ئەڤرۆ نیوز:
سەرۆکێ دەستەیا نەزاھێ ئاشکرا کر، نوکە کار ل سەر 25 بادەکێن گەندەلیێ د قۆناغا دووماھیێ دانە و بڕیارە بۆ دووماھیا ئەڤ سالە بھێنە ھنارتن بۆ ھەمبەر دادگەھێ ھەتا گەندەلکار بھێنە سزادان، زۆربەیا گەندەلیێ ژی ل سنورێ پارێزگەھا دھۆکێ نە، ھەروەسا دیارکر ژی، رێنمایی دێ بۆ فەرمانبەران ھێنە دەکرن ل دۆر وەرنەگرتنا بەرتیلا و سەرۆکایەتیا ھەرێمێ یا رژدە ل سەر چاکسازیێ، ب تایبەتی د کەرتێ دەرمانان دا و گۆت ژی: نوکە نەزاھە یا کار بۆ دەرکرنا چار رێنمایێن گرنگ دکەت بۆ ھەموو فەرمانبەرێن ھەرێما کوردستانێ، ئێک ژ وان رێنمایان زۆرا گرنگە، ئەو ژی ھشیارکرن و کارکرنا فەرمانبەرانە ل کەرتێ گشتی و خوە پاراستن ژ وەرگرتنا بەرتیلان.
دکتۆر ئەحمەد ئەنوەر، سەرۆکێ دەستەیا نەزاھێ ل ھەرێما کوردستانێ بۆ رۆژناما ئەڤرۆ گۆت “دەستەیا نەزاھە یا بەردەوامە ل سەر کارێ خوە بۆ نەھێلانا گەندەلیێ و سزادانا گەندەلکاران، د دەمێ نوکە دا کار ل سەر ھژمارەکا بادەکێن گەندەلیێ دھێتەکرن و نێزیکە دێ قۆناغا ڤەکۆلینێ ب دووماھی ھێت و ھێنە ھنارتن بۆ ھەمبەر دادگەھێ ھەتا بھێنە سزادان، پتریا بادەکێن گەندەلیێ ژی ل سنورێ پارێزگەھا دھۆکێ نە، چونکو ب تنێ ل پارێزگەھا دھۆکێ 10 بادەکێن گەندەلیێ ل دەستەیا دەستپاکی ل بن ڤەکۆلینێ دانە و پێشبینی دکەین ھەتا دووماھیا ئەڤ سالە 25 بادەکێن گەندەلیێ قۆناغا ڤەکۆلینێ دووماھی بھێت و بچنە ھەمبەر دادگەھێ بۆ سزادانێ.
زێدەتر دبێژیت: ھەتا نوکە ژی چەندین کەس ژ بەرپرس و وەلاتیێن ئاسایی ب تۆمەتا گەندەلیێ ھاتینە دەستەسەرکرن ب فەرمانا دادوەری، بەلێ ھندەک ژ وانا ب کەفالەت ھاتینە ئازادکرن ھەتا رۆژا دادگەھکرنێ، ب تایبەتی ئەڤێن فەرمانبەرێن حوکمەتێ، ژ بەر کو نەشێن بڕەڤن و دێ بەرھەڤی دادگەھێ بن ب کەفالەت ھاتینە ئازادکرن، بەلێ ھێشتا ژی خەلک ھەیە د ناڤا زیندانا ب تۆمەتا گەندەلیێ، بەلێ ئامارا وان ل بەر دەست نینە ھژمارا وان چەندن.
سەرۆکێ دەستەیا نەزاھێ گۆت ژی “نوکە نەزاھە یا کار بۆ دەرکرنا چار رێنمایێن گرنگ دکەت بۆ ھەموو فەرمانبەرێن ھەرێما کوردستانێ بڕیار ل ڤێ حەفتیێ ئەڤ رێنمایی ب شێوەیەکێ فەرمی بھێنە دەرکرن و دێ ل سەر فەرمانگەھێن حوکمەتێ دا ھێنە بەلاڤکرن، ئێک ژ وان رێنمایان زۆرا گرنگە، ئەو ژی ھشیارکرن و کارکرنا فەرمانبەرانە ل کەرتێ گشتی و خوە پاراستن ل وەرگرتنا رەشوێ یا کو دبێژنێ بەرتیل، ئەف دیاردا وەرگرتنا بەرتیلێ دیاردەیەکا جیھانی و بەربەلاڤە ل ھەرێما کوردستانێ ژی ھەیە، لەوڕا مە دڤێت ل گۆرەی رێکەفتنێن جیھانی فەرمانبەر ل کەرتێ گشتی کارێ خوە ب پاقژی بکەت، ھەروەسا ھژمارەک رێنمایێن دی ژی ھەنە و دێ ھێنە دان ب فەرمانبەران، پڕۆسا نەزاھێ پڕۆسەیەکا بەردەوامە، چەندین بادەک دگەھنە دەستێ و ھەموو دھێنە ڤاڤارتن و دووڤچوون بۆ دھێتەکرن، بڕیارە د شەش ھەیڤێن بۆری مە چو پێنگاڤ ھاڤێتینە ل دۆر نەھێلانا گەندەلیێ ھەموو بھێنە بەلاڤکرن و کارکرن ژی دێ بەردەوامبیت بۆ نەھێلانا گەندەلیێ.
دکتۆر ئەحمەدی دیار کر “دەستەیا نەزاھێ ژبلی ئەرکێ خوە ئەندام ل ھژمارەک لیژنەیێن نەھێلانا گەندەلیێ یا سەر ب سەرۆکایەتیا ھەرێمێ ڤە ھەنە و یێ ل سەر چەند کەرتەکا دکەن، ژ وانا چاکسازیکرن و نەھێلانا گەندەلیێ د کەرتێ دەرمانان دا، سەرۆکایەتیا ھەرێمێ یا رژدە ل سەر نەھێلانا گەندەلیێ ب تایبەتی ئەف گەندەلیا ل کەرتێ دەرمانان دا دھێتەکرن، ل دۆر بادەکا تۆمەتبارێن بازرگانی دگەل گرۆپا تیرۆرستیا داعش کری. دکتۆر ئەحمەد دبێژیت “ژ بەر کو بازرگانیکرن ل گەل چەکدارێن داعشێ زێدەتر پرسەکا ئەمنیە و ل گۆرەی قانوونا تیرۆرێ سەرەدەری ل گەل دھێتەکرن، ئەڤ بادەکە ل جھێن ئەمنیە و دادگەە دێ بڕیارێ ل سەر دەت، راستە ھژمارەکا کەسان ب تۆمەتا بازرگانیکرنێ ل گەل داعش ھاتینە گرتن، بەلێ ئەڤ پرسە ل دەستەیا نەزاھە نینە”.

ئەڤرۆ نیوز:
ب تۆمەتا گەفێن کوشتنێ و تەشھیرکرنێ ب ھەڤژینا خوە، دادگەھا توندوتیژیا خێزانی ل ھەرێما کوردستانێ فەرمانا دەستەسەرکرنێ بۆ پەرلەمانتارەکێ کورد ل پەرلەمانێ عێراقێ دەرکریە و پارێزەرێ بادەکا ھەڤژینا ئەڤی پەرلەمانتاری ژی دبێژیت، ب نڤیسارا فەرمی دادگەھێ داخوازا ھەلگرتنا پارێزبەندیێ ل پەرلەمانێ عێراقێ کریە ھەتا ئەڤ پەرلەمانتارێ تۆمەتبار ب گەفکرنێ ل ھەڤژینا خوە بھێتە دەستەسەرکرن، ھەکە پارێزبەندی ھاتە ھەلگرتن ژی دێ گەشت کرن ل ڤی پەرلەمانتاری ھێتە قەدەغە کرن.
پارێزەر ئاسۆ ھاشم، بریکارێ ھەڤژینا بەرێ یا مەسعود حەیدەر پەرلەمانتارێ کورد ل پەرلەمانێ عێراقێ بۆ رۆژناما ئەڤرۆ گۆت” مەسعود حەیدەر پەرلەمانتارێ عێراقێ ھەڤژینەکا دی ئینایە و تەشھیر ب ھەڤژینا خوە یا بەرێ کریە، لەوڕا من وەک بریکارێ ھەڤژینا ئێکێ یا مەسعود حەیدەری ل دادگەھا خێزانی و نەھێلانا توندوتیژیێ سکالا ل سەر تۆمار کریە و دادگەھێ ب تۆمەتا ناڤبرنێ فەرمانا دەستەسەرکرنی بۆ مەسعود حەیدەر دەر کریە، بەلێ ژبەر ھەبوونا پارێزبەندیێ ھێشتا پۆلیسان دەستەسەر نەکریە، دادگەھا توندوتیژیا خێزانی ب نڤیسارەکا فەرمی داخواز ل پەرلەمانێ عێراقێ کریە پارێزبەندی ل پەرلەمانتار مەسعود حەیدەر بھێتە وەرگرتن ھەتا پۆلیس بشێن دەستەسەر بکەن.
پارێزەر ئاسۆی گۆتژی” ھێشتا پەرلەمانێ عێراقێ چ بەرسڤ نەدایە، بەلێ ئەگەر پەرلەمان نوونەرێ خەلکی یە و دڤێت قانوون بھێتە بجە ئینان، ئەڤە پێدڤیە پارێزبەندی ل سەر ئەڤی پەرلەمانتاری بھێتە راکرن ھەتا بھێتە دادگەە کرن، چونکو مەسعود حەیدەری ژبلی سفکاتی و ئاخفتنێن نەھەژی گوژمەکێ پارەی ژی ل ھەڤژینا خوە یا کەڤن برینە و گەفێن کوشتنێ ژی لێ کرینە و ھەر دەمێ پەرلەمانی پارێزبەندی ل سەر راکر دێ گەشتگرن ژی لێ ھێنە قەدەغەکرن و گورەی قانوونێ دێ ھێتە سزادان، چونکی مەسعود حەیدەری سەرەرای ئینانا ھەڤژینا دویێ ل دەرڤەی قانوونێن ھەرێما کوردستانێ گەفێن کوشتنێ ل ھەڤژینا کەڤن کرینە و توندوتیژی ھەمبەر بکارئینایە.