ئەڤرۆ نیوز:
شارەزایەکێ ئەمنی ئاماژە بڤێ چەندێ دکەت، ئاخفتنێن وەزیرێ بەرەڤانیا عێراقێ لدۆر ئازادکرنا مووسل بێی ھێزا پێشمەرگەی ھەڤدژن ل گەل بۆچوونا سەرکردەیێن عێراقی و ھەکە عێراق یا مەمنوون ژی نەبیت پێشمەرگە پشکداریێ د گرتنا مووسلدا ناکەن، لدۆر دەڤەرێن دەوروبەرێ مووسل ژی دیارکر، ھێزێن پێشمەرگەی دێ ئەڤان دەڤەرێن کوردستانی ئازاد کەن و پرسیارا چو کەس و لایەنان ژی ناکەن.
شوان محەمەد تەھا، شارەزایێ ئەمنی بۆ رۆژناما ئەڤرۆ گۆت” ئاخفتنێن وەزیرێ بەرەڤانیا عێراقێ ل گەل سەرۆک وەزیرێن عێراقێ ئێک ناگرن و ھەلویستێ وان یێ جودایە لدۆر پشکداریا ھێزێن پێشمەرگەی د شەڕێ ئازادکرنا مووسڵ دا، ھێزێن پێشمەرگەی بێی پرسیارا کەسێ بکەن، دێ دەست ب کۆنتڕۆلکرنا دەڤەرێن کوردستانیێن دەرڤەی ئیدارەیا حوکمەتا ھەرێما کوردستانێ کەن و بۆ ناف سەنتەرێ باژێڕێ مووسل ژی ژۆرەکا ئۆپەڕاسیۆنێ ل میحوەرێ مەخموور ھاتیە پێکئینان، کو تێدا ھەرێما کوردستانێ و سوپایێ عێراقێ و ئەمریکا و چەکدارێن عەشیرەتێن مووسڵ ئەندامن، چەندین جارا وەزیرێ بەڕەڤانیا ئەمریکا سەرەدانا ئەڤێ ژۆرێ کریە و ھەماھەنگی ھەبوویە، بەلێ ھەکە بەغدا یا مەمنوون نەبیت پێشمەرگە پشکداریێ د شەڕێ مووسڵ دا ناکەن، ھەکە لەشکرێ عێراقێ بشێت بێی پێشمەرگەی ھێرشێ بکەت ئەڤە پێشمەرگە یێ مەمنوونە، بلا عێراق باش بزانیت مووسڵ تکریت و حەویجە نینە ھەموو ھێزا داعش تێدایە، بێی ھەرێما کوردستانێ لەشکرێ عێراقێ نەشێت تنێ ئاوارا حەوینیت دێ چاوا مووسل ئازادکەت، سەرۆک بارزانی سەرۆکێن ھێزێن چەکدارە ل ھەرێما کوردستانێ و تنێ ئەو دێ بڕیارێ لدۆر پشکداریا پێشمەرگەی بدەن بۆ شەڕێ مووسڵ.
شوانی گۆتژی” چەندین جارا سەرۆک بارزانی تەکەزی لسەر چاوانیا ئازادرکرنا مووسڵ و پاراستنا وێ بۆ پشتی تیرۆرستێن داعش کریە، چونکە ژلایێ جوگرافی باژێڕێ مووسل وەسایە دڤێت پەیوەندی دگەل ھەرێما کوردستانێ ھەبیت و رەوشا ئەمنیا مووسڵ مەترسیە بۆسەر ھەرێما کوردستانێ، لەوڕا ئەز باوەرم ب چو شێوەیەکی بێ ھەماھەنگی و ھەڤکاریا ھەرێما کوردستانێ عێراقێ شیانێن ئازادکرنا باژێڕێ مووسل نینە و دێ زۆرا ب زەحمەت بێی ھەرێمێ پڕۆسە یا سەرکەفتی بیت، ھەرچەندە ئیرادەیەکا نێڤدەولەتی ھەیە دڤێت ئەڤسالە مووسل بھێتە ئازادکرن و سالا دوماھی ئینانا گروپا تیرۆرستیا داعشبیت ل عێراقێ، گیرۆبوونا گرتنا مووسل دێ مینیت لسەر چاوانیا پلانا گرتنا مووسل و ئەف ھێزێ بڕیارە پشکداریێ د گرتنەڤا مووسلدا دکەن.

ئەڤرۆنیۆز، سالار دۆسکی:

نەجیبا نەجیب ئەنداما پەرلەمانێ عیراقێ ژ فراکسیۆنا پارتی دیموکراتی کوردستان ئاشکراکر کو چەند ئەندامێن پەرلەمانێ عیراقێ خواستەک پێشکێشی سەرۆکاتیا پەرلەمانێ عیراقێ کربوو ب مەرەما راستڤەکرنا ھندەک خال و برگ ژ دەستورێ عیراقێ، ھەکە لژنە ژی بھێنە پێکئینان و پەرلەمان رازیبوونێ ل سەر ڤێ خواستێ دیار بکەت دبینم گەلەک یا بزحمەتەبھێتە راستڤەکرن.
ھەمان ئەنداما پەرلەمانی ئەو ژی گۆت: زحمەتا وێ ئەوە چونکە دەستورێ ھەمیشەیی عیراقێ، بێژیت پشتی راستڤەکرن ل سەر بھێتەکرن دڤێت پتریا ئەندام پەرلەمانان دەنگی ل سەر بدەن و چ رێ نین و ناگەھنە ئەنجامێ دووماھیێ، ھێشتا گۆت: ھەر راستەڤەکرنا بھێتەکرن ل گەل کاودانێن نوکە، دیسا دەستوری ئەو ماف دایە سێ پارێزگەھا کو ل سەر خالەکێ نە درازیبن ئەو راستڤەکرن دێ یا فاشل بیت.

ئه‌ڤرۆ نيوز:

رێڤەبەرێ رەگەزنامە و کاروبارێن شارستانی ل پارێزگەھا دھۆکێ ب وەکالەت دیار کر کو ل سنوورێ پارێزگەھا دھۆکێ و رێڤەبەریا وان ژڤانێ دانا کارتا نشتیمانی یا ئێکگرتی نێزیک بوویە و دبێژیت: وەکو خوە بەرھەڤکرن بۆ دەرئێخستنا کارتا نشتیمانی ھەر ژ رۆژا 31/7 ھەتا 7/8/2016 کار ل رێڤەبەریا بارێ شارستانی یا دھۆکێ دێ ھێتە راوەستاندن.
عەقید کامیران ئیبراھیم، رێڤەبەرێ رەگەزنامە و کاروبارێن شارستانی ب وەکالەت ئاشکرا کر، ل دووڤ وان رێنمایێن ژ لایێ رێڤەبەریا گشتی یا رەگەزناما بەغدا – پشکا کارتا نشتیمانی دوھی 25/7 گەھشتینە وان، وان چەند بڕیار داینە، وەکو خوە بەرھەڤکرن بۆ قووناغا نوو یا کاری ل دۆر کارتا نشتیمانی و دەرئێخستنا وێ و بۆ ئەڤرۆ گۆت: “پشتی رۆژا 7/8/2016 دێ رێڤەبەریا مە دەست ب دانا کارتا نشتیمانی کەت”.
ناڤھاتی خویا ژی کر، وەکو خوە بەرھەڤکرن بۆ قووناغا نوو یا کاری ل دۆر کارتا نشتیمانی، ھەر ژ رۆژا 31/7 ھەتا 7/8/2016 کار ل رێڤەبەریا بارێ شارستانی یا سەنتەرێ دھۆکێ دێ ھێتە راوەستاندن، ھەروەسا ھەموو تۆمارێن بارێ شارستانی یێن سالا (1957) یێن رێڤەبەریا دھۆکێ بۆ رێڤەبەریا گشتی یا رەگەزنامێ ل بەغدا – پشکا کارتا نشتیمانی دێ ھێنە ھنارتن بۆ مەرەما دەرئێخستنا کارتا نشتیمانی.
عەقید کامیران ئاماژە ب وێ چەندێ ژی کر، ئەو ھەموو وەلاتیان ئاگەھدار دکەن کو ل رۆژا 8/8/2016 و وێڤە ل رێڤەبەریا بارێ شارستانی یا دھۆکێ دەست ب دانا کارتا نشتیمانی بۆ وەلاتیان ل دووڤ سیستەمەکێ ئەلکترۆنی دێ ھێتە کرن، ئەڤ پرۆسە بۆ دەمەکێ درێژ دێ یا بەردەوام بیت و دێ ب رێیا فۆرمەکا ئەلکترۆنی بیت ل سەر مالپەرێ (www.nid-moi.gov.iq) کو ژ لایێ وەلاتیان ڤە دێ ھێتە پرکرن و رۆژا پەیوەندیێ ژ لایێ رێڤەبەریێ ڤە دێ ھێتە دیارکرن، دا کو گەلەک وەلاتی ل بەر دەریێ رێڤەبەریێ خرڤە نەبن و نەبیتە قەرەبالغ.