ئه‌ڤرۆ نيوز:
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند ب هه‌لكه‌فتا ئازادكرنا عيراقێ و سه‌رسالا ئێزديان كو دبێژنێ جه‌ژنا سور، ل سه‌رجه‌م دام و ده‌زگه‌هێن هه‌رێمێ دو رۆژ بهێنڤه‌دانن.
سه‌فين دزه‌يى په‌يڤدارێ حوكمه‌تا هه‌رێما كوردستانێ راگه‌هاند رۆژا 9 ڤێ هه‌يڤێ ب ب هه‌لكه‌فتا ئازادكرنا عيراقێ و رۆژا 20 ڤێ هه‌يڤێ ب هه‌لكه‌فتا سه‌رسالا ئێزديان كو دبێژنێ جه‌ژنا سور ل هه‌موو دام و ده‌زگايێن حكومى بهێنڤه‌دانن.
ئه‌ڤرۆ نیوز:
جه‌مال كوچه‌ر جێگرێ سه‌رۆكێ فراكسیۆنا ئێكگرتوو ئیسلامى كوردستان ل جڤاتا نوونه‌رێن عیراقێ، دیاركر كو كوردان كاخه‌زێن گڤاشتنێ ل سه‌ر عه‌بادى یێن هه‌ین وبۆ ڕۆژناما ئه‌ڤرۆ گۆت” كورد د جڤاتا نوونه‌رێن عیراقێ دا ب هێزن و 20% كورسیێن وێ یێن هه‌ین، پێگه‌هێ له‌شكرى مه كوردان یێ هه‌ی و سنوره‌كێ درێژ د ده‌ستێ مه‌دایه ل شه‌ڕێ دژی داعشێ، دیسا كوردان پێگه‌هه‌كێ سیاسى یێ هه‌ی و كوردان پێگه‌هه‌كێ نێڤده‌وله‌تی ژی یێ هه‌ی و و نابیت بهێنه لاوازكرن.
جه‌مال كۆچه‌ری زێده‌تر بۆ ئه‌ڤرۆ گۆت” ئه‌مریكا ب عه‌بادى ڕاگه‌هاندیه كو ب چو ڕه‌نگان نابیت كورد بهێنه پشت گوه هاڤێتن و كورد ڤێ قوناغێ دگرنگن بۆمه و مه ئێك كێشه ل ڕۆژهه‌لاتا ناڤین یا هه‌ی و بۆمه خه‌مه ئه‌وژى شه‌ڕێ دژی داعشێ یه، ئیدارا ئۆبامای دڤێت به‌رى هه‌لبژارتنێن ئه‌مریكا داعشێ بشكێنیت، یان گه‌له‌ك لاواز بكه‌ت و ئه‌ڤه بێ كوردان ناهێته‌كرن و نه مووسل بێ كوردان دهێته ئازادكرن و شه‌ڕ ژی ل گه‌ل داعشێ بێ كوردان ناهێته‌كرن، نه ل عیراقێ و نه ژی ل سووریێ”.
خواكر ژی” كورد ناهێنه پشت گوه هاڤێتن و عه‌بادى ژى گۆتیه كوردان و پشتى گوتارا خوه ل جڤاتا نوونه‌ران خواندی، به‌ر مێزا مه هه‌ر پێنچ فراكسیۆنێن كوردى دا هات و گۆت من سێ وه‌زیر بۆ هه‌وه داناینه و ئه‌ڤه نه سه‌پاندنه وهین دشێن ب گوهۆڕن ب تنێ هنده‌ك ته‌كنوكراتان بۆمه ڤرێكه‌ن”.
دییاركر ژی” مه وه‌زیر و بریكارێن وه‌زیران و بالیۆز و كه‌سانێن له‌شكرى یێن هه‌ین و ئه‌ڤه دستوورى داناینه و هه‌كه گوهۆڕین بهێته‌كرن و ڕێژا مه مسوگه‌ر بوو، دێ داهات مه‌زنتر بیت و دڤێت حوكمه‌تا هه‌رێمێ ب گه‌رمى بهێته سه‌ر هێلێ و هه‌تا به‌رسڤا هه‌رێمێ ڤه‌كێشان ژى بیت، هه‌كه مه پێگه‌هه‌كێ ب هێز هه‌بیت، مه چو ده‌مێ دڤێت ئه‌م دشێین ڤه‌گه‌رین كوردستانێ”.
جه‌مالى هێشتا گۆت” مه پێدڤى ب به‌غدا یا هه‌ی ژ چه‌ند خالان، هه‌تا نوكه مه ل هه‌رێما كوردستانێ بڕیار نه‌دایه، مه پێدڤى پێ هه‌یه هه‌تا بڕیارێ دده‌ین، چونكی دڤێت ژێكڤه‌بوونا مه و عیراقێ یا قانوونى و دستوورى بیت، ژ به‌ر كو دبیت وه‌لاتێن زلهێز قه‌بوول نه‌كه‌ن و هه‌كه ب شه‌ڕ ژێ ڤه‌بین و جیران دوژمن بن و هه‌ڤپه‌یمان نه ڕازیبن ژ مه، دێ كه‌ڤینه ئاریشه‌كێ، هه‌تا هه‌كه سه‌ربخوه‌یێ ژى وه‌ربگرین وببینه ده‌وله‌ت، بلا جیرانیا مه یا خوه‌ش بیت و نه هه‌موو ده‌مان شه‌ڕ بیت، چونكی مه ده‌رگه‌ه ئازاد نینن، هه‌ر جارا ئه‌و هه‌ر چار وه‌لاتێن ده‌وروبه‌ر خوه بكه‌نه ئێك، دشێن مه برسی بكه‌ن”.
ئاماژه دا” بۆچوونه‌ك دناڤ سه‌رۆكێن فراكسیۆنان و كه‌سانێن شاره‌زا و ئالیێن سیاسى هه‌یه كو ئه‌و پێرابوونێن عه‌بادى دكه‌ت، دو بۆچوون ل سه‌ر هه‌نه، بۆچوونه‌كا هه‌ى كو ئه‌و پێرابوون ددستوورى نینن و ب تنێ سه‌رۆك وه‌زیران بمینیت، بۆچوونه‌كا دى یا هه‌ى كو ئه‌و پێنگاڤێن بۆ وان پێرابوونان د قۆناغێن قانوونى دا نه‌هاتیه هاڤێتن و نابیت وه‌زیره‌ك بهێته‌دانان و به‌حسێ هه‌لبژارتنا وى بهێته‌كرن و هێشتا وه‌زیرێ حوكمه‌تا دى دكارى دابیت و ده‌ست ژ كاری نه‌كێشا بیت “.
دیاركر ژی” هه‌كه مه‌ره‌ما عه‌بادى لادانا هنده‌ك كه‌سان و ئالیان بیت، دێ ڕه‌فتار به‌رامبه‌ر مه هه‌بیت، به‌لێ هه‌كه مه‌ره‌ما وى ئاڤاكرنا حوكمه‌ته‌كێ بیت ل گه‌ل نوكه ب گونجیت و ئه‌و مه‌رجێن هه‌ردو بانكێن نێڤده‌وله‌تی و ئیسلامى و نه‌ته‌وێن ئێكگرتى بجهبینیت، پێدڤیه حوكمه‌تا كارا بیت و ژ كه‌سانێن شاره‌زا بیت، وى ده‌مى دبیت به‌ر ب ده‌ست ژ كاركێشانا وێ نه‌چین، هه‌كه مافێ كوردان هاته به‌رزه‌كرن كو دڤێت 20% بیت ژ حوكمه‌تا نوو و مه سێ وه‌زاره‌ت دێ هه‌بن و هه‌كه ئالیێن سیاسى وه‌زیرێن خوه نه گوهۆڕین، ئه‌م ژى ناگوهۆڕین و هه‌كه گوهۆڕین دێ بیته بابه‌ته‌كێ دى، پێنگاڤا دویێ، هه‌كه مه‌ره‌ما عه‌بادى یا دروست نه‌بیت، وى ده‌مى دێ پێگه‌هێ كوردى لاواز كه‌ت و نه‌چارین به‌ر ب هه‌لوه‌شاندنا حوكمه‌تا عه‌بادى بچین”.
ب دیتنا جه‌مال كۆچه‌ری” چو تشت ل ده‌ڤ كوردان ناهێته گوهۆڕین و دبیت وه‌زیر بهێنه گوهۆڕین، به‌لێ نابیت وه‌زاره‌ت بهێنه گوهۆڕین كو سێ وه‌زاره‌تن و هه‌ر ئێكێ وه‌زاره‌ته‌ك ل گه‌ل هاتیه لێكدان و ب تنێ به‌حسێ وه‌زیرى كریه”.
جه‌مالی دیاركر كو كورد ژ وه‌زیرێن خوه درازینه و گۆت” نه‌بوونا بۆدجێ ژلایێ وه‌زاره‌تا دارایى ڤه، نه كێشا وه‌زیرى یه ئه‌و ڕێككه‌فتنه‌كا سیاسى یه و به‌رامبه‌ر په‌ترۆلێ یه و هه‌رێم په‌ترۆلێ بۆ به‌غدا ناهنێریت و به‌غدا ژی بۆدجێ ناڤرێكه‌ت”.
ل دووڤ بۆچوونا جه‌مال كۆچه‌ری” شیعان دڤێت حوكمه‌تا زۆرینه پێكبینن كو ل ده‌سپێكێ هنده‌ك وه‌زیر بهێنه‌دانان كو پێگه‌هێ حزبى یێ وانیێ لاواز بیت ونه ب ڕێیا فراكسیۆنێن كوردى بیت و پێنگاڤا دویێ نه‌شێن چ بكه‌ن، چونكی چ پاره نینه دێ وه‌زیر چ كه‌ت و دڤێت بۆدجه‌كا ب هێز هه‌بیت، له‌وما پشتى ده‌مه‌كى دێ هنده‌ك وه‌زیرێن دى ئینیت و پاشی دێ لاده‌ت وحوكمه‌ته‌كێ پێكئینیت و كا چاوان جێگرێن خوه و یێن سه‌رۆك كۆمارى لاداین و كه‌سه‌كێ نه ئاخڤتى، له‌وما دڤێت هه‌رێما كوردستانێ ب ڕژدى بهێته سه‌ر هێلێ كا دێ چ بریارێ ده‌ت”.
ئه‌ڤرۆ نیوز:
ئه‌ندازیار و شاره‌زا د بوارێ چاندنێ دا كه‌مال جه‌لال عه‌بدولا دیار دكه‌ت كو قه‌یرانا ئابوورى یا ب سه‌ر هه‌رێمێ دا هاتى و نه‌بوونا مووچه‌یان كارتێكرنه‌كا ئێكجار مه‌زن ل سه‌ر كه‌رتێ چاندنێ كریه و لڤینه‌كا به‌رچاڤ ئێخستیه بازارێ چاندنێ ل هه‌رێما كوردستانێ و ب تایبه‌ت ل دهوكێ و گۆت ( به‌لێ ئه‌ڤ چه‌نده ب جوتیارى ب تنێ ناهێته كرن و فه‌ره حوكمه‌تا هه‌رێما كوردستانێ كارێن ڕاسته‌قینه د هنده‌ك خالان دا بكه‌ت و دڤێت ئه‌ڤ پێنگاڤه د ئێكسه‌ر بن ژ بۆ هندێ ببنه هانده‌ر كو بزاڤا چاندنێ به‌رفره‌هتر ببیت و خه‌لكێ مه به‌ر ب چاندنا گوند و زه‌ڤیێن خوه بزڤرن).
شاره‌زاییێ چاندنێ كه‌مال جه‌لال زێده‌تر بۆ ئه‌ڤرۆ دبێژیت” خالا هه‌ره گرنگ كو پێدڤیه بهێته كرن ئه‌وه كو هندى به‌رهه‌مێ خومالى هه‌بیت نه‌هێلن ب چ ڕه‌نگه‌كى به‌رهه‌مێ ژ ده‌رڤه بهێته ناڤا پارێزگه‌هێن هه‌رێمێ، خالا دویێ ژى ئه‌وه كو پارێزگه‌هێن هه‌رێمێ و ب تایبه‌ت پارێزگه‌ها دهوكێ گه‌له‌ك پێدڤى ب كوگه‌هێن ته‌زیكه‌ر هه‌یه ژ بوى كو ل ده‌مێ به‌رهه‌م زێده دبیت، لێ بهێنه هه‌لگرتن و پاراستن دا پیچ پیچه بكه‌ڤیته بازاری”.
كه‌مالی ئه‌و چه‌نده ژى دیار كر كو پێدڤیه حوكمه‌تا هه‌رێمێ پرۆژه‌یێن مه‌زن بۆ چوتیاران دابین بكه‌ت ژبۆ وێ چه‌ندێ كو بشێن د ناڤا ڤان پرۆژان دا كار بكه‌ن، مینا پرۆژێن ب خودانكرنا ئاژه‌لان و كێلگێن مه‌زن یێن چاندنێ وخانیێن پلاستیكى و خانیێن شوشه‌ى و كارگه‌هێن داگرتنێ.
ئه‌ڤ شاره‌زایێ چاندنێ دبێژیت” پێشكه‌فتن ل هنده‌ك وه‌لاتان گه‌هشتیه وێ چه‌ندێ كو پرۆژه‌یێن ژیێ وان دو سال، به‌رهه‌مێ زه‌ڤیێن بیست سالى به‌رهه‌م دئینیت. هیڤیه ئه‌و پێشڤه‌چوون و ئه‌و پێدڤیێن زانستى بگه‌هنه وه‌لاتێ مه ژى و ئه‌م بشێین ب ڕێیا زانستى وه‌لاتێ خوه پێشبێخین ژ لایێ چاندنێ، نوكه ل جیهانێ دو جورێن به‌رهه‌مى هه‌نه ئێك ژ وان به‌رهه‌مێ سروشتى یه و یێ دى ئه‌و به‌رهه‌مه یێ كو ب هورمونان دروست دبیت و دبیت خه‌لك حه‌ز ژ یی هورموناتان ناكه‌ت، به‌لكو حه‌ز دكه‌ت به‌رهه‌مێ سروشتى بخوت و ئه‌و گه‌له‌ك ساخله‌متره”.
ئه‌و چه‌نده ژى دا خویا كرن كو ل دهۆكێ گه‌له‌ك جاران جوتیار و ب تایبه‌ت یێن زه‌ڤیێن مه‌زن هه‌ین، نه‌شێن سوته‌مه‌نیێ بۆ زه‌ڤیێن خوه دابین بكه‌ن، یان ئه‌و به‌رهه‌مێ به‌رهه‌م دئینن بهایێ وێ سوته‌مه‌نیێ نا ده‌ریخیت یێن لێ مه‌زاختین، له‌وما فه‌ره حوكمه‌تا هه‌رێمێ كار ل سه‌ر وێ چه‌ندێ ژى بكه‌ت كو سوته‌مه‌نیان ل سه‌ر جوتیاران به‌لاڤ بكه‌ت، داكو پتر پشته‌ڤانیا جوتیارى بهێته‌كرن .
كه‌مال جه‌لال دبێژیت” ل ئه‌ڤ ساله ب ده‌هان ته‌نێن سێڤێن ده‌ڤه‌را به‌رواری بالا كه‌فتنه ئه‌ردى و خراب بوون و چ مفا ژێ نه‌هاته وه‌رگرتن ل ده‌مه‌كى كو مه كیلۆیا سێڤێن رۆمانى ب هزار هه‌تا دو هزار دیناران دكڕی، بۆچی سێڤان ژ توركیا و ئیرانێ و سووریێ و ئه‌مریكا دئینن، ل ده‌مه‌كى كو سێڤێن مه د بێ خودانن، هه‌كه كوكه‌هێن ته‌زیكه‌ر و كارگه‌هێن داگرتنێ هه‌بان، دا ب هزاران خه‌لك كار كه‌ن و بیته داهاته‌ك بۆ ملله‌تێ مه و دهه‌مان ده‌م دا به‌رهه‌مه‌كێ خومالى و ب تام”.
شاره‌زایێ چاندنێ ئه‌و چه‌نده ژى دیار كر كو دڤێت حوكمه‌تێ به‌رنامه‌یه‌ك هه‌بیت كا دێ چه‌وا به‌رهه‌مى ژ جوتیارى وه‌رگریت و بكارئینیت، ئه‌ردێ مه و جوتیارێن مه و ده‌رچویین كولیژێن چاندنێ هه‌موو هاریكارن كو هه‌رێم بشێت به‌رهه‌مى تێرا خوه و هه‌موو عیراقێ به‌رهه‌م بینیت و ئه‌ڤ چه‌نده دێ بیته ئه‌گه‌ر كو ژێرخانا ئابوورى ل هه‌رێمێ بهێز بكه‌ڤیت و پاره‌یه‌كێ مه‌زن نه‌چیته ده‌رڤه‌ى وه‌لاتى.
هه‌ولێر، قائید میرۆ
شه‌ڤا بۆری هانده‌ره‌كێ یانا ریال مه‌درید ژبه‌ر ده‌ربڕینا كه‌یفخۆشیا خوه بۆ سه‌ركه‌فتنا ریال مه‌درید ترۆمبێلا خوه سووت.
كه‌سه‌كێ نێزیكی روویدانێ ب ئه‌ڤرۆ نیۆز راگه‌هاند” شه‌ڤا بۆری پشتی سه‌ركه‌فتنا یانا ریال مه‌درید بسه‌ر یانا به‌رشلۆنه د یاریا كلاسیكۆدا جه‌ماوه‌رێ یانا ریال مه‌درید رژیانه سه‌ر جاده‌یان ده‌ست و ب ئاهه‌نگێن خوه‌شیێ كرن. ل ناحیا رزگاریا سه‌ر ب قه‌زا خه‌بات روویدانه‌كا ئاگربه‌ربوونێ ژی لێكه‌فت.
ژێده‌ری گۆت ژی” پشتی گه‌نجه‌كێ هانده‌رێ ریال بۆ چه‌ندین جارا ترۆمبێلا دجهدا زڤڕاندی ترۆمبێلا وی ئاگر به‌ربوویئ و ب ئیكجاری سووت.
ئه‌ڤرۆ نيوز:
پشتى عه‌بادى كابينا خوه پێشكێشكرى، كورد ژ پێنگاڤێن عه‌بادى د رازى نينن و كوم دبن و دبێژن نه ژ دوور نه ژ نێزيك ئه‌وان هاش وان كه‌سان نينه يێن ب ناڤێ كوردان هاتينه كانديدكرن و ده‌ربڕينێ ژ فراكسيۆنێن وان ناكه‌ن.
لايه‌نێن سياسى گۆمانێ ژ ئێكدو نابه‌ن د وێ چه‌ندێ دا كو د پشت ئێكدو را كانديدان پێشكێشى عه‌بادى بكه‌ن، ئارام شێخ محه‌مه‌د، جێگرێ سه‌رۆكێ جڤاتا نوونه‌رێن عيراقێ د ڤێ ده‌ربارێ دا راگه‌هاند: “فراكسيۆن هه‌موو يێ ل ڤێره و د راگه‌هاندنێن وان ژى دا يا دياره كو كانديدان پێشكێش ناكه‌ن و ل دوو و نێزيك په‌يوه‌ندى ب وان ڤه نينن”.
پارتى ژى ته‌كست ل سه‌ر وێ چه‌ندێ دكه‌ت كو چو كه‌س د حوكمه‌تا عه‌بادى دا كانديد نه‌كرينه، خسرۆ گۆڕان، سه‌رۆكێ فراكسيۆنا پارتى ديمومكراتى كوردستان ل جڤاتا نوونه‌رێن عيراقێ دبێژيت: “مه ب فه‌رمى چو ناڤ ره‌وانه نه‌كرينه ئه‌و ناڤێن هاتينه جڤاتا نوونه‌ران چ كاك هشيار يان كاك نزار يان ئه‌ڤێن دى ب تنێ نوونه‌راتيا خوه دكه‌ن”.
ئێكگرتوو ئيسلامى كوردستان كو چار كورسى يێن ل جڤاتا نوونه‌رێن عيراقێ هه‌ين، د هه‌ر گوهۆڕينه‌كێ دا داخوازا وه‌زاره‌تان دكه‌ت و جه‌مال كۆچه‌ر سه‌رۆكێ فراكسيۆنا ئێكگرتوو ل جڤاتا نوونه‌رێن عيراقێ دبێژيت: “ژ به‌ر كو دێ گۆڕانكاريێن مه‌زن روو ده‌ن، ئێكگرتوو پۆسته‌ك دڤێت”.
فراكسيۆنا ئێكه‌تيێ ژى عه‌بادى ب كه‌سه‌كێ تاكڕه‌ۆ دزانن، ئالا ته‌له‌بانى سه‌رۆكا فراكسيۆنا ئێكه‌تى نشتيمانى كوردستان ل جڤاتا نوونه‌رێن عيراقێ دبێژيت: “وه‌سان دبينين كو سه‌رۆك وه‌زيران سه‌رپێچى يا ل سه‌ر وان هه‌موو رێكه‌فتن و كۆمبوون و به‌ياننامان كرى كو مه وه‌كو كورد و لايه‌نێن دى ژى د چه‌ند رۆژێن بۆرى دا پێشكێش كرى، دا كو دير ژ ئيرادا مه ناڤ نه‌هێنه گۆتن، به‌لێ ل به‌رچاڤێن هه‌موويان ناڤ ئينان”. گۆتژى: “دشێن ره‌ت بكه‌ت، به‌لێ ئه‌ڤه خوه لادانه ژ پره‌نسيپێن ته‌وافقێ”.
ئه‌ڤه هه‌موو د دده‌مه‌كى دايه كو بڕياره ئه‌ڤرۆ جڤاتا نوونه‌رێن عيراقێ كۆمبوونا خوه يا ئاسايى بكه‌ت.
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا ئێكشه‌مبى رێكه‌فتى 3ى نيسانا 2016ێ هنده‌ك ئه‌ورێن كێم دێ ل ئه‌سمانى هه‌بن و ئه‌ڤه ئه‌وه‌ره دێ زێده بن هه‌تا ل دانێ ئێڤارى دبنه ئه‌ورێن ته‌مام و ب شه‌ڤ ل ده‌ڤه‌رێن چيايى ئه‌گه‌رێن بارينا بارانه‌كا كێم هه‌يه.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ فشارێن بلندێن وه‌لاتێ توركيا و نێزيكبوونا فشارێن نزمێن ده‌ريا ناڤه‌راست بۆ سه‌ر هه‌رێما كوردستانێ دهێته پێشبينيكرن هنده‌ك ئه‌ورێن كێم ل ئه‌سمانى هه‌بن و ئه‌ڤه ئه‌وه‌ره دێ زێده بن هه‌تا ل دانێ ئێڤارى دبنه ئه‌ورێن ته‌مام و ب شه‌ڤ ل ده‌ڤه‌رێن چيايى ئه‌گه‌رێن بارينا بارانه‌كا كێم هه‌يه.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژئاڤا بيت ب ره‌نگه‌كى د ناڤبه‌را 5 هه‌تا 15كم دا و هنده‌ك و ماوێ ديتنێ ژى دێ 10كم بيت، پلێن گه‌رمێ ژى دێ د ناڤبه‌را (7 بۆ 20) پلان دا بيت.
ئەڤرۆ:
لژنا بلند یا رۆژا پاقژیا دھۆکێ، دوھی 30/3/2016 کۆمبوو، تێدا بڕیار ھاتە دان رۆژا دوشەمبیا بھێت 4/4/2016 و ل ژێر درووشمێ (پاقژی گیانێ شەھیدێن کوردستانێ شاد دکەت) وەکو رۆژا پاقژکرنا پارێزگەھا دھۆکێ بۆ ئەڤ سالە ھاتە دەستنیشانکرن و ھەموو دام و دەزگەھێن پارێزگەھێ دێ پشکداریێ تێدا کەن.
ئەندازیار ھەڤال محەمەد، رێڤەبەرێ گشتیێ باژێرڤانیێن پارێزگەھا دھۆکێ د کۆمبوونێ دا دیار کر کو ئەڤە سالا دویێ یە ل پارێزگەھا دھۆکێ ئەڤ ھەوە دھێتە ئەنجام دا، ل سالا بۆری ئەو شیابوون گلێش و بەرمایکێن چەند سالان ڕاکەن و گۆت: “بۆ ئەڤ سالە ژی بڕیارە ل سنوورێ ھەموو باژێرڤانیان رۆژا پاقژیێ بھێتە کرن، ب تایبەت پشتی سەیرانێن بھار و نەورۆزێ ب دووماھی ھاتین ئەو جھێن سەیرانیان قەستکریێ دێ ژ گلێشی ھێنە پاقژکرن”.
ھەروەسا ئەندازیار ھەڤال ئاشکرا ژی کر، کەرستە و پێدڤیێن ھەوا پاقژکرنێ ل چەند جھان دێ ھێنە بەلاڤکرن، وەکو: گەلیێ دھۆکێ، بێسرێ، باجلۆرێ، گەلی کۆرتکی و چیایێ زاوا و پشکدارێن ھەوێ دشێن ل وان جھان وان کەرەستێن پێدڤی دبنێ ب دەستخوڤە بینن.
د لایەکێ دی یێ کۆمبوونێ دا ئەندازیار ئیحسان یەحیا، سەرۆکێ باژێرڤانیا دھۆکێ دیار کر، مەرەم ژ ھەوا رۆژا پاقژیا پارێزگەھا دھۆکێ نە ب تنێ پاقژکرنە، بەلکو ھشیارکرنا وەلاتیانە ژی ل دۆر پاقژیێ و گۆت: “رۆژانە دھۆک دھێتە پاقژکرن و ھژمارەکا زۆر یا گلێشی دھێتە ڕاکرن، لێ ئەڤ رۆژە یا جودایە”.
سەرۆکێ باژێرڤانیا دھۆکێ ئاماژە ب وێ چەندێ ژی کر کو رێکخراوێن نەحکومی و نەتەوێن ئێکگرتی ژی دێ پشکداریێ د ھەوا رۆژا پاقژکرنا پارێزگەھا دھۆکێ دا کەن و گۆت: “ژ بلی سەنتەرێن قەزا و ناحیان، کەمپ ژی دێ ھێنە پاقژکرن، و خواست ھەموو لایەن و دەزگەھێن ڕاگەھاندنێ ل گەل د ھاریکار بن بۆ سەرکەفتنا ڤێ رۆژێ”.
ئه‌ڤرۆ نيوز:
فراكسيۆنێن كوردستانى ل په‌رله‌مانێ عيراقێ ئێڤاريا ئه‌ڤرۆ رۆژا ئه‌ينى رێكه‌فتى 1ى نيسانا 2016ێ ل سه‌ر چه‌ند خالێن گرنگ كۆمبوون دا كو دانوستاندنێ بكه‌ن و بگه‌هنه چه‌ند خالان ژ بوو كۆمبوونا سوبه‌هى يا جڤاتا نوونه‌رێن عيراقێ دا كو بێخنه به‌ر سه‌رۆكاتيا جڤاتا نوونه‌ران.
ب گۆره‌ى پێزانينان كۆمبوونا فراكسيۆنێن كوردستانى ماوێ دو ده‌مژمێران ڤه‌كێشايه و رێكه‌فتينه ل سه‌ر چه‌ند خالان و گرنگترين ژى ئه‌وه د چارچۆڤێ وان گورانكاريان ژى ئه‌وان دڤێت عه‌بادى ب خوه ژى بهێته گوهۆڕين.
نيشاندان