مەزلووم عەبدی، فەرماندەیێ گشتیێ هێزێن سووریا دیموكرات (هەسەدە) پەیوەندییەكا تەلەفۆنی ل گەل مەسرور بارزانی، سەرۆكێ حوكمەتا هەرێما كوردستانێ ئەنجامدا و تێدا بزاڤ بۆ ئارامكرنا رەوشێ و چارەنڤیسێ دەستەسەركریێن داعشێ گەنگەشەكر.
فەرماندەیێ گشتیێ (هەسەدە) د پەیامەكێدا ل پێگەهێ خوە ل تۆرا جڤاكییا (ئێكس) ئاشكراكر كو ل گەل مەسرور بارزانی، سەرۆكێ حوكمەتا هەرێما كوردستانێ پرسا ڤەگوهاستنا پرسا ڤەگوهاستنا چەكدارێن دەستەسەركریێن داعشێ بۆ ئیراقێ و بزاڤێن دیپلۆماسی بۆ جهگیركرنا ئارامییان گەنگەشەكر.
د وێ پەیوەندییا تەلەفۆنیدا، مەسرور بارزانی دووپاتی ل وان بزاڤان كر كو حوكمەتا هەرێما كوردستانێ د چارچۆڤەیێ پشتەڤانیكرنا خوشك و برایێن خوە ل رۆژئاڤایێ كوردستانێ وەرگرتین.
ژ ئالیێ خوەڤە مەزلووم عەبدی رێز و سوپاسییا خوە بۆ وێ پشتەڤانییا بەردەوام دیاركر كو حوكمەتا هەرێما كوردستانێ د ڤێ قووناغا هەستیاردا پێشكێشی مە كرین، ئەڤە ژی وەك رەنگڤەدانا روحییا هەڤپشك و بەرپرسیارەتییا نەتەوەیی ل ڤان وەختێن دژواردا هەژمارت.
ئەڤ پەیوەندییان تەلەفۆنی د ناڤبەرا فەرماندەیێ گشتیێ هەسەدە و سەرۆكێ حوكمەتا هەرێما كوردستانێ د وەختەكیدایە كو باكوورێ سووریێ ل بن گڤاشتنێن توند یێن سەربازی و مرۆڤایەتیدایە، پرسا هزاران زیندانیێن داعشێ ل رۆژئاڤایێ كوردستانێ، ئێكە ژ دۆسێیێن ئەمنی یێن هەرە گرنگ كو ئیراق و هەرێما كوردستانێ و هەڤپەیمانییا نێڤدەولەتی كار ل سەر دكەن، هەماهەنگییا بەردەوما هەولێرێ و قامشلۆ د ڤێ قووناغێدا، نەك هەر بۆ چارەسەركرنا دۆسێیێن ئەمنی، بەلكو وەك فاكتەرەكێ سەرەكی بۆ سڤككرنا قەیرانێن مرۆڤی و پاراستنا ئارامییا دەڤەرێن كوردنشین دهێتە دیتن.

بەربژارێ پارتی دیموكراتی كوردستان بۆ پۆستێ سەرۆككۆمارێ ئیراقێ راگەهاند: پارتی بەرهەڤە هەموو پۆستێن دی یێن بەهرا كوردان ل بەغدا بدەتە ئێكەتی نیشتمانی كوردستان، ل بەرامبەر وەرگرتنا پۆستێ سەرۆككۆماری.
د. فوئاد حسێن، وەزیرێ دەرڤەیێ ئیراقێ و بەربژارێ پارتی دیموكراتی كوردستان بۆ پۆستێ سەرۆككۆمارێ ئیراقێ د داخۆیانییەكا رۆژنامەڤانیدا پرۆپاگندەیا ڤەكێشانا خوە ژ بەربژاركرنێ بۆ پۆستێ سەرۆككۆماری رەتكر و گوت» من خوە نەڤەكێشایە و ئەوا دهێتە گوتن ل دۆر ڤێ چەندێ تنێ پرۆپاگندەیە، نوكە رەوشا من باشە و فراكسیۆن و هێزێن سیاسی پشتەڤانییەكا باش ل من دكەن».
ل دۆر پرسا پاشئێخستنا روونشتنا رۆژا سێشەمبی 27/1/2026 یا جڤاتا نوونەران كو تایبەت بوو ب هەلبژارتنا سەرۆككۆمارێ ئیراقێ، د. فوئاد حسێن پێشنیازا پاشئێخستنێ هەم ژ ئالیێ ئێكەتیێ ڤە و هەم ژ ئالیێ پارتی ڤە و هەتاكو سەركردەیێن شیعە ژی باس ل پاشئێخستنا وێ كر و یا ئەز دزانم بۆ رۆژا ئێكشەمبییا بهێت هاتیە پاشئێخستن».
ل دۆر دانوستاندنان ل گەل ئێكەتی نیشتمانی كوردستان، د. فوئاد حسێن دووپاتی ل وێ چەندێ كر كو هێشتا هیڤییەك بۆ رێككەفتنێ مایە.
گوت ژی» هەكە ل سەر بەربژارەكێ هەڤپشك (كو ئەز بم) رێكبكەڤین، پارتی بەرهەڤە ئەو پۆستێن ل بەغدایێ هەین، بێخیتە بەردەستێ ئێكەتیێ».
د. فوئاد حسێن ئاماژە ب وێ چەندێ ژی كر دێ ڤێ پێشنیازێ ب فەرمی ل گەل ئێكەتیێ باس كەن، بەلێ هەكە ئەو رازی نەبن، دێ ب شێوەیێ هەڤڕكیێ چینە ناڤ جڤاتا نوونەران.
سەبارەت ب میكانیزما هەلبژارتنا سەرۆككۆماری ل ناڤ جڤاتا نوونەران، د. فوئاد حسێن پێشبینیێ ناكەت ل گەڕا ئێكێ هیچ بەربژارەك دەنگێن پێدڤی ب دەستڤەبینیت ژ ئەگەرێ زۆرییا هەژمارا بەربژاران كو 18 كەسن و گوت» ململانێ دێ كەڤیتە گەڕا دوویێ، من باوەری ب خوە هەیە دێ چمە گەڕا دوویێ، ل وێرێ ژی بڕیار دێ مینیت بۆ پەرلەمانتاران و فراكسیۆنێن سیاسی».
فەرهاد ئەترووشی، جێگرێ سەرۆكێ جڤاتا نوونەرێن ئیراقێ گوت» بڕیارا پاشئێخستنا روونشتنا جڤاتا نوونەرێن ئیراقێ ل سەر داخوازییا فەرمییا پارتی دیموكراتی كوردستان و ئێكەتی نیشتمانی كوردستان بوو».
سەبارەت ئالیێ قانوونیێ روونشتنا جڤاتا نوونەران، فەرهاد ئەترووشی گوت» ب گۆرەی دستووری و بڕیارا دادگەها بلند یا فیدرالی، بۆ بڕێڤەچوونا پرۆسەیا هەلبژارتنا سەرۆككۆماری، پێدڤییە 22 پەرلەمانتار ل هولا جڤاتا نوونەران بەرهەڤ بن، بەلێ د روونشتنا رۆژا سێشەمبی دا ئەو هەژمارا پەرلەمانتاران بەرهەڤ نەبوون و رێژەیا قانوونی تمام نەبوو».
ژ ئالیێ خوەڤە نڤیسینگەها راگەهاندنا هەیبەت حەلبووسی، سەرۆكێ جڤاتا نوونەرێن ئیراقێ ل رۆژا سێشەمبی 27/1/2026راگەهاند» هەردوو فراكسیۆنێن پارتی دیموكراتی كوردستان و ئێكەتی نیشتمانی كوردستان داخوازییەكا فەرمی پێشكێشی سەرۆكێ جڤاتا نوونەران كر بۆ پاشئێخستنا روونشتنا رۆژا سێشەمبی یا جڤاتێ».
ئارمانج ژ ڤێ پاشئێخستنێ وەك د بەیاننامەیا نڤیسینگەها راگەهاندنا سەرۆكێ جڤاتا نوونەراندا هاتی» دانا زێدەتر وەختییە بۆ تێكگەهشتنێ و رێككەفتنێ د ناڤبەرا پارتی دیموكراتی كوردستان و ئێكەتی نیشتمانی كوردستان».
عامر فایز، سەرۆكێ هەڤپەیمانییا تەسمیم یا سەر ب چارچۆڤەیێ هەماهەنگیێ ڤە ئاشكراكر» ل كۆمبوونا شەڤا 26/1/2026، نوونەرێن پارتی داخوازا وەختێ زێدەتر كر بۆ رێككەفتنێ، ئێكەتی ژی رازی بوو ل سەر وێ پێشنیازێ».
عامر فایز ئاماژەكر» بڕیارە روونشتنا هەلبژارتنا سەرۆككۆمارێ ئیراقێ بۆ رۆژا ئێكشەمبی 1/2/2026 بهێتە پاشئێخستن».

هەولێر، قائید میرۆ

بەرپرسەكێ وەزارەتا پێشمەرگەی ئاشكراكر، رەوشا نوكە ل سووریێ پەیدابووی پێشهاتەكا مەترسیدارە و ئیراقێ هەست ب ئەڤان مەترسییان كریە و راگەهاند، داعش نوكە بوویە مەترسی ل سەر ئیراقێ و هەرێما كوردستانێ و دەڤەرێ، چونكە هەژمارەكا چەكدارێن وان یێن د ناڤا زیندان و كەمپێن رۆژئاڤا دا بەرەلا بووینە و گەفان ل ئیراقێ دكەن.
فەریقێ ئێكێ جەبار یاوەر، ئەمیندارێ بەرێ یێ وەزارەتا پێشمەرگەی بۆ رۆژنامەیا (ئەڤرۆ) گوت» رەوشا نوكە ل سووریێ هەی، ب تایبەتی ل رۆژئاڤایێ كوردستانێ هەیە، چونكە دەڤەرێن بەری نوكە د بن دەستهەلانا هەسەدێ دا كەفتینە بن دەستهەلاتا گرۆپێن چەكدار كو بەری نوكە گرۆپێن تیرۆرستی بووینە و نوكە ناڤێ خوە كریە لەشكرێ نوو یێ سووریێ، یا خۆیایە ئەو گرۆپ مینا لەشكرەكێ رێكخستی كار ناكەن و هەموو ب جلكێن سەردەمێ خوە وەختێ گرۆپێن تیرۆرست بووینە، هەتا رهێن وان ژی هەروەك بەرێ نە و هەمان مەژی و گوتارێن بەرێ ژی هەنە، ژبلی هێرشكرنێ ل سەر دەڤەرێن بن دەستێ هەسەدێ هێرشی سەر كەمپا هۆل كریە كو پێنجی هزار كەسوكارێن داعش تێدانە و هێرشی سەر هندەك زیندانێن دی ژی كریە نێزیكی 10 هزار بەرپرس و ئەمیرێن گرۆپا تیرۆرستیا داعشێ تێدانە، مخابن هندەك ژوان چەكدارێن داعشێ دناڤا زیندانێن رۆژئاڤایێ كوردستانێدا هاتینە ئازادكرن یان ژی بەرەلا بووینە، لەوڕاژی ئیراق ئەڤێ رەوشا سوورێ ب دو ئالییان ڤە ب مەترسی دزانیت یا ئێكێ، ئەو گرۆپێن چەكدار گەفن ل سەر ئاسایشا ئیراقێ و نوكە ئەو گرۆپ یێن چەكدار وەختێ چەند رۆژێن بۆری گەهشتینە دەروازەیەكێ سنوورێ ئیراقێ گوتی راناوەستین هەتا دگەهینە كەربەلا، ئەڤەژی مەترسییە و ترس بۆ سنوورێ ئیراقێ چێكریە، هەروەسا مەترسییەكا دی بەلاڤبوونا ئەو هەموو چەكدارێن ناڤا زیندان و كەمپێن رۆژئاڤایە بەرەلا ببن و ببنە مەترسی ل سەر ئیراقێ، لەوڕاژی ئیراق نوكە یا بەرهەڤییان دكەت بۆ بەرهنگاربوونا ئەڤان مەترسییان و هێزەكا مەزن هاتیە هنارتن بۆ سەر سنوورێ سووریێ، چونكە ئیراقێ زێدەتری 600 كیلۆمەتران سنوور ل گەل وەلاتێ سووریێ هەیە ل رۆژێن بۆری ژی پترییا بەرپرسێن ئیراقێ سەرەدانا سنوورێ ئیراقێ ل گەل سووریێ كریە ژوان ژی وەزیرێ بەرگریێ و سوپاسالارێ ئیراقێ و فەرماندێ هێزێن چەكدار و چەندین بەرپرسێن دی ژی، كۆمبوونەك هاتیەكرن ل ئیراقێ و بەرهەڤی هاتینەكرن بۆ رەوشا نوكە».
ڤی بەرپرسێ سەربازیێ هەرێما كوردستانێ گوت» داعش وەك رێكخراوەكا تیرۆرستییا جیهانی نەهاتیە ژناڤبرن و وەك خوە مایە، تنێ هەردو ئیمارەتێن داعشێ ل سووریێ و ئیراقێ هاتینە ژناڤبرن ل سالا 2017ێ، بەلێ وەك رێكخراوەكا تیرۆرستی داعش هەر مایە و كریارێن تیرۆرستی ئەنجام ددەت و ل سووریێ و ئیراقێ و وەلاتێن دی ژی داعشێ چالاكیێن تیرۆرستی هەنە، هەتا ل ئورۆپا ژی داعش مایە و ژئالیێ هزری ڤە داعش نوكە گەلەك یا چالاكە، ب تایبەتی ب رێكا سۆشیال میدیایێ، مخابن هێشتا داعش گەفە ل سەر ئاسایشا جیهانی ول هندەك وەلاتێن مینا ئەفریقیا ویلایەت هەنە، داعشێن د ناڤا زیندان و كەمپاندا مەترسییەكا مەزنن تنێ داعشێن ئیراقێ ژی نینە، بەرۆڤاژی ب رەگەز و نەتەوەیێن جودا هەنە».
فەریقێ ئێكێ جەبار یاوەر ئاماژەكر» هندەك گومان هەنە ل دۆر رەوشا نوكە یا ل سووریێ و ئازادكرنا چەكدارێن داعشێ، ب تایبەتی وەختێ گرۆپێن چەكدار هێرشی سەر زیندانێن داعش تێدا ئەنجامدای بنگەهێن هێزێن ئەمریكا تنێ دو كیلۆمەتران دووری وان زیندانانە و چو هەلوەست نەبوون، ئانكو ل پێش چاڤێن ئەمریكا گرۆپێن سووریێ هێرشی سەر كەمپ و زیندانێن داعشێ دكر و ئەمریكا بێدەنگ بوو ئەڤە جهێ گومانێیە، چونكە سەردەمەكی ئەمریكا پارەیەكێ مەزن د مەزاخت بۆ دەستەسەركرنا ئەمیرەكێ داعش، نوكە ئەو ئەمیر دناڤا زیندانێن رۆژئاڤایێ دا دهێنە بەردان و د رەڤن وئەمریكا چو هەلوێست نینە، هەرێما كوردستانێ ژی سنوور هەیە ل گەل سووریێ و وەك پشكەك ژ ئیراقێ ژی ئەو مەترسیێن داعشێ و ئالۆزیێن سووریێ مەترسی ل سەر هەرێما كوردستانێ ژی هەیە».

چاڤدێرێن سیاسی دیار دکەن ستراتیژیا نوو یا ئەمریکا بۆ رۆژهەلاتا ناڤین مەترسیا خوە بۆ کوردان هەیە، ژ بەر ڤێ یەکێ ژی گرنگە خوەنیشادانێن نها ل هەموو وەلاتێن جیهانێ بەردەوام بن، چونکی تنێ ب ئێکگرتنێ کورد دشێن مەترسیێن هەی ژناڤ ببەن.

د. وەهاب جوشکون بسپۆرێ کاروبارێن سیاسی دیار کر، یا نها ل رۆژئاڤایێ کوردستانێ و سووریێ روو ددەت مەترسیا خوە بۆ هەموو کوردان هەیە، ئەمریکا و هێزێن جیهانێ ب ئاشکرا پشتەڤانیێ ل دەستهەلاتا شەرعی دکەن و ل دژی مافێن گەلێ کوردستانێ نە، ئەمریکا و وەلاتێن ئێکەتیا ئۆرۆپا و ئەو هێزێن هەتا دوهی پشتەڤانی ل کوردان دکرن نها دبێژن ئێدی کارێ مە ب کوردان نەما و شام هەڤپەیمانا مە یە، ئەو یەک ژی مەترسیا گەلەک مەزن بۆ پاشەرۆژا کوردان هەیە و دڤێت کورد هشیار بن و یا پێدڤی بکەن و گۆت: (بێگومان ئێکەتیا نها د ناڤبەرا گەلێ کورد ل هەموو جیهانێ دا دروست بوویە گەلەک یا گرنگە، هەروەسا دهێتە خواستن هەموو هێزێن سیاسی یێن کوردی ژی ئێدی پێکڤە کار بکەن، چونکی مەترسیا نها تنێ ژ بۆ رۆژئاڤایێ کوردستانێ نینە و هەکە رێگری لێ نەهێتە کرن دێ مەترسی بۆ هەرێما کوردستانێ و پارچەیێن دی یێن کوردستانێ ژی دروست بن، مخابن تشتێ تۆم باراک دبێژیت بۆ کوردان گەلەک یا ب مەترسیە و کورد دشێن ب ئێکگرتنێ رێگریێ ل پیلانێن هەی بکەن).
عەبدوللا بایمیش چاڤدێرێ سیاسی ژی دیار کر، دەمێ تۆم باراکی راگەهاندی ئەو ل دژی سیستەمێ فیدرالیێ نە ل رۆژهەلاتا ناڤین وی دەمی دیار بوو کو پیلانەک ل دژی کوردان هەیە، ئەمریکا پشتەڤانیا کەسەکێ دکەت کو هەتا دوهی تیرۆرست بوو و نها بوویە هەڤالبەندێ ئەمریکا، د هەمان دەمی دا هەسەدە کو دوهی هەڤالبەندێ ئەمریکا بوو نها ئەمریکا پشتەڤانیێ لێ ناکەت، سیاسەتا ئەمریکا وەسایە، هەر تشت بوویە بەرژەوەندی و دڤێت کورد ژی ل گۆر راستیا نها ل جیهانێ سیاسەتێ بکەن، کورد دشێن هەڤسەنگیێن هەی ب رەنگەکێ دی بگوهۆڕن یان ژی وەسا بکەن کو د ئاڤاکرنا سیستەمێ نوو دا ئەو ژی بگەهنە مافێن خوە، خالا هەری گرنگ ژی دڤێت ئێکەتیا نها یا کو د ناڤبەرا کوردان دا دروست بوویە بەردەوام بیت و گۆت: (جارا ئێکێ یە د چەند سالێن بۆری دا ئەز دبینم کو کورد وەسا ئێکگرتی نە، خوەنیشادانێن ل هەموو جیهانێ نیشا دا هەکە کورد ئێکگرتی بن دشێن گەلەک تشتان بکەن، دەمێ کورد ئێکگرتی و بهێز بن بێگومان دێ هندەک هێزێن جیهانێ ژی پشتەڤانیێ ل کوردان کەن، وەکو سەرۆک بارزانی ژی بەری نها دیار کری دەمێ تو هەبی وی دەمی دێ گەلەک کەس ژی ل گەل بن و هەکە تو نەبی کەس بۆ تە چ ناکەت).

ل رۆژا ئێكشەمبی 11/1/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل فەرهاد ئەترووشی، جێگرێ سەرۆكێ جڤاتا نوونەرێن ئیراقێ كر.
د دیدارەكێدا، دانوستاندن ل دۆر رۆلێ كارا یێ جڤاتا نوونەرێن ئیراقێ د وارێ قانووندانانێ و چاڤدێریێ و بەرگریێ ژ مافێن هەموو وەلاتی و پێكهاتەیێن ئیراقێ هاتە كرن.
سەرۆكێ حوكمەتا هەرێمێ سەرەرای دەربڕینا پشتەڤانیێ بۆ جڤاتا نوونەرێن ئیراقێ وەك دەستهەلاتا قانووندانانێ، دوپاتی ژی ل گرنگییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرال ل سەر بنەمایێ دەستوور و رێككەفتنان و رێزگرتن ل قەوارەیێ فیدرالی و دەستوورێ یێ هەرێما كوردستانێ كر.

مەسرور بارزانی، سەرۆكێ حوكمەتا هەرێما كوردستانێ، پێشوازی ل ئەسعەد توركی سواری، نوونەرێ بەردەوام یێ ئیراقێ ل رێكخراوا یونیسكۆیێ كر.
ب گۆرەی بەیاننامەیەكا حوكمەتا هەرێما كوردستانێ، د دیدارەكێدا نوونەرێ ئیراقێ ل یونیسكۆیێ، كورتییەك ل دۆر كار و چالاكیێن خوە ل رێكخراوا یونیسكۆیێ بەرچاڤكر و ئاماژە ب گرنگییا نوونەرایەتكرنا هەموو پێكهاتە و پشكێن ئیراقێ، ب هەرێما كوردستانێ ژی ڤە، د رێكخراوێدا كر.
ئاماژە ب وێ چەندێ ژی هاتە كرن» سەرۆكێ حوكمەتا هەرێما كوردستانێ رێز و سوپاسیێن خوە بۆ كار و بزاڤ و چالاكیێن نوونەرێ ئیراقێ دیاركر و هیڤییا سەركەفتنێ د ئەركێ وی دا بۆ خواست. هەروەسا سەرۆكێ حوكمەتا هەرێمێ دووپاتی ل گرنگییا هەبوونا هەرێما كوردستانێ ب ئەندامەكێ پشكدار د رێكخراوا یونیسكۆیێ كر».

پەرلەمانتارەكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند، دانوستاندن دەربارەی پۆستێ سەرۆككۆماری بەردەوامن، و ئاماژە ب وێ چەندێ ژی كر : دو بژاردە ل پێشبەری ئالیێن كوردی نە بۆ ئێكلاكرنا ڤی بابەتی.
ئیخلاس دلێمی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ رۆژنامەیا (ئەڤرۆ) گوت» دانوستاندن د ناڤبەرا پارتی دیموكراتی كوردستان و ئێكەتی نیشتمان كوردستان دا بەردەوامن، و روونشتنەك ژی هاتیە ئەنجامدان ل سەر پێكئینانا كابینەیا نوو یا حوكمەتا هەرێمێ و پۆستێ سەرۆككۆماری و پارتی بەربژارێن خوە بۆ وی پۆستی پێشكێش كرینە و یا رژدە ل سەر بەربژاركرنا وان، و ئالیێن كوردستانی ژی ل بەرامبەر دو بژاردانە ژ وان، دڤێت رازییوونا زۆرینەیا كوردی هەبیت بۆ پۆستێ سەرۆككۆماری، هەر وەك چەوا زۆرینەیا سوننە هەبوو بۆ هەلبژارتنا سەرۆكێ جڤاتا نوونەران، و چەوا زۆرینەیا شیعە ژی دێ هەبیت بۆ هەلبژارتنا سەرۆك وەزیرێن نوو؛ لەوما یا سروشتییە هەلبژارتنا سەرۆككۆماری ب زۆرینەیا كوردی بیت و ئەو ئالیێ پۆستێ سەرۆككۆماری وەردگریت، دڤێت دەست ژ مافێن دی یێن خوە بەردەت، یان پشكداریێ د حوكمەتێدا بكەت یان ژی سەرۆككۆماری وەربگریت».
ئیخلاسی ئاشكرا كر» یا ئەستەمە ئالییەكی 17 كورسی ل جڤاتا نوونەرێن ئیراقێ هەبن و پۆستێ سەرۆككۆماری و دو وەزارەت و لیژنەیان و پێنج بریكارێن وەزارەتان و دەستەیەكا سەربەخوە وەرگریت، ئەڤە یا لۆژیكی و بەر ئاقل نینە».
زێدەتر گوت»دانوستاندن هێشتا بەردەوامن، ئەم د پارتی دا وەك بابەك ل هەموو ئالیێن دی دنێرین و د دانوستاندنێدا دێ بەردەوام بین و بەربژارێن مە بۆ پۆستێ سەرۆككۆماری فوئاد حسێن و نەوزاد هادی نە، هەروەسا ئەم داخواز ژ چارچۆڤەیێ هەماهەنگیێ دكەین ئەو میكانیزما كو دەنگی پێ د دەن بۆ سەرۆككۆماری، هەمان ئەو میكانیزم بیت یا كو دەنگی پێ د دەن بۆ سەرۆكێ جڤاتا نوونەران و سەرۆك وەزیران، ئەو ژی ب پشتبەستن ب زۆرینەیا سوننی و زۆرینەیا شیعی و زۆرینەیا كوردی».

سەرۆك بارزانی و تۆم باراك، هنارتیێ تایبەتێ دۆنالد ترەمپی، سەرۆكێ ئەمریكا بۆ كاروبارێن سووریێ و بالیۆزێ ئەمریكا ل توركیا پەیوەندییەكا تەلەفۆنێ ل دۆر رەوشا سووریێ ئەنجامدا.
بارەگەهێ بارزانی بەلاڤكر»د وێ پەیوەندییا تەلەفۆنیدا بیرو بۆچۆن ل دۆر رەوشا سیاسییا دەڤەرێ و سووریێ و دووماهی پێشهات و گرژیێن سووریێ و باژێرێ حەلەبێ هاتنە لێكگۆهارتن».
هەر د وێ پەیوەندییا تەلەفۆنیدا هەردو ئالییان دووپاتی ل وێ چەندێ كر كو پێدڤییە هەموو بزاڤ بهێنە كرن بۆ وێ چەندێ گرژی و ئالۆزی نەمینن و رەوش ئاسایی ببیت و پێنگاڤێن جدی ژی بۆ ب دەستڤەئینانا ئاسایش و ئارامیێ بهێنە هاڤێتن.

سەرۆك بارزانی و ئەحمەد شەرع د پەیوەندییەكا تەلەفۆنیدا دووماهی پێشهاتێن سیاسی یێن سووریێ و گوهۆڕینێن دەڤەرێ گەنگەشەكر.
بارەگەهێ بارزانی بەلاڤكر، ئەحمەد شەرع سەرۆكێ سووریێ ب رێكا تەلەفۆنێ پەیوەندی ب سەرۆك بارزانی كر.
د وێ پەیوەندییا تەلەفۆنیدا دووماهی پێشهاتێن سیاسی یێن سووریێ و گوهۆڕینێن دەڤەرێ هاتنە باسكرن و هەردو ئالییان دووپاتی ل گرنگییا ئارامی و هەماهەنگییا هەڤپشك كر.
هەروەسا سەرۆكێ سووریێ بۆ سەرۆك بارزانی دووپاتكر كو كورد پێكهاتەیەكێ رەسەن و سەرەكیێ گەلێ سووریێ یە و دووپاتی ل پێگیریبوونا دەولەتا سووریێ بۆ گەرەنتیكرنا هەموو مافێن نیشتمانی و مەدەنی یێن كوردان ل گەل پێكهاتەیێن دی یێن سووریێ ب شێوەیەكێ وەكهەڤ و بێی جوداهی كر.
هەر د وێ پەیوەندییا تەلەفۆنیدا سەرۆك بارزانی رێز بۆ وێ بۆچۆنا سەرۆكێ سووریێ هەبوو و پشتەڤانییا خوە بۆ حەز و خواست و هیڤیێن سوورییان بۆ ئاڤاكرنا دەولەتەكێ راگەهاند كو هەموو ئالی و پێكهاتەیان ب خوەڤە بگریت و تێدا هەڤپشك بن.
هەروەسا سەرۆك بارزانی دوپاتی ل پێدڤییا بەردەوامییا راوێژ و هەماهەنگیێ كر ئەوژی ژ پێخەمەت ل بەرچاڤ وەرگرتنا بەرژەوەندیێن هەموو ئالییان و پاراستنا ئاشتییا جڤاكی.

مەسرور بارزانی، سەرۆكێ حوكمەتا هەرێما كوردستانێ پەیامەك ل دۆر روودانێن حەلەبێ بەلاڤكر وراگەهاند: روودانێن حەلەب و ب ئارمانجگرتنا گوردان ژ پێخەمەت گوهۆڕینا دیموگرافییا دەڤەرێ و دروستكرنا مەترسیێ ل سەر ژیانا وەلاتیێن سڤیل، دەستهەلاتا دیمەشقێ و ویژدانا جڤاكێ نێڤدەولەتی د ئێخیتە بن پرسیاری.
سەرۆكێ حوكمەتا هەرێمێ ئاماژە ب وێ چەندێ ژی كر، شەڕ و توندوتیژی، چارەسەەرییا بنەڕەتییا هیچ كێشەیەكێ ناكەت. هیچ بەهانە نابیت رێكێ ب ژناڤبرنا رەگەزی بدەت. هێرش ل سەر تاخێن كوردێن باژێرێ حەلەبێ، ئەم ب گەلەك دلتەنگ كرینە.
ل دووماهییا پەیاما خوە مەسرور بارزانی گوت» هیڤیدارین هەموو ئالییەك ژیانا وەلاتییان بپارێزن و بۆ چارەسەرییا كێشەیان، پەنایێ بۆ دیالۆگێ و دانوستاندنێ ببەن، هەروەسا هیڤیدارین سیستەمێ حوكمڕانییا نوكە یا سووریێ ل ئاستێ بەرپرسیارییا دەستهەلاتەكا دیموكرات و گشتگیر بۆ هەموو خەلكێ سووریێ بیت.