NO IORG
نووترين نووچه
نووترين نووچه

ئه‌ڤرۆ نیوز: ڤه‌ده‌ر ره‌شاڤایی:
خوه‌كوژه‌كی خوه‌ دناڤ به‌هییه‌كێ دا ل ناوچا میقدادیه‌ ل پارێزگه‌ها دیالا په‌قاند و د ئه‌نجام دا پتری 20 كه‌سان هاتن كوشتن و ب ده‌هان كه‌س هاتن برينداركرن.
به‌هی یا ملیشیایه‌كێ شیعه‌ بوو كو د شه‌رێ دژی داعش دا هاتبوو كوشتن.
چ ئالییه‌كی هێشتا به‌رپرساتییا خوه‌ ژ روودانێ رانه‌گه‌هاندییه‌.

ئه‌ڤرۆ، سالار دۆسكى:
سه‌رۆكێ لژنا پیشه‌سازى و به‌رهه‌مێن گازێ ل جڤاتا پارێزگه‌ها دهۆكێ دیاركر كو بهایێن ئه‌مپێرێن كاره‌بێ هاتنه‌ خوار و ئه‌ڤ بریاره‌ بۆ هه‌یڤا ئادارێ دێ كه‌ڤیته‌ دبیاڤێ بجهئینانێ دا. عه‌بدوسه‌مه‌د تێلى سه‌رۆكێ لژنا ناڤبرى زێده‌تر بۆ ئه‌ڤرۆ نیۆز گۆت: كاركرنا موه‌لیدان ب ده‌مژمێران هه‌یڤانه‌ دهێته‌ لێكدان و بهایێ ئه‌مپێرى وێ هه‌یڤێ ده‌ردكه‌ڤیت، پێشتر بۆ هه‌ر ده‌مژمێره‌كێ هزار و 500 دینار هاتبوونه‌ ده‌ستنیشانكرن، نوكه‌ 20% هاتنه‌ كێمكرن و بوو  هزار و 200 دینار.
ناڤبرى هێشتا رونكرن و گۆت: بۆ هه‌یڤا شواتێ یا چووى دێ بهایێ ئه‌مپێرى 10 هزار دیناربن، بۆ هه‌یڤا ئادارێ و دووڤ دا دێ گوهۆرین كه‌ڤیتێ، ماوێ كاركرنا موه‌لیدان دێ چارى ئێڤارى بیت هه‌تا ئێكى شه‌ڤێ و هه‌یڤا بهێت ئه‌م پێشبینى یا شه‌ش هزار دیناران دكه‌ین بۆ ئه‌مپێرى، ئانكو ژ دوازده‌ هزاران دێ بیته‌ شه‌ش هزار دینار.
ل دۆر موه‌لیدێن بازارى ناڤبرى گۆت: پێشتر ئه‌وان بۆ هه‌ر ده‌مژمێره‌كێ 2000 دینار وه‌ردگرتن و ئه‌و ژى 25% هاتنه‌ خوار، بۆ هه‌ر ده‌مژمێره‌كێ دێ هزار و 500 دیناربن و دێ به‌رده‌وام كاركه‌ن چونكه‌ ل بازارى نه‌.
ل دۆر موه‌لیدێن شوقان ژى گۆت: چونكه‌ ئاڤا شوقان ب كاره‌بێ یه‌، كاركرنا موه‌لیدان دێ وه‌ك به‌رێ بیت ژ حه‌فتى سپێدێ هه‌تا دووێ شه‌ڤێ، بهایێ ئه‌مپێرى 20% دێ كێم بیت.

ئه‌ڤرۆ نیوز:
نێچیرڤان بارزانى سه‌رۆكێ حوكمه‌تا هه‌رێما كوردستانێ داخاز ژ پاتریك سیمۆنى بالیوزێ ئێكه‌تیا ئورۆپا ل عیراقێ كر كو جڤاكى نێڤده‌وله‌تى پشكا هه‌رێمێ ژ وان قه‌ران دابین بكه‌ت یێن كو دێ ب حوكمه‌تا عیراقێ هینه‌ دان.
نێچیرڤان بارزانى د دیداره‌كێ دا ل گه‌ل بالیۆزێ ئێكه‌تیا ئورۆپا به‌حسێ برینا پشكا بۆدجا هه‌رێمێ ژ ئالیێ به‌غدا ڤه‌ كر و گۆت” برینا بودجه‌ى و هاتنا ژماره‌كا زۆر یا ئاواران و ئه‌رزانبوونا بهایێ نه‌فتێ كارتێكرنێن زور نه‌رێنى ل سه‌ر ره‌وشا هه‌رێما كوردستانێ دروست كرن”.
نێچیرڤان بارزانى ئاماژه‌ ب پابه‌ندبوونا حوكمه‌تا هه‌رێمێ ب وان رێكار و چاكسازیان كر كو بۆ ده‌ربازبوونا قه‌یرانا داراییا هه‌رێمێ هاتینه‌ دانان و گۆت” حوكمه‌تا هه‌رێمێ هیڤى خوازه‌ جڤاكى نێڤده‌وله‌تى ب گشتى و ب تایبه‌ت دوست و هه‌ڤپه‌یمانێن مه‌، هه‌ڤكاریا هه‌رێمێ بكه‌ن و ب واقیعانه‌ ته‌ماشه‌ى ره‌وشا هه‌رێما كوردستانێ بكه‌ن”.

ئه‌ڤرۆ نیوز:
عه‌بدولره‌حمان عه‌لى ئه‌ندامێ په‌رله‌مانێ كوردستانێ راگه‌هاند ل هه‌رێما كوردستانێ نێزیكى 25 هزار كۆمپانیا هه‌نه‌ كو پرانیا وان كۆمپانیێن مه‌زنن، سالانه‌ ب ملیاره‌ها دولاران ل هه‌رێما كوردستانێ قازانجێ دكه‌ن، به‌لێ حوكمه‌تێ ژ باجێ به‌خشى نه‌ و چ پاره‌یه‌كێ وه‌ك باج ناده‌نه‌ حوكمه‌تێ ب تنێ بۆ خوه‌ قازانجى خرڤه‌ دكه‌ن،
زانیار محه‌مه‌د رێڤه‌به‌رێ گشتى یێ باجێن هه‌رێمێ راگه‌هاند: ب تنێ 40% كۆمپانى سالانه‌ باجێن خوه‌ دده‌ن، ئه‌وێن دیتر دوسیه‌ بۆ نه‌هاتینه‌ ڤه‌كرن و باجان ناده‌ن.
زانیار محه‌مه‌د راگه‌هاند ژى ل دووڤ ئامارێن ل به‌رده‌ست داهاتێ باجێ ل سالا 2015 ب 160 ملیار دهاته‌ خه‌ملان و ل چاڤ سالێن بورى كێم بوویه‌ ژ به‌ر ئیفلاسبوونا هنده‌ك كۆمپانیان و خوه‌ڤه‌دزینا هنده‌ك خۆدان كۆمپانیان ژ دانا باجێ.

ئه‌ڤرۆ نیوز:
شورش حاجى په‌یڤدارێ گۆڕان راگه‌هاند: پارتى دیموكراتى كوردستان هێشتا یا ل سه‌ر هه‌لویستێن خوه‌ به‌رده‌وامه‌، و چ سازشه‌ك نه‌كریه‌ و ئه‌م ژى چ كۆمبوونه‌كێ ره‌ت ناكه‌ین، به‌لێ كومبوونێ ژ پێخه‌مه‌ت كومبوونێ ئه‌م ئه‌نجام ناده‌ین.
شورش حاجى په‌یڤدارێ گۆڕان راگه‌هاند: مه‌رجێ مه‌ یێ سه‌ره‌كى بۆ كومبوونێ، ئه‌وه‌ ره‌وش ڤه‌گه‌ریت وه‌كو به‌رى 12 چریا ئێكێ یا 2015ێ.

ئه‌ڤرۆ نيوز:

ل باژێرێ دهۆكێ حاله‌ته‌كێ دگمه‌نێ زارۆبوونێ هاته‌ تۆماركرن پشتى زارۆيه‌ك ل جهێ پيستێ ئاساى پێستێ وه‌كو پۆله‌كێن ماسى هه‌بوو. ئه‌و نوشدارا سه‌رپه‌رشتيا ژ دايكبوونا زارۆى دكر، دبێژيت ده‌ما دايكا وى زارۆ ب وى ره‌نگى ديتى زۆر كريه‌ گرى. نوشداره‌كێ تايبه‌تمه‌ند ژى دبێژيت: “ئه‌ڤه‌ حاله‌تێ ئێكێ نينه‌، هه‌ر 300 هزار زارۆيان ل جيهانێ كه‌سه‌ك ب ڤى ره‌نگى ژ دايك دبيت”.

ئه‌و زارۆيه‌ ل رۆژا 19ى ڤێ هه‌يڤێ ل نه‌خۆشخانا ژ ژن و ژدايكبوونێ ل باژێرێ دهۆكێ ژ دايك بوويه‌، به‌لێ پشتى سێ رۆژان ب تنێ ئه‌وى گيانێ خوه‌ ژ ده‌ست دا.
د. خاليدا حه‌سه‌ن، سه‌رپه‌رشتيا ژدايكبوونا زارۆى كريه‌ بۆ رووداو گۆت: “ئه‌و زارۆ د ده‌مێ خوه‌ دا و ب رێيه‌كا سرۆشتى و بێ نشته‌رگه‌رى ژ دايكبوو، سێ رۆژان د ژيانێ دا ما و مر، دايكا وى هه‌ر يا روونشتى بوو و دكره‌ كرى”.
ل دووڤ گۆتنا نوشدارى ئه‌و زارۆ هه‌لگرێ نه‌خۆشيا ماسى (Ichthyosis) بوو، ب تنێ كريم بۆ دهاته‌ ب كارئينان و ئه‌ڤه‌ ژى چاره‌سه‌ريا نه‌خۆشيێ نه‌دكر و ژ به‌ر هندێ گيانێ خوه‌ ژ ده‌ست دا.

د. خاليدايێ گۆتژى: “ئه‌ڤه‌ حاله‌تێ ئێكێ نينه‌ ل دهۆكێ ب ڤى ره‌نگى ژ دايك دبيت، به‌رى نوكه‌ ژى حاله‌تێن ژ ڤى ره‌نگى هه‌بووينه‌، به‌لێ نه‌خۆشيا سڤك بوويه‌ و هاتينه‌ چاره‌كرن”.

نه‌خۆشيا ماسيێ تووشى پيستێ مرۆڤى دبيت و زێده‌تر يا زكماكى يه‌، ئه‌وێ نه‌خۆشيێ ژى چار پله‌ يێن هه‌ين و ئه‌ڤا زارۆيێ دهۆكێ ژ جۆرێ پلا تۆند بوو.

هه‌ر چه‌نده‌ به‌رپرسيارێن نه‌خۆشخانێ د ئاماده‌ نه‌بووين چو پێزانينان به‌لاڤ بكه‌ن، به‌لێ ب گۆره‌ى پێزانينان ئه‌وێ خێزانێ دو زارۆيێن دژى هه‌نه‌، به‌لێ چو كێشێن ساخله‌ميێ نينن.

د. خاليدا محه‌مه‌د تايبه‌تمه‌ندا نه‌خۆشيێن زارۆيان 12 ساله‌ ب نه‌خۆشخان ژن و زارۆبوونێ كار دكه‌ت به‌حس ل وێ نه‌خۆشيێ دكه‌ت و دبێژيت: “نه‌خۆشيا ماسيان تووشى پيستێ مرۆڤى دبيت، نه‌خۆشيه‌كا به‌لاڤ ل جيهانێ و هه‌ر 300 هزار زارۆيان ئێكى ئه‌ڤ نه‌خۆشيه‌ هه‌يه‌”.

ده‌رباره‌ى به‌لاڤبوونا وێ نه‌خۆشيێ ل كوردستانێ ژى دكتورا خاليدا دبێژيت: “ب گۆره‌ى پێزانينێن من سالانه‌ ل دهۆكێ دو بۆ سێ حاله‌تێن ژ ڤى ره‌نگى ژ دايك دبن، به‌لێ رێژا نه‌خۆشيا وان كێمتره‌، ئه‌ڤ زارۆيێ ڤێ دووماهيێ ژ دايكبووى، رێژا وى گه‌له‌ك يا زێده‌ بوو، ژ به‌ر هندێ نه‌ژيا”.
ب گۆره‌ى گۆتنێن نوشدارێ هێشتا چاره‌سه‌ريا ڤێ نه‌خۆشيێ نه‌هاتيه‌ ديتن و گۆت: “باشترين سه‌نته‌رێ چاره‌سه‌ريێ ل جيهانێ هێشتا چاره‌سه‌ريا ڤێ نه‌خۆشيێ نه‌ديتيه‌، پتريا ئه‌و زارۆيێن ب ڤى ره‌نگى ژ دايك دبن حه‌فتيه‌كێ دمينن و پاشان دمرن”.

image-(10)

ژێده‌ر: رووداو

ئه‌ڤرۆ نيوز:

بۆ جارا ئێكێ وه‌لاتێ يابانێ په‌ترۆلا خاڤا هه‌رێما كوردستانێ هاورده‌ كر.

چه‌نده‌كى به‌رى نوكه‌ ل سه‌ر ئه‌كاونتێ پلاتس ئۆيل ل سه‌ر تۆڕا جڤاكيا تويته‌رى ژ زارێ وه‌زاره‌تا بازرگانى و پێشه‌سازى يا ژاپۆنێ ڤه‌ هاته‌ به‌لاڤكرن كو وه‌لاتێ وان ئێك ژ پێشكه‌فتيترين وه‌لاتێن جيهانێ، د هه‌يڤا بۆرى دا بۆ جارا ئێكێ په‌ترۆلا هه‌رێما كوردستانێ هاورده‌ كر.

ئه‌ڤرۆ نيوز:

ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو پشتى كۆمبوونا فراكسيۆنا وان ل دۆر كۆمبوونا جڤاتا سه‌ركرداتيا پارتى ديموكراتى كوردستان ب مه‌ره‌ما چاكسازيان دێ پرۆژه‌كى ده‌ته‌ سه‌رۆكێ هه‌رێما كوردستانێ.

محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ بۆ ده‌زگه‌هێن راگه‌هاندنێ راگه‌هاند: فراكسيۆنا پارتى ديموكراتى كوردستان ل په‌رله‌مانێ كوردستانێ دێ پرۆژه‌كێ چاكسازيێ بۆ حزبا خوه‌ و حوكمه‌تا هه‌رێمێ ئاراسته‌ى مه‌سعود بارزانى سه‌رۆكێ هه‌رێما كوردستانێ كه‌ت.

ناڤبرى زێده‌تر گۆت: “ئه‌و پرۆژێ چاكسازيێ ژ دو پشكان پێك دهێت، ئێك يێ تايبه‌ته‌ ب حزبێ و ئه‌وێ دژى يێ تايبه‌ته‌ ب حوكمه‌تا هه‌رێما كوردستانێ”.

محه‌مه‌د عه‌لى ياسين دا زانين ژى كو بۆ چاكسازيێن ناڤ پارتێ فراكسيۆنا پارتى پێشنيازا دووباره‌ دارشتنا هه‌يكه‌لێ حزبێ دكه‌ت و داخواز ژى كريه‌ كو باره‌گايێن پارتى بهێنه‌ كێمكرن.

ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ نه‌ڤه‌شارت ژى كو بۆ چاكسازيێن ناڤ حكومه‌تێ ژى ئه‌و پشته‌ڤانيا بڕيارێن مه‌سعود بارزانى سه‌رۆكێ هه‌رێما كوردستانێ دكه‌ن.

ئەڤرۆ نیوز:
مالپەرێ ناشینال ئینترست ل دۆر سەربخوەیا کوردستانێ و جودابوونێ ژ عیراقێ ڕاپۆرتەک بەلاڤکریە و تێدا دبێژیت، سەرۆک بارزانی ب ئاشکرا ڕاگەھاندیە کو دەمێ ڕیفراندۆمێ بۆ دیارکرنا چارەنڤیسێ ھەرێمێ یێ ھاتی، بەلێ د ھەمان دەم دا ژی دبێژیت، ئەڤە وێ چەندێ ناگەھینیت کو دەولەتا سەربخوە دێ بلەز ھێتە ڕاگەھاندن، بەلکو نیشادانا حەزا ڕاستەقینەیا خەلکی یە بۆ چارەنڤیسێ خوە ل عیراقێ.
مالپەرێ ناڤبری، بەحس ل وێ چەندێ دکەت کو سەرۆک بارزانی ل سالا 2014 ێ داخوازا سازکرنا ڕیفراندۆمێ کربوو و بڕیاربوو پەرلەمانێ کوردستانێ ژڤانەکی بۆ ڕیفراندۆمێ دەست نیشان بکەت، بەلێ شەڕێ داعشێ ئەو پرۆسە پاشخست.

زێدەتر دبێژیت، شەڕێ داعشێ باشتر ژ ھەر ڕیفراندۆمەکێ وێنێ کوردستانەکا سەربخوە نیشا ھەموو لایەکی دا و ھەرێما کوردستانێ، بێ بەغدا و ب شێوەکێ سەربخوە ئەو شەڕە ب ڕێڤەبر.
ناشینال ئینترست بەحس ل چەند نموونەکێن ڕیفراندۆمێ ل جیھانێ دکەت وەکو کاتالۆنیا و کیوبیک و سکۆتلەندا کو ژ وان نموونانە ژئەگەرێ ئاستێ دیموکراسیا وان، وان ڕیفراندۆم قەبوولکر و وەلاتێن بیانی ژی ڕێگری لێ نەکر کو سەربخوە ببن، یان ل گەل ناڤەندێ بمینن، ھەروەسا نموونا کوسۆڤا ژی دئینیت کو ل سالا 1991 ێ، زێدەتر ژ ملیۆن کەسان ژ خەلکێ کوسۆڤا دەنگ بۆ جودابوونێ ژ یوگۆسلافیا دا، پاشی ل سالا 2008 ێ، سەربخوەیا خوە وەرگرت، ھەرچەندە ھەموو وەلاتێن جیھانێ دانپێدان پێ نەکر، بەلێ 112 وەلاتان دانپێدان پێکر ب ئەمریکا و ئێکەتیا ئورۆپی ڤە. ھەروەسا نموونا سۆمالێ ل سالا 2001 ێ کو پشکا سۆمال لاند ژێ جودابووی.
ئەڤ مالپەرە زێدەتر دبێَژیت، ھندەک وەلات وەکو سۆمال لاند و باشوورێ سودانێ کو سەربخوەیا خوە وەرگرت، تووشی کێشێن یێن ناڤخوەیی بوون، سەبارەت کوردستانێ ژی، پرۆسە بێ کێشە نابیت.
سەرۆ قادر بەرپرسێ سەنتەرێ ڤەکۆلینێن گەشەپێدانا کوردستانێ بۆ مالپەرێ ناڤبری دبێژیت” ڕیفراندۆم یا پەیوەندیدارە ل گەل سەربخوەیێ و ب دیتنا من ئەم دشێین بێ ڕیفراندۆم ژی سەربخوە ببین، دەمێ سەرۆک بارزانی بەحسێ ڕیفراندۆمێ دکەت، بۆ وێ چەندێ یە کو ئەو دخوازیت ھەموو لایەنێن سیاسی یێن کوردستانێ ھەڤ دەنگبن، چونکی دوێ پرۆسێ دا، سەرۆک بارزانی ژبەر پێگەھا خوە، گەلەک ب ھێزتر دشێت ڕەفتارێ ل گەل عیراقێ و جڤاکێ نێڤدەولەتی بکەت”.
سەرۆ ھێشتا گۆت” ل سالا 2016 ێ، دێ کوردستان سەربخوە بیت و ھەرسێ وەلاتێن ئیسرائیل و سعودیە و فرەنسا ب فەرمی دێ دانپێدانێ پێکەن، ھەروەسا ئەم پێشبینیێ دکەین نێزیکی 40 وەلاتێن دی ژی پشتەڤانیا سەربخوەیا کوردستانێ بکەن”.
ناشینال ئینترست ل سەر زارێ (کەمال کەرکووکی) سەرۆکێ بەرێ یێ پەرلەمانێ کوردستانێ و ئێک ژ فەرماندێن پێشمەرگەی ل میحوەرێن شەڕی دژی تیرۆرستێن داعشێ ل کەرکووکێ، دبێژیت” دیارکرنا چارەنڤیسی مافەکێ سروشتیێ ھەر نەتەوەکی یە و قانوونا نێڤدەولەتی و پەیمانێن نەتەوێن ئێکگرتی و مافێن مرۆڤی ل سەر د ھەڤڕانە و مافەکێ ڕەوایێ مللەتانە ل دووڤ قانوونێن نێڤدەولەتی”.
کەمال کەرکووکی زێدەتر گۆت” سەربخوەیا کوردستانێ دژی دستوورێ عیراقێ ژی نینە، کو بەغدا وەسا پرۆپاگندێ دکەت، چونکی دستوورێ عیراقێ دبێژیت، پێکھاتێن جودا جودا یێن وەلاتی بڕیار یا دای کو ب رەزامەندی د چارچۆڤێ ئێکگرتی پێکڤە بمینن، ئانکو دشێن ب رەزامەندیا خوە ئێک چارچە بمینن، یان جودا ببن”.
کەرکووکی زێدەتر دبێژیت” بۆچی جیھان دیدەڤانیێ ددەت کو پێشمەرگە ل شوونا ھەموو جیھانێ شەڕێ داعشێ دکەت، بەلێ پرسیار ناکەت بۆچی بەغدا بودجا ھەرێمێ ناھنێریت؟ دڤێت جڤاکێ نێڤدەولەتی دانپێدانێ ب مافێن مە یێن ڕەوا و قانوونێ بکەت بۆ وێ چەندێ مافێ خوە یێ چارەنڤیسی بکاربینین و ڕیفراندۆمێ ئەنجام بدەین”.
سەرۆ قادر ل دۆر وێ چەندێ دبێژیت” ب بۆرینا دەمی، ئارمانجێن سەربخوەیێ دێ تووشێ ڕێگریێن زێدەتر بن ب تایبەتی ژلایێ ئیرانێ ڤە و وی شەڕێ تائیفی و مەزھەبی یێ د ناڤبەرا شیعە و سونەیان دا ل دەڤەرێ ھەی، ھەکە ئەم د چارچۆڤێ عیراقێ دا بمینین، ئەوا مە ب دەستڤەژی ئینان، دێ ژ دەست دەین، ھەکە ئەم د چارچۆڤێ وەلاتەکێ بچووکێ وەکو عیراقێ دا بمینین کو جھێ شەڕێ مەزھەبی و تائیفی یە، ل دووماھیێ دێ وەکو کویلێن ئیرانێ مینین”.
دبێژیت ژی” ل ھەرێما کوردستانێ، ئیران ب ڕێیا ھندەک پارتێن سیاسی یێن ھەرێمێ وەکو بزاڤا گۆڕان، ڕێگریێ بۆ پرۆسا ڕیفراندۆمێ و سەربخوەیا کوردستانێ دروست دکەن، ھەرچەندە ئەو لایەنێن سیاسی ب شێوێ گشتی دبێژن کو پشتەڤانێن سەربخوەیا کوردستانێ دکەن، بەلێ ھەتا نوکە ب وێ ڕاشکاویا کو پارتی داخوازا ڕیفراندۆمێ دکەت، ئەو ناکەن”.
مالپەرێ ناڤبری خویاکر ژی” ددەمەکی دا، بارزانی ڕوو ب ڕوویێ وێ نەرازیبوونا ناڤخوەیی و دەرەکی دبیت کو ل بەرامبەر ڕیفراندۆمێ و سەربخوەیێ ھەی، لەوما بی چگومان چاڤەڕێ دھێتە کرن ڕوو ب ڕوویێ تەحەدیێن گەلەک مەزنتر ژی ببیت، ھەتا وی دەمێ ڕیفراندۆم دھێتە ئەنجامدان”.

website security
WP Facebook Auto Publish Powered By : XYZScripts.com