ئه‌ڤرۆ نيوز:
وه‌ڤدێ بلندێ پارتى ديموكراتى كوردستان چه‌نده‌كێ به‌رى نوكه گه‌هشته باره‌گايێ مه‌كته‌با سياسى يا ئێكگرتوو ل هه‌ولێر و چه‌نده‌كێ به‌رى نوكه كۆمبوونا ناڤبه‌را وان ده‌سپێكه‌ت.
شاندێ پارتى ب سه‌رۆكاتيا فازل ميرانى سكرتێرێ مه‌كته‌با سياسى يا وێ پارتيێ و چه‌ند ئه‌ندامێن دى يێن مه‌كته‌با سياسى و ناڤدا مه‌حمود محه‌مه‌د و كاكه‌ئه‌مين نه‌جار و ئازاد به‌روارى و ژ لايێ به‌رپرسێن ئێكگرتوو ڤه هاتنه پێشوازيكرن.
ئەڤرۆ نيوز:
جێگرێ پارێزگەرێ دھۆکێ بۆ کاروبارێن ئاواران بۆ رۆژناما ئەڤرۆ ئاشکرا کر کو ژ دەستپێکا ئۆپەراسیۆنا رزگارکرنا باژێرێ مووسل و ھەتا نوکە زێدەتری چار ھزار و 621 کەس ژ باژێری ناڤھاتی ئاوارەی پارێزگەھا دھۆکێ بووینە و گۆت: “نوکە نێزیکی 700 ھزار ئاواران ل سنوورێ پارێزگەھا دھۆکێ ھەنە”.
ئیسماعیل محەمەد، جێگرێ پارێزگەرێ دھۆکێ بۆ کاروبارێن ئاواران خویا کر کو بەری ئۆپەراسیۆنا رزگارکرنا مووسل دەست پێ بکەت وان بەرھەڤیێن باش بۆ ھاتنا ئاوارێن باژێرێ ناڤھاتی کربوون و گۆت: “پشتی ئۆپەراسیۆنا رزگارکرنا باژێرێ مووسل دەست پێ کری 925 خێزانێن باژێرێ ناڤبری کو دبنە چار ھزار و 621 کەس ئاوارەی پارێزگەھا دھۆکێ بووینە و ل کەمپا (زیلکان) ھاتینە ئاکنجیکرن، بەلێ خەلکێ وان دەڤەرێن ژ لایێ پێشمەرگەی ڤە ھاتینە رزگارکرن ڤەدگەڕنە سەر مال و مولکێن خوە”.
ناڤھاتی ئاماژە دا وێ چەندێ کو نوکە وان گازا سپی ل سەر حەفت کەمپان بەلاڤکریە و ل رۆژێن داھاتی دێ ل سەر کەمپێن دی ژی بەلاڤ کەن و گۆت: “مە گازا سپی بۆ پەنابەرێن رۆژئاڤا ژی یا دابینکری و ب رێیا چەند رێکخراوان دێ گازا سپی ل سەر ئاوارێن ژ دەرڤەی کەمپان ژی ھێتە بەلاڤکرن داکو ل وەرزێ زڤستانێ چو ئاریشە نەبن”.
ل دووماھیێ جێگرێ پارێزگەرێ دھۆکێ بۆ کاروبارێن ئاواران دیار کر کو نوکە نێزیکی 700 ھزار ئاواران ل سنوورێ پارێزگەھا دھۆکێ ھەنە و رۆژانە ئاواریچن ل کەمپان ھاتینە ئاکنجیکرن ڤەدگەڕنە دەڤەرێن رزگارکری ب تایبەتی ئەو دەڤەرێن ژ لایێ ھێزێن پێشمەرگێ کوردستانێ ڤە ھاتینە رزگارکرن”.
ئەڤرۆ نیوز:
د پالەوانییا جاما ئەلماسێ نێڤدەولەتی یا لەشجوانیێ کو ل ئەسینا پایتەختی یۆنانی برێڤەچوو، لەشجوانێ کورد، کورێ دھۆکێ نزار غەزالی شیا پلەیا ئێکێ یا سەنگا خوە بدەست ڤە بینیت.
پشتی نزار غەزالی پارسال نەشیای ناسناڤی بدەستڤە بینیت، ئەڤ سالە شیا خەونا خوە کو ھەمییان چاڤەرێ دكر، بجھبینیت و مەدالییا زێری بدەستڤەبینیت.
ناڤھاتی ب سترانا (ئەز پێشمەرگەمە) نمایشا خوە دەست پێ کر و ب سەنگا ٨٥ کیلۆیان پشکداری کر و پشتی ھەڤرکیێ دگەل ٥ پشکدارێن دی پلا ئێکی بدەستڤە ئینا.
ھەر د ڤێ پالەوانییێ دا پشکدارەکێ دی یێ کورد، سەردار ئیسماعیل ب سەنگا ٩٠ کیلۆیان پشکداربوو و مەدالیا زێری بدەستڤەئینا.
ئەڤرۆ نیوز:
وەزارەتا دارایی و ئابۆری یا ھەرێما کوردستانێ ئاشکرا کر، سبە و دوسبە مووچەیێ مەھا ئیلۆنێ یێ وەزارەتێن ناڤخۆ و پلان دانان و سامانێن سروشتی دێ ھێتە دابەشکرن.
وەزارەتا دارایی و ئابووری یا حکومەتا ھەرێما کوردستانێ مووچەیێ ھندەک وەزارەتەکێن دی ئاشکرا کر و راگەھاند، رۆژانێن دوشەمبی و سێشەمبی ٢٨ و ٢٩ێ چرییا دووێ یا ٢٠١٦ێ مووچەیێ مەھا ئیلۆنێ یێ وەزارەتێن (ناڤخۆ، پلان دانان و سامانێن سروشتی) دێ ھێتە دابەشکرن.
ئەڤە د دەمەکی دایە د رۆژێن بۆری دا مووچەیێ مەھا نەھـ یێ ھندەک وەزارەتەکان ھاتە دابەشکرن و ئەڤرۆ ژی مووچەیێ وەزارەتا خواندنا بلند و ڤەکۆلینێن زانستی و چەندین دەستە و کۆمسیۆنان ھاتە دابەشکرن.
ئه‌ڤرۆ نيوز:
ئه‌ڤرۆ د كۆنگره‌يه‌كێ رۆژنامه‌ڤانى دا، پشتى ب دووماهى هاتنا هه‌لمه‌تا به‌رهنگاربوونا توندوتيژيان دژى ژنان، نێچيرڤان بارزانى سه‌رۆك وه‌زيرێن هه‌رێما كوردستانێ به‌رسڤا وێ پرسيارێ دا، ئه‌رێ راسته حوكمه‌تا هه‌رێمێ پاره هه‌نه و ناده‌ته وه‌لاتيان.
نێچيرڤان بارزانى سه‌رۆك وه‌زيرێن هه‌رێما كوردستانێ ئاماژه ب وێ يه‌كێ كر: خه‌لك يێ ب ته‌حه‌موله ل گه‌ل مه، سوپاسيا وان دكه‌ين، وان پشت راست دكه‌ين كو چ راستى بۆ وان ئاخافتنان نينن كو دبێژن حوكمه‌تا هه‌رێمێ پاره يێ هه‌ى و ناده‌نه وه‌لاتيان، ئه‌م نوكه يێ دقه‌يرانه‌كا دارايى يا دژوارداينه.
ئه‌ڤرۆ نيوز:
نێچيرڤان بارزانى سه‌رۆك وه‌زيرێن هه‌رێما كوردستانێ راگه‌هاند ئه‌گه‌ر به‌غدا يا به‌رهه‌ڤ بيت مووچه‌ى بده‌ت، ئه‌و د به‌رهه‌ڤن بۆ چاره‌كرنا كێشان.
سه‌باره‌ت كه‌يسێ كوشتنا مه‌لا وشيار ، نێچيرڤان بارزانى سه‌رۆك وه‌زيرێن هه‌رێما كوردستانێ راگه‌هاند: ده‌نگوباسێن خوش هه‌يه و ئه‌نجامێ ڤه‌كولينێ دێ بۆ براده‌رێن ئاسايشێ بجهـ هێلم.
ئەڤرۆ نيوز:
ل دووڤ راگەھاندنەکا رێڤەبەریا گشتی یا کارەبا سلێمانیێ ڕەوشا کارەبا نشتیمانی ل سەرانسەری ھەریما کوردستانێ دێ ئاسایی بیت و دەمژمێرێن دانا کارەبێ ژی دێ زێدە بن و تێدا ھاتیە: “ئەگەرێ کێمبوونا کارەبا نشتیمانی د ڤان رۆژێن بۆری دا بۆ دروستبوونا گڤاشتەنەکا زۆر ل سەر کۆمپانیا داناغاز ڤەدگەریێت، لێ ئاریشە ھاتە چارەکرن و دێ کارەب ئاسایی بیتەڤە”.
ھەروەسا د وێ راگەھاندنێ دا خویا ژی کریە، شەڤا 25 ل سەر 26/11 بەرھەمئینانا کارەبا نشتیمانی ل وێستگەھێن بەرھەمئینانێ ژ ئەگەرێ کێمبوونا گڤاشتنا غازا کۆمپانیا داناغاز بۆ 688 مێگاواتان کێمبوو، لەو پشکا پارێزگەھێن ھەرێمێ و دانا دەمژمێرێن دانا کارەبا نشتیمانی بۆ وەلاتیان گەلەک کێمبوو، لێ پشتی بزاڤێن کۆنترولا کارەبا ھەرێمێ و کۆمپانیا داناغاز، شیان ئاریشێ چارە بکەن و نوکە بەرھەمئینانا کارەبێ و بەر ب ئاسایبوون و باشبوونێ دچیت.
رێڤەبەریا گشتی یا کارەبا سلێمانیێ ئەگەرەکێ دی یێ کێمبوونا کارەبا نشتیمانی بۆ ھاتنا پێلا سەرمایێ و زێدەبوونا خواستا وەلاتیان بۆ کارەبێ ڤەگەراند.
ئەڤرۆ نيوز:
حوکمەتا ھەرێما کوردستانێ گۆتگۆتکا ڕاگرتنا مووچێ فەرمانبەرێن ھەرێمێ بۆ سالا بھێت ڕەت دکەت، ل دووڤ پێزانینان ژی دانا مووچێ فەرمانبەران دێ بەردەوام بیت و لایەنێن پەیوەندیدار ژی د بزاڤا باشترکرنا سیستەمێ پاشکەفتکرنا مووچەی دانە.
وەکو دیار دەمەکە ھژمارەکا دەزگەھێن راگەھاندنێ گۆتگۆتکەک بەلاڤکریە کو سالا بھێت 2017 حوکمەتا ھەرێما کوردستانێ شیان نابن، مووچێ فەرمانبەران بدەت، ئەگەر ژی بۆ دانا قەرێن کۆمپانیێن پەترۆلێ ڤەدگەریێت، راگەھاندیە ژی، ژ ئەگەرێ بەردەوامبوونا دانا قەران، حوکمەتا ھەرێمێ شیان نابن چارێکا مووچەی ژی بەلاڤ بکەت.
ل دووڤ وان پێزانینێن SNN ژ جڤاتا وەزیرێن ھەرێمێ بەلاڤکرین، د نوکە دا حوکمەتا ھەرێمێ د بزاڤا باشترکرنا سیستەمێ پاشکەفتکرنا مووچەی دایە و وان گۆتگۆتکان ژی ڕەت دکەت، یێن ھاتینە گۆتن کو حوکمەتا ھەرێمێ نەشێت بۆ سالا بھێت، د بەلاڤکرنا مووچێ فەرمانبەران دا یا بەردەوام بیت.
ھەروەسا ل دووڤ پێزانینان، لژنا روو ب رووبوونا قەیرانان چ راپۆرت ل سەر ڤێ چەندێ ل بەر دەست دا نینن کو سالا بھێت بەلاڤکرنا مووچەی دێ یا چاوا بیت، بەلکو ب تنێ د بزاڤا باشترکرنا مووچەی دایە.
دەربارەی سیستەمێ ئەلکترۆنیکرنا مووچەی ژی، پێزانین دیار دکەن کو ژ ئەگەرێ ب جھئینانا وی سیستەمی گرێبەستێن ھژمارەکا زۆر یا فەرمانبەران دێ ھێنە ھەلوەشاندن، چونکو فەرمانبەرێن راستەقینە نینن و ب رێیا حزبان بووینە فەرمانبەر ل دام و دەزگەھێن حوکمەتا ھەرێما کوردستانێ.
ئه‌ڤرۆ نيوز:
تەرمێن چار پەنابەرێن دی یێن ھەرێما کوردستانێ ھاتنە دیتن و سەرۆکێ فیدڕاسیۆنا سەرانسەریا پەنابەران ژی ئاشکرا کر کو بڕیارە تەرمێن ھەر چار پەنابەران بۆ ھەرێما کوردستانێ بھێنە ڤەگەڕاندن و گۆت: “ل یونان ژی ژ ئەگەرێ روودانەکا ئاگربەربوونێ ژنەک و زارۆیەک ژی ھاتینە سۆتن و گیانێ خوە ژدەست دایە”.
ئاری جەلال، سەرۆکێ فیدڕاسیۆنا سەرانسەریا پەنابەران بۆ رۆژناما ئەڤرۆ دیار کر کو بزاڤێن وان د بەردەوامن بۆ دیتنا تەرمێن وان کۆچبەرێن ھەرێما کوردستانێ یێن د رێیا ئورۆپا دا خەندقین و دبەرزە و ل رۆژێن بۆری ژی وان تەرمێن چار پەنابەرێن دی دیتینە کو ڤان پەنابەران د ئەڤ سالە دا د سێ روودانێن جۆدا دا گیانێ خوە ژدەستدابوون و گۆت: “نوکە تەرمێن وان چار پەنابەران ھاتینە دیتن و خەلکێ دەڤەرێن جۆدایێن ھەرێما کوردستانێ نە، بەری دو رۆژان ژی ژ ئەگەرێ روودانەکا ئاگری ژنەک و زارۆیەکێ پەنابەر ل یونان گیانێ خوە ژدەستداینە”.
ناڤھاتی خویا کر کو ئەو دگەل کەس و کار و سەرۆکاتیا جڤاتا وەزیران ئاخفتینە بۆ ڤەگەڕاندنا تەرمێن ژن و زارۆیێ ژ ئەگەرێ روودانا ئاگری گیانێ خوە ژ دەست داین و بۆ ڤێ مەرەمێ جڤاتا وەزیران داخوازا پێزانینان کریە و گۆت: “بۆ ڤەگەڕاندنا تەرمێن چار پەنابەرێن د ژی بزاڤێن مە دگەل سەرۆکاتیا جڤاتا وەزیران د بەردەوامن و بەری نوکە ژی تەرمێن چەندین پەنابەرێن ھەرێما کوردستانێ ل سەر ئەرکێ سەرۆکاتیا جڤاتا وەزیران ھاتینە ڤەگەڕاندن”.
ئه‌ڤرۆ نيوز:
دوھی جڤاتا نوونەرێن عیراقێ بدەنگێ زوورینەیا پەرلەمانتارێن شیعە، قانوونا حەشد شەعبی پەسەندکرن کو ئیمتیازێن مەزن ددەتە چەکدارێن حەشد شەعبی وھاتینە یەکسانکرن ل گەل سەرباز و پۆلیسان و خزمەتا چەکدارێن میلیشیێن شیعی دێ ھێتە ھژمارتن وەکو خزمەتا فەرمی، پەرلەمانتارەکێ کورد ژی دبێژیت، ئەڤ قانوونە ل پاشەرۆژێ دێ بیتە مەترسی ل سەر ھەرێما کوردستانێ و دووماھی ژی ب دەولەتا عیراقێ ئینا.
دکتۆر عەرەفات کەرەم، ئەندامێ جڤاتا نوونەرێن عیراقێ ژ لیستا پارتی دیموکراتی کوردستان بۆ رۆژناما ئەڤرۆ گۆت” ئەڤ پرۆژە قانوونە ب دەنگێ پتریا شیعان ھاتە پەسەندکرن، چونکی شیعان گەف کربوون ھەکە پەرلەمانتارێن لیستێن دی دەنگ ب وی پرۆژە قانوونێ نەدەن، ئەم تنێ دێ پەسەندکەین کو ھژمارا وان دبیتە 180 پەرلەمانتار ژ سەرجەمێ 328 پەرلەمانتاران.
ب دیتنا دکتۆر عەرەفاتی، ب پەسەندکرنا قانوونا حەشد شەعبی، دووماھی ب دەولەتا عیراقێ ھات و رەوشا عیراقێ دێ وەکو لوبنانێ بیت کا چاوان ل وێرێ حزب اللە ھەیە، دیسا وەکو زێرەڤانێن شۆرەشێ ژی (پاسدار) ل ئیرانێ، ئەڤ قانوونە مەزنترین گەفە ل سەر دەولەتا عیراقێ و دوھی ب پەسەندکرنا وێ قانوونێ دووماھی ب دەولەتا مەدەنی ل عیراقێ ھات و بەر ب دەولەتەکا ئایدیۆلوجی – مەزھەبی چوو و ئەڤ قانوونە دێ پرۆسا سیاسی ل عیراقێ گەلەک ب زەحمەت کەت و دوور نینە وێ پرۆسێ ب ھەلوەشینیت.
ل دۆر ھەلویستێ لیستێن کوردستانی ل جڤاتا نوونەرێن عیراقێ، ئایا کا ب شێوە رەفتار کر و کێ دەنگ ب وێ قانوونێ دا، دکتۆر عەرەفاتی گۆت” ئەم دئازاد بووین ھەر کەسێ دەنگ بۆ بدەتیان نەدەت و ھەکە ھەموو کوردان دەنگ بدژی دابا ژی، دا ھەر ھێتە پەسەندکرن، ژبەرکو پەرلەمانتارێن شیعە زوورینەیا پەرلەمانتاران پێک دئینن و دا ب دەنگێن وان ب تنێ ژی ھێتە پەسەندکرن.
سەبارەت وێ چەندێ ئایا ب ڤی شێوەی حەشد شەعبی نابیتە شوونگرێ لەشکرێ عیراقێ، ب تایبەتی تنێ بۆ شەڕێ داعشێ ھاتیە دامەزراندن ب فەتوایا سیستانی، پەرلەمانتارێ کورد دبێژیت” حەشد شەعبی بۆ دەمەکێ دیارکری ھاتبوو دامەزراندن و ھەکە شەڕێ دژی داعشێ ب دووماھی بھێت، حەشد شەعبی ژی نەمینیت و ب دووماھی بھێت، بەلێ وەسا دیارە فشارەکا مەزن یا ھاتیە کرن کو قانوونا حەشد شەعبی بەری ئازادکرنا مووسلێ بھێتە پەسەندکرن، ئەوژی ژلایێ ئیرانێ ڤە کو ئیرانێ دخوازت ھێلەک ھەبیت ل عیراقێ و دزانیت پشتی ئازادکرنا دەڤەرێن عیراقێ ژ داعشێ و نەمانا حەشد شەعبی، وێ چو کاریگەری و دەستێوەردان ل عیراقێ نامینیت.
ب دیتنا ڤێ پەرلەمانتارێ لیستا پارتی، کاکلکا ڤێ قانوونێ ئەوە کو شیعە ھەتا ھەتایێ دێ حوکمڕانیێ ل ڤی وەلاتی کەن و حەشد شەعبی دێ بەرگریێ ل ڤێ بیرۆکێ کەن، بەلێ حەشد شەعبی گەفەکا مەزنە ل سەر ھەرێما کوردستانێ ژی، چونکی ھەکە سوباھی داعش نەمینیت، دێ ماعش پەیدا بیت ئەوژی میلیشیێن شیعی نە ومن وەکو ئەندامەکێ فراکسیۆنا پارتی پێشنیارەک دا و تێدا من گۆت” ئەڤ قانوونە ل پاشەرۆژێ گەفە ل سەر ھەرێما کوردستانێ، چونکی ل گۆرەی وێ قانوونێ، حەشد شەعبی ب سەر سەرۆک وەزیران ڤەیە و دبیت مالکی جارەکا دی ببیتە سەرۆک وەزیران، یان سەرۆک وەزیرانەک بھێتە کو دژی کوردان بیت و دێ حەشد شەعبی دژی کوردان بۆ پاراستنا بەرژەوەندیا خوە بکارئینیت.
د بەرسڤا پرسیارا ئەڤرۆ دا، ئایا ب دەرکرنا قانوونەکا تایبەت ب حەشد شەعبی ڤە ودانا چەندین ئیمتازاتان بۆ چەکدارێن وێ و یەکسانیکرنا وان ب سەرباز و پۆلیسان ژروویێ مووچە و مافان دا، نابیتە دژایەتیەک راستەوخوە بۆ پێشمەرگەی کو پێشمەرگە ددستوورێ عیراقی دا وەکو پشکەک ژ سیستەمێ بەرگریێ عیراقی ھاتیە نیاسین و ھەتا نوکە حوکمەتا عیراقێ چو بودجە و پشتەڤانی بۆ دابین نەکریە، دکتۆر عەرەفاتی گۆت” ھەڤپەیمانیا نیشتمانی یا شیعی بەر ب وێ چەندێ ڤە دچیت کو عیراق پارچە پارچە ببیت، ھەتا نوکە چو مافێن پێشمەرگەی ژلایێ حوکمەتا عیراقێ ڤە نەھاتیە دان، ھەر چەندە ددستووری دا ھاتیە کو پشکەکە ژ وەزارەتا بەرگریێ و ھەتا نوکە ئەم جورعەت ناکەین بچین تانێ ل ڤێ چەندێ بدەین دادگەھا فیدرالی ژ وێ چەندێ کو ئەم دترسین ئەڤ دادگەھە یا بێ لایەن نینە و پتر ب لایێ وان ڤە بچیت، لەوما ستەمەکا مەزن یا ل پێشمەرگەی ھاتیە کرن و قانوونا حەشد شەعبی ھەموو ئیمتیازاتان ددەتە چەکدارێن وێ و ھەتا بودجە ژی بۆ حەشد شەعبی یێ ھاتیە تەرخانکرن، بەلکو ھەتاکو بەری پەسەندکرنا قانوونێ، بودجە بۆ ھاتبوو تەرخانکرن، ئەڤە ھەموو وێ چەندێ دیار دکەت کو بۆچوونەک دناڤ ھەڤپەیمانیا شیعی دا یا ھەی کو عیراقێ بەر ب پارچەبوونێ ڤە ببەت و ل ئیرانێ ھەکە ( ولایە الفقیە) ھەبیت، ل عیراقێ دێ ( ولایە المراجع) ھەبیت و و ل پاشەرۆژێ ھەکە ھەر کێشەکا ئایدیۆلۆجی یا گرێدای ب شیعان ڤە ھەبیت و ل کیرێ و ل کیش وەلاتی بیت، ئەو دێ حەشد شەعبی ھنێرن وی جھی”.
نیازی ئوگلۆ، بریاردەرێ جڤاتا نوونەرێن عیراقێ کو پەرلەمانتارەکێ تورکمانە بۆ ئەڤرۆ دیارکر کو ژ سەرجەمێ 239 پەرلەمانتارێن بەرھەڤی کۆمبوونا دوھی یا جڤاتا نوونەران بووین، 201 پەرلەمانتاران دەنگ بۆ پەسەندکرنا قانوونا حەشد شەعبی دا، نە تنێ پەرلەمانتارێن شیعە دەنگ بۆ دا، بەلکو کورد و مەسیحی و سونەیان ژی دەنگ بۆ دایە کو 10 پەرلەمانتارێن سونی دەنگ بۆ قانوونێ دا.
بەلێ دکتۆر عەرەفات کەرەم دبێژیت ئەو پەرلەمانتارێن سونی ئەوێن دەنگ بۆ پەسەندکرنا وێ قانوونێ دا د بەرنیاسن ب ( سونەیێن مالکی)، ھەر چەندە نوکە دھێتە چاڤەڕێکرن کا دێ ھەلویستێ سونەیان ژ پەسەندکرنا ڤێ قانوونێ چ بیت، وان ژی چو بۆچوونێن ئێکگرتی نینن، بەلکو بۆچوونێن وان د بەلاڤەنە و ھەر ھندەکان ھەلویست و بەرژەوەندیا خوە یا ھەی، کو ھندەک ل گەل پرۆسا سیاسی نە و ھندەک ل گەل مالکی نە و ھندەکان ژی ھەر باوەری ب پرۆسا سیاسی نینە.
ئاشکراکر ژی کو ھەر دوھی و بەری پەسەندکرنا قانوونا حەشد شەعبی، حەیدەر عەبادی سەرۆک وەزیرێن عیراقێ نامەک بۆ جڤاتا نوونەران ھنارت و داخوازکر پرۆژە قانوونا حەشد شەعبی بھێتە ڤەکێشان، ژبەر کو وی ھەست ب وێ چەندێ کربوو کو ھەکە قانوون ب وی شێوەیێ پێ ھاتیە دارێشتن بھێتە پەسەندکرن، دێ پرۆسا سیاسی ل عیراقێ تێکچیت، بەلێ ئەو داخوازە ژلایێ شیعان ڤە ل جڤاتا نوونەران ھاتە رەتکرن و قانوون ژی ھاتە پەسەندکرن
نيشاندان