دادوەرێ نێڤدەولەتی ستیڤن شوێبل، د شرۆڤەكرنەكا قانوونی یا گرنگ دا، پشتەڤانییا تمام بۆ مافێن دستووری یێن حوكمەتا هەرێما كوردستانێ دكەت سەبارەت ب بەرهەمئینان و بڕێڤەبرنا كەرتێ پەترۆل و غازێ. بەری چەند رۆژان ژی وەزارەتا سامانێن سروشتی ئاماژە ب بۆچوونا ئەڤی دادوەرێ نێڤدەولەتی كربوو كو تێدا پشتبەستن كریە ب تێكگەهشتنەكا هوور د قانوونا نێڤدەولەتی و دستووری ئیراقێ دا ودوپاتی ل سەر مافێ رەوا و دەستهەلاتا قانوونی و دستوورییا حوكمەتا هەرێمێ بۆ بڕێڤەبرنا ژێدەرێن پەترۆلی و غازی.
شوێبل كو ل سالێن 1997 – 2000 سەرۆكێ دادگەها دادوەرییا نێڤدەولەتی بوو، ب هووری دستوورێ ئیراقێ یێ سالا 2005 شرۆڤە دكەت و دوپاتیێ ل ئەوێ چەندێ دكەت هەرێم، وەكو هەرێما كوردستانێ دەستهەلاتا بڕێڤەبرنا سامانێن سروشتی یا هەی ب رێكا مادەیێن 110 و 114 و 115 و 121 ژ دستووری كو ب گشتی، دەستهەلاتا پەترۆلی و غازێ نادەتە حوكمەتا فیدرالی، بەلكو ئەڤ مادە رێكێ ب هەرێمان ددەن كونترۆلا چاوانییا بەرهەمئینانا پەترۆلێ و غازێ ل دەڤەرێن خوە بكەن.
دادوەر شوێبل شرۆڤەكرنەكا هوور بۆ بڕیارێن سالا 2022 یێن دادگەها بلند یا فیدرالی ل ئیراقێ كریە كو تێدا قانوونا پەترۆل و غازێ یا سالا 2007 ل هەرێما كوردستانێ ب نە دستووری هەژمارتییە. دادوەر شوێبل دژی ئەڤێ بڕیارا دادگەها فدرالییا ئیراقێ یە و ب دیتنا وی كو مافێ حوكمەتا هەرێما كوردستانێ یە قانوون و رێنمایان بۆ كەرتێ پەترۆل و غازێ دانیت.
دادوەرێ ناڤبری هەڤڕایێ بۆچوونێن پرۆفیسۆر جەیمس كراوفۆردی یە ل دۆر مافێ حوكمەتا هەرێما كوردستانێ بۆ بڕیاردانێ ل سەر لێگەریانا پەترۆلی و دەرئینانا وی كو بێگومان ئۆتۆنۆمییەكا زێدەتر دبەخشیتە هەرێما كوردستانێ. ل دوماهیێ، بۆچوونێن قانوونی یێن دادوەر شوێبل پشتەڤانییەكا تمامە ل مافێن دستووری یێن هەرێما كوردستانی كو رێكێ خوەش دكەت بۆ حوكمڕانییەكا ب هێز و سەربخوە د رێڤەبرنا ژێدەرێن پەترۆل و غازی.

سەرۆكێ فەرمانگەها پەیوەندیێن دەرڤە یێن حوكمەتا هەرێما كوردستانێ راگەهاند: گرۆپێن ژ دەرڤەی قانوونێ بزاڤێ دكەن ئالۆزیێ بێخنە د ناڤبەرا بەغدا و هەولێرێ دا، هەروەسا دیاركر ژی: پێدڤیە حوكمەتا فیدرالی سنۆرەكی بۆ هێرشێن ئەڤان گرۆپێن ژ دەرڤەی قانوونێ دابنیت و سەروەریا ئاخا هەرێما كوردستانێ بپارێزیت.
سەفین دزەیی، سەرۆكێ فەرمانگەها پەیوەندیێن دەرڤە یێن حوكمەتا هەرێما كوردستانێ، راگەهاند: ئەو هێرشێن ل سەر هەرێما كوردستانێ دهێنە كرن شەرمزار دكەین، مخابن ئەو هێرشە دوبارە و دەهـ بارە بووینە، دڤێت حوكمەتا فیدرال ب كریار پێنگاڤەكا رژد ب هاڤێژیت بەرامبەر ئەوێ كریارێن نە پەسەند كو دژی مرۆڤایەتیێ و خەلكێ هەرێما كوردستانێ دهێنە ئەنجامدان، هەر ژ راگرتنا پەترۆلا هەرێما كوردستانێ.
دیاركر: وەكو زنجیرەیەكێ چەندین كریارێن نەپەسند دژی خەلكێ هەرێما كوردستانێ دهێنە ئەنجامدان، هەر ژ راگرتنا پەترۆلا هەرێما كوردستانێ، بڕینا بودجەی، هێرشێن درۆنی و مۆشەكی و هەتا دگەهیتە بجهئینانا پڕۆسەیا ئەنجامدانا هەلبژارتنان، ئەو هەموو كریارێن نە رەوانە دژی قەوارەیێ هەرێما كوردستانێ.
سەفین دزەیی گۆت ژی: ئەم هەڤپشكێن حوكمەتا فیدرالی نە، بەری ئەڤ حوكمەتا نوو پێك بهێت كارنامەیەك هەبوو، نەخشەرێكەك هەبوو، پێدڤیە ئەو نەخشەرێكە وەكو خوە بهێتە بجهئینان».
باس ل ئەوێ چەندێ ژی كر: سەرۆك وەزیرێن ئیراقێ بزاڤا چارەسەركرنا كێشەیان ددەت و یێ رژدە د كارێن خوە دا، بەلێ هندەك گرۆپێن ژ دەرڤەی قانوونێ یێن هەین بزاڤێ دكەن ئالۆزیێ بێخنە پەیوەندیێن بەغدا و هەولێرێ.
ل دۆر ڤەكێشانا هێزێن هەڤپەیمانان ژ ئیراقێ، سەرۆكێ فەرمانگەها پەیوەندیێن دەرڤە یێن حوكمەتا هەرێما كوردستانێ، دبێژیت: هەتا نوكە هیچ بزاڤەكا ب شێوەی نینە، بەلێ زوو بیت یان درەنگ هێزێن بیانی دێ هەر ژ ئیراقێ دەركەڤن، بەلێ پێدڤیە د چارچۆڤەیەكێ گونجای دا بیت ئەو دەمێ كو ئیراق یا سەقامگیر بیت، ل سالا 2011 دەمێ هێزێن ئەمریكی ژ ئیراقێ دەركەفتین، حوكمەتا ئیراقێ راگەهاندبوو كو لەشكرێ ئیراقی یێ هاتیە مەشقدان و یێ بەرهەڤە ئیراقێ بپارێزیت، بەلێ مخابن مە دیت چاوان ل سالا 2014 ئەوی لەشكری شكەستن خوار».
گۆت ژی: ڤەكێشانا هەڤپەیمانان د نوكە دا د بەرژەوەندیا ئیراقێ دا نینە د دەمەكی دا كو داعش هێشتا گەفەكا جدییە، وەلات باش ئەوێ چەندێ دزانن و هەست ب ئەوێ مەترسیێ كریە.

پێشەوا هەورامی، پەیڤدارێ حوكمەتا هەرێما كوردستانێ، بەرسڤا شیرەتكارەكێ سەرۆك وەزیرێن ئیراقێ ددەت كو پەیامەك ئاراستەی هەرێمێ كریە و دبێژیت دەست ژ دبلۆماسیەتێ بەردەن و مژوولی مووچەی بن.
پەیڤدارێ حوكمەتا هەرێما كوردستانێ دبێژیت: پرسیار ئەڤەیە، سەرەرای ب نە دستوری دەست هاتیە هاڤێتن بۆ حەفكا حەفت ملیۆن كەسان و دهێنە برسیكرن و 55 مادەیێن دستووری بەرانبەر خەلكێ هەرێما كوردستانێ هاتینە پێشێلكرن، بەلێ ئەڤ بەرێزە دبێژیت نابیت هەرێمێ لڤینێن دبلۆماسی هەبن.
پێشەوا هەورامی گۆت ژی: پێدڤیە وەلاتی ل سەرانسەری ئیراقێ كو ئەوێن شایستەیێن دارایی یێن هەرێمێ و فەرمانبەران راگرتی، كەسانێن وەكو ئەوی شیرەتكاری نە كو ب ئەوی مەژیێ شۆفینی پێداگیریێ ل سەر برسیكرنا وەلاتیێن هەرێما كوردستانێ دكەن.
ل دووماهیێ پەیڤدارێ حوكمەتا هەرێما كوردستانێ دبێژیت» ئەم د پشتڕاستین كەسێن هەڤشێوە و خودان ئەڤ هزرە ئاستەنگن ل بەردەم نێزیكبوونا هەرێما كوردستانێ و حوكمەتا فیدرال، هەروەسا شیرەتكارێن هەڤشێوەنە كو دخوازن ئاستەنگان ل بەردەم پێنگاڤێن سەرۆك وەزیران سودانی بۆ چارەسەركرنا كێشەیان ل گەل هەرێمێ دانن.

ئەندامەكێ مەكتەبا سیاسی یا پارتی دیموكراتی كوردستان راگەهاند، هەرێما كوردستانێ گرفت ل گەل هیچ دەولەتەك و ئالیەكی نینن، بەلێ ئەو دەولەت و ئالی هەردەم پێشكەفتنێن هەرێما كوردستانێ ب گەف ل سەر خوە زانی یە.
عەلی حسێن، ئەندامێ مەكتەبا سیاسی یا پارتی دیموكراتی كوردستان گوت: هەرێما كوردستانێ ب خوین و خەباتا قوربانیدانا خەلكێ شۆڕەشگێر و رێبەرییەكا حەكیم ژی كو سەركردایەتییا ئەوێ ئەزموونێ دكەت هاتیە پێكئینان.
گۆت ژی: هەرێما كوردستانێ ب گۆڕەی بنەمایێن دستووری و قانوونی رەفتار كرییە، هەكە نە گەلەك جاران ل سەر ئاستێ ئیراقێ دستوور هاتییە پێشێلكرن ب بابەتێن گرێدای مافێن گەلێ كورد ڤە.
رۆهنكر ژی: پارتی وەكو هێزەكا كاریگەر، هێزەكە كو ژیێ وێ 78 سالن، هەڤدەم رێبەرایەتییەكا مەزن ژ ئالیێ بارزانیێ نەمر بۆ مایە، هەروەسا ئەڤرۆ ژی سەرۆك مەسعود بارزانێ رێبەرایەتییا وێ دكەت، ئەركەكێ نەتەوەیی و نیشتمانی یێ ل سەر ملێن مە.
خویاكر» هەرێما كوردستانێ رێزێ ل قانوونێن نێڤدەولەتی دگریت، هەروەسا هیچ دەمەكی نەبوویە گەف ل سەر ئاسایشا نەتەوەیی و گرفت بۆ وەلاتێن دەوروبەر، هەروەسا هەرێما كوردستانێ هەردەم بزاڤكریە ل گەل بەغدا ب دانوستاندنێ و تیكگەهشتنێ گرفتان چارەسەر بكەت.
ئاماژەكر ژی: هەبوونا سەرۆكێ حوكمەتا هەرێما كوردستانێ ل داڤۆس و پەیوەندیێن نێڤدەولەتی یێن وی، هەروەسا نیشاندانا پێگەهێ هەرێما كوردستانێ چ ل سەر ئاستێ ئیراقێ، چ ل سەر ئاستێ هەرێمایەتی جهێ دلخوەشیا پشكەك ژ ئالی و دەولەتان نینە، چونكە پێشكەفتنێن گرنگ یێن هەرێما كوردستانێ ل سەر ئاستێ نێڤدەولەتی نیشان ددەت.
ئەوی ئەندامێ مەكتەبا سیاسی یا پارتی دوپاتی ل ئەوێ چەندێ ژی كر» هەرێما كوردستانێ گرفت ل گەل هیچ دەولەتەك و ئالیەكی نینە، بەلێ ئەو دەولەت و ئالی هەردەم پێشكەفتنێن هەرێما كوردستانێ ب گەف ل سەر خوە زانی یە، هەر ب ئەوێ چەندێ ژی نە راوەستیاینە و چەندین سیناریۆیێن جۆراوجۆر دروستكرینە و چەندین جاران هێرش ل سەر هەرێما كوردستانێ ئەنجامداینە.

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستانێ راگەهاند، پلانەكا نوو دژی هەرێما كوردستانێ یا هەی بۆ برسیكرنا خەلكی و فەرمانبەران، هەروەسا دبێژیت، هەمان مەژیێ شۆفینی بەرانبەر كوردان ل بەغدا حوكمڕانیێ دكەت.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان وئەندامێ لژنەیا ئابۆری ل جڤاتێ گۆت: ئەو كێشەیا كو وەزارەتا دارایییا ئیراقێ سەبارەت لیستا مووچەیێن هەرێما كوردستانێ ئاماژێ بۆ دكەت، پەیوەندی ب وەزارەتا ناڤبری ڤە نینە، چونكە پێشتر لیستا مووچەیان ژ ئالیێ هەردو دیوانێن چاڤدێرییا دارایییا فیدرالی و دیوانا چاڤدێرییا دارایییا هەرێما كوردستانێ هووربینی بۆ هاتیە كرن و هیچ كێشەیەك تێدا نەبوو.
ئەوی ئەندامێ لژنەیا ئابۆری ل جڤاتا نوونەرێن ئیراقێ گۆت ژی: پێدڤی ئەو 618 ملیار دینارێن كو بڕیار بوو بۆ هەرێما كوردستانێ بهێنە هنارتن بگەهنە هەرێمێ، چونكە پشكا هەرێما كوردستانێ یە ژ بودجەیا گشتی یا فیدرالی و پەیوەندی ب لیستا مووچەی نینە.
دوپاتكر ژی: ئاستەنگێن بەردەم چارەسەركرنا مووچەیێن هەرێما كوردستانێ، پلانەكا دی یا نوویە دژی هەرێما كوردستانێ بۆ برسیكرنا خەلك و فەرمانبەرێن هەرێما كوردستانێ.
دیاركر» رژێم ل ئیراقێ یێن هاتینە گوهۆڕین، سیستەمێ فیدرالی ل ئیراقێ یێ هەی، بەلێ هێشتا مەژیێ شۆڤینی دژی كوردان و هەرێما كوردستانێ ئەوی وەلاتی بڕێڤە دبەت.

پارێزگەها كەركووكێ د نڤیسارەكێ دا ژڤانێ ئێكەمین كۆمبوونا جڤاتا نوو یا پارێزگەها كەركووكێ دیاركر و ب رێكا ئیدارەیا جڤاتێ ژی ڤە داخوازا ئاگەهداركرنا ئەندامێن جڤاتێ كرییە بەرهەڤی ئێكەمین كۆمبوونا جڤاتا پارێزگەها كەركووكێ ببن.
نڤیسینگەها پارێزگارێ كەركووكێ دوهی سێشەمبی 30/1/2024، نڤیسارەكا هەڤپێچ ل گەل ناڤێن ئەندامێن سەركەفتی بۆ جڤاتا پارێزگەها كەركووكێ ئاراستەی هەر ئێك ژ نڤیسینگەها سەرۆك وەزیرێن ئیراقێ، جڤاتا كۆمسیارێن كۆمسیۆنا بلند یا سەربخوە یا هەلبژارتنان ل ئیراقێ و پشكا كارگێری یا جڤاتا پارێزگەها كەركووكێ كرییە، داخواز ژی ژ هەموو ئەندامێن جڤاتێ كرییە، ل نیڤرۆیا سوباهی پێنجشەمبی 1/2/2024 بەرهەڤی ئێكەمین كۆمبوونا جڤاتا پارێزگەها كەركووكێ ببن.
ل رۆژا دوشەمبییا بۆری ئەندامێن جڤاتا پارێزگەها كەركووكێ سویندا قانوونی خواند، هەروەسا حەسن مەجید، سەرۆكێ لیستا پارتی دیموكراتی كوردستان ل جڤاتا پارێزگەها كەركووكێ گوت» دێ بزاڤێ كەین رەوشا كاگێری ل كەركووكێ بۆ سەردەمێ بەری روودانێن 16 ئۆكتۆبەرێ و سەپاندنا پارێزگارەكێ خوەسەپاندی بزڤرینین و دێ كار كەین بۆ كێمكرن و نەهێلانا كاریگەریێن ئەڤ چەند سالێن بۆری ل كەركووكێ كەین».

سلێمانیی، عەزیز هەورامی:

شڕۆڤەكارێن سیاسی ئاماژێ ب ئەوێ چەندێ دكەین كو گرۆپێن چەكداری ل ئیراقێ ب پارە و چەكێ حوكمەتا ئیراقێ هەرێما كوردستانێ و بنگەهێن ئەمریكی توپباران دكەت و حوكمەتا ئیراقێ خوە ژ كریارێن ئەوان گرۆپان بێ گونەه دكەت، و دیار دكەن كو ئەڤ جۆرە كریارە بەزاندنا ئاسایشا كوردستانێ یە و ئەو گرۆپێن چەكدارێ گوهدانا سەرۆك وەزیرێن ئیراقێ ناكەن، هەروەسا دبێژیت: ل بەغدا كوردان تنێ وەزیرێ دەرڤە فوئاد خسێن یێ هەی ل سەر كێشەیێن بەغدا و هەولێرێ بهێتە سەر هێلێ.
محەمەد رەئووف، شرۆڤەكارێ سیاسی بۆ رۆژنامەیا (ئەڤرۆ) گۆت: هێرشكرن ل سەر پێگەهێن پێشمەرگەی و هێزێن ئەمریكی ل هەرێما كوردستانێ ب درۆنان، چەند سالە یا هەی، ل گەل شەڕێ غەزە، چەند وەلاتەك پشتەڤانیێ ل غەزە دكەن ژ وان ژی ئیراقە، كۆمەكا گرۆپێن چەكدار ل ئیراقێ یێن هەین كو پشكەكن ژ حەشدا شەعبی، ل گەل هەموو هێرشەكا ب درۆنان ل سەر هەرێما كوردستانێ یان پێگەهێن ئەمریكی دهێتە كرن، سەرۆك وەزیرێن ئیراقێ ئیحراج دبیت و پێدڤی دانا رۆهنكرنێ دبیت.
دیاركر ژی: كریارێن گرۆپێن چەكدار یێن ژ دەرڤەی قانوونێ راستەوخوە چەكی و پارەی ژ حوكمەتا ئیراقێ وەردگرن، ل ئاخا ئیراقێ دهێن ل پێگەهێن ئەمریكی و هەرێما كوردستانێ ددەن، حوكمەت ژی خوە ژ ئەوان گرۆپان بێ گونەه دكەت».
هەروەسا گوت» بودجەیا حەشدا شەعبی 80% هاتیە زێدەكرن، تێرا دەهان ژ ئەوان گرۆپان دكەت كو سەر ب حەشدا شەعبی نە و ناچینە ژێر هیچ بڕیارەكا سەرۆك وەزیرێن ئیراقێ كو د هەمان دەمدا فەرماندەیێ گشتیێ هێزێن چەكدارە ل ئیراقێ».
ئەوی شرۆڤەكارێ سیاسی ئاماژە كر» محەمەد شیاع سودانی، سەرۆك وەزیرانە و فەرماندەیێ گشتیێ هێزێن چەكدارە، بەلێ دەمێ كو لەشكرێ ئیراقێ هەی د بەرامبەر دا حەشدا شەعبی ل سەر شێوەیێ پاسدارێن ئیرانێ بۆ دهێتە دروستكرن، ئێدی حەشد دبن بڕیار و فەرمانێن ئەوی نابن چونكە روانگەها مەزهەبی و لەشكری یا جودایە.
خۆیاكر: كۆمبوونا بلند یا حزب و ئالیێن سیاسی و حوكمەتێ و سەرۆكایەتیا هەرێمێ و بەرپرسێن كورد ل بەغدا ل سەر پرسا نەتەوە و ئاسایشا كوردستانێ و ئێكرێزییا بەردەوام یا گرنگە، ب دیتنا مە ئێكەتی نیشتمانی كوردستان و پارتی دیموكراتی كوردستان دشێن كۆمبن، بەلێ حزبێن ئۆپۆزسیۆنێ ناهێنە كۆمبوونان چونكە ئەم یێ بەر ب هەلبژارتنان دچین».
رۆهنكر ژی: بابەتێ بەزاندنا ئاسایشا هەرێما كوردستانێ ژ ئالیێ گرۆپێن چەكدار و بودجەیا هەرێمێ، دو بابەتێن قانوونی و كارێ حوكمەتێیە، حوكمەت دێ بەردەوام بیت ل سەر دانوستاندنان ل گەل ئیراقێ بۆ چارەسەركرنا كێشەیان، بەرپرسێن كورد ل بەغدا تنێ مە وەزیرێ دەرڤە یێ هەی كو ل سەر هێلێ یە سەبارەت ئەوان بابەتان، سەرۆك كۆمار دەستهەلاتێن وی د تەشریفی نە و نەشێت چ بكەت، سەرۆكێ هەموو ئیراقێیە بەلێ تنێ كارێ پڕۆتۆكۆلی یێ هەی».
گۆت ژی: ئەاو لەشكرێ پاسدارێن ئیرانێ بەرامبەر هەولێرێ دكەت و كرییە، شەر فرۆشتنە و رێزنەگرتنە ل هەڤسنۆریێ، ئەو بهانەیا ئیران بۆ توپبارانكرنا بنگەهـ و بارەگەهێن مۆسادی دئینیت، ب تمامی ئاخڤتنێن بێ بنەمانە و ڤەكۆلینان ژی دیاركر هیچ راستی بۆ ئەوان بهانەیان نینە».
ل دووماهیێ گوت: ئەوا دهێتە كرن تنێ دژایەتییا خەلك و قەوارەیێ دستووریێ هەرێما كوردستانێ یە.

سەرۆكێ هەرێما كوردستانێ ب توندی هێرشا ل سەر هێزێن ئەمریكی ل ئوردنێ شەرمزار دكەت كو بوویە ئەگەرێ كوشتنا سێ سەربازێن ئەمریكی.
دوهی دوشەمبی 29/1/2024، نێچیرڤان بارزانی سەرۆكێ هەرێما كوردستانێ راگەهاند» ب توندی، هێرشا تیرۆرستی ل سەر هێزێن ئەمریكی ل باكوورێ رۆژهەلاتا ئوردن شەرمزار دكەم و سەرەخوەشیێ ل خێزانێن سەربازێن هاتینە كوشتن دكەم».
سەرۆكێ هەرێما كوردستانێ گۆت ژی: د ئەڤی دەمێ دژوار دا ل گەل ئەمریكا د راوەستین. هیڤیا باشتربوونا ب لەز بۆ برینداران دكەین.
ژ ئالیێ خوەڤە مەسرور بارزانی، سەرۆكێ حوكمەتا هەرێما كوردستانێ د پەیامەكێ دا ئەو هێرش ب ترسنۆك هەژمارت و گوت» هەڤخەمم ل گەل حوكمەت و خەلكێ ئەمریكا د ئەڤی دەمێ دژوار دا».
ل ئێڤاریا رۆژا ئێكشەمبی 28/1/2024، لەشكرێ ئەمریكی ئاشكرا كربوو كو ل شەڤا پێشتر هێرشەكا درۆنی ل سەر بنگەهەكێ هێزێن ئەمریكی ل ئوردن كو ب تاوەر 22 دهێتە نیاسین هاتبوو كرن، ب گۆڕەی پێزانینان سێ سەربازێن ئەمریكی هاتبوونە كوشتن و 24 دی بریندار ببوون.

شیرەتكارەكێ پەرلەمانێ كوردستانێ راگەهاند: پێدڤی بوو ئیراقێ ل بەرامبەر هێرشێن ل سەر هەولێرێ، بایكۆتا پەیوەندیێن سیاسی و دبلۆماسی، ب شێوەیەكێ دەمكی ژی با، ل گەل ئیرانێ راگەهاندبا.
د. وەعدی سلێمان، شیرەتكارێ قانوونی ل پەرلەمانێ كوردستانێ، گۆت: هێرشا مووشەكییا ئیرانێ ل سەر هەولێرێ، كارڤەدان ل سەر ئاستێ ناڤخوەیا هەرێما كوردستانێ، ئیراقێ و دەرڤە ل دووڤ خوە ئینان، ب تایبەتی كو هەلویستێ حوكمەتا ئیراقێ ل دۆر ئەڤێ چەندێ یێ باش بوو، بەلێ د ئاستێ پێدڤی دا نەبوو».
د. وەعدی گۆت ژی: ئیرانێ ب خوە راگەهاند كو ئەوێ هێرش ئەنجامدایە، بەلێ حوكمەتا ئیراقێ لژنەیا ڤەكۆلینێ پێكئینا، د دەمەكی دا وەلاتێ هێرش ئەنجامدای دانپێدان ب هێرشێ كریە، لیژنەیا ڤەكۆلینێ بۆ چیە؟».
ناڤبری باس ل ئەوێ چەندێ ژی كر» پێدڤیە ئیراق ل سەر ئاستێ نێڤدەولەتی پێنگاڤێن پێدڤی ب هاڤێژیت، بەلكو ب تنێ شەرمزاركرنا ئەوان هێرشان ژ ئالیێ بەغدا ڤە بەس نینە».
ئاماژەكر ژی» پێدڤی بوو ئیراقێ د كارڤەدانا ئەوێ هێرشا مووشەكێ ل سەر هەولێرێ، بالیۆزێ ئیرانێ ل بەغدا گازیكربا و ل سەر ئاستێ سیاسی و دبلۆماسی دا بایكۆتا پەیوەندیان ل گەل كربا هەكە ب شێوەیەكێ دەمكی ژی با».