ئه‌ڤرۆ نيوز:

کەسەکا نێزیکی ترامپی دیار دکەت کو ترامپ پشتەڤانیێ ل دەولەتا کوردی ل عیراقێ و ھەروەسا پشتەڤانیێ ل ھەرێما کوردی ل رۆژئاڤایێ کوردستانێ دکەت و پشتی ترامپ ب فەرمی دەست ب کاری بکەت دێ ب رەنگەکێ ئاشکرا پشتەڤانیا خوە بۆ کوردان دیار کەت.
ماری لۆنگ کو کەسەکا گەلەکا نێزیکی ترامپی یە بۆ رۆژناما حوریەت یا تورکیا دیار کر کو ترامپ دێ سیاسەتا ئەمریکا ل ھەمبەر دەڤەرا رۆژھەلاتا ناڤینی گوھۆریت و وەکو ئیدارا ئۆبامای ناکەت، ترامپ دێ ل گۆر رەوشا نوو یا دەڤەرێ ھەلویستەکێ زەلالتر دیار کەت و گۆت: (پشتی ترامپ دەست ب کاری بکەت دێ ب رەنگەکێ ئاشکرا پشتەڤانیا خوە بۆ دەولەتا کوردی ل ھەرێما کوردستانێ دیار کەت و ژ بۆ ھندێ ژی دێ بزاڤێ کەت وەلاتێن جیرانێن ھەرێما کوردستانێ ژی وێ راستیێ قەبوول بکەن و ئەز باوەرم د شەرێ ل دژی داعشێ و گەلەک بابەتێن دی ئەمریکا دێ پتر ژ سالێن بۆری ھاریکاریا کوردان کەت و ئەو یەک بۆ کوردان گەلەک گرنگە و دێ ھەڤسەنگیێن ل رۆژھەلاتا ناڤین ژی ھێنە گوھۆرین).
ناڤھاتی ئەو یەک ژی دیار کر کو ئەز باوەرم ناکەم ترامپ ل ھەمبەر تورکیا چو دەستێوەردانەکێ بکەت، بەلکو دێ پتر بزاڤێ کەت کو پەیوەندیێن تورکیا و ئەمریکا ئاسایی ببن و گۆت: (لێ ل دۆر ھەرێما رۆژئاڤایێ کوردستانێ ئەز ب باوەرم دێ ترامپ بزاڤێن مەزن بکەت دا تورکیا رازی بیت و شەرێ کوردێن رۆژئاڤایێ کوردستانێ نەکەت و پەیوەندیێن خوە ل گەل کوردێن سووریێ ژی وەکو یێن عیراقێ باش بکەت).
ماری لۆنگ ل دۆر سیاسەتا ترامپی ل ھەمبەر رۆژئاڤایێ کوردستانێ ژی راگەھاند کو ترامپ دێ پشتەڤانیێ ل ھەرێمەکا کوردی ل رۆژئاڤایێ کوردستانێ کەت و دێ ل شەرێ دژی تیرۆرێ پتر ژ ئیدارا ئۆبامای ھاریکاریا ھێزێن کوردی ل سووریێ کەت و ئەز وەسا دبینم کو دێ تورکیا ژی نەچار کەت کو شەرێ کوردێن سووریێ نەکەت.
ناڤھاتیێ د دووماھیا ئاخڤتنا خوە دا ئەو یەک ژی دیار کر کو دێ ترامپ بزاڤەکا مەزن بکەت دا روسیا، ئیران و سووریا ل دەڤەرێ خوە نەکەنە ھێزەکا سەرەکی، ژ بەر ھندێ دێ بزاڤێ کەت تورکیا ژ روسیا دوور کەت و ھەروەسا دێ ترامپ بزاڤەکا مەزن ژی بکەت کو دەولەتا کوردی ل عیراقێ بھێتە ئاڤاکرن و ب ئاڤاکرنا دەولەتا کوردی دێ دەستێ ئەمریکا ل ھەمبەر وان سێ ھێزان ل رۆژھەلاتا ناڤین ب ھێز بیت و گۆت: (ترامپ دێ بزاڤێ کەت کو نەھێلیت روسیا کاریگەریێ ل ھێزێن کوردی ل رۆژئاڤایێ کوردستان بکەت و ئەز ب باوەرم دێ ژ بەر ھندێ ژی پشتەڤانیێ ل ھەرێما کوردی ل رۆژئاڤا بکەت و دێ بۆ وێ مەرەمێ ژی بزاڤێ کەت ئەردۆگانی رازی کەت، چونکو ب رازیبوونا ئەردۆگانی و ئاسایی بوونا پەیوەندیێن تورکیا ل گەل رۆژئاڤایێ کوردستانێ دێ رەوشا دەڤەرێ ب گشتی ئارام بیت و ترامپ ژی باش دزانیت د رەوشەکا وەسا دێ شێت باشتر شەرێ تیرۆرێ کەت و بەرژەوەندیێن ئەمریکا ل دەڤەرێ پارێزیت.

ئه‌ڤرۆ نيوز:

سه‌رۆك وه‌زيرێ ئيتاليا ماتيۆ رێنزى پشتى شكه‌ستنا پرۆژێ خوه‌ يێ گرێدايى راستڤه‌كرنا دستوورى ده‌ست ژ كاركێشانا خوه‌ راگه‌هاند.