ئه‌ڤرۆ نيوز:
چه‌نده‌كێ به‌رى نوكه ته‌قينه‌ك ل باژێرێ قامشلۆ يێ رۆژئاڤايێ كوردستانێ روودا و هه‌تا نوكه زه‌ره‌ر و زيانێن وێ نه‌هاتينه زانين.
ئاسايشا رۆژئاڤايێ كوردستانێ ل لاپه‌رێ خوه يێ فه‌رمى ل فه‌يسبۆكى به‌لاڤكريه كو ته‌قينه‌ك ل تاخێ پێشه‌سازى يێ نێزيك فلكا باژێرڤانيا رۆژهه‌لات روودا.
ئاماژه ب وێ چه‌ندێ ژى كريه كو ئه‌ڤ ته‌قينه د رێيا ماتۆر سكله‌كێ بۆمرێژكرى دايه.
ئه‌ڤرۆ نيوز:
ژ ئه‌ڤرۆ رۆژ دوشه‌مبى ب ده‌هان په‌نابه‌رێن كه‌مپا كاليه ل فره‌نسا ده‌ست ب چوولكرنا كه‌مێ كر.
ئاژانسا فرانس پرێس به‌لاڤكر كو پشتى ده‌سته‌لاتا فره‌نسا بڕيارا چوولكرنا كه‌مپا ناڤبرى داى، نوكه ب ده‌هان كۆچبه‌ر و په‌نابه‌ران كه‌مپ ب جهـ هێلا و بڕياره ل سه‌ر وان ده‌ڤه‌ران بهێنه به‌لاڤكرن يێن حوكمه‌تا فره‌نسا دياركرين.
ئاژانسا ناڤبرى دايه زانين ژى كو كوچبه‌ر و په‌نابه‌ران روو كريه ده‌ڤه‌رێن جودا كو ژ لايێ حوكمه‌تا فره‌نسا ڤه هاتينه دياركرن ب مه‌ره‌ما دووباره به‌لاڤكرنێ ب سه‌ر ده‌ڤه‌رێن دى و پاشان ژى بنه‌جهكرنا وان كو ژمارا وان نێزيكى 10 هزار كه‌سانه.
ئەڤرۆ نیوز:
قایمقامێ قەزا ئامێدیێ خویا کر کو ژ سەرجەمێ شەش رێڤەبەرێن ناحیێن سەر ب قەزا ئامێدیێ ڤە بڕیارە پێنج ژ وان بھێنە گوھۆڕین و دبێژیت: ئەڤ گوھارتنە د ئاساینە و ھەر چەند سالان جارەکێ دھێنە ئەنجامدان و مەرەم ژێ پتر خزمەتکرنا خەلکێ دەڤەرێ یە.
د رێورەسمەکی دا ب ئامادەبوونا ھژمارەما بەرپرسێن حزبی و حکومی و خەلکێ دەڤەرێ دوھی 23/10/2016 ڕێڤەبەرەکی نوو بۆ ناحیا سەرسنکێ ھاتە دانان و رێڤەبەرێ وێ ژی بۆ ناحیا زاویتە ھاتە ڤەگوھاستن.
ئیسماعیل مستەفا، قایمقامێ قەزا ئامێدیێ بۆ رۆژناما ئەڤرۆ دیار کر کو د وان درێورەسمان دا نەشوان حسنی وەکو رێڤەبەرێ ناحیا سەرسنکێ دەست ب کار بوو و مشیر محەمەد بەشیر، رێڤەبەرێ بەرێ یێ ناحیا سەرسنکێ بۆ ناحیا زاویتە ھاتە ڤەگوھاستن، ھەروەسا ناڤبری دەست خوەشی ل ھەموو رێڤەبەرێن ناحیان کرن یێن بەری نھا ل دەڤەرێ کار کری و پیرۆزباھی ل رێڤەبەرێن نوو یێن دھێنە دەڤەرێ کرن و ھیڤیا سەرکەفتنێ بۆ خواست.
قایمقامێ قەزا ئامێدیێ بۆ ئاشکرا ژی کر، ئەڤ گوھارتنە د ئاساینە و ھەر چەند سالان جارەکێ دھێنە ئەنجامدان و گۆت: “مەرەم ژ ڤان گوھۆڕینان پتر خزمەتکرنا خەلکێ دەڤەرێ یە، ئەز ھیڤدارم ئەڤ رێڤەبەرێن نوو یێن ل ناحیێن سەر ب قەزا ئامێدیێ ڤە دەست ب کار بووین بشێن خزمەتەکا باش یا دەڤەرێ بکەن”.
ناڤبری ئاماژە ب وێ چەندێ ژی کر، ژ سەرجەمێ شەش رێڤەبەرێن ناحیێن سەر ب قەزا ئامێدیێ ڤە پێنج ژ وانا دێ ھێنە گوھۆڕین و گۆت: “بڕیارە ئەڤرۆ 24/10 رێورەسمێ لێک گوھارتنا رێڤەبەرێ ناحیا دێرەلۆکێ بھێتە ئەنجامدان و سامی ئوشانە دێ وەکو رێڤەبەرێ ناحیا دێرەلۆکێ دەست بکار بیت”.
ئه‌ڤرۆ نيوز:
بەرپرسەکێ پارتی ل بەغدا ئاشکرا کر کو ل رۆژێن داھاتی دێ شاندەکێ حوکمەتا عیراقێ بۆ چارەسەرکرنا پرسا پەتڕۆلا ھەرێما کوردستانێ سەرەدانا ھەولێرێ کەت و گۆت: “وەزیرێ پەترۆلا عیراقێ سۆزدایە گازا سپی بۆ ھەرێما کوردستانێ فڕێکەت”.
دکتۆر تارق گەردی، جێگرێ سەرۆکێ فڕاکسیۆنا پارتی ل پەرلەمانێ عێراقێ بۆ رۆژناما ئەڤرۆ دیار کر کو ئەو وەکو لژنا پەترۆل و غازێ ل پەرلەمانێ عیراقێ دگەل وەزیرێ پەترۆلا عیراقێ کۆمبووینە و چەندین پرسێن گرنگ دگەل ھاتینە بەحسکرن و گۆت: “مە پرسیارا بەھرا ھەرێما کوردستانێ ل دۆر ھنارتنا گازا سپی دگەل وەزیرێ پەترۆلا عیراقێ کریە و نافھاتی سۆزدایە حوکمەتا عیراقێ دێ بەھرا ھەرێما کوردستانێ ژ گازا سپی فڕێکەت و بەھرا ئاوارەیێن عیراقێ یێن ل ھەرێما کوردستانێ ئاکنجی دێ جودا ھێتە ھنارتن”.
ناڤھاتی ئاماژە دا وێ چەندێ کو بڕیارە شاندەکێ بلندێ حوکمەتا عیراقێ ب سەرۆکاتیا وەزیرێ پەترۆلا عیراقێ سەرەدانا ھەرێما کوردستانێ بکەت و دگەل بەرپرسێن ھەرێما کوردستانێ و وەزارەتا سامانێن سرۆشتی پرسا ھنارتنا پەتڕۆلا ھەرێما کوردستانێ بھێتە بەحسکرن و بگەھنە رێیەکا گۆنجایی بۆ دووماھی ئینان ب پرسێن پەترۆل و غازێ دناڤبەرا ھەر دو حوکمەتێن ھەرێم و فیدڕالدا، چونکی ھەر دو حوکمەت گەھشتینە رێکەفتنێ بۆ باشترکرنا پەیوەندیان و رێکەفتن لدۆر پرسێن ھەلاویستی ئێک ژ وان پرسا ھنارتنا پەتڕۆلا ھەرێما کوردستانێ یە بۆ دەرڤە.
ئەڤرۆ نیوز:
ئاژانسەکا ناڤدار یا جیھانی دیار دکەت کو پێشمەرگە رۆلەکێ سەرەکی د شەرێ مووسلێ دا دگێریت و گەلەک دەڤەر ب دەستێ ھێزێن پێشمەرگەھی ھاتنە کۆنترول کرن و ھەکە پێشمەرگە نەبیت زەحمەتە لەشکرێ عیراقێ بشێت مووسلێ کۆنترول کەت.
ئاژانسا رویتەرز یا نووچەکان د راپۆرتەکێ دا دیار دکەت کو شەرێ مووسلێ بۆ جیھانێ ھەموویێ گرنگیا خوە یا ھەی، چونکو مووسل و رەققە وەکو دو ناڤەندێن گرنگ یێن تیرۆرستێن داعشێ نە و ب ئازادکرنا مووسلێ دێ دربەک مەزن ل داعشێ کەڤیت و ئەو یەک بۆ ھەموو جیھانێ گرنگە و ژ بەر ھندێ ژی دڤێت پتر ھاریکاریا ھێزێن پێشمەرگەی بھێتە کرن، چونکو د شەرێ نھا یێ مووسلێ دا ژی پێشمەرگێن کوردستانێ رۆلەکێ سەرەکی دگێرین و گەلەک دەڤەرێن رەخ مووسلێ ژ ئالیێ ھێزێن پێشمەرگەی ڤە ھاتنە کۆنترول کرن و بێی پێشمەرگەی زەحمەتە کو لەشکرێ عیراقێ بشێت مووسلێ ژ دەستێ داعشێ ئازاد کەت.
د پشکەکا دی یا راپۆرتا ئاژانسا رویتەرز دا ھاتیە دیار کرن کو پێشمەرگە گەلەک شارەزا بووینە و دزانن کا چاوا شەرێ داعشێ بکەن و ژ بەر ھندێ ژی ھەموو تەکتیکێن داعشێ ژ ئالیێ پێشمەرگێن کوردستانێ ڤە ھاتنە ئاشکرا کرن و ئەو نەشێن خوە ل بەر پێشمەرگەی بگرن و ئێدی ب ترومبێلێن بۆمبرێژ کری ژی نەشێن خوە رابگرن و د چەندین رۆژێن رابۆری دا پێشمەرگەی شیایە ل رەخ مووسلێ گەلەک دەڤەرێن ستراتیژی کۆنترول بکەت کو ئەو یەک بۆ ئازادکرنا مووسلێ گەلەک گرنگە.
د دووماھیا راپۆرتێ دا ئەو یەک ژی ھاتیە دیار کرن کو دڤێت ھێزێن جیھانی پتر ھاریکاریا کوردان بکەن، چونکو چەکێن پێدڤی د دەستێ پێشمەرگەی دا نینن و د بەرەیەکێ دەستپێکێ یێ شەری دانە و ژ بەر ھندێ ژی دڤێت چەکێن گران بۆ وان بھێنە دابین کرن، چونکو رەوشا نھا ل مووسلێ بۆ ھەموو جیھانێ نیشا ددەت کو یێن شەرێ سەرەکی بۆ ئازادکرنا مووسلێ دکەن کوردن و دڤێت ئەمریکا و ھەڤپەیمانیا نێڤدەولەتی یا ل دژ داعشێ ژی وەکو پێدڤی ھاریکاریا کوردان بکەن و ب تایبەتی ژی چەکێن گران بۆ وا دابین بکەن. چونکو داعش مەترسیێ ل سەر ھەموو جیھانێ و چالاکیێن وێ رێکخراوا تیرۆرستی ل ئورۆپا ژی بۆ ھەموو جیھانێ سەلماند داعشێ دوژمنێ مرۆڤاتیێ یە.
ئەڤرۆ نيوز:
دارایی ھۆشداریێ ددەت ھەکە بڕیارەکا حوکمەتا عیراقێ ل ھەرێمێ بھێتە ب جھئینان، گرانی دێ کەڤیتە بازارێن ھەرێمێ و بھایێ تشتان دێ بلند بیت، پەرلەمانتارەکێ کورد ژی دبێژیت: حوکمەتا عیراقێ بڕیار دایە باجێ ل سەر ئینانا کەلۆپەلێن ل خالێن سنووری زێدە بکەت.
د دووماھی کۆمبوونا جڤاتا وەزیرێن عیراقێ دا، بڕیارا زێدەکرنا باجێ ل سەر ئینانا کەلوپەلان ل رێیا خالێن سنووری ھاتیە دان و مەرەم ژێ زێدەکرنا داھاتی یە و بزاڤەکە ژی بۆ پشتەڤانیکرنا بەرھەمێ ناڤخوە.
د ڤی واری دا قادر محەمەد، ئەندامێ لژنا دارایی ل جڤاتا نوونەرێن عیراقێ خویا کر، ھەکە عیراق بڕیارا زێدەکرنا باجێ ل سەر ئینانا کەلوپەلان ل رێیا خالێن سنووری دەربێخیت، دێ ھەرێمێ ژی ڤەگریت، چونکو خالێن سنووری یێن ھەرێمێ گومرگێن ئتحادی نە و سەر ب حوکمەتا عیراقێ ڤە نە.
قادر محەمەد بۆ NNA گۆت: “ئەوا ب مەترسی ژ ب جھئینانا ڤێ بڕیارێ ئەوە، ئێکسەر بھایێ ئینانا ھندەک کەلوپەلان ل بازارێن ھەرێما کوردستانێ دێ گران بیت”.
ئه‌ڤرۆ نيوز:
چه‌كدارێن داعش سپێده‌هيا ئه‌ڤرۆ هێرش كره سه‌ر سه‌نگه‌رێن پێشمه‌رگه‌ى ل ميحوه‌رێ رۆژئاڤايێ شنگال و پێشمه‌رگه‌ى ژى ب دژوارى به‌رسڤا وان دا و حه‌فت ترۆمبێل تێك شكاندن و نێزيكى 15 تيرۆرستان ژى ژێ كوشتن.
عه‌ميد سمێ بۆسه‌لى فه‌رماندێ ميحوه‌رێ شنگال يێ هێزێن پێشمه‌رگه‌ى راگه‌هاند كو ئه‌ڤرۆ سپێدێ زوو ژماره‌كا چه‌كدارێن داعش هێرش كره سه‌ر سه‌نگه‌رێن پێشمه‌رگه‌ى ل به‌ره‌يێ رۆژئاڤايێ شنگال و ب دژوارى به‌رسڤ لێ هاته دان.
ئه‌ڤى فه‌رماندێ پێشمه‌رگێ كوردستانێ گۆت: “داعش ژ سێ لايان ڤه هێرش كر و ترۆمبێلێن گوله‌نه‌بڕ و پرێن ده‌مكى د ڤێ هێرشا خوه دا ب كار ئينابوون”.
حه‌فت ترۆمبێلێن داعش د ڤێ هێرشێ دا هاتنه ژناڤبرن هه‌ر وه‌كو عه‌ميد سمێ بۆسه‌لى گۆتى و دا زانين ژى كو نێزيكى 15 چه‌كدارێن داعش ژى هاتنه كوشتن بێ كو پێشمه‌رگه‌ى چو زيانێن گيانى هه‌بن.
ئەڤرۆ نيوز:
وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ کاراکرنا سیستەمێ زانکۆلاین راگەھاند و ھەر ژ ئەڤرۆ قوتابیێن دەرچوویێن 12 ئامادەیی دشێن داخوازا وەرگرتنێ ل زانکۆ و پەیمانگەھێن ھەرێمێ پێشکێش بکەن.
ھێمن شوانی، رێڤەبەرێ راگەھاندنا وەزارەتا خواندنا بلند و ڤەکۆلینێن زانستی ئاشکرا کر، دوھی 23/10/2016 زانکۆلاین ھاتە کاراکرن و قوتابی دشێن فۆرمێ پڕ بکەن و بۆ خەندان گۆت: “زانکۆلاین بۆ دەمێ 15 رۆژان دێ یا کارا بیت و قوتابی دشێن د وی دەمی دا داخوازێن خوە پێشکێشی وەزارەتا خواندنا بلند بکەن، دا کو بۆ سالا خواندنێ 2016 – 2017 ل زانکۆ و پەیمانگەھێن ھەرێمێ بھێنە وەرگرتن”.
وەزارەتا خواندنا بلند خویا ژی کریە، ئەوێن ھەتا نوکە یوزەرنەیم و پاسورد وەرنەگرتین، دشێن ب رێیا سایتێ زانکۆلاین ل ئۆپشنێ (چوونە ژوور بۆ وەرگرتنا پەیڤا تێپەر) پشتی بەرسڤدانا حەفت پرسیاران پاسورد و یوزەرنەیمێ تایبەت ب خوەڤە وەربگرن.
ژ بلی وەرگرتنا قوتابیان ب رێیا سیستەمێ زانکۆلاین، وەزارەتا خواندنا بلند و ڤەکۆلینێن زانستی بۆ ئەڤ سالە دەست ب سیستەمەکێ نوو کر بوو بۆ وەرگرتنا راستەوخوە یا قوتابیان ل ھندەک پشکێن زانکۆیێن ھەرێما کوردستانێ و گۆت: “ژ سەرجەمێ 520 پشکان، سیستەمێ نوو یێ وەرگرتنا قوتابیان ل 108 پشکان ھاتە ب جھئینان و پێنج ھزار و 689 قوتابیان پێشکێش کربوو و د ئەنجام دا سێ ھزار و 425 قوتابی ھاتنە وەرگرتن”.
ئه‌ڤرۆ نيوز:
ده‌سته‌يا سه‌ربه‌خو يا مافێ مرۆڤى راگه‌هاند كو رۆمالا راسته‌خو يا كه‌نالێن راگه‌هاندنێ ل به‌رۆكێن شه‌رى، زيان ب پێشمه‌رگه‌ى گه‌هانديه، و بويه ئه‌گه‌ر كو زيان ب پلانا پێشمه‌رگه‌يێ كوردستانێ بگه‌هيت و دياركريه: پێدڤيه ده‌زگه‌هێن راگه‌هاندنێ پێگرى وان رێنما و قانوونان بن كو بۆ رۆژنامه‌ڤانێن ل به‌رۆكێن شه‌رى ده‌ركه‌ڤتين.
نيشاندان