ئەڤرۆ نيوز:
جێگرێ سەرۆکێ حوکمەتا ھەرێما کوردستانێ راگەھاند، ژ بەر داکەفتنا بھایێ پەترۆلێ، حوکمەتا ھەرێمێ دێ ھەژمارەکا پشکێن کەرتێ کارەبێ فرۆشیتە کۆمپانیێن کەرتێ تایبەت.
قوباد تالەبانی بۆ ئاژانسا رۆیتەرز دیار کر، پشتی کێمبوونا دەمژمێرێن کارەبێ ل ھەرێمێ، حوکمەتێ دەست ب دانوستاندنان ل گەل کۆمپانیێن کەرتێ تایبەت کریە، داکو چەند پشکێن کەرتێ کارەبێ بفرۆشیتە وان و گۆت:( د گەلەک واران دا دێ کارئاسانیێ بۆ کەرتێ تایبەت کەین، لێ ب مەرج و ھووردەکاری).
ئەڤرۆ نيوز:
ل گۆر راپۆرتەکا رۆژناما واشنتۆن پۆست سەرۆکێ ئەمریکا باراک ئۆباما دوھی بریار دا کو سزایێن ئابووری یێن ل سەر ئیرانێ بھێنە راکرن و د چارچۆڤێ راکرنا سزایێن ئابووری ژی دا ئیران دشێت فرۆکێن مەدەنی ژ ئەمریکا بکڕیت و کۆمپانیێن فرۆکەڤانیێ یێن ئەمریکی ژی بەرھەڤیا خوە دیار کرینە کو فرۆکان بفرۆشنە ئیرانێ، ئەو یەک ژی ب پێنگاڤەکا گرنگ بۆ باشترکرنا پەیوەندیێن ئیرانێ و ئەمریکا دھێتە دیتن و دھێتە چاڤەرێ کرن کو وەلاتێن ئێکەتیا ئورۆپا ژی دەست ب کارێ بازرگانی و پرۆژێن مەزنێن ئابووری ل گەل ئیرانێ بکەن.
د بەردەوامیا راپۆرتێ دا ھاتیە دیار کرن کو پشتی ٣٧ سالان ئیران دێ شێت ب رەنگەکێ ئازاد ھەڤبەستێن بازرگانی ل گەل ئەمریکا و وەلاتێن ئورۆپا ئیمزا کەت و ئەو یەک دێ بیتە ئەگەر کو پێگەھێ ئابووری یێ ئیرانێ گەلەک ب ھێز بیت، چونکو ل گۆر رێککەڤتنا ئیرانێ ل گەل وەلاتێن ٥+١ ئیرانێ سۆزێن خوە بجە ئیناینە و ژ بەر ھندێ ژی وەلاتێن ئورۆپا و ب تایبەتی ژی ئەمریکا دێ سزایێن ئابووری ل سەر ئیرانێ راکەن و ئەو یەک دھێتە واتەیا دەستپێکرنا قۆناغەکا نوو د پەیوەندیێن ھەر دو ئالیان دا.
ل ئالیێ دی پرانیا دەزگەھێن راگەھاندنا ئیرانێ راکرنا سزایێن ئابووری یێن ل سەر ئیرانێ ب پێنگاڤەکا گەلەک باش دبینن و داخوازێ ژ حوکمەتێ دکەن کو پێداچوونەکێ د شێوەیێ گرێبەستێن نەفتێ دا بکەت دا کو ئیران نەبیتە ئەگەر کو بھایێ نەفتێ پتر بھێتە خوارێ، بەری نھا ژی ھژمارەکا زێدە ژ پەرلەمانتارێن ئیرانێ نەرازیبوونا خوە ل ھەمبەر سیاسەتا نەفتێ یا ئیرانێ دیار کربوون و داخواز ژ سەرۆک کۆماری کربوون کو د بیاڤێ نەفتێ دا چو ھەڤرکیان ل گەل سعوودیێ و وەلاتێن دی نەکەن، چونکو ئەو یەک دێ زیانا خوە بۆ وەلاتیێن ئیرانێ ھەبیت.
ئەڤرۆ نیوز:
ئەمریکا بنگەھەکێ مەزن یێ سەربازی ل نێزیک باژێرێ قامشلۆ ل رۆژئاڤایێ کوردستانێ ئاڤا دکەت و چاڤدێرێن سیاسی ژی دیار دکەن کو ئاڤاکرنا وێ بنگەھێ بۆ رێگرتنا دەستێوەردانێن تورکیا و ھەروەسا بۆ رێگری ژ دەستێوەردانێن روسیا ھاتیە ئاڤاکرن و ئەو یەک دێ بیتە ئەگەرێ ب ھێزبوونا کوردان ل سووریا.
ل گۆر راپۆرتەکا مالپەرێ نێرینا ئازاد یا کوردی بەرپرسەکێ سەربازی یێ ھێزێن سووریا یا دیموکراتیک دیار کریە کو ئەمریکا دەست ب ئاڤاکرنا بنگەھەکێ سەربازی ل نێزیک باژێرێ قامشلۆ یێ رۆژئاڤایێ کوردستانێ کریە و ئەو بنگەە نێزیکی سنۆرێ تورکیا یە و مەرەم ژ ئاڤاکرنا وی بنگەھی ژی ئەوە کو ئەمریکا دڤێت پتر ھاریکاریا کوردان بکەت، چونکو بەرپرسێن ئەمریکی دبێژن یێن شیاینە ل سووریا و عیراقێ شەرێ داعشێ بکەن کوردن و دڤێت ئەم پتر ھاریکاریا وان بکەین و ئاڤاکرنا بنگەھەکێ سەربازی یێ ئەمریکا ل نێزیکی قامشلۆ دێ بیتە ئەگەر کو کورد گەلەک ب ھێز کەڤن.
د بەردەوامیا راپۆرتێ دا ھاتیە دیار کرن کو سەمیر حافز بەرپرسەکێ تورکمانان ل سووریایێ ژی دیار کریە کو ئەمریکی وەسا ھزر دکەن تنێ کورد ئەڤرۆکە شەرێ داعشێ دکەن، ئەو نێرینا ئەمریکیان گەلەک یا شاشە و ھەکە ئەمریکا بەردەوام ھاریکاریا کوردان بکەت ئەو یەک دێ ئالۆزیێن ل دەڤەرێ مەزنتر کەت، چونکو دەمێ کورد ب ھێز بن ھاریکاریا تورکمان و خەلکێن دی نەھێتە کرن دێ ئاریشێن نوو دروست بن و ژ بەر ھندێ ژی دڤێت ئەمریکا بزانیت تورکمان ژی ئەڤرۆکە ل سووریایێ شەرێ داعشێ دکەن و دڤێت ئەمریکا ھاریکاریا تورکمانان ژی بکەت.
ل ئالیێ دی جێگرێ سەرۆکێ گشتی یێ پارتیا کۆماریا گەل سەزگین تانری کولو ژی راگەھاند کو تورکیا بەرھەڤی بۆ ھندێ دکرن دا کو دەستێوەردانێ ل رۆژئاڤایێ کوردستانێ بکەت، لێ ئەمریکیان ئەو یەک زوو دیت و نھا ژی بنگەھەکێ سەربازی ئاڤا دکەن و ب ئاڤاکرنا بنگەھێ سەربازی ل قامشلۆ تورکیا ئێدی نەشێت خوە نێزیکی رۆژئاڤا کەت و ئەمریکا دڤێت خوە پتر نێزیکی کوردان دکەت و نەھێلیت کو روسیا کاریگەریا خوە ل سەر کوردێن سووریایێ زێدەتر لێ بکەت و گۆت: (ئەمریکا و گەلەک وەلاتێن جیھانێ کوردان وەک قارەمانێن شەرێ ل دژی داعشێ دبینن و ژ بەر ھندێ ژی نھا ھاریکاریا کوردێن عیراقێ دکەن و دیارە دێ ھاریکاریا وان بۆ رۆژئاڤا ژی بەرفرەھتر لێ ھێت، ژ بەر ھندێ ژی دڤێت تورکیا سیاسەتا خوە ل ھەمبەر کوردێن سووریا بگوھۆریت و وەک ھەڤال و ھەڤپەیمانێن خوە ببینیت و ئێدی دژبەریا وان نەکەت).
چاڤدێرێن سیاسی ژی دیار دکەن کو ئەمریکا دڤێت ب رێیا ئاڤاکرنا وی بنگەھی ھەم پتر ھاریکاریا کوردان بکەت و ھەم ژی نەھێلیت روسیا دەستێوەردانێ د کاروبارێ رۆژئاڤایێ کوردستانێ دا بکەت و دخوازیت پتر خوە نێزیکی کوردان بکەت و ئەو یەک د بەرژەوەندیا کوردان دایە، چونکو ب ئاڤاکرنا بنگەھەکێ سەربازی یێ ئەمریکا ل رۆژئاڤایێ کوردستانێ دێ پێگەھێ کوردان د بیاڤێ سیاسی و سەربازی دا ل سووریایێ مەزنتر لێ ھێت و ھەکە کورد سیاسەتەکا راست و دروست برێڤە ببەن دێ شێن مفایەکێ باش ژ ھاریکاریێن ئەمریکا وەرگرن و ھەرێما رۆژئاڤایێ کوردستانێ ئاڤا کەن، لێ ژ بۆ ھندێ ژی دڤێت بەری ھەر تشتەکێ ھەر دو جڤاتێن کوردی یێن رۆژئاڤایێ کوردستانێ ناکۆکیێن د ناڤبەرا خوە دا ل سەر بنەمایێ دانوستاندنان چارە بکەن و دڤێت پێشمەرگێن رۆژئاڤا ژی د زووترین دەم دا بچنە رۆژئاڤایێ کوردستانێ، چونکو ب چوونا وان دێ پێگەھێ کوردان گەلەک ب ھێزتر لێ ھێت و دێ ئەمریکا ژی پتر ھاریکاریا کوردان کەت.
ئه‌ڤرۆ نيوز:
وەزیرێ وزێ یێ تورکیا راگەھاند کو ئەو د مژارا وزێ دا نە گرێدایێ روسیا نە و پێدڤیێن وزێ دێ ھەتا دو ھەیڤێن دی چارە بکەن و ژ ھەرێما کوردستانا عیراقێ پێدڤیێن خوە دابین کەن و گۆت: (ھەرێما کوردستانا عیراقێ بۆ مە گەلەکا گرنگە و نە ب تنێ د وارێ وزێ دا بەلکو د وارێن سیاسی، بازرگانی و سیاسی دا ژی ھەڤکار و ھەڤپەیمانێ مەیە).
بەرات ئالبایراک وەزیرێ وزە و وزێ یێ تورکیا د داخویانیەکێ دا راگەھاند کو سزایێن روسیا یێن د وارێ وزێ و بازرگانی دا زیان نەگەھاندیە تورکیا و بەدیلێ بازارا فرۆشتنا کەلوپەلێن تورکیا و کڕینا گازا سروشتی و پەترۆلێ ھاتیە پەیدا کرن و گۆت: (تورکیا خوەدان ئابووریەکا گەلەکا مەزنە و د پێنج سالێن بۆری دا ئابووریا مە ژ پرانیا وەلاتێن ئورۆپا زێدەتر مەزن بوویە و بۆ ڤێ چەندێ ل ھەمبەر ھەر سزایێن ئابووری مە گەلەک بەدیل ھەنە و کەس نەشێت ببیتە ئاستەنگ ل ھەمبەر پێشکەڤتنێن مە و ژ خوە د وارێ گازا سروشتی و پەترۆلێ دا پێدڤیێن مە دێ ل ھەرێما کوردستانا عیراقێ ھێنە دابینکرن و ھەرێما کوردان ل ھەرێمێ ھەڤپەیمانەکا مە یا ب ھێزە و ئەم دێ د ھەر واری دا ل گەل کوردان پەیوەندیێن خوە گەھیننە ئاستێ ستراتیژی).
وەزیرێ وزێ یێ تورکیا ھەروەسا راگەھاند ژی وەلاتێن وەک روسیا و ئیران بۆ گوھۆرینا دیمۆگرافیا رۆژھەلاتا ناڤین و ب دەست خستنا ھێلێن وزێ خەباتێن گەلەک مەزن دکەن و سووریێ بۆ خوە وەک مەیدانا شەری دبینن و گۆت: (نھا ھەری زێدە مەترسیا داعشێ ل سەر ئێمناھیا وەلاتێن رۆژھەلاتا ناڤین ھەیە، لێ د ھەمان دەمی دا پلانێن ڤەشارتی یێن روسیا و ئیرانێ ژی بۆ رۆژھەلاتا ناڤین جھێ مەترسیێنە و ھەردو وەلات دخوازن شەرێ مەزھەبی دەرخینن و بنگەھێن وزێ یێن ل سووریێ، یەمەنێ، لیبیا و وەلاتێن عەرەبی بێخنە ژێر کۆنترۆلا خوە و د بجە کرنا پلانێن خوە دا ژی تورکیا وەک ئاستەنگ دبینن و بۆ ڤێ چەندێ دخوازن ب سزایێن ئابووری و وزێ مە بێدەنگ بکەن، لێ بەرھەڤیێن مە تەمامن بۆ ژناڤبرنا ھەموو پیلانێن تاری یێن ل سووریێ و رۆژھەلاتا ناڤین دا).
ل دۆر سەربخوەبوونا ھەرێما کوردستانێ ژی بەرات ئالبایراک وەزیرێ وزێ یێ تورکیا راگەھاند کو ھەرێما کوردستانێ پشکەکە ژ عیراقێ و وێ مافی نادەنە خوە دەستێوەردانێ د رەوشا ناڤخوە یا عیراقێ دا بکەن و گۆت: (پرسا راگەھاندنا دەولەتا کوردی ل عیراقێ پرسەکا ناڤخوەیی یا عیراقێ و ھەرێما کوردستانێیە و ھەر دەمێ وان بریارا خوە دا ئەم دێ رێزێ لێ بگرین و ژ خوە د دستوورا عیراقێ دا کورد پشکەکا ھەری گرنگ یێ عیراقێ نە و د دەربارێ پاشەرۆژا خوە دا چ بریارێ بدەن و راگەھینن ئەم دێ رێزێ ل بریارا وان بگرین، ھەر چەندە وەک تورکیا ئەم دخوازن ئێکەتیا ئاخا عیراقێ پاراستی بیت، لێ دەمێ ئەو ل ھەڤ بکەن و خوە جودا بکەن ئەم نەشێین دەستێوەردانێ د بریارا وان دا بکەین).
ل دۆر پرسا کوردی ل باکورێ کوردستانێ ژی وەزیرێ وزێ یێ راگەھاند کو حوکمەتا وان بۆ چارەکرنا پرسگرێکا کوردی گەلەک پێنگاڤێن گرنگ ھاڤێتن و داخوازیێن وەلاتیێن کورد بجە ئیناینە و گۆت: (حوکمەتا مە پرسگرێکا سەد سالی یا کوردی چارەکریە، لێ ھندەک ئالی ب تایبەت ژیPKK و HDP ناخوازن پێنگاڤێن کو مە ئاڤێتیە ببینن و ھەردەم بۆ بجھکرنا بەرنامێن وەلاتێن بیانی کار کرینە و د قۆناغا ئاشتیێ دا ژی مە ب دلسۆزی پێنگاڤ ئاڤێت، لێ PKK و HDP باژێرێن مە تژی چەک و تەقەمەنی کرینە و ئەڤرۆ ژی ل ژێر ناڤێ شەرێ خەندەکان باژێران وێران دکەن و وەلاتیێن کورد دکەنە قوربانی و بۆ ڤێ یەکێ ژی حوکمەتا رژدە PKK و یێن سەر ب وێ ب تەمامی ژناڤ ببەت).
د داویا ئاخڤتنا خوە دا ژی بەرات ئالبایراک وەزیرێ وزێ یێ تورکیا راگەھاند کو د مەھا سباتێ دا دێ ل گەل شاندەکێ بلند سەرەدانا ھەرێما کوردستانا عیراقێ بکەت و ل گەل سەرۆک و سەرۆک وەزیرێن ھەرێما کوردستانێ ھەڤدیتنان ئەنجام بدەت و گۆت: (د بەرنامێ مە دا ھەیە ھەیڤا بھێت سەرەدانا ھەرێما کوردستانێ بکەین و ھژمارەکا پرۆژێن وزێ، بازرگانی و ئابووری ئیمزا بکەین و ئێدی ب کریاری دەست ب ڤەگوھاستنا گازا سروشتی ژ ھەرێما کوردستانێ بکەین و د سەرەدانا خوە دا ئەم دێ ل گەل بەرێز مەسعود بارزانی سەرۆکێ ھەرێما کوردستانا عیراقێ و سەرۆک وەزیران و وەزیرێ وزێ کۆم ببین و بۆ پاشەرۆژەکا گەش پێکڤە پێنگاڤان ب ھاڤێژین).
ئه‌ڤرۆ نیوز: ڤه‌ده‌ر ره‌شاڤایی:
وه‌ك گاڤه‌ك بۆ راكرنا سزایێن ئابۆریێن لسه‌ر ئیرانێ هاتییه سه‌پاندنا باراك ئۆباما یه‌رۆكێ ئه‌مریكا بریار دا رێگرتنێ لسه‌ر فرۆتنا فرۆكێن رێڤینگ هه‌لگر ب ئیرانێ راكه‌ت.
هه‌روه‌سا ئه‌مریكا بریارا لێخۆشبوونێ بۆ 7 زیندانێ، ئیرانی لده‌ڤ ئه‌مریكا دا ل هه‌مبه‌ری ئازادكرنا 4 زیندانیێن ئه‌مریكی لده‌ڤ ئیرانێ كو دو ژ وان خودان جوته ره‌گه‌زناما ئیرانی و ئه‌مریكی نه.
ئه‌ڤه دده‌مه‌كی دایه تێ پێشبینیكرن ئاژانسا وزه‌یا ئه‌تۆمی یا نه‌ته‌وێن ئێكگرتی د چه‌ند رۆژێن داهاتی دا راپۆرتا خوه لسه‌ر به‌رنامی ئه‌تۆمیێ ئیرانێ به‌لاڤكه‌ت، هه‌كه‌ر یا ئه‌رێنی بیت و دیاركه‌ت كو ئیران یا ب رێككه‌فتنا 5+1 پێگیره ئێدی دێ پرۆسا راگرنا سزایێن مه‌زنێن ئابۆری كو لسه‌ر ئیرانێ هاتینه سه‌پاندن ده‌ستپێكه‌ت و ئابۆرا ئیرانێ دێ گه‌له‌گ پێشڤه‌چیت.
ئه‌ڤرۆ نیوز: ڤه‌ده‌ر ره‌شاڤایی:
قوباد تاله‌بانی جێگرێ سه‌رۆك وه‌زیرێن هه‌رێما كوردستانێ بۆ ئاژانسا رویته‌رز یا نووچه‌یان دا خویاكرن كو ئه‌و پێشبینی ناكه‌ت د سالا 2016 ێ دا مووسل بهێته ئازادكرن.
تاله‌بانی گۆت: ئه‌ز د وێ باوه‌رێ دا نینم ئۆپه‌راسیۆنا ئازادكرن مووسل د ئه‌ڤ ساله دا بهێته كرن” هه‌روه‌سا گۆت: هێزێن ئیراقی نه د ئاماده‌نه بۆ ڤێ ئۆپه‌راسیۆنێ و هه‌ڤپه‌یمانییا نێڤده‌وله‌تی ژی باوه‌ری ب شیانێن هه‌مییان نینه دده‌مێ پێدڤی دا بۆ ڤێ ئۆپه‌راسیۆنێ ، له‌ورا یا بزه‌حمه‌ته به‌ری 2017 ێ ئۆپه‌راسیۆن بهێته ئه‌نجامدان”
ئه‌ڤرۆ نیوز: ڤه‌ده‌ر ره‌شاڤایی:
عه‌بدولا كوردی بابێ ئالان كوردی لدۆر ئه‌و كارتۆنێ ژ ئالیێ كۆڤارا شارلی ئێبدۆ یا فره‌نسی ڤه لدۆر كورێ وی ئالان كوردی به‌لاڤكری گۆت كو: كاره‌كێ “نه‌مرۆڤانه و بێ ره‌وشتانه یه”.
عه‌بدولا كوردی دیاركر كو خه‌مبارییا وی یا نها پتره ژ وێ خه‌مبارییا وی لده‌مێ مرنا ئالانی خاری.
پشتی چه‌ند كۆچبه‌ران ده‌ستدرێژییا سێكسی كرییه سه‌ر چه‌ند ژنێن ئه‌لمانی، كۆڤارا شارلی ئێبدۆ كاریكاتێره‌ك چێكرییه و وه‌سا نیشان دده‌ت كو هه‌كه‌ر ئالان كوردی نه مربا دا لدووڤ ژنێن ئه‌ورۆپی كه‌ڤيت دا ده‌ستدرێژیێ بكه‌ته سه‌ر.
ئه‌ڤرۆ نیوز ب باشتر دیت وی كارتۆنی به‌لاڤ نه‌كه‌ت.
ئه‌ڤرۆ نيوز:
د كۆمبوونا دوهى يا جێگرێ سه‌رۆكێ حوكمه‌تا هه‌رێمێ و ئێكه‌تيا مامۆستايان و رێڤه‌به‌ريا په‌روه‌ردان دا، بڕيار دا بهێنڤه‌دانا وه‌زرێ ئێكێ يێ خواندنێ هاته درێژكرن.
ئه‌حمه‌د عه‌بدولا زوبێر، به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت:كو كۆمبوونا دوهى يا 15ى كانوونا دويێ 2016ێ قوباد ته‌له‌بانى جێگرێ سه‌رۆكێ حوكمه‌تێ و پشتيوان سادق، وه‌زيرێ په‌روه‌ردێ ل حوكمه‌تا هه‌رێما كوردستانێ بڕيار هاته دان بهێنڤه‌دانا وه‌زرێ ئێكێ يێ خواندنێ بۆ ماوێ چار رۆژێن دى بهێته درێژكرن.
گۆتژى: رۆژا شه‌مبى رێكه‌فتى 23ى كانوونا دويێ يا 2016ێ ده‌واما وه‌رزێ دويێ يێ خواندنێ ل سالا خواندێ يا 2015 بۆ 2016ێ يه.
به‌رى نوكه وه‌زراره‌تا په‌روه‌ردێ رۆژا 14 بۆ 19ى كانوونا دويێ يا 2016ێ كربوو بهێنڤه‌دان و نوكه بهێنڤه‌دان بۆ 23ى كانوونا دويێ هاته درێژكرن.
ئه‌ڤرۆ نيوز:
به‌نكا ناڤه‌ندى يا عيراقێ راگه‌هاند، يه‌ده‌كێ دارايى يێ وه‌لاتێ ب تنێ به‌هرا شه‌ش هه‌يڤان دكه‌ت، ژ به‌ر هندێ ل به‌ره ئه‌ڤ ساله كۆژمێ دو مليار دۆلاران، سه‌نه‌دا نيێڤده‌وله‌تى ده‌ربكه‌ن.
عه‌لى عه‌لاق پارێزگارێ به‌نكا ناڤه‌ندى ل عيراقێ د داخۆيانيه‌كێ دا بۆ رۆژناما “المغرب اليوم” گۆت: “يه‌ده‌كێ دارايى يێ وه‌لاتى به‌هرا شه‌ش هه‌يڤان ب تنێ دكه‌ت”، ئاماژه ب وان بزاڤان ژى كر يێن بۆ قه‌رزكرنێ ژ دامه‌زراوێن نێزده‌وله‌تى د پێناڤى پركرنا كورتئينانا دارايى دا گرتينه به‌ر.
پارێزگارێ به‌نكا ناڤه‌ندى ل عيراقێ وه‌لاتى پشت راست كرن كو چو مه‌ترسيه‌ك بۆ بلندبوونا بهايێ دۆلارى ل به‌رامبه‌ر دينارێ عيراقێ ل پێش نينه، ئاماژه ب ده‌ركرنا سه‌نه‌دا ناڤخۆى ژى كر كو ب ب هايێ پێنج مليار دۆلاران هه‌تا پاره‌يێ ده‌وله‌تێ فه‌راهم بيت.
گۆتژى: “به‌نكا ناڤه‌ندى دو جاران هندى دراڤێ ناڤخۆى ل بازارى، دراڤێ بيانى يێ هه‌يى و ئه‌ڤا د چه‌ند رۆژێن بۆرى دا روودايى، هنده‌كا كربوو د به‌ريكێن خوه دا و ده‌ستێن دژى ل پشت هه‌بوون كو من نه‌ڤێت بچمه ناڤ هوورده‌كاريان، چونكو ئه‌وى حاله‌تى چو ده‌سته‌واژه‌كا سرۆشتى ل پشت نه‌بوو، ل گه‌ل هندێ ژى به‌رامبه‌ر سياسه‌تا به‌نكا ناڤه‌ندى ئه‌وان شكه‌ستن خوار”.
ل دووڤ گۆتنا پارێزگارێ به‌نكا ناڤه‌ندى يا عيراقێ قه‌بارێ دۆلارى بگه‌هيته چ ئاست، ئه‌و دشێن ل دووڤ داخوازيا وى بچن و ژ به‌ر هندێ هه‌ر مه‌ترسيه‌ك ل سه‌ر درۆستبوونا كارتێكرنێ ل بهايێ خه‌رجيان نينه.
عه‌لاق ئاماژه ب يه‌ده‌كێ دارايى يێ عيراقێ ژى كو نوكه نێزيكى 68 مليار دۆلارايه و قه‌بارێ يه‌ده‌كێ دينارى ژى ب نێزيكى 40 ترليۆن ديناران دياركر.
نيشاندان