دهۆك، لەزگین جۆقی:

ئیسماعیل ئەبابەكر بامەرنی بەربژارێ‌ ژمارە (15) ل سەر لیستا 190 یا پارتی دیموكراتی كوردستان تایبەت بۆ رۆژنامەیا ئەڤرۆ ڕاگەهاند، ئەو دروشمێن پارتی ل سەر كار دكەت دێ‌ ئەنجامێن باش ب دەستخوەڤە ئینیت، هەموو دروشمێن خزمەتكرنا خەلكێ‌ كوردستانێ‌ نە، ژوان دروشمان ئاڤەدانی و ئارامی و خوەڕاگری و پێكڤەژیان ئەڤە دەربڕینێ‌ ژ 14 خالان دكەت، بێ‌ گۆمان هەر حزبەكا خودانا ڤێ‌ هزرێ‌ بیت دێ‌ سەركەفتنەكا مەزن ب دەستخوەڤە ئینیت.
بەربژارێ‌ لیستا 190 یا پارتی دیموكراتی كوردستان، پ.د. ئیسماعیلی بامەرنی گۆت: ل پەرلەمانێ‌ كوردستانێ‌ دێ‌ كاری ل سەر ب جهئینانا بەرنامەیێ‌ پارتی دیموكراتی كوردستان كەین، لەورا دبێژم هەموو دروشمێن پارتی دگرێدایی ژیان و ژیارا خەلكێ‌ كوردستانێ‌ یە و بتنێ‌ ئەڤ كار و خزمەتەنە دبنە جهێ‌ دلخوەشیا خەلكێ‌ كوردستانێ‌، چ دبیاڤێ‌ ئاڤەدانكرنێ‌ دا یان ئارامی و تەناهیا وەلاتیان، یان ژی دروشمێ‌ پێكڤەژیانێ‌ چونكی هەرێما كوردستانێ‌ ئایین نەتەوەیێن جودا جودا تێدا هەنە، لەورا دڤێت دروشمێن تە دڤێت هەموو تەخ و چینێن وەلاتیێن كوردستانێ‌ بخوە بگرن، چونكی پارتی خودان جەماوەرەكێ‌ بەرفرەه و هەمی كەسێن كوردستانێ‌ دناڤ حزبا پارتی دا هەنە و كاری تێدا دكەن.
بەربژارێ‌ ژمارە (15) ل سەر لیستا 190، هەروەسا دیاركر، بۆ من جهێ‌ شانازیێی یە بەربژارێ‌ پارتی دیموكراتی كوردستان بۆ پەرلەمانێ‌ هەرێما كوردستانێ‌ بم، سۆزێ‌ ددم ب هەمی شیانێن خوە پشتی باوەریا هەوە خزمەتكرنا گەنج و لاو و ئافرەت و هەمی تەخ و چینێن جڤاكی بیێ‌ جوداهی بكەم، ببم دەنگ و رەنگێ‌ هەوە دهۆلا پەرلەمانێ‌ كوردستانێ‌ و بەرەڤانیێ‌ ژ مافێن هەوە بكەم.
پ.د. ئیسماعیل ئەبابەكر بامەرنی وەك مامۆستایێ‌ زاكۆیا دهۆكێ‌ ل كولیژا یاسایی 27 سالێن خزمەتێ‌ هەرێما كوردستانێ‌ و مللەتی دكەت، د هەمان دەمدا ل زانكۆیا نەورۆز ژی مامۆستایە، و ل هندەك پكشێن دیتر ژی وەك مامۆستا كار دكەت وەكی پشكا ڤەلۆكینا ئاشتیێ‌ و بابەتێن پێكڤە ژیانێ‌ وان پشكان دبێژیت.

رەمەزان زەكەریا:

پرۆفیسۆر د.جەگەر عەزیز عەلی ئەمین، بەربژارێ‌ ژمار 13 ل سەر لیستا 190 یا پارتی دیموكراتی كوردستان بۆ خولا شەشێ‌ یا پەرلەمانێ‌ كوردستانێ‌ بازنەیێ‌ دهۆك بەرنامەیێ‌ كارێ‌ خۆ ئاشكراكر، ئارمانجا من كار بۆ ب هێزكرنا كەرتێ‌ پەترۆلا ل هەرێما كوردستانێ‌ و ب تایبەتی ل پارێزگەها دهوكێ‌.
پرۆفیسۆر د.جەگەر عەزیز عەلی ئەمین، بەربژارێ‌ ژمار 13 ل سەر لیستا 190 یا پارتی دیموكراتی كوردستان بازنەیێ‌ دهۆك ددیدارەكێ‌ دا بۆ رۆژناما ئەڤرۆ گۆت: وەكو بەربژارێ‌ ژمار 13 ل سەر لیستا 190 یا پارتی دیموكراتی كوردستان بازنەیێ‌ دهۆك سۆزێ‌ ددەم كو ب ئاوایەكێ‌ راستگۆیانە و شێوازەكێ‌ مودرێن و شێوازەكێ‌ زانستییانە كار بكەم .
ناڤبری گۆتژی: ئارمانجا منە كار بۆ ب هێزكرنا كەرتێ‌ پەترۆل و گازێ‌ ل هەرێما كوردستانێ‌ و ب تایبەتی ل پارێزگەها دهوكێ‌ بكەم، هەروەسا دێ‌ كار بۆ چارەسەركرنا كێشەیا وزەیێ‌ و سوتەمەنیێ‌ و دێ‌ پڕۆژەیێن باش مە هەبن.
ناڤهاتی ئاشكراكر: دێ‌ ب رژدی كار بۆ پەیداكرنا دەلیڤێن كاری و خولێن راهێنانێ‌ بۆ گەنجێن دەڤەرێ‌ و پارێزگەها دهوكێ‌ بكەم، زێدەباری وان پرۆژەیێن ب هێز و سەردەمیانە بۆ ئێشمەرگەیێ‌ هەرێما كوردستانی ی و پێشئێخستنا كەرتێ‌ پەروەردێ‌ و خواندنا بلند كو ب ئەركێ‌ خوەیێ‌ سەرەكی دزانم.

دوهی دوشەمبی 7/10/2024، مەسرور بارزانی، سەرۆكێ حوكمەتا هەرێما كوردستانێ، پڕۆژەیێ (كاڤین فارم) ل سنوورێ قەزا سێمێلێ ڤەكر، كە یێ تایبەتە ب خودانكرنا چێلان و دابینكرنا ئالەفی زێدەباری كارگەهەكا سپیاتییان.
كاڤین فارم، مەزنترین پڕۆژەیێ ئاژەلداری و بەرهەمێن سپیاتییایە ل سەر ئاستێ هەرێما كوردستانێ و ئیراقێ و ب گۆژمەیێ 80 ملیۆن دۆلاران هاتییە بجهئینان. رووبەرێ پڕۆژەی سێ هزار دۆنەمێن ئەردییە و دو هزار و 500 دەلیڤەیێن كاری ب شێوەیەكێ راستەوخوە و نەراستەوخوە دێ پەیدا كەت. هەروەسا شیانێن بەرهەمئینانا 120 هزار لترێن شیری د رۆژەكێدا یا هەی، ئەڤە ژی وەدكەت بەرهەمێن ناڤخوەیی یێن ژ شیری دهێنە دروستكرن، جهێ بەرهەكێ بیانی بگریت. هەروەسا رووبەرێ كەسكاتیێ ل ڤی پڕۆژەی زێدەتر ژ 125 هزار مترێن دوجاركییە و نێزیكی 25 هزار شتل لێ هاتینە چاندن.

سەرۆكێ حوكمەتا هەرێمێ ل دەمێ ڤەكرنا وی پڕۆژەی پەیڤەكا گرنگ پێشكێشكر و ئەڤە دەقێ وێ یە:

بەری دو سالان ئەم هاتینە ڤێرێ بۆ دانانا بەرێ بنیاتێ ڤی پرۆژەی و ئەڤرۆ ئەم ل ڤێرێ نە بۆ ڤەكرنا ڤی پڕۆژەی. د دەمێ ڤان دو سالاندا كارەكێ گەلەك باش هاتییە كرن، پشتی ئەوا من دیتی، ب راستی جهێ دەستخوەشیێ و شانازیێیە كو پڕۆژەیەكێ ب ڤی شێوەی ل سەر ئاستێ هەرێما كوردستانێ دهێتە دانان ئەوژی ئێكە ژ وان پڕۆژەیێن گەلەك ستراتیژی كو ل دەڤەرا سێمێلێ هاتییە دانان.
راستە بۆ هەموو پارێزگەها دهۆكێ دێ مفا هەبیت، هەروەسا بۆ هەموو كوردستانێ ژی دێ مفا هەبیت، بەلێ گەلەك ژ وان پڕۆژەیێن ستراتیژی كو دكەڤنە دەڤەرا سێمێلێ، وەسا دیارە كو گرنگییا ڤێ دەڤەرێ بۆ پێشئێخستنا ڤان جۆرە پڕۆژەیان چەند یا بەرچاڤە. هیڤییا مە ئەوە كو خەلكێ ڤێ دەڤەرێ مفای ژ ڤان پڕۆژەیان وەربگرن. بێگومان هەژی گەلەك پڕۆژەیێن دی ژی نە، ئینشائەللا ئەوژی دێ هێنە ئەنجامدان، چ بۆ بابەتێ خزمەتگوزاری بۆ خەلكێ ڤێ دەڤەرێ، پێشئێخستنا ئابوورێ ڤێ دەڤەرێیە. یان هەر بابەتەكێ دی كو بكەڤیتە د خزمەتا هەڤوەلاتیێن كوردستانێدا، ئینشائەللا د بەرنامەی دایە ئەوژی بهێنە بجهئینان.
ئەڤ پڕۆژەیێ ئەڤرۆ ل ڤێرێ هاتییە ڤەكرن، بۆ بەرهەمئینانا شیری، ئەو رووبەرێ كو پڕۆژە ل سەر هاتییە بجهئینان، رووبەرەكێ گەلەك بەرفرهەیە و بێگومان دێ كاریگەرییەكا باش ل سەر ئابوورێ هەرێما كوردستانێ هەبیت و دێ دەلیڤەیێن كاری بۆ خەلكێ ڤێ دەڤەرێ زێدەكەت. من پرسیاركر، دیارە سەدان دەلیڤەیێن كاری ل ڤی پڕۆژەی یێن هەین و هندی بەرفرەهتر ژی ببیت، ئەڤ دەلیڤەیە دێ زێدەتر بن و خەلكێ مە نەكو تنێ ل ڤێرێ كار بكەن، بەلكو دێ فێری پسپۆریێن دی ژی بن و هێدی هێدی ئەڤ پڕۆژەیە دێ پڕۆژەیێن دی ژی د دووڤ خوە دا ئینیت.
د بەرنامەیێ حوكمەتا هەرێمێ دایە بۆ هەمەجۆركرنا ئابوورێ مە بۆ وێ چەندێ كو ئەم ب جۆرەكێ داهاتی ڤە پێگیر نەبین، بەلكو گرنگیدان ب كەرتێ چاندنێ د بیر و بۆچوونێن مە دا ئەوە كو دێ گەلەك مفا بۆ پێشئێخستنا هەموو كەرتێن دی ژی هەبیت. دەمێ كەرتێ چاندنێ پێش دكەڤیت و ئەڤ جۆرە پڕۆژە ل سەر دهێنە دروستكرن، ئەم ب وێ هیڤییێ نە كو بابەتێ ئاسایشا خوراكی ل سەر ئاستێ هەموو هەرێما كوردستانێ بهێتە دروستكرن و خەلكێ مە ئێدی نەچار نەبیتن بەرهەمێن خوارنێ ژ دەرڤە بینن یان ژی هەكە خودێ نەكەت تووشی قەیرانەكێ بووین، بابەتێ خوارنێ و ئاسایشا خۆراكی بۆ مە ببیتە كێشە و ئاریشە.
دابینكرنا خوارنێ بۆ خەلكێ كوردستانێ ئێك ژ ئارمانجێن سەرەكی یێن مە یە و ئەز یێ دلخوەشم كو دبینم ل سەر ئاستێ هەموو كوردستانێ بێی جوداهی ل هەموو پارێزگەهێن كوردستانێ، ئەڤ جۆرە پڕۆژە دهێنە ئەنجامدان، گەلەك ژوان یێن گەهشتینە ئەنجامێ دوماهیێ و هندەك ژی هێشتا دبەرنامەی دانە كو بهێنە بجهئینان.
پاراستنا ئاسایشا خۆراكی بۆ هەر وەلاتەكی، بۆ هەر نەتەوەیەكێ، بۆ هەر مللەتەكی تشتەكێ گەلەك گرنگە، خوەشحالم كو ئەڤرۆ هەرێما كوردستانێ بەر ب وێ قۆناغێ و وێ ئارمانجێ پێنگاڤان د هاڤێژیت.
هەروەكو من باسكری، دروستكرنا دەلیڤەیێن كاری بۆ خەلكێ مە، ئێك ژ وان بابەتانە كو مە هەموو دەمان خواستییە كەرتێ تایبەت هاریكار بیت ل گەل كەرتێ گشتی و حوكمەتێ، خەلك هەموو دەمان نەچار نەبیت چاڤەڕێی دمەزراندنێ بن ژ حوكمەتێ، بەلكو د ڤان جۆرە پڕۆژەیاندا، وی دەمی بڕیار یا د دەستێ هەڤوەلاتیدا بۆ وێ چەندێ ئەو بڕیارێ بدەت كو دێ ل كەرتێ گشتی كار كەت یان ل كەرتێ تایبەت. دەمێ ئەڤ پڕۆژە دهێنە بجهئینان، هەر پڕۆژەیەك، دێ پڕۆژەیەكێ دی ل دووڤ خوە ئینیت. بابەتێ پیشەسازیێ، ئەڤ جۆرە پڕۆژە پێدڤی ب ئامیرێن چاندنێ و بڕێڤەبرنێ و چاككرن و هاریكارییا پڕۆژەیێ خوەنە، ئەڤە ژی هەر پڕۆژەیەك، پڕۆژەیەكێ دی دێ ئێخیتە كاری، پڕۆژەیێن پیشەسازی ژی پشتی چاندنێ دهێن. د بەرنامێ مەدا یێ هەی، هەكە خودێ دەلیڤێ بدەت و بەردەوام بین، دێ گەلەك گرنگیێ ب كەرتێ پیشەسازی دەین تاكو ئەوژی ببیتە دەلیڤەیەكا دی و بیاڤەكێ دی بۆ خەلكێ مە تاكو بشێن هەمو كوردستانێ بەر ب پێشڤە ببەن، هەم بیاڤەكێ زێدەتر بۆ خەلكێ مە هەبیت كو د بوارێن جودا دا كار بكەن.
ڤی پڕۆژەی بێگومان كاریگەرییەكا مەزن ل سەر بازرگانیێ ژی یا هەی، مە ژ مێژە بزاڤەكا رژد كریە كو كوردستان ب بازارێن جیهانێڤە بهێتە گرێدان، بۆ وێ چەندێ دەرگەهێ هنارتنا بەرهەمێن ناڤخوەیی بۆ جیهانێ ڤەكەین. ئەم د سەركەفتی بووین د وێ چەندێدا بشێین بەرهەمێن چاندنێ ل كوردستانێ بەر ب وەلاتێن كەنداڤی و هندەك وەلاتێن دی ژی ب هنێرین. ئەڤە دەستپێكە، ئەڤ چەندە وەدكەت كو ئابوورێ كوردستانێ بكەڤیتە د بوارەكێ دی دا كو بابەتێ هنارتنا بەرهەمێن ناڤخوەیی و ئینانا بەرهەمێ دەرڤە بهێتە رێكخستن، ئەم نەچار نەبین هەموو دەمەكی مللەتەك بین تنێ تشتێ خەلكی بینین و پارەیێ مە بچیتە ژ دەرڤە. ئەڤ جۆرە پڕۆژە دەمێ بەرهەمێن ناڤخوەیی دهێتە هنارتن بۆ دەرڤە، دێ گەلەك هاریكار بن بۆ رێكخستنا بابەتێ بازرگانیێ ل گەل وان وەلاتێن كو كوردستانێ پەیوەندی ل گەل هەی. لەوما ئەز گەلەك خوەشحالم كو ئێك ب ئێك ئەڤ پڕۆژە دهێنە بجهئینان، بێگومان دێ كاریگەرییەكا مەزن ل سەر پێشئێخستنا ئابوورەكێ ب هێز بۆ كوردستانێ هەبیت.
هەروەسا گەلەك خوەشحالم كو من دیتی ل ڤێرێ رووبەرەكێ مەزن بوویە دار و كەسكاتی، ئەوژی بۆ بابەتێ ژینگەهپارێزیێ كارەكێ گەلەك باشە، ئەو بەنداڤا هەوە دروستكری بۆ كۆمكرنا ئاڤێ، ئەوژی هاریكارییەكا مەزنە بۆ وێ چەندێ ئەم باشتر مفای ژ وان نیعمەتان وەربگرین كو خودای داینە مە و نەهێلین ب هەدەر بچیت. وێ كەسكاتیێ دێ كاریگەرییەكا مەزن هەبیت ل سەر هەوای و بۆ وان ئاژەل و پەزێ ل ڤان جهان دژین. بێگومان پێدڤییە بابەتێ ژینگەهپارێزیێ ببیتە كەلتوور بۆ مە. هەر پڕۆژەیەكێ ئەم دروست بكەین، هەكە بیاڤ تێدا هەبیت كو رووبەرەكێ وان پڕۆژەیان بكەینە كەسكاتی و بكەینە شینكاتی و داروباری لێ بچینین، بێگومان دێ هاریكار بین.
ئەز وەسا دبینم كو ئەڤ پڕۆژەیێن دهێنە دروستكرن، ئێك پڕۆژە نینە، راستە ئەو ئێك پڕۆژەیە بەلێ دێ هاریكار بیت بۆ زێ چەندێ هەژمارەكا پڕۆژەیێن دی ژی پێڤە بهێنە گرێدان، ئەڤە ژی دێ بیتە ئەگەر وێ چەندێ ئابوورێ كوردستانێ بەر ب پێشڤە بچیت.

مەسرور بارزانی جێگرێ سەرۆكێ پارتی دیموكراتی كوردستان ل كەرنەڤالێ جەماوەریێ زاخۆ بۆ پشتەڤانیێ ل لیستا 190 یا پارتی دیموكراتی كوردستان راگەهاند: پارتی ل هەر جهەكی بیت ئاڤەدانێ و پێشكەفتن یا لێ هەی.
دوهی دوشەمبی 7/10/2024، مەسرور بارزانی، جێگرێ سەرۆكێ پارتی دیموكراتی كوردستان، ل كەرنەڤالا جەماوەری بۆ پشتەڤانی و سەرئێخستنا لیستا 190 یا پارتی ل باژێرێ زاخۆ بۆ دانەنیاسینا بەربژارێن لیستا 190 یا پارتی گۆت» زاخۆیا جوان و دلێ سەرۆك بارزانی، جەماوەرێ خەباتكەر و خۆڕاگرێ زاخۆ، هەبوون و دەنگێ هەوە، سەركەفتنا پارتی د هەلبژارتنێن داهاتیدا یا مسۆگەرە».
گۆت ژی» پشتی دو حەفتیێن دی ئەم دێ بەر ب هەلبژارتنێن چارەنڤیسساز چین كو پاشەڕۆژا وەلاتێ مە دێ دیار كەن، دەنگێ هەوە و بڕیارا هەوە شێوازێ حوكمڕانییا چار سالێن داهاتی یا وەلاتێ مە دێ دیار كەت، لەوما پێدڤییە، ئەم هەموو پێكڤە ب جیران و خزم و كەسوكارڤە بچینە سەر سندووقێن دەنگدانێ بۆ سەرئێخستنا لیستا 190 یا پارتی دیموكراتی كوردستان، ئەو پارتییا ژ رۆژا دامەزراندنا خوە بۆ نەهێلانا ستەم و زۆرداریێ هەتا ئەڤرۆ یا بەردەوامە وبۆ نەهێلانا ستەمكاریێ هاتییە دامەزراندن و هەتا ئەڤرۆ ژی یا بەردەوامە بۆ پاراستنا قەوارەیێ هەرێما كوردستانێ وپێناسەیا نەتەوەیی یا كوردستانێ، پارتی ژ رۆژا ئێكێ هەتا ئەڤرۆ ب پشتەڤانییا هەوە دێ بەردەوام بیت، پارتی هەر یا ئێكێ بوو و هەر دێ یا ئێكێ ژی بیت».
مەسرور بارزانی ئەوژی گۆت» پارتی بزاڤكریە كوردستانێ سەركەڤیت و مافێن خەلكێ كوردستانێ ب دەستڤەبهێن، نەحەزێن پارتی ژی بزاڤكریە پارتی بكەنە ئارمانجا خوە، پێشتر ب جۆرەكی دژایەتییا پارتی دكر و پیلان داڕێشت، نوكە ژی ب جۆرەكی پیلانان دادرێژن، بەلێ ب پشتەڤانییا خودایێ مەزن ل 20 ئۆكتۆبەرێ دێ وان پیلانان ژناڤ بەین و پارتی دێ هەر یا ئێكێ بیت».
مەسرور بارزانی داخواز ئارامیێ كر، چونكە پارتی د وێ باوەریێ دایە مللەتێ مە هەژی وێ چەندێیە د ژیانەكا ئارام و وەلاتەكێ ئارامدا بژیت و گۆت» ئەم داخوازا ئاشتەواییێ دكەین و پێكڤە بژین، چەنكو هندی ئارامی و ئاشتەوایی د وەلاتێ مە دا هەبیت، پارتی دێ زێدەتر پێشكەڤیت».
خویاكر ژی» پارتی ل هەر جهەكی بیت جهێ دەستێ وێ یێ دیارە و ئاڤەدانی یا تێدا، یێ ئاڤەدان و پێشكەفتییە، پارتی داخوازا پێكڤەژیانێ دكەت ل گەل هەموو نەتەوە و ئایینێن جودا و ئالیێن سیاسی، ب دیتنا مە پێكڤە بین دێ وەلاتێ مە جوانتر بیت و دێ ب هێزتر بین، دێ مللەتێ مە پاشەڕۆژەكا گەشتر هەبیت، پارتی هەردەم شانازیێ ب وێ چەندێ دكەت داكۆكی و پشتەڤانێ مافێن نەتەوە و ئایینایە، ل سەر وێ سۆزێ دێ بەردەوام بیت و هەتا ماینە دێ داكۆكیێ ل هەر تاكەكێ ڤی وەلاتی كەین».
مەسرور بارزانی دیاركر» پارتی درووشمێ خۆڕاگریێ یێ هەلگرتی چونكە یا خۆڕاگربوو بەرامبەر هەموو پیلان و هێرشێن ل سەر كوردستانێ، پارتی خودانا چەندین داستانایە، هزاران شەهید و پێشمەرگێن قەهرەمان و جەماوەرەكێ قەهرەمانە ژ بەر وێ چەندێ دێ خۆڕاگر بیت و دێ هەر بەردەوام بیت ژی ل خۆڕاگریێ و بەرگریكرنێ ژ مافێن گەلێ كوردستانێ».
جێگرێ سەرۆكێ پارتی دیاركر» گەلەك بزاڤ هاتنە كرن قەوارەیێ هەرێما كوردستانێ كو ب خوینا شەهیدان و خەباتا پێشمەرگەی و وەستییانا ڤی مللەتی، بهێتە ژناڤبرن یان بهێتە لاوازكرن، گەلەك ئالیێن ئەڤرۆ درووشم هەلگرتین و داخوازا دەنگێن خەلكێ كوردستانێ دكەن، دوهی و پێر پیلان دادڕێژتن ئەڤ قەوارەیە نەمینیت، دوهی و پێر بزاڤكر ل گەل دەستێن خوە ل گەل دەستێ دەرەكی تێكهەل بكەت، بزاڤكر مافێ خەلكێ كوردستانێ رادەستێ بەغدا بهێتە كرن و خەلكێ كوردستانێ تووشی شكەستنێ بكەن، بەلێ پارتی رێك نەدا، نوكە دهێن ب شێوازەكێ دی ل گەل خەلكی د ئاخڤن، بەلێ خەلك یێ هشیارە و دزانیت بۆریێ هەموویان چییە و دێ دەنگی دەتە كێ».
پتر گۆت» پەیاما مە بۆ هەموو ئالییەكی كو بزاڤا شكاندنا پارتی كریە، بۆ هەموو ئەوێن خەونان ب شكاندنا پارتی ڤە دبینن، د بێژمە وان: ئەوێن بزاڤا شكاندنا پارتی كری، تووشی شكەستنێ بوون، فێر ببن، ژ دیرۆكێ فێر ببن، پارتی ناشكێت».

شاكر ئەترووشی:

پارێزەر(ژێهات ئیبراهیم عەلی حەجی مەلۆ مزیری) بەربژارێ‌ ژمارە(25) ل سەر لیستا (190) یا پارتی دیموكراتی كوردستان بۆ هەلبژارتنێن خولا شەشێ‌ یا پەرلەمانێ‌ كوردستانێ‌، د دیدارەكێ‌ دا بۆ رۆژناما ئەڤرۆ گۆت: ل بەر رۆناهیا گۆتنا سەرۆك بارزانی كو دبێژیت (نابیت ل كوردستانێ‌ كەس ژ یاسایێ‌ مەزنتر بیت) لەورا وەك پارێزەرەك من بەرنامە هەیە و هەكە خەلكی ئەو باوەری دامە و ئەم چووینە پەرلەمانی ب هەڤكاریا هەڤالێن خوە یێن پەرلەمانتار ب رژدی ل سەر كار كەین دا یاسا پتر رۆلێ‌ خوە ببینیت و سەروەر بیت، ئانكو بێی فەرق و جوداهی ل سەر هەموویان بهێتە چەسپادن، هەروەسا دێ‌ بزاڤێ‌ كەین هندەك گوهۆڕین و راستڤەكرنان د هندەك یاسایان دا بكەین كو پتر د بەرژەوەندیا خەلكی دا بن، مەرەما من هندەك یاسا هەنە یێن بەری چەندین سالانە و بۆ وی سەردەمی ڕەنگە دگونجان، لێ‌ نوكە پێدڤی ب هندەك گوهۆڕین و راستڤەكرن و زێدەكرنانە، هەروەسا د بەرنامێ‌ من دایە هەر كەسەكێ‌ زیان گەهشتیێ‌ د كارەساتێن ئەنفالان و كیمیاباران و كۆمكۆژیان دا بهێنە قەرەبووكرن و دێ‌ بزاڤێ‌ كەین كو ئەو قەرەبوو ژ حكومەتا عیراقێ‌ بهێتە وەرگرتن، چونكو وان ئەو تاوان و كارەسات ئەنجامدینە.
بۆ گەنجان ژی مە پرۆژەیەك هەیە ئەو ژی دێ‌ بزاڤێ‌ كەین كو دەلیڤەیێن كاری بۆ وان پەیدا كەین، چو ل كەرتێ‌ حكومەتێ‌ بیت یان ژی ل كەرتێ‌ تایبەت و دێ‌ مافێن وان ل دووڤ یاسایێ‌ رێكئێخین ژ بۆ هندێ‌ ئەو ژی د ژیانەكا خۆش و ئارام دا بژین كو ئەڤە ژی مافێ‌ وانە، هەروەسا بۆ دەرچوویێن زانكۆ و پەیمانگەهان ژی مە بەرنامەیەك دێ‌ هەبیت بۆ دامەزراندنا وان و دێ‌ داخوازێ‌ ژ حكومەتا هەرێما كوردستانێ‌ كەین كو گڤاشتنان ل سەر حكومەتا فیدارل بكەن بۆ دامەزراندنا وان، هەروەسا كەس و كارێن شەهیدان ژی مە ژبیرنەكرینە، چونكو ئازادیا ئەڤرۆ ئەم تێدا بەرهەمێ‌ خوین و خەباتا وانە و هەر كارەكێ‌ ئەم بۆ وان بكەین مافێ‌ وانە و ئەم چو منەتان ل كەسێ‌ ناكەین، زێدەباری چەندین كار و پرۆژەیێن دی ژ بۆ پێشڤەبرنا هەرێما كوردستانێ‌ د هەموو وارێن ژیانێ‌ دا.

ئامێدیێ‌، مەحمود نهێلی:

هاڤین ئەحمەد ئیبراهیم ئامێدی بەربژارا هەژمار 45 سەر ب لیستا پارتی دیموكراتی كوردستان یا هەژمار 190 بۆ رۆژمانا ئەڤرۆ دیار كر، ئەو دێ‌ هەموو بزاڤان كەت ژ بۆ خزمەتكرنا گەل و وەلاتێ‌ خوە ب تایبەت ژی قوتابیان و مامۆستایان، ژ بۆ ئاڤاكرنا نفشەكێ‌ نوو كو یێ‌ گرێدایی بیت ب ئاخ و ئالا و نەتەوەیێ خۆ ڤە.
هاڤین ئامێدی گۆت ژی: ب حوكمێ‌ وێ‌ یەكێ‌ كو من 36 سالان خزمەت ل كەرتێ‌ پەروەردێ‌ هەیە دێ‌ بزاڤێ‌ كەم هەر خزمەتا ڤی كەرتی كەم و د لژنا پەروەردێ‌ دا ل پەرلەمانێ‌ كوردستانێ‌ كار كەم داكو هندەك یاسا دەربێخین یان ژی راست ڤەكەین پتر گرێدایی بیت ب قوتابیان ڤە كو قوتابی ب ئاخ و ئالا و نەتەوە ڤە بهێتە گرێدان زێدەباری وێ‌ یەكێ‌ كو مامۆستایەكێ‌ سەردەم بهێتە ئاڤاكرن مامۆستایەك بیت بشێت خزمەتا قوتابیان و وەلاتێ‌ خوە بكەت.
دیاركر ژی كر، كو هندەك هزروبیرێن جودا هەنە د وارێ‌ پەرەوردێ‌ دا كو ئەو كێماسیێن د ڤی وارێ‌ دا هەین راست ڤەكەت و بكەتە د خزمەتا قوتابی و مامۆستایان دا.
ئاماژە كر كو یا دشیانێن وێ‌ دا بیت دێ‌ د خزمەتا كەرتێ‌ پەروەردێ‌ دا كەت و چاوا د بەری نوكە دا وێ‌ خزمەتا خەلكێ‌ دەڤەرێ‌ كریە ب تایبەتی ژی پێشمەرگەیێ‌ كوردستانێ‌ د شەرێ‌ داعش د رۆلەكێ‌ بەرچاڤ هەبوویە و گۆت: هیڤیدارین ئەم بشێین باوەریا خەلكی ب دەست خوە ڤە بینین و ببینە نوونەرێن وان یێن راستەقینە د پەرلەمانێ‌ كوردستانێ‌ دا و بشێین خزمەتا وان و خێزانێن سەربلندێن شەهیدان و هەژار و كێمدەرامەتان بكەین.
هاڤین ئەحمەد ئامێدی ژ دایكبوویا سالا 1961ێ‌ یە ل باژارێ‌ ئامێدیێ‌ و خودان باوەرناما بەكالوریۆسە د وارێ‌ زانستێن بایلۆجی دا ل سالا 1985 ێ‌ و 16 سالان مامۆستا بوویە ل پەروەردا دهۆكێ‌ و ئەڤە هەیاما 20 سالانە ژی وەك سەرپەرشتا پەروەدریی خزمەتێ‌ د وارێ‌ پەروەردێ‌ دا دكەت و پشكداری د چەندین پرۆژەیێن نێڤدەولەتی دا كریە ژ بۆ پێشئێخستنا ئاستێ‌ پەروەردێ‌ ل هەرێما كوردستانێ‌.

دیدار، سالار محەمەد دۆسكی:

حەسەن سلێڤانەی، بەربژێرێ‌ هەژمارە (16) لیستا (190) یا پارتی دیموكراتی كوردستان دا، ل دور هەلبژارتنا خوە بۆ بەربژێری یا پەرلەمانێ‌ كوردستانی بۆ ئەڤرۆ گۆت: پرۆگرامێ‌ من پرۆگرامێ‌ سەرەكیێ‌ پارتی دیموكراتی كوردستان، لژێر دروشمێ‌ (ئارامی و ئاڤەدانی، پێكڤەژیان و خوراگری)، چونكە ئەز بەربژارێ‌ پارتی دیموكراتی كوردستانم دێ‌ هەمی بزاڤێن من ئەوبن دچارچووڤێ‌ ڤی پرۆگرامی دا كار و خزمەتا گەل و وەلاتێ‌ خوە بكەم.
حەسەن سلێڤانەی، بەربژارێ‌ پارتی دیموكراتی كوردستان ئەو ژی گۆت: كاركرن ژ بوو پتر پاراستن و گەشەپێدانا رەوشەنبیرییا كوردی و پێشڤەبرنا زمان و ئەدەبێ كوردییە و دابینكرنا ژیانەكا ژ هەژی بۆ خەلكێ‌ كوردستانێ‌، نڤیسەر و هونەرمەند و رۆژنامەنڤێسێن كوردستانێ‌، دیسا خورتكرنا پەیوەندیان و ئاڤاكرنا پرێن رەوشەنبیری دناڤبەرا هەمی نڤیسەرێن كورد ل هەر چار پارچێن كوردستانێ‌، كاركرن ژبو دامەزراندنا پەرتوكخانا نشتیمانی یا كوردستانێ‌ بو پاراستنا كەدو بەرهەم و بەلگەنامێن ب كوردستانێ‌ ڤە گرێدایی، كاركرن ژبوو پاراستنا مافێن مرۆڤی و ئازارێن تاكە كەسی و رێزگرتن ل بیرەوەریێن ژێك جودا، پاراستنا گیانێ‌ پێكڤە ژیانێ‌ و لێبورینێ‌ و هاندانا دیالوكێ‌ دناڤبەرا ئاین و نەتەوە و زمانێن دیتر كو ئێك ژ نیشانێن پێشكەفتنێ‌ یە، بەرەڤانیرن ژ هزرێن مرۆڤانیێ‌ و كاركرن دژی هزرێن تیرۆرێ‌، كاركرن ل سەر ئازادی یا هزری و سیاسی ل كوردستانێ‌.
حەسەن سلێڤانەیی گۆت: دەنگدان بۆ لیستا (190) دەنگدانە بۆ خوینا شەهیدێن كورد و كوردستانێ‌ و خوراگریا پێشمەرگێ‌ قەهرەمان ئەوێن شیاین دەسكەفتێن كوردستانێ‌ ب پارێزن و نەهێلێن دوژمنێ‌ مللەتێ‌ كورد جارەكا دی ئاخا پیرۆزا كوردستانێ‌ ب هەرمینن، دەنگێ‌ هەوە بۆ لیستا (190) دەنگدانە بۆ سەربلنداهی یا كوردستانێ‌ و بەردەوامی یا خزمەتا گەل و وەلاتی یە.، دەنگدان بۆ لیستا پارتی دیموكراتی كوردستان دەنگدانە بۆ پاشەرۆژەكا گەشتر بۆ خەلكێ‌ كوردستانێ‌ وەفاداری یە بۆ خەباتا مللەتێ‌ كورد ب رێیا ئازادیی.

ئامێدیێ‌، مەحمود نهێلی

ئاخچین جبرائیل دۆسكی بەربژارا ژمارە (36) سەر ب لیستا پارتی دیموكراتی كوردستان یا ژمارە( 190) بۆ رۆژناما ئەڤرۆ دیاركر، ئێكەم ئەركێ‌ وێ‌ د پەرلەمانی دا دێ‌ پاراستنا هەیبەت و شكویا وەلاتیێن كوردستانێ‌ و پاراستنا ئازادی و پێكڤە ژیانێ‌ بیت، دێ‌ بمە پارێزەرا مافێن هەموو تەخ و چینێن خەلكێ‌ كوردستانێ‌ و بجهئینانا ئەجیندایێن پارتی دیموكراتی كوردستان.
ئاخچین دوسكی زێدەتر گۆت: ئەو بەرنامەیێ‌ پارتیا مە پارتی دیموكراتی كوردستان و لیستا (190) دانای داكو دخۆلا نوویا پەرلەمانێ‌ كوردستانێ‌ كار ل سەر بكەت، كارنامەیەكا تێر و تەسەل و گشت گیر و د خزمەتا هەموو خەلكێ‌ كوردستانێ‌ و وەلاتیان دا یە.
ئاخجین دۆسكی و دیاركر، دێ‌ كار كەت بۆ دیتنا دەلیڤەیێن كاری و دامەزراندنا دەرچویێن كولیژ و پەیمانگەهان و هەروەسا گرنگی دان ب ئافرەتان و رۆل و پێگەهێ‌ ئافرەتێ‌ دێ‌ كارنامەیا وێ‌ یا تایبەت بیت.
هەروەسا گۆت: گرنگی دان ب كەرتێ‌ گەشت و گۆرازی و كەرتێ‌ چاندنێ‌ و كەرتێ‌ پەروەردێ‌ و كەرتێ‌ ساخلەمیێ‌ دێ‌ ڤان بیاڤان دا هەموویان كار ل سەر كەین بتایبەتی ژی پتر گرنگی دان ب دەڤەرا ئامێدیێ‌.
ئاخچین جبرائیل دۆسكی خەلكا گوندێ‌ نێروە سیتو ل دەڤەرا دوسكی ژۆریا ڤە و ل سالا 1994 ل وەلاتێ‌ ئیرانێ‌ و د پەنابەریێ‌ دا ژ دایكبوویە و ماموستایە و كچا پێشمەگەریەكێ‌ یە و چەندین سالان د رێزێن ئێكەتیا ئافرەتێن كوردستانێ‌ دا كار دكەت و هەروەسا رۆلەكێ‌ بەرچاڤ هەبوویە د رێخراوا قوتابیان و رێكراوێن جەماوەری دا.

دوهی ئێكشەمبی 6/10/2024، مەسرور بارزانی، جێگرێ سەرۆكێ پارتی دیموكراتی كوردستان، ل باژێرێ دهۆكێ ل گەل مامۆستایێن زانكۆیێن دهۆكێ كۆمبوو و د پەیڤەكێدا راگەهاند، ئەڤ هەلبژارتنە دێ روودانەكا هەستییار ودیرۆكی بیت بۆ پاشەڕۆژا هەرێما كوردستانێ.
گۆت ژی» هەر بڕیارەكا د ڤان هەلبژارتناندا بدەین دێ چارەنڤیسێ وەلاتێ خوە دیار كەین، پاشەڕۆژا زارۆیێن خوە دیار كەین، بڕیاردانا مە دێ دیار كەت پشتی ڤان هەلبژارتنان ل چار سالێن داهاتی شێوازێ حوكمڕانیێ ل هەرێما كوردستانێ، دێ ب چ شێوە بیت».
مەسرور بارزانی دیاركر» بڕیار د رۆژەكێدا بۆ هەلبژارتنان دهێتە دان، بەلێ بڕیارا ڤان هەلبژارتنان چار سالان بەردەوام دبیت، هەروەسا ئەنجامێ بڕیارا هەوە هەر چ بیت، ئەڤ چار سالێن حوكمڕانیێ دیسان دێ بیتە بەرهەمێ بڕیارا هەوە، لەوما داخوازێ ژ هەموو خووشك و برایێن هێژا دكەم، چ ئەوێن ئەڤرۆ ل ڤێرێ د روونشتی یان هەموو ئەو هەڤوەلاتیێن ل هەر جهەكی و گوه ل مە دبن، داخوازێ ژ هەوە دكەم د ڤان هەلبژارتناندا بڕیارەكا نەتەوەیی و نیشتمانی بدەن، بۆ ئەوێ چەندێ بزانین پاشەڕۆژا ڤی وەلاتێ وڤان دەستكەفت و ئەزموونا كو بەرهەمێ خوینا شەهیدان و رەنج و خەباتا پێشمەرگەی و خۆڕاگرییا خەلكەكێ قەهرەمانە، ب هەدەر نەچیت».
راگەهاند ژی» هەكە ئەم دەنگی نەدەین و هەر ئێك ژ مە وەسا پێشبینیێ بكەت كو ئەڤ رەوشە دێ بەردەوام بیت، یان دەنگی بدەم یان دەنگی نەدەم هیچ جوداهییەك نینە، ئەڤە شاشییە، چونكە هەكە هەر ئێك ژ مە دەنگی نەدەت، دێ كەسەكێ دی ل شوونێ دەنگی دەت، هەكە هوون بڕیارێ نەدەن، دێ كەسێن دی ل شوونا هەوە بڕیارێ دەن، ب تایبەت هوون مامۆستایێن هێژا، ئەركەكێ گەلەك پیرۆز یێ ل سەر ملێ هەوە، لەوما دڤێت هوون رێنمایان بدەنە هەڤوەلاتیێن دی ژ خویندكار و قوتابییان و هەر كەسەكێ كو هەوە كاریگەری ل سەر دەنگدانا وی هەی، بچنە سەر سندووقێن دەنگدانێ تاكو پاشەڕۆژا خوە مسۆگەر بكەن، ئەز ژی یێ د وێ باوەریێدا بڕیارا هەوە دێ بڕیارەكا راست و دروست بیت».
گۆت ژی» چاڤەڕێ دكەین نەكو هەر هوون ب تنێ، بەلكو كەسوكارێن هەوە و خزم و جیرانێن هەوە، ل گەل قوتابیێن هەوە بهێنە هاندان رۆژا 20/10/ 2024 بچنە سەر سندووقێن دەنگدانێ و دەنگی بدەنە لیستا 190 یا پارتی دیموكراتی كوردستان. گرنگییا ڤان هەلبژارتنان بۆمە د دەمەكی دایە كو گوهۆڕینێن ب لەز ل دەڤەرێ روو ددەن و یا دیار نینە چارەنڤیسێ دەڤەرێ ژی دێ بەر ب كیڤە چیت، لەوما وەلاتێ مە پێدڤی ب بڕیارەكا حەكیمانە یا هەی و سەركردایەتییەكا حەكیمانە دڤێت، تنێ ب پەیڤ ئاخڤتنان و سۆز دانێ، وەلات بڕێڤە ناچیت، لەوما پێدڤییە مە ڤەخواندنەكا دروست ل سەر بۆریێ هەر ئالییەكێ سیاسی هەبیت، بۆ وێ چەندێ بزانین ل ئاستێ بڕێڤەبرنا ڤی وەلاتی نە یان نە».
مەسرور بارزانی، جێگرێ سەرۆكێ پارتی دیموكراتی كوردستان د پەیڤا خوە دا بۆ مامۆستایێن زانكۆیا دهۆكێ گۆت ژی» هەكە وەلاتێ مە نەچاری قوربانیدانێ بیت، ئەو سەركردایەتییا دهێتە هەلبژارتن كو د وی ئاستی دانە خوە بكەنە قوربانی بۆ خەلكێ خوە یان وەكو گەلەك ئالییان، وەكو هەموو جاران مللەتی دكەنە قوربانی خوە، بەلێ ئەز بێگومان بۆ هەوە دبێژم پارتی ئەو پارتە كو ل سەر دەستێ بارزانیێ نەمر دروست بوویە و نوكە ژی كو سەرۆك بارزانی رێبەرییا وێ دكەت ئەو حزبە كو هەردەم خوە كریە قوربانی مللەتێ خوە».
خویاكر» هەر ژ دەستپێكا دامەزراندنا خوە، پارتی بۆ وێ چەندێ هاتە دامەزراندن كو پێدڤییەكا نیشتمانی بوو، مللەتێ مە كەفتبوو بەر هەوا قڕكرنێ، ئاخا مە دهاتە وێرانكرن، خەلكێ مە بێ هیڤی كربوو، ئەو دەستكەفتێن پێشتر هەبوون، بەر ب ناڤچوونێ دهاتنە برن، خەلكێ كوردستانێ وەلێكربوو باوەری ب دۆزا خوە نەمینیت، بەلێ بارزانیێ نەمر بڕیارا دامەزراندنا پارتی دا، پارتی وەكو بزاڤەكا رزگاریخواز كو هەموو تەخ و چینێن كوردستانێ بێی جوداهی ل هەر باژێر و باژێرەك و دەڤەرەكا كوردستانێ، ب هەر بیر و بۆچوون و ئایینەكێ جودا و ئایین و نەتەوەیەكی بیت ل بن سیبەرا پارتی خوە ببینیت. ل وی دەمی ئەڤە بڕیارەكا حەكیمانە بوو. ڤێ چەندێ ژی وەكر بۆ جارا ئێكێ د دیرۆكا هەڤچەرخدا، بزاڤەكا رزگاریخوازییا نیشتمانی، نەكو ب تنێ نەتەوە، بەلكو نیشتمانی ل سەرانسەری كوردستانێ پەیداكر، ئەگەرێ مانا پارتی و سەركەفتنا پارتی رۆژ ل دووڤ رۆژێ، بۆ وێ بڕیارا حەكیمانەیە كو وی دەمی بارزانیێ نەمر دای، ئەڤرۆ ژی ئەم شانازیێ دكەین كو هەر ل سەر ڤێ رێكێ بەردەوامین و قوتابیێن ڤێ رێبازێنە، هیڤییا مە ژی ئەوە ئینشائەللا ب پشتەڤانییا خەلكێ كوردستانێ رۆژ ل دووڤ رۆژێ دێ دەستكەفتێن زێدەتر بۆ ڤێ پارتێ زێدەكەین كو د خزمەتا مللەتێ خوە دایە».
جێگرێ سەرۆكێ پارتی دیموكراتی كوردستان پتر گۆت» د جهێ خوەدایە سوپاسییا مامۆستایێن كوردستانێ بكەم كو د ڤی دەمێ بۆریدا خوە ل بەر نەخوەشییان گرت و فشارەكا ئابوورییا مەزن ل سەر وان بوو، بەلێ مامۆستا هەر وەكو ناڤ و پیشەیا وان، نەكو هەر ب وانەگۆتنێ بەلكو ب كریار سەلماند كو پێدڤییە مرۆڤ قوربانیێ بدەت بۆ بەرژەوەندییا وەلات و مللەتێ خوە، خوە ل بەرامبەر هەموو فشاران گرت و رێك نەدا پڕۆسەیا خواندنێ پەككەڤیت، نەهێلا قوتابی ژ فێربوونێ و خواندنێ بێ بەهر ببن، ئەڤە ژی جهێ دەستخوەشیێیە، وەستییان و خۆڕاگرییا هەوە جهێ رێزلێنانێیە، لەوما ئەم گەلەك سوپاسدارێن هەوەینە بۆ وێ هەموو وەستییانا هەوە د دەمێ بۆریدا دیتی».
سەبارەت پیلانێن دژی قەوارەیێ هەرێما كوردستانێ، مەسرور بارزانی، جێگرێ سەرۆكێ پارتی دیموكراتی كوردستان گۆت» گەلەك بزاڤ هەبوون بۆ وێ چەندێ هەموو جومگێن حوكمەتا هەرێما كوردستانێ تووشی شكەستنێ بهێن، مە ژی هەموو بزاڤ كرن رادەستی وان فشاران نەبین بۆ وێ چەندێ ئەڤ ئەزموونا مە بەردەوام بیت، ئەڤە ژی وەسا یا ب ساناهی نەبوو، بەلێ ئەوا جهێ دلخوەشیێ بوو، چەند نەیارێن مە فشارێن خوە زێدە دكرن، مە زێدەتر هەست ب پشتەڤانییا خەلكێ كوردستانێ دكر، ئەڤە ژی مەزنترین سەروەت و سامانە، بۆ هەر حوكمەت و دەستهەلاتەكێ، ما دام خەلك ل گەل تە بیت، هیچ هێزەك نەشێت تە پشكێنیت».

دوهی ئێكشەمبی 6/10/2024، نێچیرڤان بارزانی، جێگرێ سەرۆكێ پارتی دیموكراتی كوردستان ل هەوا بانگەشەیا هەلبژارتنێن پەرلەمانێ كوردستانێ ل باژێرێ هەولێرێ راگەهاند: رۆژا پارتی هەر یا هەلاتییە و هەردەم ژی دێ یا هەلاتی بیت. هەروەسا گۆت: سەرۆكەفتنا پارتی یا مسۆگەرە.
نێچیرڤان بارزانی، جێگرێ سەرۆكێ پارتی دیموكراتی كوردستان ل دەستپێكا پەیڤا خوە گۆت» هەر ژ ئەڤرۆ سەركەفتنا پارتی یا مسۆگەرە».
هەروەسا گۆت ژی» ئەڤرۆ ئەم یێن ل ڤێرێ كۆمبووین تاكو ل بەر رۆناهییا مەشخەلا 78 سالییا پارتییا مە (پارتی دیموكراتی كوردستان) بانگەشەیا هەلبژارتنان بگێرین، چیرۆكا گەلێ كوردستانێ و پارتی دیموكراتی كوردستان بووینە جێمكەك چو جاران ژێك ناهێنە جوداكرن، پارتی د تاریترین دیرۆكا سیاسییا مەدا چرایەكێ رۆهن و هێزەكا پۆلایی بوویە دژی ستەمێ و ملكەچی ئازادی و دیموكراسی و دادپەروەریێ بوو».
گۆت ژی» ل دەمێن بۆری رێكا مە یا ب ساناهی نەبوو، نوكە ژی د بێ گرفت نینین، ل پاشەڕۆژێدا ژی بێ گرفت نابین، ئەوا پێدڤییە گەلێ كوردستانێ بزانیت، پارتی سەربلندانە مەشخەلا مە بلند راگرتییە و پەیمان دایە بەردەوام بیت ل سەر وێ رێكێ».
جێگرێ سەرۆكێ پارتی دیموكراتی كوردستان ئەوژی گۆت» یێ پشتڕاستم ب هێمەتا گەلێ كوردستانێ دێ خەونا مە یا دێرین بیتە راستی، پارتی مەشخەلا خەبات و قوربانیێ ژ نڤشێ بەری خوە ب ئەمانەت یا وەرگرتی، دڤێت نڤشێ نوكە یێ پارتییا مە وێ مەشخەلێ هەلگرن و بەر ب پێشڤە ببەن، پەیاما رۆژا ئالایێ كوردستانێ و رۆژا درووشمێ پارتی بۆمە و بۆ گەلێ كوردستانێ ئەوە، دبێژیت، دڤێت هەردەم هێز و هیڤییا خوە نوو بكەین، ژبیرا مە نەچیت، رۆژا پارتی هەر یا هەلاتییە و هەردەم دێ هەلیت بۆ خزمەتكرنا گەل و نیشتمانی».
نێچیرڤان بارزانی خویاكر ژی» گەلێ مە ب گەلەك قۆناغێن تاری و نەهامەتیێ و شكەستنێ دەرباز بوویە، بەلێ هیچ دەمەكی نە شكەستن پێناسەیا پارتی بوو، نە بێهیڤی پێناسەیا پارتی بوو، پێناسەیا مە وەكو مللەت، وەكو پارتی دیموكراتی كوردستان، تیشك و پرشنگ و رۆناهی و گەشەیا ژیانێیە، پارتی وەسا ژ دایكبوویە، وەسا بەردەوام بوو، هەر ب وی رەوتی ژی دێ بەردەوام بیت».
نێچیرڤان بارزانی گۆت ژی» پارتییا مە ژ پارتەكا سیاسی مەزنتربوو، ئەم بزاڤەكین بووینە چرایێ رۆناهییا گەلێ كوردستانێ ب هەموو پێكهاتەیێن خوەڤە، ل دەمێن بۆری مە تاری ڤەرەڤاند، ل سەردەمێ مە یێ نوكە ئەم دەستپێشخەر و گرەنتی و ئاڤەدانی و سەقامگیری و ئاسایشا كوردستانێ و پێشكەفتنا كوردستانێ نە، دەمێ بارزانیێ نەمر ل سالا 1946 پارتی دیموكراتی كوردستان دامەزراندی، تنێ رێكخراوەك نەبوو، بەلكو پارتی بوو ستێرەكا نووژیانێ بۆ كوردان، بۆ گەلێ كوردستانێ كو ژ مێژەبوو د بێ بەهر بوون ژ ماف و دەنگ و ناسنامەیا خوە، ئەم پەیرەوكارێن پارتی دیموكراتی كوردستان و رێبازا پیرۆزا بارزانی، پێگیرین ب وێ رێبازێ نەكو ژ بەر بارزانی بوونێ، نەكو ژبەر وێ چەندێ پارتی دیموكراتی كوردستان دامەزراند، بەلكو ژ بەر وێ چەندێ رێبازا كوردایەتیێ و خۆڕاگریێ و خەبات و خەباتا مللەتەكێ ژێر دەست بەرجەستە كر».
ئەوژی گۆت» بۆ وێ رێبازێ، بۆ كوردستانەكا پڕ ئازادی، هەرێمەكێ ل سەر بنەمایێ دیموكراسی بڕێڤەبچیت، دیرۆكا مە یا دوور و نێزیك، خەباتا بێ راوەستییان ب خوەڤە گرت، كو ل ڤێ هەرێما مە، ل ڤێ كوردستانا مە، كێم خێزان یێن هەین قوربانی نەدابیت، رەنگێ سوور یێ ئالا مە بیرئینانا خوینا شەهیدانە كو گیانێ خوە بەخشی تاكو ئەم ل ڤێرێ ب زمانێ خوە باخڤین و ئاهەنگان بگێرین ژ پێخەمەت نیشتمانێ مە، درێژیێ ب كاروانێ خەباتا خوە بدەین، ئەم سوپاسدارێن ژن و زەلامێن ڤی مللەتی نە كو گیانێ خوە بەخشییە ژ پێخەمەت ئازادییا ڤی مللەتی».
نێچیرڤان بارزانی ئاماژەكر» قوربانیدانا گەلێ كوردستانێ، بیرئینانە كو ئازادی وەكە جەژنانە ناهێتە بەخشین، بەلكو ب خەبات وقوربانیدانێ ب دەستڤە دهێت، قوربانیدانا مە ب هەدەر نەچوویە و ناچیت، هەموو قوربانیێن مە، ئەم ژ ئارمانجا كوردستانەكا دیموكرات و ئازاد نێزیك كرینە، ل ڤێرێ دخوازم سوپاسییا خۆڕاگرییا گەلێ كوردستانێ بكەم، چونكە سەرەرای روو ب رووبوونا دژوار هەر ژ بڕینا بودجەی، گەفێن داعشێ بۆ نەهێلانا شوونوارێن ژیانێ ل هەرێما كوردستانێ و دەڤەرێن دابرای، سەرەرای دوورپێچا سەربازی، دائێخستنا ئەسمان و سنوورێ كوردستانێ، گەلێ كوردستانێ پشتەڤان بوو بۆ پەرلەمانی و حوكمەتێ و سەرۆكایەتییا هەرێمێ و هێزا پێشمەرگەی و ئاسایشا كوردستانێ، ل گەل گەشەكرنا مەدا، دڤێت ئەڤ پرەنسیپە د هەموو كارێن مەدا ، ئارمانجێن مەدا، ئاڤاكرنا جڤاكەكی بیت كو هەموو تاكەك تێدا بشێت یێ دادپەروەر و سەربلند بیت».
نێچیرڤان بارزانی رۆهنكر ژی» دڤێت ئەم وەكو مەشخەلا نەورۆزێ بین، كوردستان رۆژ ل دووڤ رۆژێ د پێشكەفتنێ دا یا بەردەوام بیت، د نووكرنا هیڤیێ بۆ گەلێ كوردستانێ، بۆ هەموو ئەوێن كو باوەری ب ئازادیێ و دادپەروەریێ و شكۆمەندییا كوردستانێ هەبیت، تنێ دەنگێ ئازاد و وێرەكێ هەوە و گەلێ مە گرەنتییە بۆ بەردەوامبوونا گەشەیا سیاسی و جڤاكی و كەلتوورییا وەلاتێ مە ب رێبەرییا سەرۆك بارزانی و پارتی دیموكراتی كوردستان».