ل رۆژا دوشەمبی 2/2/2026 ل پیرمام، سەرۆك مەسعود بارزانی پێشوازی ل موسەننا سامەرائی، سەرۆكێ هەڤپەیمانییا عەزم كر.
ب گۆرەی بەیاننامەیەكا بارەگەهێ بارزانی» د دیدارەكێدا رەوشا سیاسییا ئیراقێ و دەڤەرێ ب گشتی هاتە گەنگەشەكرن، هەروەسا باس ل دووماهی پێنگاڤێن پرۆسەیا سیاسی ل ئیراقێ بۆ پێكئینانا حوكمەتا نوو هاتە كرن».

ل رۆژا دوشەمبی 2/2/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل عیرفان سدیق، بالیۆزێ بریتانیا ل ئیراقێ كر.
ب گۆرەی بەیاننامەیەكا حوكمەتا هەرێما كوردستانێ» د كۆمبوونەكێدا رەوشا گشتییا ئیراقێ و بزاڤ و دانوستاندنێن هەلبژارتنا سەرۆككۆماری وپێكئینانا كابینەیا نوو یا حوكمەتا فیدرال هاتە گەنگەشەكرن».
د پشكەكا دی یا كۆمبوونێ، بیر و بۆچۆن ل دۆر دووماهی گوهۆڕین و پێشهاتێن دەڤەرێ و ب تایبەتی رەوشا سووریێ هاتە لێكگۆهارتن و دووپاتی ل چارەسەركرنا كێشەیان ب رێكا ئاشتیێ و دانوستاندنێ و پاراستنا مافێن گەلێ كورد و هەموو پێكهاتەیێن سووریێ هاتە كرن.

ل رۆژا دوشەمبی 2/2/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل بێریڤان ئاماز، جێگرا سەرۆكێ پەرلەمانێ هەرێما نۆدراین – ڤێستڤالن یا ئەلمانی كر.
حوكمەتا هەرێما كوردستانێ د بەیاننامەیەكێدا بەلاڤكر» د دیدارەكێدا دووپاتی ل گرنگییا پێشڤەبرنا هەڤبەندیێن هەرێما كوردستانێ و ئەلمانیا د وارێن جۆراوجۆردا هاتە كرن».
حوكمەتا هەرێمێ دیاركر ژی» جێگرا جێگرا سەرۆكێ پەرلەمانێ هەرێما نۆدراین – ڤێستڤالن یا ئەلمانی، رۆلێ كارا یێ هەرێما كوردستانێ د پاراستنا ئاسایش و ئارامییا دەڤەرێ دا و ب تایبەتی ئارامكرنا شەڕ و ئالۆزیێن ڤێ دووماهیێ ل سووریێ و داكۆكیكرن ژ مافێن گەلێ كورد و پێكهاتەیێن دی یێ ن وی وەلاتی، بلند هەلسەنگاند».

رێڤەبەرێ نڤیسینگەها رزگاركرنا رەڤاندنیێن دەستێ داعشێ ل حوكمەتا هەرێما كوردستانێ راگەهاند: نێزیكی 400 وەلاتیێن كوردێن ئێزدی د ناڤ كەمپا هۆلێ دانە ل سووریێ و ژ ئەگەرێ زالبوونا ژنێن داعشێ و گوهۆڕینا ناسنامەیا زارۆیان، پرۆسەیا ڤەدیتن و رزگاركرنا ئافرەت و زارۆیێن رەڤاندی یێن ئێزدی تووشی ئاستەنگێن مەزن بوویە.
حسێن قائیدی، رێڤەبەرێ نڤیسینگەها رزگاركرنا رەڤاندنیێن دەستێ داعشێ سەبارەت ب رەوشا ئێزدییان ل كەمپا هۆلێ ئاماژە ب وێ چەندێ دا كو ب رێكا بانگەوازییەكێ كو رۆژا 24/1/2026 هاتیە بەلاڤكرن، هەژمارا تەلەفۆنەكا تایبەت تەرخانكرییە بۆ وێ چەندێ هەر كەسەك ل رۆژئاڤایێ كوردستانێ پێزانینەك ل سەر بێسەروشوونبوویێن ئێزدی ل كۆمپا هۆلێ یان هەر دەڤەرەكا دی هەبیت، ئاگەهدارییا وان بكەت.
گوت ژی» كارمەندێن مە بەردەوام دووڤچوونێ بۆ پێزانینان دكەن، پێشتر مە پێزانین هەبوون كو هەژمارەكا ئافرەت و زارۆیێن ئێزدی ل وی كەمپێ بوون، بەلێ هەتا نوكە هیچ دەنگوباسەكێ نوو ل دۆر نینە».
ب گۆڕەی دووڤچوونا نڤیسینگەها رزگاركرنا رەڤاندنیێن دەستێ داعشێ، نێزیكی 400 كوردێن ئێزدی د ناڤ كەمپا هۆلێ دا ماینە. حسێن قائیدی، دووپاتی ل وێ چەندێ ژی كر» د ناڤ كەمپا هۆلێ دا جۆرە بالادەستییەكا داعشێ هەیە كو ژ ئالیێ ژنێن تیرۆرستڤە دهێتە بڕێڤەبرن، ل وێرێ زیندانیكرن و كوشتن ژی هەیە».
رێڤەبەرێ نڤیسینگەها رزگاركرنا رەڤاندنیێن دەستێ داعشێ رۆناهی ئێخستە سەر وان ئاستەنگێن ل پێشبەری نیاسینا رەڤاندییان هەین و گوت» دو جۆرێن ئێزدییان د ناڤ كەمپا هۆلێ دا هەنە، پشكەك ژ وان نەوێرن ناسنامەیا خوە ئاشكرا بكەن، چونكە دێ مەترسی ل سەر ژیانا وان دروست بیت، پشكەكا دی ژی ئەو زارۆیەنە كو ل وێرێ هاتینە مەزنكگرن و ناڤ و ئایین و زمانێ وان هاتینە گوهۆڕین، ئەڤێ چەندێ ژی وەكریە نیاسینا وان گەلەك ب زەحمەت بیت».
سەبارەت ب هەماهەنگیێ ل گەل هێزێن سووریا دیموكرات (هەسەدە)، رێڤەبەرێ نڤیسینگەها رزگاركرنا رەڤاندنیێن دەستێ داعشێ راگەهاند كو پێشتر هەسەدە بەرهەڤییا خوە نیشادایە هاریكارییا وان بكەت بۆ زڤڕاندنا رەڤاندیێن ئێزدی، بەلێ وەكو قائیدی دبێژیت» مە هەردەم پلانا خوە هەبوویە و چەندین جاران ژی مە شاند هنارتینە وێرێ، بەلێ ژ ئەگەرێ وێ چەندێ خێزانێن داعشێ هێشتا ل سەر هەمان بیر و باوەرێن توندڕەوی ماینە، پشكنینا خیڤەت ب خیڤەت بۆ هێزێن ئەمنی ژی كارەكێ ب زەحمەت و پڕ مەترسی بوو».

ئەندامەكێ دەستەیا هەڤسەرۆكایەتییا پارتییا ئێكەتییا دیموكرات (پەیەدە) راگەهاند، رێككەفتنا هەسەدە و حوكمەتا سووریێ دەستپێكەكا نوویە بۆ كوردێن رۆژئاڤایێ كوردستانێ، هەروەسا هیڤی ژی خواست پشتەڤانییا سەرۆك بارزانی بۆ رۆژئاڤایێ كوردستانێ یا بەردەوام بیت.
سالح موسلم، ئەندامێ دەستەیا هەڤسەرۆكایەتییا پارتییا ئێكەتییا دیموكرات (پەیەدە) رێككەفتنا هێزێن سووریا دیموكرات (هەسەدە) و حوكمەتا سووریێ ب دەستپێكەكا نوو بۆ مللەتێ كورد ل رۆژئاڤایێ كوردستانێ هەژمارت و گوت» رێككەفتن ئەنجامێ بەرخودانا شەڕڤانان، هاریكارییا بەرپرسێن هەرێما كوردستانێ و پشتەڤانی و خوەنیشادانێن خەلكێ هەر چار پارچەیێن كوردستانێ بوو، دۆستێن مە ژی، ب تایبەت ئەمریكا و فرەنسا ژی رۆل د ئیمزاكرنا رێككەفتنێدا هەبوو».
ل دۆر گەرەنتییا بجهئینانا رێككەفتنێ، سالح موسلم باس ل وێ چەندێ كر» پێشتر ژی چەندین رێككەفتن ل گەل حوكمەتا سووریێ هاتینە ئیمزاكرن، بەلێ بەرپرسێن دیمەشقێ پێگیر نەبوون، بەلێ ڤێجارێ ئەمریكا و فرەنسا گەرەنتییا بجهئینانا رێككەفتنێ ب ستوویێ خوەڤە گرتییە».
رۆهنكر ژی» پیشتر ئەمریكا و فرەنسا تنێ چاڤدێرییا رێككەفتنان دكر، بەلێ ڤێجارێ جودایە و وان ب خوە گەرەنتی دایە، ئیمانوێل ماكرۆن، سەرۆكێ فرەنسا ب خوە تەلەفۆنا مەزلووم عەبدی كر وگوتێ رێككەفتنێ ئیمزا بكەن، ئەز ب خوە دێ گەرەنتییا بجهئینانێ دەمە هەوە».
ل دۆر جهگیركرنا هێزان د چارچۆڤەیێ رێككەفتنێدا، سالح موسلم گوت» رێككەفتن ب وی شێوەی هاتیە كرن، هێزێن سووریا دیموكرات (هەسەدە) ل جهێن خوە یێن نوكە بمینن و بۆ هیچ جهەكی نە ڤەكێشن، ئانكو دەڤەرێن كوردی دێ د بن دەستهەلاتا شەڕڤاناندا مینن و هیچ هێزەكا لەشكرێ سووریێ ناچیتە گوند و باژێرێن كوردی.
ل دووڤ گوتنا وی ئەندامێ دەستەیا هەڤسەرۆكایەتییا پەیەدە، هەژمارەكا كارمەند و ئەندامێن هێزێن ئەمنی یێن حوكمەتا سووریێ بۆ دەمەكێ بەروەخت چنە باژێرێن حەسەكە و قامشلۆ ب مەبەستا سەرپەرشتیكرنا پرۆسەیا تێكهەلكرنا هێزێن هەسەدە و دامودەزگەهێن حكومی، پاشی دێ چنە دەرڤەی وان باژێران.
سالح موسلن رۆلێ بەرپرسێن هەرێما كوردستانێ، ب تایبەت سەرۆك بارزانی د راوەستاندنا شەڕی و راگەهاندنا رێككەفتنێدا بلند هەلسەنگاند و ئاماژە ب وێ چەندێ دا» هیڤیدارم پشتەڤانییا سەرۆك بارزانی بۆ رۆژئاڤایێ كوردستانێ بەردەوام بیت و كاری بۆ سازكرنا كۆنگرەیەكێ نەتەوەیی ب پشكدارییا هەموو ئالی و هێزێن سیاسی یێن كوردی، بكەت «.
وی بەرپرسێ پەیەدە باس ل وێ چەندێ ژی كر»ل سالا بۆری، ب پشتەڤانییا سەرۆك بارزانی و بەرپرسێن هەرێما كوردستانێ، كۆنفرانسێ ئێكڕێزی و ئێكهەلوەستێ ئالیێن سیاسی یێن رۆژئاڤا ل قامشلۆ بڕێڤەچوو، د كۆنفرانسیدا شاندەكێ هەڤپشک یێ دانوستاندكار هاتە پێكئینان و ل نێزیك دێ چیتە دیمەشقێ بۆ مسۆگەركرنا مافێن گەلێ كورد ل سووریا نوو».

زنار تۆڤی:

نڤیسەر و چاڤدێرێ سیاسی ل وەلاتێ ئەمریكا، بەختیار عزەت دەرگەلی، د دیدارەكێدا بۆ رژنامەیا (ئەڤرۆ) دبێژیت» پرسا گەلێ كورد، پرسەكا ئالۆزە و یا ب ساناهی نینە، پشتی شەرێ جیهانیێ ئێكێ، رەوشا كوردستانێ ب زەحمەتتر لێهات، كوردستان ل سەر هەر چار وەلاتێن( توركیا، ئیران، ئیراق و سووریێ) هاتە پارچەكرن، وان هەرچار وەلاتان ژی، باوەری ب مافێن گەلێن دیتر نینە یێن ل وان وەلاتان دژین، ل گەل هندێ ئەو پارچەبوونا كوردستانێ، پشتی پەیمانا نەفرەتییا سایكس بیكۆی، كارەكێ گەلەك خراب بوو، هەروەسا كارەساتەكا مەزن و تراژیدی بوو، دیسا خۆزی ل وی وەختی، باشوورێ كوردستانێ ل بن دەستهەلاتا بریتانیا دابا، نەكەفتبا د بن دەستهەلاتا ئیراقێدا ، چونكی هەر ژ سالا 1921 ێ، ئیراقێ باوەری ب كوردان نەبوو، ل سووریێ ژی ب هەمان رەنگ بوو، كو وێ ژی دانپێدان ب كەلێ كورد نەكریە، هەر ژ سالێن شێستان، ب ئەرەبكرن و ژناڤبرنا كوردان ل وێ پارچەیا كوردستانێ دەستپیكریە و هەتا نوكە یا بەردەوامە، وەختێ ل سالا 1962 ێ، حزبا بەعسا عەرەبی، یا شوڤینی هاتیە سەر دەستهەلاتێ، هەر تشتی ژ دەستێ وان هاتی دژی كوردان ئەنجامدایە، دیسا ل باكوورێ كوردستانێ ژی، توركیا چ گوهۆڕین د سیاسەتا خوە دا نەكریە، شۆڤینییەتا توركان چو سنوور نینن، هەتا نوكە ئەو كوردان ب توركێن چیا د دەنە نیاسین، هەر چەندە نوكە مللەتێ كورد ژ هەموو وەختان هشیارترە و دڤێت كورد دەستان ژ خەباتا خوە بەرنەدەن، هەروەسا نوكە ل هەرێما كوردستانێ، ئێكڕێزییەكا باش هەیە و خەلكێ هەرێمێ بۆ برایێن خوە ل رۆژئاڤایێ كوردستانێ خوەنیشادانان دكەن و پشتەڤانییێ ل وان دكەن».
ناڤهاتی گوت ژی» د پرسا گەلێ كورد دا، نابیت ئەم رادەستی ئیرادەیا دوژمنان بین، دڤێت ئیرادەیا خوە ب هێزتر لێ بكەین، ل دەرڤە ژی دڤێت بەرەیەكێ ب هێز ڤەكەین، ب هشیاری سەرەدەریێ ل گەل بكەین، ب تایبەتی ژی ئەمریكا، چونكی نوكە ئەمریكا ئێكلاكەرا پرسێن جیهانییە، ئەمریكا بۆ مە كوردان گەلەك یا گرنگە، ب تایبەتی جڤاتا پیران و كۆنگرێسێ ئەمریكا، ل گەل هندێ ژی نوكە ل باژێرێ دالاس ل ئەمریكا، نێزیكی 12 هزار كورد لێ دژین، دڤێت ئەم و هەموو ئەو كوردێن ل ئەمریكا دژین، خەباتێ بۆ كوردایەتیێ بكەین و لۆبیەكێ بهێز ژی ئاڤا بكەین، دڤێت ئەم هەموو ببینە بالیۆزێن كوردایەتیێ ل ئەمریكا و وەلاتێن ئورۆپی ژی، نوكە قانوونەك ل جڤاتا پیرێن ئەمریكا ژئالیێ سیناتۆر (لێندزی گراهام) بۆ پشتەڤانییا كوردان هاتیە بەرهەڤكرن، ئەو قانوونە دێ سەركەڤیت و دێ بیتە هێڤێنەكێ باشتر بۆ سەركەفتنا گەلێ كورد، د نوكە دا، هەردوو حزبێن دیموكرات و كۆماری یێن ئەمریكی پشتەڤانییێ ل وێ قانوونێ دكەن، ب دەركەفتنا وێ قانوونێ، ئێدی عەرەبێن سووری یێن فاشست، نەشێن كوردان ل رۆژئاڤا ژناڤ ببەن، لەوما مانا كوردێن رۆژئاڤا گەلەك گرنگییا خوەۆ بۆ مانا كوردێن هەرێما كوردستانێ ژی هەیە، هەروەسا هەرێما كوردستانێ هەناسەیا گەلێ كوردە و دڤێت وەكو چاڤێن خوە و دلێ خۆ بپارێزین».
بەختیار عزەت هێشتا دبێژیت» د ڤێ قووناغێدا دڤێت هەموو كورد ئێكبگرن، پێدڤییە هەموو پارت و ئالیێن كوردی ئێكڕێز بن، دیسا دڤێت ئەم هەموو سوپاسییا سەرۆك بارزانی بكەین كو بوویە لێڤەگەر و دەنگێ كوردان گەهاندیە هەموو جیهانێ، مە كوردان پێدڤی ب سەرۆك بارزانی هەیە، وەكو لێڤەگەرێ هەموو كوردان، دیسا نوكە ل ئیراقێ، شیعە یێن بووینە ئێك و سوننە ژی یێن بووینە ئێك، دڤێت كورد ژی ببنە ئێك، داكو بەرژەوەندیێن كوردان بهێنە پاراستن و سەربكەڤن و بهێز بن، هەروەسا خۆنیشاندانێن كوردان ل ئورۆپا و ئەمریكا گەلەك گرنگیا خۆ هەیە، دێ كاریگەری هەبیت ل سەر وان قانوونێن دەردچن د بەرژەوەندیا كوردان دا، ب تایبەتی ژی ئەمریكا، هەر چەندە ئەمریكا دۆستێن هەردەم و دوژمنێن هەردەم نینن، سیاسەتا ترەمپی ژی، هەر جارێ ب رەنگەكێیە، ل گەل هندێ ژی، دڤێت بزاڤێن مە د بەردەوام بن ل گەل ئەمریكا، چونكی ئەمریكا ئێكلاكەرا پرسانە و ئەم ژی دێ هەردەم پشتەڤانییا گەلێ خوە كەین».

فەرماندارەکێ کورد ل حەسەکێ دیار کر، باوەریا وان ب رێککەفتنا ل گەل شامێ ناهێت، چونکی بەری نها ژی چەندین جاران رێککەفتن هاتینە کرن، لێ شامێ رێککەفتن بنپێکرینە و نها ژی شاندەکێ ئاسایشا شامێ دەربازی چەند باژێرێن کوردی بووینە، لێ شەرڤانێن کورد د ئامادەباشیێ دانە و هەروەسا وان خوە بۆ هەر ئەگەرەکێ ژی بەرهەڤ کرینە، چونکی دبیت شام رێککەفتنێ بنپێ بکەت، ڤێجا ئەو د ئامادەباشیێ دانە.
هەمان فەرمانداری ئەو یەک ژی دیار کریە، نها رەوشا وان گەلەک باشە و وان سەنگەرێن خوە ساخلەم کرینە و ل هەمبەر هەر ئێرشەکێ ژی د ئامادەباشیێ دانە، مۆرالێ وان گەلەک بلندە و هەکە رێککەفتن وەکو خوە بهێتە بجهئینان دێ گەلەک باش بیت، لێ هەکە شام رێککەفتنێ بنپێ بکەت ژی شەرڤانێن کورد دێ دەڤەرێن کوردی یێن رۆژئاڤایێ کوردستانێ پارێزن و رێ نادەن چەکدارێن جۆلانی ئاخا رۆژئاڤایێ کوردستانێ داگیر بکەن.

سەرۆك بارزانی د پەیامەكێدا بۆ كوردستانیێن دەرڤەی وەلاتی، سەرەرای بلند هەلسەنگاندنا پشتەڤانییا وان بۆ رۆژئاڤایێ كوردستانێ، دووپاتكر كو كورد پارێزەرێن مرۆڤایەتیێ بوون و نوكە وەختێ وێ چەندێیە مرۆڤایەتی پارێزەرا كوردستانێ بیت.
دەقێ پەیاما سەرۆك بارزانی:
جهێ شانازیێیە ئەڤرۆ ل باژێرێن وەلاتێن ئورۆپا، هەژمارەكا مەزن ژ رەڤەندا كوردی ب شێوەیەكێ بێوێنە د خرڤەبوونێن ئاشتییانەدا، پشتەڤانییا خوشك و برایێن خوە ل رۆژئاڤایێ كوردستانێ دكەن.
ئەڤە ئاماژەیەكا رۆهنە بۆ شیان و زیندییا رەڤەندا كوردی ل دەرڤەی وەلاتی، وێ چەندێ ژی د سەلمینیت كو گەلێ مە ل دەرڤەی وەلاتی، هەردەم هێزەكا مەزن و بەرهەڤ و ئێكگرتییە، بۆ پشتەڤانیكرنا دۆزا رەوا یا گەلێ كوردستانێ ل هەر پارچەیەكا كوردستانێ بیت. سلاڤ و رێزێن من یێن تایبەت، بۆ هەوەیێن خوەشتڤی هەنە.
ل دەستپێكا چەرخێ بیستی، ئاخا كوردستانێ ب نەحەقی هاتە پارچەكرن، پشتی وێ پارچەكرنێ، گەلێ كوردستانێ روو ب روویێ كارەسات و نەهامەتی و ئازارێن مەزن بوویە. بەلێ ئەو رەوشا دژوار كو بۆ گەلێ كوردستانێ دروست بووی، نەبوویە ئەگەرێ وێ چەندێ كو گەلێ مە ئیرادەیا خوە ژ دەست بدەت و مافێن خوە ژبیر بكەت. بەروڤاژی، گەلێ كوردستانێ رۆژ ب رۆژ ب هێزتر و هشیارتر ل سەر خەباتا خوە بۆ مسۆگەركرنا مافێن خوە بەردەوام بوو. ب رێكا خەباتێ ژی دا قوربانیێن بێ هەژمار داینە.
هەروەكە پارچەیێن دی یێن كوردستانێ، ل رۆژئاڤایێ كوردستانێ ژی گەلێ كورد خەباتەكا دوور و درێژ هەیە. خەباتكەر و شۆڕشگێرێن رۆژئاڤایێ كوردستانێ، ئازار و زیندان و دەربەدەری و ئاوارەیی دیتییە. پشتی خەباتەكا مەزن روو ب روویێ گەفا تیرۆرستێن داعشێ بوون، گەنج و لاوێن گەلێ مە ب ئازایەتییا خوە و ب خوین و قوربانییان داعش شكاند و بوونە پارێزەرێ مرۆڤایەتیێ.
نوكە گەلێ مە ل رۆژئاڤایێ كوردستانێ تووشی گەفەكا نوو و رەوشەكا ئالۆز و مەترسیدار بوویە. ئەركەكێ نیشتمانی و نەتەوەییێ هەر كوردستانییەكییە كو پشتەڤانێن خوشك و برایێن مە ل رۆژئاڤایێ كوردستانێ بین.
دەنگێ هەر ئێكی ژ هەوە كاریگەرییا خوە ل سەر مۆرال و خۆڕاگرییا گەلێ كورد ل كوردستانێ و ب تایبەتی ل رۆژئاڤایێ كوردستانێ هەیە، پەیامەكە ژی بۆ خەلكێ جیهانێ بۆ وێ چەندێ كو پشتەڤانیێ ل داخوازی و مافێن رەوا یێن خوشك و برایێن مە بكەن.
ئەركێ جڤاكا نێڤدەولەتی و وەلاتێن رۆژئاڤایە، كو ملێ خوە بدەنە بەر بەرپرسیارەتییا خوە و رێكێ نەدەن نەهامەتی و ئازارێن گەلێ مە دووبارە ببن. ل شەڕێ داعشێ كورد پارێزەرێن مرۆڤایەتیێ بوون، نوكە پێدڤییە مرۆڤایەتی پارێزەرێن كوردستانێ بن.
خوەنیشادان و خرڤەبوونێن هەوە، نیشانەكا رۆهن یا وێ ئێكدەنگییا نەتەوەیییە كو ل ناخێ كوردستانییێن دەرڤەی وەلاتیدایە. ئەوژی وێ راستیێ نیشا ددەت، كو جوداهییا سنووران و بیر وبۆچۆنێن سیاسی، نەشێن هەڤبەندیێن دیرۆكی و نەتەوەیی د ناخێ مەدا لاواز و بێهێز بكەن. ئەم ئێك نەتەوەینە و مە ئێك دیرۆك و پاشەڕۆژ مە هەیە و ل خوەشی و نەخوەشییاندا هەڤپشكین. كوردبوونا مە ل سەر هەر ئایدیۆلۆژییەكێیە. كوردبوون پەیاما ئاشتیێ و پێكڤەژیانێیە، نەك تنێ بۆ گەلێ مە، بەلكو بۆ گەلێن دەڤەرێ و هەموو جیهانێ ژی.
ئەز سوپاسییا هەوەیێن ئەزیز ئێك ئێك و رێكخەرێن وان خرڤەبوونا و كۆنفیدراسیۆنا رەڤەندا كوردستانی دكەم، سوپاسییا هەموو كوردستانیێن دەرڤەی وەلاتی دكەم، كو ل رۆژێن بۆری ب هیممەت و حەماسەكا مەزن پشتەڤانییا خوشك و برایێن خوە ل رۆژئاڤا بوون. دەستخوەشیێ ل هەوە دكەم، هەر ئەڤە ژ هەوە دهاتە چاڤەڕێكرن. پێدڤییە ئەو پشتەڤانیكرنە د چارچۆڤەیێ شێوازێن ئاشتییانە و پێرابوونێن مەدەنیدا هەر بەردەوام بن.
داخوازا من ئەوە كو د كۆمبوونێن هەوەدا، د مەراسیم و خوەنیشاداناند، ب تمامی پێگیری بهایێن بلند یێن مللەتێ مە بن و پێگیری قانوون و رێنمایێن وان وەلاتان بن كو هوون لێ دژین. ب هەموو شێوەیەكی خوە ژ هنگامێ و ئالۆزیێ و توندوتیژیێ دووربێخن. گەلێ كوردستانێ كێشە ل گەل سیاسەتا حوكمەت و رژێمان هەیە و هیچ كێشەیەك ل گەل نەتەوەیان نینە، دڤێت هەموو ئاگەهداری وێ چەندێ بن نابیت كەرب و كێشە د ناڤبەرا كورد و نەتەوەیێن دی دا دروست ببیت، پەیاما گەلێ كوردستانێ پەیاما ئاشتیێ و مرۆڤدۆستیێ و پێكڤەژیانێیە.
هەروەسا ل ڤێرێ ب پێدڤی دزانم كو داخوازێ ژ حوكمەتا سووریێ و هێزێن (هەسەدە) بكەم كو ل سەر ئاگربەستا د ناڤبەرا خوەدا بەردەوام بن. بۆ چارەسەركرنا كێشە و ناكۆكیێن خوە، پشتبەستنێ ل دیالۆگێ و تێكگەهشتنێ بكەن و ب هیچ شێوەیەكی رێك نەهێتە دان كو درفت و كێشەیێن سیاسی ببنە ئەگەرێ پەیدابوونا ناكۆكی و كێشەیێن نەتەوەیی د ناڤبەرا كورد و عەرەباندا.
هەروەسا بۆ گەهشتنێ ب ئاشتیێ و ئارامیێ، پێدڤییە دووماهی ب ئازارێن گەلێ كورد و بزاڤێن حەلاندن و بەهۆژاندنا وی دا بهێتە دان و د پاشەڕۆژا سووریێ دا مافێن سیاسی و مەدەنی و نیشتمانی یێن گەلێ كورد د دەستووریدا بهێنە گەرەنتیكرن.
ل دووماهیێ وێ چەندێ دووپات دكەم، كو دڤێت ئەم هەموو پشتەڤانییا دۆزا رەوا یا گەلێ خوە ب هێز بكەین و دڤێت هەردەم مە هیڤی ب پاشەڕۆژەكا گەش بۆ گەلێ كوردستانێ هەبیت.

ل رۆژا ئێكشەمبی 1/2/2026، ل پیرمام سەرۆك مەسعود بارزانی پیشوازی ل جوشوا هاریس، كاربڕێڤەبەرێ بالیۆزخانەیا ئەمریكا ل ئیراقێ و ویندی گرین، قونسلا گشتییا ئەمریكا ل هەرێما كوردستانێ كر.
د دیدارەكێدا جۆشوا هاریس، ب ناڤێ سەرۆك و حوكمەتا ئەمریكا رێز و سوپاسی ئاراستەی سەرۆك بارزانی كر بۆ هەموو وێ پشتەڤانییا كو بۆ دووماهی رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) بەرچاڤكری.
ل دۆر پرۆسەیا سیاسیا ئیراقێ جارەكادی پشتەڤانی و هەلوەستێ ئەمریكا بۆ هەرێما كوردستانەكا ب هێز د چارچۆڤەیێ ئیراقێدا دووپاتكر.
سەرۆك بارزانی، سوپاسییا رۆل و هەلوەستێ ئەمریكا كر بۆ پشتەڤانییا وێ ل گەلێ كوردستانێ و ئاماژە بۆ وێ چەندێ كر كو هەكە هەلوەست و پشتەڤانییا ئەمریكا ل سالا 1991 نەبا ئەم نەدشیاین دەستكەفتێن سەرهلدانێ و پەرلەمان و حوكمەتا هەرێما كوردستانێ بپارێزین.
سەبارەت پرۆسەیا سیاسییا ئیراقێ بیر و بۆچۆن هاتنە لێكگۆهارتن و هەردو ئالییان دووپاتی ل گرنگییا پێگیریبوون ب دەستووری كر و هەڤڕابوون كو دڤێت وەلاتیێن ئیراقی ب خوە بڕیارێ ل دۆر رەوشا وەلاتێ خوە ل سەر بنەمایێ هەڤپشكی و هەڤسەنگی و لهەڤكرن بدەن.
د ڤی چارچۆڤەیدا هەردو ئالییان پێشوازی ل دانوستاندنێن ڤێ دووماهیێ یێن بەغدایێ كر بۆ دیتنا پێرابوون و سیناریۆیێن سیاسی كو تێدا بەرژەوەندییا وەلاتێن ئیراقێ ل بەرچاڤ بهێتە وەرگرتن و ژ هەموو روویەكی ژی ڤە هەڤپشكییا ئەمریكا و ئیراقێ بهێتە ب هێزتركرن.

سەرۆك مەسعود بارزانی و فەرماندەیێ گشتیێ هێزێن سووریا دیموكرات (هەسەدە) د پەیوەندییەكا تەلەفۆنیدا باس ل پێنگاڤێن بجهئینانا رێككەفتنا د ناڤبەرا دیمەشقێ و هەسەدە دا كر.
ل رۆژا ئێكشەمبی 1/2/2026، سەرۆك مەسعود بارزانی و مەزلووم عەبدی، فەرماندەیێ هێزێن سووریا دیموكرات (هەسەدە) ب تەلەفۆنێ ل گەل هەڤدوو ئاخڤتن.
ب گۆرەی بەیاننامەیەكا بارەگەهێ بارزانی، د پەیوەندییا تەلەفۆنیدا باس ل دووماهی پێشهاتێن سووریێ و پێنگاڤێن بجهئینانا رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) هاتە كرن.
د پشكەكا دی یا پەیوەندیێدا، هەردو ئالییان دووپاتی ل چارەسەربوونا كێشە و گرفتان ب رێكا دیالۆكێ و بەرقەراربوونا ئاشتیێ و ئارامیێ ل سووریێ كر.
ئەڤ پەیوەندییا تەلەفۆنی د ناڤبەرا سەرۆك بارزانی و مەزلووم عەبدی دا پشتی وێ پەیوەندییا تەلەفۆنی د ناڤبەرا سەرۆك مەسعود بارزانی و ئەحمەد شەرع، سەرۆكێ سووریێ ل رۆژا 31/1/2026 هاتیە ئەنجامدان.
بارەگەهێ بارزانی ل دۆر وێ پەیوەندییا تەلەفۆنی د ناڤبەرا سەرۆك بارزانی و سەرۆكێ سووریێ دا بەلاڤكربوو» باس ل رەوشا سووریێ و دووماهی گوهۆڕین و رێككەفتنا د ناڤبەرا حوكمەتا سووریێ و هێزێن سووریا دیموكرات (هەسەدە) دا و پێنگاڤێن داهاتی هاتە كرن، هەروەسا دووپاتی ل پێدڤییا بەرقەراربوونا ئاشتیێ و ئارامیێ ل سووریێ هاتە كرن و ئەوژی هاتە دووپاتكرن كو پێدڤییە دیالۆگ و تێكگەهشتن تنێ رێكا چارەسەركرنا كێشە و ناكۆكییان بیت».