دوهی ئێكشەمبی 30/11/2025، سەرۆك مەسعود بارزانی، ئێكەمین پێشانگەها نێڤدەولەتییا پرتووكێ ل زاخۆ ب ناڤونیشانێ (زاخۆ دخوینیت) ڤەكر و سەرەدانا پشكێن پێشانگەهێ كر.
هەر د پێشانگەهێدا سەرۆك بارزانی، دلخوەشییا خوە ب ڤەكرنا پێشانگەها نێڤدەولەتییا زاخۆ دیاركر و راگەهاند» سوپاس بۆ خودای بۆ ڤان رۆژێن خوەش، دوهی ل جزیرێ و ئەڤرۆ ل زاخۆ. ئینشائەللا خودێ هەر خێر و خوەشیێ بدەت، هەر كەیفێ بدەت و ئەڤ پێشانگەها نێڤدەولەتییا پرتووكێ كو ئەڤرۆ ل زاخۆ هاتیە ڤەكرن جهێ دلخوەشییەكا مەزنە».
سەرۆك بارزانی زاخۆ ب باژێرێ هونەری و كەلتووری و كوردایەتیێ هەژمارت و راگەهاند» زاخۆ جهێ هونەری و كەلتووری و مێرانی و كوردایەتیێ و پێشمەرگایەتیێیە».
سەرۆك بارزانی، دەستخوەشی هەبوو بۆ ڤەكرنا پێشانگەها نێڤدەولەتییا زاخۆ و هیڤییا زێدەتر پێشكەفتنێ بۆ زاخۆ خواست.
ل دووماهیێ سەرۆك بارزانی پەسنا زاخۆییان كر وگوت» جارەكێ من گوتە زاخۆ روحا منە، جارەكا دی من گوت هوون دلێ منن، هوون نەك هەر روحا منن، هوون دل و روحا منن».
ئەڤە ئێكەمین پێشانگەها نێڤدەولەتییا پرتووكێیە ل ئیدارەیا سەربخوە یا زاخۆ بڕێڤەدچیت. پشتی هەولێرێ و سلێمانیێ، زاخۆ دبیتە باژێرێ سیێ ل هەرێما كوردستانێ پێشانگەهەكا نێڤدەولەتییا پرتووكێ ڤەدكەت كو تێدا زێدەتر ژ 20 هزار ناڤونیشانێن جودا جودا دهێنە نیشادان و 50 دەزگەهێن چاپ و بەلاڤكرنێ ژ 10 وەلاتان پشكداریێ تێدا دكەن. پێشانگەها ناڤبری بۆ دەمێ شەش رۆژان دێ یا بەردەوام بیت.

سەرۆكێ هەرێما كوردستانێ پێشوازی ل قونسلێ نوو یێ چیكێ ل هەولێرێ كر و پشتەڤانییا خوە بۆ سەرئێخستنا ئەركێ وی دوپاتكر. د دیارێدا قونسلێ نوو یێ وەلاتێ چیك، هێرشا سەر زەڤییا كۆرمۆر یا غازی پرۆتەستۆ كر و دوپاتی ل بەرفرەهكرنا هەڤبەندیێن ئابۆری كر.
دوهی ئێكشەمبی 30/11/2025، نێچیرڤان بارزانی، سەرۆكێ هەرێما كوردستانێ پێشوازی ل لوكاس گیوریچ، قونسلێ گشتیێ نوو یێ كۆمارا چیك ل هەرێما كوردستانێ كر.
ب گۆڕەی بەیاننامەیەكا سەرۆكایەتییا هەرێما كوردستانێ» نێچیرڤان بارزانی پیرۆزباهییا دەستبكاربوونێ ل قونسلێ نوو چیك كر و هیڤییا سەركەفتنێ د ئەركێ وی دا بۆ خواست، هەروەسا بەرهەڤییا پشتەڤانیێ بۆ سەرئێخستنا ئەركێ وی دیاركر».
نێچیرڤان بارزانی سوپاسییا هاریكاریێن كۆمارا چیك كر و خواستا هەرێما كوردستانێ ژی بۆ پێشڤەبرنا هەڤبەندییان ل گەل وی وەلاتی نیشادا.
قونسلێ گشتیێ نوو یێ كۆمارا چیك هێرشا ل سەر زەڤییا گۆرمۆر یا غازی پرۆتەستۆكر و خوەشحالییا خوە ب وەرگرتنا ئەركێ خوە ل هەرێما كوردستانێ نیشادا. هەروەسا دوپاتی ل كاركرنێ بۆ پێشڤەبرنا هەڤبەندییان د ناڤبەرا هەردو وەلاتاندا د هەموو واراندا كر، ب تایبەتی بەرفرەهكرنا هاریكارییا هەڤپشك د ناڤبەرا واندنا د وارێ ئابۆریدا.

سەرۆكێ حوكمەتا هەرێما كوردستانێ، د پەیامەكێدا سەرەرای سوپاسیكرنا خۆڕاگرییا وەلاتییان بەرانبەر كێمبوونا ساتێن كارەبێ، مزگینییا دەستپێكرنا بەرهەمئینانا غازێ و زڤرینا كارەبێ راگەهاند و دوپاتكر نابیت ئەو هێرشە ببنە روودانێن ئاسایی و پێدڤییە ئەنجامدەرێن وان ژی بهێنە سزادان.
مەسرور بارزانی، سەرۆكێ حوكمەتا هەرێما كوردستانێ د پەیامەكێدا ئاماژە ب وێ چەندێ كر كو پشتی تمامكرنا بەرهەڤیێن تەكنیكی و گەهشتن ب رێككەفتنێ ل گەل كۆمپانییا (داناغاز)، پرۆسەیا بەرهەمئینانێ دەستپێكریە و رەوشا كارەبێ دێ ئاسایی بیت.
سەرۆكێ حوكمەتا هەرێما كوردستانێ ئیرادەیا رێڤەبەری و كارمەندێن كۆمپانیێ بلند هەلسەنگاند كو سەرەرای وێ چەندێ ئەڤە هێرشا یازدێ یە ل سەر وان دهێتە كرن، بەلێ د رژدن ل سەر مانێ و بەردەوامیێ ب كارێن خوە.
د پشكەكا دی یا پەیاما خوەدا، سەرۆكێ حوكمەتا هەرێما كوردستانێ رۆهنكر كو ل گەل محەمەد شیاع سوودانی، سەرۆك وەزیرێن ئیراقێ ل سەر هێلن بۆ وێ چەندێ ئەنجامدەرێن وێ هێرشا تیرۆرستی، سەر ب هەر گرۆپ و ئالییەكی ڤە بن و ل هەر جهەكی بن، دڤێت روو ب روویێ قانوونێ ببن.
مەسرور بارزانی هۆشداری ژی دا كو ئیراق نەشێت وەبەرهێنانا بیانی بۆ خوە رابكێشیت هەكە گرۆپێن چەكدارێن ژ دەرڤەی قانوونێ بێی سزادان بەردەوام بن د ئارمانجگرتنا ژێرخانەیا ئابۆرییا وەلاتیدا.
سەرۆكێ حوكمەتا هەرێما كوردستانێ ئەوژی بەرچاڤكر كو چاڤێن نەحەزان ب پێشكەفتنێن كوردستانێ ناڕابن و دخوازن تاریێ بزڤرینن، بەلێ پشتڕاستبوون دا كو حوكمەتا هەرێمێ ل گەل هەڤپشكێن نێڤدەولەتی كار دكەت بۆ پاراستنا خەلكی و ژێرخانەیا ئابۆری و ئەو هێرشە ژی نەشێن كاروانێ ئاڤەدانیێ رابگرن.
ل دووماهیێ مەسرور بارزانی سەرەرای دەستخوەشیێ ل تیمێن تەكنیكی یێن وەزارەتێن سامانێن سروشتی و كارەبێ و هێزێن ئەمنی، داخواز ژ خەلكێ كوردستانێ كر، وەك بەردەوام پشتەڤانێن حوكمەتا خوە بن بۆ دەربازكرنا ئاستەنگان.

ئەندامەكێ كۆمیتەیا ناڤین یا پارتی دیموكراتی كوردستان راگەهاند: ل رۆژا دوشەمبی 1/12/2025 پارتی دیموكراتی كوردستان و ئێكەتی نیشتمانی كوردستان ل سەر ئاستێ بلند دێ كۆمبن.
هیوا گەیلانی، ئەندامێ كۆمیتا ناڤین یا پارتی دیموكراتی كوردستان گوت» ل رۆژا دوشەمبی 1/12/2025، پارتی دیموكراتی كوردستان و ئێكەتی نیشتمانی كوردستان ل سەر ئاستێ بلند دێ كۆمبن».
هەروەسا دیاركر ژی» ل رۆژێن داهاتیدا ژی پارتی دێ سەرەدانا ئالیێن سیاسی كەت».
ل دۆر كۆمبوونا پارتی ل گەل ئێكەتیێ، هیزا گەیلانی زێدەتر بۆ كەنالێ كوردستان 24 گوت» دێ هەموو بزاڤان كەین بۆ وێ چەندێ كابینەیا نوو یێ حوكمەتا هەرێما كوردستانێ بهێتە پێكئینان، چونكە ل بۆری ژی دا پارتی نەرمی بەرچاڤكریە بەلێ ئێكەتی نەهاتە پێش».
وی ئەندامێ كۆمیتەیا ناڤین یا پارتی دیموكراتی كوردستان ئاماژە ب وێ چەندێ ژی كر» مەبەستا پارتی دیموكراتی كوردستان گەهاندنا دو پەیامایە بۆ ئالییان، پەیاما ئێكێ رێكخستنا پەرت و بەلاڤبوونا ناڤمالا كوردی، پەیاما دویێ ل گەل ئالیێن سەركەفتی د هەلبژارتناندا ئێك پاكێچ و گۆتار د حوكمەتا داهاتییا ئیراقیدا هەبیت».
دووماهی كۆمبوون د ناڤبەرا پارتی دیموكراتی كوردستان و ئێكەتی نیشتمانی كوردستان ل رۆژا 30/9/2025 ب سەرپەرشتییا سەرۆك بارزانی ل پیرمام هاتبوو ئەنجامدان.

ڤەكۆلەرێن كاروبارێن ئەمنی ل ئیراقێ رادگەهینن، ڤەكۆلینێن ل دۆر هێرشا ل سەر زەڤییا كۆرمۆر یا غازی یێن گەهشتینە ئەنجام، بەلێ راناگەهینن، چونكە د مەترسیدارن، ئاماژە ب وێ چەندێ ژی دكەن، هۆكارێن سیاسی ل پشت وان هێرشان هەنە و ڤەكۆلین بووینە تشتەكێ رۆتینی ئەگەر نە كا ئەنجامێن ڤەكۆلینێن پێشتر؟
موجاهد ئەلسومەیدعی، ڤەكۆلەرێ كاروبارێن ئەمنی یێ ئیراقی، ل دۆر هێرشا ل سەر زەڤییا كۆرمۆر یا غازی هاتیە كرن د دیدارەكا تەلەڤزیۆنیدا كو پێگەهێ (ئەلجیبال) یێ دەنگوباسان یێ ئیراقی دووڤچوون بۆ كری، دبێژیت» هۆكارێ سیاسی ل پشت هێرشا ل سەر زەڤییا كۆرمۆر یا غازی هەیە و ڤەكۆلین یێن بووینە تشتەكی رۆتینی ئەگەر نە كا ئەنجامێن پێشتر یێن ڤەكۆلینان؟».
ئەلسومەیدعی گوت ژی» زەڤییا كۆرمۆر یا غازی مەزنترین زەڤییا غازییە و كاریگەرییا وی چەندین پارێزگەهان ڤەدگریت و تۆپبارانكرنا وێ زیان گەهاندییە ئیراقێ و ژێرخانەیا ئابۆرییا هەرێما كوردستانێ».
ناڤبری رۆهنكر ژی» ئەمریكا ب رێكا هەیڤێن دەستكرد شیانێن ڤەدیتنێن هوور هەنە و دشێت وێ خالا فرۆكەیا درۆن ئەوا كۆرمۆر تۆپبارانكری ژێ بلند بووی، دیار بكەت».
هەڤدەم غالب ئەلدەعمی، شرۆڤەكارێ سیاسی، دبێژیت» هزرا هەموو ئیراقییان بۆ وێ دچیت كو گرۆپێن چەكدار دەست د هێرشا ل سەر كۆرمۆرێ دا هەیە».
هەروەسا گوت» ڤەكۆلینێن پێشتر ل سەر هێرشێن دژی وەستگەهێن وزەیێدا گەهشتینە ئەنجامان، بەلێ رانەگەهاندینە، چونكە د (مەترسیدارن) ، هەر تاوانەكا د ساتێن ئێكێدا نەهێتە ئاشكراكرن، ئەو تاوانەكا سیاسییە».
ب دیتنا ئەلدەعمی» ناڤەندێن دەستهەلاتێ د سیستەمێ نوكە دا دێ هێنە گوهۆڕین، ئیسلاما سیاسی د ڤێ قووناغێدا نامینیت و رۆژهەلاتا ناڤین یا نوو دێ پەیدا بیت، ئەم نوكە بەر ب گوهۆڕینان د هەڤسەنگییا هێزێن ناڤخوەییدا دژین».
هەر سەبارەت ڤێ بابەتی، فوئاد حسێن، وەزیرێ دەرڤەیێ ئیراقێ، د دیدارەكا تەلەڤزیۆنیدا راگەهاند» یا رۆهنە ئەوا هاتیە كرن، هێرشا ل سەر كۆرمۆر كارەكێ تیرۆرستی بوو و هێرش ژی ژ ناڤخوەیا ئیراقێ هاتیە كرن. بۆ زانین و ئاشكراكرنا ئەنجامدەرێن وێ هێرشێ ژی دڤێت چاڤەڕێی راپۆرتا ڤەكۆلینێ بكەین».
وەزیرێ دەرڤەیێ ئیراقێ ئاماژە ب وێ چەندێ ژی كر» د راپۆرتێن ڤەكۆلینێ ل دۆر هێرشا پێشتر كو نوكە ل دەف حوكمەتا ئیراقێ نە، ناڤێن كەس و ئالیێن هێرشكار هەنە، بەلێ مخابن حوكمەت ئەو راپۆرت بەلاڤ نەكرینە».
دیاركر ژی» ب دیتنا من هەكە راپۆرت هاتبا بەلاڤكرن و پیرابوون هاتبانە وەرگرتن، ئەو هێرشا ل ڤێ دووماهیێ نە دهاتە كرن و دوبارە نەدبوو».
سەبارەت گرۆپا ئەو هێرشا ل ڤێ دووماهیێ ل سەر زەڤییا كۆرمۆرێ ئەنجامدای، فوئاد حسێن بەرچاڤكر» ئەو ئالی یێ دیارە و ئەو ئالیێ هێرش ئەنجامدای گرۆپەكە كو چەكێ گرنگ و پێشكەفتی هەیە».

دەزگەهێن راگەهاندنا تورکیا ب گرنگی بەحسێ سەرەدانا سەرۆک بارزانی یا بۆ باژێرێ جزیرێ ل باکورێ کوردستانێ دکەن و دیار دکەن سەرۆک بارزانی رۆلەک مەزن بۆ ئاشتیێ ل تورکیا دگێریت و سەرەدانا سەرۆک بارزانی پشتەڤانیەکا مەزنە بۆ ئاشتیێ ل تورکیا.

کەنالێ ئیکلە تی ڤی د راپۆرتەکێ دا بەحسێ سەرەدانا سەرۆک بارزانی بۆ باژێرێ جزیرێ کریە و تێدا هاتیە دیار کرن، سەرۆک مەسعود بارزانی رۆلەک سەرەکی بۆ ئاشتیێ ل تورکیا دگێریت، بەری نها ژی گەلەک جاران هەرێما کوردستانێ و سەرۆک بارزانی پشتەڤانیا خوە بۆ ئاشتیێ ل تورکیا دیار کرینە و نها ژی سەرۆک بارزانی رۆلەک مەزن دگێریت و ل ئاخڤتنا خوە یا ل جزیرێ ژی ب رەنگەکێ ئاشکرا دیار کر ئەوا ژ دەستێ وان بهێت دێ بۆ پێشڤەبرنا قووناغا ئاشتیێ ل تورکیا کەن.
مالپەرێ T24 ژی د راپۆرتەکێ دا بەحسی ڤێ یەکێ کریە، د دەمەکێ دا کو ل تورکیا بزاڤێن گەلەک مەزن بۆ ئاشتیێ و نەمانا شەڕی دهێنە کرن، سەرۆک مەسعود بارزانی سەرەدانا باژێری جزیرێ کر و پەیامێن گەلەک گرنگ دان، پشتەڤانیا خوە بۆ ئاشتیێ دیار کر و جارەکا دی بۆ هەموو رۆژهەلاتا ناڤین و جیهانێ سەلماند کو کوردان ئاشتی و پێکڤەژیان دڤێت، ژ بەر ڤێ یەکێ ژی سەرەدانا سەرۆک بارزانی یا بۆ جزیرێ پشتەڤانیەکا گەلەک مەزنە ژ بۆ قووناغا ئاشتیێ ل تورکیا.
هەروەسا پڕانیا مالپەر و کەنالێن تەلەفزیۆنێ یێن تورکیا ژی بەحسێ سەرەدانا سەرۆک بارزانی یا بۆ جزیرێ کرن و دیار کرن، هەرێما کوردستانێ هەردەم پشتەڤانێ ئاشتیێ بوویە، سەرۆک بارزانی بەری نها ژی گەلەک جاران ب کریاری سەلماندیە کو تنێ رێیا چارەسەرکرنا پرسا کوردی ل تورکیا رێیا ئاشتیێ یە، سەرەدانا سەرۆک بارزانی بۆ جزیرێ نها گەلەک گرنگە و هەموو ئالی سوپاسیا سەرۆک بارزانی دکەن.
هەروەسا عایشەگول دۆغان پەیڤدارا دەم پارتی ژی دیار کر، سەرەدانا سەرۆک مەسعود بارزانی د ڤێ دەمێ دا ژ بۆ جزیرێ گەلەک گرنگە، سەرۆک بارزانی هاتیە مالا خوە و گۆت: (ئەم گەلەک کەیفخوەشین کو جەنابێ سەرۆکی هاتیە جزیرێ، هەر کەس دزانیت کو هەرێما کوردستانێ و ب تایبەتی ژی جەنابێ سەرۆک بارزانی رۆلەک گەلەک مەزن و کاریگەر ژ بۆ ئاشتیێ ل تورکیا دگێریت و هەموو کوردێن ل تورکیا سوپاسیا سەرۆک بارزانی دکەن).
هەروەسا پارێزگارێ شەرنەخێ و بەرپرسێن ئاکپارتیێ یێن ل شەرنەخێ ژی سوپاسیا ئامادەبوونا سەرۆک بارزانی کرن و دیار کرن، نها سەردەمەک نوو ل تورکیا دەستپێکریە و کورد و تورک ئێدی دشێن وەکو برا پێکڤە بژین و پرسێن هەی ژی چارەسەر بکەن و سوپاسیا پشتەڤانیا سەرۆک بارزانی یا بۆ قووناغا ئاشتیێ کرن.

د دیدارەكێ دا ل گەل شاندەكێ بلند یێ ئەمریكی، سەرۆك بارزانی دوپاتی ل وێ چەندێ كر كو دانوستاندن د ناڤبەرا ئالیێن كوردستانی بۆ پێكئینانا كابینەیا نوو یا حوكمەتا هەرێما كوردستانێ د بەردەوامن و پێدڤییە حوكمەتا داهاتییا ئیراقێ ژی ل سەر بنەمایێ دەستووری بیت.
ل پیرمام سەرۆك بارزانی پێشوازی ل شاندەكێ ئەمریكی ب سەرۆكایەتییا جۆشوا هاریس، كاربرێڤەبەرێ كاروبارێن بالیۆزخانەیا ئەمریكا ل بەغدا كر.
د كۆمبوونەكێدا كو وێندی گرین، قونسلێ گشتیێ ئەمریكا ل هەولێرێ بەرهەڤبووی، دانوستاندن ل دۆر رەوشا گشتییا ئیراقێ پشتی هەلبژارتنێن جڤاتا نوونەران هاتنە كرن. شاندێ مێهڤان پیرۆزباهییا سەركەفتنا پرۆسەیا هەلبژارتنان ل سەرۆك بارزانی كر و بزاڤێن سەرۆك بارزانی ژ پێخەمەت سەرئێخستنا پرۆسەیێ بلند هەلسەنگاندن.
تەوەرەكێ سەرەكیێ دیدارێ تایبەت بوو ب پێنگاڤێن پێكئینانا كابینەیا نوو یا حوكمەتا فیدرالی و هەڤبەندیێن د ناڤبەرا هەولێرێ و بەغدایێ دا. سەبارەت ڤێ چەندێ سەرۆك بارزانی راگەهاند» پێدڤییە پێكئینانا كابینەیا نوو رەنگڤەدانا داخوازیێن هەموو گەلێ ئیراقێ بیت و ل سەر بنەمایێ دەستووری بیت».
سەبارەت رەوشا ناڤخوەیا هەرێما كوردستانێ ژی، سەرۆك بارزانی دوپاتی ل بەردەوامییا دانوستاندنان د ناڤبەرا هەموو ئالیێن كوردستانی كر ب ئارمانجا گەهشتن ب رێككەفتنێ بۆ پێكئینانا كابینەیا نوو یا حوكمەتا هەرێما كوردستانێ.
د پشكەكا دی یا كۆمبوونێدا، گوهۆڕین و ئاستەنگێن دەڤەرێ هاتنە گەنگەشەكرن و هەردو ئالی هەڤڕابوون ل سەر پێشئێخستن و بەردەوامییا هەڤبەندیێن د ناڤبەرا ئەمریكا و هەرێما كوردستانێ و ئیراقێ.

ل پیرمام سەرۆك مەسعود بارزانی پێشوازی ل پاترێك دۆرێل، بالیۆزێ فرەنسا ل بەغدا كر.
ب گۆڕەی بەیاننامەیەكا بارەگەهێ بارزانی» د دیدارەكێدا كو یان برێم، قونسلێ گشتیێ فرەنسا ل هەولێرێ بەرهەڤبووی، بالیۆزێ فرەنسال بەغدا پیرۆزباهی ل سەرۆك بارزانی كر ب هەلكەفتا سەركەفتنێ د هەلبژارتناندا و هیڤی خواست ل قووناغا داهتی دانوستاندنێن د ناڤبەرا هێز و ئالیێن سیاسی یێن هەرێما كوردستانێ و ئیراقێ ب شێوەیەكێ كارا بڕێڤەبچن، بۆ وێ چەندێ حوكمەتەكا كارا بهێتە پێكئینان كو ل ئاستێ داخوازیێن خەلكێ ئیراقێ بیت».
بارەگەهێ بارزانی دیاركر ژی» هەر د دیدارێدا رەوشا ئیراقێ و دەڤەرێ ب گشتی و پێشهات و گوهۆڕینێن سیاسی د ناڤ پرۆسەیا سیاسییا ئیراقێ دا و ئارامییا دەڤەرێ و پێكئینانا كابینەیا نوو یا حوكمەتا هەرێما كوردستانێ و هەڤبەندیێن د ناڤبەرا هێز و ئالیێن كوردستانێ هاتنە گەنگەشەكرن».
ژ ئالیێ خوەڤە سەرۆك بارزانی سوپاسییا رۆلێ دیرۆكیێ فرەنسا كر و رۆناهی ئێخستە سەر دوماهی دانوستاندنێن پشتی ئەنجامدانا پرۆسەیا هەلبژارتنێن جڤاتا نوونەرێن ئیراقێ د ناڤبەرا هێز و ئالیێن سیاسی یێن ئیراقی، هەروەسا سەرۆك بارزانی باسێ هەلوەستێ پارتی دیموكراتی كوردستان بۆ پێكئینانا كابینەیا نوو یا حوكمەتا هەرێمێ ب رێكا دانوستاندنێ ل گەل هێز و ئالیێن سیاسی یێن دی ل كوردستانێ كر.

نێچیرڤان بارزانی، سەرۆكێ هەرێما كوردستانێ ب هەلكەفتا رۆژا جیهانییا نەهێلانا توندوتیژیێ دژی ئافرەتان د پەیامەكێدا بەرگریكرن ژ مافێن ژنان دوپات دكەت.
دەقێ پەیاما سەرۆكێ هەرێما كوردستانێ:
ل رۆژا جیهانییا نەهێلانا توندوتیژیێ دژی ئافرەتان، پێگیرییا خوە ب بەرگریكرنێ ژ مافێن ژنان و دروستكرنا جڤاكەكی كو ئازادی و وەكهەڤی و شكۆیێ مرۆڤی تێدا سەروەر بیت، دوپات دكەین. دێ د بزاڤ و كاركرنێدا بین بۆ روو ب رووبوونا هەموو شێوەیێن توندوتیژیێ و جوداهیێ دژی ئافرەتان.
ب رێزڤە بیرئینانا هەموو وان ئافرەتان ساخ دكەین كو ژ ئەگەرێ توندوتیژیێ گیانێ خوە ژ دەستدای و هەڤسۆزییا خوە بۆ خێزانێن وان دەدبڕین. پشتڕاستی ژی بۆ خێزانێن وان تنێ دێ ب دەستڤەئینانا دادپەروەریێ و رێگرتنێ ل دووبارەنەبوونا ڤان تاوانایە و دروستكرنا سەقایەكێ ئارام بیت كو هەموو ژنەكێ ل هەر پێگەهەك و رەوشەكێدا دابیت بپارێزیت.
پاراستنا مافێن ئافرەتان ستوونەكا سەرەكییا دروستكرنا جڤاكەكێ ئازاد، دادپەروەر، پێشكەفتی و ئارامە بۆ هەموویان. بنبڕكرنا توندوتیژیێ دژی ژنان پێدڤی ب ئیرادەیەكا ب كۆم، قانوونێن ب هێز و بجهئینانا وان و هشیارییەكا جڤاكی هەیە كو رێزێ ل ئافرەتێ بهێتە گرتن و پشتەڤانیێ ل پشكداریكرنا وێ یا بەرفرهە د ژیانا سیاسی و كارگێری و ئابۆریدا بكەت.
پاشەڕۆژا كوردستانێ، گرێدایە ب تواناسازییا ئافرەتان و ب هێزكرنا پشكداریكرنا وان یا كارا د هەموو وارێن ژیانێدا. ب هەموو هێز و پێداگیریێ دێ پێگیر بین ب روو ب رووبوونا توندوتیژیێ، هزرا توندڕەویێ، پاراستنا ماف و ئازادییان و ئاڤاكرنا جڤاكەكی كو تێدا هەرئافرەتەك یا پاراستی و ئازاد و ب شیان بیت بۆ ب دەستڤەئینانا خەون و ئارمانجێن خوە.
ل گەل هەموو دەزگەه و ئالیێن فەرمی ل هەرێما كوردستانێ و جڤاكێ مەدەنی و كەسایەتیێن ئایینی و جڤاكی دێ د بەردەوام بین بۆ ب هێزكرنا پاراستنا قانوونی، بەرفەرهكرنا بەرنامەیێن تواناسازییا ئابۆری و پێشڤەبرنا پشكداریكرنا ئافرەتان د پێگەهێن بڕیاردانێ و مسۆگەركرنا دروستكرنا سەقایەكێ كاری و جڤاكەكێ كو دوور بیت ژ توندوتیژیێ و جوداهیێ.
سلاڤان ل هەموو وان ئافرەتێن خەباتێ بۆ مافێن خوە دكەن، هەروەسا ل چالاكڤان و كارمەندێن وارێ بەرگریكرنێ ژ ژنان و هەموو ئەوێن د بلندكرنا ئاستێ هشیارییا جڤاكی و چەسپاندنا بهایێن وەكهەڤیێدا پشكدارن، هەروەسا رۆلێ گەنجان، دەزگەهێن راگەهاندنێ، قوتابخانە و زانكۆیان، د بەلاڤكرنا كەلتوورێ نەتوندوتیژیێ و رێزگرتنێ ل یێ بەرامبەر، بلند د هەلسەنگینین.
بلا ئەم هەموو پێكڤە بەردەوام بین د كاركرنێدا ژ پێخەمەت جڤاكەكێ بێ توندوتیژی، بێ ترس و بێ جوداهی.

نێچیرڤان بارزانی، سەرۆكێ هەرێما كوردستانێ، پێشوازی ل جۆشوا هاریس، كاربڕێڤەبەرێ كاروبارێن بالیۆزخانەیا ئەمریكا ل ئیراقێ و شاندەكێ د گەلدا كر.
د كۆمبوونەكێدا هەڤبەندیێن ئەمریكا ل گەل ئیراقێ و هەرێما كوردستانێ، ئەنجامێن هەلبژارتنێن جڤاتا نوونەرێن ئیراقێ و پاشەڕۆژا پرۆسەیا سیاسی ل وەلاتی و رەوشا ناڤخوەیا هەرێما كوردستانێ، هاتنە گەنگەشەكرن.
هەردو ئالییان دوپاتی ل پێشڤەبرنا هەڤبەندیێن ئەمریكا ل گەل ئیراقێ و هەرێما كوردستانێ كر، هەروەسا هەڤڕابوون كو بەرژەوەندی و بهایێن هەڤپشك ئەمریكا ل گەل ئیراقێ و هەرێما كوردستانێ گرێددەت. هەر سەبارەت ڤێ چەندێ باس ل وارێن هاریكاریێ د ناڤبەرا هەردو ئالییاندا هاتە كرن.
نێچیرڤان بارزانی و جۆشوا هاریسی، بڕێڤەچوون و سەركەفتنا هەلبژارتنێن جڤاتا نوونەرێن ئیراقێ ب پێنگاڤەكا گرنگ و ئەرێنی هەژمارت و هیڤی خواستن ببیتە ئەگەرێ پێشڤەچوونا پرۆسەیا سیاسی ل وەلاتی، هەروەسا بەرسڤدانا داخوازی و چاڤەڕێبوونا وەلاتییان بیت.
هەڤبەندیێن هەولێر- بەغدا، گرنگییا ئێكدەنگییا ئالیێن كوردستانی ل هەرێما كوردستانێ و ئیراقێ و رەوشا دەڤەرێ ب گشتی، تەوەرەكێ دی یێ كۆمبوونێ بوو.