەرخانەیەكا دیرۆكی د خەبات و تێكوشینا گەلێ كوردستانێ ژ پێخەمەت ڕزگاربوونێ ژ ستەمێ زۆرداریێ و داگیركاریێ و بدەستڤەئینانا ئازادیا دروستكر.
سەرهلدان پەیامەكا ڕۆهن و زەلال یا خەلكێ كوردستانێ بوو بۆ هەموو جیهانێ، كو ژێر دەستیێ و داگیركاریێ ڕەت دكەت و دخوازیت ب سەربلندی بژیت.
د ڤێ هەلكەفتا پیرۆز دا، دوپاتیێ ل هەڤهەلوەستی و تەباییا خەلكێ نیشتمانپەروەرێ كوردستانێ دكەین بۆ داكۆكیكرنێ ژ دەستكەفت و مافێن دەستووری یێن گەلێ كوردستانێ، كو ب هەموو شێوەیەكی، بەرگریێ ژێ دكەین و دەستبەرداری نابین و دێ د بەردەوام بین د كاروانێ ئاڤەدانكرن و گەشەپێدانا كوردستانێ دا.
د سالیادا سەرهلدانێ دا، سەرێ ڕێزێ بۆ شەهیدێن نەمر یێن سەرهلدانێ و هەموو شەهیدێن كوردستانێ د چەمینین.

ئەڤرۆ

سەرۆكێ هەرێما كوردستانێ، نێچیرڤان بارزانی ڕادگەهینیت، پێدڤیە نوكە گەلێ كوردستانێ ب هەموو پێكهاتە و هێز و ئالیێن سیاسی، وانەیا سەركەفتنێ ژ سەرهلدانێ وەربگرن. دڤێت ئێكڕێزی و تەبایی و هەڤدو قبوولكرن و پێكڤەكاركرنێ، بكەنە هێڤێنێ سەركەفتنێ و پاشەڕۆژەكا باشتر بۆ گەلێ مە.

دەقێ پەیاما نێچیرڤان بارزانی..
ب هەلكەفتا 32 سالیا سەرهلدانا مەزن یا ئادارا 1991 ل مالباتێن سەربلندێن شەهیدێن سەرهلدانێ و هەموو شەهیدێن كوردستانێ و پێشمەرگێن قەهرەمان و هەموو گەلێ كوردستانێ، ب هەموو پێكهاتەیێن خوەڤە پیرۆز دكەین، ب ڕێز و شكۆڤە بیرئینانا شەهیدان دكەین، سلاڤان بۆ گیانێ وان یێ پاقژ دهنێرین.
سەرهلدان رابوونەكا دیرۆكی و ئێكلاكەر یا جەماوەری یا سەرانسەری گەلێ كوردستانێ بوو ب هەموو تەخ و چین و پێكهاتەیێن وێ ڤە كو ب پشتەڤانیا پێشمەرگەی و بەرەیێ كوردستانێ، دژی ستەم و زۆرداریێ سەرهلداین. پێشمەرگەی و ڕۆلێن كوردستانێ بۆ ئازادیێ، بۆ ژیان و پاشەڕۆژەكا باشتر بۆ گەلێ كوردستانێ، گیانێ خوە خستەر سەر دەست و بەرهنگاری مەرگێ بوون.
ئێكڕێزی و تەبایی، هێڤێنێ سەركەفتنا سەرهلدانێ بوو كو هەموو دەستكەفتێن گەلێ كوردستانێ ژ ئازادیێ، پەرلەمانی، حوكمەتێ، فیدرالیێ و چەسپاندنا مافێن وی د دەستوورێ ئیراقا فیدرالدا بدەستڤەئینا. نوكە ژی گەلێ كوردستانێ ب هەموو پێكهاتە و هێز و ئالیێن سیاسی یێن خوەڤە، دڤێت وانەیا سەركەفتنێ ژ سەرهلدانێ وەربگرن. پێدڤیە ئێكڕێزیێ و تەباییێ و هەڤدو قبوولكرنێ و پێكڤە كاركرنێ، بكەنە هێڤێنێ سەركەفتنێ و پاشەڕۆژەكا باشتر بۆ گەلێ مە.
د ڤێ سالیادا پیرۆز دا، دووپات دكەین كو هەموو بزاڤ و شیانێن مە دێ بۆ وێ چەندێ بن هەموو پێكڤە كار بكەین بۆ بدەستڤەئینانا ئارمانجێن پیرۆز یێن سەرهلدانێ و ئەو خەونێن شەهیدان ژ پێخەمەتێ وان گیانێ خوە بەخشی. وەكو چاوان د سەرهلدانێ دا پێكڤە سەركەفتین، گەلێ كوردستانێ ب هەموو ڕەنگ و پێكهاتەیێن خوە ڤە ب سەركەفت، نوكە ژی سەركەفتن و مسۆگەركرنا پشەڕۆژەكا باشتر بۆ گەلێ كوردستانێ، تنێ ئێكڕێزی و تەبایی و پێكڤەكاركرن و هەڤدو قبوولكرنە.

مەكتەبا سیاسی یا پارتی دیموكراتی كوردستان ب هەلكەفتا سالیادا سەرهلدانا پیرۆز 1991 پەیامەك بەلاڤكر و ئەڤە ژی پشكەكا وێ یە.
پێنجێ ئادارێ ڕۆژەكا پڕ ڕامان و گرنگە د بزاڤا ڕزگاریخوازا گەلێ مە دا و هەموو كوردستانیێن ب وەفا و خۆراگر و وەرچەرخانەكا دی یا زنجیرەیا خەباتا گەلێ مە ب هەموو تەخ و چین و پێكهاتەیێن خوەڤە.
ئەو سەرهلدانا كو بەردەوام جهێ شانازیێ یە بۆ دیرۆكا بزاڤا ڕزگاریخوازا كوردی بۆ گەهشتن ب ئارمانجێن مە یێن ڕەوا و بدەستڤەئینانا مافێن مە یێن پێشێلكری، بەرهەمێ خەبات و خوینا ڕۆلێن گەلێ مە و پێشمەرگێن قەهرەمان بوو.
سەرهلدانا پیرۆز ب بڕیارا بەرەیێ كوردستانی و سەركردایەتیا سیاسی و هێز و ئالیێن سیاسی یێن كوردستانی و ب پشكداریا جەماوەرێ دلسۆز، بەرنامە بۆ هاتبوو داڕێشتن و ل 5 ئادارا 1991 ل باژێرێ ڕانیە دەرازینکا سەرهلدانێ دەستپێكر و پاشی هەموو باژێر و باژێركێن كوردستانێ ڤەگرت ب كەركووكا دلێ كوردستانێ ژی ڤە.
سەرهلدان، پێدڤیەكا دیرۆكی و پێنگاڤەكا وێرەك و ڕەوا یا گەلێ مە بوو، پشتی چەندین سالێن خەبات و قوربانیدانێ ئەو سەركەفتنا مەزن بدەستڤەهات و كوردستانیان سەلماند كو ل دووماهیێ ب بیروباوەریێن ڕاستەقینەیێن نیشتمانپەروەری و خۆراگری و گیانێ شۆرەشگێرانە، گەلێ ستەم لێ هاتیە كرن دێ هەر گەهیتە ئارمانجێن خوە.
ژ دەستكەفتێن هەرە گرنگ یێن سیاسی یێن سەرهلدانێ ئەزموونەكا نوو یا حوكمڕانیێ بوو، كو بڕیاردان بوو ل سەر سیستەمێ فیدرالیێ، هەروەسا ل 15 گۆلانا 1992 جڤاتا نیشتمانی یا كوردستانی هاتە هەلبژارتن و حوكمەتا كوردستانێ پێكهات بۆ بڕێڤەبرنا كاروبارێن هەرێمێ.
ب درێژیا وێ ئەزموونا هەرێما كوردستانێ كو شەرعیەتا قانوونی یا خوە هەیە، ئارمانجێن گەلێ مە و كوردستانیان د وێ هەرێمێ دا ب گۆرەی كارنامەیا كابینەیێن حوكمەتێ دهاتە ئەنجامدان ب ڕێكا پرۆژەیێن گرنگ و ستراتیژی بۆ ئاڤاكرنا ژێرخانەیا ئاڤەدانكرنێ و بنیاتا ژیارا وەلاتیان، هەورەسا تێكرایا بوارێن ئاسایش و پیشەسازیێ، ساخلەمیێ، چاندنێ، پەروەردەیێ، گەشتوگوزارێ و پرۆژەیێن خزمەتگوزاری یێن دی .
ئەڤرۆ ڕەوشا سیاسی یا كوردستانێ و ئیراقێ و دەڤەرێ ل بەردەم كۆمەكا گورانكاریان دایە، كو چارەنڤیسێ هەرێمێ و وەلاتیێن وێ پێڤە گرێدایە، لەوما مە زێدەتر پێدڤی ب هەماهەنگیێ و هەڤدەنگیێ یە بۆ وێ چەندێ ڕۆلێ خوە یێ گرنگ ببینین و پێگەهێ سیاسی و دیپلۆماسی یێ هەرێمێ ب هێزتر بكەین. ل سەر ئاستێ هەرێمێ هیڤیدارین هەموو هێز و ئالیێن سیاسی هەماهەنگیا زێدەتر بكەن و نەخشەڕێكەكا گونجای دابڕێژن بۆ چارەسەركرنا گرفت و كێشەیان و ل سەر ئاستێ ئیراقا فیدرالی ژی تاكە جارەكا دی كێشە و قەیران دوبارە نەبن، دانوستاندن ل گەل حوكمەتا فیدرال ڕێكا خوە یا ڕاست بگریت بۆ چارەسەرەركرنا بابەتێن گرنگ وەكو پرسا بودجەی و شایستەیێن دارایی یێن هەرێمێ و بابەتێ پەترۆلی و پرسێن دی یێن هەلاویستی.