نێچیرڤان بارزانی، سەرۆكێ هەرێما كوردستانێ و جانێت ئەلبێردا، بالیۆزا هۆلەندا ل ئیراقێ كۆمبوون.
سەرۆكایەتییا هەرێما كوردستانێ راگەهاند» د كۆمبوونێدا هەڤبەندیێن هۆلەندا ل گەل ئیراقێ و هەرێما كوردستانێ، هەلبژارتنێن جڤاتا نوونەرێن و رەوشا ئیراقێ هاتنە گەنگەشەكرن».
ب گۆڕەی سەرۆكایەتییا هەرێمێ، هەردو ئالییان خواستا پێشڤەبرنا هەڤبەندییان دوپاتكر، هەروەسا ل دۆر چاوانییا پێشڤەبرنا هاریكارییا هەڤپشك د ناڤبەرا هەرێما كوردستانێ و هۆلەندا د وار و كەرتێن جودا جودا دا، بیر و بۆچۆن لێكگۆهارتن.
رەوشا دەڤەرێ و چەند پرسێن دی یێن جهێ گرنگییا هەڤپشك، تەوەرەكێ دی یێ دیدارێ بوو.

مەسرور بارزانی، سەرۆكێ حوكمەتا هەرێما كوردستانێ، پێشوازی ل پاتریك دۆرێل، بالیۆزێ فرەنسا ل ئیراقێ كر.
د دیدارەكێدا كو یان برێم، قونسلێ گشتیێ فرەنسا ل هەرێما كوردستانێ بەرهەڤ بووی، بیر و بۆچۆن ل دۆر رەوشا گشتییا ئیراقێ پشتی هەلبژارتنێن جڤاتا نوونەران و بزاڤ و دانوستاندن و پێرابۆنێن پێكئینانا كابینەیا نوو یا حوكمەتا ئیراقێ هاتنە لێكگۆهاڕتن.
هەروەسا دانوستاندن ل دۆر بزاڤێن پێكئینانا كابینەیا دەهێ یا حوكمەتا هەرێما كوردستانێ هاتە كرن. سەرۆكێ حوكمەتا هەرێمێ دوپاتكر كو رەوشەكا نوو بۆ پێكئینانا حوكمەتا نوو یا هەرێما كوردستانێ هاتیە پێش.

مەسرور بارزانی، سەرۆكێ حوكمەتا هەرێما كوردستانێ پێشوازی ل ئەحمەد حەسەن ئەلشحی، قونسلێ نوو یێ ئیماراتێ ل هەرێما كوردستانێ كر.
سەرۆكێ حوكمەتا هەرێمێ سەرەرای پیرۆزباهیێ ب هەلكەفتا دەستبكاربوونێ، ئاماژە ب هەڤبەندیێن تایبەت و دێرین د ناڤبەرا هەرێمێ و دەولەتا ئیماراتێدا كر و پشتەڤانییا حوكمەتا هەرێمێ بۆ سەرئێخستنا ئەركێ وی دەربڕی.
قونسلێ گشتیێ ئیماراتێ خوەشحالییا خوە ب دەستبكاربوونێ ل هەرێما كوردستانێ نیشادا و رێزێن سەرۆكێ ئیماراتێ، شێخ محەمەد بن زاید ئال نەهیان و جێگرێ سەرۆكێ ئیماراتێ، شێخ محەمەد بن راشد ئال مەكتووم گەهاندنە سەرۆكێ حوكمەتا هەرێمێ و پێشكەفتن و ئاڤەدانی و چاكسازیێن حوكمەتا هەرێمێ د كەرتێن جۆرا و جۆردا كر.

سەرۆك مەسعود بارزانی، ل پیرمام، پێشوازی ل ئەحمەد حەسەن ئەحمەد سلێمان ئەلشەحی، قونسلێ گشتیێ نوو یێ ئیماراتێ ل هەولێرێ كر.
د دیدارەكێدا، قونسلێ گشتیێ ئیماراتێ ل هەولێرێ، سلاڤ و رێزێن سەركردایەتییا ئیماراتێ گەهاندنە سەرۆك بارزانی و پیرۆزباهییا سەركەفتنا پرۆسەیا هەلبژارتنان ل سەرۆك بارزانی كر و هیڤی خواست ئەنجامێن هەلبژارتنان د خزمەتا گەلێ ئیراقێدا بن.
هەروەسا قونسلێ گشتیێ ئیماراتێ، پێشكەفتن و ڤەژاندنا هەرێما كوردستانێ بلند هەلسەنگاند و دیاركر كو وەلاتێ وی دخوازیت هەڤبەندیێن خوە د وارێن ئابۆری و بازرگانی و تەكنەلۆژیا پێزانینان و چاندنێ و وارێن دی، ل گەل هەرێما كوردستانێ پێشڤە ببەت.
سەرۆك بارزانی ب گەرمی ب خێرهاتنا قونسلێ نوو ئیماراتێ كر و هیڤییا سەركەفتنێ بۆ خواست و دوپاتكر كو گەلێ كوردستانێ هەردەم روانگەهەكا ئەرێنی و دۆستانە بەرانبەر ئیماراتێ هەیە و پێشوازیێ ل بەردەوامی وپ ێشڤەبرنا هەڤبەندییان د ناڤبەرا هەردو ئالییان كر.
پێشهات و رەوشا سیاسی یا ئیراقێ و دەڤەرێ ب گشتی، تەوەرەكێ دی وێ دیدارێ بوو.

دیدار/ دلۆڤان ئاكرەیی

بەرپرسێ لقێ 17 یێ پارتی دیموكراتی كوردستان ل شنگالێ راگەهاند: پارتی پیلانا نەیارێن كوردستانی ژناڤبر ئەوێن دڤیا بە دەنگێ خەلكێ كوردستان بەربژارێن حەشدێ و یێن دژی خەلكێ كوردستانێ ڤرێكەنە جڤاتا نوونەرێن ئیراقێ و ل وێرێ ژی وەزارەتان پێ وەربگرن.
نازم هەركی، بەرپرسێ لقێ 17 یێ پارتی ل شنگالێ بۆ رۆژنامەیا (ئەڤرۆ) گوت» چەند شەرمە ئێكەتییێ دڤیا ل سنۆرێ دهۆك و نەینەوا و بەغدا ب دەنگێ خەلكێ كوردستانێ و ئەندام و لایەنگرێن خوە بەربژارێ رەیان كلدانی و حەشدا شەعبی و یێن دژی كوردان سەربێخیت، بەلێ ب دلخوەشیڤە خەلك و ئەندامێن ئێكەتیێ حزبا خوە سزادا و پارتی ژی ئەو پیلان ژناڤبر، كو بڕیار بوو ب دەنگێ خەلكێ كوردستانێ كەس و تاقمەكێ دژە كورد بچنە جڤاتا نوونەرێن ئیراقێ».
ل دور ئینانا وان هەموو دەنگان ژئالیێ پارتی ڤە ل نەینەوا گوت» ئێك ژوان ئەگەران ئەوە سەرۆك بارزانی سەركردەیەكێ ب ب سەنگە، ل دەف دۆست و نەیاران پێگەهێ خوە یێ تایبەت هەیە، ژ ئالییەكێ دی ڤە سەنگا پارتی ل دیرۆكێ پڕ شانازیی بوویە، و نوكە ژی پڕ ئاڤەدانی و ستراتیژییەتا رۆهنا نەتەوەیییە بۆ نیشتیمانی ژبۆ پاشەرۆژا كوردستانێ، ئەڤە بوونە ئەگەر كو خەلكێ كوردستانێ و سنوورێ دەڤەرێن مادەیا 140 ب تایبەت ل نەینەوا، باوەرییا خوە بدەنە لیستا پارتی، هەرچەندە د نوكەدا و د بەرێ ژی دا بزاڤ هەبووینە بۆ لێدانا پێگەهێ كوردان ل نەینەوا و دڤیان ب پیلانەكا بەری دەمی پوستێن كوردان ل نەینەوا وەبگرنەڤە، بەلێ خەلكێ كورد ل نەینەوا زوو هەست ب خیانەتێ كر، زێدەتر ژ وێ حوكمەتا هەرێما كوردستانێ ژ روویێ خزمەتگوزاریان و ئارامی و ئاڤەدانی و بەرقەراكرنا ئازادییێ ڤە یا سەركەفتی بوویە و ئەو خزمەتێن پارتی كرین ل دەف خەلكێ كوردستانێ د ئاشكرانە، لەوما د هەلبژارتناندا زێدەتر ژ ملیۆن و سەد هزار دەنگدەران ل سەر سندوقێن دەنگدانێ دەنگ ب سەرۆك بارزانی و لیستا پارتی دا».
بەرپرسێ لقێ 17 یێ پارتی ئاماژەكر» پارتی ب رامانا پەیڤ حزبا دەولەتمەدار و حوكمڕانییا سەركەفتییە، حزبەكە بەرپرسیارەتییێ هەلدگریت و دشێت سەركردایەتی و ئیدارەیا دەهان قەیرانان پێكڤە بكەت و هەموویان دەرباز بكەت، پارتی هێزا نیشتیمانپەروەرانەیە د ناڤا خەلكیدا، خەلكێ نەینەوا باوەری ب پارتی هەیە و پشتی ب دەستڤەئینانا زێدەتر ژ ملیۆن دەنگان بەرپرسیارەتی و ئەركێ ل سەر ملێ پارتی گرانتر بوو، بەلێ وەك هەرجار پارتی یا بەرهەڤە بۆ هەلگرتنا وێ بەرپرسیارەتییێ و بجهئینانا داخوازییێن خەلكێ كوردستانێ».

هەولێر، قائید میرۆ

بەرپرسەكا پارتی دیموكراتی كوردستان ئاشكراكر، پارتی د ناڤا پرۆسەیا سیاسی یا ئیراقێدا هەژمارەكا مەزنە و كار بۆ دامەزراندنا جڤاتا فیدرالی دكەت و دبێژیت، بەری بچینە بەغدا ئێكەم كارێ پارتی پشتی ڤێ سەركەفتنا د هەلبژارتناندا بدەستڤەئینای دێ رێكخستنا نافمالا كوردان بیت و ل بەغدا ژی دێ كاركەین بۆ بەرگریێ ژ مافێن خەلكێ كوردستانێ و راستڤەكرنا قانوونا هەلبژارتنان..
د. ئەشواق جاف، ئەنداما كۆمیتەیا ناڤین یا پارتی دیموكراتی كوردستان بۆ رۆژنامەیا (ئەڤرۆ) گوت» د ناڤا فەرهەنگا پارتیدا چو ئەركەك یێ زەحمەت و ئەستەم نینە، پشتی ڤێ سەركەفتنا پارتی دیموكراتی كوردستان د هەلبژارتناندا وبدەستڤەئینانا زێدەتری ملیۆن دەنگان پارتی خوە ژبۆی قووناغا داهاتی بەرهەڤ دكەت، ئێكەم پێنگاڤا پارتی ژی بەری بچیتە بەغدا دێ رێكخستنا نافمالا كوردان بیت، هەتا ب ئێكگرتی بچینە بەغدا و كار بكەین بۆ بەرگریێ ژ مافێن خەلكێ كوردستانێ، پارتی رۆلەكێ مەزن هەیە ل پرۆسەیا سیاسی ل ئیراقێ و كارنەمەیا خوە هەیە بۆ پێكئینانا حوكمەتا داهاتییا ئیراقێ، ژئالیێ قانوونی ڤە پارتی دێ كاركەت بۆ راستڤەكرنا قانوونا هەلبژارتنان، چونكە قانوونا نوكە كار ل ئیراقێ پێ دهێتەكرن چو دادپەروەری تێدا نینە بۆ نموونە پارتی زێدەتری ملیۆن دەنگان بدەستڤە ئیناینە و هەژمارا كورسیێن پارتی ب گۆڕەی ڤان دەنگان نینە، بەرەڤاژی ئالیێن دی هەنە هەژمارا دەنگێن وان ناگەهنە دەنگێن پارتی بەلێ كورسیێن وان زێدەترن، ئەڤەژی نە دادپەروەرییە د پرۆسەیا هەلبژارتناندا هەروەسا بهایێ كورسیان ل دەڤەرێن دی یێن ئیراقێ ل گەل هەرێما كوردستانێ جوداهییەكا مەزن هەیە، هەروەسا دێ پارتی كار ژبوی پێكئینانا جڤاتا فیدرالی ل ئیراقێ كەت، مادەیا 140 ژ دستوورێ ئیراقێ و دەركرنا قانوونا پەترۆل و غازێ و چەندین پرسێن دی یێن گرنگ د بەرنامەیێ پارتیدا نە بۆ بەغدا».
د. ئەشواق جاف دیاركر ژی، پارتی پارێزەرا قەوارەیێ هەرێما كوردستانێیە و ل بەغدا مەژییەك هەیە ب ناڤەندی سەرەدەریێ دگەل هەرێما كوردستانێ دكەت و دبێژیت» پارتی ل ئیراقێ هەژمارەكا مەزنە و حیساب بۆ پارتی دهێتەكرن، لەوڕا دێ كار كەین بۆ بەرگریێ ژ مافێن خەلكێ كوردستان ژوان ژی پشكا بودجەیێ هەرێما كوردستانێ و ماف و شایستەیێن كەسوكارێن شەهید و زیندانیێن سیاسی و پێشمەرگە و فەرمانبەران ب شێوەیەكێ گشتی، مە چەندین پرسێن هەلاویستی ل بەغدا هەنە، ئەز بەری نوكە ل بەغدا پەرلەمانتار بووم و ئەزموونەكا سیاسی و دپلۆماسی من هەیە ودوبارە ل جڤاتا نوونەرێن ئیراقێ دێ ب هەموو شیانێن خوە كار كەین بۆ چارەسەركرنا وان پرسێن هەلاویستی و سیاسەتا پارتی ژی هەر ئەوە بچیتە بەغدا خزمەتا خەلكی بكەت و هەموو داخوازیێن مە یێن بۆ خزمەتا خەلكێ كوردستانێ دێ د ناڤا كارنامەیا كابینەیا داهاتییا حوكمەتا ئیراقێدا هەبن».

نڤیسەر و ئەكادیمییەكێ ئیراقێ د گوتارەكێدا كو مالپەرێ (صوت العراق) بەلاڤكری، دبێژیت: سەركەفتنا پارتی دیموكراتی كوردستان د هەلبژارتنێن جڤاتا نوونەرێن ئیراقێدا، دێ گوهۆڕینەكا مەزن د هەڤسەنگییا هێزا سیاسییا كوردستانێدا دروست كەت.
د. نادر لەتیف، نڤیسەر و ئەكادیمیێ ئیراقێ د وێ گوتارا خوە دا دیاركر» پارتی دیموكراتی كوردستان ب سەرۆكایەتییا سەرۆك مەسعود بارزانی، زێدەتر ژ ئێك ملیۆن دەنگ ب دەستڤەئینان، ئەڤ چەندە ژی دێ كورسیێن گرنگ د جڤاتا نوونەراندا بەخشیتە پارتی و دێ پێگەهێ خوە وەك دیارترین هێزا سیاسی پشتڕاست كەت».
هەروەسا ئاماژەكر» ئێكەتی نیشتمانی كوردستان ب سەرۆكایەتییا بافل تالەبانی تنێ 536 هزار و 161 دەنگ ب دەستڤەئینان كو دبیتە 24،52% ئەڤە ژی كێمبوونا بەرچاڤ یا جەماوەرێ وێ هەمبەركرن ل گەل هەلبژارتنێن دی بەرچاڤ دكەت».
د. نادر لەتیف، د گوتارا خوە دا باس ل وێ چەندێ كر كو» ئەدایا لاواز یا ئێكەتیێ دەربڕینێ ژ شكەستنا ستراتیژییا وێ دكەت كو د پشتبەستنا بافل تالەبانی ب ئاخڤتنێن شەڕانگیز و شانۆیی ل دەمێ بانگەشەیا هەلبژارتنان دهاتە كرن».
ل دووڤ د. نادر لەتیف» گوتارێن بافل تالەبانی پێك دهاتن ژ هێرشێن كەسی و سڤكاتیكرن ب هەڤڕكان، ئەڤێ چەندێ ژی وەكر وێنەیێ خوە ل دەف لایەنگران لاواز بكەت و باوەرییا سیاسی ب حزبا خوە كێم بكەت و ئەڤ شێوازی بافل تالەبانی زیان ب باوەرییا گشتی گەهاند».
ناڤبری رۆهنكر ژی» سەركەفتنا پارتی پێگەهەكێ ب هێز د دەتێ د دانوستاندناندا ل گەل حوكمەتا فیدرالی و هەلوەستێ خوە د پرسێن گرنگ وەك پەترۆل و ژێدەرێن دارایی یێن هەرێمێ، تەرخانكرنا بودجە و مووچەیێ فەرمانبەران و هەماهەنگییا ئەمنی و سەربازی».
هەروەسا باس ل وێ چەندێ ژی كر» هەولێر دشێت رۆلێ خوە د دانوستاندناندا ل گەل بەغدا ب هێزتر بكەت، ب هێزبوونا پارتی دیموكراتی كوردستان وەك هێزەكا سیاسییا مەزن كو پێگەهێ خوە ل دەڤەرێ ب هێزتركریە، دێ كەتە گرنگترین ئالیێ سیاسی د ناڤ هەر هەڤپەیمانییەكا داهاتیدا».

چەند ئالییەك ل بەغدا بزاڤا دەستكاریێ د ئەنجامێن هەلبژارتناندا و كورسیێن ب دەستڤەهاتی یێن كۆتایا پێكهاتەیان دكەن، شارەزایەكێ د بیاڤێ هەلبژارتنان ژی دبێژیت، هندەك ئالیێن ئیراقی د بزاڤا وێ چەندێ دانە نەخشەیێ سیاسی بگوهۆڕن هەكە ب نەقانوونی ژی بیت.
هاوار محەمەد، شارەزایێ هەلبژارتنان گوت» ئەو ئالیێن خوە ب شكەستی دزانن ب تایبەت ئەوێن نەشیاین كورسیێن كۆتایا ببەن، بزاڤێن جدی دكەن هەتا ب هەر رێكەكێ بیت گوهۆڕینێ د وی نەخشەیێ سیاسیدا بكەن كو ل ئیراقێ دورست بوویە، ب تایبەت د چارچۆڤەیێ كورسیێن كۆتایا پێكهاتەیان».
گوت ژی» ل دووڤ عورفەكێ قانوونی ل ئیراقێ بۆ دابەشكرنا وەزارتان، هەر ئالییەكێ سێ كورسییان بدەستڤەبینیت ب تایبەت ژ پێكهاتەیان، دشێت وەزارەتەكێ بۆ خوە مسۆگەر بكەت، ئەڤە بوویە كێشە، ب تایبەت بۆ وان ئالیێن پێشتر كورسیێن كۆتایا ب نەحەق بدەستڤەئیناین».
ئاماژە كر ژی» ئەو ئالیێن نوكە كورسیێن كۆتایا پێكهاتەیان ب دەستڤەنەئیناین و رێژەیا وان كورسیێن ب دەستڤەئینین هندە نینن كو بشێن وەزارەتەكێ مسۆگەر بكەن، گەلەك دلتەنگن ژ ئەنجامان و بزاڤا وێ چەندێ دكەن ب نەقانوونی ژی بیت ب رێكا كورسیێن كۆتایا، كورسییەكێ بۆ خوە ببەن».
پتر رۆهنكر» بەردەوام ل ئیراقێ سیناریۆ و ئەگەرێن ژ ژنشكەكێڤە و ب لەز هەنە، وەك چاوان ل هەلبژارتنێن 2021 سیناریۆیەك هاتیە دروستكرن و هەتا ب مەرسووما كۆماری وەختێ تانەلێدانی ژی هاتیە درێژكرن و د ئەنجامدا دو كورسیێن پارتی دیموكراتی كوردستان هاتنە كێمكرن و برن، نوكە ژی هەمان ئەگەر هەیە و چەند ئالییەك بزاڤێ بۆ گوهۆڕینا ئەنجامان دكەن هەتا هەكە ب رێكا نەقانوونی ژی بیت».
ناڤبری هەروەسا باس ل وێ چەندێ ژی كر» پارتی دیموكراتی كوردستان ل سەر ئاستێ بلند دژی بزاڤێن دەستكاریێ د كورسیێن كۆتایا هاتیە دەنگ و مەسرور بارزانی، جێگرێ سەرۆكێ پارتی دیموكراتی كوردستان و مەكتەبا سیاسی یا پارتی ژی، جودا ئەو بزاڤە شەرمزاركرینە و دیاركرینە ب هیچ شێوەیەكێ وێ چەندێ قەبوول ناكەن».

ب، سه‌رجان مەحمود:

ئەندامەکێ پەرلەمانێ تورکیا دیار دکەت ب سەرپەرشتیا سەرۆکێ حوکمەتا هەرێما کوردستانێ کۆربەندەکا دیرۆکی ل دهۆکێ هاتە ساز کرن و کوردان جارەکا دی بۆ هەموو جیهانێ سەلماندن کو ئەو فاکتەرێ ئاشتیێ و ئارامیێ نە و مللەتەک ئاشتیخوازن.

جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتی دیار کر، کۆربەندا ئاشتی و ئارامیێ یا ل دهۆکێ براستی ژی دیرۆکی بوو، چونکی ل هەموو دەڤەرێن جیهانێ سەرکردە، سیاسەتمەدار، مامۆستایێن زانکۆیێ، کەسێن ئەکادیمی و رەوشەنبیر پشکدار بوون و پەیامێن بۆ ئاشتیێ و پێکڤەژیانێ هاتە دان، ئەو یەک ژی نیشا ددەت کو کورد هەردەم فاکتەرێ ئاشتیێ و ئارامیێ بووینە و کوردان هەردەم دڤێت ل گەل هەموو خەلکێن دی یێن ل دەڤەرا رۆژهەلاتا ناڤین پێکڤە د ناڤ ئاشیێ و ئارامیێ دا بژین و گۆت: (د کۆربەندێ ئاشتیێ دا بەحسێ پرسێن نها ل رۆژهەلاتا ناڤین هاتنە کرن، پرسێن ل ئیراقێ، تورکیا، سووریێ هاتنە کرن و بەحسێ چارەسەریێ ژی هاتە کرن، ئەو یەک پێنگاڤەک گەلەک گرنگ بوو، براستی ژی کۆربەندا ئاشتی و ئارامیێ یا ل دهۆکێ هاتە ساز کرن دیرۆکی و گرنگ بوو).
ئەندامێ پەرلەمانێ تورکیا ئەو یەک ژی دیار کر، کو پشکداریا مەزلوم عەبدی، ئیلهام ئەحمەد و سەرکردەیێن ئەنجوومەنێ نشتیمانی یێ کوردی ل سووریێ د کۆربەندێ دا گەلەک گرنگ بوو، براستی ژی هەرێما کوردستانێ سەلماند ئەو کار بۆ ئێکەتیا کوردان دکەن، وان دڤێت پرسا کوردی ل تورکیا و سووریێ ژی ب رێکێن ئاشتیانە بهێنە چارەسەرکرن و گۆت: (پەیاما مەزلوم عەبدی ژی گەلەک گرنگ بوو، وی ژی دیار کر وان دڤێت ل سووریێ کورد بگەهنە مافێن خوە و هەروەسا جارەکا دی بۆ هەموو جیهانێ دیار کر، کورد ل دژی پارچەبوونا ئاخا سووریێ نە، بەلکو وان دڤێت ل گەل هەموو نەتەوەیێن دی یێن ل سووریێ پێکڤە بژین و داخواز ژی کر کو کورد د چارچۆڤێ دستوورەکێ نوو ل سووریێ دا بگەهنە مافێن خوە، ئانکو تشتێ مەزلوم عەبدی گۆتی گەلەک گرنگ بوون).
جەنگیز چاندار د دووماهیا ئاخڤتنا خوە دا بەحسێ قووناغا ئاشتیێ یا ل تورکیا ژی کر و دیار کر، هەرێما کوردستانێ رۆلەک سەرەکی بۆ ئاشتیێ ل تورکیا دگێریت، هەکە پرسا کوردی ل تورکیا ب رەنگەکێ ئاشتیانە بهێتە چارەسەرکرن دێ کاریگەریا خوە یا گەلەک باش ل سەر سووریێ و ئیراقێ ژی هەبیت و گۆت: (ئەز وەسا دبینم د دەمەکێ نێزیک دا دێ ل سووریێ ژی پێنگاڤێن دلخوەشکەر هێنە ئاڤێتن، دەستهەلاتا نها یا سووریێ دڤێت پرسێن هەی ل گەل کوردان چارەسەر بکەت، بێگومان هەتا نها تورکیا ئاستەنگی دروست دکرن، لێ نها تورکیا ژی گەهشتیە ڤێ باوەریێ هەتا پرسا کوردی ل سووریێ نەهێتە چارەسەرکرن رەوشا سووریێ ژی ئارام نابیت).

ب بەرهەڤبوونا سەرۆك مەسعود بارزانی، ئەڤرۆ سێشەمبی 18/11/2025، كۆڕبەندێ ئاشتی و ئاسسایشا رۆژهەلاتا ناڤەڕاست ل دهۆكێ دێ دەستپێكەت و گەنگەشە ل دۆر ئاستەنگ و گوهۆڕینێن دەڤەرێ دێ هێنە كرن.
د كۆڕبەندێ ئەڤسالەدا سەرۆك بارزانی، نێچیرڤان بارزانی، سەرۆكێ هەرێما كوردستانێ، مەسرور بارزانی، سەرۆكێ حوكمەتا هەرێما كوردستانێ و محەمەد شیاع سوودانی، سەرۆك وەزیرێن ئیراقێ و سەدان سەركردە و كەسایەتیێن سیاسی و نوونەر و دیپلۆماتكار و كەسایەتیێن ئەكادیمی ژ وەلاتێن جودا جودا پشكدارن و تێدا دێ گەنگەشێ ل سەر ململانێ و ئاستەنگێن رۆژهەلاتا ناڤەڕاست كەن و دێ ل دووڤ ئاشتیێ و چارەسەرییەكا درێژخایەن گەریێن بۆ ئاستەنگان.
بڕێڤەچوونا كۆڕبەندێ ئاشتی و ئاسایشا رۆژهەلاتا ناڤەڕاست (مێپس) پشتی حەفتییەكێ دهێت ژ هەلبژارتنێن خولا شەشێ یا جڤاتا نوونەرێن ئیراقێ و دێ بیتە دەلیڤەیەك بۆ ڤەكۆلینێ د پرسا سیاسییا ئیراقێدا و هەڤبەندیێن ل گەل ئیدارەیا نوو یا ترەمپی. ئەڤە ژی د دەمەكیدایە، ئەڤسالە چەندین گوهۆڕین و روودانێن گرنگ و هەستیار، كو ل ئیراقێ و رۆژهەلاتا ناڤەڕاست رووداینە، ژ وان ژی هەلبژارتنێن خولا شەشێ یا جڤاتا نوونەرێن ئیراقێ، دیاركرنا هنارتیێ تایبەتێ ئەمریكا بۆ ئیراقێ، شەڕێ 12 رۆژی د ناڤبەرا ئیرانێ و ئیسرائیلێدا، ئیمزاكرنا رێككەفتنا ئاگربەستا غەزە، گوهۆڕینێن سووریێ و پرۆسەیا ئاشتیێ ل توركیا و باكوورێ كوردستانێ.