ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ ل گه‌ل رابه‌رێ بزاڤا ئيسلامى يا كوردستانێ كۆمبوو.
به‌رى نيڤرۆيا ئه‌ڤرۆ رۆژا چارشه‌مبى رێكه‌فتى 13ى نيسانا 2016ێ ل پيرمام، عيرفان عه‌لى عه‌بدولعه‌زيز، رابه‌رێ بزاڤا ئيسلامى كوردستان و عه‌بدولا وه‌رتى ئاخفتنكه‌رێ ب ناڤێ حزبێ ل گه‌ل مه‌سعود بارزانى سه‌رۆكێ هه‌رێما كوردستانێ و سه‌رۆكێ پارتى ديموكراتى كوردستان كۆمبوون.
محه‌مه‌د خۆشناو، ئه‌ندامێ سه‌ركرداتيا بزاڤا ئيسلامى بۆ رووداو گۆت: “عيرفان عه‌لى عه‌بدولعه‌زيز و عه‌بدولا وه‌رتى ل سه‌ر كاودانێن سياسى يێن كوردستانێ و چه‌ند پرسێن دى يێن د ناڤبه‌را پارتى ديموكراتى كوردستان دا هه‌ين ل گه‌ل بارزانى گه‌نگه‌شه كرن.
بزاڤا ئيسلامى كه‌ڤنترين حزبا ئيسلامى يه ل باشوورێ كوردستانێ، به‌لێ هه‌ڤبه‌ركى ل گه‌ل هه‌ردو حزبێن دى “كۆمه‌ل و ئێكگرتوو” پێگه‌هێ جه‌ماوه‌رى كێمتره ژ وان هه‌ردويان و ل په‌رله‌مانێ كوردستانێ خودانا ئێك كورسيه و پشكدارى كابينا هه‌شتێ يا حوكمه‌تا هه‌رێما كوردستانێ نه‌كريه.
بزاڤا ئيسلامى ل سالا 1987 ژ لايێ كۆمه‌كا زه‌لامێن ئاينى ب سه‌ركرداتيا مه‌لا عوسمان عه‌بدولعه‌زيز ل ئيرانێ هاتيه راگه‌هاندن، بزاڤا ئيسلامى حزبا ئێكانه‌يا ئيسلامى سياسى چه‌كداره ل باشوورێ كوردستانێ هاتيه راگه‌هاندن ب ره‌نگه‌كێ فه‌رمى.
ھەولێر، قائید میرۆ:
بەرەیێ تورکومانی ھەلویستێ خوە ل دۆر کابینا تەکنۆکرات ئاشکراکر و راگەھاند، ئەگەر چو وەزارەت بەر ب تورکومانا نەکەڤن دەنگی بۆ نادەن.
ئایدن مەعرۆف، ئەندامێ مەکتەبا سیاسیا بەرەیێ تورکومانی بۆ ئەڤرۆ نیۆز گۆت: “حەیدەر عەبادی سەرۆک وەزیرێن عێراقێ چو کەسێن تورکومان بۆ کابینا تەکنۆکرات بەربژێر نەکرینە و پێکھاتا تورکومان ل عيراقێ بەرچاڤ نەھاتیە وەرگرتن، لەوڕا ئەم دژی ئەڤێ کابینا نووینە ل عێراقێ”.
ئایدنی خۆياكر كو هه‌كه بھێت و عەبادی یێ رژدبیت ل سەر ڤێ چەندێ چو پۆستێن وەزاری نەدەتە مللەتێ تورکومان ئەڤە بێگومان پەرلەمانتارێن تورکومان دەنگی بۆ کابینا تەکنۆکرات نادەن، کو ھژمارا وان 12 پەرلەمانتارن.
ئەڤرۆ نیۆز، قائید میرۆ
ھێشتا حوکمەتا ھەرێما کوردستانێ سۆزا خوە بۆ دامەزراندنا قوتابیێن ئێکێ ل سەر ئاستێ زانکۆ و پەیمانگەھا بجهـ نە ئینایە و خواندنا بلند ژی دبێژیت: “ناڤێن وان چووینە جڤاتا وەزیران”.
عەباس ئەکرەم، پەیڤدارێ وەزارەتا خواندنا بلندو ڤەکۆلینێن زانستی بۆ ئەڤرۆ نیۆز گۆت: “قوتابیێن ئێکێ ل زانکۆ و پەیمانگەھێن ھەرێما کوردستانێ نەھاتینە دامەزراندن و وەزارەتا خواندنا بلند ناڤێن وان قوتابیا بلند کرینە بۆ سەرۆکایەتیا جڤاتا وەزیران، بەلێ جڤاتا وەزیران ئەف قوتابیێن ل پلا ئێکێ ھەتا سیێ ب دەستڤە ئینای دانەمەزراندينه”.
ل دۆر دەرمالێ قوتابیێن زانکۆ و پەیمانگەھان عەباس گۆت: “راستە چەند ھەیڤە دەرمالە بۆ قوتابیا نەھاتیە مەزاختن، لێ ئاریشە د ناڤبەرا زانکۆ و وەزارەتا دارایی دایە و خواندنا بلند ژێ بەرپرس نینە”.
ئه‌ڤرۆ نيوز:
ل سه‌ر داخوازا 61 نوونه‌ران ئه‌ڤرۆ رۆژا چارشه‌مبى كۆمبوونا نه‌ئاسايى يا جڤاتا نوونه‌رێن عيراقێ دێ هێته ئه‌نجام دان و هه‌ڤپه‌يمانيا ئه‌حرار ژى رادگه‌هينيت كو دێ داخوازا ڤه‌كێشانا باوه‌رێ ژ هه‌رسێ سه‌رۆكاتيان هێته كرن.
بڕياره ئه‌ڤرۆ ده‌مژمێرى 13:00 جڤاتا نوونه‌رێن عيراقێ ل سه‌ر داخوازا 61 نوونه‌ران، روونشتنه‌كا نه‌سايى يا جڤاتا نوونه‌رێن عيراقێ كۆم ببيت و و تێدا دانوستاندن ل سه‌ر كاودانێن نوكه يێن عيراقێ و جڤاتا نوونه‌رێن عيراقێ بهێته كرن.
ئيقبال غورابى، ئه‌ندامێ جڤاتا نوونه‌ران ل سه‌ر هه‌ڤپه‌يمانيا ئه‌حرار د به‌ياننامه‌كێ دا راگه‌هاند كو د كۆمبوونا ئه‌ڤرۆ يا نه‌ئاسايى دا ئه‌و دێ داخوازا ده‌ست ژ كاركێشانا سه‌رۆكاتيا جڤاتا نوونه‌رێن عيراقێ و جڤاتا وه‌زيران و سه‌رۆك كۆمارێ عيراقێ كه‌ن.
هه‌ر د ڤێ به‌ياننامێ دا دايه زانين ژى كو مانگرتنا ئه‌ندامێن جڤاتا نوونه‌ران يێن هه‌ڤپه‌يمانيا ئه‌حرار ئه‌وا دوهى ده‌سپێكرى دێ يا به‌رده‌وام بيت هه‌تا پرۆسا ده‌ست ژ كاركێشانێ ئێك ب ئێك دهێنه ئه‌نجام دان.
ئەڤرۆ نيوز:
سەرۆکێ ئێکەتیا مامۆستایێن کوردستانێ ئاشکرا کر کو د کۆمبوونا 22/2/2016 یا ل گەل نیچیرڤان بارزانی، سەرۆکێ حوکمەتا ھەرێما کوردستانێ و قوباد تەلەبانی، جێگرێ سەرۆکێ حوکمەتا ھەرێمێ ئەنجامدای سۆز ب وان ھاتەدان کو د ڤێ ھەیڤێ نیڤ مووچێ ھەیڤا نەھا یا سالا بۆری یێ مامۆستایان دێ ھێتە بەلاڤکرن.
عەبدولواحد محەمەد، سەرۆکێ ئێکەتیا مامۆستایێن کوردستانێ بۆ خەلک دیار کر کو ل مەھا نەە یا سالا بۆری مامۆستایان نیڤ مووچە وەرگرتبوو و ئەو دێ ل ھیڤیا وێ سۆزێ بن یا سەرۆکێ حوکمەتێ و جێگرێ وی دایە وان کو د ڤێ ھەیڤێ دا دێ ئەو نیڤ مووچێ مای ل سەر مامۆستایان ھێتە بەلاڤکرن.
ناڤھاتی نەدا زانین ھەکە نیڤ مووچێ مامۆستایان یێ ھەیڤا نەە یا سالا بۆری د ڤێ ھەیڤێ دا نەھاتە بەلاڤکرن دێ ھەلویستێ وان چو بیت.
ئه‌ڤرۆ نيوز:
ئه‌ڤرۆ سپێدێ و ره‌نگه‌كێ نه‌چاڤه‌رێكرى دا، سه‌رۆكێ ته‌ڤگه‌را سه‌در، موقته‌دا سه‌در، عيراق ب جهـ هێلا و به‌ر ب لوبنان ب رێ كه‌فت، بڕياره ده‌مژمێر 6:00ى ئێڤارى ژى خونيشادانێن به‌فره‌هـ ده‌ست پێ بكه‌ن.
ب گۆره‌ى راگه‌هاندنێن عيراقى، ئه‌ڤرۆ رۆژا چارشه‌مبى رێكه‌فتى 13ى نيسانا 2016ێ دێ خوه‌نيشادانێن به‌رفره‌هـ ژ لايێ لايه‌نگرێن سه‌درى ل عيراقێ هێنه كرن وه‌كو نه‌رازيبوونا به‌رامبه‌ر حوكمه‌تا ته‌كنوكرات يا عه‌بادى ب به‌هانه‌يا وێ چه‌ندێ كو حوكمه‌تا نوو نه‌بوو چاكسازيێ يه، به‌لكو ب تنێ بۆ رازيكرنا وايه.
دوهى ژى د كۆمبوونا جڤاتا نوونه‌رێن عيراقێ دا، كوتلا ئه‌حرار يا سه‌ر ب ته‌ڤگه‌را سه‌در ڤه، بايكوتا روونشتنا جڤاتێ كر وه‌كو نه‌رازيبوون هه‌مبه‌ر ناڤێ كابينا نوو يێن حوكمه‌تا ته‌كنوكرات ب سه‌رۆكاتيا عه‌بادى.
ئه‌ڤرۆ ژى د سه‌ره‌دانه‌كا نه‌چاڤه‌رێ كرى دا، سه‌رۆكێ ته‌ڤگه‌را سه‌در موقته‌دا سه‌در ب رێيا فرۆكخانا نه‌جه‌ف به‌ر ب وه‌لاتێ لوبنانێ ب رێ كه‌فت بێى كو مه‌ره‌ما سه‌ره‌دانێ بهێته دياركرن يان ژى پێشوه‌خت بهێته راگه‌هاندن.
ئه‌ڤرۆ نيوز:
ئه‌ندامه‌كێ سه‌ركرداتيا پارتى ديموكراتى كوردستان راگه‌هاند، حزبا وان ب چو ره‌نگان ده‌ست نائێخيته ناڤ كاروبارێن ئێكگرتوو ئيسلامى كوردستان و ده‌ست ناكه‌ته د ناڤ كۆنگرێ وێ ژى دا.
دوهى رۆژناما ئاوێنه ژ زارێ ئه‌بۆ به‌كر عه‌لى ئه‌ندامێ سه‌ركرداتيا ئێكگرتوو ئيسلامى كوردستان ڤه‌گوهاستيه كو پارتى كانديد بۆ ئه‌ميندارێ گشتيێ ئێكگرتوو دياركريه و پاشان ئه‌بۆ به‌كر عه‌لى د روونكرنه‌كێ دا ره‌تكر كو ئاخفتنێن ژ وى ره‌نگى كربن.
دلشاد شه‌هاب، ئه‌ندامێ سه‌ركرداتيا پارتى ديموكراتى كوردستان بۆ مالپه‌رێ فه‌رمى يێ پارتى ديموكراتى كوردستان راگه‌هاند: پارتى ب چو ره‌نگه‌كى ده‌ست نه‌خستيه ناڤ كاروبارێن ئێكگرتوو و ده‌ستێ خوه نا ئێخيته ناڤ كۆنگێ وێ ژى، هيڤيا سه‌ركه‌فتنا كۆنگره‌كێ باش و سه‌ركه‌فتى بۆ ئه‌وێ حزبێ دخوازين”.
گۆتژى: “نزانين مه‌ره‌ما ئه‌بۆ به‌كر عه‌لى ژ ڤێ به‌حسكرنێ بابه‌ته‌كێ ناڤخۆيێ وێ حزبێ يه يان په‌يوه‌ندى ب خوه‌كانديدكرنا وى و بابه‌تێ ناڤخۆى ڤه هه‌يه، يان ژ هه‌ر مه‌ره‌مه‌كا دى كو په‌يوه‌ندى ب پارتى و ئێكگرتوو ڤه هه‌بيت، ئه‌م ئه‌وان گۆتنان ب هه‌موو ره‌نگه‌كى ره‌تدكه‌ين.
بڕياره ل هه‌يڤا ئه‌يارا ئه‌ڤ ساله كۆنگرێ حه‌فتێ يێ ئێكگرتوو بهێته كرن و دهێته پێشبينيكرن هه‌ر ئێك ژ سه‌لاحه‌دين محه‌مه‌د بهائه‌دين و محه‌مه‌د فه‌ره‌ج و ئه‌بۆ به‌كر عه‌لى و هادى عه‌لى و محه‌مه‌د ره‌ئۆف خوه بۆ پۆستێ ئه‌ميندارێ گشتيێ ڤێ حزبێ كانديد بكه‌ن.
ئه‌ڤرۆ نيوز:
مامۆستایەکێ کولیژا قانوون و سیاسەتێ ل زانکۆیا دھۆکێ دبێژیت، پێکئینانا حوکمەتەکا تەکنوکرات ل عیراقێ جھێ پرسیارێ یە، ئەو ژی ڤەدگەریت بو بنەمایێن دیموکراسیەتێ و ئەرێ عیراق بوویە دەولەتەکا دیموکراسی و ڕێ بدەتە کەسێن خودان شیان و تەکنوکرات ژ دەرڤەی پارتێن سیاسی حوکمەتەک بھێتە پێکئینان و ڤی وەلاتی ب ڕێڤە ببەن و بێگومان ئەو کەسێن ھاتینە دەست نیشانکرن بۆ حوکمەتێ، دێ کەڤنە دئاریشێن پارتێن دەسەلاتدار دا.
سالم جاسم بۆ ڕۆژناما ئەڤرۆ دبێژیت”تەکنوکرات پەیڤەکا یونانی یا رەسەنە و ژ دوو پەیڤان پێک ھاتیە کو دەسەلات و حوکم ئانکو ئێکە ژ شێوێن حوکمەتێ، ڕامانا وێ ژ لایێ پەیڤێ ڤە حوکمەتەکا بسپوری یە، ئانکو حوکمەتا خودان شیانانە کو ل سەر بنەمایێ ڤێ چەندێ، دێ بیتە حوکمەتا تەکنوکرات و ژ تەخەکا خودان زانست و تەکنیکار و ڕەوشەنبیرە، ئانکو حوکمەتەکا تایبەتمەند د بیاڤێ ئابووری و پیشەسازی و بازرگانی دا کو پتریا جاران دوور ژ ھزر و بیرێن پارتەیاتی و دانوستاندنێن سیاسی یە ، ئەڤە پێناسەیا وێ یا زانستی”.
سالمی خویاکر” کەسێن تەکنوکرات دشێوێ ھەیکەلێ ئیداری و کارگێری دا دھێنە بکارئینان، ژبۆ برێڤەبرنا کاری، ب گۆرەی بسپوریێ ژی سەرکەفتی دبن د کارێن خوەدا، چونکی ل سەر بنەمایەکێ زانستی و قانوونی ڕەفتارێ دکەن دوور بێ گوھدان بۆ چ ڕا و بوچوونێن پارتێن سیاسی، بەلکو بۆ خزمەت و ھونەرێ ڕێڤەبرنا کارێ خو دکەت”.
ل دۆر وێ چەندێ ئایا تەکنوکرات و دیموکراسیێ چ پەیوەندی پێکڤە ھەیە، سالم جاسمی گۆت” تەکنوکراتێ پەیوەندیەکا خورت ب دیموکراسیێ ڤە یا ھەی، چونکی دیموکراسیەت نەبیت، حوکمەتەکا تەکنوکرات ناھێتە دروستکرن، ھەکە ل وەلاتەکی پارتەک دەسەلاتدار بیت و ڕێ بدەت کەسێن خودان بسپور دبیاڤێن ئیداری و کارگێری دا کو جھێ خوە بگرن دوور کو ژ پەیرەو پرۆگرامێ وێ پارتێ کارێن خوە بکەن، ئەڤە دیموکراسی یە، لەوما پەیوەندیەکا خورت ب دیموکراسیێ ڤە یا ھەی”.
دیاکر کر ژی”پارتێن سیاسی ل عیراقێ مینا کۆمپانیان کار دکەن کو خودان سەرمایەکێ مەزنن و خەلک ب خوەڤە گرێدایە ،کارتێکرن و مایتێکرن ل بیاڤێ بازرگانی و پیشەسازی و ئابووری و چاندنێ دا ھەیە ، ئەڤ ئاوایێ پێکئینانا حوکمەتا تەکنوکرات ل عیراقێ مەزنترین ئەزموونە بۆ عەبادی و ھەموو عیراقێ، ئەو چەندە سەرنەگرت و سەرکەفتن نەئینا بێگومان عیراق بەرەڤ چارەنڤیسەکێ نەدیار دچیت”.
پرسیار:ئەرێ کەسێن تەکنوکرات ھەڤدژیەک ھەیە ل گەل پارتێن سیاسی؟
سەبارەت وێ چەندێ ئایا ھەڤدژیەک ھەیە د ناڤبەرا کەسێن تەکنوکرات و پارتێن سیاسی دا، دبێژیت”ل دەولەتێن دیموکراسی دقۆناغێن دیرۆکی دڤان پرسان دا دەربازبووین چو گرفت نینن بۆ حوکمەتەکا تەکنوکرات ، کەسێن بسپور ببنە وەزیر یان ھەر تشتەک، بۆ نموونە ئەزموونا ئەمریکا و ل دەمێ ئۆباما بوویە سەرۆکێ ئەمریکا، لژنەکا شیرەتکاریێ ژ 100 کەسان دەستنیشانکر، کو کارێ وان ئەوبو کا چاوان کەسێن تەکنوکرات دیار بکەن و خودان شیان بن و دوور بن ژ ھزر و بیر و گرێدانێن حزبی، وەزیرێ بەرەڤانیێ نە گوھارت کو کەسەکێ خودان شیان و بسپور بو کو نە ژپارتا وی ژی بوو، بەلکو ژ پارتا کوماری بوو”.
ئاماژە دا” مەرج نینە کەسێ تەکنوکرات کەسەکێ بێ لایەن بیت، بەلکو دبیت دناڤا پارتێن سیاسی ژی دا کەسێن تەکنوکرات ھەبن و خودان شیان بن و دبەرزە بن دناڤ پارتان دا، یان لایەنگرێن پارتێ بن، بەلێ نەکەسەکێ چالاکە و کەسێن دی دچنە جھێ دەستھەلاتا پارتێن سیاسی، لەوما ئەو ژی ل دەمێ گرتنا دەستھەلاتێ ل کەسێن نێزیکی خوە دگەرن” .
سەبارەت ڕۆل و جھێ کوردان د حوکمەتا عەبادی دا، گۆت” مەرج نینە کورد وەکو ڕێژا خوە پۆستان وەربگرن، بەلکو خورتیا کوردان ل پەرلەمانی و پرسێن گرێدای ب ھەرێمێ ڤە پشکداربیت، چونکی عیراق نە وەلاتەکێ دیموکراسی یە ھەتا ئەو کەس ب شێت کارێن خوە ب پێدڤی ئەنجام بدەت، پارتێن کوردی دوێ نێرینێ دانە ھەکە حوکمەتا تەکنوکرات بھێتە پێکئینان و کەسێن دھێنە دانان دوور بن ژ کورد و پارتێن کوردی، جەماوەرێ خوە نابیت، ئەڤە پرسەکا نەتەوایەتی یە و پارتێن کوردی دترسن حوکمەتەک بھێت و کەسێن وان تێدا نەبن و ژبلی چەند وەزیران کوردان ھەبوون، بەلێ دناڤ دامودەزگەھێن دی دا ھەبوونا وان نینە، ل وی دەمی حوکمەت دبیتە حوکمەتەکا عەرەبی، یان سونی یان شیعی، ئەزمونێن دیرۆکا کوردان تشتێ ب ڤی ئاوای ھەبوویە و ل گەل بەعسیان کورد ھاتبوونە پشت گوە ھاڤێتن و ب ناڤێ کوردان چەند کەسەک ھاتبوونە دانان و بناڤێ تەکنوکراتیێ و بسپوریێ گرنگی ب پرسێن نەتەوایەتی نەدایە، نەبوونا پێگەھەکێ ب ھێز و ڕۆل نەدان ب کوردان فاکتەرن کو کورد ل دژ ڕاوەستن و پارتێن کوردی ژی ئێک دەنگ نینن، عەبادی یێ بێ منەت بوو دپێکئینانا حوکمەتێ دا بێ کو خوە ل ھیڤیا کوردان بگریت”.
ئەڤرۆ نیوز:
حەفت وەلاتێن زلھێزێن جیھانی داخواز ژ کۆمارا ئیسلامی یا ئیرانێ کرینە کو سێدارەدانا نەئاسایی رابگریت و ل گۆر قانوونێن مافێ مرۆڤی سەرەدەریێ ل گەل گرتیان بکەت و رێزێ ل بنەمایێن مافێ مرۆڤی بگریت.
وەزیرێن دەرڤە یێن حەفت وەلاتێن زلھێزێن جیھانی پشتی کۆمبوونەکا دو رۆژی ل یابانێ راگەھاندن کو ئەو پشتەڤانیێ ل رێککەڤتنا ئیرانێ ل گەل وەلاتێن ٥+١ دکەن و دڤێت ئیران رێزێ ل رێککەڤتنێ بگریت و ھەموو خالێن وێ بجە بکەت و داخواز ژ بەرپرسێن ئیرانێ ژی کرن کو سێدارەدانا نەئاسایی رابگریت، چونکو گەلەک جاران بریارێن سێدارەدانێ ل گۆر قانوونێ ناھێنە دان و گەلەک کەس پشتی کو ب سالان ل زیندانێ دمینن و سزایێ وان تەمام دبیت پاشێ ئەو دھێنە سێدارەدان و ئەو یەک ب تەمامی ل دژی قانوونێن مافێ مرۆڤی نە و دڤێت ئیران رێزێ ل مافێ مرۆڤی و ب تایبەتی ژی مافێن گرتیان بگریت و ل گۆر قانوونێن جیھانی سەرەدەری ل گەل وان بھێتە کرن.
د دووماھیا داخۆیانیا وەلاتێن زلھێز دا ئەو یەک ژی ھاتیە دیار کرن کو ئیرانێ سۆز دایە دێ رێزێ ل مافێ مرۆڤی و ئازادیا راگەھاندنێ بگریت لێ ھەتا نھا ئەو یەک نەھاتیە بجە ئینان و ھەکە ئیران سۆزێن خوە بجە نەئینیت دێ تووشی سزایێن گران بیت.
نيشاندان