ئه‌ڤرۆ نيوز:

پەرلەمانتارەکا بەرێ یا عێراقێ ئاماژە ب رەوشا نوکەیا عێراقێ و کاریگەریێن ئاریشەیێن د ناڤبەرا ئالیێن سیاسی دا دکەت و دبێژیت، پێدڤیە ئالیێن سیاسی لدۆر ئالۆزیێن نوکە رێککەڤن و بەرۆڤاژی عێراق نەشێت بڤێ رەوشا ولاتەکێ ئێکگرتی بمینیت، ھەروەسا دیارکر، ھزرا داعش ھاتیە بەلاڤکرن و مەترسی ھەیە پشتی گرتنا مووسل شەڕێ تولڤەکرنێ رووبدەت و ھەکە ھزرا داعش نەھێتە ژناڤبرن ئەڤە پێشبینی دکەم رێکخراوەکا مەترسیدارتر ژ گرۆپا داعش پەیداببیت و خەلکی بەر ب توندڕەویی پالدەت.
لانە محەمەد، ئەنداما خولا بەرێ یا پەرلەمانێ عێراقێ بۆ رۆژناما ئەڤرۆ گۆت” ھەکە دڤێ قۆناغێ دا لایەنێن عێراقێ پێداچوونێ ب سیاسەتا خوە نەکەن ئەڤە ولاتێ عێراقێ بەرەف پاشەڕۆژەکا نەدیار و مەترسیدارڤەچیت، پێدڤیە ھەموو لایەن لسەر ئاریشەیان رێککەڤن و ئاریشەیێن ناڤبەرا خوە چارەسەربکەن، ھەکە رێکنەکەڤن ئەڤە عێراق یا د قۆناغەکا دژواردا و ھەمبەر دیرۆکێ دێ بەرپرسبن، پێشبینی دھێتەکرن ب ئەگەرێ رێکنەکەفتنا لایەنێن سیاسی عێراق ولاتەکێ ئێکگرتی نامینیت، ژبەرکو عێراق نەشێت ب ئەڤان ھەموو ئاریشان ڤە یا بەردەوامبیت، دو سالە داعش ل سەر جڤاکێ عێراقی کار دکەت، ژلایێ جڤاکی و ئابوری و سیاسی کاریگەری لسەر رۆنشتڤانێن عێراق ھەبوویە، بتایبەتی ئەو وەلاتیێن دەڤەرێن بن کۆنتڕلا تیرۆرستێن داعش ل ئەنبار و نەینەوا، لەوڕا دووماھی ھاتنا داعش بشێوەیێ سەربازی نینە، بەلکۆ بشێوەیێ فکری دڤێت داعش بھێتە ژناڤبرن، ئەڤ خەلکێ نوکە بن دەستێ داعش مەژیێ وانا ھەموو تشتەکی قەبوول ناکەت، ژبەرڤێ چەندێ پێشبینی دھێتەکرن کارەسات ل ھندەک دەڤەرا چێبن و خەلک تۆلڤەکرنێ ژ ئێکدوو بکەن.
لانە محەمەد گۆتژی” پێدڤیە جڤاکی نێڤدەولەتی ب گشتی ھاریکاریا عێراق بکەت بۆ نەھێلانا گروپا داعش و رەڤاندنا ئەڤێ ترسا وەلاتیان چێبوی، بتایبەتی وەلاتێن عەرەبی و ئیسلامی ئەرکێ وانە کار بۆ لاوازکرنا ھزرا توندەڕەویی بکەن، چونکە داعش بناڤێ ئیسلامێ خەلک ھاندایە بۆ توندڕەویێ ئەڤەژی ئەرکێ ولاتێن ئیسلامیە، ئاینێ پیرۆزێ ئیسلامێ بشێوەیەکێ راستەقینە نیشا خەلکی بدەن، ھەکە ئەو ھزرا توندڕەو نەھێتە چارەسەرکرن، ئەز بخوە دۆر نابینم پشتی نەمانا داعش رێکخراوەکا توندڕەوا خراپتر ژ گروپا تیرۆرستیا داعش دروستببیت، خەلکی پتر بەر ب توندڕەویی پالدەت.

ئەڤرۆ نيوز:
نوونەرێ سەرۆکێ ئەمریکا د ھەڤپەیمانیا دژی داعشێ دا راگەھاند، ئۆپەراسیۆنا رزگارکرنا مووسلێ دێ گرنگترین شەڕێ سوپایێ عیراقێ بیت ل ھەمبەری تیرۆرستێن داعشێ و گۆت:( شەرێ ئۆپەراسیۆنا رزگارکرنا مووسلێ دێ یا ب زەحمەت بیت).
بریت ماکگۆرک ئاشکرا ژی کر، کو 30 ھزار چەکدار دێ پشکداریێ د شەرێ مووسلێ دا کەن و ھەموو بەرھەڤی بۆ دەستپێکرنا ئۆپەراسیۆنا کۆنترۆلکرنا مووسل یێن ھاتینە کرن.

ئه‌ڤرۆ نيوز:

ژێده‌ره‌كێ ئاگه‌هدار ئه‌ڤرۆ رۆژا دوشه‌مبى راگه‌هاند كو بڕياره‌ك ژ دادگه‌ها فيدرال ده‌ركه‌فتيه‌ كو بڕيارا لادانا جێگرێن سه‌رۆك كۆمارى نه‌يا قانوونى يه‌ و هه‌ڤدژى دستوورى يه‌.

ئه‌ڤى ژێده‌رى د داخۆيانيه‌كێ دا بۆ سۆمه‌ريه‌ نيوز گۆت: “دادگه‌ها فيدرال بڕيار دايه‌ كو ژ كارلادانا جێگرێن سه‌رۆك كۆمارى نه‌يا دستووى يه‌”.

ئه‌ڤى ژێده‌رێ ناڤێ خوه‌ ئاشكه‌را نه‌كرى گۆتژى: “بڕيارا دادگه‌هێ پشت به‌ستن ل سه‌ر ئێك ژ مادێن دستوورى كريه‌ يێن به‌حس ل هه‌لبژارتنا جێگره‌كى يان زێده‌تر ژ جێگره‌كى بۆ سه‌رۆك كۆمارى دكه‌ن.

مادێ 69 ژ دستوورێ عيراقێ دبێژيت: “دێ هێته‌ رێكخستن ب قانوون، رێيێن هه‌لبژارتنێ بۆ پۆستێ سه‌رۆك كۆمارى، دێ هێته‌ هه‌لبژارتن ب قانوون، رێيێن هه‌لبژارتنا جێگره‌كى يان زێده‌تر بۆ سه‌رۆك كۆمارى“.

ل 9ى ته‌باخا 2016ێ سه‌رۆك وه‌زيرێن عيراقێ بڕيارا هه‌لوه‌شاندنا جێگرێن سه‌رۆك كۆمار و سه‌رۆك وه‌زيران دا.

سه‌رۆك كۆمارێ عيراقێ فوئاد مه‌عصوم سێ جێگر هه‌بوون؛ نورى مالكى و ئوسامه‌ نوجێفى و هاريكارێ كاروبارێن پێكهاتنا نشتيمانى ئه‌ياد عه‌لاوى كو ل 2014ێ ژ لايێ جڤاتا نوونه‌ران ڤه‌ ده‌نگ پێ هاتبوونه‌ دان.